opera quae supersünt omnia. - ARCHIVE OUVERTE UNIGE

697 1561 SEPTEMB. 698
tares. Et sainct Chrysostome aussi n'a esté d'autre
advis en son exposition secondé sur sainct Matthieu,
homélie 49. Car aussi l'Eglise est appuyée sur le
fondement des Prophètes et Apostres.
Ainsi donc pour conclusion, nous recevons
l'Escriture saincte pour une entière declaration de
tout ce qui est requis à nostre salut. Et quant à
Be qui se trouvera es Conciles, ou livres des docteurs,
nous ne pouvons ni devons empescher que
ne vous en puissiez aider et nous aussi, pourveu
qu'il soit fondé sur exprès tesmoignages de l'Escriture.
Mais pour l'honneur de Dieu ne nous amenez
leur nue authorité, sans que le tout soit examiné
sur ceste pierre de touche. Car nous disons
avec sainct Augustin, au livre second de la doctrine
Chrestienne, chap. 6: Que s'il y a quelque
difficulté en l'interprétation d'un passage, le Sainct
Esprit a tellement tempéré les sainctes Escritures,
que ce qui est dit plus obscurément en un endroict,
est dit ailleurs très clairement. Voyla quant à ce
poinct, lequel i'ay déduit un peu plus amplement,
afin que chacun entende que nous ne sommes ennemis
des Conciles, ni des anciens Peres, par lesquels
il a pieu à Dieu enseigner son Eglise.
H reste encores deux poincts: c'est ascavoir la
matière des Sacremens, et la discipline ou police
de l'Eglise.
Quant au premier, il est vray qu'il meriteroit
bien d'estre traicté bien au long, pour les difficultez
qui en sont auiourd'huy en la Chrestienté:
mais pource que ie n'ay maintenant entreprins de
disputer, ains seulement de proposer les poincts
principaux de nostre conference, ie me contenteray
de declarer en sommaire ce que nous en tenons.
Nous sommes d'accord, à nostre advis, en la
description de ce mot Sacrement, c'est ascavoir que
les Sacremens sont signes visibles, moyennant lesquels
la conionction que nous avons avec nostre
Seigneur Iesus Christ ne nous est pas simplement
signifiée, ou figurée, mais aussi nous est véritablement
offerte du costé du Seigneur, et consequemment
ratifiée, seellee et comme engravee par la
vertu du Sainct Esprit, en ceux qui par vive et
vraye foy appréhendent ce qui leur est ainsi signifié
et présenté. l'use de oe mot signifié, Messieurs,
non point pour énerver et anéantir les Sacremens,
mais pour distinguer le signe d'avec la chose qu'il
signifie en toute vertu et efficace.
Nous accordons par consequent qu'es Sacremens
il faut nécessairement qu'il y entrevienne
une mutation celeste et supernaturelle. Car nous
ne disons pas que l'eau du sainct Baptesme soit
simplement eau, mais qu'elle est un vray Sacrement
de nostre regeneration, et du lavement de
nos âmes au sang de Iesus Christ nostre Sauveur.
Pareillement nous ne disons pas qu'en la saincte
Cène de nostre Seigneur le pain soit simplement
pain, mais sacrement du précieux corps de nostre
Seigneur IesuB Christ, qui a esté livré pour nous:
ni que le vin soit simplement vin, mais sacrement
du précieux sang qui a esté répandu pour nous.
Cependant nous ne disons par que ceste mutation
se face en la substance des signes, ains en
l'usage et en la fin pour laquelle ils sont ordonnez:
et ne disons point aussi qu'elle se face par la vertu
de certaines paroles prononcées, ne par l'intention
de celuy qui les prononce/ mais par la seule puissance
et volonté de celuy qui a ordonné toute ceste
action tant divine et celeste. Duquel aussi l'ordonnance
doit estre récitée haut et clair, en langage
entendu, et clairement exposée, afin qu'elle soit entendue
et receue par ceux qui assistent. Voyla
quant aux signes extérieurs.
Tenons maintenant à ce qui est testifié et exhibé
du Seigneur par ces signes.
Nous ne disons point (ce qu'aucuns par faute
de nous avoir bien entendus, ont estimé que nous
enseignons) c'est ascavoir, qu'en la saincte Cène il
n'y ait qu'une simple commemoration de la mort
de nostre Seigneur Iesus.
Nous ne disons point aussi que nous sommes
faicts en icelle participans seulement du fruict de
la mort et passion d'iceluy, ains que nous conioignons
l'héritage avec les fruits qui nous en provienent,
disans avec sainct Paul en la premiere
aux Corinthiens, chap. 10. Que le pain que nous
rompons selon son ordonnance, est la communication
du vray corps de Iesus Christ qui a este livré
pour nous: et la coupe dont nous buvons, est la
communication du vray sang qui a esté respandu
pour nous: voire, en ceste mesme substance qu'il a
prinse au ventre de la vierge Marie, et qu'il a emportée
d'avec nous au ciel. Et ie vous prie, Messieurs,
au nom de Dieu, que pouvez vous doncques
chercher ni trouver en ce sainct Sacrement, que
nous n'y cherchions et trouvions aussi?
I'enten bien là dessus que la response est toute
preste. Car les uns demanderont que nouB confessions
que le pain et le vin sont transmuez, ie ne
di pas en sacremens du corps et du sang de Iesus
Christ: car nous l'avons desia confessé: mais au
propre corps et propre sang de Iesus Christ.
Les autres (peut estre) ne nous presseront iusques
là, mais requerront que nous accordions que
le corps et le sang sont réellement et corporellement,
ou dedans, ou avec, ou dessons le pain. Mais
sur cela, Messieurs, pour l'honneur de Dieu, escoutez-nous
en patience, sans estre scandalizez: et
despouillez pour un temps toute l'opinion que vous
avez conceuë de nous.
Quant l'une ou l'autre de ces deux opinions
nous sera monstree par la saincte Escriture, nous