OPENBARING Die storie agter die storie van die boek ... - Nuwe Wyn

OPENBARING
Die storie agter die storie van die boek, Openbaring
Geskryf deur
Christo Nel

Inhoud
Openbaring (A) As alles rondom jou swart is... .................................................................. 3
Openbaring (B) Onthou, dit is profesie dié! ........................................................................ 5
Openbaring (C) Lees dit deur die bril van die Ou Testament .............................................. 7
Openbaring 1(A) As ons weer Jesus leer raaksien ... ........................................................... 9
Openbaring 1(B) Jesus, die Seun van die mens ... ............................................................. 11
Openbaring 2(A) Waar is die liefde dan ... ........................................................................ 13
Openbaring 2(B) Arm en tog ryk! ..................................................................................... 15
Openbaring 2(C) Weier om kompromie te sluit oor reg en verkeerd ... ............................ 17
Openbaring 2(D) Pasop vir die Isebel onder julle ... ......................................................... 19
Openbaring 3(A) Word wakker julle wat slaap ... ............................................................. 21
Openbaring 3(B) Mense wat mekaar en ander liefderyk vashou ....................................... 23
Openbaring 3(C) Maak asseblief vir My oop! ................................................................... 25
Openbaring 4(A) Om God op die troon te sien.................................................................. 27
Openbaring 4(B) Met krone op ons kop dien ons Hom ..................................................... 29
Openbaring 5 Daar wag iets beter voorkant toe! ............................................................... 31
Openbaring 6 Die seëls word oopgebreek ......................................................................... 33
Openbaring 7 ‘n Skuilplek midde al die ellende ................................................................ 35
Openbaring So lyk die groter, breër prentjie! .................................................................... 37
Openbaring 8 Oppad ... ...................................................................................................... 39
Openbaring 9(A) Innerlike pyniging ... ............................................................................. 41
Openbaring 9(B) Die duiwel is letterlik hier tussen ons los .............................................. 43
Openbaring 10 Wees My getuies!...................................................................................... 45
Openbaring 11 Lyke in die strate ....................................................................................... 47
Openbaring 12 Oorlog teen die draak ................................................................................ 49
Openbaring 13 Sien die een agter al die maskers raak ...................................................... 51
Openbaring 14 In Jesus is ons meer as oorwinnaars.......................................................... 53
Openbaring 15 Saam met die kore gelowiges sing ons op die strand ................................ 55
Openbaring 16 Sewe bakke vol verskrikking .................................................................... 57
Openbaring 17 ‘n Prostituut op haar laaste reis ................................................................. 60
Openbaring 18 Hierdie seepbel gaan bars ......................................................................... 62
Openbaring 19 Die storie oor twee vroue .......................................................................... 64
Openbaring 20 Vrede midde al die chaos .......................................................................... 66
Openbaring 21 So lyk die bruid ......................................................................................... 68
Openbaring 22 Kyk, Ek kom gou! ..................................................................................... 70

Openbaring (A) As alles rondom jou swart is...
Skielik was Hy net daar: Jesus, die Koning van alle konings! Daar tussen die pikswart steenkoolroet
in daardie steenkoolmyn waar hy van vroegmôre tot vroeg-saans soos 'n slaaf gewerk het. Johannes
vertel self: "Op die dag van die Here is ek deur die Gees meegevoer en ek het agter my, so hard soos
die geluid van ‘n trompet, ‘n stem hoor sê: 'Skrywe wat jy sien in ‘n boek op en stuur dit vir die sewe
gemeentes: Efese, Smirna, Pergamum, Tiatira, Sardis, Filadelfia en Laodisea.'
Ek het omgedraai om te sien wie dit is wat met my praat. En toe ek omgedraai het, het ek sewe goue
staanlampe gesien en tussen die lampe Iemand soos die Seun van die mens. Hy het ‘n lang kleed
aangehad en ‘n goue band om sy bors gedra. Die hare op sy kop was wit soos wit wol, soos sneeu, en
sy oë het soos vuur gevlam. Sy voete was soos geelkoper wat in ‘n smeltoond gloei, en sy stem soos
die gedruis van ‘n groot watermassa. In sy regterhand het Hy sewe sterre gehad, en ‘n skerp swaard
met twee snykante het uit sy mond uit gekom. Sy hele voorkoms was soos die son wat op sy
helderste skyn.
Toe ek Hom sien, het ek by sy voete neergeval en bly lê soos een wat dood is. Hy het toe met sy
regterhand aan my gevat en vir my gesê: "Moenie bang wees nie, dit is Ek, die Eerste en die Laaste,
die Lewende. Ek was dood en, kyk, Ek lewe tot in alle ewigheid; en Ek het die sleutels van die dood
en die doderyk. Skrywe nou op wat jy gesien het, wat nou daar is en wat hierna gaan gebeur" (Op.
1:10-19).
Vir hoevele gelowiges is die boek Openbaring hierdie "geslote boek". Tot jy die eintlike Boodskap
agter hierdie profetiese beelde ontdek in die Persoon van Jesus wat ons geskiedenis binnege-"val"
het en wat weer sal kom om ons bestaan volkome te maak.
Maar kom ek begin die storie agter die storie hieroor 'n bietjie voor hierdie gebeure: in
Desembermaand, 69 n.C. om meer presies te wees. Meer as 37 jaar het verby gevlieg sedert die
kruisiging en opstanding van Jesus Christus. Nero was dood en Vespasius word offisieel met groot
fanfare aangekondig as die nuwe Keiser van Rome (69 tot 79 n.C.). Tien jaar later vra dringende sake
egter sy aandag in Alexandrië, wat maak dat hy sy oudste seun, Titus, aanstel om, terwyl hy weg van
Rome is, die militêre hoof te wees (79 tot 81 n.C.). In 81 n.C word Vespasius se jongste seun,
Domitianus, die Keiser van die Romeinse Ryk (81 tot 96 n.C.). En dit is hierdie Domitianus wat
Johannes, die apostel, dan verban na die eiland Patmos (93 tot 96 n.C.) as gevolg van sy getuienis dat
Jesus die Christus en enigste ware Koning is.
Patmos is 'n klein eilandjie van omtrent 13 kilometer by 8 kilometer. Daar word Johannes gedwing
om saam met die ander prisoniers elke dag in die steelkoolmyne te werk. En daar verskyn Jesus, die
Christus, aan hom in merkwaardige profetiese visioene oor die koms van Sy Koninkryk en Sy finale
triomf oor die koninkryk van die duisternis op Planeet Aarde.
Laat ons mekaar net eers daaraan herinner dat sedert Sy kruisiging en opstanding in 32 n.C., was
Jesus Christus reeds die nuwe Koning op Planeet Aarde! Maar nou moes elke mag, heerskappy en
elke mens op hierdie aarde hierdie boodskap hoor en geleentheid kry om te kies om dit ook te glo (1
Kor. 15:20-28). Daarom moet ons intussen bly bid tot dit gebeur: Here, laat U Koninkryk kom!
Deur Sy genade en die kragwerking van die Heilige Gees sou daar oor die eeue heen oral tekens en
glimse daarvan wees van wat dit beteken as en waar Hy dan die nuwe Koning is. Maar alles is en bly
steeds "voorlopig", "net die begin" daarvan. Die finale glorie en volle werklikheid daarvan was nog
op pad en wag êrens in die toekoms op ons. Daarom noem Johannes die visioene wat hy daar
gesien het: "die profetiese openbaringe van Jesus, die Christus". En teken hy vir ons Jesus as die

Koning van konings en Here van here, wat op pad is. Wat reeds in die hemele sit op Sy troon om
binnekort, finaal, Sy plek ook op aarde op Sy troon te kom inneem. Verstaan mooi, Hy het reeds alle
magte oorwin, maar hier op aarde, waar die vyand steeds vasklou aan sy heersersposisie, moet
hierdie oorwinning "afgedwing word". Hier is daar 'n oorlog aan die gang tot en met elke knie
uiteindelik finaal voor Hom sal buig, en elke tong, finaal, Hom sal erken en bely as die Verlosser,
Koning en Here (1 Kor. 15:23-28).
Kom ons verstom ons vir 'n paar weke aan alles wat Johannes vir ons oor Hom, Jesus, ons Verlosser
en Here, in hierdie profetiese visioene openbaar. Ja, dat Hy die Here en Hoof van die ekklesia, die
wêreldwye kerk oor alle tye, is (Op. 1-3). Maar ook die Koning van die konings, wie se Koninkryk
stelselmatig en finaal kom (Op. 4-22).
Luister hoe getuig Johannes oor wat hy gesien het. "Wat hier volg, is deur Jesus Christus
geopenbaar. God het die openbaring oor wat binnekort moet gebeur, vir Hom gegee om aan sy
dienaars bekend te maak. Jesus het toe sy engel gestuur om sy dienaar Johannes dit alles te laat
sien. Johannes is die getuie van wat God gesê en wat Jesus Christus bevestig het; hy getuig van alles
wat hy gesien het. Geseënd is die een wat die woorde van hierdie profesie lees, en die mense wat
dit hoor en wat ter harte neem wat daarin geskrywe staan, want die eindtyd is naby" (Op. 1:1-3).
Daarom hoor ons Johannes sê: "Van Johannes. Aan die sewe gemeentes in die provinsie Asië.
Genade en vrede vir julle van Hom wat is en wat was en wat kom, en van die sewe Geeste voor sy
troon, en van Jesus Christus, die geloofwaardige getuie, die eerste wat uit die dood opgestaan het,
die heerser oor die konings van die aarde. Uit liefde vir ons het Hy ons deur sy bloed van ons sondes
verlos en ons sy koninkryk gemaak, priesters vir God sy Vader. Aan Hom behoort die heerlikheid en
die krag tot in alle ewigheid! Amen. Kyk, Hy kom met die wolke, en al die mense sal Hom sien, ook
hulle wat Hom deurboor het; en al die volke van die aarde sal oor Hom in selfverwyt weeklaag. Ja,
dit is seker! 'Ek is die Alfa en die Omega,' sê die Here God, Hy wat is en wat was en wat kom, die
Almagtige" (Op. 1:4-8).

Openbaring (B) Onthou, dit is profesie dié!
G'n wonder sovele gelowiges sê die boek Openaring is vir hulle 'n duister boek vol
onverstaanbaarhede nie! 'n Mens kan so maklik verstrik raak tussen die detail van die magdom
verklarings van al die beelde wat jy in die honderde boeke daaroor op die rak van winkels kry. En as
baie van hierdie boeke boonop "vergeet" dat ons hier met profesie te make het, voorspel dit net
verdere misverstand!
En tog, die oomblik as die boodskap van hierdie boek in jou hart tuiskom, is dit asof jy die hele
wêreld en skepping om jou, en die lewe as sulks, in 'n nuwe lig sien. Hoe sê die een skrywer: dit is
asof die son skielik in die nag vir jou opgekom het!
Nie dat 'n mens daarmee verwaand wil sê dat jy elke detail en vers daarin gemaklik vir mense kan
verklaar nie. Dit bly immers profetiese woorde waarmee God van Sy kant af die werklikheid om ons
van die verlede, hede en toekoms, vir ons teken. Uiteraard sien ons slegs 'n "raaiselagtige beeld
deur 'n dowwe spieël (vgl. 1 Kor. 13:12).
Mag ek sommer hier ter aanvang erkenning gee aan die deeglike studie van Tiaan Jordaan in sy
boek, "Openbaring vandag", wat die honderde en honderde eksegetiese verklarings en boeke oor
hierdie Bybelboek deurgewerk het, en op wie se materiaal ek sterk steun in my "storie" hieroor.
'n Wêreld breek vir 'n mens oop as jy raaksien dat ons in die boek, Openbaring, te make het met
profesieë wat in sewe parallelele dele bymekaar gesit is, naamlik hoofstuk 1 tot 3; 4 tot 7; 8 tot 11;
12 tot 14; 15 tot 16; 17 tot 19; en 20 tot 22.
Sonder om in die detail verstrik te raak of te probeer om elke dingetjie of elke beeld in hierdie 22
hoofstukke vir jou te probeer verduidelik, wil ek probeer om vir jou die basiese storie agter die
detail-verhaal in hierdie "aksiefilm met sy sowat 22 tonele" oor die volgende paar weke saam te vat.
Maar kom ek vat hierdie keer, in my oë, kardinaal belangrike dinge raak wat ons regte verstaan van
hierdie materiaal sal help verseker. Soos dat hierdie hele boek geskryf is in wat bekend was as
"apokalipties profetiese taal". Groot woorde wat maar net beteken dat dit "apokalipties" van aard
is, naamlik dat dit, soos die Griekse woord "apokalupsis" sê, wil "onthul" wat werklik agter die
skerms aan die gebeur is, nou en in die toekoms. En die manier hoe dit gedoen word is deur 'n
storie agter die storie vir die eerste lesers te vertel deur hierdie "askie-film vol bekende simbole en
beelde". Om hulle, en natuurlik elke ander gelowige oor die eeue wat kom, te vertroos, te versterk
en te bemoedig, soos 1 Kor. 14:3 immers sê die hart en bedoeling van profesie is.
Ons het dus hier met simboliek te make, waarmee die waarheid, dit wat werklik aan die gebeur was
en wat gaan gebeur, kom wat wil, vir ons in beelde geteken word.
So sien ons, word die bestaande wêreld geteken in die greep van die Bose. Die aarde is Satan se
gevegsterrein, en tot onlangs "sy koninkryk en bevelsgebied". Waarin hy, met sy bose strategieë en
agente, Jesus Christus, die nuwe Koning en God self, se gesag uitdaag en Sy gehoorsame volgelinge
op aarde wil vernietig.
Vir ons as gelowige mense lyk alles pikdonker en staar ons ons telkens blind teen die realiteite van sy
intense en demoniese aanslag op ons. En dit is net God wat met 'n profetiese woord uit Sy hart oor
wat werklik aan die gebeur is, vir ons geloof en hoop en 'n opwindende toekoms kan laat sien.

Vir die ekklesia wat oral in krisis verkeer, midde die haglike omstandighede van vervolging en lyding
waar hulle ookal hulle bevind, kan net God deur 'n woord van Hom af, vir ons 'n venster oopmaak
om ons te help sien hoe dinge aan die einde in die hemel reeds lyk. Om ons te help "sien" wat reeds
vir God 'n werklikheid is.
Vir Hom het al hierdie dinge "reeds gebeur". So help Hy ons bid deur Sy Gees: Vader, laat U wil
geskied, soos in die hemel ... net so ook op die aarde! Dit help ons glo en verseker weet: God bly
deurgaans in beheer. En dit gee ons nuwe energie om enduit te kan volhard.
Skielik verstaan ons dat twee werklikhede hier voor ons afspeel: die gewoon-daaglikse geskiedenis
en gebeure van elke dag, maar ook 'n ander geskiedenis agter die skerms, daar waar ons nie met ons
gewone oë kan sien nie. Daar agter die skerms is 'n dodelike stryd aan die gang tussen die magte
van die Bose (met sy agente op aarde) en God en sy hemelse magte ter wille van die heil van die
ware gelowiges in die wêreld wat volhard.
In hierdie Bybelboek word nie doekies omgedraai nie. Alles word in suiwer geloofstaal vertel.
Midde die aanvegtinge van elke dag op hierdie stukkende aarde vol stukkende mense waar
verskriklike dinge met ons gebeur. En dit word vir gelowiges vertel wat ongeduldig wag op God se
dramatiese ingrype, midde vervolging deur 'n stelsel wat vir hulle "'n dier" geword het. Met trane in
hulle oë van al die seer en die pyn in en om hulle, wag hulle ongeduldig op die waar-word van
daardie finale woede, oorlog en oordeel, wat 'n volmaakte einde 'n werklikheid gaan maak, wat ons
in geloof weet op pad is!
Deurgaans hoor ons God se troos en bemoediging. Dat Hy aan elkeen, wat midde dit alles gelowig
volhard en so die oorwinning gaan behaal, 'n spierwit steentjie gaan gee met 'n nuwe naam daarop
geskryf (Op. 2:7). Soos destyds die gewoonte was tussen vriende, om vir mekaar sulke wit
vriendskaps-klippies te gee. Om vir jou, elke keer as jy daaraan vat, of dit tussen jou vingers vrywe,
te verseker: Jou God en Hemelse Vriend gee vir jou om! Hy sal jou nooit in die steek laat nie. Jy kan
jou maar op Hom beroep, kom wat wil!

Openbaring (C) Lees dit deur die bril van die Ou Testament
Het jy geweet dat daar in die boek Openbaring meer as 400 verwysings na die Ou Testament is?
Dit is te verwagte as God profeties met gelowiges wou praat wat die Ou Testament en sy beelde ken.
Hulle sou immers verstaan as Hy sekere Ou Testamentiese beelde gebruik om simbolies met hulle te
praat oor die storie agter die storie. Vir Johannes se eerste lesers was die taal van die openbaringe
van Openbaring dus glad nie raaisels of onverstaanbaar nie. Wel vir die Romeinse gemeenskap en
owerheid rondom hulle. Vir hulle sou dit soos vermomde taal wees, wat eers "ge-dekodeer" moes
word om verstaan te word.
As ek en jy die boek Openbaring met al sy simboliek en beelde vandag lees, moet ons dit deur die
bril van die Ou Testament lees. Dit sal ons help om nie in die strik te val - soos sovele predikers en
sogenaamde kenners van hierdie boek - om te probeer om hierdie boek uit te lê asof dit in die jaar
2000 geskryf is, in beelde wat mense soos ons vandag alleen sou verstaan nie. Hoe kan ons dink dat
die sprinkane waarvan ons hier lees, sou dui op vegvliegtuie en dat die skerpioene missiele sou
wees! Of hoe kan ons sommer sê die getal 666 dui op die sogenaamde "smart card", of die
staafkodes wat op produkte vandag verskyn! Of dat Babilon op die Rooms Katolieke Kerk sou dui!
Dit mag wel alles sensasioneel vir die luisteraar in die jaar 2009 klink, maar watter boodskap sou dit
dan hê vir die eerste hoorders van hierdie profesieë in Johannes se tyd?
Al hierdie sogenaamde "moderne uitlegte", wat probeer om “aktueel” te wees, maak net almal om
ons bang! En dit terwyl die doel van die boek (en profesie as sulks) eintlik is om gelowiges te
vertroos en in moeilike omstandighede moed, hoop en rigting te gee.
Die boek Openbaring wil nie 'n "doomsday" film wees nie! Nee, dit wil doodgewoon in simboliese
taal, wat elke gelowige wat die Ou Testament goed ken sal verstaan, presies dieselfde boodskap
vertel as waaroor die res van die Bybel handel. Bloot op 'n ander manier: deur simbole te gebruik,
woord-prentjies, as jy wil.
Hoe sê ons altyd: 'n goeie prentjie is beter as 'n duisend woorde! Dit is soos toe NP van Wyk Louw
Jesus Christus se menswording in sy Feesgedig beskryf het as die "Visarendjie van God". In daardie
beeld hoor 'n mens iets van die kenmerkende duikslag van die visarend en Jesus Christus se
"neerplons" in ons sondige wêreld om mense soos visse te kom vang (d.w.s. om hulle te "red", soos
daar in Mat. 13:47 staan).
Simboliek maak dit vir ons moontlik om sake wat moeilik in woorde uitgedruk kan word, in diepte
raak te vat en dramaties helder te teken. Dink maar aan die engele wat op trompette blaas om van
die rampe aan te kondig waarvan ons in hierdie boek lees. Die simboliek is duidelik: 'n trompet
kondig gebeure aan, maar is ook 'n oproep om gereed te wees. Dit sê dat God uit die hemel
aankondig dinge gaan gebeur, kom wat wil, en dat ons gereed daarvoor moet wees. En as dit nodig
is, moet ons wakker skrik en moet ons betyds na Hom toe terugkeer.
Verder moet dit ons troos met die wete, wat ookal gebeur, God bly totaal in beheer. Al lyk dit soms
asof alles buite beheer is en asof die vyand, of die natuur, of wat ookal, 'n vry hand het. Dit is nie die
waarheid nie. God bly altyd in beheer. Hy is immers die Een wat die engele opdrag gee om die
trompette te blaas wat al hierdie gebeure en dinge aankondig.
Ook die getalle waarvan ons oral in die boek Openbaring lees, moet in hierdie sin verstaan word: as
simbole. Hierdie getalle is nie lukraak gekies nie. In Johannes se tyd, en veral in die Joodse

gemeenskap van destyds, het die simbolieke waarde van getalle in 'n fyn wetenskap ontwikkel (die
sg. "gematria").
Dit word duidelik as ons, byvoorbeeld, van die "sewe geeste van God" lees. Dit kan tog nie beteken
dat daar sewe afsonderlike Heilige Geeste is nie. Die getal 7 is doodgewoon ‘n samestelling van 3
(wat op die Drie-eenheid dui) en 4 (wat die vier windrigtings en dus op die hele wêreld om ons
aandui). So kom ons dan baie maklik uit by die verklaring dat 7 dui op dit wat volmaak is; waarby
niks bygevoeg kan word nie; wat totaal omvattend is en waar niks weggelaat word nie. God se Gees
is dus oral. In alle windrigtings is Hy in Sy volmaakte almag en liefde teenwoordig en aan die werk.
Net so, as daar 7 briewe geskryf word aan 7 gemeentes, is dit dus God se profetiese Woord aan Sy
hele ekklesia oor alle tye uiteindelik. Sodat almal wat dit lees, sy dit die eerste lesers of ons in 2009
en later, by God self hoor wat in en met die ekklesia daar in Klein-Asië destyds, maar ook oor die
wêreld gebeur en gaan gebeur.
Soos wat ons die boek in sy simboliese taal teen die agtergrond van sy eerste lesers lees, maar ook in
die lig van die gebeure vandag om ons probeer verstaan , kan God se Gees dit gebruik om
bonatuurlik die sluier van ons oë en verstand weg te trek. Sodat ons kan sien wat God sien.
Dit sal ons weer hoop gee ... Dat God kan en gaan ingryp. Dat omstandighede kan en gaan
verander. Dat 'n beter môre en oormôre verseker voorkant toe op ons wag!
Ja, om ons is dit moeilik en hard en soos in 'n oond! Maar God is en bly ten volle in beheer. En vir
diegene wat Hy liefhet SAL alles ten goede meewerk ... (Rom. 8:26).

Openbaring 1(A) As ons weer Jesus leer raaksien ...
Vir die eerste lesers van die boek, Openbaring, het die inhoud van hierdie boek soveel troos gebring.
Elke dag moes hulle voor 'n Romeinse owerheid buig. Oral om hulle is daar geëis, ongeag watter god
jy ook aanbid, dat alle burgers die keiser as god moes eer en aanbid. Een keer per jaar moes elke
burger voor 'n magistraat verskyn, 'n bietjie wierook brand, en sê: Die keiser is here! Eers dan het jy
'n dokument ontvang wat sê dat jy 'n lojale burger is.
Behalwe hierdie uiters ongemaklike keuse wat jy elke jaar moes maak waar jy ookal gewoon het in
die Romeinse ryk, was daar nog die uitdagings op die markplein ook. So moes elke werker êrens
inskakel by 'n werkersgilde (of vakbond, as ons modern daaroor sou dink) van sy betrokke beroep of
vakgebied. Om dit te doen, was jy gedwing om te buig voor die beskermgod van daardie betrokke
beroep of vakgebied en moes jy meedoen aan die gereelde feesmaaltye ter ere van daardie god.
Wat meestal gepaard gegaan het met orgies en die eet van kos wat aan daardie god gewy was.
Gehoorsame volgelinge van Jesus kon eenvoudig nie hieraan meedoen of hierby aansluit nie. En dit
het beteken dat die gildes jou oral uitgewerk het of vervolg het. Christengelowiges kon gevolglik nie
sommer werk kry nie en het gevolglig baie keer verarm.
Jy sal dus verstaan as ek sê: vir die eerste lesers van hierdie boek was gehoorsaam-Christen-wees
elke dag 'n stryd tussen lewe en dood. Goedkoop trooswoorde sou nie vir hulle help nie. Nie as jy
dag vir dag voor die werklikheid van diskriminasie, vervolging, of die steenkoolmyne op Patmos, soos
vir Johannes, of selfs 'n brandstapel of 'n kruis staan nie. Net omdat jy gehoorsaam Christus wou
volg en getrou wou bly aan die Evangelie.
Daarom kan ek en jy nooit die boek Openbaring anders lees as in die lig van 'n brandstapel se
vlamme waarop 'n gelowige van die pyn lê en krul en reg maak om te sterf nie. Want dit sou ons
help om die rede te verstaan waarom daar hierdie onverstaanbare blydskap en vreugde op die gesig
van die martelaar ook tog was ...
Hoe kan dit anders? Hulle het immers Jesus, die Christus, die Koning van alle konings gesien! Die
Iemand .... tussen die sewe lampe! (Op. 1)
Luister hoe teken Johannes Hom: "Ek het omgedraai om te sien wie dit is wat met my praat. En toe
ek omgedraai het, het ek sewe goue staanlampe gesien en tussen die lampe Iemand soos die Seun
van die mens. Hy het ‘n lang kleed aangehad en ‘n goue band om sy bors gedra. Die hare op sy kop
was wit soos wit wol, soos sneeu, en sy oë het soos vuur gevlam. Sy voete was soos geelkoper wat
in ‘n smeltoond gloei, en sy stem soos die gedruis van ‘n groot watermassa. In sy regterhand het Hy
sewe sterre gehad, en ‘n skerp swaard met twee snykante het uit sy mond uit gekom. Sy hele
voorkoms was soos die son wat op sy helderste skyn. Toe ek Hom sien, het ek by sy voete neergeval
en bly lê soos een wat dood is. Hy het toe met sy regterhand aan my gevat en vir my gesê: "Moenie
bang wees nie, dit is Ek, die Eerste en die Laaste, die Lewende. Ek was dood en, kyk, Ek lewe tot in
alle ewigheid; en Ek het die sleutels van die dood en die doderyk ..." (Op. 1:12-18).
Vriende, 'n ontmoeting met 'n lewende, opgestane Jesus Christus verander jou lewe. Gee jou moed
om aan te gaan. Troos jou as jou gehoorsaamheid aan die evangelie en aan Hom as enigste Here in
jou lewe, vir jou en jou kinders te min kos op die tafel, of verguising in julle woonbuurt, of selfs
tronkstraf, of die dood, sou beteken.
Mag God se Gees hierdie woord gebruik om jou weer te help om Jesus in Sy hemelse heerlikheid
raak te sien!

