innoveer landbou Jaarverslag 2012 - gwk

24 25 25
Die Pekanneut-besigheid het sy kwota uitdagings gehad. Die
finansiële prestasie was laer as geprojekteer hoewel bykans
drie keer die vorige jaar se volumes hanteer is. Die lesse wat
ons geleer het, het gelei tot heelwat veranderings aan die
verwerkingsaanleg, terwyl produkhanteringsprotokolle ook
reeds aangepas is. Uitvoere het wel goed verloop en ons kon `n
volhoubare afnemersmark vestig wat in die komende seisoen
waardevol sal wees.
GWK Navorsing en Ontwikkeling het uitsonderlike dienste verrig.
`n Uitbreiding in kontrakte vir Hoë Tegnologie Boerdery (HTB)
het in bykans al die streke gerealiseer. Investering in navorsing
en ontwikkeling bied aan produsente die geleentheid om hul
eweknieë elders in die land met bogemiddelde opbrengste uit te
stof.
GWK Navorsing en Ontwikkeling was die jaar in oorsig ook
betrokke by die opleiding van meer as 1 000 opkomende
produsente. GWK se dryf en betrokkenheid hierby is daarop
gefokus om voorheen benadeelde produsente kommersieel te
vestig.
Handel
Die Kleinhandelbesigheid het aan die verwagte finansiële
prestasievereistes voldoen. `n Dramatiese groei in markaandeel
is verblydend.
Al vier GWK LandMark-winkels is aangewys as deel van die top
ses winkels van LandMark in die land. Die handelstak op Douglas
is aangewys as die beste groot LandMark-winkel, terwyl
die handelswinkel op Prieska aangewys is as die naasbeste
mediumgrootte winkel in die land.
Daarbenewens het GWK ook `n goue handelaarstatus van Valley
Irrigation ontvang, wat beklemtoon hoe GWK hom as dié spesialis
in verbouing onder besproeiing geposisioneer het.
GWK kon ten spyte van landwye vervoerstakings tydens die
Desember-oestyd met innoverende oplossings voortgaan om
genoeg brandstof by al sy depots aan produsente te voorsien en
daardeur `n groot krisis afweer.
Ontwikkeling in dié besigheid sluit in die opgradering van die
Vaalrivier Diensstasie op Douglas en die omskakeling van die
bande-afdeling op Modderrivier na `n Conti Partner-agentskap,
terwyl uitbreiding van produkreekse om deurlopend aan die
aanvraag by kleinhandeltakke te voldoen, asook `n volgehoue
fokus op klantediens, tot die winsgroei bygedra het.
innoveer landbou
Die Meganisasie en Ingenieurswerke-besigheid het puik presteer.
Deelname aan die John Deere Dealer of the Future-plan skep
`n mededingende voordeel om markaandeel verder uit te brei.
Dié besigheid se vakleerlingprogram het ook sy eerste groep
gekwalifiseerde vakleerlinge in die jaar in oorsig opgelewer.
Opgradering van die onderdele en werkswinkelfasiliteite op
Barkly-Wes is afgehandel en plaas GWK in nóg `n beter posisie om
die Barkly-Wes- én Hartsvallei-omgewing met goeie fasiliteite en
diens te bedien.
Bearing and Belting, wat laers, waaierbande en elektriese motors
verkoop, is `n nuwe handelsmerk wat in die jaar in oorsig in die
Meganisasie en Ingenieurswerke-besigheid gevestig is.
Industrieë
Sidi Parani, GWK se kunsmismaatskappy, het met effektiewe
bestuur sy markaandeel behou en in nuwe gebiede uitgebrei
midde-in `n omgewing wat deur groot wisselvalligheid in
grondstofpryse gekenmerk is.
Dié volatiliteit het ook vir mededingers groot uitdagings
veroorsaak terwyl Sidi Parani wesenlik laer kunsmispryse aan
produsente kon bied.
Die werklike impak van die Mededingingskommissie se
ooreenkoms met SASOL het in die jaar in oorsig meer rigbaar
geword. Beplanning word bemoeilik en mededingendheid in die
afwesigheid van prysaanduidings beïnvloed. Dit is ook die enigste
bron van ammoniumnitraat.
Die fokus is daarop om mededingendheid te verhoog
met die verbetering van produksietoerusting, prosesse,
grondstowwe en produkgehalte asook `n verdere verbetering in
klantetevredenheid.
SA Feed Phosphates (SAFP), GWK se vervaardiger van
voerfosfate, het `n uitdagende jaar beleef. Volumes het weens
afwaartse aanpassing van pryse deur mededingers gedaal.
Die veevoerfosfaatmark is gekonsentreerd met `n klein
hoeveelheid kopers wat `n groot persentasie van die totale mark
verteenwoordig.
Die besigheid fokus op sy mededingendheid in dié kopersmark.
