deurlopende formatiewe assessering in skriftelike stelwerk in graad 5

Ek sluit af met die volgende opmerking van Carr en Kemmis (1986: 199)
… the only theory that can be compelling for a practitioner’s own
practice is the theory developed in his or her own self-reflection. Other
theories may be provocative, interesting, plausible or arresting but they
only become compelling when they are authentically understood and
critically evaluated in the self-reflection of the practitioner.
5.8 EPILOOG
‘n Belangrike bydrae wat hierdie tesis, myns insiens, gelewer het, was om te bewys dat
DFASS deur middel van die prosesbenadering tot skryf alle leerders bevoordeel. Die studie
het leerders met verskillende leervermoëns betrek en al die leerders se werk het verbeter met
behulp van die verskillende assesseringsstrategieë wat toegepas was. Assesseringsstrategieë
word duidelik uiteengesit in die WKOD (2003:8-11) se Assesseringsriglyne vir die
Algemene-Onderwys-En-Opleidingsband (Graad R tot 9).
Fraser (1997:117) argumenteer dat assessering bewyse moet genereer en leerders se
bevoegdhede moet oordeel teenoor spesifieke beskrywings of aanvaarbare bewyse of kriteria.
Die prosesbenadering tot skryf maak voorsiening vir veelvuldige hersienings of weergawes.
Daar was dus genoeg bewyse gelewer waarvolgens leerders geassesseer kon word. Die
tradisionele weergawe vir skriftelike stelwerk sou nie die nodige bewyse voorsien het om
DFASS toe te pas nie. Die prosesbenadering tot skryf vorm nou deel van die HNKV en
leerkragte moet nou die nodige transformasie in hul praktyke teweegbring. Fraser (1999: 117)
brei verder uit deur te sê dat die assesseerder na spesifieke kriteria verwys en deur middel van
spesifieke assesseringsstrategieë byvoorbeeld portuur-, self-, of leerkrag, bewyse ingesamel
moet word om vas te stel hoe leerder kriteria baasraak.
Die doel van leer en onderrig is om leerders te help om te groei en te ontwikkel.
Ontwikkeling op sigself is die doel van opvoeding. Taylor en Marienau (1997: 239)
argumenteer so: “… assessment appear to be developmental because they encourage the kind
of self-reflection and perceptual shift that define higher orders of consciousness.” Assessering
moet dus hierdie proses van groei en ontwikkeling ondersteun. Assessering is dus nie neutraal
of ‘n doel op sigself nie, maar funksioneer as ‘n instrument vir leer. Dit is ‘n uiters belangrike
agent of meganisme in die konstruksie van bevoegdheid (Fraser, 1999:117). Om dit te bereik,
108