Ja, ons ken en praat gedurig oor Hom as die Man van smarte en die Mens aan die kruis. Maar Hy is
lankal nie meer net dit nie. Hy is nou die Een wat opgestaan het uit die dood, wat opgevaar het na
die hemel, waar Hy as die Koning van alle konings op die troon sit en totaal in beheer is.
Sien iets raak van Sy majesteit. As die groot en magtige Skepper van alle dinge (vgl. Joh. 1:3). As die
Koning van die konings aan die regterhand van Sy Hemelse Vader wat in die hoë hemel sit (Heb. 1:3;
Op. 1:5).
Immanuel. God met ons. God wat in ons woon deur Sy Gees. Wat in en deur Sy teenwoordigheid,
genade, liefde en krag by ons is, en in ons midde aan die werk is. Om ons te troos, te bemoedig en
tot oorwinning te lei.
Hy is immers die Een wat rondbeweeg tussen ons ... tussen die lampe ... in die gemeentes van ware
gelowiges wêreldwyd.
As jy Hom raaksien en herken, is dit eintlik soos om in die son te kyk met jou blote oë. Verblindend
en oorweldigend.
Dit is net God se Gees wat jou hiertoe kan "meevoer". Wat jou, midde die harde werklikheid van
elke dag om jou, midde al die seer en die pyn, vir jou 'n kykie kan gee van hoe dit alles lyk van God se
kant af ... En wat jou help om raak te sien dat die lewe en die toekoms in Sy hande is!
Daarom kan ons weet: ons is veilig!

Openbaring 1(B) Jesus, die Seun van die mens ...
Probeer vir jouself die toneel voorstel: Jy hoor 'n stem agter jou, hard, maar terselfdertyd ook
strelend soos die geluid van water wat vloei. As jy omdraai, staan Hy daar: die Een wat jy liefhet,
Jesus.
Hy staan daar as die "Seun van die mens" - soos Daniël, daar in Dan. 7:13, Hom eens gesien het.
Gelaaide woorde wat vertel van 'n heilige God wat 'n "mier tussen die miere" kom word het. Om
diegene in die miershoop te kom red. Wat 'n vriend van tollenaars en sondaars geword het (vgl.
Mat. 11:19), om ons te kom red. Omdat Hy ons so liefhet.
Hy staan daar met sy lang, wit kleed met die goue band om die bors. Wat ons herinner aan die
kleredrag van die hoëpriester van die ou bedeling op die groot versoendag. Op daardie dag het hy
die offerandes geslag en die bloed daarvan op en voor die verbondsark in die Allerheiligste van die
tabernakel of tempel gesprinkel (vgl. Lev. 16).
Sien Hom in jou geestesoog aan die kruis ... Sy bloed wat vir jou gevloei het ... Sodat God jou genadig
kan wees! Sodat daar vir eens en altyd vrede moontlik kan wees tussen God en sondige mense.
Sien Hom daar staan, nadat Hy alles gedoen het wat nodig was ... Om volkome versoening vir ons te
doen ... Met Sy hande nat van die bloed. Helder rooi, teen die wit van sy kleed.
Hoor Hom God se seën uitspreek oor dié wat buite gestaan en wag het: "Die Here sal julle seën en
julle beskerm; die Here sal tot julle redding verskyn en julle genadig wees; die Here sal julle gebede
verhoor en aan julle vrede gee!" (Num. 6:24-26)
Hoor hoe die Hebreërskrywer sê: "Met sy eie bloed en nie met dié van bokke en kalwers nie, het Hy
net een maal die heiligdom binnegegaan en ‘n ewige verlossing tot stand gebring. Wanneer die
bloed van bokke en bulle en die as van ‘n vers op die onreines gesprinkel word, maak dit hulle
uiterlik rein. Hoeveel te meer sal die bloed van Christus ons gewete bevry van die las van dade wat
tot die dood lei, sodat ons die lewende God kan dien! Hiervoor het Christus immers Homself as
volkome offer deur die ewige Gees aan God geoffer ... nou het Hy net een keer in die voleinding van
die tye verskyn om deur sy offer die sonde weg te neem" (Heb. 9:12-14,26).
Die sonde waarmee die vyand ons die verderf wou insleep, se mag en houvas is breek. Sy bloed het
die uitstaande skuld betaal. Die straf is uitgedien. Nou kan God diegene wat dit glo totaal vryspreek!
Laat dit jou troos wees: die Een wat dit alles namens en vir ons bewerk het, is hier by ons. In ons
midde. In ons. Deur Sy Gees. Ons is nie alleen nie. Ons is nie vergete en alleen agtergelaat nie. Hy
is self hier by ons.
As die Hoëpriester. Soos die Hebreërskrywer oor Hom skrywe: "Elke hoëpriester is ‘n mens wat uit
die mense geneem en aangestel word om vir hulle by God in te tree deur gawes en offers vir die
sondes te bring. Hy kan meegevoel hê met die onwetendes en dwalendes, omdat hy self aan
swakheid onderhewig is" (Heb. 5:1,2).
Hy staan hier as Een wat met ons saamvoel. Wat weet wat ons deurgaan. Wat voel wat ons voel.
Wat met onvoorwaardelike liefde na ons as stukkende mense kyk.
Hoe kan dit dan anders! Hy is immers die Een wat, in plaas van veroordeel, self die straf vir ons
gedra het.

Sien Hom ook raak as die Een wat met sy regterhand aan jou vat en vir jou sê: "Moenie bang wees
nie, dit is Ek ..." (Op. 1:17).
Ongeag wat jou omstandighede is. Ongeag wat jy moet deurgaan of moet ly omdat jy Hom ken en
Hom onverskrokke volg.
Dit gee jou krag om aan te gaan. Om in geloof te volhard. Om met niks minder tevrede te wees as
dit wat Hy vir jou belowe het nie.
So begin die profetiese woorde van die boek Openbaring.
So begin Johannes van Openbaring 1, vers 4 af aan die gelowiges, die ekklesia van Jesus, die
werklikheid en implikasies teken van die Heer- en Koningskap van Jesus in die wêreldwye ekklesia.
Die manier hoe hy dit prakties doen is aangrypend. Hy gebruik sewe werklike gemeentes in Klein-
Asië as prototipes en voorbeelde van die groei- en heiligmakingsfases waardeur die kerk van die
Here Jesus deur al die eeue sal gaan op pad na die einde toe. Tot wanneer Jesus finaal kom.
Daarom kan ons so maklik identifiseer met elkeen van hierdie gemeentes en waarmee hulle
geworstel het, maar ook met hulle geestelike oorwinnings langs die geloofspad wat hulle gestap het.
Maar volgende keer gesels ek verder hieroor.

Openbaring 2(A) Waar is die liefde dan ...
'n Mens vergeet eintlik 'n bietjie wie en wat die kerk van die Here Jesus werklik is. Soms staar 'n
mens jou so blind teen al die geboue en kerksisteme en amptenary van dit wat ons gewoonlik "kerk"
noem, dat jy vergeet dat onder al hierdie uiterlike dinge, God se mense, Jesus se Liggaam, as’t ware
weggesteek is. Dit is mense vir wie Hy Sy lewe gegee het. Om ons so deel te maak van Sy familie
wie Hy lief het.
Hy het belowe om ons te lei deur Sy stem (Joh. 10:3-5). Om aanmekaar met ons te praat. Sodat ons
kan weet Hy is daar en Hy weet. In die boek, Openbaring, word dit so gesê: "In sy regterhand het Hy
sewe sterre gehad, en ‘n skerp swaard met twee snykante het uit sy mond uit gekom. Sy hele
voorkoms was soos die son wat op sy helderste skyn.
Toe ek Hom sien, het ek by sy voete neergeval en bly lê soos een wat dood is. Hy het toe met sy
regterhand aan my gevat en vir my gesê: 'Moenie bang wees nie, dit is Ek, die Eerste en die Laaste,
die Lewende. Ek was dood en, kyk, Ek lewe tot in alle ewigheid; en Ek het die sleutels van die dood
en die doderyk.
Skrywe nou op wat jy gesien het, wat nou daar is en wat hierna gaan gebeur.
En dit is die verborge betekenis van die sewe sterre wat jy in my regterhand gesien het, en van die
sewe goue lampe: die sewe sterre is die leraars van die sewe gemeentes, en die sewe lampe is die
sewe gemeentes.'" (Op. 1:16 tot 20).
Dan lees ons hoe Jesus begin praat met Sy mense, met sewe gemeentes, wat eintlik Sy hele gelowige
ekklesia of kerk oor alle tye is. Natuurlik was die sewe gemeentes wat spesifiek aangespreek word in
Openbaring 2 tot 3, werklike gemeentes in Klein-Asië. Maar Jesus gebruik hulle, en die dinge wat
daar in hulle midde gebeur, as 'n flitslig om al die belangrikste kwaliteite van 'n gesonde gemeente
te belig, maar ook om die gevare wat ons almal bedreig, uit te lig.
Dit is asof ons sewe keer die flits van die swaard sien. Sewe keer kloof die swaard van Sy Woord dit
wat goed en kwaad, reg en verkeerd, mooi en verwerplik, is oop. Sodat elkeen van ons ons daarteen
kan meet. In die lig van hierdie lig-toets onsself kan ondersoek.
Die gemeente in Efese word eerste op die tafel neergesit en bekyk. Die lig en die liefde wat altyd
nog daar was, dreig om te wil verflou. Ons hoor hoe Koning Jesus vir hulle in groot liefde sê: "Ek
weet alles wat julle doen. Ek ken julle onvermoeide arbeid en julle volharding. Julle kan nie slegte
mense verdra nie. Julle het ondersoek ingestel na die mense wat voorgee dat hulle apostels is, en dit
nie is nie, en gevind dat hulle leuenaars is. Verder volhard julle ook; julle het baie vir my Naam
verduur, en julle het nie moeg geword nie" (Op. 2:2-3).
Dan fokus Sy lig in groot liefde op dit wat hierdie gemeente, en elke ander gelowige gemeente met
sy mense, kan maak of breek: "Maar Ek het dít teen julle: julle het My nie meer so lief soos in die
begin nie. Dink daaraan hoe ver julle al agteruitgegaan het. Bekeer julle en doen weer wat julle in
die begin gedoen het. Anders, as julle julle nie bekeer nie, kom Ek na julle toe en sal Ek julle lamp van
sy plek af wegvat! (Op. 2:4-5).
Die boodskap is duidelik: Sonder liefde is die gemeente van Jesus in die gemeenskappe waar ons
geplaas is om 'n verskil te maak, niks nie! Is al ons besig-wees en veg vir wat reg is, en al die
organisering en programme, leeg en sonder werklike betekenis!

Daarom bring Jesus ons weer terug na dit waaroor dit werklik tussen ons moet gaan. So dwing Hy
ons om weer terug te dink aan hoe dit daar aan die begin in ons lewe was: toe ons Jesus pas
aangeneem het as Verlosser en Here. Onthou weer 'n slag daardie borrelende vreugde en
allesoorweldigende liefde vir Hom en vir ander ander mense wat ons lewens destyds gekenmerk het.
Dit soos om vir 'n man en vrou wat 32 jaar getroud is, uit te daag om weer sommer net mekaar lief
te hê soos daar in die begin ...
Vriende, blote kerkwees is nie genoeg nie. Ons moet mekaar en die gemeenskap om ons werklik
liefhê.
Anders word ons lamp in daardie omgewing doodgeblaas. Of eerder: gaan dit sommer vanself dood
en wen die donker weer sy ou tuiste terug. En op die ou end bly net die ou siellose afgodstempels
staan waar daar nog nooit enige lewe en warmte was nie. Dit is hartseer maar waar. Gaan kyk maar
net vandag waar hierdie historiese gemeente van Efese destyds was. Onder Turkse bewind het
hierdie gemeente spoedig uit die stad verdwyn en daarmee saam hulle invloed in die samelewing!
"Al praat ek die tale van mense en engele, maar ek het geen liefde nie, het ek ‘n stuk klinkende
metaal, ‘n galmende simbaal geword. Al het ek die gawe van profesie en ken ek al die geheimenisse
en besit ek al die kennis, en al het ek al die geloof om berge te versit, maar ek het geen liefde nie,
dan is ek niks. Al deel ek al wat ek het aan ander uit, en al gee ek my liggaam prys om my daarop te
kan beroem, maar ek het geen liefde nie, baat dit my niks.
Die liefde is geduldig, die liefde is vriendelik; dit is nie afgunstig nie, is nie grootpraterig nie, is nie
verwaand nie. Dit handel nie onwelvoeglik nie, soek nie sy eie belang nie, is nie liggeraak nie, hou
nie boek van die kwaad nie. Dit verbly hom nie oor onreg nie, maar verheug hom oor die waarheid.
Dit bedek alles, glo alles, hoop alles, verdra alles. Die liefde vergaan nooit nie ..." (1 Kor. 13:1-8)

Openbaring 2(B) Arm en tog ryk!
“So sê die Eerste en die Laaste, wat dood was en weer lewend geword het: Ek ken julle verdrukking
en julle armoede, en tog is julle ryk. Ek weet ook van die kwaadstokery van die mense ... Moenie
bang wees vir wat julle alles gaan ly nie... Bly getrou tot die dood toe, en Ek sal julle die lewe as
kroon gee.” (Op. 2:8-10)
So lui die hooftrekke van die brief aan die gelowiges in die gemeente van Smirna, maar ook aan elke
gelowige op aarde oor alle tye wat ter wille van hulle geloof en volgeling-van-Jesus-wees deur die
vuur moet gaan.
Ek lees soms met verstomming die verhale van Christene in lande soos China, Afghanistan, en die
meeste van die lande onder Moslem-bewind, se pyn, lyding en vervolging in hierdie moderne eeu
waarin ons leef. En hoe ten minste 3 miljoen Christene net die afgelope jaar of drie oor die wêreld
reeds moes sterf vir hulle geloof.
Lees ‘n mens ‘n boek soos “Heavenly Man”, of artikels op webblaaie soos persecution.org en
opendoorusa.org, tref dit jou soos ‘n vuishou voor die kop: in meer as 50 lande wêreldwyd, ja, in 50
lande, word meer as ‘n honderd miljoen volgelinge van Jesus vandag nog, in 2009, op ‘n ekstreme
wyse of ten minste gedeeltelik vervolg en selfs doodgemaak!
Hierdie brief in die profesie van Openbaring is aan sulke gelowiges in die ekklesia van Jesus geskryf.
Om hulle te bemoedig en te vertroos. Want hulle het gevoel alles was teen hulle.
Smirna van destyds was ‘n groot handelsentrum, baie welvarend, en ‘n stad waarop die inwoners
baie trots was. Maar terwyl die gemiddelde inwoner in hierdie stad volgens destydse standaarde
gelukkig en vooruitstrewend was, was die gemeente van Jesus in hulle midde arm, brandarm, om
eerlik te wees! Hulle was ter wille van hulle geloofsoortuigings tot die dood toe vervolg, deur die
Jode gehaat, en grotendeels werkloos en dus honger verby!
Dit was veral die Joodse gemeenskap in die stad wat kwaad gestook het teen hulle. So weet ons is
die Christengelowiges in hierdie stad van, kan jy glo, kannibalisme, aangekla! Omdat hulle sou
verkondig het dat hulle iemand se liggaam eet en bloed drink (in die nagmaal). Hulle is ook aangekla
dat hulle gesinne opbreek. (Mense wat tot geloof in Jesus gekom het, is mos dikwels deur die res
van die gesin verwerp en so het verdeeldheid in gesinne as gevolg hiervan ontstaan).
Dit alles het die lewe van Christengelowiges in hierdie stad ondraaglik gemaak. En soos ek gesê het,
was dit veral die Joodse gemeenskap wat hulle hieroor by die owerhede aangekla het. So lees ons
het hulle gesorg dat honderde Christene aangekla, gemartel en selfs op die brandstapels verbrand
word. Polikarpus, ‘n leraar van Smirna, het so gesterf, en dit was die Jode wat die voorstes was om
die hout vir die vuur aan te dra!
Wat sê Jesus vir hulle? Net dit: Hy sien dit alles raak! En dan hierdie geweldige woorde wat deur
hulle hart moes skeur: “Ek ken julle verdrukking en julle armoede, en tog is julle ryk!”
Hiermee sê Hy: Ek is julle God en julle is Myne! Moenie dat die wêreld om julle, en julle
omstandighede, julle soos bedelaars en armlastiges laat voel nie. Julle het alles wat werklik saak
maak! Ja, Ek weet dit kos julle tans ‘n prys en dat julle baie verdrukking daarvoor moes verduur. En
daar lê nog ‘n tydjie van verdrukking vir julle voor (“tien dae lank” – vers 10 se simbool vir ‘n kort
afgemete tydjie wat nodig is vir God se volkome plan om sy volledige doel te bereik).

‘n Mens kan in so ‘n situasie voel alles is teen jou! Maar die Here wil hulle help raaksien dat alles
eintlik “vir hulle is”. Ons is immers in Jesus reeds oorwinnaars omdat niks ons van Sy liefde kan skei
nie (Rom. 8:35-39). Hy ken ons swaarkry, en neem soms, hoe onverstaanbaar dit ookal mag wees,
nie altyd alles onmiddellik weg nie.
Dit is hier waar die sogenaamde “voorspoedsteologie” sneuwel! Want dit gaan eenvoudig nie altyd
net goed met gelowiges nie!
Om vrede te kry midde al die swaar het ons God se ewigheidsperspektief nodig! Rykdom en
welvaart kan soms vir ons so belangrik word, dat ons nie meer met God se oë na ons lewe en die
dinge om ons kan kyk nie. En dan het ons ‘n woord van God nodig om weer vrede te kry midde die
praktiese omstandighede, en om te weet dat ons werklik in die Here “ryk” is (vgl. 2 Kor. 6:10 se
mense wat niks het nie, maar tog alles besit!)
Dan hoor ons Jesus sê dat dié wat selfs tot die dood getrou sal bly, sal die oorwinnaarskroon of die
“lewe as kroon” ontvang (vgl. v. 10). Hulle sal soveel vreugde en genoegdoening ervaar soos die
atleet wat vir ‘n wedloop hard geoefen het en alles gegee het, wat dan met ‘n goue medalje op die
wennerspodium sal staan aan die einde.
Hoe weet ons dit gaan gebeur? Omdat die Een wat die goue medalje aan jou oorhandig, die Een is
wat na drie dae in die graf lewend uit die dood opgestaan het! Hy is die Een wat ek en jy dien en
liefhet. En vir wie ons bereid is om selfs ons lewe te gee as dit dan moet!

Openbaring 2(C) Weier om kompromie te sluit oor reg en verkeerd
...
Almal van ons ken die storie van die padda wat in ‘n bak gesit word met water in wat stadig maar
seker warm gemaak word ... En so nie eers agterkom dat hy eintlik besig is om te sterf van die hitte
nie!
Die briefie aan die gemeente, Pergamum, in Op. 2:12 tot 17, gaan hieroor. Hierdie stad was die
sentrum van keiseraanbidding vir die hele Asië. Kan jy glo dat daar selfs ‘n tempel vir die keiser hier
opgerig is! Waar hy letterlik “aanbid” kon word! Elke jaar moes elke burger op Romeinse
grondgebied voor die magistraat gaan bely dat die keiser van Rome die “here” is. Dan is daar vir jou
vir daardie jaar ‘n permit uitgereik wat jou toegang gegee het tot die voordele van ‘n getroue
Romeinse burger: goeie werk, sosiale aanvaarding, ‘n rustige en gemaklike lewe, sekuriteit, ens.
Maar weier jy, was dit nag vir jou en het vervolging van allerlei aard noodwendig gevolg.
Die meeste volgelinge van Jesus het as gevolg van gewetenswroeginge hieroor, net nie kans gesien
het om dit te doen nie. En dit het net moeilikheid vir hulle beteken. Sommige het selfs met hulle
lewens daarvoor betaal. Soos Antipas, van wie ons weet wat juis hier in Pergamum die hoogste tol
vir sy geloof moes betaal.
Daarom hoor ons Jesus in hierdie profetiese briefie aan hulle sê: “So sê Hy wat die skerp swaard
met die twee snykante het: Ek ken die plek waar julle bly, daar waar die troon van die Satan is. Tog
bly julle aan my Naam getrou en julle het nie julle geloof in My afgesweer nie, selfs nie in die tyd toe
Antipas, my getroue getuie, doodgemaak is daar by julle waar die Satan bly nie.” (Op. 2:12,13)
G’n wonder sekere gelowiges, en selfs sekere geestelike leiers, het allerlei maklike uitweë uit hierdie
geloofsdilemma gesoek waar voor gelowige volgelinge jaarliks gestaan het nie! Die maklikste pad uit
was om doodgewoon maar met die meerderheid saam te gaan, en ten spyte van hulle oortuiginge,
hierdie eed en belydenis teenoor die keiser as “here” te gaan aflê.
Nog ‘n uitdaging waarvoor gelowiges telkens te staan gekom het was die gereelde uitnodigings by
die werk en in baie sosiale kringe waarin hulle beweeg het, na al die verskillende heidense feeste en
onsedelike partytjies toe wat daarvoor bekend was vir al die sedelose praktyke, drankmisbruik en
selfs orgies wat daar plaasgevind het. Dit was al klaar moeilik om werk te kry as jy ‘n volgeling van
Jesus was, maar om nou nog hierdie partytjies en feeste aanmekaar te vermy, was ‘n seker manier
om uitgestoot te word uit alle sosiale kringe en om vinnig afgedank te word by jou werk.
Om dinge te vererger het sogenaamde leraars onder gelowiges ‘n leer gepropageer wat Christene
geleer het dat ons nie meer nodig het om so eng te wees soos in die verlede nie. “Ons is losgekoop
van die wet en ons is dood vir al die reëls oor jy mag nie dit doen en nie dat doen nie. Ons was
immers gees-mense, is daar vir hulle gesê, en daarom kan dit wat ons met ons liggaam (ons vleesmens)
doen nie ons ewigheidsbestemming beïnvloed nie. Ons kan dus met vrymoedigheid die
beskikbare seks by hierdie soort partytjies gaan geniet, en aan hierdie feeste meedoen.”
Tot sover die leringe van hierdie valse leraars. Hierdie keuse tussen wettisisme en wetteloosheid is
vandag natuurlik nog in verskillende vorms vir elke volgeling van Jesus ‘n gedurige keuse wat jy moet
maak in jou lewe.
Aan die eenkant is die Skrif duidelik dat ons, as volgelinge van Jesus, nie meer nodig het om ons te
laat voorskryf oor wat om te eet en te drink nie, want ons is werklik dood vir die wettiese
godsdienstige reëls (veral vanuit die tipiese Judaïstiese Joodse kringe en hulle aanhangers wat ons

wil terugdwing onder die wette, gebruike en reëls van die Ou Testament). So ‘n wettiese lewenswyse
is immers nie op God se genade gebou nie, omdat dit duidelik nie die werklike betekenis van Jesus se
dood en opstanding se implikasies verstaan nie. Dit is in werklikheid maar weer ‘n poging om God se
genade te verdien. Wat natuurlik onmoontlik is en niemand kan red nie (Rom.10:1-4).
Maar aan die anderkant is dit ewe verkeerd om te dink dat om Christus Jesus se versoening en
geregtigheid te aanvaar in geloof, beteken dat ek en jy nou maar kan net kan doen wat ons wil. Dat
ons eenvoudig aan alles kan meedoen wat in hierdie stukkende wêreld rondom ons deur stukkende
mense onder demoniese invloed bedink word. Dieselfde Christus Jesus wat alles gedoen het wat
nodig was om ons Verlosser te wees, is immers ook Here en Koning. Ons lewenswyse en keuses
moet dus in lyn wees met Sy grondwet van Sy Koninkryk en Sy totale normstelsel vir elke deel van
ons lewe. Sy dit vir die huwelik, ons liggaam, geld, alkoholgebruik of nie, of vir wat dit ookal mag
wees. Die Maker van die mens se Handboek vir die mens is en bly ons riglyn. En Sy Gees in ons wil
ons dag vir dag lei en leer wat Sy perfekte wil vir elke deel van ons lewens is.
Die ekklesia van Jesus van alle tye leer dus uit hierdie profetiese brief aan Pergamum hoe gevaarlik
dit is om ter wille van oorlewing of sosiale relevansie kompromieë te sluit met die waardes en
manier van doen deur die res van die samelewing om ons, terwyl dit eintlik totaal in stryd is met God
se perfekte wil vir Sy mense se hele lewe.
Sou ons dit negeer, is dit in elke opsig vir ons nag. En gaan ons die pyn en ellende van
ongehoorsaamheid aan God se perfekte wil vir ons lewens proe. Maar vir diegene wat bereid is om
Hom as hulle Here ook hierin te gehoorsaam, gee Hy die volgende twee beloftes: “Aan elkeen wat
die oorwinning behaal, sal Ek van die verborge manna gee, en daarby sal Ek vir hom ‘n wit steentjie
gee met ‘n nuwe naam daarop gegraveer, wat niemand anders ken nie, net hy wat dit kry” (Op.
2:17).

