I figlioli di Pandora_1

les enfants de pandora
simbiosa
« Si sà da pocu ch’eddi sò i micorisi chì assicurani i scambii nutritivi
trà tutti l’arburi di a furesta. I ricerchi novi ani pà risultatu chì tutti
l’arburi di a furesta sò in leia trà eddi è issa leia hè custituita da i
filacci di micorisi comu una reta chì s’assumiglia à Internet è certi l’ani
chjamata u Wood Wide Web, l’Internet di a furesta ».
Dopu qualchì minuti di silenziu u vechju sapienti aghjustò :
« Pari chì a furesta funziunessi comu s’edda era un solu essaru duva
tuttu hè intricciatu è tuttu s’aiuta, à cuntrariu di ciò chì si pinsava
sin’à oghji. »
Issi ricerchi lampavani in tarra a nostra manera di veda a natura.
S’erani classificati da u sempri, l’essari vivi in sfarenti cumpartiment :
l’animali di i pianti, a predazioni di a simbiosa, a selezzioni naturali
di l’aiutu, ma in fattu tuttu era liatu è intricciatu. Stella era maravigliata,
chì tuttu quissu cambiava u nostru raportu cù a natura ma
dava dinò di pussibilità infiniti di ricerca.
U corsu cuntinuvò cù spiigazioni di tutti i provi fatti à tempu à issi
travagli.
À listessu tempu, Stella era quì pinsirosa. Un idea l’era sbucciata in
capu.
Dopu una stonda di riflizzioni dicidò chì à a fini di u corsu à parlanni
à u pruffissori.
I studienti aviani tutti tagliati a visiò ma a ghjuvanetta era sempri
pusata à a so piazza.
U pruffisori cuminiciava à accoglia i so affari, quand’eddu s’avvidì di
a prisenza di Stella.
« Stella, chì c’hè ?
– O sgiò pruffissori, m’eti podassi da piglià pà una tonta, ma dapoi
chì vo eti parlatu di issa leia trà l’arburi m’hè vinutu una idea, è ùn
c’hè manera di cacciammila di u capu.
– A sà o Stella, di l’idei chì pariani scemi sò nati i più grandi scuparti.
Allora avà parla.
18 19