f° 1 - Cartusiana

f° 116 r (162)
1496
Frater Amandus Amelen, conversus, moritur.
18 maij obijt in Schuet frater Amandus Amelen, conversus huius domus, qui fuit lapicida et satis
egregius in opere suo, ante ingressum ordinis fuit nuntius scholarium almæ universitatis
Parisiensis, postea se ad servitium Dei contulit et pro constrendo sibi cubiculo dedit semel L
rhenenses.
Item prior domus Ultraiectinæ.
Domnus Christianus de Mera, Harlemensis professus et prior domus Ultraiectinæ sede et vita
excedit in profesto Sancti Martini, succedit domnus Otto de Wolffswinkel dictus de Amesfordi.
Eodem anno obijt 3 decembris frater Joannes Huckelen, donatus et sartor huius domus.
Domnus Gaspar vander Stock, prior Capellæ moritur.
Hoc anno 7 octobris obijt domnus Gaspar vander Stock, professus et prior domus Capellæ, alias
etiam Delphensis ac convisitator provinciæ, quittavit nobis in morte L rhenenses cum consensu
conventus.
Obitus Blancæ uxoris Maximiliani imperator.
Anno 1496, Blanca Maria Sfortia Maximiliani cæsaris altera uxor inter venandum (velut et Maria
Burgunda an. 1482) equo delapsa paulo post e casu simul cum fœtu quem utero gerebat, nullis
liberis relictis absente marito perit.
Philippus archidux in Germaniam profectus in ditionibus paternis in principem inauguratur.
Philippus archidux a patre cæsare iam antea vocatus in Germaniam circa finem mensis aprilis
proficiscitur. Calendas maij ligneam avem magno civium gaudio altissima arbore deijcit civesque
eius sodalitatis liberaliter donat. Historia Leodiensis habet præterito anno una cum patre in
Superiorem Germaniam profectum fuisse ut sicut provincijs Belgij maternis inauguratus erat
consimili ratione paternarum ditionum hæres ac successor declaratus sit. Philippi autem custos
adiunctus fuit episcopus Leodiensis, cui in viaticum biennij quo abfuit populus Leodiensis mille et
quingentos florenos contribuit.
Ostenta.
Hoc anno multa ostenta visa sunt in aëre nam mense maijo plures circuli apparuerunt et 8 calendas
junias parelij tres conspecti sunt : et 14 calendas junias tonitrua et fulmina et grandives et inusitatæ
tempestates magnam calamitatem satis et alijs plerisque rebus omnibus intulerunt, quo tempore
maleficus Leodij et latro positus in rota fuit qui pœnitere noluit.
Licentiæ contra statuta periculosæ nec petendæ.
His signis Deus sæpe provocat homines ad pœnitentiam, Et in capitulo nostro satis acris
reprehensio facta, quam hic subijcere placuit ut non simus proni ad nimias licentias patendas. sic
habet : cum statuta et ordinationes capituli generalis prohibeant ne monachi in spatiamentis extra
cellas comedant vel libant. Et in pluribus domibus prætextu illius consuetudinis et licentiarum
quas se habere dicunt contrarium observetur in maximum scandalum observantiæ et honestatis
ordinis, sequuntur enim et fiunt ex præfatis comessationibus inter ipsos ad invicem actus dissoluti
inverecundi rixæ et ebrietates, et quam plurimæ aliæ dissolutiones in iniuriam Dei et ordinis et
habitus irreverentiam. Idcirco volentes etiam talibus de remedio opportuno providere, omnes et
singulas licentias concessas seu permissas comedendi seu libendi extra domorum clausuras, vel
intra, vel extra cellas revocamus irritamus et cassamus. Et visitatoribus et prioribus inhibemus ne
de cetero huiusmodi licentias concedant, aut talibus uti permittant. Quo si fecerint sint de facto ab
eorum officijs suspensi. Et petentes tales licentias vel exeundi ad visitandos parentes cuiuscunque
gradus et status fuerint sint per unum mensem in disciplina generali.
242