CORREDDADAS in “la” minore - Sardegna DigitalLibrary

B’hat finza padres e peidros dottos
ch’iscunfinan in partes differentes
e sun che pedrusìmula presentes
in palcos, in tivù e in salottos:
sun cantantes, attores, polizzottos,
politicantes, magos, consulentes.
No esistit cummedia mundana
senza primos attores in suttana.
Finz’in su camp’e sa delinquenzia
non mancat mai calchi debuttante,
chi chircat de si render importante
fatend’a sos attores cuncurrenzia.
Como non b’hat peruna differenzia
tra prozzessu e cummedia brillante:
sos criminales, salvu calch’ostàculu,
dan in dogn’udienzia ispettàculu.
Su prim’attore, pesante che trae,
chi andat de prestigiu a cazza manna,
si li serrades in faccia sa gianna,
che passat finz’in s’istampa ‘e sa giae;
in primu postu piumbat che ae
che chi giuterat pìbere in sa canna.
Mai connotu peus facc’e sola
de sos eternos “primos de iscola”.