ACTA APOSTOLICAE SEDIS - La Santa Sede

Acta Pii Pp. XII 261
exhibetur ad te scribendi facultas, quum ipse denà a suscepto sacerdotio
lustra sis proxime peracturus. Quam quidem opportunitatem nancisci­
mur, ut Nostram erga te et gregem tibi commissum benevolentiam denuo
confirmemus. Hisce enim postremis mensibus suburbicaria ista Nobis
perdilecta dioecesis Veliterna saevissimi belli ruinas, calamitates et
luctus infeliciter perpessa est. Quot sane christifideles, vi minisque anno­
rum ab solo patrio extorres, nunc ad suos lares redeuntes, antiquas domos
miserabiliter dirutas vel graviter laben tes et desolatos agros vineasque
bellicis tormentis divexatas exterriti respiciunt ! Ex quibus temporalibus
bonis amissis graviores quoque iacturae ac maiora detrimenta, nisi prae­
sentibus angustiis mature consulatur, in ipso ordine morum inque dome­
stico civilique cultu metuenda sunt. Quapropter Nos, qui iam Veliternae
dioecesis filiis belli vulneribus sauciatis, auxilia, quae potuimus, affe­
renda paterna caritate curavimus, dum per te, Venerabilis Prater No­
ster, rursus commiserationem Nostram ex animo patefacimus, tibimet,
quinquagesimum sacerdotii natalem agenti, fervida vota atque omina
pandimus, gregique tuo superna solacia ac remedia instantibus miseriis
accommodata a Dei bonitate et clementia imploramus. Quo interea sacri
eventus celebratio in maiorem animarum utilitatem cedat, tibi ultro tri­
buimus facultatem, ut, qua malueris die, Sacro pontificali ritu peracto,
adstantibus fidelibus nomine Nostro Nostraque auctoritate benedicas,
plenariam indulgentiam iisdem proponens, ad Ecclesiae praescripta lu­
crandam. Caelestium autem donorum praenuntia atque praecipuae cari­
tatis Nostrae testis Apostolica sit Benedictio, quam tibi, Venerabilis
Frater Noster, Episcopo Auxiliari tuo, ceteris operam tibi navantibus,
simulque clero et populo tuae curae concredito peramanter in Domino
impertimus.
Datum Romae, apud Sanctum Petrum, die iv mensis Augusti, anno
MDCCCCXXXXIV, Pontificatus Nostri sexto.
PIUS PP. XII