deurlopende formatiewe assessering in skriftelike stelwerk in graad 5

dit beter is om die leerders die leiers van die groepe te maak omdat hulle werklike
ondersteuning aan hulle maats kan gegee. Groepe was dus sover as moontlik so saamgestel
en daar was baie beter samewerking binne groepe. Sodra leerders besef dat hulle werklike
ondersteuning kry en nie deur maats in die verleentheid gestel gaan word nie, ontspan hulle
en begin hulle om hul idees by te dra. Omdat die leerders meer ervare was in die skryfproses
kon hulle in werklike gesprek tree met hul maats ten opsigte van die komponeringsproses.
Hulle kon argumenteer en voorstelle maak oor watter sinne beter inpas en watter woord of
frase meer gepas was. Soos ek rondbeweeg het, kon ek die insetsels hoor. Selfs die leerders
wat nie so bedrewe in die skryfproses was nie en vir wie skryf vrees was, was gelukkig in die
groepe. Hulle kon nie wag om hul werk vir my te wys nie.
Leerders het nie onmiddellik met eerste weergawe verbeter nie, maar het met die
daaropvolgende weergawes hulle werk elke keer verbeter.
5.5 BEVINDNGS TEN OPSIGTE VAN DIE REFLEKTIEWE LEERKRAG
5.5.1 Dataversameling is belangrik in die proses van reflektering
Boud, Keogh en Walker (1985:19) som refleksie vir my so raak op met die volgende woorde:
“Reflection is an important human activity in which people recapture their experience, think
about it, mull it over and evaluate it. It is this working with experience that is important in
learning.” Soos ek reeds gemeld het, het dit moeilik aan die begin gegaan, want jy weet nie
as jy die regte rigting ingeslaan het nie. Ek was dus genoodsaak om op verskillende stadiums
stil te staan en te reflekteer op die ondervinding wat ek tot op daardie stadium opgedoen het
en om te sien of dit wat ek doen, relevant was. Ek het my joernaalinskrywings as ‘n
instrument gebruik waarin ek kon reflekteer ten opsigte van die manier hoe ek die studie my
klaskamerpraktyk en die leerproses verstaan.
5.5.2 Refleksie onderskraag self-ontwikkeling
Refleksie onderskraag self-ontwikkeling. Soos ek die prosesbenadering geïmplimenteer het,
het ek saam met my leerders die nuwe informasie geassimileer en dit deel gemaak van my
bestaande kennis. As leerkragte is ons ook leerders en word uitgedaag deur die onderrig- en
leerondervinding waarin ons betrokke is. Refleksie fasiliteer ‘risk-taking’ in die
onderrigproses. Ek moes ook my weerbaarheid ontbloot op dieselfde manier soos ek my
104