innoveer landbou Jaarverslag 2012 - gwk

6 7
Verslag van die Voorsitter van die Direksie
GWK gaan voort om in terme van sy finansiële en ander
prestasies aan die verwagting te voldoen. Die maatskappy
is ook reg geposisioneer om in die toekoms voort te gaan om
aandeelhouer-produsente en ander belanghebbendes deur sy
werksaamhede te bevoordeel.
Die landbou word al hoe meer gekenmerk deur stygende
onsekerheid, meer volatiliteit en ‘n sake-omgewing wat daagliks
verander.
Landboubesighede moet in hierdie omgewing innoverende
besigheidsoplossings bewerkstellig deur effektiewe
waardeketting-meganismes op alle vlakke te skep. `n Ketting
is ook net so sterk soos sy swakste skakel. Daarom moet alle
belanghebbendes in die ketting betrokke wees en daardeur
bevoordeel word. Dít is wat GWK doen.
In die jaar in oorsig het GWK weer daarin geslaag om homself
effektief in die landbou-waardeketting te posisioneer. Die
kompetisie in die mark is nie net tussen produkte en maatskappye
nie, maar ook tussen waardekettings.
Landbouers moet verseker dat ons deel is van die mees
mededingende waardeketting. Dit is wat landboubesighede in die
toekoms van mekaar gaan onderskei.
Ekonomiese oorsig
`n Paar trekkragte het op die oomblik die grootste invloed op
die landbou-omgewing. Dit sluit in die droogte in Amerika, die
finansiële krisis in Europa, China se volgehoue dryf tot sy eie
voedselsekerheid en landbou-ontwikkeling in Afrika.
Die droogte in Amerika bied op die korttermyn hoër graanpryse
wat voedselpryse in ‘n mate opwaarts trek. Dít gee `n welkome
inspuiting in die kommoditeitsmarkte wat nuwe debatte oor
voedselsekuriteit en die billike beskerming van ons plaaslike
bedrywe ontlok.
Verder maak dit Suid-Afrika se graan mededingend in die
wêreldmark en nuwe uitvoergeleenthede ontstaan. Dit is alles
positief vir landbouers.
Die krisis in Europa sal waarskynlik nog ‘n tyd lank voortduur en
hoewel hulle nie juis nuwe geleenthede vir uitvoer bied nie, moet
ons steeds ons markaandeel daar beskerm.
China is ‘n ander storie. Al het die land se ekonomie effens
afgekoel, is dit steeds die drywer wat die wêreldekonomie kop
bo water laat hou.
innoveer landbou
Ek glo dat China en Indië van ons grootste handelsvennote
gaan word, maar ook van ons grootste mededingers. Die Suid-
Afrikaanse regering moet versigtig met dié reuse onderhandel.
Suid-Afrika moet `n fyn balans handhaaf tussen die uitbreiding
van ons sakeverhouding met China en die beskerming en groei
van ons eie ekonomie.
Landbou-ontwikkeling in Afrika, waarby China ook betrokke is om
aan sy voedselbehoeftes te voldoen, noodsaak Suid-Afrikaanse
produsente ook om dermate meer effektief te boer sodat Suid-
Afrika sy posisie as die kosmandjie van Afrika kan behou. Suid-
Afrikaanse landbou moet nie die geleentheid miskyk om self in
die ontwikkeling van landbou in ander Afrikalande betrokke te
raak nie.
Die groot uitdaging midde-in die invloed van hierdie groter
trekkragte is hoe Suid-Afrikaanse produsente hulself moet
posisioneer om so ver vorentoe as moontlik `n aandeel in die
waardeketting in Afrika te behou en terselfdertyd die risiko`s in
die mark te verskans.
Landbou-oorsig
Die vloede van die afgelope twee jaar het groot druk op
produsente geplaas. Hier het GWK weer ‘n unieke oplossing
gevind deur vloedlenings van R150 miljoen van die Industrial
Development Corporation (IDC) aan produsente beskikbaar te
maak.
Grondhervorming en politieke onsekerheid bly groot uitdagings.
Die vlak van retoriek sal oor die komende maande al hoe erger
word.