Die fabriek is opgegradeer en aansoek is gedoen om ISOgradering
te verkry. Die wateroplosbaarheid van die produk is
ook nagevors en verskeie opsies is ondersoek om dit te verbeter
en hierdie geleentheid nou aan te gryp.
FloTank, wat `n diens as vervoermakelary intern aan die GWKgroep,
maar ook ekstern aan ander maatskappye bied, het die
afgelope jaar `n positiewe bydrae tot die groep se resultate
gelewer. Die besigheid het sagteware ontwikkel om `n nóg beter
diens aan sy kliënte te lewer. Die stelsel funksioneer goed ná
volledige implementering. `n Dienssentrum vir intydse inligting
vir kliënte oor vordering met aflewerings is die volgende vlak
van ontwikkeling wat aangepak word.
Westra, wat betrokke is in die vermaling van mielies om
voedselprodukte te vervaardig, het bevredigende resultate
gelewer vir die jaar in oorsig ten spyte van prysvolatiliteit weens
nuwe toetreders tot die mark. Vanweë Westra se produkgehalte
en handelsmerkvertroue kon die markaandeel vergroot word.
Die verpakkingsafdeling is opgegradeer om kapasiteit en
produktiwiteit te optimaliseer. Dit het wesenlike besparing en
groter effektiwiteit bewerkstellig.
Ondersoek word ingestel na verdere uitbreiding van Westra se
produkaanbieding, terwyl die beplande koringmeule, pastafabriek
en beskuitjiefabriek volgens beplanning onder dié besigheid gaan
ressorteer.
Veilings en Vleisbedrywe
Die Veilingsbesigheid het oor die afgelope finansiële jaar baie
goed presteer. `n Lewendehawe-kantoor is in Bloemfontein
geopen en `n bestaande veilingsbesigheid is op Humansdorp
tot die divisie toegevoeg. GWK Veilings het dus sy voetspoor
dramaties uitgebrei en is strategies goed geposisioneer vir
verdere winsgroei in die komende jaar.
Die winsgewendheid van GWK se Vleisbesigheid het wesenlik
verbeter van die vorige jaar se verliesposisie. Hoewel skaapgetalle
nasionaal laer was, het LAW sy markaandeel vergroot en is
beduidend meer skape by die fasiliteite op Groblershoop en De
Aar geslag. Nuwe strategieë is geïmplementeer om waarde tot
die produkreeks toe te voeg en eie verspreiding in die Noord-
Kaap te behartig. Die verwagting is dat skaapgetalle matig in die
komende jaar sal toeneem, wat daartoe sal bydra om deurset
deur die abattoirs te verhoog en winsgewendheid te verbeter.
Produsentepryse het in Junie en Julie 2011 skerp gestyg, maar het
weens verbruikersweerstand teruggesak en sywaarts beweeg.
Die Meat-to-Market-beesabattoir was onder moeilike
handelsomstandighede steeds winsgewend. `n Nuwe elektrisiteituit-gas-aanleg
is in die proses van voltooiing en sal in die nuwe
jaar in bedryf gestel word. Die tegnologie is `n eerste in Suid-
Afrika, is omgewingsvriendelik en sal oor die langtermyn tot
kostevoordele aanleiding gee.
Finansiering
Die fokus wat die afgelope paar jaar op die bestuur van risiko’s
met debiteure geplaas is, het verdere vrugte afgewerp deurdat
die boek tans kerngesond is.
In teenstelling met huidige neigings in die landbou, het die
groep se voorsiening vir twyfelagtige skuld met ’n verdere
R2,4 miljoen afgeneem.
`n Onlangse prestasiemeting-opname, uitgevoer deur PWC, het
getoon dat GWK se persentasie agterstallige skuld laer as die
nywerheidsgemiddeld is.
Dit is steeds ’n sterk fokus om ’n persoonlike verhouding met
GWK se kliënte te vestig. Dit is hierdie persoonlike verhouding
wat GWK ’n mededingende voordeel bied.
Ten slotte
As maatskappy in landbou-produsente se besit tree GWK as
verlengstuk van dié produsente se besighede op. Dit, sowel as
die diversiteit van GWK se verskillende besighede, maak GWK
uniek en posisioneer die maatskappy vir die toekoms.
Dit plaas GWK ook in `n posisie om voort te gaan met belangrike
herinvestering in die gemeenskappe waar ons sake doen.
GWK is as werkgewer van voorkeur in die Noord-Kaap trots op
die bydra van elke personeellid. Ek wil die GWK-span bedank vir
die toewyding en passie wat hulle daagliks in die maatskappy
belê. U is waarlik `n bron van inspirasie.
Aan die Raad van Direkteure, dankie vir u leiding en insig wat u die
afgelope jaar gebied het.
Dank ook aan ons kliënte, aandeelhouers en sakevennote,
waarsonder GWK nie `n bestaansreg sou gehad het nie.
En dan, aan die Hemelse Vader al die eer vir sy seëninge wat Hy
daagliks aan ons bied.
Johan van Dyk
Besturende Direkteur
Douglas
13 September 2012