'n Ondersoekende studie na die verband tussen leesvaardighede ...

gedurende die jaar geskryf om te bepaal of leerders die inhoud bemeester het
om na die volgende graad of standerd te vorder. Hierdie toetsing het van
leerders verwag om op ‘n papegaaiagtige wyse vir die kort termyn inhoud te
memoriseer.
‘n Ander probleem waarmee skole te doen kry, is dat hulle nou gelyktydig met
twee baie uiteenlopende stelsels binne die onderwys werk. Veral die hoërskole
word huidiglik volgens twee uiteenlopende stelsels bedryf, naamlik die
Algemene Onderwys en Opleidingsband (AOO) en die ou stelsel (Graad 10, 11
en 12). Dit skep ‘n probleem omdat die bestaande matriekeksamen wat leerders
aflê aan die einde van hul skoolloopbaan hoofsaaklik inhoudsgebaseerde
assessering is (Nelson, 1999:20).
Die fokus van hierdie studie is ‘n ondersoek na leerders wat vanaf die AOO in
Graad 9 na Graad 10 vorder en akademiese leerprobleme in lees toon as gevolg
van vaardigheidsleemtes om dan strategieë vir die bevordering van effektiewe
onderrig en leervaardighede te identifiseer om leerderprestasie te verbeter.
2.8.3 Definisie en groepering van leerprobleme volgens die Suid-
Afrikaanse HNKV Graad R-9
Die Suid-Afrikaanse HNKV Graad R-9 (Departement van Onderwys, 2002a)
dui aan dat enigiets wat in die leerder se pad staan of wat die leerder daarvan
weerhou om ten volle deel te neem en te leer kan in werklikheid gesien word as
‘n leerstoornis of leerprobleem. Dit is belangrik om te onthou dat leerstoornisse
nie noodwendig die hele tyd bestaan nie, maar dat dit soms skielik kan ontstaan,
as gevolg van ‘n verandering in omstandighede, emosionele trauma en ‘n
verskeidenheid ander faktore soos vermeld sal word in onderstaande paragraaf.
Die Departement van Onderwys (2002b) brei ook verder uit dat leerstoornisse in
vier groepe ingedeel kan word, naamlik:
• Sistematiese leerstoornisse, byvoorbeeld ‘n gebrek aan basiese en
toepaslike leerondersteuningsmateriaal, hulpmiddele/planne, ontoereikende
geriewe by skole en oorvol klasse;
59