Met die honderdjarige herdenking van Wet no. 27 oor Grondsake
van 1913, kan ons ook baie uitsprake oor grond verwag. Ons moet
egter koelkop bly! Ek glo vas dat `n proses van gee en neem en
toewyding van alle belanghebbendes oplossings sal bring.
Die veranderings met die grootste toekomsimpak in die landbou
word in die bemarkingsomgewing gesien. Kompetisie is sterk, die
konsentrasie van koopkrag word groter, die produsent se aandeel
in die verbruiker se Rand krimp, terwyl storting (dumping) en
laeprys-invoere vermeerder.
Daar is dus geen plek vir oneffektiewe praktyke nie. Op plaasvlak
moet die doeltreffendheid van produksie verhoog word.
Produsente moet meer effektief boer om mededingend te bly.
Die jaar vir GWK
Frank Lawrence
Voorsitter
GWK het die afgelope jaar weer daarin geslaag om die produsent
by te staan om meer effektief te boer. Dit is gedoen deur
toonaangewende navorsing, betrokkenheid by produsente én die
effektiewe oordrag van kundigheid.
Voorbeelde hiervan is voorligting, boeredae, besproeiingskedulering,
meganisasietegnieke, kontrakteringsdienste
vir katoen en lusern, finansiële dienste en studiegroepe.
GWK is daartoe verbind om sterk verhoudings met elke rolspeler
te vorm en te handhaaf op elke vlak van die waardeketting – van
die verskaffing van insette tot produksie, berging, prosessering,
verspreiding en bemarking.
GWK se grondboontjie-drogingsaanleg, katoenpluismeule,
pekanneutaanleg, koelkamers, uitvoer van lusern, abattoirs en
die onlangse opening van kleinhandelwinkels, asook die beplande
koringmeule, pasta- en beskuitjiefabriek is voorbeelde van hoe
GWK nuwe geleenthede in die waardeketting ontgin.
GWK tree as verlengstuk van produsente se besighede op. Ons
is, as maatskappy in produsente se besit, uniek vanweë die
samewerking en samehorigheid wat tussen die maatskappy
en produsente bestaan. Dít is die siel van ons besigheid.
Dit alles het bygedra tot uitstekende finansiële resultate met
‘n wins van R105 miljoen en toevallings van R100 miljoen
aan aandeelhouers. Ons bereik vanjaar ook ‘n mylpaal
met die eerste kapitaaluitbetalings van voorkeuraandele
en aandeelhouerslenings. Dit is die eerste rotasie van
aandeelhouersfondse wat plaasvind. `n Totale bedrag van
R11,9 miljoen sal aan kwalifiserende aandeelhouers uitbetaal
word.
GWK se eie kapitaal is tans net onder 30%. Ons mikpunt is hoër,
maar die stand van ons eie kapitaal is grootliks veroorsaak
deur die vertraagde mielieoes en die koringvoorraad wat nog
gestoor word. Dit behoort in die nuwe jaar reggestel te word.
|
Volhoubaarheid
GWK is `n besproeiingspesialis en besproeiing vorm `n integrale
deel van die landboulegkaart. Daarom is ons genoodsaak om
onsself vir die behoud van watergehalte te beywer en ook
volhoubaar en omgewingsvriendelik te boer.
In ons besigheid moet ons ook probeer om voortdurend nuwe
werkgeleenthede te skep. Deel hiervan is GWK se fokus op die
ontwikkeling van opkomende produsente en `n konstruktiewe
bydrae tot swart ekonomiese bemagtiging.
Nuwe werk word net met nuwe besigheid geskep. GWK is
daarom ook daarop gefokus om nuwe besigheidsgeleenthede
aan te gryp.
Erkenning
Ek bedank graag my mede-direkteure vir hul toewyding en die
besonderse wyse waarop hulle hul pligte uitvoer.
Dankie ook aan GWK se Bestuur en ander personeel vir die passie
wat in julle werk sigbaar is.
Aan ons aandeelhouers, dankie vir jul lojale ondersteuning wat
die maatskappy jaarliks groter hoogtes laat bereik.
Bowenal, dankie vir die genade van Bo wat ons daagliks ontvang.
Frank Lawrence
Voorsitter
Douglas
13 September 2012