CORREDDADAS in “la” minore - Sardegna DigitalLibrary

LARENTU ILIESCHI
CORREDDADAS
in “la” minore
Contivizu
de Paulu Pillonca

© Domus de Janas
Larentu Ilieschi
Correddadas
in “la” minore
Foto di copertina: Mario Sollai
ISBN 88-88569-08-1
Prima edizione Dicembre 2002
Realizzazione editoriale:
Domus de Janas
Via Monte Bianco 54
09047 – Su Planu – Selargius
Tel/Fax 0705435098
www.domusdejanaseditore.com
e-mail:domusdejanaseditore@tiscalinet.it
Senza il permesso scritto dell’eitore, è vietata la riproduzione,
anche parzilae, con qualsiasi mezzo effettuata, compresa la fotocopia,
anche ad uso interno e didattico.

Su cignu sardu
Giustu elogiu a fagher a Larentu
creo non bastet custa rima mia,
su cignu sardu de sa poesia,
dend’a issa su massimu ornamentu.
Su versu lapidariu a didu tentu
hat conchistadu tanta simpatia
in custa terra sarda sua e mia
cun satira o profundu sentimentu.
Sos potentones senza riguardu
da-e conc’a pe’ dognunu hat samunadu
cun coerente impignu sinzeru.
Larentu est poeta de abberu
e d’est pro cussu chi s’hat meritadu
su titulu de su Trilussa sardu.
Poeta dottu e de mente digna
chi onoradu hat tota sa Sardigna.
Bobore Marceddu
A fizos mios carissimos

ANNOTU DE IMPRENTA
Amus lassadu sa grafia de su sardu impitada dae Larentu Ilieschi in S’Ischiglia, pro chi oe tzertos
séberos no si sigan (sa h in su verbu àere, su jobare sas cunsonantes a sa manera de sa limba italiana
e gai sighende).
In su render sos duos donos de sa cunsonante z chi in sa limba sarda puru a bortas est modde (fizu)
e a bortas tostu (catza), dadu chi a s’autore no piaghet su digramma tz, amus dévidu sighire sa
régula de nde ponner una ebbia pro su sonu modde e duas pro su sonu tostu: custu, però lassat chene
isolta sa dificultade de pretzisare in sa grafia su sonu de sa z cando sa cunsonante nde jighet innanti
un’ateruna (anzone de sonu modde, gantzu de sonu tostu).

LARENTU ILIESCHI
S’autore de custas Correddadas est nàschidu in Tathari in su 1913, su bìndighi de su mese ‘e
Cabidanni, fizu de famìlia piaghesa. E in Piaghe at vìvidu finamentra a s u1932. Pro una barantina
de annos at tribagliadu in sas Ferrovias de s’Istadu: dae cussu impiegu s’est cungedadu cun su gradu
de segretariu superiore de prima classe.
A costazu de Angheleddu Dettori dae sos primos annos de S’Ischiglia, cando su fundadore de sa
rivista est mortu at sighidu s’impignu sou finamentra a su 1990.
In su 1994 at pubblicadu cun Della Torre sa regolta de sonetes intitulada Campanas a repicu.

SU RISU, S’AMARGURA
Cando si cojuaian batìos e batìas, o bajanas e bajanos betzos, in sas biddas nostras de sa Sardigna de
intro si costumaiat fagher sa correddada: a sonu de corru, comente narat sa peràula, ma finas a sonu
de àteros trastes, de linna o de metallu chi esseren. Fut un’ispètzia de brulla grae, inditaiat chi sa
‘idda leaiat a risu s’aventu.
Dae cussa tradissione antiga, Larentu Ilieschi at leadu s’idea pro su tìtulu de custa regolta: su
matessi tìtulu chi at distintu pro annos e annos – in S’Ischiglia de Tiu Angheleddu Dettori – sa
rubrica de su poeta piaghesu.
Sa sàtira, naraian sos latinos, “castigat ridendo mores”. E de seguru no sun pagas sas correddadas
inue su risu nde naschet naturale, dae sos versos de Mastru Larentu. Ma in sas sàtiras suas, chi puru
abberin paritzas ventanas a s’ispaju, no b’at de rier ebbia. Cando s’oju lìmpiu de Ilieschi abbàidat a
su modu ‘e fagher de sos polìticos, pro nàrrere, o de sa répula mala de paliatzos chi tosconan su
mundu finas in Sardigna, o de sos poetas de su tempus nou chi cren de aer iscobertu no s’ischit ite,
tando su risu sou si faghet mesu rànchidu.
E bàrriu de amargura est puru – tantu pro bos dare un’aterunu riferimentu –, in sa correddada
intitulada A ite servit custa poesia?, su meledu de su poeta subra sos tempos in sos cales nos est
cumbinadu de colare sa vida:
Sos romanticos versos tra amantes
sun farfaruzas de tempus lontanu.
Oe s’aneddu est un’omaggiu vanu
si no est tempestadu ‘e diamantes
e-i sas proas pius esaltantes
sun sas rapinas a pistola in manu:
pro comporare sos gustos in voga
chi dan sos paradisos de sa droga.
Unu tema chi torrat meda, comente est finas naturale, in sa regolta de Mastru Larentu est
s’amministrascione ‘e sa giustiscia. Sun paritzas sas correddadas intregadas a cust’argumentu, chi
pro sa Sardigna est unu male antigu e malu a mòrrere:
Chie s’isetat sa perfetzione
dae s’umana giustiscia s’ingannat.
Cando a issa sa vista si l’apannat
ruet che caddu tzegu in su burrone.
Giudichende sa pròpia persone
chie l’assolvet, chie la cundannat.
Ma su chi faghet a rier est custu:
ambos zuìghes an fatu su justu.
Torrende a sa chistione de sa poesia noedda e de sos poetas chi preferin sos temas de tristura mesu
in suspu, a bortas paret – comente cumbinat in Atìtdos a prémiu – chi a Mastru Larentu li torret sa
muta de rìere pro si nde befare nessi azigu:
Mi paret chi los bida a sa torrada
dae sa festa inue pro cunfortu
an retzidu una bella conca ‘e mortu
pro dogni poesia premiada
cun sa prommissa d’’enner retzitada
in s Rai pro mezus acunortu.
E si comente su piantu est mannu
cussa rètzita durat totu s’annu.

Ma no est semper chi andat gasie. Bastat de leare in manu sa correddada Bòidos pienos de nudda
(“Titilìas de jàmidos mustrengos/ fischinidas de luna sut’aghedu/ atìtidos in rughes de meledu/ che
ruéddulas bòltulan sos crastos”, cun totucantu su restu) pro si nd’abbizare, o calesisiat àtera poesia
de custa regolta subra su matessi tema.
Si podet cumprèndere, bastat de bi ponner s’aficu justu, finamentra dae inue nascat s’amargura de
Mastru Larentu in argumentos de cuncursos de poesia. Isse s’ispantat de su modu ‘e fagher de
paritzos poetas, imbramosidos e indeosados de sa fama e pagu contivizosos de su meritu. Si a unu
santu sun devotos, custos tales, su santu diat poder esser Nartzisi. Unu santu nou, però: trascurende
su Nartzisi de su chelu cristianu, pro leare a modellu s’àteru Nartzisi contadu dae sa fola de sas
paristòrias mitològicas chi lu pintan de fronte a un’ispiju ‘e abba in sa funtana.
Su ranchidùmene chi nde naschet s’assimizat a una passada ‘e cascavegliu o – si preferides – de
ganamala, ca s’ispetàculu est semper pius indecorosu. Pro unu poeta che Larentu Ilieschi, créschidu
in s’iscola e in s’amparu de Tiu Anzeleddu Dettori, sa tristura nos la podimus figurare nois etotu
chene fadiga peruna.
Isvanessit sa figura de su poeta comente fumis avesos a la sonniare: interprete de sa comunidade in
sa cale s’agatat a colare sa vida, messaggeri de isperas e disizos, de dolos e de cuntentesas de sos
àteros òmines chi no tenen su donu de sa muta ‘e cantare. No l’amus pius, custa figura: gai paret chi
cherfat nàrrere calchi correddada de Mastru Larentu. Tenimus solu òmines de paza e de regotu,
semper prontos a chircare medaglias e a si che tzacare in prima lìnia.
Ma lassende pro un’iscuta a banda custos anneos, e dende una mirada pius larga a sas correddadas,
totucantos si poden abbizare chi in totue cumandat s’ispìritu francu de su poeta, chi contivizat su
fàghere, meda pius de su nàrrere, de sos òmines: mirat a sos viscios insoro, a sos machines, a sas
vanidades chi lis inditan s’andera de sighre. B’at bortas chi ispuntat su risu e àteras in sas cales
nd’’essit a pizu s’amargura.
Francos dae totucantu su pesu de sa tristuras de sa vida e dae calesisiat àteru istrobbu sun s’andanta
de su versu e s’importu de sa limba. Su versu de Mastru Larentu cuat sa raighina sua in sa poesia
cantada, duncas no trambucat mai in perunu metro de sos chi sèberat, muntenzende semper sa
musicalidade naturale. Sa limba – in sa jarìa chi possedit e in sa sabberturas a sa modernidade chi
mustrat, finascostoit prendas de antighidade meda pius de su chi podet pàrrere.
Chie leat in manu custa regolta de correddadas tenet meda ite imparare dae sa sienda chi jighet
remonida: in su sidddu mannu, una lugura de ispantu an sos assimizos friscos chi Larentu Ilieschi
criat semper cun naturalesa, pro illughentare su risu e pro che leare sas nues a s’amargura.
Paulu Pillonca

