GAVARO - Cindy

Sinjorino E-H (ege ŝokite al Liza) – Tamen, vi ne kredas serioze ke
via onklino murdatis !?
LIZA – Ĉu ne farus mi ? Tiuj, kun kiuj ŝi vivadis, estus ŝin
murdinta pro eĉ nura ĉapelopingleto, se silenti pri ĉapelo !
Sinjorino E-H – Sed ne povis esti ĝusta ago de via patro tiamaniere
verŝadi alkoholon en ŝian buŝon. Tio estus povinta mortigi
ŝin !
LIZA – Ho, ne ŝin ! Al ŝi la brando estis kvazaŭ patrinlakto.
(Pickering ŝrumpiĝas. Higgins decidas iri for, metas salutan
fingron kontraŭ sian ĉapelon kaj ekas. Spite, lia nekontrolebla
scivolemo last-momente retenas lin je la pordosojlo, por aŭdi kion
Liza ankoraŭ estis dironta.) - Cetere, li estis verŝeginta tiom multe
tra la propra gorĝo ke li perfekte konis la efikon.
Lordino BOXINGTON – Ĉu vi volas diri, ke via patro trinkadis ?!
LIZA – Trinkadis ? Tondre, li drinkis !
Sinjorino E-H - Kiel terure por vi !
LIZA – Tute ne. Tio neniam kaŭzis malbonaĵon al li, kiom mi vidis.
Sed li ankaŭ ne faris tion senĉese. (Gajtone) – Je la hapeno, kiel
oni diras, de tempo al tempo. Kaj li estis ĉiam pli afabla kiam li
iom vagadis en vaporoj. Ĉiufoje kiam li estis sen laboro, mia
patrino kutimis doni al li kvar Azenojn por ke li eliru kaj ne
revenu antaŭ ol esti drinkinta sin mem gajhumora kaj amema.
Estas multe da virinoj kiuj devas igi siajn edzojn ebriaj, por igi ilin
taŭgaj al kunvivado. (Nun tute senĝene) – Vidu, estas tiel-ĉi: kiam
viroj havas peceton da konscienco, tiu riproĉas al ili dum sobreco
kaj tio igas ilin mavhumoras. Guteto da beberaĵo kontraŭe
forprenas la pezon kaj faras ilin feliĉaj. (Al la junviro Freddy, kiu
tordiĝas pro subpremata ridado.) – Nu, pro kio subridas ci ?
FREDDY – Pro la nova parolmaniero. Vi tiel lerte scipovas fari
tion!
LIZA – Se mi faris ĝin konvene, kial vi do ridas ? (al Higgins) – Ĉu
mi diris ion kio ne decas ?
Sinjorino HIGGINS (intervene) – Neniel, Fraŭlino Doolittle.
LIZA – Nu, tio estas konsolo, almenaŭ. (Komenteme) – Kion mi
ĉiam diras, estas ke …
HIGGINS (ekstaras kaj rigardas al sia horloĝo) – Hum, hum !
106