f° 1 - Cartusiana

f° 141 v (213)
1511
Beatrix de Luna fundatrix domus Beatæ Mariæ de Fontibus.
In Hispanis 8 aprilis obijt domina Beatrix de Luna, uxor illustris domini Blasij de Alegario qui
fuerunt fundatores domus Sanctæ Mariæ de Fontibus in diœcesi Oscensi.
Jacobus Croyus, episcopus fit dux Cameracensis et eius liberalitas erga Cartusianos.
Jacobus Croÿus Cameracensis episcopus et Cameracesij comes ab Maximiliano cæsare obtinet ut
Cameracum ducatus titulo honoraretur. Hinc novis insignibus assumptis primus omnium
episcoporum dux Cameracensis atque Cameracesij salutatus magna pompa Cameracum februarij
decima insequentis anni investitur. Nec tunc temporis pietatis immemor fuit illustris et magnificus
dominus, primo studens tantum honorem apud Deum bonis operibus promeneri, siquidem hoc
eodem anno 1511 venit ad monasterium nostrum in Schuet et ordinavit fieri unam cellam et dotare
eam, pro qua dotatione dedit diversis vicibus mille rhenenses. Insuper quando impetravimus a
capitulo generali pro eodem domino monachatum dedit centum aureos valentes centum et
quinquaginta rhenenses cum frequenter domnus prior et procurator eum visitaverunt quibus
semper exhibuit hilamer vultum et semper recepti ad mensam suam multis præsentibus magnatis
et circa eius latus sederunt.
Conciliabulum Pisanum.
Conciliabulum Pisanum a Bernardino Hispano cardinali Sanctæ Crucis et aliquot cardinalibus
contra Julium secundum indicitur, quod quidem anno sequenti Mediolanum primo post Lugdunum
in Gallia est translatum rege Gallorum illis favente quippe qui in pontificem alieno esset animo
quod recessisset a fœdere contra Venitos. Nec aberat ab hac factione Maximilianus cæsar sed vir
gravis et prudens admonitus a bonis viris sese collegit et celeriter ab hac temeritate discessit. Nihil
tamen effectum est interveniente Julij morte, qui paulo ante contra concilium Pisanum illegitimum
scilicet Lateranense œcumenicum indixerat quod postmodum ann 1517 a Leone 10 aprilis 17
absolutum fuit.
Carolus Egmondius magna belli mole pressum in Italia ac foro-Julij cæsarem videns rupta iterum
pace Brabantiæ fines depopulabatur. Hi iussu Margaretæ Austriacæ contra se armant acceptisque
ab Angliæ rege mille quingentis peditibus Venlonium frustra obsident.
Gelder duo virorum millia in unum coacta Amsterodamum mittit, qui sub-urbiorum partem, ac
viginti duas naves in portu repertas exurunt, abactaque diviti præda in Gendriam sine detrimento
redeunt, ex itinere Bodegraviam spoliantes ac exurentes . Id ægerrime fert Wassenarij regulus inter
Hollandiæ proceres facile primus vir bellicosus. Certior igitur factus partem Geldrorum qui
Amsterodami fuerant apud carthusianos Ultraiectinos consedisse cum exiguis eos copijs invadit
maioremque partem interficit. Geldri qui a clade carthusiana effugerant suis paucitatem
Wessenariorum exponentes cartusiam simul revertuntur, unde ad nobilium virginum abbatiam
Dalam dictam, quo Wessenarius concesserat, pervolant, eumque sine custodijs agentem ac nil
minus quam Geldros expectantem opprimunt, cumque multis alijs omnique præda Arnhemum
captivum abducunt sed mox factis inducijs omnes captivi gratis liberantur.
305