Sinjoro Tadeo - Cindy

imarkante kanonon forlasitan en strata angulo, ŝarĝitan per kartoĉoj, turnis ĝin al la pordego kaj
elpafis. Ĉi tiu unu pafo savis tiam Vilnon. Generalo Dejov pereis, kun li kelkaj oficiroj; la restintoj,
timante embuskon cedis for de la urbo. La nomo de tiu urbano ne estas certe konata.
(14) Indulgo, konservo de vivo soldata.
(15) Ĉefo serĝento.
(16) Cnicus benedictus aŭ centaŭera benedicta, kuraca kreskaĵo.
(17) Malnova rusa nomo de poloj.
(18) Estis ankoraŭ poste invadoj, kvankam ne tiom famaj, tamen sufiĉe laŭtaj kaj sangaj. Ĉirkaŭ j.
1817 sinjoro U...en Novogrodeka Vojevodlando, venkis dum invado tutan novogrodekan garnizonon
kaj malliberigis la ĉefojn.
Libro Deka — Emigracio — Jacek
Interkonsilo pri sendanĝerigo de l' sorto de venkintoj — Intertraktado kun Rikov — Adiaŭdiro
— Grava malkaŝo — Espero
Matenaj nuboj, dise komence kurante
Kiele nigraj birdoj al zenit' flugante,
Ĉiam ariĝis. Suno apenaŭ al subo
Ekiris el tagmezo, jam grandega nubo
Ĉielduonon kovris. La vento akcelis
Densiĝantan nubegon kaj suben ĝin pelis,
Ĝis, unu flank', duone de ĉiel' ŝirite,
Al tero kliniĝante, larĝe etendite,
En sin prenante ventojn, kiel granda velo,
10 De l' sudo okcidenten kuris sur ĉielo.
Estis moment' mallaŭta — kaj aero tute
Silentis, surde, kvazaŭ de teruro mute.
Grenoj, kiuj antaŭe kuŝiĝis kaj skuis
Ree supren la oran spikaron, kaj bruis
Kiel ondaro, staras nun tute senmove,
Al ĉiel' rigardas, pajlon skuas denove.
Verdaj salikoj, poploj ĉe vojo starantaj
Kiele ploristinoj ĉe tombo, klinantaj
Fruntojn, kaj kiuj plektis longajn brakojn vente,
20 Dislasinte harligojn siajn blankarĝente,