A UNA SANTICA
Nara cun cale faccia ispudorada
ti cheres prenotare in Paradisu,
si bos hazis sos compitos divisu
tue cun Sàtana, anima dannada!
Ses andada a s’inferru e ses torrada
pro fagher su chi Satàna hat dezzisu.
E sezis ambos semenende lue:
inue non b’est isse bi ses tue.
Tue ses de sas domos sa ruina,
ca distruis sa paghe in dogni logu:
ue b’hat erva’ irde pones fogu
e inue b’hat fogu ‘ettas binzina;
inue b’hat dulzura ‘ettas sa china;
inue sun gioghende isconzas giogu;
s’ides funtana limpida l’abbunzas;
s’ides canes in paghe los aunzas.
Comente mai a chelu ‘olare dese
cun totu cussu pesu ch’has in sinu,
cand’est unu meraculu divinu
si ti rezet sa terra sutta pese?
Cunfessas trinta ‘oltas a su mese,
mentre ses su flagellu ‘e su ‘ighinu.
S’intras in chelu tue, coro ‘e crastu,
Santu Micheli hat su pesu guastu.
Pro cumpensare dogn’attu ribaldu
chi faghes cun su tou infame rostru,
su sero naras unu Babbunostru,
cun cussu Deus est pagadu a saldu,
e non risentis ne frittu ne caldu
si tota die agidu hasa che mostru.
Segundu tue, a Deus l’has pagadu
cun d’unu Babbunostru male nadu.
Legges sempre sa vida ‘e Santu Paulu,
però che isse non ti ses pentida,
ma sa die chi lassas custa vida
partis deretta a dom’e su diaulu,
ca non b’hat logu in su celeste taulu
pro zente in sos peccados incallida.
Ca s’in su chelu b’azzettan a tie
des ponner iscumpigliu finz’inie.

Tue faghes su coro perra perra
a su chi prima ti faghes amigu;
tue ses un’ispezia ‘e castigu
chi Deus sempre mandat a sa terra,
comente: terremotos, fogu, gherra,
epidemias, carestia ‘e trigu.
S’inferru chi t’hat fattu partorire
in breve ti che potat ingullire.

A BERANU
S’ierru puru, pianu pianu,
ch’est bessende, mancari a mala gana,
poi chi che mazzone intro sa tana
hat segregadu su genere umanu.
Ecco chi triunfante intrat beranu,
s’istajone magnifica e galana.
Comente naschen novellos fiores,
naschen in sinu novellos amores.
Beranu placat sas penas amaras
de tantos coros chi sun in tristura:
non s’agatat umana criatura
chi non lu rezzat cun su risu in laras,
pro sas tantas bellesas suas raras
chi regalat dogn’annu a sa natura.
Sas piantas chi prima fin in luttu
las preparat de nou a dare fruttu.
Non s’agatat dinari a la pagare
sa pius bella de sas istajones,
e dognunu cun versos e cantones
s’apprestan dignamente a l’onorare.
Sos partidos l’han cherfidu intregare
su resultadu ‘e sas eleziones,
in modu chi, de rosas circundados,
formen sas rosas de sos candidados.
Zertu, sa propaganda ‘e ogni tinta
s’intonat mezus cun sa primavera,
pro chi fiorit sa campagna vera
cun sa campagna elettorale finta.
Tantas persones de burbera grinta
oe saludan cun bona manera,
e ti prommittin chi faghen sa luna
in chentu fittas pro ti nde dar’una.
Cust’annada de nie e de miseria
como figurat in primu pianu:
sa destra narat chi fit gelu istranu
proveniente da-e sa Siberia,
ma sa sinistra li ripiccat seria
chi fit unu ciclone americanu.
E si oe fozida est dogni frua
dognunu narat ch’est opera sua.

Intantu sighit beranu a frunire
sas arvures de fozas e fiores,
prommittend’a massajos e pastores
sos fruttos ch’issos braman de godire,
e gai sighin puru a fiorire
sas prommissas de tantos oradores,
narzende: “Si votades solu a mie
no hazis pius ràndine ne nie.
Poi ch’amministrare sun ammissos,
tando faeddan cun diversu tonu.
Dognunu si dat aria ‘e padronu,
zintu da una rete de cummissos.
Tando dipendet propiu da issos
su tempus malu e-i su tempus bonu.
Ma sos pius ti mandan pro regalu
tassa, prejos de fogu e tempus malu.
E intantu su tempus de continu,
percurret s’infinitu quadrante:
su sole, senza perder un’istante,
sighit su sou fatale caminu.
Beranu puru, pro sou destinu,
andat e torrat a passu costante,
ma tantas suas prommissas sinzeras
diventan poi pallidas chimeras.

IN FAMILIA
Su Maridu
Su maridu, forzadu a suportare,
segundu sa muzere est suportadu.
Pro sos fizos su Re pius amadu
chi dian cherrer prestu ispodestare.
Invece pro sa sogra est unu mare,
a boltas calmu, a boltas agitadu,
e balet, o niente, o chentu miza,
segundu sos umores de sa fiza.
Sa Muzere
Sa muzere est continu, a narrer sou,
su Cristos feminile postu in rughe,
ca de sos fizos ch’hat bogadu a lughe
non ischit fagher ne giau ne zou.
Pro su maridu est sempre amore nou,
mancari ‘ezza che arvur’e nughe.
Invece pro sa sogra est unu tinzu,
(tra sogra e nura b’hat sempre ruinzu).
Sos Fizos
Sos fizos malos sunu unu calvariu:
fizos de babbu cunfirmat sa mama.
Ma si calcunu bi nd’hat bonu in s’ama,
narat ch’est simil’issa senza isvariu.
E pro su babbu est totu su contrariu,
ca cheret a su nomen dare fama.
Pros sos nonnos non dan impertinenzia,
ma est sa mama ch’hat paga passenzia.
Sa Sogra
Sa sogra est s’autentica figura
chi rappresentat su caresimale.
Ognunu de sa sogra narat male,
siat in beru o in buffonatura.
Cando faghen padedda sogra e nura,
pro contu sou ognuna ‘ettat su sale.
Si tra isposos naschet malumore
ja s’improvvisat zuighe istruttore.

Su Sogru
Su sogru est pro su ‘énneru cunfortu,
e pro sa nura Deus in persone:
dat a nuras e bénneros rejone
e a fizos e fizas dat su tortu.
Est un’isperia ‘e Cristos risortu
chi hat suffridu morte e passione,
ca veramente l’han dadu fastizos
sogra, muzere, cun fizas e fizos.
Su Connadu
Tra totu sos parentes, su connadu,
poi ‘e su sogru, est su pius gradidu.
Siat frade a muzere o a maridu,
est da-e ambos duos preziadu.
E tantu pius bene hat meritadu
si t’hat de una sorre allezeridu,
acquistende, salvu àtera truffa,
una merce suggetta a ponner muffa.
Sa Connada
Tra connadas b’hat sempre mala musa,
siat pro interessu o gelosia:
sa sorre ‘e su maridu est un’ispia
chi ponet sa connada sutt’accusa.
Sa sorre ‘e sa muzere est un’intrusa
s’a su connadu mustrat simpatia.
Ma s’omine, cumpridu in su dovere,
ponet in paghe connada e muzere.
Sa Comare
Sa comare si salvat sa cundutta
bantend’in giaru e critichende a cua.
Inue intrat sa furchetta sua
Deus nde ‘aldet su chi ferit sutta!
Funtana de notiscias mai asciutta
ch’in dogni tempus hat sabor’e lua.
Est s’agenzia lampu ‘e sas amigas
ch’imbastit matrimonios e brigas.

A CHIE INGANNAT SU TEMPUS
Oe finzas su tempus est moneda,
e-d-est istabilidu veramente.
Su fattu est chi divisu est malamente,
comente dogni bene e dogni preda:
chie nde tenet pagu e chie meda,
unu nd’hat troppu s’ateru niente.
B’est chie mancu sos fizos addestrat
e chie finza pùlighe ammaestrat.
Chie passat su tempus rie rie
e chie leat posa ‘e Don Chisciotte,
chie trabagliat fin’a mesanotte
e chie dormit fin’a mesudie.
B’est chie faghet sa notte pro die
e chie invece dormit die e notte.
Pro zertos custu tempus est tirannu
pro ateros su die paret annu.
Bidimus direttores impressidos
cun montes de pabilu a taulinu;
tres o battor telefonos vicinu,
e giaman e risponden accanidos;
curren che da-e cane persighidos
(massimamente andende a camerinu).
B’hat zente chi los tentat cun passenzia
finz’una die pro un’udienzia.
Si calcunu resessit a intrare
(e no est tantu fazile s’impresa)
lis podet narrer ch’hat sa domo azzesa,
ma non b’hat mai versu e l’iscultare.
Tra ponner firmas e telefonare
lu lassat impaladu un’ora e mesa.
In su frattempus sind’enin sas duas
e senza fagher sas rejones suas.
Sos pezzos russos de cussa zenia
han pagu tempus ma meda rigore,
e tantu pro negare ogni favore
zitan, in barba a sa democrazia,
calchi leze borbònica istantìa
chi ancora mantenen in vigore.
E segundu sa cale (ite cunfortu!)
s’umile zittadinu hat sempre tortu.

