CORREDDADAS in “la” minore - Sardegna DigitalLibrary

Zertos unos pianghen in latinu,
pro chi s’opera siat pubblicada;
àteros faghen sa raccumandada,
timende chi si perdat in caminu,
o ch’andet a finire in su cestinu
e nos neghemus chi est arrivada.
Totu trassas chi usan pro iscaza
sos mazzones chi han sa coa ‘e paza.
Hat nadu, calchi limba malaitta,
ch’in s’Ischiglia sun sempre sos matessis.
Si haer roba ‘ona non resessis
non la podes mandare senz’iscritta;
cand’has istrazzulada una berritta,
cun sa pius dezente in giru ‘essis.
De s’Ischiglia no est in su costùmene
ponner paza pro fagher bamballùmene.
B’est finza chie si faghet protegger
pro intrar’in s’ispaziu tirannu,
e deves fagher un’isforzu mannu,
cand’est iscritta a manu, pro la legger.
Zertas nemmancu si poden curregger
de cantu irreparabil’est su dannu,
ma, si comente si cren totu mastros,
naran chi faghes fizos e fizastros.