Openbaring 2(D) Pasop vir die Isebel onder julle ...
Hoeveel keer kom ‘n mens nie agter dat die persone wat eintlik die gesag in die hand het, wat eintlik
die septer swaai en die opinie van mense beheer, iemand agter die skerms is nie!
Dit is wat in die gemeente, Tiatira, gebeur het. Eksegete van die Nuwe Testament meen dat dit
heelwaarskynlik ‘n vrou van een van die leraars in die destydse gemeente was. Iemand wat net soos
Isebel, die vrou van koning Agab, eintlik die stem agter die troon was wie se mening en wil gegeld
het. Jy onthou mos dat dit onder haar invloed destyds was wat Agab die Baäl-afgodsdiens ingevoer
waartoe sy hom aangehits het.
Tiatira was ‘n bedrywige handelsentrum waar die arbeidsgildes (of –vakbonde, in moderne taal) baie
aktief was. Ook hier was die harde werklikheid vir die Christengelowiges: óf jy doen mee met al die
afgode-praktyke en dronkpartytjies óf jy ontdek dat jy sommer gou-gou nie meer ‘n werk het nie!
Dit was dus werklik ‘n kwessie van of saamspeel en saamdoen met die res, en die Here misken in die
proses, óf uitgestoot te word met die gevolglike werkloosheid en lyding wat dan noodwendig gevolg
het!
Hierdie Isebel in die gemeente het skynbaar voorgegee dat sy ‘n “woord van God” ontvang het wat
gelowiges die reg gegee het om maar mee te doen aan dit wat binne die arbeidsgildes van hulle
gevra word. Daarom kom Jesus in hierdie brief in Openbaring 2:18 e.v. en waarsku Sy mense om nie
mee te doen aan dit wat hierdie Isebel propageer in die gemeente nie. Sy was ‘n regte Isebel! Sy
het geen werklike geloofsverhouding met Christus Jesus gehad nie, en doen haar net voor asof sy
hierdie profetes sou wees wat direk by God hoor wat Sy wil vir nou vir Sy mense was! Maar in
werklikheid was sy net besig om die gemeente te verlei om by allerlei afgodiese en selfs okkultiese
praktyke betrokke te raak.
Vriende, ons moet werklik God bid vir ‘n gees van onderskeiding! Om in staat te wees om tussen
waarheid en leuen te kan onderskei. Om te kan weet wanneer iets werklik van God is en wanneer
nie! Veral daar waar ons te make het met mense wat vanuit outoriteitsposisies in die gemeente en
uit die geledere van gelowiges optree of praat.
Soms verdra gelowiges baie naïef mense in hulle midde, en gee hulle selfs soms die verhoog om
hulle menings aan die res van die gemeenskap te propageer, terwyl wat hulle sê en glo, eintlik totaal
in stryd is met God se Woord! In hierdie brief hoor ons hoe die Here hierdie gemeente in Tiatira prys
vir hulle geloof, diens en volharding, maar dit teen hulle het dat hulle hierdie Isebel-tipe toelaat om
haar invloed in die gemeente te laat geld. En, hoor ons die Here vir hulle vra: Sien julle dit nie, of
kyk julle dit moedswillig mis?
‘n Mens kan maklik sê dat dit eintlik eenvoudig moes wees om so iets in die gemeente raak te sien.
Maar ek en jy weet dat dit soms nie altyd so maklik is nie. Veral as ‘n mens te make het met gesiene
mense wat gewild is onder die grootste meerderheid gelowiges. En as so ‘n mens dit nog boonop
reggekry het om almal te laat glo dat hy of sy werklik God se stem hoor, het ‘n mens met ‘n uiters
gevaarlike situasie te make!
Dan is dit belangrik om te onthou dat die God wie eintlik in beheer van die gemeente is, die
verheerlikte Here is wat Homself bekendstel as die Een wie se oë soos vuur vlam (vers 18). Hy weet
alles. Hy ondersoek die harte en gedagtes van mense. Hy weet presies wat aan die gang is. En al lyk
dinge vir ons asof alles klopdisselboom verloop, Hy weet altyd van beter!

Daarom is dit so noodsaaklik dat ons gedurig laag by Sy voete, met ons oor op Sy mond en hart,
moet bly. Om by Hom te hoor dat dit vir hierdie soort manipuleerders en bedrieërs nag is, want Hy
lewe en sal nie met Hom, of met Sy mense, laat mors nie! Maar ook om by Hom, uit Sy mond, die
twee beloftes te hoor wat ons in hierdie brief hoor (kyk vers 26 tot 28): “Aan elkeen wat die
oorwinning behaal en tot die einde toe volhou om te doen wat Ek wil hê, sal Ek mag en gesag oor die
nasies gee. Hy sal hulle met ‘n ystersepter regeer, hulle soos kleipotte stukkend slaan. Dieselfde
mag en gesag het Ek ook van my Vader gekry. Daarby sal Ek vir elkeen wat die oorwinning behaal,
die môrester gee.”
Ware geestelike outoriteit kom net van God af. En dit is ‘n outoriteit en soort gesag wat bo dié van
konings en outoriteitsfigure in hierdie wêreld van ons verhewe is. Dit is die soort geestelike
outoriteit wat maak dat mense wat skynbaar in die oë van die wêreld onbelangrik en sonder invloed
sou moes wees, skielik op verhoë verskyn en derduisende rondom hulle se lewens baie direk
positief, in naam en in diens van die Koninkryk van God, beïnvloed en verander.
Ja, soos wat Jesus self die blink Môrester genoem word (Op. 22:16), en soos wat die môrester heers
oor die nag en die nuwe dag aankondig, so verseker die Here wat ons daarvan dat, al is dit hoe
piknagdonker rondom ons, is Sy oorwinning en Sy nuwe dag op pad en so naby! Ons moet net nie
moedeloos word of ophou vertrou nie!

Openbaring 3(A) Word wakker julle wat slaap ...
Van die moeilikste mense vir my om te bedien is Christelik godsdienstige mense. Mense wat die
Bybel en sy inhoud ken omdat hulle daarmee opgegroei het in godsdienstige huise. Maar wat in
werklikheid geen persoonlike geloofs- en liefdesverhouding met Jesus Christus het nie. Wat nog
nooit in hulle lewe ‘n persoonlike geloofskeuse gemaak het dat hulle die evangelieboodskap werklik
glo en gekies het om hulle hele lewe daarop te bou nie.
Sulke mense dink meestal alles is reg tussen hulle en God. Hulle gaan immers gereeld “kerk toe” en
lewe goeie lewens. Ek onthou nog so goed hoe ek en my kollega in die NG-gemeente,
Potchefstroom-Mooirivier, vir meer as drie jaar elke jaar elke “belydende lidmaat” van daardie
gemeente besoek het om seker te maak of elkeen van hulle geloofsekerheid gehad het. Of elkeen
van hulle werklik weet dat, as hy of sy vandag sou sterf en voor die Here sou verskyn, hulle verseker
geweet het dat hulle Sy kinders was en dat hulle nie verlore sou gaan nie.
Tot ons skok het ons ontdek dat minder as 20% werklik ‘n persoonlike geloofs- en liefdesverhouding
met Jesus Christus as Verlosser en Here gehad het!
Jesus se persoonlike brief aan die gemeente van Sardis moes vir elke mens in daardie gemeente
geskok het tot in hulle fondasies!
Luister wat word daarin vir hulle gesê: “So sê Hy wat die sewe Geeste van God en die sewe sterre
het: Ek weet alles wat julle doen. Ek weet dat julle die naam het dat julle lewe, en tog is julle dood.
Word wakker en versterk wat nog by julle oorgebly het, wat op die punt staan om dood te loop. Wat
julle doen, vind Ek nie goed genoeg voor die oë van my God nie.
Dink daaraan hoe julle die evangelie ontvang en daarna geluister het. Hou daarmee vol en bekeer
julle. As julle nie wakker word nie, sal Ek onverwags kom soos ‘n dief, en julle sal nie weet wanneer
Ek op julle sal afkom nie” (Op. 3:1-3).
Hoeveel keer meet ons nie gemeentes, en die lewe in gemeentes, aan hoeveel mense daar na die
eredienste kom, en hoeveel geld hulle het nie!
Sardis was ‘n buitengewone ryk gemeente, in vergelyking met die armoede wat in baie ander
gemeentes geheers het. Behalwe vir die goudmyne wat binne die stadsgrense geval het, met die
meegaande rykdom wat dit ingebring het, het baie lede van die gemeente nie gehuiwer om
kompromie te sluit en te doen wat deur die heidense werkersgilde en Romeinse owerheid vir hulle
gevra is om te doen sodat hulle steeds hulle werk kon behou en steeds kon bly besigheid doen en bly
deel in die bloeiende ekonomie nie.
Watter prys is mense nie bereid om te betaal om sosiaal gereken, welvarend te wees en hulle
finansiële sekuriteit te kan behou nie! Vandag nog sien en hoor ons van hoevele mense wat nie
huiwer om hulle siel, en hulle persoonlike integriteit en geloofsoortuigings, te verkoop vir ‘n klompie
duisend of miljoen rand nie!
En wees maar gewaarsku, moet nie te vinnig wees om ander wat dit doen te oordeel nie! As die
regte hoeveel geld op die tafel is, is dit nie so maklik om steeds te bly nee sê nie!

Om werklik onder alle omstandighede Bybels eties te lewe en besigheid te doen, en getrou te bly
aan jou geloofsoortuigings, vra werklik elke dag doelbewuste keuses om net Jesus Christus as Here
en Verlosser in jou lewe gelowig te bly volg, gehoorsaam en te vertrou.
Goddank vir God se Gees in elkeen van Sy mense, wat as Hy in beheer van ons lewens is, ook geduld,
volharding en selfbeheersing in ons sal bewerk. Wat ons sal help om steeds getrou te bly en ons sal
help om nie kompromie te sluit nie. Wat ons sal help om te onderskei as dit werklik gaan oor
waarheid en leuen, en oor reg of verkeerd. Wat ons sal help sien wanneer die keuses waarvoor ons
gestel word werklik ‘n keuse is tussen lewe en dood, en die prys om steeds mee te doen en om
besigheid te bly doen in daardie geval net te hoog is.
Daarom hoor ons ook in hierdie briefie : “Maar julle het darem ‘n paar mense daar in Sardis wat nie
hulle klere besoedel het nie, en hulle sal altyd in wit klere by My wees omdat hulle dit waardig is.
Elkeen wat die oorwinning behaal, sal sulke wit klere dra. Ek sal nooit sy naam uit die boek van die
lewe uithaal nie, en Ek sal voor my Vader en voor sy engele verklaar dat hy aan My behoort” (Op.
3:4-5).
Hoe wonderlik is dit nie om ‘n God te dien wat belowe om ons te bly vashou, kom wat wil! Hoe
staan daar in Johannes 10:27 en 28: “My skape luister na my stem; Ek ken hulle, en hulle volg My.
Ek gee hulle die ewige lewe, en hulle sal in alle ewigheid nooit verlore gaan nie. Niemand sal hulle uit
my hand ruk nie.”

Openbaring 3(B) Mense wat mekaar en ander liefderyk vashou
Mense gaan en kan my en jou herken as volgelinge van Jesus Christus aan die manier hoe ons
mekaar en hulle liefhet ... Daar waar die rubber die teer raak ... Daar waar mense pyn of nood het ...
As hulle beleef ons sien dit raak en bedien hulle waar dit werklik saak maak.
Jesus sê dit daar in Joh. 13:34 en 35: “Ek gee julle ‘n nuwe gebod: julle moet mekaar liefhê. Soos Ek
julle liefhet, moet julle mekaar ook liefhê. As julle mekaar liefhet, sal almal weet dat julle dissipels
van My is."
Dit gaan nie in die eerste plek wees deur al die regte, waar-dinge wat ons vir mense gaan sê nie.
Hulle gaan weet Jesus het ons lewens verander as hulle voel en beleef dat ons hulle liefhet.
Ons weet dit almal, maar tog vergeet ‘n mens dit. Party van ons makliker as ander van ons. Veral as
jy ‘n persoonlikheid het wat fyn ingestel is op detail en feite, of as jy eerder ‘n entrepeneur en
pionier is wat nie skrik om nuwe dinge aan te pak of uit die boks te dink nie.
Ons persoonlikhede en manier hoe ons dink (hulle noem dit deesdae “ons breinprofiel”) maak dat
ons op verskillende dinge fokus en ingestel is. Maar ten spyte van ons wonderlike uniekheid, is die
algemene noemer, en vrug van God se Gees se werking en beheer in volgelinge van Jesus se lewe,
dat mense om ons beleef dat ons hulle werklik liefhet.
Ons lees dit ook in Gal. 5:13 as daar staan: “... dien mekaar in liefde”. Daar verduidelik God se Gees
deur hierdie skrywe van Paulus vir ons hoe dit kan gebeur, want ons ou mens, met ander woorde
wie ons van nature is, is nie in staat om dit te doen nie. Dit is alleenlik moontlik, sê Gal. 5:16, as ons
ons lewe deur die Gees van God laat beheer. Dan, sê vers 22, is die vrug in ons lewe onder andere
“liefde”.
Dit was dit vir my baie interessant om in die nuutste Christelike FINESSE-tydskrif te lees dat ‘n
ondersoek getoon het dat 87% van hulle lesers se breinprofiel mensgerig is. Hulle empatiseer
natuurlikgewys met mense om hulle se seer en vreugdes, reik maklik uit na mense om hulle en
waardeer self waar ander hulle sensitief behandel. Die stories van ander mense raak hulle, en hulle
is baie gemaklik met hulle eie emosies en dié van ander.
Vir die ander van ons wat, byvoorbeeld, meer strategies dink, of fantaseerders is, of gewoonlik
realisties of analities dink, of organiseerders en reguleerders is, ontdek dat waar God se Gees die
beheer in ons lewe het, praktiese liefhê van mense ook – soms verstommend – ook deel van ons
natuurlike omgang met mense word.
Die gemeente Filadelfia, aan wie Jesus die brief in Op. 3:7 tot 13 gerig het, getuig daarvan. Midde al
die vervolging en swaar wat al die ander gemeentes ook maar om hulle beleef het, het hulle dit reg
gekryk om werklik mekaar en ander lief te hê waar dit saak maak. Presies soos hulle naam in die
Grieks sê, het hulle lewens getuig van oop harte en oop deure vir mekaar en ander. Was hulle
werklik ‘n gemeente wat uitgereik het na mekaar in broerderliefde.
Egte, warm naasteliefde kom nie vanself nie. Nee, dit is werklik teken en vrug as God deur Sy
genade- en verlossingswerk ons kom red en verlos uit ons natuurlike selfsug en selfgerigtheid, waar
alles net om ons self en ons eie mense draai, en Hy ons nuut en oor kom maak.
Soos 1 Joh. 3:14 tot 18 sê: “Ons weet dat ons klaar uit die dood na die lewe oorgegaan het, want
ons het ons broers lief. Wie nie liefhet nie, bly in die dood. Elkeen wat sy broer haat, is ‘n

moordenaar; en julle weet dat geen moordenaar die ewige lewe in hom het nie. Hiéraan weet ons
wat liefde is: Jesus het sy lewe vir ons afgelê. Ons behoort ook ons lewens vir ons broers af te lê.
Wie aardse besittings het en sy broer sien gebrek ly, maar geen gevoel vir hom het nie-hoe kan die
liefde van God in hom wees? Liewe kinders, ons liefde moenie net woorde en lippetaal wees nie,
maar moet met die daad bewys word, en dan in opregtheid.”
Die wonder is dat wanneer ons mense begin liefhê daar waar dit saak maak, maak dit deure oop en
bou dit brue tussen mense. En skep dit geleenthede vir mense om jou te leer ken en te leer vertrou.
Gee dit hulle geleenthede om iets te sien wat hoe God jou lewe verander het. En dit maak dat hulle
die een of ander tyd die regte vrae vra wat jou geleentheid bied om jou geloofstorie met hulle te
deel. Om aan hulle te vertel wat Jesus in jou lewe gedoen het, wat nou maak dat jy lyk soos wat jy
lyk, en doen en dink soos wat jy doen en dink.
Dan verstaan ons wat Jesus bedoel as Hy daar in Op. 3:7 e.v. vir hulle sê: “Ek weet alles wat julle
doen. Kyk, Ek het ‘n deur voor julle oopgesluit en niemand kan dit weer toesluit nie. Ek weet dat julle
min krag het, en tog het julle aan my boodskap vasgehou en My nie verloën nie. Kyk, Ek beskik dat
van die lede van die sinagoge van die Satan, die mense wat daarop aanspraak maak dat hulle Jode is,
en dit nie is nie, maar lieg - kyk, Ek sal maak dat hulle kom en voor julle kniel en erken dat Ek julle
liefhet. Omdat julle aan die boodskap van my volharding in lyding vasgehou het, sal Ek julle ook
vashou in die tyd van beproewing wat oor die hele wêreld gaan kom om die bewoners van die aarde
op die proef te stel. Ek kom gou. Hou vas wat julle het, sodat niemand julle kroon wegvat nie.
Elkeen wat die oorwinning behaal, sal Ek ‘n pilaar in die tempel van my God maak, en hy sal vir altyd
daar bly. Ek sal op hom die Naam van my God skrywe en die naam van die stad van my God, die
nuwe Jerusalem, wat van my God af uit die hemel uit afkom. En Ek sal ook my eie nuwe Naam op
hom skrywe.”

Openbaring 3(C) Maak asseblief vir My oop!
Kan jy glo dat so iets moontlik is! Dat God vir ‘n gemeente, en dit nogal een van die vroeë
Christengemeentes daar reg aan die begin, kan sê dat Hy hulle soos ‘n slegte smaak uit Sy mond wil
uitspoeg!
Laodisea is die enigste van die sewe gemeentes in Op. 2 en 3 waaroor God niks goeds te sê het nie.
En dit terwyl hierdie gemeente self gedink het: “Ons is ryk, skatryk, ons het niks meer nodig nie ...”
(Op. 3:17).
Maar Jesus, Verlosser, Here en Hoof van Sy Liggaam se beoordeling was: “Ek weet alles wat julle
doen. Ek weet dat julle nie koud is nie, en ook nie warm nie. As julle tog maar koud of warm was!
Maar nou, omdat julle lou is, nie warm nie en ook nie koud nie, gaan Ek julle uit my mond uitspoeg.
Julle sê: ‘Ons is ryk, skatryk, en ons het niks meer nodig nie,’ en julle weet nie dat julle ellendig en
beklaenswaardig is nie, arm, blind en kaal.
Daarom raai Ek julle aan om by My goud te koop wat deur vuur gelouter is, sodat julle ryk kan word;
en koop wit klere, sodat julle julle kan aantrek en julle skande, julle naaktheid, nie gesien word nie;
en koop oogsalf om aan julle oë te smeer, sodat julle kan sien. Ek bestraf en tug elkeen wat Ek
liefhet. Laat dit dan vir julle erns wees en bekeer julle.
Kyk, Ek staan by die deur en Ek klop. As iemand my stem hoor en die deur oopmaak, sal Ek by hom
ingaan en saam met hom die feesmaal hou, en hy saam met My.
Elkeen wat die oorwinning behaal, sal Ek saam met My op my troon laat sit, net soos Ek ook die
oorwinning behaal het en saam met my Vader op sy troon gaan sit het. Elkeen wat kan hoor, moet
luister na wat die Gees vir die gemeentes sê” (Op. 3:15-22).
Hoe meer ek hierdie woorde van Jesus aan hierdie gemeente lees, hoe meer verslae en verstom laat
dit my wonder oor die vraag: Aan hoeveel gemeentes moet Jesus sê: Julle dink Ek is binne, tussen
julle, maar in werklikheid staan Ek buite en klop om in te kom!
Binne lyk en voel dit asof alles vlot en klopdisselboom verloop. Aan niks is daar skynbaar tekort nie,
en almal lyk gelukkig en ons hou lekker “kerk”!
Maar die werklikheid is dat die Een waaroor dit moet gaan, waarop ons heeltyd gefokus moet wees,
nie eers meer daar is nie, en die tragedie is dat niemand dit eens agtergekom het nie!
Dit is een van die groot gevare van finansiële sukses en baie geld ... Dit laat mense blind word vir die
dinge wat eintlik saak maak. Dit verlei jou om te dink dit gaan goed op alle vlakke!
Laat daar nou geen twyfel wees nie: met die mense in Laodisea het dit goed gegaan finansieel!
Hierdie handelstad was geleë op die vernaamste hoofweg in Asië en was gevolglik ‘n stad met baie
bankiers, winkels, teaters, en aan die voorpunt van vooruitgang. So welvarend was hierdie stad dat
toe dit in 61 n.C. deur ‘n aardbewing verwoes is, het die inwoners saamgeklap en alles herbou,
sonder om die geld te bruik wat die Romeinse owerheid beskikbaar gestel het. Om maar net weer te
onderstreep waarom die mense in hierdie stad gevoel het: “Ons het niks meer nodig nie!”

Die wolboere in die omgewing se skape se beroemde swart wol is net in die beste klere verwerk. En
die oogsalf van die befaamde mediese skool in die stad was wêreldwyd bemark as ‘n middel wat dalk
selfs blindheid kon help genees.
Dink net die skokgolf wat deur hierdie gemeente getrek het die oggend toe die leraar van die
gemeente Jesus se brief aan hierdie gemeente voorgelees het! Toe hy lees: “So sê die Een deur wie
God alles geskep het: Julle is ... ellendig ... arm ... beklaenswaardig ... blind ... kaal ... julle moet julle
bekeer ... Ek sal julle... uitspoeg!
Want Jesus was nie meer daar nie. Hy het buite in die koue in hierdie gemeente gestaan.
Alles het in hierdie gemeente om hulleself gedraai. Egte liefde is deur selfsug en eiebelang vervang.
Ware geloof is deur selfvertroue vervang. Die regte goed is dalk selfs gedoen, maar vir verkeerde
redes.
Die onbegryplike, genadige wonder was dat tog, steeds, bly Jesus hoopvol, liefdevol, geduldig met
hulle. Hulle is nog nie uitgespoeg nie. Daar was nog omdraai-kans! Steeds pleit Hy by hulle: “Kom
koop by My ... gelouterde goud, wit klere en oogsalf om julle van julle blindheid te genees (vgl. vers
18).
Steeds nooi Hy hulle uit om vir Hom oop te maak, en belowe Hy dat Hy wil en sal inkom. Om saam
met hulle te kom aansit aan die tafels van Sy seën en beloftes wat ook vir hulle daar is. Ja, dat Hy
ook vir hulle gekom het om lewe en dit in oorvloed aan hulle te bedien. Hy het immers ook vir hulle,
soos vir al Sy volgelinge, ‘n feesmaal voorberei.
Onthou, net: Jesus forseer nooit deure oop nie. Hy roep en klop ... en wag dan dat ons die deur van
binne af oopmaak. Want hierdie deur kan net van binne-af oopmaak. Van jou kant af.
Het jy werklik vir Hom oopgemaak! En as jy oopgemaak het, proe jy Sy seën en oorvloedige lewe?

Openbaring 4(A) Om God op die troon te sien
Kan jy jouself indink watter verskil maak dit ... Om midde uitdagende, spanningsvolle, selfs pynlike
omstandighede, skielik God raak te sien!
Op die troon. Ten volle in beheer. In staat om, soos Rom. 8:28 sê, alles, ja, alles, vir diegene wat Hy
liefhet, ten goede te laat meewerk!
Dit is wat Johannes daar op die eiland, Patmos, midde al die swart van die steenkoolmyn-tronk
rondom hom, skielik beleef het. Hoor hoe vertel hy dit self daar in Op. 4:1 tot 8:
“Hierna het ek, Johannes, in die hemel ‘n deur gesien wat oopgemaak is, en die stem, soos die geluid
van ‘n trompet, wat ek die eerste keer met my hoor praat het, het gesê: ‘Kom op hierheen, en Ek sal
vir jou wys wat hierna moet gebeur.’
Onmiddellik is ek deur die Gees meegevoer. Ek het gesien daar staan ‘n troon in die hemel en op die
troon sit daar Iemand. Sy voorkoms was soos opaal en karneool. Om die troon was daar ‘n reënboog
met die glans van smarag. Reg rondom die troon was daar vier en twintig ander trone, en op die
trone het daar vier en twintig ouderlinge gesit. Hulle het wit klere aangehad, en op hulle koppe was
daar goue krone. Daar het weerligstrale, dreunings en donderslae van die troon af gekom. Vlak voor
die troon het sewe fakkels helder gebrand. Dit is die sewe Geeste van God. Voor die troon was dit
soos ‘n spieëlgladde see, helder soos kristal. Naby, rondom die troon, was daar vier lewende wesens,
vol oë van voor en van agter.
Die eerste lewende wese het soos ‘n leeu gelyk en die tweede soos ‘n bul; die derde het ‘n gesig soos
dié van ‘n mens gehad en die vierde het gelyk soos ‘n arend wat vlieg. Elkeen van die vier lewende
wesens het ses vlerke gehad, wat aan die bokant en aan die onderkant vol oë was. Hulle het dag en
nag sonder om te rus, gesê: ‘Heilig, heilig, heilig is die Here God, die Almagtige, Hy wat was en wat is
en wat kom.’”
Dit is merkwaardig hoeveel keer God as’t ware in lewende lywe aan gewone mense soos ek en jy in
die Bybel verskyn het! Dink maar, om net ‘n paar te noem, aan Eksodus 3, toe God aan ‘n Moses
verskyn het. En in Jesaja 6 aan die profeet, Jesaja. En dan ook daar in Esegiël 1 aan die profeet,
Esegiël.
Nie dat hulle Hom werklik van aangesig tot aangesig “gesien” het nie! Niemand kan immers Hom
“sien” en bly lewe nie (vgl. Eks. 19:19-21; 33:20). Dit was eerder net ‘n visioen, ‘n prentjie, wat God
jou in Sy genade self wys oor Hom.
Dit is asof God jou oplig uit die beperktheid van die alledaagse, wat so maklik ons uitsig op God
belemmer, en jou daar gaan neersit waar jy Hom kan sien, in die hemel, bo alles, tenvolle in beheer.
Daar kan jy jou verstom aan Sy grootheids en heerlikheid. Dat Hy soveel groter is as wat ons ooit kan
dink. Soveel so dat ons sprakeloos, sonder genoeg woorde gelaat word en agterna, as ons daaroor
wil getuig, net nie genoeg woorde en beelde het om dit te verduidelik wat ons gesien het nie.
Hoe kan ‘n mens nou God en die heerlikheid van Sy woonplek in die hemel, aan mense vertel in
Afrikaans, Grieks, Hebreeus, of watter taal ookal?!

Daarom hoor ons Johannes strompel van die een beeld na die ander. Ons hoor hoe hy probeer om
met die beperktheid van die dinge wat hy ken ... lig en kosbare, kleurvolle juwele ... te vertel wat hy
gesien het toe hy God op die troon gesien het.
Hy vertel hoe Jesus Christus die deur was waardeur hy kon ingaan om God te kon sien. Soos wat
Hyself daar in Joh. 10:9 en 14:6 vir ons gesê het Hy is: die enigste ingang na die Vader toe. Ja, Hy is
nou vir ons die deur, na Sy dood en opstanding, wat vir ons oopstaan na die hemel toe.
Om daar God op die troon te sien. In Sy heiligheid, almag, alwetend, alwys, liefdevol, genadig ...
Totdat ons woorde net opraak.
Maar nie net vir Hom nie. Ook die skepping voor Sy troon. Besig om dag en nag, sonder ophou wie
Hy is, Sy karakter, wese en dade, te besing met alles wat tot hulle beskikking is - soos dit eintlik
bedoel is in God se oorspronklike skeppingsplan.
Ons sien daar die leeu, die koning van die diereryk; die bul, as die top-eksemplaar van alle mak diere;
die arend, as adelike verteenwoordiger van alle voëls; en dan die mens as die al-kroondraer onder
God se skepsels op aarde (vgl. Gen. 1:26-27).
En skielik verstaan ons: dit is eintlik hoe dit behoort te wees! God het alles gemaak, mens, dier en
die hele skepping, net met een doel: om Hom te eer, te loof en genot te bring. Elke dingetjie, op sy
unieke manier, is bedoel om te getuig oor Sy mag, liefde, genade en heerlikheid (vgl. Ps. 148). Dit is
soos hierdie reuse simfonie-orkes met al sy fantastiese instrumente en geskakeerde klanke. Alles
wat lewe en bestaan, lewe en bestaan eintlik net om God te loof en te eer!
Miskien moet ek en jy net vandag weer ‘n tydjie maak en buite gaan stap. Om te hoor, te sien en te
ervaar hoe elke berg, wolk, voëltjie, grassprietjie, met alles wat hulle het getuig oor God wat daar is.
Oor Hom wat ten volle in beheer is.
Sodat ons net weer kan onthou.