Invece àteros tantos pezzos russos
totu sa die la passan caschende.
E cando calchi firma sun ponzende,
su mundu paret in palas de cussos.
Faghen sos usuales lisciobussos
a chie in part’issoro est trabagliende.
E issos chi devian dare lughe,
foghen solu peràulas a rughe.
Mancari istraccos de fagher niente,
hapende tempus pro nde fuliare,
non lis paret dezzente a s’istentare
pro intender sas lagnas de sa zente
- non cumbenit chi tantu illustre mente
senza lucru si firmet a pensare -
e dadu chi sun pagas sas bideas,
si las cunservan sutt’aghedu intreas.
Però, comente puzzant s’imbreagu,
o puru chie mandigat chibudda,
chie non tenet gana ‘e fagher nudda
si connoschet de tesu a su fiagu.
E hapat tempus meda o tempus pagu,
s’intenzione sua est sempre cudda.
Ma su tempus, chi dogn’ingannu appurat
sena metro dogn’òmine mesurat.

FAMA E PRESUNZIONE
Amigu caru, sa musa est un’arte
e pro la tutelare hat un’iscola,
ca s’arte non si podet rezer sola,
ponzéndeche s’iscola a una parte.
Salvu chi non pioan da-e Marte,
sos genios perfettos bola-‘ola.
Sa terra ancora no hat bidu un’astru
senz’imparadu diventare mastru.
E tue chi de mastru no has fama,
istas sempre ra-ra che rana in poju,
e pro pius pianghes a toroju
cando ti bullan calch’ottava grama.
Sos mastros puru iscappan calchi trama,
però pro issos si serrat un’oju.
De sos chi viven in sa rosa mìstica
est finza su catarru cos’artìstica.
Permitti cust’esémpiu ‘e ti dare,
de porcheria restada famosa:
legge Sas immondìzias de Bosa
senza ti ponner sa manu in su nare.
Ma pro cantu est Murenu a concimare,
totu paret amenta e malvarosa.
Segundu me, pro votu li daia
deghe in sa rima e zero in poesia.
Finzas poetas de mannu respiru
han puru calch’iscrittu tramandadu,
chi, non solu non fit trigu purgadu,
ma non fit mancu passadu in chiliru.
E restat s’istruminzu ancora in giru
solu ca s’autore fit famadu.
Mentre brujan un’opera ‘e valore
ca est pagu connotu s’autore.
Su duttoradu, poi, hat un’iscudu
chi non lu passat ballas de fusile.
Beru, s’iscola curregget s’istile,
ma non nd’’ettat de linfa cun s’imbudu.
Intantu a tie, pro istare mudu,
ti ponet su diploma in muzzighile,
mancari siat pianta necciada
chi si rezet ca l’han impalonada.

Perdona puru si, senza dirittu,
iscomodo su “ Vate “ immortaladu:
si prim’e Dante, tue, in cuss’istadu,
“Pape Satan Aleppe” haisti iscrittu,
cando t’haian bidu, poverittu,
t’haian de pumattas carralzadu.
Ma collocadu in tantu altu livellu,
s’oscuru versu, b’istat a pinzellu.
Comente brillat una dama altera,
cun sas perlas pius variopintas,
gai s’adornat de mentes distintas
dogni patria nobile e fiera.
E si li mancat calchi perla vera
cumpletat sa collana a perlas fintas.
Su miseru chi peccat de orgogliu,
pro cumparrer, si servit de s’imbrogliu.
Como non nerzas chi so limba mala
s’hapo chilcadu de t’incoraggiare.
Chie hat sa fama ancora in altu mare
sa supèrbia ponzat a un’ala.
A mie puru dan sa rughe a pala,
cand’iscantono in su ciarolittare.
Cando mi bullan ripito sa proa
e organizo correddada noa.

RISPOSTA A PANTALEO SERRA
Non faghes proa, caru Pantaleo,
si curres a difender a Murenu,
tantu podes cumprender a pienu
chi sos meritos ch’hat non bi los leo.
E poi, Melchioro, a cantu creo,
no hat bisonzu de amparu anzenu,
ca diat esser troppu cuntrastante,
su nanu difendende unu zigante.
Incriminende sa cantone a Bosa,
cun zero in poesia a s’Autore,
dimustro chi dogn’òmine ‘e valore
si podet perder in pessima cosa.
Ne lu mudat s’istercu in frisca rosa
s’arringa ‘e s’avvocadu difensore.
Poetas che Murenu nd’’essin pagos,
ma esclusos bazzinos e fiagos.
Amigu, has un’istògomo granìticu,
si ses de rimas rassas ottimista.
Ma pro connoscher s’ànima ‘e s’artista
be-i cheret invece sensu crìticu,
pro no cunfunder su fruttu rachìticu
cun su ch’est genuina conquista:
giustu pro no estender a totue
sa bruttura (comente has nadu tue).
Prima naras chi Bosa in cussu sensu
l’hat descritta a Murenu àtera zente,
poi faghes cumprender giaramente
chi a t’assozziare ses propensu.
Forsi pro cussu abbundas in s’inzensu
tant’e purificare s’ambiente.
E passet pro Murenu, chi fit zegu:
ma tue gi’has sa vista e non ses legu!
Cumprendo totu s’intimu turmentu
de su poeta zegu e male sanu,
guas’ispintu a istender sa manu
pro poder haer su sustentamentu.
Intendo de sos versos su lamentu
chi toccat ogni coro ‘e cristianu,
ma est pro cussu chi postu hapo a parte
su chi no est espressione ‘e s’arte.

Cheria puru, amigu Pantaleo,
trattare arte e fama in generale.
Ma su campu est istesu in modu tale
chi resessire in breve no lu creo.
In cantu ‘a s’arte, pro su chi pens’eo,
raramente l’indèvinan su sale.
In sa fama, merìtu o non merìtu,
influit meda s’ora e-i su situ.
Tue faeddas bene: chi ogn’assu
sa fama si la devet meritare.
Ma comente des tando ispiegare
sa fama de Dalì e de Picassu,
chi t’impiastran una tela a grassu
e naran ch’est unu tramontu in mare?
Duncas suzzedit chi sa fama, in pràtica,
la dat su gustu de zente fanàtica.
Zertu no est una régula fissa,
non cherzo ponner ogn’erva in sa fascia.
Ma génios balzanos, pro disgrascia,
m’abbizo chi nd’ispuntan a s’ispissa;
si mantenen in pe’ pro iscummissa,
eppuru faghen tèmpera alta e bascia.
Pro como, amigu, t’istringo sa manu
e a ti legger sempre allegru e sanu.

VIAGGIU A SA LUNA
Custa famosa visita a sa luna
paret chi siat una cosa seria.
Già calch’eroe, istufu ‘e fagher feria,
est prontu, senza fàula peruna,
a chircare in s’aera sa fortuna,
dadu ch’in terra ch’hat troppu miseria.
E a sa luna in chirca de trabagliu
si trasferit cun armas e bagagliu.
Cussos chi sun pro fagher su fagotto
paret chi già un’oju hapan ispesu.
Sozziedades, a su ch’hapo intesu,
neguscende sa luna sun sett’otto.
Ognuna accabarradu hat unu lotto
che chi esseren in Campu giavesu.
E già cominzan, prim’e b’arrivare,
a bender e torrare a comporare.
Custos ispazziales affaristas
non poden esser che americanos.
Issos non creen in sos marzianos
però sun de sa luna azzionistas.
Istufos de terrenas conquistas,
cominzan in sa luna a ponner manos,
pro fagher finz’inie monopòliu
de oro, de uràniu e petròliu.
Guidat cust’impresa planetaria
sa crema de s’umana intelligenzia,
e isettende s’ora ‘e sa partenzia
ognunu faghet casteddos in aria.
S’est offerta finz’una segretaria
pro isbrigare sa currispondenzia,
ja meledende su modu simpàticu
de imbrigliare un’òmine lunàticu.
Sun aziendas bene piazzadas
chi no lis mancat ne fundu ne costas.
Ma intantu s’uffisciu ‘e sas impostas,
su cal’est sempre a orijas paradas
mi las hat a dovere tartassadas
in base a sas intradas presuppostas.
Tassas chi veramente faghen pena:
propiu tassas de luna piena.

Mancu in sa luna cun sa fantasia,
s’omine podet fagher contivizos,
senza che dever lassare sos chizos
in sos calascios de s’esattoria,
ja chi pro gulpa de s’astronomia,
astronomicos sun sos affoghizos.
Mancu in sa luna ti lassat in pasu
s’erariu, s’eternu ficcanasu.
Americanos meda, a prim’acchitu,
si sunu de sa luna innamorados,
ca sa notiscias de iscenziados
lis hat istuzigadu s’appetitu.
Ma su fiscu, de dollaros a pitu,
los hat in malu modu iscoraggiados,
cand’invece podian rie-rie,
a s’ispissa sighìrelas inie.
Pensade, custa luna incantadora
cumpagna de poetas e amantes,
in manu a una cricca ‘e trafficantes
capazzes de la ‘ender in mes’ora.
E non bi sunu jòmpidos ancora:
ite cand’han a essere abitantes!...
Calchi die, si ponen manu in pasta,
l’idimus pignorada e post’a s’asta.

