Ewropa ta' lib ertà, sigurtà u ġustizzja - EU Bookshop - Europa

(b) Il-kompetizzjoni
Il-politika tal-kompetizzjoni tal-UE hija essenzjali biex tiżgura li, fis-suq uniku
Ewropew, il-kompetizzjoni ma tkunx biss ħielsa iżda anki ġusta. Il-Kummissjoni
Ewropea timplimenta din il-politika u, flimkien mal-Qorti tal-Ġustizzja, tiżgura li
din tiġi rrispettata.
L-għan ta’ din il-politika huwa l-prevenzjoni ta’ kwalunkwe kartell fin-negozju,
kwalunkwe għajnuna mill-awtoritajiet pubbliċi jew kwalunkwe monopolju mhux
ġust, li jistgħu jgħawġu l-kompetizzjoni ħielsa fis-suq uniku.
Kwalunkwe ftehim li jaqa’ taħt ir-regoli tat-Trattat irid jiġi nnotifikat lill-Kummissjoni
Ewropea mill-kumpaniji jew mill-entitajiet ikkonċernati. Il-Kummissjoni tista’
timponi multa diretta fuq kwalunkwe kumpanija li tikser ir-regoli tal-kompetizzjoni
jew li ma tagħmilx in-notifika meħtieġa — bħal fil-każ tal-Microsoft, li weħlet
multa ta’ € 900 miljun fl-2008.
Jekk Stat Membru tal-UE jagħti għajnuna illegalment, jew ma jinnotifikax li jkun se
jagħti l-għajnuna, il-Kummissjoni tista’ titlob li terġa’ titħallas lura. Il-Kummissjoni
għandha tiġi nnotifikata wkoll bi kwalunkwe amalgamazzjoni jew akkwist ta’
kumpanija li tista’ twassal biex kumpanija jkollha pożizzjoni dominanti f’suq
partikolari.
(ċ) Il-ħarsien tal-konsumaturi u tas-saħħa pubblika
Il-leġiżlazzjoni tal-UE f’dan il-qasam timmira li tagħti lill-konsumaturi kollha
l-istess ammont ta’ protezzjoni finanzjarja u tas-saħħa, irrispetttivament minn fejn
jgħixu, jivvjaġġjaw jew jixtru fl-Unjoni Ewropea. Il-ħtieġa għal protezzjoni mifruxa
madwar l-UE kienet kwistjoni taħraq lejn l-aħħar tas-snin 90 tas-seklu l-ieħor
minħabba beżgħat fir-rigward ta’ kwistjonijiet tas-sikurezza tal-ikel bħall-“marda
ta’ ġenn il-baqar” (BSE). Biex ikun hemm bażi xjentifika soda għal-leġiżlazzjoni
dwar is-sikurezza tal-ikel, fl-2002 twaqqfet l-Awtorità Ewropea dwar is-Sigurtà fl-
Ikel (EFSA).
Il-ħarsien tal-konsumatur madwar l-Ewropa kollha huwa meħtieġ ukoll f’ħafna
oqsma oħra u huwa għalhekk li jeżistu għadd ta’ direttivi tal-UE dwar is-sikurezza
tal-kożmetiċi, tal-ġugarelli, tal-logħob tan-nar, eċċ. Fl-1993 l-Aġenzija Ewropea tal-
Mediċini (EMEA) twaqqfet biex tittratta applikazzjonijiet għal awtorizzazzjoniijiet
għall-kummerċjalizzazzjoni ta’ prodotti mediċinali. L-ebda mediċina ma tista’ tiġi
kkummerċjalizzata fl-UE mingħajr awtorizzazzjoni bħal din.
L-Unjoni Ewropea tieħu azzjoni wkoll biex tipproteġi lill-konsumaturi minn
reklamar falz u qarrieqi, minn prodotti difettużi u abbużi f’oqsma bħall-kreditu talkonsumaturi
u l-ordnijiet li jaslu bil-posta jew il-bejgħ fuq l-Internet.
43