GAVARO - Cindy

4.24 La Ŝajnkrimulino
La usona filmo Bringing up Baby (Edukante non Bebo) el 1938, realigita
de Howard Hawks, estas klasika modelo de sensenca teatraĵo en
kiu la miskomprenoj, erarpaŝoj, kaj fuŝaĵoj sekvas unu la alian senhalte
ĝis la fino, en kiu okazas kolapso. La aktoroj dialogas tiel rapide, ke oni
ricevas la impreson ke ili hastegas por atingi la finon de la komikaj
scenoj. Nur la plej lertaj kapablas mastri tian postuleman taskon de
aktorado. Ĉefrolas Cary Grant (en rolo de mallerta, forgesema, kaj
stult-konduta paleontologo) kaj Katharine Hepburn (en rolo de sintruda,
impulsiva, frenezeta filino de riĉeguloj). Jena sovaĝritma farso, tra la
“batalo de la seksoj” kiel gvidfadeno, daŭre mokpikas gravajn
institutojn, psikiatrion, sterilan sciencon, la policon, kaj la burĝan socitavolon.
La titolo referas al dresita brazila leopardo, dorlotbesto de la
heroino, kiun ŝi nomis “Bebo” ĉar ĝi ŝatas koncernan usonan kanzoneton:
“I can’t give you anything but love, Baby” (Mi povas doni al vi
nenion alian ol amo, Karulino). Tiu malsovaĝa rabobesto kaŭzas
multajn komplikiĝojn, jen pro ektimo ĉe personoj, jen pro ties malkredemo
pri ĝia ekzisto.
La juna sciencisto David Huxley, post kvar jaroj da
eksperimentado, sukcesis rekonstrui la gigantan skeleton
de brontosaŭro. Mankas nur unu ostego, la klaviklo. Tiun
oni liveros al li perpoŝte, la sekvan tagon. Tamen, la tuta
entrepreno lia estas en danĝero pro kadukeco de la halo en
kiu staras la praepoka skeleto kun aliaj valoraj fosiliaĵoj.
Pro tio li aspiras akiri unu milionon da Dolaroj de iu filantropa
riĉulino — neniu alia ol la onklino de la ventkapa
Susan Vance — kiu lasta hokas sin al li, kaŭzante sennombrajn
komplikiĝojn en lia vivo. Post multaj ridigaj
eventoj kaj situacioj, la juna paro trafas en prizonon, li
kulpigita esti rompŝtelisto kaj ŝi danĝera frenezulino. La
ŝerifo kaj lia asistanto plus psikiatro, kiuj certe ne inventis
la radon, obstine rifuzas kredi iliajn eksplikojn, eĉ ne post
kiam alvenas eminentaj personoj por ilin senkulpigi. Male,
ankaŭ tiuj estas enkarcerigitaj kiel estante membroj de la
sama bando. Fine Susan realigas al si, ke nur iu “konfeso”
povos kontentigi la stultajn policistojn. Ekparolante slange,
ŝi do kondutas kvazaŭ ŝi estus efektive gangsterino
(“Turnoporda Suzi”) kaj preta perfidi ĉiujn anojn de la
bando. La ŝerifo, jam vidante sin kiel gloran kaptinton de
danĝera krimularo, tuj akceptas ellasi ŝin el la karcero por
fari plenan konfeson protokolotan.
189