deurlopende formatiewe assessering in skriftelike stelwerk in graad 5

By die kind en onderwyser ontwikkel ‘n gewillige betrokkenheid tot die leerproses. Hierdie
benadering staan in skerp kontras met die tradisionele skryfklas en het as doelstelling die
verandering van gesindheid teenoor skryf as ‘n komponent van taalonderrig by leerlinge
sowel as onderwysers, die aanmoediging van skryf oor die kurrikulum en die algemene
bemagtiging van leerlinge, wat hulle in staat stel om demokraties in die klaskamer op te tree.
Rohman (in Emig, 1990:1) argumenteer dat “… writing is usefully described as a process,
something which shows continuous change in time like growth in organic nature”.
Korrigering van foute kan later aandag geniet soos wat die leerder se vertroue toeneem. Arndt
(1987:117) beskryf die proses as ‘evolusionêr’ in die opsig dat dit beweging van een stadium
na ‘n ander behels. Iets wat nie daar was aan die begin nie word nou geproduseer of
voortgebring deur ‘n reeks operasies wat geleidelike verandering behels. Conner (1987:677)
sê dat die prosesbenadering onderrigstrategieë vir intervensies en ontdekking sowel as die
doel en konteks van die skryfproses oorweeg. Harrison (in Silva, 1990) karakteriseer die
teoretiese proses as “… diverse, flexible and still emerging”.
Voorstanders van die prosesbenadering beklemtoon die rekursiewe aard van die skryfproses
en integrerende aktiwiteite daarvan. Voorafskryf, konsepskryf, hersiening, redigering,
evaluering en publisering beklemtoon die rekursiewe aard van die proses en integrerende
aktiwiteite waarby die leerlinge betrokke raak (McKensie en Tomkins 1984). Voorafskryf
verwys na die aktiwiteite wat konsepskryf voorafgaan. Dit beteken meer spesifiek die
insameling van informasie, lees, besluitneming en aktiwiteite soos vlugskrif. Konsepskryf
behels die eerste skryfpogings en interaksie met ander leerlinge of die onderwyser, en kan
aktiwiteite soos vryskryf en vlugskrif insluit. Dit behels egter alles wat ter voorbereiding
gedoen word. Hersiening geskied in elke fase, selfs in die voorafskryffase, terwyl redigering
verwys na die suiwering van die stuk van tegniese foute in grammatika, spelling, formatering,
ensovoorts. Baie vroeg al, selfs by voorafskryf, moet die leerlingskrywer oor sy/haar gehoor
besluit. As die leerders weet wie hul gehoor is, wend hulle ‘n groter poging aan om hul beste
te doen.
Die skryfproses is nie linier nie. Dit sal die idée van skryf as ‘n proses weerspreek. Die
skrywer is betrokke in die skepping van daardie proses en die verfyning daarvan. Die
skryfproses is voltooi as die afgeronde stuk gepubliseer word.
25