SU DIVORZIU
No so a su divorziu in favore,
ca lu cundannat sa Santa Dottrina,
ma no est mancu norma cristallina
render irreparabile un’errore.
Malu s’accordat su troppu rigore
cun sa misericordia Divina,
e pagu giuat in su matrimòniu,
postu chi b’hapat coa su dimòniu.
Inue est su divòrziu imperante
sos moralistas si dan tanta pena.
Ma ue ribadida est sa cadena,
sa morale no est pius brillante,
ca su titulu feu de amante
cuntenit ludu che riu in piena.
Ue s’osservat sa leze canònica
est s’infidelidade pius crònica.
Ogni legge si devet cambiare,
cando a una paralisi est suggetta.
Peruna legge, mancari perfetta,
si podet in eternu cunservare:
a sos tempos si devet adattare
pro esser veramente bene azzetta.
Gai sa legge matrimoniale
est tempus de la render attuale.
Cand’unu matrimòniu est faddidu,
de l’annullare est prezisu dovere,
mentre, segundu sa leze in podere,
s’annullamentu est solu cunsentidu,
si femina diventat su maridu,
o resultat chi masciu est sa muzere,
e pro àteros nodidos motivos
ateretantu de lògica brivos.
Ma de s’annullamentu fagher usu
non podet s’emigrante isventuradu
chi, torrende a su nidu, hat agatadu
s’isposa cun tres fizos in piusu,
e-i sa legge, pro mazore abusu,
su nomen sou puru lis hat dadu.
In custa leze, chi naran morale
paret de ‘ider s’umbra ‘e su juale.

E cand’ammittit calchi prozzedura,
custa legge non brillat pro lestresa:
non tantu ca li pesat sa ‘ezzesa,
ma ca paret senz’ancas de natura.
Pro su pius si serrat s’avventura
a dannu e beffe de sa parte lesa.
Tando in barba a sa legge, ch’est senz’ancas,
bessin de turnu sas damas biancas.
Non benzan poi a narrer cun sussegu
chi chèrene sas lezes rispettadas,
in situazziones disperadas
chi nde ‘ogan sos ojos a su zegu.
Est umanu chircare ripiegu
cando totu sas giannas sun serradas.
Sòcrate solu hat supportadu tantu,
eppuru mancu a isse han fattu santu.
Potat s’oggettu de cust’argumentu,
mover sos ch’han sas rèdines in manu
tantu in sas salas de su Vaticanu
che in sos bancos de su Parlamentu,
pro fagher sì chi custu sacramentu,
sende divinu siat puru umanu.
E già chi umanu est fagher isbagliu,
s’abberzat, pro nd’’essire, un’ispiragliu.

GUVERNU DE ANIMALES
Sos animales puru cun decoro
riunidos umpare in assemblea
han decretadu totu a un’idea
de nominare su guvernu issoro.
E han postu ministru a su tesoro
s’elefante, ca fit a diarrea.
Ma rezzidu s’ingàrrigu polìticu,
est de repente diventadu istìticu.
A unanimidade a sa difesa
nominan un’azzérrimu leone.
Coment’e boghe fit unu cannone,
ma surdu e zegu pro tanta ‘ezzesa.
No ischende sa sua debilesa
faghiat una zerta impressione.
Ma s’abe, ispia atòmica, hat notadu
chi fit cumpletamente isdentigadu.
A sa giustiscia han devidu giamare
su tostoìne, ch’est calmu e prudente,
ja chi bi cheren assolutamente
nessi degh’annos prima ‘e giudicare.
E poi àteros deghe a s’abbizare
de haer cundannadu un’innozzente.
A sos reclamos sa risposta est cudda:
“Mezus giustiscia tarda chi non nudda”.
Sa posta l’hana dada a su piccione,
ca ‘olat senza perder s’oriente.
Ma zertos naran ch’est suffizziente
fina sa joga in cussa mansione,
ch’arrivit sempre a destinascione
prima de calchi telegrammu urgente.
Difatti, ancora rezzin bigliettinos
ch’han impostadu sos garibaldinos.
Pro sos trasportos, totu in armonia,
dan su mandatu a unu carrabusu.
Ma isse de s’istrada faghet usu
e non si curat de sa ferrovia.
Pro s’asfaltu dimustrat simpatia,
ca merce si bi buscat de piusu.
Partit in bolu, avvistat su muntone,
arrotundat e torrat in furgone.

E pro s’istruzzione, mancu male,
cumparit unu membru cumpetente:
fit in tribuna compare molente
ca fit puru oradore uffizziale.
Luego a s’Istitutu liceale
mandat s’òrriu sou riverente.
E saludat, serrende su discursu,
tantos amigos suos fora ‘e cursu.
Pro sos affares esteros chircare
den unu pappagallu birde e grogu
tantu de cussos nd’hat in dogni logu
duncas si poden cumprender a pare.
Ma a pattu sa limba ‘e li truncare
cando faeddat de ferru e de fogu.
Issos cundannan cun terrore sacru
sas modernas iscolas de massacru.
E de s’insoro còmpitu cunvintos
cuntemplan in su codice penale
de ponner fora ‘e legge ogn’animale
chi manifestat umanos istintos,
o chi s’abbasciat, cun attos ispintos,
a su livellu ‘e s’òmine attuale.
Ca disonoran s’issoro guvernu
sas impresas de s’omine modernu.

SAS IMMONDIZIAS DE CASTEDDU
Pro cuntestare un’epoca lontana,
chi sa zittade pulida hat connotu,
su Sindigu ‘e Casteddu hat fattu votu
de abolire sa “Nettezza urbana”.
A “s’ecolofobia” sua arcana
s’elettoradu applaudit devotu.
Est diventadu s’idolu ‘e sa zente,
isse, cun s’Assessore cumpetente.
Custu sìndigu tardat a nde rùere
c’hat a coro sos suos zittadinos:
hat nadu “bastat!” a sos ispazzinos,
ca sas iscobas sullevan piùere.
Però sas tassas las sighit a sùere,
mancari no esistan netturbinos.
Ma sa zittade nessi hat sa deliscia
d’esser isprofundada in s’immondizia.
Semus cobertos de arga e de ludu
ma niunu hat gana ‘e protestare,
ca est coment’e a interpellare
unu sìndigu zegu, surdu e mudu.
Duncas nois, pro haer calchi aggiudu,
nos devimus a Deus invocare
ca Deus solu hat podere bastante
pro intervenner cun manu pesante.
Deus cumpenset s’amministradore
de custu nostru immensu muntonarzu
e nos diat pimones de attarzu
pro resister a tantu pudidore,
già chi non tenen perunu valore
sas prommissas de unu molinarzu.
Forsi est tramende calchi epidemia
pro tenner bon’ispazzu in farmacia.
Chie tenet de sìndigu s’istoffa,
chie procurat sa penicillina.
Intantu in dogni istrada zittadina
naschet s’erva che matta ‘e iscarzoffa.
Ma si nde li mandamus una coffa,
a su sìndigu nostru pro istrina,
forsi rispondet ch’isse no nd’hat neghe
s’est sa zittade invasa ‘e pedrufeghe.

Su notte non si podet caminare
in sos marciapiedis a s’iscuru:
autos in parcheggiu contr’a muru
inu’est proibidu ‘e parcheggiare.
Sos mascalzones poden ingombrare
cussos passazos a coro seguru.
Paret una zittade abbandonada
‘ue peruna leze est rispettada.
Non creo chi calcunu hapat pensadu
- si est omine sìncheru ‘e cherveddu -
chi ‘enzan sos turistas a Casteddu
pro cattigare istercu istajonadu,
o pro si sezzer, a nasu tuppadu,
inue naschet fina cugumeddu.
Pius sos zittadinos si proìgan
pius sos de sa Giunta si nde frìgan.
Sos muntonarzos de ogni rione
attiran dogni razza ‘e bestiàmine:
canes e battos, morzend’e su fàmine,
forrojan nott’e die ogni muntone,
mentre sa capitale ‘e sa Regione
est affoghende in mesu ‘e su ledàmine.
Canes, battos e sòrighes vagantes:
sìndigu e assessores latitantes.

CAMPA, SARDIGNA!
S’ìsula nostra paret destinada
a passare sa vida in ispidale,
cun affacca a su sou cabidale
luminares de fama incuntrastada.
E dogni ‘olta ch’enit visitada
l’agatan sempre differente male
ma invece de justa meighina,
la sun curende a base ‘e aspirina.
Sos dottos de sa sarda maladia
illustran sas origines profundas
in cungressos e tàulas rotundas,
isperdiscende tempus e salia.
Pro inchiestas de dogni zenìa
forman cummissiones vagabundas,
chi de cultura mustran su bagagliu
in sas colaziones de trabagliu.
Cand’apparin in televisione
- novellos Esculapios de ghia -
mi rendo contu ch’in democrazzia
finza sa mesa hat una funzione:
sa mesa longa dat s’impressione
chi calchi membru hat sa supremazzia.
Si narat sì su ch’est a cabutàula,
sos de fiancu risponden ch’est fàula.
Dognunu, a modu sou, faghet fronte
a sos males chi tentat de curare:
Pianu Irde, Zona Militare
Leze Chibudda cun Pianu Ponte.
Totu progettos andados a monte
ca sa tàula fit rettangulare.
Dogni cunvegnu dat ésitu iscassu
si sa mesa no est a iscumpassu.
Su peccadu l’han subra sa cussenzia
sos architettos de s’arredamentu:
pro gulp’issoro hat fattu fallimentu
su Pianu ‘e Rinàschida in partenzia,
chi prommittiat dare in permanenzia
rios de latte da-e Gennargentu.
Ma si comente fìt sa mesa ovale
cussu pianu puru andeit male.