Openbaring 4(B) Met krone op ons kop dien ons Hom
Soms moet ons die genade ontvang om net weer ‘n slag die geheelprentjie te sien ... Om weer
perspektief te kry ... Dit is wat met Johannes daar tussen al die swart roet in die steenkoolmyn op
Patmos gebeur het. Hy het skielik God op die troon ontdek ... Net toe hy dalk kon dink dat alles
buite beheer is!
Boonop ontdek hy ook die hele skepping daar voor God se troon. Besig om Hom op die troon met
alles wat hulle het en is te loof en te eer. Maar hy het ook die kerk, die ekklesia van Jesus, uit alle
volke en tale, daar ontdek ... Gedurig besig om hulle krone af te haal, om dit eerbiedig voor die Een
op die troon neer te sit, as teken van hulle totale onderwerping aan Sy gesag.
Luister hoe vertel Johannes dit: “Ek het gesien daar staan ‘n troon in die hemel en op die troon sit
daar Iemand... Reg rondom die troon was daar vier en twintig ander trone, en op die trone het daar
vier en twintig ouderlinge gesit. Hulle het wit klere aangehad, en op hulle koppe was daar goue
krone.
Daar het weerligstrale, dreunings en donderslae van die troon af gekom. Vlak voor die troon het
sewe fakkels helder gebrand. Dit is die sewe Geeste van God...
Elke keer wanneer die lewende wesens heerlikheid, eer en dank toebring aan Hom wat op die troon
sit, wat tot in alle ewigheid lewe, kniel die vier en twintig ouderlinge voor Hom wat op die troon sit,
en aanbid Hom wat tot in alle ewigheid lewe. Hulle sit dan hulle krone voor die troon neer en sê:
‘Here, ons God, U is waardig om die heerlikheid en die eer en die mag te ontvang omdat U alles
geskep het; deur u wil het alles ontstaan en is dit geskep.’" (Op. 4:2-11)
In die ou tyd as ‘n koning in ‘n veldslag verslaan is, wys hy dat hy hom onderwerp deur voor die
oorwinnaar te kniel, sy kroon af te haal en dit dan voor daardie heerser se voete neer te sit. So sien
ons die vier en twintig ouderlinge doen. Vier en twintig van hulle. Simbolies vir die totale kerk van
die Here Jesus, Sy ekklesia. Van diegene uit die twaalf stamme van Israel, tot by Sy ander volgelinge
wat die vrug is van die getuienis van die twaalf eerste dissipels en hulle volgelinge.
Hierdie ouderlinge dra krone. Nie net omdat die mens die kroon of toppunt van God se
skeppingswerk is nie, maar veral omdat die mens wat Jesus Christus ontdek het as Verlosser en
Here, weer in sy heersersposisie as koning herstel is na die val in die sondeval.
Onthou: ons het hier met ‘n visioen te make. Alles is dus simbolies, profeties. En dus bedoel om
gelowiges van alle tye te help onthou ... midde al die swaar en pyn van elke dag ... dat ons geroep is
om as God se kroondraers en ambassadeurs op hierdie aarde, oor alle eeue uit te roep: "Here, ons
God, U is waardig om die heerlikheid en die eer en die mag te ontvang omdat U alles geskep het;
deur u wil het alles ontstaan en is dit geskep." Tiaan Jordaan, in sy boek, Openbaring Vandag, vertel
die volgende storie wat dit uitstekend illustreer.
Hierdie wêreld waarin ek en jy lewe, is soos ‘n groot internasionale maatskappy met ‘n baie ryk en
magtige eienaar. Alles daarin is presies na sy smaak gemaak en georden. Hy besluit egter om die
bestuur van hierdie maatskappy aan ander toe te vertrou; waarna Hy detail-instruksies vir die
doeltreffende bestuur daarvan vir die aangewese hoofde en lede daarin deurgegee het; en toe
vertrek hy.
Nie lank nie of elkeen in die maatskappy begin dink dat hy of sy self baas is. Mense het mekaar begin
domineer en hulle het eenvoudig die handleiding van die werklike eienaar eenkant laat lê. Die gees

van die maatskappy is gou deur die lelike oorheers. Sekere mense is bevoordeel en teenoor ander is
weer gediskrimineer, nagelang diegene in beheer dit wou doen. Naderhand was almal ongelukkig.
Maar eendag loop een van die werkers die werklike eienaar weer raak. (Eintlik het die eienaar dit so
beskik). Toe die werker uitvind wat die ware toedrag van sake was, sê hy verbaas: Dit is nou vir my
‘n openbaring! Weet u ooit wat tans in u maatskappy aangaan? Ja, sê die eienaar. Ek het volledige
detailverslae oor presies elkeen se doen en late. Eintlik is ek nog steeds volledig in beheer. Ek het
immers my maniere om my mag uit te oefen. En wanneer ek terugkom, sal ek met elkeen in die lig
van sy doen en late afreken.
Maar waarom kom u nie nou al terug nie? Hierop antwoord die eienaar: Wel, as ek nou kom, sal ek
byna almal bankrot moet verklaar en in die tronk moet gooi! En as die werker dan terugreageer:
Maar dit sal net reg wees, antwoord die eienaar: Ja, maar dit is nie my hart nie. Ek het die mense so
verskriklik lief. Daarom gee ek hulle tyd om self tot insig te kom en sake reg te stel. Maar gaan jy
nou en dra die boodskap oor.
Gaan vertel vir hulle wat jy ontdek het. En hoe lief hulle baas hulle steeds het ten spyte van alles.
Dalk leer hulle dan om weer hulle werk so te doen as een van die maniere om ook hulle baas lief te
hê. En dalk leer hulle om my handleiding te gehoorsaam. Herinner hulle ook daaraan dat ek alles
weet, en dat ek weer terugkom. Die persoon het dit so gedoen, en ook ander gekry wat hom gehelp
het. Sommige mense het wel ag daarop gegee, maar baie ander het gedink dit is sommer net ‘n
wolhaarstorie. Hulle het die boodskappers uitgelag en selfs gehaat. Vir diegene wat dit egter geglo
het, het die lewe nuwe betekenis gekry. Omdat hulle geweet het dat die hoof steeds in beheer is,
het hulle rustig geraak. Hulle het geweet Hy is besig om alles reg te stel!

Openbaring 5 Daar wag iets beter voorkant toe!
Kan jy jou vir een oomblik voorstel dat God nie werklik bestaan nie! En dat Jesus Christus net ‘n
gewone mens was wat eens gelewe het en toe gesterf het! Met ander woorde, kan jy jou voorstel
dat daar nie ‘n groter plan agter alles is nie! Of as daar wel ‘n God is met ‘n finale plan, dat daar
niemand op aarde is wat God genoeg kon vertrou om dit wat Hy in gedagte het, te laat gebeur nie!
As jy jou dit kan voorstel, verstaan jy iets van wat Johannes daar op Patmos emosioneel belewe het
toe hy gesien het wat hy gesien het: “In die regterhand van Hom wat op die troon sit, het ek ‘n
boekrol gesien wat aan die voor-en aan die agterkant vol geskrywe was en wat met sewe seëls goed
verseël was. Toe het ek ‘n sterk engel gesien wat met ‘n harde stem uitroep: ‘Wie is waardig om die
boek oop te maak deur die seëls daarvan te breek?’
Maar niemand in die hemel of op die aarde of onder die aarde was in staat om die boek oop te maak
en daarin te kyk nie. Ek het baie gehuil omdat daar niemand gekry is wat waardig was om die boek
oop te maak en daarin te kyk nie. Toe sê een van die ouderlinge vir my: ‘Moenie huil nie. Kyk, die
Leeu uit die stam van Juda, die Afstammeling van Dawid, het die oorwinning behaal en kan die boek
met die sewe seëls oopmaak.’
Toe het ek voor die troon wat omring was deur die vier lewende wesens, tussen die troon en die
ouderlinge, ‘n Lam sien staan, die Een wat geslag was. Hy het sewe horings en sewe oë gehad. Die
sewe oë is die sewe Geeste van God, wat oor die hele aarde uitgestuur is. Hy het toe gegaan en die
boek ontvang uit die regterhand van Hom wat op die troon sit.” (Op. 5:1-7)
In die wêreld waarin Johannes geleef het, het so ‘n boekrol gewoonlik die opdragte van die keiser
aan die goewerneurs oor die provinsies of aan die veggeneraals bevat. Hierin was al die beplanning
en opdragte opgeskryf, opgerol en verseël met die keiser se ringembleem, wat in rooi daarop
aangebring is.
Die inhoud daarvan sou gewoonlik geweldige gevolge vir menselewens gehad het. Hulle môre en
oormôre, en lewe en dood, was immers daarin vasgevang.
Net iemand met die nodige mag en gesag om dit uit te voer wat daarin staan, kon die seëls breek en
lees wat daarin staan.
In ‘n stukkende wêreld, vol pyn en lyding - waar die sondige mens eintlik maar net kry wat hy werklik
regverdiglik verdien - kon God se genadige liefdesplan vir ‘n nuwe aarde en ‘n nuwe hemel, vir ‘n
nuwe mense-familie vir God, net op een voorwaarde gebeur: as iemand met die nodige mag en
gesag die straf wat die mensdom eintlik regverdiglik verdien, kon wegneem sodat die heilige God
regverdiglik mense uit die mensdom genadig kan wees.
Dit is waarom daar ‘n kruis op Golgota moes staan!
Dit het alles verander. Daarsonder sou daar geen werklike troos op hierdie aarde wees nie.
Daarsonder was dit bloot hel op aarde. Was my en jou geskiedenis en toekoms sonder enige
diepere betekenis of bedoeling. Daarsonder was ons vasgevang in vandag se kortstondige vreugde
en genot, en was daar vir ons trane, ongeluk en pyn, geen werklike blywende hoop en troos nie.
Goddank, ‘n kruis het op Golgota gestaan waaraan Hy vir ons gehang het!

“Moenie huil nie. Kyk, die Leeu uit die stam van Juda, die Afstammeling van Dawid, het die
oorwinning behaal en kan die boek met die sewe seëls oopmaak.” (Op. 5:5)
Goddank, die Leeu van Juda was bereid om Lam te word. Was gehoorsaam-gewillig om namens ons
geslag te word. Sodat daar deur Sy wonde vir ons genesing kon kom. Sodat ons stukkende wêreld
met sy stukkende mensdom, wat gedoem was tot totale selfvernietiging, nou op pad kan wees na
iets beter ... na ‘n hoopvolle, nuwe toekoms.
Daarom hoef ek en jy nie vas te kyk en oordonder te word deur die realiteite van vandag in ons
lewens nie, want ons weet daar is meer as net dit. Oorwinning, verandering, deurbrake, genade,
genesing, lewe ... wag voorkant toe!
Daarom kan ek en jy waag om te glo ....
Daar is ‘n wonderwerk oppad
Die onmoontlike kan moontlik word
God self wil ons lei deur Sy stem na waarheen Hy met ons oppad is
Dat God selfs uit die slegste sleg wat met ons kan gebeur, of wat ons oor onsself kan bring,
die allerbeste vir ons kan laat voortkom.

Openbaring 6 Die seëls word oopgebreek
Hoe ‘n mens daarna kyk, maak uiteindelik die groot verskil! Dit is waarom twee mense na ‘n glas
wat 50 persent vol water is kan kyk, en een kan dit beskryf as “halfvol”, en die ander een as dat dit
“byna leeg” is.
Dit is presies wat God deur ‘n profetiese visioen vir Johannes laat sien as Hy vir hom die geskiedenis
van die wêreld wys. Hy teken vir hom hierdie reuse tafereel waar die een toneel deur ‘n ander
gevolg word. Ja, dat die wêreldgeskiedenis geteken kan word as ‘n toneel van stormende
perderuiters van vernietiging wat, as gevolg van die mens se sonde en vergryp, soos die golwe van
die see mekaar telkens in die geskiedenis volg.
Eers sien ons die een of ander tiran of wêreldmag wat alles wat voorkom wil verower en onder sy
mag kry. Dan, onvermydelik, soos ‘n klomp domino’s wat mekaar omstamp, is dit eers die vrede
tussen mense wat padgee; dan begin die mense mekaar in hulle derduisende op allerlei verskriklike
wyses vermoor en doodmaak; dan volg daar onvermydelik armoede en voedselskaarstes,
werkloosheid, noem maar op; en midde dit alles storm die angswekkende ruiter op sy vaal perd deur
en laat dood in al sy verskriklike vorms agter: dodelike siektes, epidemies en peste. So vernietig die
sondige mensdom hulle self telkens deur die geskiedenis heen.
Baie keer vra mense half onnadenkend: Maar waarom keer God dan nie dit alles nie! Hy kan mos!
Maar as jy hieroor begin nadink, besef jy: God kan nie die mensdom, aan wie Hy juis volkome
vryheid van wilskeuse gegee het – om Sy beelddraer te wees wat uit vrye Hom as God kan liefhê en
dien – nou na willekeur stuit en “red” van die gevolge van sy eie keuses nie. Maar, en hierin lê die
troos van hierdie profetiese visioen wat Jesus Johannes - en dus ook ons - laat sien: God is en bly
steeds in beheer. Dit is Sy groter plan wat midde dit alles afspeel. Dit is soos ‘n trein wat op twee
skynbaar totaal verskillende spore gelyktydig loop: wiele binne-in wiele! Midde al die verwoesting
wat die perderuiters veroorsaak, is God se plan, en die oordeel as gevolg van die mens se
afvalligheid, besig om te gebeur! God het dit nie alles veroorsaak nie, maar tog is dit Hy wat dit alles
inweef in die tafereel van Sy groter reddingsplan vir die mens. Omdat Christus Jesus aan ‘n kruis op
Golgotta gehang het en na drie dae uit die dood as Oorwinnaar opgestaan het, kan ons vir mekaar
steeds midde al hierdie ellende sê: Jesus het gekom juis hiervoor. Sodat ons lewe en dit in oorvloed
kan hê midde dit alles!
Oor al die gelowiges wat op allerlei wyses midde al hierdie ellende en vernietiging selfs hulle lewens
moes gee, toon Jesus ons, as die die vyfde seël van die boekrol van wêreldgebeure gebreek word,
hoe hulle bloed voor Sy altaar lê. Elke dag “herinner” dit Hom as’t ware aan hulle lot. En so
verswaar die oordeel oor dié wat hulle lewens geneem het net nog meer.
Hoor hoe vertel Johannes hierdie toneel: “Toe die Lam die vyfde seël oopmaak, het ek onder die
altaar die siele gesien van die mense wat doodgemaak is omdat hulle aan die woord van God en aan
die getuienis van Jesus vasgehou het. Hulle het hard geroep: ‘Hoe lank nog, heilige en getroue
Heerser? Wanneer voltrek U die oordeel en wreek U ons dood op die bewoners van die aarde?’ Aan
elkeen van hulle is daar lang wit klere gegee, en daar is vir hulle gesê om nog ‘n klein rukkie te wag,
totdat hulle mededienaars, hulle medegelowiges, wat net soos hulle ook doodgemaak gaan word,
almal daar is” (Op. 6:9-11).
Soos die bloed van Abel van ouds ten hemele geroep het, so roep hulle bloed tot God in die hemel
om wraak.

God se antwoord aan Sy lydende ekklesia, wat oor al die eeue op verskillende maniere sou ly en selfs
sterf vir hulle geloof, bly dieselfde: wees maar net geduldig! Weet ons, ons God weet van alles
waardeur ons hier op aarde moet gaan as Sy kinders. Daarom hoef en mag ons nie Sy oordeel op
mense om ons afbid nie. Ons moet maar steeds geduldig Sy evangelie aan hulle bly verkondig. God
se hart is immers dat almal, indien moontlik, gered sal word.
Een ding moet ons egter weet, en die oopbreek van die sesde seël herinner ons daaraan: God se
finale oordeelsdag is oppad in al sy verskrikking en finaliteit. Daaraan gaan niemand ontsnap nie. Sy
dit die konings op aarde, opperbevelvoerders, rykes, magtiges, slawe en vry mense. Niemand,
belangrik of onbelangrik, gaan hieraan ontkom nie. Mense gaan tevergeefs probeer wegvlug, maar
aan die wraak van God gaan geen ongelowige ontsnap nie.
Op daardie dag gaan almal weet: die genadetyd op aarde is verby. Al het hulle lewenslank Hom
dood-geredeneer en geleef asof Hy nie bestaan het nie. Nou is daar geen wegkomkans meer nie.
Soos Op. 6:16 en 17 dit teken: “Hulle het vir die berge en die kranse gesê: ‘Val op ons en bedek ons
vir die oë van Hom wat op die troon sit, en vir die toorn van die Lam. Die groot dag waarop Hulle die
oordeel sal voltrek, het aangebreek, en wie sal staande kan bly?’"
Voor die ontplooing van God se groter plan, waar ‘n nuwe hemel en ‘n nuwe aarde finaal ‘n
werklikheid gaan word, staan die onvermydelike werklikheid van die finale oordeel van God oor alle
mense. Soos ‘n massiewe, gloeiende oond. Maar tot dan, en hierin lê die genadeboodskap, tot dan,
is dit steeds genadetyd! Kan ons steeds vir die ongelowiges rondom ons sê: “God het die wêreld so
lief gehad dat Hy sy enigste Seun gegee het, sodat dié wat in Hom glo, nie verlore sal gaan nie maar
die ewige lewe sal hê. God het nie sy Seun na die wêreld toe gestuur om die wêreld te veroordeel
nie, maar sodat die wêreld deur Hom gered kan word. Wie in Hom glo, word nie veroordeel nie; wie
nie glo nie, is reeds veroordeel omdat hy nie in die enigste Seun van God glo nie.” (Joh. 3:16-18)

Openbaring 7 ‘n Skuilplek midde al die ellende
Vir so baie mense is die boek, Openbaring, met al sy visioene en prente van lyding en geweld, ‘n
ongemaklike boek wat hulle half bang maak en daarom vermy hulle dit.
Maar dit is juis wat die boek nie wil wees nie! Dit is immers profesie en profetiese visioene, en hoe
sê 1 Kor. 14 dit – “Iemand wat profeteer, rig hom tot mense en praat woorde wat geestelik opbou en
bemoedig en vertroos.”
Op. 7 bevestig dit aan ons. Hier teken Johannes wat Jesus hom laat sien. In my eie taal, iets wat as’t
ware midde al die ellende op aarde vir die volgelinge van Jesus, God se mense, ‘n skuilplek moet
bied midde al die stormwinde van elke dag.
Luister hierna en word getroos daardeur. “Daarna het ek vier engele by die vier hoeke van die aarde
sien staan. Hulle het die vier winde van die aarde vasgehou, sodat daar geen wind op die land en op
die see en teen enige boom sou waai nie. Ek het ook ‘n ander engel van die ooste af sien kom met
die seël van die lewende God. Hy het met ‘n harde stem geroep na die vier engele aan wie mag
gegee is om die land en die see te tref, en het vir hulle gesê: ‘Moenie die land en die see en die
bome tref nie. Ons moet eers die dienaars van ons God op hulle voorkoppe merk met die seël.’ Ek
het die getal gehoor van dié wat gemerk is: daar was honderd vier en veertig duisend. Hulle was uit
elke stam van die volk Israel ...” (Op. 7:1-4).
Stel jou die prentjie voor: hoe vier lewensgroot engele aan die ooste, weste, suide en noorde van
die aarde bokant die horison staan en die winde wat oor die aarde woed, soos lang wapperende
linnedoeke, tussen hulle vashou. Met hulle bewegings van 45 grade na elke kant, kontroleer en
beheer hulle elke wind van verandering en lyding waaraan ons lewe onderworpe is.
Watter troos bied dit nie vir ons nie! Ja, soos wat die einde van die tyd nader kom, gaan die Bose se
aanslag en die gevolge van sonde in intensiteit toeneem gedurende die “laaste dae”. As gelowige
volgelinge van Jesus is ons nie daarvan vrygestel nie. Maar tog ... word die volledige straf en oordeel
van God, in sy intensheid, teruggehou ... totdat God se uitverkore volgelinge gemerk en dus beveilig
is as Sy eiendom!
Raak ‘n bietjie stil en dink hieroor na. Dink weer daaroor na hoe God op ‘n dag in jou lewe, midde
alles wat op hierdie stukkende aarde vol stukkende mense gebeur, jou êrens gaan uithaal het. Hoe
Hy Homself aan jou kom voorgestel het en met jou begin praat het.
Dink na oor hoe die evangelieboodskap oor Jesus, en wat Hy ook vir jou kom doen het, op ‘n dag net
vir jou ‘n werklikheid geword het en jy dit begin glo het.
Maar die verdere troos is dat, midde daardie gebeure, is jy gemerk ... verseël deur die bloed van
Jesus Christus deur die werking en inwoning van God se Gees. Het jy God se eiendom geword, die
appel van Sy oog! Wie nou aan jou vat, vat aan die appel van Sy oog!
En so “bou” God vir jou ‘n skuilplek midde al hierdie stukkendheid en ellende wat rondom ons op
aarde heers, waar jy veilig kan gaan sit aan die voete van jou Herder. Waar Hy jou kan troos en
bemoedig, en kan verseker dat Hy sal sorg dat, wat ookal rondom jou en in jou lewe mag gebeur, dat
alles tot jou beswil uiteindelik sal wees, want jy is Syne!
Omdat jy in Christus Jesus glo en jou ewige redding van Hom en Hom alleen verwag, kan jy seker
wees dat jy een van die 144 000 uitverkorenes, in Openbaring 7 se prentjie, sal wees.

Die 144 000 is natuurlik net ‘n simbool. Drie maal vier maal twaalf maal twaalf maal driemaal tien.
Tekenend van hoe die Drie-eenheid, Vader, Seun en Gees, met mense op die aarde met sy vier
windrigtings, besig is. Besig is om uit die ganse mensdom gelowiges oor alle tye, uit die 12 stamme
van Israel, en later deur die werk van die 12 apostels en hulle volgelinge, die ekklesia, die kerk van
die Here Jesus, tot stand te bring. Ja, tot elkeen wat daar moet wees - die volle getal - daar is. Tien
maal tien maal tien, soos die getal 7, tekenend van iets wat volledig en volkome is.
Sien in jou verbeelding dat jy deel van hulle is. Sien jouself staan tussen “... ‘n groot menigte ... wat
niemand kon tel nie. Hulle was van elke nasie, stam, volk en taal en het voor die troon en voor die
Lam gestaan. Hulle het wit klere aangehad, en daar was palmtakke in hulle hande. Hulle het hard
uitgeroep: ‘Ons redding kom van ons God, wat op die troon sit, en van die Lam!’" (Op. 7:9-10).
Wat ‘n troos! Voor God se troon het ek en jy elke dag wit klere aan, skoongewas deur die bloed van
die Lam. Is ons oorwinnaars, kom wat wil, in Christus Jesus, ons Here! Oppad na ‘n nuwe hemel en
‘n nuwe aarde.
Is dit nie merkwaardig dat ons die hemel nie anders kan beskryf as met “nie-woorde” nie! En
daarmee bedoel ek dat al manier hoe ons dit kan beskryf is om te sê hoe dit nie daar gaan wees nie!
Luister hoe teken Johannes dit vir ons in Op. 7:15-17: “Daarom is hulle voor die troon van God en
dien hulle Hom dag en nag in sy tempel; en Hy wat op die troon sit, sal by hulle bly. Hulle sal nie
meer honger en nie meer dors kry nie; die son sal hulle nie brand nie en ‘n hittegloed ook nie, want
die Lam wat in die middel van die troon is, sal hulle herder wees en hulle na die fonteine met die
water van die lewe lei; en God sal al die trane van hulle oë afdroog."
Mag dit vir jou tot troos wees, wat ookal tans, of in die verlede, in jou lewe gebeur het!

Openbaring So lyk die groter, breër prentjie!
Om die tendense van die toekoms korrek te voorspel het groot besigheid geword in ons moderne
wêreld. Elke sakeman of groot besigheid wil immers graag vooraf weet wat wag op ons môre en
oormôre sodat ons onsself korrek kan posisioneer en proaktief kan voorberei en beplan.
Kan jy jou voorstel as die lewende God, ja, die enigste ware God, kom en jou uitlig uit die beperkinge
van jou huidige situasie en vir jou op ‘n plek neersit waar jy alles kan sien! Waar jy werklik alles kan
sien ... en boonop kan sien hoe dit inpas in die groter, breër prentjie!
In ‘n sin is dit wat ware Bybelse profesie is (waaroor 1 Kor. 14 onder andere praat). Ware Bybelse
profesie is wanneer God ‘n ander mens gebruik as Sy “tuinslang” en/of “mikrofoon”, om vir mense
te wys hoe lyk die dinge wat gebeur in ons lewens, van God se kant af.
Ek weet nie hoe dit daar in die gedeelte van die Here Jesus se kerk, waar jy Hom aanbid en dien, tans
lyk nie, maar in die Nederduitse Gereformeerde wêreld waaruit ek kom, het ons vir jare die bestaan
en die werklikheid van moderne Bybelse profesie, wat van God af kom, ontken. Omdat ons, saam
met mense soos dokter John MacArthur, geglo het dat hierdie gawe van die Gees, soos die gawes
van bonatuurlike wonderwerke en genesings, opgehou bestaan het met die totstandkoming van die
Bybel in sy vorm soos ons dit vandag ken (hier rondom die vierde eeu na Christus).
En hoe arm het dit ons nie gelaat nie! En dit terwyl God nog heerlik met ander van Sy mense in
ander dele van die Liggaam ook deur profesie (en bonatuurlike wonderwerke en genesings) gepraat
het!
In my eie lewe sou ek dit eers in 1993, toe ek reeds vir veertien jaar predikant in die NG Kerk was,
persoonlik ervaar en belewe! En watter bemoedigende, vertroostende en versterkende geestelike
ervaring was dit nie in my lewe nie (jy kan daarvan lees in my boek, WAARHEEN MET DIE NUWE
WYN).
Die boek, Openbaring, is niks anders as Bybelse profesie nie! Behalwe dat God self daarin vir Sy
mense (en dus ook vir ons) as’t ware kom uitlig tussen al die dinge wat ons visie gewoonlik so
beperk, en ons op ‘n plek neersit van waar ons alles kan sien, kom Hy deur Sy Gees in hierdie
profetiese woorde en wys ons hoe die hele wêreldgeskiedenis van Jesus se koms af tot aan die einde
inmekaar pas. En nie net een keer nie. Sewe keer! Ja, sewe keer, in sewe parallelle gedeeltes in
hierdie 22 hoofstukke, teken Hy vir ons profeties hoe dinge inmekaar pas. Meer as dit, help Hy vir
ons om verby die ooglopende sigbare werklikhede te kyk en om te sien wat agter alles wat gebeur,
sit! Wat daar gebeur waar ons gewoonlik nie kan sien nie!
Kom ek herinner jou net weer aan die sewe parallelle hoofdele van hierdie profetiese boek:
Openbaring 1 tot 3
Openbaring 4 tot 7
Openbaring 8 tot 11
Openbaring 12 tot 14
Openbaring 15 tot 16
Openbaring 17 tot 19
En Openbaring 20 tot 22.

