CORREDDADAS in “la” minore - Sardegna DigitalLibrary

IS PRESENTADORIS
Una borta tenemu amigus meda
bravissimus messajus e pastoris,
immoi faint’is presentadoris
a turnu in Tele-Radio-Campeda.
No hant’a tenni’ bella parlantina,
ma funti togus in is intervistas
candu domand’a is autistas:
“Cosa ne pensa del caro benzina?”.
O puru, anant’e una domu arruta,
a bortas intervistanta su meri:
“Signore, che cos’ha provato ieri
quando ha visto la casa caduta?”.
Si morit unu, po sa primu cosa
faint a sa viuda sa domanda:
“Ora, ci dica, signora Miranda,
resta vedova oppure si risposa?”.
Una dì hapu bistu unu de custus,
presentadori a Tele-Monte-Linas,
intervistendi duas signorinas,
meda dotadas de lumbus e...bustus.
Cun su microfunu cravau in bucca
coment’e unu manigu de scova,
ddis domandàda: “Lei che cosa prova
toccando le mammelle a una mucca?”.
Cand’unu si cunsiderat in gradu
de presentai a Radio-Zinnìbiri,
parit ch’in su paneri porti’ pìbiri
imitend’a Bongiorno e a Corradu.
Parit chi custu nou mestieri,
mancai a livellu artigianali,
donit una patenti culturali,
coment’e nai: “quintu poderi”.
Non c’è bisongiu ‘e andai a iscola,
po podi’ fai’ su presentadori,
bastat chi zerri’: “Signore e Signori”
nerit: “Cioè” e tenga’ facc’e sola.
Certas bortas, po tenni’ prus valori,
invec’e unu ndi poninti dusu,
ca parit chi ndi serbat un’in prusu
po presentai su presentadori.