No mezorat sa sarda nazione
ca non b’hat cumpattesa in sa guida,
a malapena la tenen in vida
fattende sa sartizza a su muscone,
e poi tenen sa presunzione
de cherrer fagher s’Europa unida.
Cun pregiudizziales malaittas
isperran unu pilu in battor fittas.
De tribunos piena est dogni sala,
sezzidos in poltronas e cadreas
ca sos cungressos non sun cosas feas,
coment’e manizare piccu e pala.
Podet esser de trigu annada mala,
però annada ‘ona ‘e assembleas,
‘ue fagher si den su culu a brou
sas concas mannas pienas che ou.
Cand’in tàulas tundas e ovales
est impignada cussa zente seria,
totu paren espertos in materia
trattende sos problemas regionales.
Faghen intruglios pro totu sos males
e ciacciarrende abrogan sa miseria.
Ma totu sas sedutas finin gai:
discurren sempre e non dezzidin mai.

SU TOTOTRUFFA
Cust’est cantu podiat capitare
a zertos giogadores de pallone:
su s’ider convocados a presone
pro un’allenamentu singulare,
ca paret chi si devan incontrare
Reginaceli cun s’Ucciardone.
Accumpagnados a sonos de corra
intran in campu mafia e camorra.
Non diat essere tantu cosa buffa
istituire su calcio-galera
e dare a nois puru sa manera
de iscummitter a su Tototruffa.
Cand’in su campu faghian baruffa
e faghìana s’àrbitru a bisera
sa zente tifaiat a favore
de chie est resultadu truffadore.
Custos tifosos sunu zente istrana
e cheren inchiestas rigorosas,
ca nachi cussas ancas prezziosas,
faghian trucos a s’italiana.
Però comente mai a mente sana,
tolleran truffas in àteras cosas?
Est coment’e pretender chi s’anzone
restet biancu in mesu a su carvone.
Sos giogadores tenen fantasia
e non s’ispiran a Santu Franziscu,
e si calch’unu lu ponen in friscu,
est de seguru in bona cumpagnia.
Si salvat solu sa categoria
de pischecanes chi frodan su fiscu.
De s’evasore sa zente s’abbizat
ma niunu pius s’iscandalizat.
Su càrcere acquistat giogadores
pro divagare sa classe bancaria.
Cale mezus riforma carceraria
podian fagher sos legisladores?
A sos egregios amministradores
han assignadu sa zella onoraria,
in modu ch’hapan totu asseguradu,
vittu e alloggiu a gàrrigu ‘e s’Istadu.

Cun istranzos de lussu, sas presones,
pro forza deven esser accoglientes,
ca pro redimer sos delinquentes
non bastan solu televisiones:
bi cheren puru veros campiones
chi potan soddisfagher sos clientes,
cumpensende, segundu sas fadigas,
sos giogadores (in maglias a rigas).
Coment’appagat dogni ristorante
sos gustos de sos suos fittianos,
gai puru sos carceres nostranos
deven servire sa zent’importante,
in modu ch’iscat, s’illustre birbante,
de poder capitare in bonas manos,
e chi l’han preparadu un’ambiente
a mesura de omine influente.
Isperamus chi dogni Direttore
trattet bene s’illustre inquilinu:
si unu “stopper” pro sou destinu,
cummittit fallu in area ‘e rigore,
non pretendan chi cussu jogadore
hapat su trattamentu ‘e s’ispazzinu.
Ma pro fortun’e s’aristocrazia,
in sas presones b’est s’infermeria.

CUNTRASTOS DE SARDIGNA
Pro meritu ‘e s’illustre personaggiu
de prestigiosa razza levantina
approdan a sa Costa Ismeraldina
miliardos che ballas de foraggiu.
Poi hamus su bàrbaru coraggiu
de narrer chi cust’ìsula est mischina.
Su piangher miseria e disgrascias
est a torrare a Deus malas grascias.
Osservade cant’oro hat semenadu
s’Aga Kan, in sa costa sardignola,
pro trasformare sos Montes de Mola
in d’unu paradisu indeoradu.
No hat sa zente sarda abbauccadu
cun bìcculos de ‘idru e istagnola,
anzis, prìnzipe riccu si appalesat
ca incasciat tant’oro cantu pesat.
Cumpetente in materia ‘e turismu,
ma cabu de sa sua religione
forsi est in Sardigna in missione
pro cunvertire zente a s’islamismu
ca de sa patria ‘e su bandidismu
hat decretadu sa redenzione.
Inue fit su fàdigu a fiancos
pioen marcos, dollaros e francos.
Però su sardu est malu a cuntentare
e si lamentat chi no hat trabagliu.
Si gàrrigat a pala su bagagliu
e partit, pro su gustu d’emigrare.
Su chi fit ladru sighit a furare,
e de mezoru perunu ispiragliu.
Sighin sos sequestros de sa zente
chi sun de moda finza in Continente.
Però, si cussa costa est gai ricca,
no est totu tributu musulmanu,
ca sa Regione l’hat dadu una manu
(ancu l’haeret giuta muzza o sicca).
Com’han rejone si faghen sa ficca
contr’a calchi Gerònimu nostranu
e a sos chi si sun isfressurados
fattend’inchinos a noranta grados.

Si che-i su passadu est s’avvenire,
de Tàntalo su sardu hat su destinu:
bidet su fruttu maduru vicinu
però non giompet mai a lu cogliere.
Isse hat contribuidu a costruire
in Gaddura s’imperu levantinu,
però lu mirat da-i tesu ebbia
e s’hat sidis ingullit sa salia.
Porto Cervo est coment’e unu lagu
ch’invasat miliardos a usura.
Però da intro cuss’invasadura,
de liquidu nde ‘irat bell’e pagu,
ca servit solamente pro disvagu
de chie favoridu hat sa natura.
De cussa linfa vital’e benigna
no nde lucrat su restu ‘e sa Sardigna.
Ma cussu carismàticu sovranu,
cando hat isbarcadu in Arzachena,
nos hat prommissu sa luna piena
che Colombo a su pòpulu indianu.
Pro attuare su sou pianu
hat raccontadu un’istoria amena.
E subitu, sos nostros buscapese
si sun fattos in battor e in sese.
Ancora, Montezumas in marsina,
andan in missione ispeciale,
e s’ingruscian pius de su normale
- chi a momentu si truncan s’ischina -
pro adattare sa moda latina
a su salameleccu orientale.
Mancu s’ammentan, intro cussas salas,
de s’iscurìa ch’han lassadu a palas.
Si sa Costa Ismeralda est un’incantu,
devimus s’Aga Kan ringrazziare,
ca est capazze de organizare
finza salas de ballu in campusantu.
Su mundu est fattu de risu e piantu,
edduncas poden esister umpare.
E gai est sa Sardigna, in custu mundu:
riccas sas costas, pòveru su fundu.

SAS RIFORMAS
In meritu a su solitu macchine
de tanta zente chi riformas cheret,
cheria chi calcunu mi ziteret
una riforma andada bonu fine.
A chie de riforma hat su ‘addine
bisonzat chi calcunu lu poderet.
S’Italia est sa terra ue s’irricchin
sos ladros, ma riformas non nd’atticchin.
Ancora nos incantat su miraggiu
de diventare una riforma attiva
cun-d-una macchina amministrativa
chi giughet ruinzadu ogn’ingranaggiu
e chi niunu s’armat de coraggiu
pro li dar’ozu, de su cale est briva.
Si leat su refreu un’applicadu
intrat in crisi totu s’apparadu.
Si poden fagher milli determinos
sutta sa nostra italica bandela:
abbandonamus sa marina a vela
senz’approntare prima vaporinos.
In zittade serramus sos casinos
pro ponner sas bagassas in carrela.
Cando segamus tres pes a sa banca
cherimus chi si rezat cun-d-un’anca.
Riforman su regime tributàriu
e faghen sa figura ‘e sa corronca:
totu si ‘ettan sas manos a conca
pro dever aggiornare un’ischedàriu.
Intantu, de sos ladros de s’eràriu,
no iscoberin mai s’ispelonca.
E deven pienare sos calascios
cun su ch’ispozan in sos fundos bascios.
Pro fagher sa riforma burocràtica
han formadu unu nou ministériu,
ma cun s’iscopu de crescher s’impériu
e in progressione matemàtica.
Ma cando ponen manu a una pràtica
l’istruin cun borbòpnicu critériu.
De cussu ministériu est sa neghe
si dogn’uffisciu nde partorit deghe.

Comente funzionat un’uffizziu
l’hapo toccadu cun sa manu mia:
solu s’ispostan un’iscriania
si bloccat unu pubblicu serviziu.
Ecco proit’esprimo su giudiziu
chi sas riformas sun un’utopia,
e non mi fido de ogni Barabba
chi annegat in-d-una tazz’e abba.
Han fattu sa riforma de sa domo,
chi nachi fit serviziu sociale,
e sutta su palattu comunale
sos isfrattados s’accàmpana como.
In su Sindigu b’ido un Ecce Homo
chi non risolvet ne bene ne male.
Non riformemus niente, pro Deus!
Sinò andamus da-i mal’in peus.
Bon’ultima (su sogn’e tanta zente)
arrivit sa riforma sanitaria:
s’assistenzia, prima fit precaria,
però como no nd’hamus pro niente.
Tant’in Sardigna che in Continente,
iscummitto chi torrat sa malaria.
Dogni riforma est sempre un’imbarazzu,
si l’amministrat una conca ‘e istrazzu.