Dit is dus werklik asof God ons innooi in Sy rolprentteater en vir ons die tydperk, wat ek sommer die
“tussentyd” wil noem, van sewe hoeke af kom wys. En dan is hierdie “tussentyd” die gebeure,
sigbaar en onsigbaar, van Jesus se eerste koms as mens af tot by Sy wederkoms. Dit handel dus elke
keer oor dieselfde tydperk wat net elke keer in ander simboliese taal en prentjies, met verskillende
aksente, vir ons geteken word.
As jy dit verstaan sal dit jou beskerm en help om nie verwar te word nie, of om gedeeltes verkeerd
uit te lê nie. Dit sal jou help om te verstaan dat die gedeeltes van die profesieë wat handel oor die
oopmaak van die sewe seëls, byvoorbeeld, en die gedeelte oor die sewe trompette en die bakke vol
wraak, almal na dieselfde gebeure in die geskiedenis verwys. Dit sal jou help om raak te sien hoe
daar telkens verwys word na hoe God se mense gedurende die geskiedenis vervolg is of word, maar
ook hoe God Sy mense midde dit alles beskerm. Asook hoe Sy oordeel en straf, Jesus se wederkoms,
en die laaste oordeel, in die groter prentjie inpas.
Dit alles sal jou help om die boodskap van die boek Openbaring werklik te verstaan. En dit help dat,
midde al die donker rondom jou en my, om tog ook die lig sal raak sien.
Dit help ook ons ontdek dat daar goeie rasionele redes is waarom ek en jy as gelowige volgelinge van
‘n lewende opgestane Jesus, in die lig van die boodskap van hierdie boek, positief en gelowigopgewonde
kan wees oor dit wat reeds in die geskiedenis gebeur het, asook oor dit wat môre en
oormôre nog op ons wag. Al weet ons ook dat daar nog moeilike tye op ons wag.
Sien, Openbaring wys vir ons die “telbord” aan die einde van die “wedstryd”! Ons weet reeds wie
hierdie “wedstryd” gaan wen en wat die uiteinde van alles, en ons plek daarin, gaan wees!

Openbaring 8 Oppad ...
Hoe goed onthou ek nie hoe ons, oppad na ons vakansie by die see, as kinders mekaar uitgedaag het
wie sien eerste die see nie! En as ons dan die see vir die eerste keer raakgesien het, hoe ons net nie
kon wag om uiteindelik daar te kom nie. Ek onthou maar te goed hoe ons, aanhoudend, teenoor ons
ouers klaend gevra het: Maar wanneer kom ons uiteindelik dan daar aan?
Die boek, Openbaring, is baie soos ‘n mens wat onderweg is na êrens wat vêr is. Jy reis deur
woestyne, diep valleie en soms oor onherbergsame terreine. In die proses word jy moeg, dors en
moedeloos, en jy begin uitsien na die einde. Maar die stad wil net nie kom nie. Soms sien jy uit die
verte die stad daar voor blink, maar dan is dit weer weg en lê net nog ‘n bult of vallei voor.
So werk Openbaring met ons. Net wanneer ons dink die einde is voor die deur, word ons horison
weer terugverskuif en word ons, soms hardhandig, terug in die werklikhede van ons bestaan
teruggeruk.
Ek onthou so goed hoe my oom wat in die Tweede wêreldoorlog was, vertel het hoe hulle midde al
die lyding, oorlogwerklikhede en dood, telkens gedink het: die einde het nou aangebreek! Maar dan
het daar maar weer rustiger tye gekom en uiteindelik is vrede gesluit en kon die gewone lewe maar
net weer aangaan.
Terwyl ‘n mens die boek Openbaring lees, weet ons seker: êrens voorkant toe gaan ons oor die
laaste hoogte, om meteens, stralend, voor ons in al sy heerlikheid, die hemelse Godstad te sien lê,
die nuwe Jerusalem. Laas het Openbaring, hoofstuk 7, ons daaraan herinner. Maar meteens is ons
weer terug in die werklikheid van die nou in hoofstuk 8. Wanneer die Lam van God die sewende en
laaste seël oopbreek, is daar eers ‘n stilte en dan word sewe trompette geblaas (Op. 8:1,2). ‘n
Oomblik van stilte wek mos afwagting, en beklemtoon eintlik wat gaan volg ... asof alles gespanne
stilbly en luister wat gaan volgende kom. Soos Sefanja sê: Wag in stilte op die Here God! Die dag
van die Here is naby! (Sef. 1:7) Die boodskap is duidelik: Wag ... luister ... hier kom verskriklike
dinge!
Dan blaas engele sewe keer met hulle trompette. En, onthou ons, trompetgeskal in die Ou
Testament was altyd simbolies bedoel as ‘n waarskuwing en oproep tot bekering. So ook hier. Kom
ons lees met hierdie verstaan hierdie verse.
“Die sewe engele met die sewe trompette het hulle toe gereed gemaak om daarop te blaas. Die
eerste engel het op sy trompet geblaas. Daar het hael en vuur gekom met bloed gemeng, en dit is op
die aarde gegooi. ‘n Derde van die aarde is verbrand, ‘n derde van die bome is verbrand, en al die
groen gras is verbrand. Die tweede engel het toe op sy trompet geblaas. Iets soos ‘n groot berg wat
brand, is in die see gegooi. ‘n Derde van die see het bloed geword, ‘n derde van alles wat in die see
lewe, het doodgegaan, en ‘n derde van die skepe het vergaan. Toe het die derde engel op sy
trompet geblaas. ‘n Groot ster wat soos ‘n fakkel brand, het van die hemel af geval. Hy het op ‘n
derde van die riviere en op die waterbronne geval. Die ster se naam is Bitterals. ‘n Derde van die
water het bitter geword, en baie mense het van die water doodgegaan omdat dit besmet was. Die
vierde engel het toe op sy trompet geblaas. ‘n Derde van die son en ‘n derde van die maan en ‘n
derde van die sterre is getref, sodat ‘n derde van hulle donker geword het. ‘n Derde deel van die dag
het nie lig gehad nie, en die nag ook nie.

Toe het ek ‘n arend hoog in die lug sien vlieg, en ek het hom met ‘n harde stem hoor skreeu: "Wee,
wee, wee die bewoners van die aarde wanneer die ander drie engele op hulle trompette gaan
blaas." (Op. 8:7-13)
Soos wat die eerste vier engele hulle trompette die een na die ander blaas, speel drie-dimensionele
beelde in ‘n warboel van beeld en klank voor ons af. Ongeag wie daar na kyk, en in watter tydvak van
die geskiedenis jy leef, herken jy dinge uit jou eie tyd wat rondom jou op aarde gebeur tussen die
dinge wat hier beskryf word. Wie van ons in die twintigste eeu sien nie die brande en die bomme in
‘n tipiese oorlogsituasie met al die bloed en lyke wat agtergelaat word nie! En as die tweede
trompet blaas, dink ons aan al die rampe op see en die uitwissing van ons visbronne en seelewe. Die
derde trompet se boodskap laat ons onvermydelik dink aan vulkaniese uitbarstings wat gepaard
gaan met verspoelings, skepe wat sink en tifone. En die water wat bitter raak, laat ons onvermydelik
dink aan al die waterbesoedeling en bitterheid as gevolg van watertekorte, vloede, oorstomings en
verspoelings.
Die vierde trompet se gebeure is nie so maklik om te interpreteer nie. Sou dit dui op
sonverduisterings, lugbesoedeling en ...?
Maar miskien is dit alles bedoel om ons sprakeloos te laat. Om ons te help om iets van die gevoel
van absolute verskrikking en magteloosheid te onthou as ons ons telkens vasloop teen een of ander
gevolg van sonde. Daar besef ons maar weer die oordeel van God as die mensdom maar weer
selfgesentreerd hulle vergryp het in hulle omgewing en die hele ekosisteem maar net verder
vernietig het. Met al die paniek en katastrofiese gebeure na alle kante toe as gevolg daarvan.
En dan treffend, as ‘n soort tussenspel, die prentjie van die engel met die goue wierrookbak vol van
al die gebede van die gelowiges midde al hierdie dinge wat gebeur. “‘n Ander engel het toe gekom
en by die altaar gaan staan met ‘n goue wierookbak. Daar is baie wierook aan hom gegee om dit
saam met die gebede van al die gelowiges op die goue altaar voor die troon te offer. Die rook van
die wierook wat deur die engel geoffer is, het saam met die gebede van die gelowiges opgestyg voor
God” (Op. 8:3,4)
So word ons getroos: ons gebede word gehoor! Ons gebede kan dinge verander! Ja, kan selfs
hierdie katastrofiese gebeure midde die mensdom, die aarde en skepping om ons, positief
beïnvloed! Daar is werklik krag in gebed!

Openbaring 9(A) Innerlike pyniging ...
Een van die mees merkwaardige gebeure tydens Jesus se lewe op aarde was toe Hy twee-ensewentig
van Sy volgelinge opdrag gegee en toegerus het om, soos Hy vir hulle gesê het: “Maak die
siekes daar gesond en sê vir die mense: ‘Vir julle is die koninkryk van God baie naby!’” (Luk. 10:9)
As hulle dan terugkom en met groot opgewondenheid vir Hom vertel van al die merkwaardige dinge
wat gebeur het, ja, selfs hoe mense wat demonies besete was, vry geword het, herinner Hy hulle
maar net weer daaraan dat ons as Sy volgelinge ons telkens gaan vasloop teen satan en sy
demoniese magte.
"Ek het die Satan soos ‘n weerligstraal uit die hemel sien val. Kyk, Ek het aan julle die mag gegee om
op slange en skerpioene te trap en om die vyand met al sy geweld te oorwin, sonder dat iets julle
enige leed aandoen. En tog moet julle nie bly wees net omdat die geeste hulle aan julle onderwerp
nie, maar wees veral bly omdat julle name in die hemel opgeskryf is." (Luk. 10:18-20)
Hierdie aarde was dus, na die sondeval, nou satan en sy magte se hoofkwartier. Die mens het
immers sy outoriteit om hier te heers as beelddraer van God, prysgegee aan satan.
Daarom moet ons nie verras wees as hy op allerhande wyses hier sy mag wil laat geld. Maar
Goddank, ons staan nie meer magteloos en hulpeloos teenoor al hierdie demoniese aanslae en
realiteite nie. As volgelinge van Jesus het ons mag en gesag om hom en sy magte teë te staan en
moet hulle van ons af wegvlug (lees maar weer ‘n keer wat in Jak. 4:7 hieroor staan).
As die vyfde engel sy trompet blaas, vertel Openbaring 9 vir ons: “Ek het ‘n ster gesien wat van die
hemel af op die aarde geval het, en die sleutel van die skag na die onderaardse diepte is aan hom
gegee. Hy het toe die skag na die onderaardse diepte oopgemaak, en daar het rook uit die skag uit
opgestyg soos die rook van ‘n groot oond. Deur die skag se rook is die son verduister en het die lug
donker geword. Toe het daar uit die rook sprinkane oor die aarde uitgeswerm. Aan hulle is dieselfde
vermoë gegee as wat skerpioene op aarde het. Hulle is aangesê om nie die gras van die aarde, die
plante en die bome kwaad aan te doen nie, maar net die mense wat nie die seël van God op hulle
voorkoppe het nie. Hulle is nie toegelaat om die mense dood te maak nie, maar wel om hulle vyf
maande lank te pynig. Die pyn wat hulle veroorsaak, is soos die pyn as ‘n skerpioen ‘n mens steek. In
daardie tyd sal die mense die dood soek en dit nie vind nie; hulle sal verlang om te sterwe, maar die
dood sal hulle ontwyk. Die sprinkane het gelyk soos perde wat regstaan vir oorlog. Op hulle koppe
was daar iets soos krone wat gelyk het asof dit van goud is. Hulle gesigte was soos die gesigte van
mense. Hulle het lang hare gehad soos vrouens se hare, en hulle tande was soos dié van leeus.
Hulle borskaste was soos ysterharnasse. Die gedreun van hulle vlerke was soos die gedreun van baie
strydwaens met perde wat opruk vir oorlog. Hulle het sterte met angels soos dié van skerpioene; en
in hulle sterte is hulle vermoë om die mense vyf maande lank kwaad aan te doen. Hulle het die
engel van die onderaardse diepte as koning oor hulle. Sy naam in Hebreeus is Abaddon, en in Grieks
het hy die naam Apollion” (Op. 9:1-11).
As God vir ons oë gee om werklik te sien wat sedert die sondeval, en dus ook na Jesus se koms op
aarde, aan die gebeur is, sien ons hierdie pandora se boks wat oopgemaak is. Onaardse gedrogte
maak telkens – as’t ware uit die helse dieptes - hulle verskyning om die mensdom, wat nie beskerm
is deur die bloed van Jesus nie, aan te val en te teister.
Wat hier beklemtoon word is dat hulle die mense gaan “pynig” en nie fisies gaan doodmaak nie. Dit
lyk dus vir my hierdie vyfde (en later ook die sesde) trompetgeskal kondig geestelike, innnerlike,
emosionele lyding aan. Ja, wat soos ‘n springkaanplaag mense gaan beroof van die oes van seëninge

wat eintlik vir hulle daar behoort te wees. Maar wat ook, soos die pynlike steke van ‘n skerpioen,
alles hier binne in mense laat pyn.
Paulus waarsku reeds teen die aanslae van die bose waarop ons almal bedag moet wees (Ef. 6:12) In
hierdie gedeelte in Openbaring gaan dit veral oor wat ongelowige mense gaan belewe. Omdat hulle
totaal onbewus is van die bose se bestaan en werk, gaan hulle letterlik van binne-af verwoes en
verniel word deur die gevolge van hulle eie keuses, eie dade en deur die dinge wat hulle najaag in
hulle soeke na selfbevrediging en sukses. Gaan hulle ten prooi val van al die dinge wat Paulus
beskryf wat so kenmerkend is as die sondige natuur van die mens in beheer is, naamlik haat, naywer,
selfsug, vyandskap, onsedelikheid, woede, wraak, losbandigheid, verdeeldheid, dwelmmisbruik (lees
maar 1 Tim. 3:14-15; Gal. 5:19-20).
Tog is God se onverstaanbare genade selfs daar vir hulle. Om soos die getal vyf aandui, selfs die
demoniese magte aan bande te lê in wat hulle mag en nie mag doen, en om die tye te beperk wat
hulle toegelaat word om die mens te pynig! Kyk ‘n mens na die mens se geskiedenis met hierdie oë,
sien jy telkens hoe God se genade die mensdom (ja, selfs die ongelowige twee-derdes wat nie eers
Christene wil wees nie) bonatuurlik beskerm en red van totale vernietiging wat soveel kere eintlik
noodwendig moes volg.
Die Hebreeuse woord, Abaddon, kan vertaal word met “Vernietiger”, wat een van die name van
satan is. En die Griekse woord, Apollion, is ‘n vervorming van die naam van die bekende Griekse god
van oorlog, Apollo.
‘n Mens sou seker nog meer uitvoerig kon uitbrei oor hierdie innerlike aanslag van die bose op
mense, en oor hoe die innerlike pyn van dinge soos jaloesie, geestelike aftakeling, verwerping,
manipulasie, vernedering en liefdeloosheid soos skerpioensteke, ja, soos vuur, mense van binne-af
kan aftakel en vernietig. Soveel so, dat hulle later voel dit is beter as hulle maar eerder sterf as om
verder dit te moet belewe. Maar ek wil afsluit en sê: hoe verskriklik moet dit nie wees om sonder
God in hierdie stukkende wêreld vol stukkende mense mens te moet wees nie!

Openbaring 9(B) Die duiwel is letterlik hier tussen ons los
Die een ding wat ek ontdek het oor wanneer God met ons as mense begin praat, is dat Hy ‘n baie
ekonomiese God is. Hy mors nie een woord nie en sê niks onnodig nie. Hy draai ook nie doekies om
nie. Soos ‘n ding is of gaan wees, so sê Hy dit vir ons.
Ook hier in Openbaring 9 waar Hy besig is om ons, tussen die trompetgeskal heen, te waarsku oor
wat in die geskiedenis van die mensdom op ons wag.
Ons het gehoor dat duiwel en sy magte letterlik los is hier rondom ons. Met die blaas van die sesde
trompet hoor ons: “Toe het die sesde engel op sy trompet geblaas. Ek het ‘n stem tussen die vier
horings van die goue altaar voor God gehoor. Die stem het vir die sesde engel, wat die trompet het,
gesê: ‘Maak los die vier engele wat by die groot Eufraatrivier vasgemaak is.’
Die vier engele wat gereed gehou is vir hierdie uur en dag en maand en jaar, is toe losgelaat om ‘n
derde van die mensdom dood te maak. Die aantal perderuiters van hulle leërs was miljoene der
miljoene en nog ‘n keer soveel. Ek het hulle getal gehoor. En in hierdie gesig het die perde en hulle
ruiters só gelyk: hulle het vuurrooi, donkerblou en swaelgeel harnasse aangehad. Die perde se koppe
was soos die koppe van leeus, en uit hulle bekke het daar vuur, rook en swael uitgekom. Deur
hierdie drie plae, die vuur, die rook en die swael wat uit hulle bekke uitgekom het, is ‘n derde van die
mensdom doodgemaak. Die perde se vermoë om skade te doen, is in hulle bekke en ook in hulle
sterte; want hulle sterte is soos slange en het koppe, en daarmee pynig hulle die mense.
Die ander mense, wat nie deur hierdie plae doodgemaak is nie, het hulle egter nie bekeer nie. Hulle
het aangehou met die aanbidding van bose geeste en van afgode wat hulle self gemaak het van
goud, silwer, koper, klip en hout, en wat nie kan sien of hoor of loop nie. Hulle het hulle ook nie
daarvan bekeer om moord, towery, onsedelikheid en diefstal te pleeg nie.” (Op. 9:13-21)
Van anderkant die Eufraat het die Jode van ouds net slegte dinge verwag. Dit was immers waar die
leermagte van die Assiriërs, Babiloniërs en dié van Partië vandaan gekom het. En veral dié van Partië
was bekend vir die harnasse wat beide die soldate en die perde gedra het.
Die vreesaanjaende prentjie van ‘n inval van sulke oorlogruiters van oorkant die grensrivier teken vir
ons hoe oorloë - die een meer intens as die ander - deur die eeue soos ‘n massiewe, verwoestende
en onkeerbare plaag die mensdom gereeld sal kom teister.
Agter hierdie oorloë staan natuurlik die gevalle engele, met ander woorde satan, die engel van die
lig, en sy mag gevalle engele, wat saam met hom teen God in opstand gekom het. Hulle doel is om
die mensdom te pynig, te vernietig, dood te maak, te belieg en te bedrieg op elke moontlike manier.
Natuurlik gebruik hulle “mens-agente” waar hulle kan. Ons moet dus nooit vergeet wat Paulus ons
geleer het nie: “Ons stryd is nie teen vlees en bloed nie, maar teen elke mag en gesag, teen elke
gees wat heers oor hierdie sondige wêreld, teen elke bose gees in die lug. Trek daarom die volle
wapenrusting aan wat God julle gee, sodat julle weerstand kan bied in die dag van onheil en, nadat
julle die stryd tot die einde toe gevoer het, nog op julle pos kan bly staan. Bly dan op julle pos,
toegerus met die waarheid as gordel om julle heupe, die vryspraak deur God as borsharnas, en die
bereidheid om die evangelie van vrede te verkondig as skoene aan die voete. Daarby moet julle
altyd geloof as skild in die hand hê, want daarmee sal julle al die brandpyle van die Bose kan afweer.
Sit verlossing as helm op en vat die swaard van die Gees, dit is die woord van God. Doen dit alles
biddend en smeek God by elke geleentheid deur die Gees. Wees waaksaam en bid gedurig vir al die
gelowiges.” (Ef. 6:12-18)

Wees gewaarsku: elke keer gaan die oorloë wat kom net meer brutaal en wreder as die vorige
wees! En, soos W Hendriksen sê, wees gewaarsku: tydens oorloë word mense soos duiwels!
Hoe goed ken ons dit nie! Lees jy die geskiedenis van die mensdom, sien jy telkens hoe oorlogsmal
diktators probeer om hulle mag met leuens en geweld te behou, en hoe oorloë as gevolg hiervan
volg. So was dit, so is dit en so sal dit wees totdat Jesus weer kom!
Behalwe dat God deur hierdie profetiese woord die werklikheid teken wat op ons wag, is dit
terselfdertyd bedoel as ‘n waarskuwing vir die mensdom, sodat hulle sal skrik en na Hom sal
terugdraai.
Maar die tragedie is, sê God, dat die meerderheid mense hulle nie gaan bekeer nie! Te midde van
die swart perd van honger wat steeds op die rooie van oorlog volg, en die vaal perd met sy
onvermydelike massagrafte kort op sy hakke, het die mensdom steeds koud, magsbelus en hard
soos ‘n klip gebly. Ons leer maar net nie. Alhoewel God se genadedeur steeds oopstaan, keer die
meerderheid mense maar net nie na God terug nie.
Tog ... moet dit nie ons as gelowiges ontmoedig nie. Midde al hierdie negatiewe realiteite het God
steeds met ons ‘n plan ...
En daaroor gesels ons volgende keer verder.

Openbaring 10 Wees My getuies!
In Openbaring 10 verskyn Jesus, die Christus, as ‘n Engel, soos ons Hom telkens reeds in die Ou
Testament leer ken het. Om Sy jong kerk hier op aarde aan hulle opdrag te kom herinner.
Kom ons lees wat daar staan: “Toe het ek ‘n ander engel, ‘n sterke, uit die hemel uit sien afkom. Hy
het ‘n wolk om hom gehad en ‘n reënboog bokant sy kop. Sy gesig was soos die son en sy bene soos
vuurpilare. In sy hand het hy ‘n oop boekie gehad. Hy het toe met sy regtervoet op die see en met sy
linkervoet op die land gaan staan en met ‘n harde stem uitgeroep soos ‘n leeu wat brul. Toe hy
uitroep, het sewe donderslae geantwoord.
En toe die sewe donderslae praat, wou ek dit opskrywe, maar ek het ‘n stem uit die hemel hoor sê:
‘Hou geheim wat die sewe donderslae gesê het; moet dit nie opskrywe nie.’
Die engel wat ek op die see en die land sien staan het, het toe sy regterhand na die hemel toe
opgelig en ‘n eed afgelê by Hom wat tot in alle ewigheid lewe, wat die hemel en wat daarin is, die
land en wat daarop is, die see en wat daarin is, geskep het. Hy het met ‘n eed bevestig: ‘Daar is geen
tyd meer oor nie. Op die dag wanneer die sewende engel op sy trompet gaan blaas, sal God se
verborge bedoeling met alles bereik word, soos Hy die blye tyding aan sy dienaars, die profete,
bekend gemaak het.’
Die stem wat ek uit die hemel gehoor het, het toe weer met my gepraat en vir my gesê: ‘Gaan kry
die oop boek daar in die hand van die engel wat op die see en die land staan.’
Ek het na die engel toe gegaan en vir hom gevra om die boekie vir my te gee. Hy sê toe vir my:
‘Neem dit en eet dit op. Dit sal jou maag bitter maak, maar in jou mond sal dit so soet soos heuning
wees.’
Ek het toe die boekie uit die hand van die engel gevat en dit opgeëet. In my mond was dit so soet
soos heuning, maar toe ek dit insluk, het my maag bitter geword. Toe het hulle vir my gesê: ‘Jy moet
weer God se boodskap aangaande baie volke, nasies, tale en konings verkondig.’” (Op. 10:1-11)
Dit is duidelik dat die Engel waarmee ons hier te make het nie net ‘n gewone engel was nie, maar
wel Jesus Christus self was. Kyk maar: Sy gesig was soos die son; die wolk om Hom dui dat God self
is hier is; die reënboog bo Sy kop, dui, soos die een om die troon van God (Op. 4:3), op God se
genade wat heeltyd teenwoordig en aan die werk is.
Hy het ‘n klein oop boekie in sy hand, omdat Hy hier ‘n klein, maar belangrike deel van Sy plan kom
bekend maak. Spesifiek oor wat die rol van die kerk gaan wees in hierdie tyd op aarde.
Maar eers is daar sewe donderslae, wat sewe boodskappe bevat het. Sekere dinge oor God se pad
met die mens is nie vir ons ore en vir bespiegeling beskore nie. Daarom, hoor Johannes, mag hy nie
daaroor skryf nie. Soms moet ons maar net tevrede wees om stil te bly oor dinge wat met ons en
ander mense gebeur waarvoor ons geen menslike verduideliking het nie.
Wat ons wel moet weet, sê God vir ons deur Openbaring 10: hierdie wêreld, soos ons dit ken, gaan
ten einde kom, is aan die verby gaan. En dit gaan met groot rampe en ellende gebeur (dit het ons
immers reeds vir mekaar gewys in die vorige hoofstukke van Openbaring). Maar wat nou belangrik
is, is om te verstaan dat God, midde dit alles, vir Sy mense, Sy ekklesia, ‘n ontsettend belangrike taak
het: “Jy moet weer God se boodskap aangaande baie volke, nasies, tale en konings verkondig.”

Die tyd is min. Net een trompet bly oor! Tog is mense in hulle miljoene besig om ongered die
ewigheid in te strompel!
Daarom moet ons eers God se Woord eet. ‘n Woord wat, aan die eenkant, soet soos heuning in ons
mond is. Dit bestaan immers uit die blye boodskap van die evangelie van redding wat vir ons lewe
en dit in oorvloed kan bedien. Maar die anderkant van hierdie selfde boodskap van genade is ook
die bitter van die wete dat elkeen wat hierdie woord nie aanvaar nie, God se oordeel gaan beleef.
Ook dat ons, wat die boodskap wel aanvaar het in geloof en daaroor gaan getuig, self vervolging en
lyding as gevolg daarvan in ons eie lewens gaan beleef, wat soms dit selfs vir ons bitter gaan maak.
Neem dit. Maak dit jou eie. Laat dit soos kos in jou bloedstroom opgeneem word. Laat dit jou voed
en sterk maak. Maak dit deel van jou gees en jou passie in die lewe. Sodat dit jou kan aanvuur om
uit te gaan en daaroor te getuig. Want God wil nie hê dat een mens verlore sal gaan nie.
Ons weet immers, met die blaas van die sewende trompet, gaan die finale oordeel oor die
ongelowige wêreld finaal kom: op hulle wag die hel van ‘n ewigheid sonder God!
Terwyl daar vir ons die belofte van ‘n nuwe hemel en ‘n nuwe aarde waar sal word. Dit is God se
einddoel. Hierheen is Hy met ons oppad.

