innoveer landbou Jaarverslag 2012 - gwk

12 13
Korporatiewe beheer (vervolg)
Direksiekomitees
Die Direksie het spesifieke komitees gevestig wat verantwoording doen aan die Raad van Direkteure. Spesifieke verantwoordelikhede
is aan die komitees gedelegeer met duidelik gespesifiseerde verwysingsraamwerke. Geen uitvoerende direkteur tree as voorsitter
van enige van die ondergemelde Direksiekomitees op nie.
Ouditkomitee
Die Ouditkomitee verrig `n belangrike rol in die stelsel vir die monitering van interne kontroles. Die lede van die Ouditkomitee beskik
oor voldoende finansiële en kommersiële vaardighede om hul pligte en verantwoordelikhede suksesvol uit te voer.
Die verslag van die Ouditkomitee vir die afgelope finansiële jaar is in hierdie jaarverslag vervat.
Risikokomitee
Die Risikokomitee beskik oor `n formele handves wat deur GWK se Raad van Direkteure goedgekeur is. Die komitee is verantwoordelik
om die maatskappy se risiko-filosofie, strategieë en beleid te hersien, sowel as om die effektiwiteit van GWK se risikobestuursplan
te evalueer.
Die maatskappy se Risikokomitee bestaan uit vier onafhanklike, nie-uitvoerende direkteure. Die Uitvoerende Direkteure,
Hoofbestuurders, Uitvoerende Bestuurder: Sekretariaat en Risikobestuur en Bestuurder: Interne Oudit woon die vergaderings op
uitnodiging by. Die komitee vergader minstens vier maal per jaar.
Tydens die jaar in oorsig is `n algehele herevaluasie van die GWK-groep se risiko-analisestelsel gedoen en is die risiko-analiseproses
en rapportering dienooreenkomstig aangepas.
Vergoedingskomitee
Die Vergoedingskomitee bestaan uit vier onafhanklike, nie–uitvoerende direkteure sowel as die Besturende Direkteur. Die Finansiële
Direkteur woon die vergaderings op uitnodiging by.
Die Vergoedingskomitee het twee maal die afgelope finansiële jaar vergader. Die Vergoedingskomitee het onbeperkte toegang tot
eksterne kundiges om die komitee by te staan in die hersiening van GWK se vergoedingsfilosofie, formulering van die oorhoofse
menslike hulpbron-raamwerk en vergelyking van die maatskappy se vergoedingspraktyke met die beste bestaande praktyke.
Sosiale en Etiekkomitee
Tydens die afgelope finansiële jaar is `n Sosiale en Etiekkomitee gevestig, welke komitee uit vier onafhanklike, nie-uitvoerende
direkteure en die Besturende Direkteur bestaan. Die Sosiale en Etiekkomitee monitor die GWK-groep se aktiwiteite in die gemeenskappe
waarbinne dit funksioneer en evalueer GWK se rol as korporatiewe burger.
innoveer landbou