ATTITIDOS A PREMIU
Dogn’epoca at sa sua poesia
chi riflettit sos gustos de sa zente.
Sa poesia sarda, in su presente,
mischina, est in corruttu che battia,
ca pro su gustu de calchi giuria
no est gradida si no est dolente,
ne hat valore su cumponimentu
si no hat de attitidu s’accentu.
E pro cussu sos temas preferidos
sighin a esser sa matessi lagna:
s’iscurìa, su gelu, sa siccagna,
sos delittos, sos fogos, sos bandidos,
sos pastores chi nudos e famidos
fuin e abbandonan sa campagna.
Possibile ch’in custa sarda vida
piangan sette dies a sa chida!
Custu Parnasu sardu est tappezzadu
de poesias listadas a luttu,
ue tottu pianghen a succuttu,
autores, giuria e cumitadu.
Da un’estru poeticu annuzadu
non podet nascher differente fruttu,
si non che poesias lastimosas
chi paren epitaffios de losas.
E non lis paret cuntraddizione
su andar’a piangher a sa festa,
tot’affliggidos, a cuguddu in testa,
che cunfrades in chida ‘e passione,
cummentende sa morte de Ugone,
o calch’atera istoria funesta.
Però non rien mai, cussos tales,
ca timen de che perder sos casciales.
Mi paret chi los bida, a sa torrada
da-i sa festa, inue pro cunfortu
han rezzidu una bella conca ‘e mortu
pro dogni poesia premiada,
cun sa prommissa d’enner rezzitada
in sa Rai, pro mezus accunortu.
E si comente su piantu est mannu,
cussa rezzita durat tottu s’annu.

Cussos patidos de musa bastarda
sighin a buliare sa funtana
cun poesias a s’italiana,
chi tradùini poi in limba sarda.
Sa propaganda lis faghen gagliarda,
però non sunu ne linu ne lana.
Eppuru passan pro poetas coltos,
bastat ch’appedden che canes isoltos.
Sa poesia tradizionale,
chi prima fit su ‘antu ‘e Logudoro,
devet sighire su gener’issoro:
senza rima ne metrica usuale.
E, pro haer s’impronta culturale,
devet esser pro forza istrazza-coro.
Non la liberat da-i cussu assédiu
mancu Nostra Segnora ‘e su Rimédiu.
Solu chie est dispostu a s’angustia
intro cussu parnasu ‘enit ammissu.
Su nostru apollo sardu est semper issu,
tant’in sa Rai che in sa Giuria,
e cando legget calchi poesia
si sonniat linghende licarissu:
cunvintu chi sa zente est iscultende
a muccaloru in manu e pianghende.
Ma, forsi, pro sa legg’e su cumpensu,
chi solet guvernare sa natura,
si sun formende Centros de Cultura
orientados in ateru sensu,
ue no usan de brujare inzensu
pro sos poetas de sa disaura.
Ne de cantare cun sa rughe a pala
sas litanias pro s’annada mala.
Bastat cun sos messaggios de tristura
e allegros gosémunos sa vida.
Pro ‘incher una poetica isfida
non recurremus a tanta impostura,
che chie pro patentes de cultura,
iscomodat sa zente seppellida.
Sos mortos ch’’iden simile trabagliu,
rien intro sa tumba a iscracagliu.

Fatemus viver allegra sa zente
déndeli nessi poesia amena.
No inventemus pro fagher iscena
atomosferas de càmera ardente
ca ja bi pensat su delinquente
a nos ponner in coro luttu e pena.
No attristemus chie est già attristadu,
chirchende fune in domo ‘e s’impiccadu.
No est cussu su modu ‘e cunfortare
chie da-e sas penas est distruttu.
Si cantamus attìtidos de luttu
sa zente non si podet allegrare
ca est coment’e cherrer iscazzare
su sidis mandighende su prosciuttu.
A front’e cussu pateticu clima
nois, allegros, brindamus in rima:
“Chie d’esser cuntentu hat bramosia,
siat cuntentu, viva s’allegria!”

MALE SENZA RIMEDIU
S’omine, cust’umana criatura
fruttu de sa divina onnipotenzia,
dòminat, cun sa sua intelligenzia,
sos tres regnos chi forman sa natura.
S’irricchit de continu in sa cultura
e penetrat a fundu in dogn’iscenzia.
Ma est un’impotente minchione
contr’a su cancru de s’inflazzione.
Hat inventadu mesos pro ‘olare
da una parte a s’atera ‘e su mundu:
attraessat sa terra tot’in tundu
senza tenner bisonzu ‘e si frimmare,
comodamente navigat in mare,
siat in superficie che in fundu.
E poi, fessu, perdet sa partida
cun sos iscattos de su caru-vida.
S’omine, ch’in su mundu est unu re
(senz’offesa pro zertas feministas)
istufu de terrenas conquistas,
finza subra sa luna ha postu pè,
e cun coraggiu, seguru de sè,
percurret de s’ispaziu sas pistas.
Ma non possedit formula segura
pro bloccare su preju ‘e sa ‘irdura.
S’òmine chi s’impignat a pienu,
penetrat de sa terra in sas intragnas:
trapanat che regottu sas muntagnas
e intro faghet passare su trenu,
però est incapaze a ponner frenu
a sos prejos e ateras magagnas.
Dominat totu ma non podet nudda
pro fagher rebasciare sa chibudda.
Unu chirurgu onu in s’operare,
vidas umanas recuperat meda.
A chie est lanzu che filu ‘e seda
li dan sa cura pro si rinforzare,
però niunu resessit a dare
poder’e acquistu a sa moneda.
Su chi hat in pius sa chirurgia
paret chi manchet a s’economia.

A ite servin sas cummissiones,
ja chi sos prejos creschen a dogn’ora?
Senza sensu pontifican ancora,
membros de cussas istituziones,
ca pro impappinare sas persones
hamus magos locales e de fora.
Pro chi non benzan da-e sa Sorbona
ischin tenner sa zente calma e bona.
S’iscenzia economica hat dettadu
teorias in tantas naziones,
ma de sas suas applicaziones
no hamus sempre bonu resultadu.
Tra chimbant’annos, in su nostru Istadu,
un’ou costat duos miliones,
in barba a sa politica economica
(si non l’ingullit calchi nue atomica).
Da-e sa vile ispeculazione
est invasada sa soziedade,
eppuru sighit s’Autoridade,
a faeddare de protezione,
e tue vives cun s’illusione
chi non connoschet preju s’onestade.
Invece lu connoschet, e comente!
Ma in proporzione a s’ambiente.

PRO MERITU DE SA PINNA A SFERA
Sa pinna a sfera est de fazzile usu
finza pro chie de pinna est dejunu:
ecco proite la trattat dognunu
chi d’esser iscrittore s’est illusu.
Su professore non contat piusu,
ca paret chi non servat a niunu.
Oe dognunu manizat sa pinna
che chi giuteret unu roccu ‘e linna.
Prima, però, cun pinna e cun tinteri,
bi cheriat pius abilidade:
s’agataiat in difficultade
chie non fit de cussu mestieri.
Unu diploma de ragionieri
non s’otteniat cun fazilidade.
Chie jugher sa pinna no ischiat,
finza manos e faccia si tinghiat.
Como, però, cun cussa invenzione,
sa tinta colat pianu pianu.
Cand’unu leat una pinna in manu,
s’ischit fagher appena un’isburrone,
pretendet s’impiegu in sa Regione
e ismittit de fagher s’ortulanu.
Pro cussu abbundan sos impiegados,
ma sa mazore parte improvvisados.
Oe sa zente piena de viscios,
girat sas palas a s’agricoltura.
Ecco proite mancat sa ‘irdura
e b’hat casinu mannu in sos uffiscios.
Ispintos da-i falzos pregiudiscios
passan da-i su zappu a s’iscrittura.
A chi’hat sa zimbiga de iscrier,
pagu l’importat si faghet a rier.
Ma calchi ‘olta podet capitare
ch’in-d-un’uffisciu non torran sos contos,
e sun suggettos a rezzire affrontos,
sos chi sun pagu ‘onos a contare.
Diffatti nd’hana devidu arrestare
pro zeros in pius, poveros tontos!
Gai in galera nde sighin a pònnere
ca non ischin sa cifras iscumpònnere.

A ite servit andare a iscola,
si già ischin iscrier in s’asilu?
cando l’appoggian subra su pabilu,
sa pinna a sfera, iscriet finza sola.
Pro cussu, tanta zente campagnola,
curret a si leare ateru filu
e, mancari isfregende sa grammatica,
leat sa carriera burocratica.
Ma cando s’usaiat su pinninu
e bi fit in programma sa grafia,
chie sezziat in s’iscriania
manizaiat sa pinna a puntinu.
ja chi tando s’impitu fit continu:
in manu pinna e tinta in sintonia.
Chie fit mani-frùncinu o redossu
si ch’ettaiat su tinteri a dossu.
Sa pinna a sfera hat contribuidu
a miminare s’analfabetismu.
Si fit bessida in tempus de fascismu,
gerarcas de pius haimis bidu.
Oe s’infilan in dogni partidu
(ca no est mortu ancora s’arrivismu).
Restan analfabetas su matessi,
ma tentan de iscrier, a su nessi.