Openbaring 11 Lyke in die strate
Om gehoorsaam Jesus te volg, gaan vervolging en selfs dalk jou lewe kos! Laat daar geen twyfel oor
wees nie.
Dit lees ons sommer op baie plekke in die Nuwe Testament. In Openbaring 11 profeteer Jesus
teenoor Sy mense dat om Sy getuies in hierdie stukkende wêreld vol stukkende mense te wees, baie
keer in die geskiedenis gaan beteken dat van ons se lyke soms sommer in die hoofstraat gelos gaan
word. As ‘n waarskuwing vir ander, maar ook om die meerderheid se minagting vir ons boodskap in
die openbaar ten toon te stel.
Kom ons kyk na hierdie hoofstuk in ‘n bietjie meer detail. In verse 1 en 2 herinner Jesus ons
profeties daaraan dat die God se ekklesia, Sy nuwe volk, soos die tempel van ouds gaan wees. Om in
hierdie tempel welkom te wees, moet jy deel wees van God se nuwe geslag priesters (soos 1 Pet. 2:9
en 10 elke gelowige volgeling van Jesus teken). Moet jy dus ‘n gelowige volgeling wees om deel te
wees van Sy volk wat hier welkom is.
God self is soos ‘n muur van vuur rondom Sy mense. Voortdurend kan ons verseker wees van Sy
beskerming. Ja, selfs as ons, soos die klein boekie van Openbaring 10 en 11 sê, terwille van ons
getuienis teenoor die res van die wêreld, bereid moet wees om, soos Daniël se vriende van ouds, in
die vuur gegooi te word om te sterf.
Die profetiese woord gaan verder: “Maar die voorhof, wat buitekant die tempel is, moet jy
heeltemal uitlaat en dit nie meet nie, omdat dit aan die heidene oorgegee is, en hulle sal die heilige
stad twee en veertig maande lank vertrap.
‘Ek sal aan my twee getuies opdrag gee, en hulle sal, met rouklere aan, my boodskap twaalf honderd
en sestig dae lank verkondig.’
Hulle is die twee olyfbome en ook die twee lampe wat voor die Here van die aarde staan. As iemand
hulle kwaad wil aandoen, kom daar vuur uit hulle monde uit en verteer hulle vyande. Só moet
elkeen doodgemaak word wat hulle kwaad sal wil aandoen. Hulle het die mag om die hemel toe te
sluit, sodat daar gedurende die hele tyd wanneer hulle God se boodskap verkondig, geen reën sal val
nie. Hulle het ook die mag om al die water in bloed te verander en om die aarde met allerhande plae
te tref so dikwels as hulle dit nodig vind. Wanneer hulle egter hulle getuienis klaar gelewer het, sal
die dier wat uit die onderaardse diepte uit kom, teen hulle oorlog maak, hulle oorwin en hulle
doodmaak. Hulle lyke sal in die hoofstraat van die groot stad lê waar hulle Here ook gekruisig is. Die
stad word sinnebeeldig Sodom en Egipte genoem. Mense van al die volke, stamme, tale en nasies
sal hulle lyke drie en ‘n half dae lank daar sien lê en nie toelaat dat hulle begrawe word nie. Die
bewoners van die aarde sal bly wees oor hulle dood en hulle daaroor verheug.” (Open. 11:2-10)
Twee en veertig maande, of 1260 dae, is die getalle-simbole in die Bybel vir die eindtyd, van Jesus se
eerste koms tot by Sy wederkoms. Daarom is dit ook die tyd wat God se mense blootgestel is aan
die werklikheid van ‘n wêreld waarin die meerderheid van die wêreld se bevolking op allerlei
maniere God se gesag gaan uitdaag en vertrap. En baie kere sal hulle teiken Sy mense wees.
Die lig in gelowige volgelinge van Jesus se lewens, as God se “lampe”, en die salwing en Godsvrug as
gevolg van God se Gees se werking in en deur hulle lewens, gaan maar altyd vir die wêreld daarbuite
soos ‘n plaende gewete wees; ‘n klip in die skoen waarvan die meerdheid van die mensdom net
ontslae wil raak.

God se Gees se bonatuurlike toerusting en gawes in hulle lewens gaan van hulle kanale maak
waardeur merkwaardige wonders kan gebeur. Wat gaan maak dat die evangelieboodskap uit hulle
mond letterlik die hemel vir miljoene kan oopsluit of toesluit.
Maar telkens in die geskiedenis gaan “...die dier wat uit die onderaardse diepte uit kom, teen hulle
oorlog maak, hulle oorwin en hulle doodmaak.”
Ons worstelstryd is immers teen Satan en sy bose magte. Hy sit agter al die haat en vyandskap teen
die ekklesia van God in hierdie wêreld van ons. En telkens gaan hy sy mens-agente gebruik om
letterlik miljoene van ons te vervolg, te treiter, te bespot, gevange te neem, te martel en selfs te
vermoor. En alhoewel die wêreld daarvan gaan kennis neem, gaan dit baie keer maar net nog ‘n
beriggie wees tussen die miljoene ander in die koerante en in ander media in die wêreld. En gaan
die wêreld se stilswye in werklikheid hulle goedkeuring vir wat gebeur verwoord.
Die bemoediging vir God se mense is dat dit nooit die laaste woorde oor een van hulle se lewens sal
wees nie. “Ons is meer as oorwinnaars ...” Ons weet daar wag vir elkeen van ons ‘n opstanding uit
die dood, maar ook die dag wat almal sal opstaan, wanneer Christus Jesus weer kom.
Vir ons is dit ‘n dag van vreugde, maar vir die res van die wêreld is dit ‘n dag van onbeskryflike angs.
Dit is immers die einde van hulle bekende wêreld wat hulle soos ‘n reuse aarbewing gaan tref.
Daardie gevoel van volslae magteloosheid, angs en totale chaos tydens so ‘n aardbewing is tekend
van die profetiese prentjie as die einde aanbreek vir die mense sonder God. Nou is dit die tyd
wanneer God nie meer Sy oordeel gaan terughou nie, en wat Sy genadetyd vir goed verby is.
Die verwysing na 7000 mense wat in die aarbewing gaan sterf, dui simbolies op die volle getal van
die dood en totale verwoesting en vernietiging wanneer die ergste van ergstes, die einde van ons
bekende wêreld, gaan aanbreek. Wanneer, saam met die opstanding van die gelowiges, God se
oordeel losbars oor ‘n wêreld wat enduit volhard het om Sy goeie nuus te verwerp.
Maar die laaste klanke van Openbaring 11 is nie dit nie. Dit is eerder ‘n sewende trompet wat blaas.
En daarmee saam hoor ons: “Daar was stemme in die hemel wat hard uitgeroep het: ‘Die
koningskap oor die wêreld behoort aan ons Here en sy Gesalfde, en Hy sal as koning heers tot in alle
ewigheid.’
Die vier en twintig ouderlinge wat op hulle trone voor God sit, het toe gekniel met hulle gesigte na
die grond toe en het God aanbid en gesê: ‘Ons dank U, Here God, Almagtige, U wat is en wat was,
dat U nou u groot mag gebruik en as koning heers. Die nasies was woedend, maar nou het die tyd
vir u oordeel gekom. Die eindtyd het aangebreek: die dooies word geoordeel; aan u dienaars, die
profete, en aan die gelowiges, dié wat U vrees, klein en groot, word hulle loon gegee; en dié wat die
aarde vernietig, word vernietig."

Openbaring 12 Oorlog teen die draak
Die hele geskiedenis op Planeet Aarde word in 17 verse in ons Afrikaanse Bybel in Openbaring 12
vasgevang. As ‘n stryd tussen God en Satan. Met as hoofkarakters: God ... ‘n vrou ... haar kind ... ‘n
bloedrooi draak ... en die nakomelinge van die kind.
Kom ons kyk en luister daarna. “Toe het daar ‘n groot teken in die hemel verskyn: daar was ‘n vrou
met die son as kleed om haar, die maan onder haar voete, en op haar kop ‘n kroon van twaalf sterre.
Sy was swanger en het geskree van die pyn, want die geboortepyne was daar.
Daar het ook ‘n ander teken in die hemel verskyn: daar was ‘n groot vuurrooi draak met sewe koppe
en tien horings, en op sy koppe was daar sewe heerserskrone. Sy stert het ‘n derde van die sterre
van die hemel saamgesleep en hulle op die aarde gegooi. Die draak het voor die vrou gestaan wat op
die punt was om ‘n kind te kry. Hy wou haar kind verslind sodra sy hom in die wêreld bring.” (Op.
12:1-4)
Dit is asof die wêreldgeskiedenis soos die rolprentdraaiboek voor ons afspeel. Met God as die
Regisseur wat die storie vertel. So kry ons geleentheid om te sien wat daar in die onsigbare gebeur,
waar ons normaalweg nie kan sien nie.
Dit is maklik om in te sien dat die draak Satan voorstel. Hy word immers reeds in die Ou Testament
die slang en die draak genoem (kyk ook Gen. 3:1-4; Jes. 27:1). Deur die geskiedenis sou hy alles in sy
vermoë doen om te verhoed dat die Jesuskind gebore sou word. Hy was immers getaak om as die
beloofde Messias en Redder die mensdom te red uit die hand van die Bose en sondemag.
Maar wie is die vrou dan? Sy kan nie net Maria wees nie. Sy is eerder simbool vir die mensdom, en
spesifiek Israel, die volk van God in die Ou Testament, van wie op baie plekke in die Bybel gepraat
word as “God se vrou” (kyk ook Jes. 50:1; Hos. 2:1). Soos wat die kerk in die Nuwe Testament die
“vrou van die Lam” genoem word, of die “bruid” (kyk ook Op. 21:9; 22:17).
In watter wonderlike kleure word sy nie geteken nie! Met ‘n sonnekleed aan, omdat sy die glans en
heerlikheid van God weerkaats. Met ‘n sterrekroon op haar kop, omdat sy bedoel is om in die Naam
van haar God oor hierdie aarde te heers. En met die maan aan haar voete, sien ons haar triomfeer
oor die donker van die bose nag wat heers in hierdie wêreld.
Kom ons kyk verder wat daar staan: “Sy het ‘n kind in die wêreld gebring, ‘n seun, bestem om al die
nasies met ‘n ystersepter te regeer. Haar kind is egter weggeruk na God en na sy troon toe, en die
vrou het na die woestyn toe gevlug waar God vir haar ‘n plek gereed gemaak het, sodat die mense
haar daar twaalf honderd en sestig dae lank kon versorg.
Daar het toe oorlog gekom in die hemel: Migael en sy engele moes oorlog voer teen die draak. Die
draak en sy engele het oorlog gevoer, maar hulle is verslaan. In die hemel was daar geen spoor meer
van hulle te vind nie, want die groot draak, die slang van ouds, wat die duiwel en die Satan genoem
word en wat die hele wêreld verlei, is uit die hemel uit gegooi. Hy is op die aarde gegooi en sy engele
saam met hom.” (Op. 12:5-9)
Voor ons oë speel die opstand van Satan en die engele - wat hulle aan sy kant geskaar het – in die
hemel af, en sien ons hoe hulle verslaan is in die hemel. Uitgewerp uit die hemel het Planeet Aarde,
met die sondeval-gebeure, hulle nuwe hoofkwartier geword. Om nou hier met alle mag en geweld
in hulle boosheid te regeer (kyk ook Joh. 12:31, waar Satan die “owerste van hierdie wêreld”
genoem word; en ook gedeeltes soos 2 Pet. 2:4; Judas, vers 6).

Kom ons lees die profetiese draaiboek verder: “Toe het ek ‘n stem in die hemel gehoor wat hard
uitgeroep het: ‘Nou het ons God die redding gebring, nou is sy mag en koningskap hier, en die gesag
van sy Gesalfde! Die aanklaer van ons medegelowiges is uit die hemel uit gegooi, hy wat hulle dag en
nag voor ons God aangekla het. Hulle het self die oorwinning oor hom behaal danksy die bloed van
die Lam en die boodskap waarvan hulle getuig het; en hulle het nie hulle lewens so lief gehad dat
hulle onwillig was om vir Hom te sterwe nie. Daarom, hemel en dié wat daarin bly, verheug julle.
Maar vir julle, land en see, wag daar ellende omdat die duiwel na julle toe gekom het met groot
woede en met die wete dat hy min tyd het.’
Toe die draak sien dat hy op die aarde gegooi is, het hy die vrou agtervolg wat die seun in die wêreld
gebring het. Maar aan die vrou is twee groot arendsvlerke gegee, sodat sy na die woestyn, na haar
plek toe, kon vlieg. Daar word sy die hele vasgestelde tyd, weg van die slang af, versorg. Die slang
het toe ‘n stroom water soos ‘n rivier uit sy bek agter die vrou aan uitgespoeg, sodat sy deur die
stroom meegesleur kon word, maar die aarde het die vrou te hulp gekom. Dit het oopgegaan en die
stroom opgesluk wat die draak uit sy bek uitgespoeg het.
Die draak was woedend oor die vrou en hy het weggegaan om oorlog te maak teen haar ander
nakomelinge wat die gebooie van God nakom en aan die getuienis vashou wat Jesus gelewer het.”
(Op. 12:10-17)
Watter wonderliker prentjie van wat gelowig-lewe in werklikheid beteken is daar as dit wat Jes.
40:31 vir ons teken: “ ... dié wat op die Here vertrou, kry nuwe krag. Hulle vlieg met arendsvlerke,
hulle hardloop en word nie moeg nie, hulle loop en raak nie afgemat nie.” Eers is dit die belewenis
van die vrou, en later dié van die nakomelinge van die kind (m a w ons as gelowige volgelinge van
Jesus) wat beleef hoe God ons help om die Bose en sy magte te oorwin. Self, uit eie krag is dit nie
moontlik nie, maar deur vas te klou in geloof aan die verlossende krag van wat Christus Jesus vir ons
en namens ons gedoen het deur Sy bloed en lewe aan die kruis, deel ons in Sy oorwinning.

Openbaring 13 Sien die een agter al die maskers raak
Toe God die gordyn vir ons in Openbaring 12 lig, sien Sy gelowige volgelinge van alle tye die
onsigbare drama raak wat eintlik agter die skerms afspeel: die bose se ewige stryd teen God en Sy
gelowige volgelinge. In hierdie stryd gebruik die bose sy agente om sy boosheid hier op aarde te
bevorder.
Openbaring 13 teken vir ons twee van sy helpers. Eers is daar die dier uit die see. “... En toe het ek
‘n dier uit die see uit sien kom met tien horings en sewe koppe. Op sy horings was daar tien
heerserskrone en op sy koppe godslasterlike name. Die dier wat ek gesien het, het soos ‘n luiperd
gelyk. Sy pote was soos dié van ‘n beer en sy bek soos dié van ‘n leeu. Die draak het sy mag, sy troon
en groot gesag aan hom gegee. Dit het gelyk asof hy aan een van sy koppe dodelik gewond was,
maar die dodelike wond het genees, en die hele wêreld het verwonderd agter die dier aan geloop.
Die mense het die draak aanbid omdat dit hy is wat die gesag aan die dier gegee het. Hulle het ook
die dier aanbid en gesê: ‘Wie kan met die dier vergelyk word? En wie kan teen hom oorlog voer?’
Die dier is toegelaat om verskriklike dinge te sê en te laster en om twee en veertig maande lank
gesag uit te oefen. Hy het teen God begin laster, hy het God se Naam en sy woonplek en dié wat in
die hemel bly, belaster. Aan hom is daar ook mag gegee om teen die gelowiges oorlog te maak en
hulle te oorwin; en daar is gesag aan hom gegee oor elke stam, volk, taal en nasie. Al die bewoners
van die aarde sal hom aanbid, almal wie se name nie van die skepping van die wêreld af geskrywe
staan in die boek van die lewe, die boek van die Lam wat geslag is nie.” (Op. 13:1-8)
Deur die geskiedenis heen het teoloë ure en ure se verduidelikings en detail-skemas gebruik om te
probeer verklaar wie hierdie “dier uit die see” sou wees – asook sy ander helper, “die dier uit die
aarde”. Maar dit is om die punt te mis van wat God hier werklik vir ons profeties teken. In
werklikheid wil Hy hê ons moet verstaan dit gaan nie oor die spesifieke historiese figure wat satan
deur die eeue gaan gebruik as sy helpers nie. Dit gaan oor satan, die bose, wat telkens met
verskillende maskers op, maar net sy eeuelange stryd teen God en Sy gelowige volgelinge ook hier
voortsit.
Ons worstelstryd is immers nie teen vlees en bloed nie, maar teen die bose magte in die lug ... In
elke tydvak in die geskiedenis gaan die vyand sy helpers hê. Daarom vind ons in hierdie profesie
simboliek wat Daniël reeds gebruik het om die bose se helpers in sy tyd en na hom te teken. In sy
dae was satan se helpers wêreldmagte soos dié van die Mede, die Perse, die Grieks-Masedoniese
ryke, en mense soos Antiogus Epifanus van die Griekse wêreldryk (in Dan. 7). In Johannes se dae
was dit die heersende regime van sy tyd, Rome, met sy sewe Romeinse regeerders vanaf keiser
Augustus tot by die tyd wat Openbaring geskryf is, plus die drie wat na Nero se dood vir kort tydjies
sou regeer.
Wat van belang vir ons is om raak te sien is dat hierdie “dier” vir 42 maande die mag gekry het om
namens die bose sy saak te bevorder. En hierdie getal ken ons. Dit dui simbolies die tyd aan van
Jesus se koms tot by die wederkoms.
Om die vyand as ‘n dier voor te stel is ook nie vir ons as moderne mense vreemd nie. Wie van ons
kan nie DJ Opperman se gedig, “Stad in die mis”onthou nie!
“Met gespanne spier ... loop ek deur die mis ... want om my sluip ‘n dier ... onder die wit duisternis;
... ek hoor hom knor en in oop mote ... waggel sy pilare-pote ... en sy kantelende rug metaal; ... op
hoeke van strate blink ... sy oë bloedbelope, ... en met sy hap sluit staal op staal.”

Die feit dat die “dier” uit die “see” uit opstaan, verbaas ons ook nie, want oral in die Skrif word die
nasies en volke van die wêreld soos ‘n onstuimige see vir ons geteken (vgl. Jes. 17:12-13).
Telkens in die geskiedenis sien ons volkere en nasies, met hulle verskillende heersers, wat in
ongeloof steeds in opstand teen God is. Wat aanhou om God se goeie nuus te verwerp en Sy
Gesalfde te misken, en gevolglik Sy volgelinge te vervolg.
Hoe goed ken ons dit nie ook in ons dae nie! Krone, mag, status, roem, regerings, konings en
staatsleiers in staatsbankette en perskonferensies, met goud en glans versier. Maar agter die blink
maskers sien ons deur God se bril die afskuwelike draak, wat die opgestane Here haat ... en Sy kerk
vervolg.
En dan is daar sy ander helper, “die dier uit die aarde”, wat skynbaar sag soos ‘n lammetjie is, maar
tog in werklikheid maar net sê wat die draak hom aansê om te sê (Op. 13:11-12).
Hierdie “dier” is die groot godsdienstige propaganda-masjien waarmee die draak oor die wêreld
mense wil manipuleer om in werklikheid hom alleen te aanbid en te dien. Noem dit “valse
godsdienste”, die wolf in skaapsklere, wat soos ware demoniese kulkunstenaars met woord-bedrog
en manipulasies deur die eeue alles in hulle vermoë doen om te sorg dat die een agter al die
maskers, satan, in werklikheid aanbid en gedien word.
Johannes het hom al in sy dae “die antichris” genoem (1 Joh. 4:2-3). In Efesiërs 2:2 praat Paulus van
“... julle laat lei deur die vors van die onsigbare magte, die gees wat daar nou aan die werk is in die
mense wat aan God ongehoorsaam is.” En in 1 Joh. 2:18 praat Johannes van “Julle het gehoor dat
daar ‘n antichris kom; en daar is nou reeds baie antichriste. Daaruit weet ons dat dit die laaste uur
is.”
Duidelik gaan dit hier oor die klimaat van ongeloof, ander wêreldgodsdienste behalwe die ware
Christus-diens, wêreldgesindheid, magsbeheptheid en al die ander pogings van die mens om maar
net alleen in beheer te wil wees van sy eie lewe. Maar ten diepste is dit egter niks anders as
vyandskap teen die evangelie en die Christus van die evangelie nie. Gaan dit oor mense, instansies,
magte, stelsels, wat as “die wettelose mens” (in Paulus se taal daar in 2 Tess. 2:3-4) hom verset teen
al wat God genoem word, en selfs sal voorgee dat hy God is.
Deur die eeue sal ons telkens sien hoe die vyand deur middel van sy helpers selfs die koop en
verkoop van mense probeer beheer, alles in ‘n poging om so die hele lewe van mense te probeer
beheer. Ja, dit gaan soos ‘n onsigbare simbool wees, 666, die simbool van die mens wat streef na
totale mag, waarmee die vyand mense as’t ware gaan merk wat deur hulle denke en lewenswyse
hulle aan sy kant geskaar het.
Elkeen wat nie bely dat Jesus die Seun van God, en Verlosser en Opgestane Here is, word beheer
deur die “gees van die antichris” en aanbid eintlik die een agter al die maskers.

Openbaring 14 In Jesus is ons meer as oorwinnaars
As ‘n mens die boek, Openbaring, lees en half verskrik verstrik raak in die realiteite van hierdie
oorlog tussen God en satan wat aan die gang is, is dit nodig om te onthou dat ons hier met profesie
te make het. Die hart en bedoeling van profesie is nie om ons bang te maak vir die toekoms nie,
maar eerder om ons te bemoedig.
Daarom is die simfonie van oorwinning wat ons hoor in Openbaring 14 balsem vir ons siel. Dan val al
die spanning weg en voel jy weer God se liefde koesterend om jou, en kan jy weer glo wat Paulus
daar in Romeine vir ons gesê het: Ons is meer as oorwinnaars in Christus Jesus ons Here!
Luister en word getroos! “Toe het ek die Lam op Sionsberg sien staan en by Hom honderd vier en
veertig duisend mense met sy Naam en sy Vader se Naam op hulle voorkoppe geskrywe. En ek het
‘n geluid uit die hemel uit hoor kom wat soos die gedruis van ‘n groot watermassa en soos die
gedreun van swaar donderweer geklink het. Die geluid wat ek gehoor het, was ook soos dié van
siterspelers wat op hulle siters speel. Hierdie mense sing ‘n nuwe lied daar voor die troon en voor
die vier lewende wesens en die ouderlinge. Niemand anders as net hierdie honderd vier en veertig
duisend mense, wat van die aarde af losgekoop is, kon hierdie lied leer nie. Dit is hulle wat hulle nie
met vrouens besoedel het nie; hulle het kuis gebly. Hulle volg die Lam waar Hy ook al gaan. Hulle is
onder die mense uit losgekoop as eerstelinge vir God en vir die Lam. Uit hulle mond het daar nooit
‘n leuen gekom nie. Hulle is onberispelik.” (Op. 14:1-5)
Honderd vier en veertig duisend is nou al ‘n getal wat ons baie goed ken. Wat vir ons al God se
mense oor alle tye teken wat gelowig aan Hom getrou gebly het en Hom bly volg het, kom wat wil.
As jy, saam met my, Jesus Christus in geloof aangeneem het as jou persoonlike Verlosser en Here,
kan jy verseker weet jy gaan ook daar wees. In geloof kan ek en jy onsself op daardie dag daar sien,
as deel van die bruid van Jesus die Bruidegom, getrou tot die einde net aan Hom.
Hy het ons immers losgekoop en vrygemaak van al die bande wat ons gebind en verhoed het om
Hom as die Bruidegom vir ewig lief te hê. Sy dit die bande van sonde, die mag van die bose, die mag
van die wêreld om ons, en uiteindelik ook die mag van die dood. Ons is immers losgekoop en
vrygemaak deur die sterwe en kruis van Jesus. Sy opstanding uit die dood en die inwoning van Sy
Gees in ons is ons waarborg hiervan. Daarom kan ons weet en glo: ons sal ook eendag daar wees en
deel in Sy finale oorwinning oor alle magte aan die einde van die tyd. Daarom kan ons nou al, lank
voor die tyd, in geloof onsself sien wag op Hom, die Bruidegom, wat finaal Sy bruid kom haal vir die
bruilof.
Natuurlik is alles nog nie verby hier op aarde nie. Ons is nog nie daar nie. Sekere dinge moet nog
eers hier gebeur voor daardie finale dag en wederkoms van die Bruidegom. Daarom skuif die fokus
terug na die finale gebeure hier op aarde voor Hy weer kom.
Luister hoe vertel Op. 14 dit: “Toe het ek ‘n engel hoog in die lug sien vlieg. Hy het ‘n goeie
boodskap gehad wat vir ewig van krag bly. Hy moes dit aan die bewoners van die aarde, aan elke
nasie, stam, taal en volk verkondig, en hy het met ‘n harde stem uitgeroep: ‘Vrees God en gee aan
Hom die eer, want die tyd het aangebreek vir sy oordeel. Aanbid Hom wat die hemel en die aarde,
die see en die waterbronne gemaak het.’
‘n Tweede engel het agter die eerste aan gevlieg en uitgeroep: ‘Geval, geval het die grote Babilon
wat al die nasies van die dwelmdrank van haar onsedelikheid laat drink het.’

