Compendium diplomaticum sive tabularum veterum

Dilecto nobis in Christo Patri Fratri Iosepho Antonio de Clesio nostrae Reformatae
Provinciae s. Vigilii lectori 102 theologo, ac concionatori salutem, plenamque in Spiritu Sancto
consolationem. Cum Provinciarum Capitulis, praepediti negociis, praesidere minime valeamus,
pro debito officii nostri nobis incumbit, viros illos eis praeficere, quos ad id muneris idoneos
esse conspicimus. Hinc de tui prudentia, zelo, ac probitate certiores effecti, te praesidentem in
Capitulo nostrae Reformatae Provinciae Sancti Antonii Venetiarum nominamus, instituimus, et
deputamus, opportunam tibi concedentes facultatem ipsum convocandi, et celebrandi in uno ex
conventibus dictae Provinciae, Patribus, ad quos spectat, ac tibi beneviso; ibique congregatis de
more omnibus vocalibus, die a te praefigendo ad electiones Ministri Provincialis, Custodis,
Definitorum, Guardianorum, aliorumque Provinciae officialium, praemissis praemittendis, ac
servatis alias de iure servandis, deveniendi: concedentes tibi in omnibus, et singulis praefatis
electionibus capitularibus praesidentiam, necnon votum consultivum, et electivum.
Praecipientes tibi ad sanctae obedientiae meritum, conscientiamque tuam super hoc onerantes,
ut exclusis de iure excludendis, digniores tantum ad dicta officia respective eligi pro viribus, et
omni conatu cures; ad cuius effectum tibi inculcamus observantiam statuti Capituli generalis de
anno 1676 quod scilicet electores sub poena non suffragandi, antequam ad electionem Ministri,
Custodis, Definitorum, et Guardianorum procedant, singillatim coram venerabili Crucifixi
imagine, ac te praesente iuramentum praestent, se eos electuros ad quodlibet officiorum
praedictorum respective, quos in conscientia omnibus aequa lance libratis, digniores iudicabunt.
Cunctis autem electionibus rite, et canonice sequutis, eas confirmandi in nomine Domini tibi
auctoritatem vigore earumdem tribuimus. Insuper stricte praecipimus tibi, omnibusque
Definitorii Patribus quatenus peracto totaliter de more Capitulo, subscribant in hac eadem nostra
litera patentali, se adamussim omnia observasse, quae a nobis praeordinata sunt, eamque sigillo
parvo Provinciae munitam ad manus nostras remittere debeant in testimonium perpetuum
exactae executionis, et filialis reverentiae tuae, aliorumque supradictorum Patrum, pro maiori
Dei gloria, et Religionis splendore. Praecipimus autem in virtute sanctae obedientiae omnibus et
singulis praememoratae Provinciae superioribus, et subditis, ut te tamquam praesidentem a
nobis institutum, et deputatum recipiant, et recognoscant, tibique ad Regulae, et nostrarum
Constitutionum praescriptum prompte pareant, et obtemperent. Vale. Datum Romae ex Aracoeli
die 26 martii 1802.
Fr. Hilarius de Montemagno
Commissarius generalis.
Venezia nell'imperial regio Governo generale 6 maggio 1802. Vista, e licenziata per
l'esecuzione purché nelle promozioni agli offici abbiano da esser osservate le veglianti leggi
quanto ai requisiti personali degli eleigendi, e che debbano rassegnarsi le risultanze delle
sessioni capitolari al competente Dipartimento della nobile Congragzione delegata per li
necessari confronti, e per la successiva approvazione del regio Governo a tenore del permissivo
divieto 29 aprile decorso 7894.
A. Gradenigo etc.
L.+S. (maioris) De mandato rev.mi in Christo patris
Fr. Augustinus de Nocchis
Secretarius generalis.
Nota. Descripsi die 13 maii 1802, quo laudatus P. Praeses Iosephus Antonius huiusce
tridentini coenobii Guardianus Tridentum reliquit, Perginumque, ac Patavium ad Capitulum
celebrandum die 26 huius pergere coepit, una cum secretario suo P. Ioanne Iosepho de
Cantiolino. Ibi dicto die 26 electi fuerunt Minister provincialis P. Franciscus Antonius de
Venetiis ex-prov. et actualis Guardianus Paduae. Custos P. Bernardinus de Ciano. Definitores
PP. Augustinus de Ceneta, Aloysius de Vicentia lector, Antonius de Padua, et Iosephus de
Bassano, olim Guardianus Veronae.
102 Lector, idest professor scholae.
112