SOS EUFEMISMOS
Non paret beru chi zente guasta,
assumat unu titulu dezzente.
In calchi aristocràticu ambiente
si giogan sas muzeres a canasta,
eppuru sighin a giamare casta
una congrega de sìmile zente,
pro dare decorosa identidade
a chie non connoschet castidade.
Tantos àteros titulos faddidos
adòrnana sa semplize attrattiva:
gai rezzit su tìtulu de diva
una chi l’han suzzada otto maridos,
senza contare cuddos accudidos
chi si la suzzan in cooperativa.
Pius che dea est una calarina
dotada de su titulu ‘e divina.
S’eufemismu est sa tuta mimètica
chi preservat da ogni pregiudisciu:
sa ch’alimentat su mund’e su viziu
no est bagassa, ma peripatètica,
e s’in su sessu hat natura frenètica,
la tenen pro ninfòmane a indisciu.
Non dana mai su nòmene giustu
a suggettos chi causan disgustu.
Non bido mancu sa nezessidade
e ne pro cale motivu ispecificu
appizzigan su titulu ‘e “Magnificu”
a su Rettore ‘e s’universidade,
(chi calchi ‘olta, pro sa veridade,
paret una figura ‘e geroglificu).
Forsi pro chi, a parte sa presenzia,
rendat su sensu ‘e sa magnificenzia.
Finz’in sa gerarchia militare
han cummittìdu su matess’isbagliu:
comente mai giaman “Ammiragliu”
unu ch’est impossibile ammirare?
Dadu ch’est sempre navighend’in mare
no l’ammiran che fera in su serragliu.
Non s’ischit cantos ammiraglios sunu,
ne si resessit a nde ‘ider unu.

Ma s’ironia pius evidente
l’hapo toccada cun manu sa die
chi hana fatti “Cavaglieri” a mie,
chi no hapo ne caddu ne molente;
coment’han insignidu atera zente
appiedada che deo, gasie.
In omaggiu, umpare a su brevettu,
m’haeren nessi mandadu un’acchettu.
E ite narrer de calch’Onorevole?
De calch’unu giamadu “Vostro Onore”?
Ch’in combutta cun mafia e terrore
si cumportan in modu abbominevole?
Deus ‘aldet de zente autorevole
de sa delinquenzia a favore,
chi cun s’issoro manu trista e vile
sunu luende su mundu zivile.
In cantu, poi, a s’Autonomia,
chi sol’in teoria hat sa Regione,
dogni partidu hat unu copione,
fruttu de sa romana gerarchia,
chi pappagallos de periferia
deven ripiter a perfezione,
mentre si moven, a s’inzoma inzoma,
cun sos filos tirados da-e Roma.

FASSONIS PO SA MARINA
Piccioccus, disoccupaus,
labai ch’est s’ora giusta,
baxei a fai fassonis
a Crabas e Santa Giusta.
Impiantai arsenalis
po fai’ barcas de giuncu,
giai chi no’ teni’ navis
custu Guvernu susuncu.
Seus torraus a frori
in manus a certa genti:
a navigai in fassonis
po andai in Continenti.
Penseus seriamenti
de attrezzai una flotta,
po andai in Terrafrimma
istudieus sa rotta.
Tra mancanzia de navis
e iscioperus selvaggius,
su fatt’e’ chi a sa Sardigna
dd’hanti serrau is passaggius.
Inzandus, ita fadeus,
po no essi’ isolaus?
Totu su mari Tirrenu
de fassonis ndi prenaus!
Po sollecitai in Roma
praticas de pensionis;
in mancanzia de navis
parteus cun is fassonis.
In logu de su motori
ddi cuncordaus sa vela,
poneus lossias de canna
po no ispacciai tela.
It’abbisongiu teneus
de navis continentalis?
circundeus sa Sardigna
de cantieris navalis!
Si costrueus fassonis
eus a tenni’ s’iscoffa
de trasportai in Italia
meda prus casu e cancioffa

Aici donaus provas
de sa sarda “balentia”
e teneus sa bisura
de vera AUTONOMIA.
Depeus fair’in modu
de no’ domandai nudda,
aici “birdia nosta”
si nci ficchit in sa ‘udda.

SA LEPPA LUSSURZESA
(A su caru amigu Vittoriu Mura)
S’omaggiu tou, gratu, hap’apprezzadu,
caru Mura, cun tanta simpatia,
ma calcunu, chissà, pro gelosia,
cuss’omaggiu l’hat goi interpretadu:
chi m’has una resorza regaladu
ca est su simbulu ‘e sa limba mia.
Su chi non m’hasa nadu pro rispettu
mi l’has iscrittu offrendemi un’oggettu.
Cunfesso chi m’has postu in pensamentu,
amigu, cun cuss’attu ‘e gentilesa:
b’est chie narat chi est un’offesa,
e chie narat chi est cumplimentu,
paragonare sa limba ‘e Larentu
a unu pramm’e leppa lussurzesa.
Su fatt’est chi, pro bona o mala fama,
su sambenadu iscrittu has in sa lama.
Est beru chi su diciu narat gai:
“Segat pius sa limba de s’ispada”
ma non creo chi calchi “Correddada”
peruna conca messadu hapat mai,
ne mi resultat ch’hat tentu guai
sa zente in poesia criticada.
Tantu pius chi sas concas de mazu
non las intaccat perunu limbazu.
Tenz’un’amigu superstiziosu
chi cando l’hapo contadu s’assuntu,
m’hat domandadu si m’haisti puntu,
comente faghen isposa e isposu
cando si faghen regalu pungosu,
pro chi mai s’amore ‘enzat consuntu.
E biadu, cand’unu si consolat
cretend’ancora chi s’ainu ‘olat.
Mi nd’han contadu de dogni colore,
imbidiosos de s’omaggiu tou,
dognunu interpretende a modu sou,
in chirca de mi ponner malumore.
Ma de tant’insolenzia e rumore
non nd’han bogadu ne giau ne zou,
e pro los reduire a una larva
mi so insabonadu e fatta s’arva.

Cand’hana ‘idu chi cussa resorza
segaiat su pilu che lametta,
luego sun partidos che saetta
a lu contare in tota sa cussorza.
Deo mancu cabia in sa chintorza
passéndemi sa leppa in sa basetta.
Nachi nd’han fattu finza maladia
pro su disizu ‘e sa resorza mia.
Non andan ne a cazza e ne a pisca
e sun pro una leppa in oriolu,
cussos chi trattan sa resorza solu
pro iscorzare sa figumorisca.
Issos l’imprean pro ‘irdura frisca,
ma deo sego petta cun corzolu.
Custos disizos sunu frequentes:
su cherrer pane chie no hat dentes.
Torrend’a su chi m’han attribuidu
- chi nachi giuto sa limba che serra -
sas concas mannas nde ruen a terra
pro limbas malas de calchi partidu,
ca sos ladros de Pisa, l’hamus bidu,
furan umpare e si faghen sa gherra.
In intrallazzos de massoneria
no hapo mai postu limba mia.

IS PRESENTADORIS
Una borta tenemu amigus meda
bravissimus messajus e pastoris,
immoi faint’is presentadoris
a turnu in Tele-Radio-Campeda.
No hant’a tenni’ bella parlantina,
ma funti togus in is intervistas
candu domand’a is autistas:
“Cosa ne pensa del caro benzina?”.
O puru, anant’e una domu arruta,
a bortas intervistanta su meri:
“Signore, che cos’ha provato ieri
quando ha visto la casa caduta?”.
Si morit unu, po sa primu cosa
faint a sa viuda sa domanda:
“Ora, ci dica, signora Miranda,
resta vedova oppure si risposa?”.
Una dì hapu bistu unu de custus,
presentadori a Tele-Monte-Linas,
intervistendi duas signorinas,
meda dotadas de lumbus e...bustus.
Cun su microfunu cravau in bucca
coment’e unu manigu de scova,
ddis domandàda: “Lei che cosa prova
toccando le mammelle a una mucca?”.
Cand’unu si cunsiderat in gradu
de presentai a Radio-Zinnìbiri,
parit ch’in su paneri porti’ pìbiri
imitend’a Bongiorno e a Corradu.
Parit chi custu nou mestieri,
mancai a livellu artigianali,
donit una patenti culturali,
coment’e nai: “quintu poderi”.
Non c’è bisongiu ‘e andai a iscola,
po podi’ fai’ su presentadori,
bastat chi zerri’: “Signore e Signori”
nerit: “Cioè” e tenga’ facc’e sola.
Certas bortas, po tenni’ prus valori,
invec’e unu ndi poninti dusu,
ca parit chi ndi serbat un’in prusu
po presentai su presentadori.