‘n Derde engel het agter die eerste twee aan gevlieg en hard uitgeroep: ‘Wie die dier en sy beeld
aanbid en ‘n merk op sy voorkop of op sy hand aanvaar, sal van die wyn van God se toorn moet
drink...” (Op. 14:6-10)
Die boodskap van die evangelie, wat vir altyd geld, moet ook nog in hierdie laaste van laaste dae
verkondig word. Tot op die laaste van laaste dae sal ons God se genade onophoudelik hoor roep dat
mense hulle tog moet bekeer, want Hy wil nie dat een verlore sal gaan nie.
Want, laat die een wat ore het om te hoor, hoor dat Babilon, die ongelowige wêreldmag onder die
heerskappy van die bose, wat so vyandig teenoor God en Sy mense deurentyd staan, in wese klaar
verslane vyande is. In God se agenda is die bose en sy regime op aarde se einde klaar vas geteken:
gedoem en totaal verslaan!
Met daardie sekere wete kan ons die einde tegemoet stap en weet die ergste van ergstes is oppad.
God se regverdige woede oor sonde en teenoor die bose en almal wat hulle aan sy kante geskaar het
oor die eeue, wag soos ‘n beker vol galbitter wat deur hulle gedrink gaan word. Elkeen wat nie
gelowig gekies het om te glo dat Christus Jesus reeds aan die kruis die volle straf vir jou sonde en
ongehoorsaamheid gedra het nie, sal gevolglik self die volle gloed van God se toorn as gevolg van
daardie sonde en ongehoorsaamheid moet dra! Niemand gaan dit ontsnap nie!
Luister daarom na die Woord van God in die verband: “Toe het ek ‘n wit wolk gesien. Op die wolk
het daar Iemand soos die Seun van die mens gesit. Hy het ‘n goue kroon op sy kop gehad en ‘n skerp
sekel in sy hand.
‘n Engel het uit die tempel uitgekom en hard geroep na Hom wat op die wolk sit: ‘Steek u sekel in en
oes, want die tyd het gekom om te oes. Die aarde is ryp vir die oes.’ Hy wat op die wolk sit, het toe
sy sekel ingesteek op die aarde, en die aarde is afgeoes.
Toe het daar ‘n ander engel uit die tempel wat in die hemel is, uitgekom. Hy het ook ‘n skerp sekel
gehad. Nog ‘n ander engel het van die altaar se kant af gekom. Hy het mag oor die vuur gehad en
het met ‘n harde stem geroep na die engel wat die skerp sekel het, en vir hom gesê: ‘Steek jou skerp
sekel in en sny die druiwetrosse van die wingerd op die aarde af, want sy druiwe het ryp geword.’
Die engel het toe sy sekel op die aarde ingesteek. Hy het die wingerd op die aarde afgeoes en die oes
in die groot parskuip van God se toorn gegooi.” (Op. 14:14-19)

Openbaring 15 Saam met die kore gelowiges sing ons op die
strand
Stel jou voor jy staan langs Moses en die Israeliete terwyl hulle terugkyk oor die see waarin die
laaste van die Egiptiese leermag met hulle strydwaens tussen die golwe verdwyn! Hoor hoe Moses
sing: "Ek wil tot eer van die Here sing omdat Hy hoog verhewe is... Die Here is my krag en my
beskerming. Hy het tot my redding gekom. Hy is my God ... Die Here is oorwinnaar in die stryd, sy
Naam is ‘die Here’! ... U regterhand, Here, gedug in sy krag, u regterhand, Here, verpletter die vyand
... U vernietig wie teen U opstaan, U laat u toorn woed, dit verteer hulle soos kaf... Here, U het ‘n
plek vir u troon voorberei, u hande, Here, het ‘n gewyde plek gereed gemaak. Die Here regeer tot in
ewigheid!" (Eks. 15:1-18)
Met hierdie lied in jou ore, draai jy om en skielik staan jy langs God aan die einde van die tyd en kyk
jy deur Sy oë na die telbord; weet jy, ten spyte van alles wat tans rondom ons aan die gebeur is: die
oorwinning is reeds verseker! Dit is uit en gedaan en klaar!
Dit is die bemoedende boodskap van Openbaring 15. Dit is asof God vir ons ‘n bril opsit in hierdie
hoofstuk waarmee ons aan die einde van die tyd profeties kan terugkyk. Waarmee ons as’t ware
anderkant die see van volkere staan en terugkyk en sien hoe, midde al die vlikkerende vlamme van
lyding en God se finale oordeel, die see seepglad en rustig word.
Hoor ons hoe Jesus Christus, die Lam van God sê: Ek sal My volgelinge deur dit alles getrou dra
sodat hulle aan die einde op die ewige strand kan staan en terugkyk. Skielik weet ons hier binne:
ons is meer as oorwinnaars in Christus Jesus wat ons krag gee!
Laat hierdie woord jou ook bemoedig midde wat ookal in jou lewe tans aan die gang is! Weet, jy
gaan tussen daardie kore op die strand staan aan die einde en saam met hulle God loof en prys!
Hoor hoe jy saam met daardie koor van gelowige volgelinge van Jesus die lied van die Lam sing:
"Groot en wonderbaarlik is u dade, Here God, Almagtige. Reg en betroubaar is u optrede, Koning van
die nasies. Wie sal U nie vrees nie, Here, en u Naam nie verheerlik nie? U alleen is heilig! Al die
nasies sal kom en U aanbid, want hulle sal sien dat u handelwyse regverdig is." (Op. 15:3-4)
Dan verander die toneel voor ons. Skielik sien ons hoe die tempel se deure toegaan!
Vir duisende jare het God in Sy groot genade en liefde die mensdom uitgenooi: Kom tog, laat ons
die saak met mekaar uitmaak ... Bekeer julle en laat julle red uit hierdie ontaarde geslag uit! Maar
op ‘n dag, aan die einde van alles, gaan daardie genadetyd verby wees. Gaan God uit Sy woonplek,
Sy tempel, reuse engele stuur met bakke vol van Sy regverdige wraak oor die mens se volhardende
ongeloof.
Kan jy jou indink: daar kom ‘n dag wat God se genadetyd verby is! Daar kom ‘n dag wat mense
onverdun die volle gloed van die verskriklike gevolge van hulle volhardende ongelowige keuses gaan
proe!
Luister hoe teken God hierdie gebeure aan die einde vir ons profeties: “... die sewe engele wat die
sewe plae bring, het uit die tempel uitgekom. Hulle het helder blink klere aangehad, en elkeen het ‘n
goue band om die bors gehad. Een van die vier lewende wesens het toe aan die sewe engele sewe
goue bakke gegee, gevul met die toorn van God, van Hom wat tot in alle ewigheid lewe. Die tempel
het vol rook geword vanweë die heerlikheid en die mag van God, en niemand kon in die tempel
ingaan voordat die sewe plae van die sewe engele hulle einde bereik het nie.” (Op. 15:6-8)

God het vir eeue geduldig uitgehou en gewag. Vir eeue het Hy Sy regverdige woede en oordeel oor
sonde en die ongeloof van die grootste gedeelte van die mensdom beteuel. Sodat soveel as
moontlik mense nog geleentheid kon kry om hulle te bekeer.
Hy het hulle immers so liefgehad ... Hy wou hulle so graag genadig wees. Hy wou hulle so graag
bedien met lewe en dit in oorvloed in Christus Jesus. Daarvoor het Hy immers Sy Seun en Sy Seun se
lewe gegee. Daarvoor het Hy, voordat daar sprake van tyd of enigiets anders was ... voordat daar ‘n
skepping en ‘n planeet Aarde was ... ‘n verlossingsplan bedink wat vir die nuwe geslag mense wat Hy
gaan skep, onverdiend, ‘n brug kan voorberei terug na Hom toe. Het Hy ‘n bevrydingsplan bedink
om uit hierdie nuwe geslag mense ‘n bruid los te koop om vir Sy Seun ‘n Bruid te wees.
Maar nou is die tyd om gered te word vir ewig verby. Die maat is vol. Nou gaan God se oordeel en
woede oor sonde en ongeloof en die boosheid op aarde hom uitwoed! En niks kan dit keer nie!

Openbaring 16 Sewe bakke vol verskrikking
Het jy al ooit in een van hierdie deurskynende hysbakke gery wat so teen die wand van ‘n gebou al
hoër boontoe beweeg? En gesien, hoe hoër jy ry, hoe meer kan jy werklik sien wat onder gebeur?
Dit is dalk ‘n prentjie wat ons kan help om die boek, Openbaring, in sy sewe dele, beter te verstaan.
In al sewe dele sien ons dieselfde tydperk en dieselfde gebeure in daardie tydperk, maar elke keer,
van ‘n bietjie hoër, sien ons net ‘n bietjie meer en dalk, hier en daar, vanuit ‘n ander hoek, met ‘n
bietjie ander fokus.
Om Openbaring 16 reg te verstaan, moet ons onthou dat ons ook hier, soos in die ander dele, nog
steeds kyk na die tydperk van Christus Jesus se eerste koms tot Sy wederkoms. Dit wat ons
voorheen sien gebeur het toe die trompette geblaas het, is ook hier aan die gebeur as die
wraakbakke uitgegooi word. Maar dit is asof ons dit sien uit die oë van die Een vir wie een dag soos
‘n duisend jaar en ‘n duisend jaar soos een dag is. En onthou, Hy is dié Een, die lewende God, wat
presies weet hoe dinge uiteindelik gaan gebeur en hoe die laaste van dae, voor Jesus se finale koms,
daarna gaan uitsien.
Ons lees hoe hierdie “harde stem” uit die hemel vir die sewe engele ‘n finale opdrag gee. God se
geduld met die mensdom is op. Sy genadetyd is bykans verby. Die mens moet nou die bitter proe
vir hulle keuses en lewenswyses. Sien, die mens het nog nooit geglo dat God ernstig was toe Hy bv.
in Rom 6:23 gesê het dat die straf vir sonde die dood is nie, en dat ons reeds hier op aarde iets
daarvan gaan proe en beleef nie.
Die realiteit is dat die selfgesentreerde mens besig is om gevolglik dood te bedien aan die mense om
hom, maar ook aan hierdie wonderlike, gebalanseerde ekosisteem van die skepping rondom hom.
Daarom is die hele ekosisteem besig om totaal ineen te stort en vernietig die mensdom homself en
miljoene rondom hom. Openbaring 16 teken dit vir ons.
“Toe het ek uit die tempel ‘n harde stem vir die sewe engele hoor sê: "Gaan gooi die sewe bakke,
gevul met die toorn van God, op die aarde uit!"
Die eerste engel het toe gegaan en sy bak op die land uitgegooi... kwaadaardige en pynlike swere
(het) uitgekom aan die mense wat die merk van die dier aan hulle het en wat sy beeld aanbid. Die
tweede engel het sy bak in die see uitgegooi. Dit het bloed geword soos die bloed van ‘n dooie, en
alles wat in die see lewe, het doodgegaan. Die derde engel het sy bak in die riviere en die
waterbronne uitgegooi. Dit het ook bloed geword.
Toe het ek die engel wat oor die water toesig hou, hoor sê: ‘U is regverdig, U wat is en wat was, U,
die Heilige, omdat U hierdie oordeel voltrek het; want hulle het die bloed van die gelowiges en van
die profete vergiet, en U het hulle self bloed laat drink. Dit het hulle verdien.’ Toe het ek die engel
wat oor die altaar toesig hou, hoor sê: ‘Ja, Here God, Almagtige, betroubaar en reg is u oordele.’
Die vierde engel het toe sy bak op die son uitgegooi. Daardeur is aan die son die vermoë verleen om
die mense met vuur te brand. Die mense is deur ‘n groot hitte gebrand, en hulle het die Naam
gelaster van God wat die mag oor hierdie plae het. En hulle het hulle nie bekeer nie en aan Hom nie
die eer gegee nie.
Die vyfde engel het toe sy bak op die troon van die dier uitgegooi, en daar het duisternis oor die
koninkryk van die dier gekom. Die mense het hulle tonge stukkend gebyt van die pyn en het die God

van die hemel gelaster oor die pyn wat hulle moet verduur, en oor die swere. En hulle het hulle nie
bekeer van hulle verkeerde praktyke nie.
Die sesde engel het toe sy bak op die groot Eufraatrivier uitgegooi. Die water daarvan het opgedroog
om ‘n pad vir die konings uit die ooste oop te maak. Toe sien ek uit die bek van die draak en uit die
bek van die dier en uit die mond van die vals profeet drie onrein geeste kom wat soos paddas lyk.
Hierdie geeste, wat wondertekens doen, is bose geeste. Hulle gaan na die konings van die hele
wêreld toe om hulle byeen te bring vir die oorlog op die groot dag van God, die Almagtige.
‘Kyk, Ek kom onverwags soos ‘n dief. Geseënd is die een wat wakker bly en sy klere reghou, sodat hy
nie kaal hoef te loop en die mense sy skande sien nie.’
Die geeste het die konings byeengebring op die plek wat in Hebreeus Armageddon genoem word.
Die sewende engel het toe sy bak in die lug uitgegooi. Van die troon in die tempel af het daar ‘n
stem hard uitgeroep: ‘Dit is verby!’ Toe het daar weerligstrale, dreunings en donderslae gekom.
Daar was ook ‘n groot aardbewing soos daar nog nie was vandat die mens op die aarde gekom het
nie, so ‘n geweldige groot aardbewing was dit... En die mense het God gelaster oor die plaag van die
hael, omdat die plaag verskriklik groot was.” (Op. 16:1-21)
Dit is asof alles wat op aarde gebeur het, van Christus Jesus se eerste koms tot voor Sy wederkoms,
hier gekondenseer in 21 verse beskryf word. Natuurlik simbolies, as sewe bakke van God se wraak
wat oor die hele skepping uitgegooi word.
Kyk jy mooi, sien jy hoe die mensdom teen homself en teen die hele skepping draai, en hoe alles in
die prosese vernietig word. Omdat hulle gekies het om hulle teen God en Sy plan vir die skepping te
verset.
Alhoewel hulle eintlik maar net die gevolge proe van hulle eie keuses, is selfs die verskriklike gevolge
van hulle keuses God se laaste pogings om hulle te roep tot bekering. Maar die tragedie is dat die
meerderheid nog steeds volhard in hulle rebellie teen Hom en Sy planne.
Daarom sien ons, uit God se perspektief, soos die gebeure van die sesde wraakbak ons wys, hoe alles
in werklikheid een groot oorlog is tussen God en die mens en die skepping wat Hy gemaak het. Soos
hierdie reuse geveg ... tot daardie finale dag met Jesus se wederkoms.
Dan gaan dit wees soos daardie tyd toe koning Josia gesterf het (vgl 2 Kron. 35:23; 2 Kon. 23:29),
waarna die profeet Sagaria reeds profeties verwys het toe hy gesê het: “Daardie dag sal daar in
Jerusalem meer getreur word as wat daar oor Hadad-Rimmon getreur is in die Megiddovlakte.” (Sag.
12:11)
Sien, ek is oortuig dat Armageddon, soos die res van die boek, Openbaring se inhoud, simboliese
betekenis het. En dat dit kom van die Hebreeuse woord, Har Megiddo, wat beteken, as dit vertaal
word, “Berg van Megiddo”.
Soos wat die volk van God van ouds eers werklik besef het wat Josia se hervormingswerk se impak
was met en na sy dood, so gaan daar ‘n dag kom wat die mensdom, soos die Jode van ouds daar op
die vlaktes van Hadad-Rimmon, naby die berg van Megiddo, reg aan die einde, met nuwe oë na
Jesus gaan kyk. Maar dan gaan dit te laat wees!

Reeds met die kruisdood en opstanding van Jesus is die mag van Satan en al die wêreldryke van die
bose se mag gebreek en vir altyd onderwerp aan God se groter plan (vgl Kol. 2:15). Maar die
grootste deel van die mensdom glo dit nie en sal dit ook nie glo nie ... tot die einde van eindes toe.
En tog, weet verseker, kom daar ‘n dag waarvan Paulus reeds profeties gepraat het as hy in Rom.
14:11 sê: “.... want daar staan geskrywe: ‘So seker as Ek lewe, sê die Here, voor My sal elke knie buig,
en elke tong sal bely dat Ek God is.’" (vgl Fil. 2:10)
Maar daardie dag, sê Op. 1:7, gaan dit te laat wees. “Kyk, Hy kom met die wolke, en al die mense sal
Hom sien, ook hulle wat Hom deurboor het; en al die volke van die aarde sal oor Hom in selfverwyt
weeklaag. Ja, dit is seker!”
Dan is dit te laat, want alles is verby. God se genadetyd vir ongelowiges is vir altyd verby!

Openbaring 17 ‘n Prostituut op haar laaste reis
Kan jy jou dit voorstel: die helderrooi dier met sy sewe koppe en tien horings! Aan die eenkant lyk
hy soos ‘n luiperd, met pote soos ‘n beer en die bek van ‘n leeu. En dan sien jy haar ... wydsbeen op
sy rug ... uitdagend, uitgedos in pers en rooi, met allerlei goue en kosbare juwele om haar nek, arms
en aan haar vingers. En in haar hand ‘n goue beker wyn.
Dit is die prentjie waarmee die voorlaaste deel van die boek, Openbaring hoofstukke 17 tot 19, begin
om die tyd tussen Jesus se eerste koms tot en met die wederkoms te beskryf.
Hier val die fokus op ‘n samelewing sonder God. Wat ten spyte van die hoevele kere wat Hy Sy
liefde aan haar verklaar het, en die hoevele kere wat Hy haar gevra het om Sy vrou en Sy bruid te
word, gekies het om soos ‘n prostituut, haar te verkoop teen die regte prys. Ter wille van die regte
hoeveelheid geld, mag en genot, is sy bereid om haar alles te gee aan wie ookal bereid is om te
betaal. Is sy bereid om haar gewete te verkrag, en die lewe en ‘n leefstyl geanker in geloof in Jesus
Christus te versmaai, vir die genot en die sukses van die oomblik.
Hoe goed ken ons nie die prentjie van die prostituut dwarsdeur die Bybel nie! Dit was mos nog maar
altyd die manier hoe die mens se afvalligheid en ontrou aan God beskryf is. Nie net as ‘n manier om
net seksuele sondes te beskryf nie, maar alle sondes.
Soos die oerstad, Babilon, bekend was vir sy lewenswyse waar alles net gedraai het om besittings,
genot, en alles wat vir die oog en die hart van die mens aanloklik gelyk het, so verkoop die
samelewing oor alle tye haar siel aan die drie groot afgode: mag, geld en seks, en word alles
verwring wanneer dit in God se plek ons lewens begin regeer.
En moet tog nie die magsbestel, polities en ekonomies, wat soos ‘n dirigent agter die skerms, alles
met groot vertoon op die tafels van ons wêreld uitstal, vergeet nie! Wat natuurlik niemand anders
as Satan met al sy verskillende vermommings aan is nie - het ons nou al ‘n paar keer mekaar aan
herinner!
Hoe goed ken ons dit nie in ons tyd nie! Soos Johannes in sy tyd, en elke gelowige sederdien, sien en
beleef ons elke dag ‘n mensdom wat smag na ‘n lewe van tydelike bevrediging. Wat net skoonheid,
sukses en geluk raaksien, en blind is vir die dier waarop sy sit, wat dit alles met sy kloue en tande
moontlik maak. Wat blind is vir die magte om haar en in haar, wat haar elke dag dryf. Magte soos
die bose en haar eie sondige natuur. Waarvan ‘n Paulus daar in Galasiërs 5 vers 19 tot 21 so treffend
sê: “Die praktyke van die sondige natuur is algemeen bekend: onsedelikheid, onreinheid,
losbandigheid, afgodsdiens, towery, vyandskap, haat, naywer, woede, rusies, verdeeldheid, skeuring,
afguns, dronkenskap, uitspattigheid en al dergelike dinge.”
G’n wonder, as ons haar van nader beskou, dat ons opmerk dat sy dronk is nie! “En ek het gesien
dat die vrou dronk is van die bloed van die gelowiges, van die bloed van die mense wat vir Jesus
getuig het.” (Op. 17:6)
Bedwelm deur haar eie ongeloof en selfgesentreerdheid, huiwer sy nie om, as agent van die bose,
die bloed van volgelinge van Jesus te vergiet as hulle sou waag om haar op enige wyse te probeer
keer of te probeer herinner deur hulle getuienis aan die ramp waarop sy afstuur nie.
Maar die troos vir die gelowige volgelinge van Jesus lê daarin, sê die volgende verse van Openbaring
17 met al sy simboliek, dat ons kan weet dat ons God wêreldwyd ( simbolies vasgevang in die sewe
berge), tot en met die volheid van die tyd (simbolies vasgevang in die syfer 10) aan die werk is. Al

eleef ons gedurende hierdie tyd hoe die vyand met die hulp van al sy agente God op elke manier sal
teëstaan en God se ware volgelinge met alles tot hulle beskikking sal vervolg. En dit, weet ons, sal
voortduur tot wanneer Christus weer kom.
Kyk ons met daardie oë na die wêreld om ons, sien ons, hoe, waar ons ookal kyk en lewe, hoe allerlei
koninkryke, sy dit polities of ekonomies is, “hulle koningskap tot die dier se beskikking” stel “totdat
God sy woorde in vervulling laat gaan het” (Op. 17:17).
God het ‘n plan, en niks en niemand gaan dit stuit nie. Daarom, wat ookal rondom ons en in ons eie
lewe gebeur, ons weet reeds hoe dit alles gaan eindig! Ons weet wat die eindtelling gaan wees! Die
einde van alles staan vas. Niemand kan daaraan verander nie.
Daarom weet ons: hierdie dier, met die vrou op sy rug, is oppad hel toe! Twee keer hoor ons dit in
hierdie gedeelte, in verse 8 en 11. En hoor ons dat sy verbrand gaan word (vers 16). Alles gaan
uiteindelik op niks uitloop nie. Alles gaan uiteindelik net bydra tot haar uiteindelike straf en ewige
pyniging wat voorlê.
Soos ons in die vorige hoofstuk van Openbaring vir mekaar gesê het: daar kom ‘n dag wat hierdie
vrou gaan agterkom en selfs sal moet bely, dat alles wat sy nagejaag het, niks anders was as
klatergoud nie!
Die einde is vasgepen: “Hulle sal teen die Lam oorlog voer, maar die Lam en saam met Hom dié wat
geroep en uitverkies en getrou is, sal hulle oorwin, omdat Hy die Here van die heersers en die Koning
van die konings is." (Op. 17:14)
En met dit in gedagte, kan ons nou terugkyk na die vrou op die dier en in werklikheid raaksien dat dit
eintlik een reuse spotprent is, waaronder geskryf staan: ‘n Lewe sonder God is eintlik so leeg!

Openbaring 18 Hierdie seepbel gaan bars
Die Engels praat van “hindsight”, daardie wysheid na die tyd, as alles verby is en ons gesien het hoe
dit afgeloop het.
Dit is waarmee God Sy mense voor die tyd wil toerus en bemoedig deur die boek, Openbaring, se
boodskap. Dit is immers wat die Here deur hierdie profetiese boek wil doen. Hy vertel hier vir ons
wat die uiteinde van alles gaan wees, hoe dinge gaan afloop, sodat ons vandag en môre, terwyl daar
nog tyd is, die regte keuses kan maak.
As die suksesvolle sakeman, of minister, of onderwyser, of boer, of tiener, werklik glo wat hier staan,
gaan hulle vandag en môre so anders lyk as toe hulle “nie geweet het nie”.
As ons werklik “die spotprent op die middelblad”, in Openbaring 17, met erns bejeën, en die
Redakteur se kommentaar in hoofstuk 18 lees, verander alles! Luister dus, volk van God!
“Hierna het ek ‘n ander engel uit die hemel uit sien afkom. Hy het groot gesag gehad, en die aarde is
deur sy heerlikheid verlig. Hy het met ‘n sterk stem uitgeroep: ‘Geval, geval het die grote Babilon.
Dit het die blyplek van die bose geeste geword, die skuilplek van alle onrein geeste, die skuilplek van
alle onrein roofvoëls en die skuilplek van alle onrein en afskuwelike diere, omdat al die nasies van
die dwelmdrank van haar onsedelikheid gedrink het. Die konings van die aarde het onsedelik met
haar verkeer, en die sakemanne van die aarde het ryk geword uit haar grenselose weelde.’
Toe het ek ‘n ander stem uit die hemel hoor sê: ‘Gaan uit haar uit, my volk, sodat julle nie aan haar
sondes deel kry en die plae wat oor haar kom, julle ook tref nie. Haar sondes het tot aan die hemel
opgehoop, en God het haar ongeregtighede onthou. Behandel haar soos sy julle behandel het, en
vergeld haar dubbel soveel as wat sy julle aangedoen het. In die beker waarin sy vir julle ingeskink
het, moet julle vir haar twee keer soveel inskink. In die mate waarin sy gepronk en in wellus gelewe
het, in dié mate moet julle haar pyn en droefheid aandoen. Sy sê by haarself: ‘Ek sit as koningin op
my troon. Ek is nie weduwee nie, en treur sal ek nooit nie.’
Daarom sal al die plae haar op een dag tref: pes, droefheid en hongersnood. Sy sal met vuur
verbrand word, want sterk is die Here God wat haar oordeel." (Op. 18:1-8)
Hoe verskriklik moet dit nie wees om eendag, as dit te laat is, te ontdek dat dit wat jy jou hele lewe
nagejaag het, niks anders as ‘n seepbel was nie! Dat alles waarvoor jy alles in jou lewe: jou
gesondheid, jou familie, jou tyd en jou energie, gegee het, letterlik in een oomblik in rook kan
opgaan nie!
Wie die Bybel en sy boodskap met erns bejeën, kan nie anders as om dit nie te hoor en nie te weet
nie! Hoeveel keer word daar nie in die Bybel gepraat van daardie een dag in die geskiedenis wat op
pad is nie! Daardie dag wat die Bybel “die dag van die Here” noem.
Jesaja praat daarvan in Jes. 13:9 tot 13 as hy sê: Die Here waarsku ons: “... Ek sal die hemel skud, die
aarde sal uit sy plek uit geruk word, Ek, die Here die Almagtige, doen dit in my gramskap die dag
wanneer my toorn ontvlam.”
Die profeet Joël het al hieroor geprofeteer toe hy gesê het: “ ... die dag van die Here kom, dit is naby
... die vreeslike dag van die Here kom. Elkeen wat die Naam van die Here aanroep, sal gered word.
Op Sionsberg en in Jerusalem sal daar uitkoms wees. So het die Here beloof. Dié wat deur die Here
geroep is, is by dié wat gered is.” (Joël 2:1,31-32)

Die profeet, Maleagi, het hieroor geprofeteer toe hy gesê het: “Die dag kom en hy brand soos ‘n
oond. Dié wat teen God in opstand is, almal wat verkeerd doen, sal die kaf wees, en hulle sal
verbrand word deur die dag wat kom, sê die Here die Almagtige. Daar sal van hulle nie ‘n wortel, nie
‘n tak oorbly nie. Maar vir julle wat eerbied het vir my Naam, sal die son van redding skyn met
genesing in sy strale. Julle sal vry word en bokspring soos vetgemaakte kalwers. Julle sal die
goddeloses vertrap dat hulle soos stof onder julle voete word die dag as Ek ingryp, sê die Here die
Almagtige.” (Mal. 4:1-3)
Van die eens magtige, suksesvolle wêreldstad, Babilon - as die toonbeeld van alles anti-goddelik en
totaal demonies – het daar vandag letterlik niks oorgebly. In 539 v.C. het die Persiese koning,
Xerxes, Babel met die grond gelyk gemaak, sodat dit vandat net ‘n halte vir die trein na Bagdad is!
So gaan daar van alles waarvoor die mensdom hulle hart aan afgode verpand het: sy dit genot, mag,
geld, tydelike bevrediging, sekuriteit, weelde ... niks ... niks oorbly nie.
As jy werklik die gebeure aan die kruis en by die oop graf van Jesus Christus verstaan, begryp jy dat al
ons gejaag na die aardse niks anders as ‘n gejaag na wind is nie!
Dan verstaan jy dat ons moet kies waarin ons wil belê: die tydelike of die ewige; dit wat waarde het,
of dit wat in werklikheid geen waarde het nie. Dan verstaan jy Mat. 6:33 wat sê: “ ... beywer julle
allereers vir die koninkryk van God en vir die wil van God, dan sal Hy julle ook al hierdie dinge gee.”
Dan begryp jy wat Mat 6:20 bedoel as daar staan: “ ... maak vir julle skatte bymekaar in die hemel,
waar geen mot of roes verniel nie en waar diewe nie inbreek en steel nie”.

