'n Ondersoekende studie na die verband tussen leesvaardighede ...

HOOFSTUK 5
SAMEVATTING, GEVOLGTREKKINGS EN
AANBEVELINGS
5.1 INLEIDING
Die fokus van die navorsingstudie was om die verband tussen leesvaardighede
en leerdervordering in ‘n Afrikaans medium hoërskool in die Wes-Kaap,
spesifiek Graad 10 na te vors. Die navorsing het ook gepoog om strategieë te
identifiseer vir die bevordering van effektiewe leesonderrig en
leerdervaardighede om leerderprestasie te verbeter.
In hierdie hoofstuk word die fokus ook bespreek soos verkry is deur die
bevindinge van die studie. Die gevolgtrekking, interpretasie en aanbevelings
van die empiriese data volg hierna. Die tekortkominge van hierdie studie word
uitgewys en aanbevelings word gemaak vir toekomstige navorsing. Die
samevatting verwys na die sterktes van hierdie studie.
5.2 HERSIENING VAN DIE DOELSTELLING EN DOELWIT VAN
DIE STUDIE
Die Suid-Afrikaanse opvoedingstelsel het die weg van transformasionele UGO
begin volg en dit behels die radikaalste vorm van ‘n geïntegreerde kurrikulum.
Dit beteken dat daar net een kurrikulum sal wees waartoe alle leerders die reg
van toegang sal hê naamlik ‘n Inklusiewe Onderwys en Opleidingstelsel. Dit
het daartoe gelei dat hierdie navorsingstudie vier doelwitte bevat, soos vermeld
in hoofstukke een en drie, om data te bekom om die huidige
onderrigbenaderings van lees en leer te verbeter.
Die vyfde doelwit van die studie het beoog om aanbevelings te maak vir die
bevordering van leerondersteuningsmaatreëls. Die Inklusiewe Uitkomsgebaseerde
Onderwys benadering was in hierdie studie ook van belang, omdat
145