Cartulaire de l'abbaye de Moissac

88.
1073, 5 novembre
Donation à Cluny, par les moines et les nobles de la région, de l’abbaye de Lézat.
A. ADTG, G 722 (charte marquée n° 1) (inconnu chez Müssigbrod).
B. Analyse du XVIII e siècle, d’après une copie du début du XII e siècle dans un fragment de
cartulaire perdu: Andurandy 604.
C. Analyse du XVIII e siècle dans un relevé d’actes d’un cartulaire perdu : ADTG G 588
(Andurandy 1663).
Edition: HGL, t. 5, col. 599-600; Bernard-Bruel, t. 4, n. 3454.
A.
Mention dorsale ancienne: LESATENSIS MONASTERII
Notum sit omnibus hominibus, tam presentibus quam futuris, quod Lesatense monasterium quondam
ab Atone Benedicti constructum, atque sancto apostolorum principi Petro ab eodem Atone Benedicti
contraditum, cum succedentibus adversitatibus pene jam ad ultimam secularitatis, que bonorum
locorum destructionis indicium maxime esse solet, profunditatem devenisset, nos ejusdem loci
monachi, iuncti nobilibus terre viris, comiti videlicet Rogerio, necnon et Raimundo Willelmi, insuper
et Berengario de Alta Ripa et Bernardo de Marca Fava, in quibus una nobiscum abbatis constabat
electio, venerabilem virum Hugonem, Cluniacensem videlicet abbatem, adivimus et ut supra
memorato cenobio sua ordinatione et consilio, qualiter ad Dei iterum servitium restauraretur,
subveniret rogavimus. Igitur ipse in primis nullomodo nostræ assentiens peticioni nequaquam se de
causa ista intromissurum asseruit, nisi ei electionem seu ordinationem abbatis ita traderemus,
quatenus per succedentia tempora ipse atque ejus in perpetuum successores, quamdiu Cluniacensis
locus in religione monastica vigeret, jam dictum monasterium Lasatense sine alicuius justa
impeditionis querela ordinare debuissent. Hoc autem ideo se facere dicebat, ne et ipse in vacuum
laborare videretur, et semel recuperatus locus iterum ad peiora laberetur. Quapropter nos ejusdem loci
monachi, necnon et clarissimi viri superius scripti, comes scilicet Rogerius et ceteri ad quos abbatis
electio seu monasterii ordinatio pertinere videtur, damus et concedimus eidem reverentissimo viro et
sepe memorando domno HUGONI abbati, ejusque in perpetuum successoribus omnibus, quamdiu
Cluniacensis locus religionem monasticam secutus fuerit, electionem seu ordinationem abbatis
monasterii Lesatensis, ut ordinent et provideant ipsum locum secundum regulam sancti Benedicti, ad
laudem et honorem Domini nostri Ihesu Christi, qui nunc et semper regnat et vivit et in omnibus
seculis.
Hanc autem donationem nostram, sicut optamus, ita et rogamus, ut isdem domnus abbas
Cluniacensis auctoritate apostolica confirmare et roborare faciat, quatenus amodo et deinceps nullus
hæc temerario ausu audeat infringere. Quod si quisquam presumserit, iram Omnipotentis Dei incurrat,
et quod temtaverit non eveniat, insuper perpetuo anathemati, nisi resipuerit, subiaceat, atque suam in
parte sinistra, cum reprobis, portionem accipiat.
Facta est autem hæc carta die IIIII post festivitatem Omnium Sanctorum, anno Incarnationis
Dominice M.LXX.III., indictione XI, presidente domno Hugone abbate Cluniacense, et domno
Hunaldo, abbate Moisiacense, necne et Auxiense episcopo Willelmo, sedem vero apostolicam domno
papa Gregorio VII tenente, regnante Philippo, Francorum rege, insuper Domino nostro Ihesu Christo,
cui est honor et imperium per omnia secula seculorum. Amen.
Signum Rogerii comitis. Signum Raimundi. Signum Berengerii. Signum BERNARDI.
C.
129