Openbaring 19 Die storie oor twee vroue
Openbaring 19 help ons ontdek dat die storie agter die storie van die Bybel eintlik gaan oor ‘n vrou,
of as jy wil tegnies wees, twee vroue. Die een vrou, waaroor alles eintlik gaan, is die Bruid, of anders
gesê, diegene wat gewillig hulle laat oorrompel het deur die liefde van Jesus, die Christus. En die
ander vrou is dan die een wat nee gesê het.
Eintlik is dit merkwaardig om te ontdek dat die verhaal van die Bybel begin met God, die Vader, wat
‘n skepping geskep het, met ‘n klein planeet, Aarde, tussen al die ander planete en sterreliggame. En
op hierdie planeet het Hy lewe moontlik gemaak vir ‘n mensdom wat Hy doelbewus na Sy beeld
geskape het. Uit hierdie mensdom sou Hy, as Vader, vir Sy Seun ‘n bruid kies. Mense wie Sy Seun
met passie kon liefhê met alles wat hulle het, omdat hulle ontdek het, glo en beleef dat Hy hulle met
alles in Sy wese liefhet.
Daarom eindig die Bybel, heel gepas, hier in Openbaring 19, in die laaste van die sewe dele van
Openbaring, met die bruilof tussen die Bruid en die Bruidegom.
“Ek het toe iets gehoor soos die geluid van ‘n groot menigte, soos die gedruis van ‘n groot
watermassa en soos die gedreun van swaar donderweer. Hulle het uitgeroep: ‘Prys die Here! Die
Here ons God, die Almagtige, heers nou as koning. Laat ons bly wees en juig en aan Hom die eer
gee, want die bruilof van die Lam het aangebreek, en sy bruid het haar daarvoor gereed gemaak.
God het haar dit vergun om fyn, helder blink klere aan te trek.’ Hierdie fyn klere is die regverdige
dade van die gelowiges.
Toe sê die engel vir my: ‘Skryf op: Geseënd is hulle wat na die bruilofsmaal van die Lam uitgenooi is.’
Verder sê hy vir my: ‘Dit is die woorde van God, en hulle is waar.’" (Op. 19:6 tot 9)
Die hele geskiedenis van die mensdom kan dus tot hierdie liefdesverhaal gekondenseer word. Oor
hoe die Vader alles gereed gemaak het en in die fynste detail beplan en bewerk het, sodat die Bruid,
die ware ekklesia of kerk van die Here Jesus, wat Hy gekies het vir Sy geliefde Seun, uiteindelik
geheilig, rein en gereed op daardie dag van hulle troue sal wees.
Dit beteken dus dat wat ookal tans, vandag, in jou en my lewe aan die gebeur is as gelowige
volgelinge van Jesus, is alles deel van die groter plan, naamlik om ons finaal gereed te maak vir
daardie dag!
Daarom het Jesus gekom, sê die boodskap van die evangelie, om alles te doen wat nodig was. Deur
Sy dood en oorwinning aan die kruis het Hy jou te red uit die midde van die mensdom. Jy was
immers ook maar soos die res besig om soos ‘n prostituut jou te verkoop aan die een wat maar net
bereid was om die regte prys te betaal. Net omdat jy jou hand in geloof uitgesteek het en bereid
was om in geloof te roep dat Hy jou moet kom red, het Hy jou uit die modderslyk kom uithaal. Ja, jy
was soos die res om jou eintlik reeds dood, reeds verdoem, maar toe het Hy jou lewend gemaak
deur Sy Gees in jou te gee, om so vir jou ‘n nuwe hart en gees te gee. Ja, daarom is Sy Gees tans in
jou besig om jou gereed te maak deur Sy heiligmakingswerk elke dag, sodat jy gereed sal wees vir
daardie dag van die Bruilof.
Maar, sê Openbaring 19 en 20, dan is daar ook natuurlik ‘n ander soort dag wat wag op die ander
vrou wat nee gesê het vir Sy liefde. Vir haar wag daar uiteindelik net God se oordeel. Hoor hoe sê
Johannes dit daar in Johannes 3: “God het nie sy Seun na die wêreld toe gestuur om die wêreld te
veroordeel nie, maar sodat die wêreld deur Hom gered kan word. Wie in Hom glo, word nie
veroordeel nie; wie nie glo nie, is reeds veroordeel omdat hy nie in die enigste Seun van God glo nie.

En so kom die skeiding: die lig het na die wêreld toe gekom, en tog het die mense eerder die
duisternis as die lig liefgehad, want hulle dade was sleg.” (Joh. 3:16-19)
Daarom kan die tyd van Jesus se koms tot by Sy wederkoms ook gesien word as hierdie Ruiter op die
wit perd wat deur die geskiedenis ry oppad na die einde. Oppad om vir Homself ‘n vrou te kom haal.
Oppad na daardie finale dag waar die groot stryd tussen donker en lig, wat tans aan die gang is,
finaal verby sal wees. Waar die tyd van genade, die tyd om nog ja te sê op die liefdesaanbod van die
Bruidegom deur Sy Woord, finaal verby sal wees.
Hoor hoe staan dit in Openbaring vir ons opgeteken: “Toe het ek gesien die hemel is oop. Daar was
‘n wit perd. Sy Ruiter word die Getroue en die Betroubare genoem. Met regverdigheid oordeel Hy en
voer Hy oorlog. Sy oë het soos vuur gevlam, en op sy kop was daar baie heerserskrone. Daar was ‘n
Naam op Hom geskrywe wat niemand anders ken nie, net Hy self. Hy het klere aangehad wat met
bloed deurweek was, en sy Naam is: ‘Die Woord van God.’ Die leërs in die hemel het op wit perde
agter Hom aan gery. Hulle het fyn, helder wit klere aangehad. Uit sy mond het daar ‘n skerp swaard
uitgekom om die nasies mee te tref, en Hy sal hulle met ‘n ystersepter regeer. Hy sal self die
parskuip trap vir die wyn, die wyn van die toorn en die oordeel van God, die Almagtige. Op sy klere,
by sy heupe, was daar ‘n Naam geskrywe: ‘Die Koning van die konings en die Here van die heersers.’
Toe het ek ‘n engel by die son sien staan. Hy het met ‘n harde stem uitgeroep en vir al die roofvoëls,
wat hoog in die lug vlieg, gesê: ‘Kom, kom bymekaar vir die groot feesmaal wat God gereed maak!
Kom eet die vleis van die konings, die vleis van die opperbevelhebbers, die vleis van die magtiges en
die vleis van die perde en hulle ruiters, ja, die vleis van allerhande mense: vryes en slawe, klein en
groot.’
Toe het ek gesien dat die dier en die konings van die aarde met hulle leërs bymekaargekom het om
oorlog te maak teen die Ruiter op die wit perd en teen sy leër. Die dier is toe gevange geneem en
saam met hom ook die vals profeet wat die wondertekens vir die dier gedoen en daarmee die mense
mislei het wat die merk van die dier aanvaar en sy beeld aanbid het. Hulle twee is lewend in die
vuurpoel gegooi wat met swael brand. Die ander mense is doodgemaak met die swaard wat
uitgegaan het uit die mond van die Ruiter op die wit perd.” (Op. 19:11-21)

Openbaring 20 Vrede midde al die chaos
‘n Mens se verklaring van Openbaring 20 openbaar vinnig hoe jy hierdie hele boek, Openbaring,
verstaan: of as baie letterlik, of as ‘n profetiese boek vol simbole.
Jy weet waar ek staan of val. Ek glo dat daar oorgenoeg bewyse in die boek, Openbaring, is dat dit as
‘n profetiese boek in geheel verstaan wil word. En daarom verstaan ek Openbaring 20 ook as sulks.
In die teologiese wêreld is Openbaring 20 se verstaan ook die toets of jy tipies chiliasties (chilioi is
die Grieks vir 1000) dink (hulle staan ook bekend as “millenialiste”), of eerder as ‘n “post-millenialis”
na sekere gegewens in die Bybel kyk.
‘n Tipiese “chilias” glo, heel vereenvoudig, dat die duisend jaar (= millenium) van vrede, waarvan ons
in hierdie hoofstuk in die Bybel lees, ‘n letterlike 1000 jaar is waarin Jesus weer op aarde gaan
verskyn om saam met Sy mense te regeer. Gedurende die tydperk sal daar ‘n massabekering onder
die Jode plaasvind en gaan hulle na Israel terugkeer. Aan die einde van die duisend jaar sal Jesus na
die hemel teruggaan en die gelowiges saam met Hom neem (ook bekend as die “wegraping”). Satan
sal vir ‘n kort tydjie losgelaat word om die mense op aarde verder te verlei. Daar sal ‘n geweldige
vervolging plaasvind van diegene wat in die tyd tot bekering kom, wat dan tot die tweede
wederkoms sal aanhou en deur die finale oordeelsdag beëindig sal word.
Soos ek gesê het, glo ek nie dit is die boodskap van die Bybel, en van Openbaring 20 nie. Maar kom
ons lees saam wat hier staan en probeer dan saam verstaan wat eerder hier staan.
“Toe het ek ‘n engel uit die hemel uit sien kom met die sleutel van die onderaardse diepte en met ‘n
groot ketting in sy hand. Hy het die draak, die slang van ouds, wat die duiwel en die Satan is, gegryp
en hom vir duisend jaar vasgebind. Hy het hom in die onderaardse diepte gegooi, dit toegesluit en
dit bokant hom verseël sodat hy nie meer die nasies kan verlei voordat die duisend jaar om is nie.
Daarna moet hy ‘n klein rukkie losgelaat word.
Toe het ek trone gesien en die siele van die mense wat onthoof is omdat hulle aan die getuienis van
Jesus en die woord van God vasgehou het. Hulle het op die trone gaan sit, en aan hulle is die
bevoegdheid gegee om as regters op te tree. Dit is hulle wat nie die dier en sy beeld aanbid het nie
en nie die merk op die voorkop en op die hand aanvaar het nie. Hulle het lewend geword en saam
met Christus duisend jaar lank geregeer. Dit is die eerste opstanding. Die ander dooies het nie
lewend geword voordat die duisend jaar om was nie.
Geseënd en heilig is dié wat aan die eerste opstanding deel het. Oor hulle het die tweede dood geen
mag nie, maar hulle sal priesters van God en van Christus wees en sal saam met Hom die duisend
jaar lank regeer.
Wanneer die duisend jaar om is, sal die Satan uit sy gevangenskap losgelaat word. Dan sal hy gaan
om die nasies wat tussen die vier uithoeke van die aarde is, die Gog en Magog, te verlei, en om hulle
byeen te bring vir die oorlog... en die laer van die gelowiges en die geliefde stad omsingel. Toe het
daar vuur van die hemel af gekom en hulle verteer. Die duiwel wat hulle verlei het, is in die poel van
vuur en swael gegooi, daar waar die dier en die vals profeet ook is. Hulle sal dag en nag gepynig
word tot in alle ewigheid.

Toe het ek ‘n groot wit troon gesien en die Een wat daarop sit. Die aarde en die hemel het voor Hom
padgegee, en daar was nie meer plek vir hulle nie. Ek het die dooies, groot en klein, voor die troon
sien staan, en die boeke is oopgemaak. Daar is ook ‘n ander boek oopgemaak, dit is die boek van die
lewe. Die dooies is toe geoordeel volgens wat daar in die boeke geskrywe staan oor alles wat hulle
gedoen het... Toe is die dood en die doderyk in die vuurpoel gegooi. Dit is die tweede dood, die
vuurpoel. As daar gevind is dat iemand se naam nie in die boek van die lewe geskrywe staan nie, is
hy in die vuurpoel gegooi.” (Op. 20:1-5)
Jesus het self, net na Sy opstanding uit die dode – en dus nadat Hy elke mag wat ‘n houvas gehad het
op die mens, se mag verbreek het met Sy dood en bloed wat gevloei het – aan Sy dissipels gesê:
“My vrede gee Ek vir julle” (Joh. 14:27). Dit is daardie vrede wat die engele reeds aangekondig het
met Sy geboorte toe hulle gesing het: “Vrede op aarde ...” (Luk. 2:14). Dit is daardie vrede waarvan
Paulus daar in Rom. 5:1, en ook Ef. 2:14 tot 19, praat as hy skryf van God wat ons nou vrygespreek
het ... Daarom is daar nou vrede tussen ons en God. En glo ek, dit is daardie vrede waarvan hier in
Op. 20 sprake is.
Efesiërs 2:6 sê ek en jy sit nou alreeds saam met Christus in die hemel en regeer! As hier dus in
Openbaring staan dat ons saam met Christus vir ‘n duisend jaar sal geregeer, weet ons mos reeds
dat die getal 1000 die getalle-simbool is wat die volle tydperk van Christus se eerste koms tot by Sy
wederkoms beskryf.
Die volgende vraag is natuurlik: Maar hoe moet ons die “binding van Satan” verstaan?
Dit lyk vir my, in die lig van die hele boodskap van die evangelie en ook die boek, Openbaring, dat
met Christus se oorwinning deur Sy kruisdood en opstanding, die vyand in wese reeds verslaan (en
dus gebind het). Hy kan dus nie meer na willekeur in sy onbeheersde krag en mag opereer nie. Nee,
van na die kruis- en opstandingsgebeure kan hy nie beweeg buite die gebied waar God hom nog
tydelik ruimte gee om te beweeg nie. Jesus Christus is immers nou reeds die nuwe Koning en totaal
in beheer. Al ruimte wat die bose het om te beweeg is waar hy, deur die mag van sonde, die wet,
die begeerlikhede van hierdie wêreld, en deur die mag van die dood, ‘n houvas en openinge het of
kry om sy verwoestingswerk te verrig.
Maar ook hierin is hy in ‘n ander sin reeds gebind, want die gelowige volgelinge van Jesus, het reeds
die innerlike krag en vermoëns in Jesus se Naam om hom te weerstaan en hom selfs te laat wegvlug
(vgl. Jak. 4).
Die volgende begrip waaroor baie mense wonder is wat die “eerste opstanding” en “tweede
opstanding” dan sou beteken. Die “eerste opstanding” is bloot dat ons hier op aarde sterf, en dan
deur die “dieper slaap” van die dood deurgaan, soos deur ‘n deur, om dan onmiddellik by die Here
“wakker te word” (vgl. 1 Tess. 4:14-18). Die mense wat sonder Christus sterwe het egter nie hieraan
deel nie.
Die “tweede opstanding” verwys dus na daardie omvattende opstandingsdag wat saamval met die
wederkoms van Christus, wanneer alle mense in hulle liggame opgewek sal word: die gelowige
volgelinge van Jesus met hulle verheerlikte nuwe liggame, en die ongelowiges om die “tweede
dood” tegemoet te gaan in die ewige verderf.

Openbaring 21 So lyk die bruid
Soos ek laas gesê het is die Bybel hierdie liefdesverhaal, ‘n Roman per excellance! Dit vertel vir ons
die verhaal hoe God die Vader ‘n meesterplan aanmekaar sit om te sorg dat Sy Seun die vrou van
vroue kry, wat Hom met haar wese vir ewig sal terug liefhê.
Telkens in die geskiedenis van die mensdom sien ons hierdie goue draad deur alles loop. Sien ons
skadubeelde en fyn voetspoortjies oppad na daardie dag wat wag in die toekoms ... hulle troudag!
Reeds met die eerste twee hoofstukke in die Bybel, daar in die begin in Genesis, ontdek ons die
begin van die goue draad. Ons sien dit waar God vir sy nuutgeskape eerste Adam ‘n vrou, iemand uit
homself, skep sodat hulle twee “een” kan wees.
Daarom verbaas dit ons nie om hier op die laaste bladye van hierdie boek, die Bybel, waarin God
Homself en Sy hart openbaar, hier in Openbaring 21, uiteindelik, vooruit, die “foto” te kry van die
gebeure op daardie finale dag, met die bruilof van Sy Seun en Sy Bruid!
“Toe het ek ‘n nuwe hemel en ‘n nuwe aarde gesien. Die eerste hemel en die eerste aarde het
verdwyn, en die see het nie meer bestaan nie.
En ek het die heilige stad, die nuwe Jerusalem, van God af uit die hemel uit sien afkom. Die stad was
gereed soos ‘n bruid wat vir haar man versier is.
Toe het ek ‘n harde stem van die troon af hoor sê: ‘Kyk, die woonplek van God is nou by die mense.
Hy sal by hulle bly; hulle sal sy volke wees, en God self sal by hulle wees as hulle God. Hy sal al die
trane van hulle oë afdroog. Die dood sal daar nie meer wees nie. Ook leed, smart en pyn sal daar nie
meer wees nie. Die dinge van vroeër het verbygegaan.’
Toe sê Hy wat op die troon sit: ‘Kyk, Ek maak alles nuut.’ En daarna sê Hy: ‘Skryf hierdie woorde op,
want hulle is betroubaar en waar.’
Verder sê Hy vir my: ‘Dit het klaar gebeur. Ek is die Alfa en die Omega, die Begin en die Einde. Aan
elkeen wat dors het, sal Ek te drinke gee uit die fontein met die water van die lewe, verniet. Elkeen
wat die oorwinning behaal, sal dit alles kry, en Ek sal sy God wees, en hy sal my seun wees.
‘Maar dié wat bang en ontrou geword het, die losbandiges, moordenaars en onsedelikes, bedrieërs
en afgodsdienaars en al die leuenaars, hulle lot is die poel wat met vuur en swael brand, dit is die
tweede dood.’
Toe het een van die sewe engele wat die sewe bakke het waarin die sewe laaste plae was, gekom en
met my gepraat. ‘Kom,’ het hy gesê, ‘ek sal jou die bruid wys, die vrou van die Lam.’
Ek is toe deur die Gees meegevoer en die engel het my na ‘n groot hoë berg toe geneem en die
heilige stad Jerusalem vir my gewys, wat van God af uit die hemel uit afkom. Die stad het die
heerlikheid van God ...” (Op. 21:1-11)
Is dit nie aangrypend dat die vrou wat uiteindelik die Bruid van die Seun van God gaan wees, geteken
word as ‘n “stad” nie! Net soos wat die “vrou” wat “nee” gesê het vir Sy liefde, ook as ‘n stad, Babel,
geteken is nie!

Dit is eintlik logies dat dit juis so gesimboliseer moet word, want die Bruid (en die vrou wat nee gesê
het) is immers miljoene der miljoene mense! Die Bruid is immers die ekklesia, elke mens wat êrens
in die geskiedenis gekies het om in geloof die evangelieboodskap vas te gryp oor ‘n God wat my en
jou, ten spyte van ..., so liefgehad het dat Hy Sy Seun gestuur het om Sy lewe te gee. Sodat ek en jy
vry gemaak kon word van alles wat ons verhoed het om Hom lief te hê soos wat ‘n vrou bedoel is om
haar Man lief te hê!
Maar soos wat ek en jy deur God se Gees oor en nuutgemaak moes word om gereed te wees vir
daardie dag ... vir wanneer ons finaal gaan trou ... so moet hierdie aarde en hemel oor en
nuutgemaak word om die finale dekor en woonplek te kan wees waar ons, as die bruid, en die
Bruidegom, vir ewig kan saamwoon.
Daarom hoor ons hoe Paulus daar in Romeine 8, van vers 18 af, vertel hoe die hele skepping al
sugtend uitsien na daardie dag ... Wat hulle ook finaal verlos sal word van al die gevolge van die
sonde van die mens, wat gemaak het dat alles dag vir dag net verder verval en doodgaan.
En hoor ons hoe Paulus vertel hoe ek en jy as gelowiges al sugtend uitsien na daardie dag, terwyl die
transformasieproses nog besig is om in ons eie lewe en om ons plaas te vind, om alles gereed te
maak vir daardie dag.
En, sê hy, hoor ons hoe die Gees van God met groot versugting saam met ons bid tot die Vader ... dat
die laaste pennestrepe van Sy merkwaardige ewige plan tog gou getrek sal word.

Openbaring 22 Kyk, Ek kom gou!
Die meeste films vandag word afgesluit met dramatiese musiek en ‘n paar treffende laaste tonele
wat die draaiboek van die film mooi saamvat en afrond, en dan begin die name van die rolspelers
oor die skerm afrol. So moet ons hierdie laaste hoofstuk, hoofstuk 22, van die boek, Openbaring,
sien.
“Toe het die engel my die rivier met die water van die lewe gewys. Dit is helder soos kristal en dit
stroom uit die troon van God en van die Lam uit. Tussen die hoofstraat van die stad aan die een kant
en die rivier aan die ander kant staan die boom van die lewe. Hy dra twaalf keer per jaar vrugte: elke
maand lewer hy sy vrugte. Die blare van die boom bring genesing vir die nasies.
Daar sal niks meer wees wat deur God vervloek is nie. Die troon van God en van die Lam sal in die
stad wees, en sy dienaars sal Hom dien. Hulle sal Hom sien, en sy Naam sal op hulle voorkoppe
wees.
Daar sal nie meer nag wees nie. Die mense het nie die lig van ‘n lamp en die lig van die son nodig nie,
omdat die Here God hulle sal verlig, en hulle sal tot in alle ewigheid regeer.
Toe sê die engel vir my: ‘Hierdie woorde is betroubaar en waar. Die Here God, wat sy Gees aan die
profete gee, het sy engel gestuur om vir sy dienaars te wys wat binnekort moet gebeur.’
Jesus sê toe: ‘Kyk, Ek kom gou! Geseënd is elkeen wat die woorde van hierdie profetiese boek ter
harte neem.’
Dit is ek, Johannes, wat dit alles gehoor en gesien het...
‘"Moenie die woorde van hierdie profetiese boek geheim hou nie, want die eindtyd is naby.
Wie kwaad doen, moet voortgaan om kwaad te doen, en wie vuil is, moet vuil bly; maar wie doen
wat reg is, moet voortgaan om reg te doen, en wie heilig is, moet heilig bly.’
Jesus sê toe weer: "Kyk, Ek kom gou! ... Ek is die Alfa en die Omega, die Eerste en die Laaste, die
Begin en die Einde... Ek, Jesus, het my engel gestuur om dit alles aan julle in die gemeentes te betuig.
Ek is die Wortel, dit is, die Nakomeling van Dawid. Ek is die helder Môrester.’
Die Gees en die bruid sê: ‘Kom!’ En elkeen wat dit hoor, moet sê: ‘Kom!’ En elkeen wat dors het,
moet kom; elkeen wat die water van die lewe wil hê, moet dit kom kry, verniet!..
Hy wat dit alles getuig, sê: ‘Ja, Ek kom gou!’
Amen! Kom, Here Jesus! Die genade van die Here Jesus sal by almal wees.” (Op. 22:1-21)
Water bring lewe. Daarsonder gaan alles dood! Hier sien ons hoe die ware lewe soos ‘n stroom
water as’t ware uit die troon van die God vloei wat Christus Jesus Sy Seun na hierdie wêreld gestuur
het. Om lewe, en dit in oorvloed, aan elkeen wat Hom in geloof vasgryp, te bedien.
Jesus Christus staan, soos daar in die begin van Genesis, as die werklike Boom van die Lewe daar.
Elkeen wat van die genade en lewe wat Hy aanbied in geloof geniet, beleef verlossing en genesing in
hulle lewens.

Sy kruis het vir elkeen wat in Hom glo ‘n boom van lewe geword. Waarvan ons die blare en vrugte
kan eet en vir ewig genees kan word daardeur.
Daarom kan Op. 22:17, na al die profesieë, nog steeds mense uitnooi om daarvan te kom eet. Ja, om
te kom drink uit hierdie stroom van God se genade in Christus Jesus en self dan te beleef hoe dit
lewe aan hulle bedien.
Daar is immers geen ander bron waaruit ons God se genade kan drink nie. Net in Jesus Christus,
daar aan die voet van Sy kruis, ontdek ons God as ons enigste Bron van ware lewe. Net daar ontdek
ons genade wat ons nooit kan verdien nie. Dit is en bly immers hierdie geskenk wat vir ons
aangebied word deur Jesus Christus self. Sy lewe en Sy bloed het klaar vir hierdie geskenk van
genade betaal het.
Wie van hierdie water aanhou drink, beleef hoe dit hom of haar versterk om tot die einde toe in
geloof te volhard. Midde al die vervolging, swaar en gebrokenheid van ons daaglikse lewe op hierdie
aarde.
Dit is hierdie genade wat ons lewens so gaan verander dat mense uit ons optrede en lewe kan sien
dat ons Sy volgelinge is.
Hoofstuk 22 van Openbaring sluit af met Jesus Christus, as die Bruidegom, wat vir Sy bruid - elke
gelowige volgeling op aarde - verseker dat Hy oppad terug Aarde toe is. Om haar finaal te kom haal
vir hulle troudag en die bruilofsfees daarna.
Watter troos is dit nie vir die bruid, die kerk van Jesus Christus, nie! Na en midde al die lyding en
ontberinge deur al die tye. Na al die tye van bloedvergieting en stryd. Na al die tye van marteling en
vervolging. Om te weet, haar Geliefde, Koning Jesus, is oppad.
En kyk, Hy kom gou! Ons kan dit glo, want God self het dit aan ons gesê.

Hierdie dokument is deur Dr Christo Nel geskryf.
As jy dalk met hom in aanraking wil kom, hier is sy kontakbesonderhede:
Dr Christo Nel
In diens van Jesus se Ekklesia
Posbus 3114
Somerset-Wes
7129
Tel: 021 851 0003
Sel: 082 7702397
Epos: nchristo@lantic.net
Webblad: www.nuwewyn.co.za