3 di Avrîl 1077 - La Patrie dal Friûl

CHIARA SEGRADO
Sanc tes urnis de Spagne
Inmò un atentât prin des elezions
che a àn confermât Zapatero
Tal Març dal 2004, pôc prime des elezions politichis in Spagne, 191 personis
a murivin a Madrid a cause di un atentât. José María Aznar, a cjâf dal Partido
Popular (PP), al pierdeve lis elezions e José Luis Rodríguez Zapatero al
deventave prin ministri.
Il 43.6% dai vôts al à puartât ancje cheste volte il Partido Socialista Obrero
Español (PSOE) vuidât di Zapatero a vinci lis elezions in Spagne, che a son
però stadis segnadis di gnûf de tension e de pôre par cause di un atentât, che al
à puartât a la muart di Isaías Carrasco, sindacalist leât al Partido Socialista de
Euskadi – Euskadiko Ezkerra (PSE), il partît socialist basc. Il sanc duncje al à
segnat ancjemò une vote lis elezions di chest paîs, complès e ingredeât.
E pûr, i socialiscj a son rivâts a vinci, ancje in Catalogne; 25 membris dal partît a
saran sentâts tal parlament catalan mostrant che la politiche di decentralizazion,
za puartade indenant di bande di Zapatero te legjislature prin, e a paiât ben.
La oposizon conservadore e acuse il prin ministri di meti in pericul la “unitât
nazionâl”, ma lui al continue a prometi simpri plui autonomie par chê che e je
stade clamade, propite di lui, une “nazion”, la Catalogne. A la fin, Zapatero al
à bisugne de poie dal partît Convergència i uniò (Ciu) catalan: il so vantaç sui
popolârs al rive propit de Catalogne, vêr serbatori di vôts pe sinistre, soredut
intune elezion come cheste, là che i partîts plui piçui a àn vût une part margjinâl
e il dialic politic si è concentrât su lis dôs fuarcis plui grandis. Un grant sucès dal
bipartitisim, là che cui che al vinç al scuen strenzi aleancis.
Daûr di un scandai, la int e preferirès une grande coalizion tra il PP e il PSOE,
ma chest ultin al somee plui interessât a une intese cun partîts minôrs, come la
Izquierda Unida.
Tal Paîs Basc la campagne eletorâl e jere stade invezit segnade di azions cuintri
de çampe indipendentiste, e i citadins bascs a jerin stâts invidâts a no lâ a votâ,
parcè che chestis elezions a jerin consideradis “ilegjitimis”. I socialiscj, i popolârs,
ma ancje i nazionaliscj moderâts e la famee stesse di Carrasco, a vevin invezit
domandât ai bascs di lâ ducj a votâ par rispuindi al atentât. Inte Comunitât
Autonome Basche e in Navare la medie de astension e je stade dal 33,3%, come
a dî che un basc su trê nol è lât a votâ. Une percentuâl plui alte di cuasi il 10%
rispiet al 2004 (1). In ogni câs, il PSOE al à vuadagnât il 39% dai vôts tal Paîs
Basc; Zapatero al à cirût di tignî viert il dialic cui separatiscj e meti cussì fin ae
“ete de glace” dai timps di Aznar. Il Partît Nazionâl Basc al à pierdût cussì un dai
siet seçs che al veve tal parlament nazionâl di Madrid e un tic di stime di front
dai eletôrs, soredut dopo che il premier, Juan Jose Ibarretxe, al veve cirût cence
sucès di fâ un referendum separatist tal Otubar passât.
Patxi Lopez, che al vuide il partît socialist tal Paîs Basc, al à dit che “chest al è
un risultât storic par dutis lis vitimis dal terorisim, soredut ma no dome, Isaías
Carrasco”.
(1) Informazion gjavade fûr di www.internazionalitari.blogspot.it
RISULTÂTS DES ELEZIONS
Partît Seçs %
PSOE (socialist) 169 43.64
PP (popolâr) 153 40,11
CIU (catalans) 11 3,05
PNV-EAJ (basc) 6 1,20
ERC (catalan) 3 1,17
IU (çampe) 2 3,80
BNG (Galizie) 2 0,82
CC-PNC (Canariis) 2 0,65
UPYD (çampe) 1 1,20
NA-BAI (Navare) 1 0,24
Spagne Nazions Un tic di dut Curtis
FONT: Il Pais
ALC&CÈ DI PASCHE
Al è jessût il numar 31 di Alc&cè. Il speciâl al è dedicât aes
tradizions di Pasche in Friûl, pal lunis di Pasche a son stâts dâts
sugjeriments par fâ zîrs in bici in citât, lant ancje par museus a
viodi alc di biel, e tal “Cjantonut dal fâ” si insegne a piturâ i ûfs
cu lis jerbis. Fat di sedis pagjinis, dutis a colôrs, cuntune grafiche
pensade di pueste pe mularie, «Alc&cè» al ven doprât ancje in
tantis scuelis de regjon dulà che si insegne la lenghe furlane. I
docents che a vuelin ricevilu pai lôr arlêfs, sore nuie, a puedin
domandâlu telefonant al numar
0432.242611, mandant un fax
al 0432.242600, o une e-mail
ae direzion: amministrazione
@lavitacattolica.it
Par sugjeriments e curiositâts
sul gjornalut, scrivêt
une e-mail ae direzion:
adami@lavitacattolica.it
Si puedin discjamâ ducj i pdf
de riviste, lant sul sît
www.lavitacattolica.it
IL DIARI DI MARÇ
Al è stât distribuît cuntune tiradure di 12 mil copiis l’ultin “Il
Diari”, il cuindisinâl fûr par fûr par furlan. La cuviertine e je
dedicade a Elisa Londero di Glemone, che a 26 agns e je la prime
femine furlane che e scuvierç une stele. Di fat Elisa, che e studie
Fisiche te Universitât di Triest, osservant il cîl e à cjatât une
Supernove. Po dopo il gjornâl al va indevant cuntune riflession sul
referendum di Sapade par
tornâ in Friûl e un schirie
di gnovis dai paîs dal
nestri teritori. Un voli ancje
sport cu lis matriculis di
Pontebe sul tron de Italie,
lis gnovis sul Udin che al
torne a alçâ il cjâf e tante
altre atualitât. Si puedin
discjamâ ducj i pdf dal
gjornâl, lant sul sît
www.ildiari.eu
Il CJANTON
DI Romeo de Conte
Une femine di un cuintâl e vincj,
a monte sù pe coriere. Un trop di zovins a
tachin a ridile fûr. “Cjale li ce grasse che e je.
E somee un armaron!”. “Sì … e je propit come
un armaron”. La femine, un pôc ofindude, si
zire a colp e i sune une sberle, al prin che i rive
pes mans, che lu scaravente fintremai dapît de
coriere.
“Scusaitmi, zovins… mi si è vierte une puarte
cence savê!!!”
la patrie dal friûl _ AVRÎL 2008 _ 25