GAVARO - Cindy

4. KRESTOMATIO
4.1 Antaŭparolo
Kara leganto, en la sekvanta parto vi renkontos tekstojn facilajn
kaj malfacilajn, tekstojn preskaŭ virgajn je slangaĵoj kaj tekstojn
plenŝtopitajn per ili. Ĉiu el ili ja spegulas la varieman formon de
sia originalo, ĉar mi sufiĉe skrupule respektis tiun formon. Sekve,
se tiu aŭ alia fragmento estas nur pene komprenebla al vi, kaj
postulas konsulti la vortareton, precipe se muntita en dialekta
kunteksto, memoru ke ĝi ankaŭ estas tia en la nacia vesto. Jena
rimarko pri la kvalito de ĉiena varo ne volas konsistigi pretekston
por senkulpigi min aŭ mian metodon pri malglataĵoj, ĉar mi estas
erarema homo, kiu ne ĉiam trovis la plej prudentan solvon, ne
ĉiam tradukis ĝuste, aŭ ne ĉiam lerte aplikis sian propran
regularon. Sed ĝi konsistigas averton ke vi bonvolu ne kritiki en la
internacilingva traduko tion kio eventuale estas kritikinda en la
nacilingva originalo.
En simila perspektivo vi konsideru, ke slangoliteraturo ofte kaj
facile kreskas sur pornografia sterkobedo. Mi provis elekti sole
verkojn aŭ fragmentojn en kiuj la beletra parfumo aŭ la spriteco
sufiĉe superas la fiprozan fetoron, kondamnante tiumaniere sufiĉe
grandan kvanton da publicaĵoj, kiuj el sola terminfarada vidpunkto
estintus tamen interesaj. Sed, ĉar morala aŭ arta pritakso
ege ligiĝas al privataj preferoj subjektivaj, la rezulto ne povos
kontentigi ĉiujn. Krome, inter la jes menciitaj fragmentoj troviĝas
ie-tie ankaŭ hazarde blanka viandaĵo fortranĉita el cetere putra
korpo; ties aperigo do neniel garantias la moralan karakteron de
la koncerna verko entute.
Mi do petas vian pardonon pri la fakto ke tiu aŭ alia verko estas
prezentita aŭ ne prezentita, ke tiu aŭ alia fragmento trotaksas
vian senteman digestokapablon. Mi faris kion mi opiniis necesa
kaj en la maniero kiel permesis la disponebla literatura materialo
laŭ la starigitaj principoj. Mi ne povis ne limigi min al la situacio
de slango en okcidentaj literaturoj, kaj eĉ nur en parteto de ili.
Informoj pri slango kaj ĝia influo je beletro en aliaj lingvoj kaj
landoj estos sekve tre bonvenaj al mi por eventuala remuldo de
tiu-ĉi projekto. Sciencaj lingvostudoj pri la temo ne figuras en la
sekvanta palmareso, ĉar mia celo ja nur estas ebligi verkadon aŭ
75