CORREDDADAS in “la” minore - Sardegna DigitalLibrary

De sos ammancos nisciunu nd’hat neghe
ne direttores e ne guvernantes;
paret chi totu sian ignorantes
e no iscan contare fin’a deghe,
e pagat sempre su populu - ‘arveghe
sa bancarotta ‘e totu sos birbantes,
chi sin reparan da ogni ruina
sutta s’ala ‘e s’America Latina.
Su populu lu faghen a bisera
senza li dar’ispiegazione.
Sa causa de s’alta inflazione
naran ch’est maladia istraniera.
Sos ch’han amministradu a sa lezera,
hapende tortu si faghen rejone
e gira-gira sa neghe la lampan
a sos ch’in pensione a longu campan.
Antizipadu han sas eleziones
brujende miliardos a usura,
ca su Guvernu un’istangada dura
nachi teniat in previsiones.
Ma como, senza tantas chistiones,
custu nos faghet a suppressadura,
a dann’e beffe de chie no hada
mancu s’isfogu ‘e custa Correddada.