CORREDDADAS in “la” minore - Sardegna DigitalLibrary

Inue regnat su “Grande Oriente”
zertu non b’hat pastore ne massaju,
ne insegnante, nemmancu operaju,
ne artigianu, ne umile zente.
Ma su potente occultat su potente
(a boltas no li falet calchi raju).
Ista seguru chi su ch’est massone
non che frazat sos ossos in presone.
No est permissu pro sos istatales
esser a una Loggia assoziados,
però l’impidin a sos appuntados
e lu cunsentin a sos generales;
est proibidu a sos iscritturales,
no a ministros ne a magistrados.
Sos professores de sos intrallazzos
non si pienan sa dom’e istrazzos.
Sempre fit decantada in dogni versu,
s’Italia, sa terra ‘e sos fiores:
terra de santos, de navigadores,
patria de “Dirittu” (e de reversu),
populu de carattere estroversu,
riccu de geniales inventores.
Tantu ch’han inventadu sa “Pidue”
pro futtire su prossimu in totue.