Ewropa ta' lib ertà, sigurtà u ġustizzja - EU Bookshop - Europa

Iċ-ċittadini Ewropej għandhom il-jedd li jgħixu fil-libertà, mingħajr biża’
ta’ persekuzzjoni jew vjolenza, fi kwalunkwe post fl-Unjoni Ewropea. Imma
l-kriminalità u t-terroriżmu internazzjonali huma fost it-tħassib ewlieni tal-Ewropej
illum.
Huwa ċar li d-dritt għall-moviment liberu għandu jfisser li kull persuna, fi
kwalunkwe post fl-UE, tingħata l-istess protezzjoni u l-istess aċċess għall-ġustizzja.
Għalhekk, permezz ta’ serje ta’ emendi fit-Trattati, l-Unjoni Ewropea bil-mod il-mod
qed issir “żona ta’ libertà, sigurtà u ġustizzja” unika.
L-ambitu għal azzjoni tal-UE f’dawn l-oqsma twessa’ tul is-snin, hekk kif il-Kunsill
Ewropew adotta tliet programmi ta’ qafas suċċessivi: il-programm ta’ Tampere
(1999–2004), il-programm tal-Aja (2005–09) u l-programm ta’ Stokkolma
(2010–14). Filwaqt li l-programmi ta’ Tampere u tal-Aja mmiraw għal iktar sigurtà,
il-programm ta’ Stokkolma jiffoka iktar fuq il-ħarsien tad-drittijiet taċ-ċittadini.
It-teħid tad-deċiżjonijiet f’dawn l-oqsma sar iktar effettiv bis-saħħa tat-Trattat
ta’ Lisbona li daħal fis-seħħ f’Diċembru 2009. Sa dakinhar, l-Istati Membri kienu
żammew ir-responsabbiltà għall-ħolqien u t-tmexxija taż-żona tal-libertà, issigurtà
u l-ġustizzja. Ix-xogħol, essenzjalment, sar mill-Kunsill (jiġifieri permezz ta’
diskussjoni u qbil fost il-ministri fil-gvern), u b’hekk il-Kummissjoni u l-Parlament
kellhom biss rwol żgħir x’jaqdu. It-Trattat ta’ Lisbona biddel dan kollu: il-Kunsill
issa jieħu ħafna mid-deċiżjonijiet tiegħu permezz ta’ votazzjoni b’maġġoranza
kwalifikata u l-Parlament huwa sieħeb indaqs fil-proċess tat-teħid tad-deċiżjonijiet.
59