I figlioli di Pandora_1

A chjama marina
•••••
« Corciu quiddu ch’ùn sunieghja »
Dettu arburigenu
Cusì bedda ch’edda era quidda ghjurnata di branu. Una
ghjurnata d’aprili calda comu ci n’hè certi volti, una ghjurnata
chì dava più voglia à a spassighjata cà à u travagliu. Da
a finestra di a so camara, Stella, ghjovana studienti in biulugia, vidia
u mari chì spampigliulava. Era quì, cusì vicinu, ch’edda pudia senta
u so muscu ed era comu un invitu. Ma pà disgrazia, colpu à issa
pandemia, a ghjuvanetta era intannata in casa. Chjudendu tuttu, libri
è urdinatori, Stella si ni surtì in tarrazza, pà mirà a natura. Edda si ni
stava in un paisolu, supranendu u mari è arrimbatu à a muntagna.
Tuttu in giru, a machja, issa vegetazioni tipica di u Miditerraniu, issa
vegetazioni chì mentri millai d’anni s’era avvizzata à i caldamoni è i
sicchini. Ma oghji tuttu cambiava. Ancu i suvari, i listinchi, i mortuli
è altri pianti d’issa machja, pocu à pocu si ni spariani par via di u
mancà d’acqua.
U viru avia toccu millioni di parsoni in u mondu, è a natura ancu
edda patia in ogni lochi. Si n’avvidia, Stella, ma ùn sapia chì fà di
pettu à tuttu issu disturbu di a natura.
Di stizza a zitedda si lampò nantu à a so bicicletta di casa è cuminciò
à appughjà comu una scema annantu à i pedali. A si pigliò cusì forti
chì pocu tempu dopu i so ghjambi li frighjiani è u so cori battia à
più pudè. I studii è u sportu erani, in issi tempi, a sola manera di
cacciassi l’angoscia chì ingutupava a so vita. Pà issa volta à ci avia
11