Klik hier om die volledige joernaal in PDF-formaat af te laai - LitNet

LitNet Akademies Jaargang 9(2), Augustus 2012
sorg-eenheid-omgewing verval hierdie ouderdomsverspreiding en gepaardgaande hiërargiese
orde, wat rolbevrediging moontlik kan inperk.
Die respektering van individualiteit binne die kulturele konteks van die inwoner as deel van
die gemeenskap in die residensiële-sorg-eenheid kan die moontlike negatiewe effekte van
institusionalisering teëwerk. Volgens Wilcock (2007:18) is die bemagtiging van die persoon
om individuele plesier en uitdrukking te ervaar van belang om die spirituele behoeftes van die
persoon aan te spreek. Dit impliseer dat die kern van menswees erken word en behou
sodoende die menswaardigheid van die individu binne die massa van inwoners in die
residensiële-sorg-eenheid. Die erkenning van individualiteit sluit ook by die
kliëntgesentreerde benadering in arbeidsterapie aan, aangesien die unieke behoeftes van die
individu in ag geneem word.
Die skep van ’n veilige residensiële-sorg-eenheid omgewing behels veel meer as fisiese
sekuriteit soos ’n veiligheidshek. Kane en Kane (in Cutler en Kane:2004:6) beskryf ‘n
situasie van sekuriteit en orde as ’n omgewing waar die inwoner veilig en selfversekerd voel
oor die sekuriteit van die self en besittings, vermoë om vrylik rond te beweeg, en die goeie en
opregte bedoelings van die personeel. Personeelopleiding is dus in hierdie opsig van belang,
waar die klem op respek en begrip vir die bejaarde persoon se wense en gevoelens geplaas
word.
Menswaardigheid is die sleutel tot optimale lewensgehalte vir die individu. Betrokkenheid in
aktiwiteite wat vir die Sesotho/Setswana-bejaarde sin en betekenis inhou, erken
menswaardigheid en dra dus tot lewensgehalte in die residensiële-sorg-eenheid by. Die
geïdentifiseerde lewensgehalte-temas hou egter nou verband met die skep van ’n toepaslike
milieu. Lewensgehalte kan dus geoptimaliseer word deur aktiwiteitsverrigtingsgeregtigheid te
laat geskied in die daarstelling van ’n milieu waar die inwoner vry voel om aan aktiwiteite
van eie keuse deel te neem.
5. Samevatting en aanbevelings
5.1 Getrouheid aan die ontluikende aard van kwalitatiewe navorsing
Dit is duidelik dat die milieu waarin die individu hom/haar bevind, nie van die aktiwiteit
waarin die individu betrokke is, geskei kan word nie. Sin en betekenis word eerder ontgin uit
die erkenning van menswaardigheid deur die totale ervaring van ’n toepaslike milieu. Die
erkenning van menswaardigheid deur die milieu dien as ’n basis vir die bevordering van
lewensgehalte van die individu. Die betekenis van “kultuurtoepaslike aktiwiteite” en ander
moontlike faktore in die skep van ’n toepaslike kulturele ervaring in residensiële-sorgeenhede
het ’n breër betekenis gekry, aangesien die fokus eerder op die menswaardigheid en
die optimalisering van lewensgehalte van die inwoners geval het as bloot net op die
aanbieding van kultuurtoepaslike aktiwiteite. Hierdie veelseggendheid van bevinding kan
spesifiek in verband gebring word met die residuele effek van historiese onderdrukking.
603