deurlopende formatiewe assessering in skriftelike stelwerk in graad 5

Soos ek die verskillende weergawes nagesien het, kon ek die verbetering in hul werk van die
konsepweergawes tot die finale produk waarneem. Die prosesbenadering, tesame met die
verskillende assesseringstrategieë en terugvoering het hulle instaat gestel en gemotiveer,
sodoende het hulle werk verbeter sonder dat hulle daarvan bewus was. My kollega wat
waargeneem het, het tot dieselfde slotsom gekom soos hy deur die verskillende weergawes
gewerk het. Hulle werk het verbetering getoon in taalbeheer, logiese volgorde van sinne en
koherensie. ‘n Hoë graad van verbetering was duidelik.
5.6.2 Aksienavorsing is ‘n tydrowende maar bevrydende proses
Deur middel van refleksie kan daar nou ‘n plan van aksie ontwikkel word om diegene met
probleme met remediëring te help. Aksienavorsing gee jou die geleentheid om jou leerders se
leerprobleme te identifiseer en remediërende programme in plek te stel. Dit is ‘n tydrowende
proses, maar beslis die moeite werd om te onderneem.
5.7 AANBEVELINGS
5.7.1 Verbetering en verandering in die leer- en onderrigsituasie kan deur
middel van aksienavorsing bewerkstellig word
My studie het gefokus op skriftelike stelwerk en dit was ‘n groot sukses in my klas. Ek kan
egter nie sê dat dit met dieselfde sukses in ander leerareas toegepas sal kan word nie omdat
my studie slegs gefokus het op die leerarea Afrikaans as Eertse Taal. Wat ek wel met groot
vrymoedigheid kan aanbeveel, is dat indien ‘n leerkrag ‘n probleem in haar klas ondervind,
dit deur middel van aksienavorsingondersoek kan word. ‘n Mens sal aangenaam verras wees
met al die antwoorde wat jy sal kry en die lig wat gewerp sal word op kwessies wat jou
aangaande sekere leerders pla. Jou begrip ten opsigte van die leerders verbeter, en jy vind
presies uit waartoe hulle instaat is. Gissings omtrent leerders word uit die weg geruim.
Soos enige nuwe teorie het ek aan die begin gesukkel. Ek was onseker en verward. Na die
eerste siklus het ek ‘n deeglike refleksie gehad en probeer om die dinge wat my pla sover as
moontlik uit te sorteer. Met die aanbreek van die tweede siklus het ek baie van my probleme
uitgestryk en dit het toe baie beter gegaan.
106