Su scimpanzè presentat su gorilla
(senz’e tenni’ problemas de barberi),
su maridu presentat sa mulleri
e-i su babbu presentat sa filla.
Oi, sa timidesa, est cosa rara,
peus po chini in custu mundu est fessu,
manu manu ch’avanzat su progressu
ci ‘ollit unu nou “Dulcamara”:

SU PIANETA AUTONOMIA
Est unu pianeta chi, pro giogu,
lu battizzein: “Autonomia”,
gai suzzedit chi, pro ironia,
si narat Brunu chie invec’est grogu.
Sa Sardigna Autonoma est su logu
de sos unturzos pro fagher razzìa,
e dogn’astore in chirca de recatu
benit famid’e s’avviat attatu.
Su pastore, vivende che bandidu,
sighit a pasculare ‘arveghes lanzas,
pro ingrassare sas aes istranzas
chi ‘enin in Sardigna a fagher nidu.
Ma, in cumpensu, nos han offeridu
de autonomia pagas ranzas
e, forsi, in d’un’ezzessu ‘e altruismu,
duos cocciaris de bilinguismu.
A riguardu de sa limba sarda,
b’hat puru opiniones differentes.
Ma pro appasigare sas currentes
non b’est ne Ospitone ne Zabarda,
e armados de lanza e alabarda,
s’iscontran sos diversos esponentes.
Su clima caldu de custa Regione
no est adattu a sa discussione.
Tra nois semus che canes e gattos,
peus de cando giogan sos piseddos,
ca nos imbreagamus de faeddos
e nos ismentigamus de sos fattos.
Abboghinamus sutta sos Palattos
poi nos accujamus che catteddos.
Pro fagher una leze nos bocchimus,
fatta sa leze, no nos nde servimus.
Tra nois regnat odiu profundu
ch’alimentan currentes e partidos.
Pro neghe d’esser goi disunidos
restamus a livellu ‘e terzu mundu,
e de su nostru trabagliu fecundu
si nde gosan sos canes accudidos,
e cando sas discordias esplodin,
sos sardos brigan, sos istranzos godin.

No azzuffamus finzas in sa festa
pro negusciare truddas e cocciaris,
e cando abboghinamus: “Forza Paris”
chie tirat a manca e chie a dresta.
Sos matessis ch’imminzan sa protesta,
poi si frimman pro trinta’ inaris.
De sos chi sun in custa barca a bordu
no nd’hat duos chi remen de accordu.
Da-i Amsicora a s’ultima Giunta,
su sistema non paret cambiadu:
cuddu fit de Cartagine alleadu,
custa cun sos Romanos est congiunta.
Cando trambucan sos caddos de punta
non si cunsighit bonu resultadu.
Autonoma fit Eleonora
chi non rezziat ordines de fora.
Su limbazu politicu est oscuru
e lu cumprendet solu calchi addettu.
Pensade, si su sardu dialettu,
o sa limba sos nostros usan puru:
che la giran in suspu de seguru,
pro non ponner in giaru ogni cunzettu
e non s’abbizet, sa zent’isolana,
chi totu sighit a s’italiana.

SOS TRES PODERES
Lampu! Cantu fit tèttera che fusu,
cust’ispina dorsale italiana,
nachi teniat fibra fort’e sana,
invece fit marzìda da-e susu.
Sos chi podere tenian piusu
de sa “Pidue” forman sa collana.
Chissà proite, sos chi si b’aggrègana,
cun coraggiu massonicu lu nègana.
Pro cuss’esprimo su parrer modestu:
- e iscujade si so indiscretu -
sas cungregas chi traman in segretu
non poden haer un’iscopu onestu.
E non rezet nemmancu su pretestu
de poveros chi furan pro s’apretu,
ne si diventat mai frammassone
solu pro signu de distinzione.
S’Istadu de Dirittos e Doveres
in manu a un’ignobile zavorra!
Sun issos, colp’e balla a sa pettorra,
de su ‘inari pubblicu sos meres.
Sun cussos sos famosos tres poderes:
massoneria, mafia e camorra,
non sos ch’imparan in giurisprudenzia,
chi servin pro salvare s’apparenzia.
Forsi, sas concas mannas, est pro cussu,
ch’idende sa tempesta in sas aeras,
cherian trasformare sas galeras
in accoglientes albergos de lussu.
Non zertu pro su ladru bucci-russu
de sos puddarzos e de coniglieras,
ma sos carceres, gai ammodernados,
servin pro generales giubilados.
Si zertos camorristas e massones
possedin sempre su podere in manu,
s’idet chi su pastore italianu
intregat a su lupu sos anzones.
E poi nachi sas eleziones
sun armas de su populu sovranu!
Si no est sana, sa democrazia,
est che pruna isboltada in tegadia.

Inue regnat su “Grande Oriente”
zertu non b’hat pastore ne massaju,
ne insegnante, nemmancu operaju,
ne artigianu, ne umile zente.
Ma su potente occultat su potente
(a boltas no li falet calchi raju).
Ista seguru chi su ch’est massone
non che frazat sos ossos in presone.
No est permissu pro sos istatales
esser a una Loggia assoziados,
però l’impidin a sos appuntados
e lu cunsentin a sos generales;
est proibidu a sos iscritturales,
no a ministros ne a magistrados.
Sos professores de sos intrallazzos
non si pienan sa dom’e istrazzos.
Sempre fit decantada in dogni versu,
s’Italia, sa terra ‘e sos fiores:
terra de santos, de navigadores,
patria de “Dirittu” (e de reversu),
populu de carattere estroversu,
riccu de geniales inventores.
Tantu ch’han inventadu sa “Pidue”
pro futtire su prossimu in totue.

BILINGUISMU
Cussos chi sun partidos che saetta,
cun su “Bilinguismu” a dogni costu,
macchines mannos in conca s’han postu:
ch’apparinen sos montes a bacchetta,
e ch’issos solu in manu han sa rezzetta
pro persuader chi’est conchi tostu.
Presumin ch’issos solu han sentimentu
de sardidade a su chentu pro chentu.
No est sa “limba” s’issoro meleda,
ma diversa madrighe b’hat in fundu:
oe ch’hamus pro patria su mundu,
inventan sa repubblica ‘e Campeda,
forsi cunvintos de batter moneda
(tant’abbundamus de metallu brundu).
E non pensan a calchi lisciu-bussu,
si si nde pesat Emilio Lussu.
Nos sunu dividende in milli fittas,
pro begas chi non lucran ses dinaris,
abboghinende ancora
tra chentu concas e chentu berrittas,
dende corpus a umbras malaittas
che-i sas de Boginu e de Beccaris.
Sun isperdende bùlvera de badas
gherrende cun sa musca a cannonadas.
Pro asciuttare su sardu pantanu,
non bi cheret si no Bilinguismu.
Gai si fit illusu su fascismu,
chi, evochende s’imperu romanu,
totu su mundu teniat in manu,
cultos, democrazia e comunismu.
Coment’e chi, pro sanare sos dannos,
bastet torrare insegus de mill’annos.
E non mi nerzat, calch’impertinente,
chi m’aggradat de Roma su Podere.
A mie diat fagher piaghere
de faeddare in sardu solamente,
ma chi’est cojuadu in Continente
amat puru sa limba ‘e sa muzere.
Amante so de custa limba mia,
però mi servit in Sardegna ebbia.

Cunservare, su populu isolanu,
sos suos dialettos hat dirittu,
senza bisonz’e intrare in cunflittu
su Logudoro cun su Campidanu,
ne chi su sardu cun s’italianu
in dogni documentu ‘enzat iscrittu.
No servit, pro rejones de prinzipiu,
criar’intoppos a su Municipiu.
Totu pretenden de fagher iscola,
dognunu ‘antat sa sua meaza.
Gai, ponzend’in fattu a sa mundaza,
lassan tuddire su trigu in s’arzola.
Ma dogni limba si difendet sola,
senza pampadas de fogos de paza,
ca su l’imponner cun leze istatale
est a li fagher unu funerale.
Cun lezes non s’imponet un’usanzia,
ma si cunservat cun su sentimentu;
ne si presentat a su Parlamentu
una leze minada ‘e arroganzia,
ca, resultende poi in minoranzia,
no est unu felize isperimentu,
su presentare cust’Isula areste
ancora pius “Isula” ‘e su ch’este.

CANES DE ISTERZU
In custu nostru miseru cuile
sos canes sunu totu ammasettados:
biden sos ladros e restan corcados,
ne giàgaran mazzone ne assile;
su gos’issoro est cun su muzzighile
affacc’a culu, sempre isterrujados.
Però faghen che raju a si ‘ettare
cando sebestan cosa ‘e mandigare.
Cantas boltas s’intenden su masone
iscantiadu in nottes de iscuru,
però sos canes, in pinn’a su muru,
paren fagher de palu a su mazzone,
ch’iscannat calch’arveghe o calch’anzone
e si nd’abbuddat a coro seguru.
Sas feras iscobertu han cussu giogu
e accudin da ogni part’e logu.
Si calchi ladru ‘enit a furare,
pro sos canes no hat perun’intoppu.
Forsi los hamus ingrassados troppu
e non si poden mancu morigare.
Eppuru diat poder appeddare,
unu cane, mancari rassu o toppu,
però sos canes nostros istan mudos,
fattende solu sos porcos fottudos.
Senza fagher custodia peruna,
pan’e giotta lis damus a budusciu.
Pro su mazzone no lis bessit musciu,
poi, mancari, appeddan a sa luna.
Si b’hat ladros si caglian tot’in d’una,
paren chi los connoscan a su frusciu.
Finza sas feras si nde sun abbistas
chi custos canes nostros sun basistas.
Cando mai podimus isvizzare,
cun canes de isterzu, sos furones,
si cando nos che furan sos anzones
dan a issos sa ‘entre a mandigare?
Mancu resessin su muru a brincare
cun su grassu chi giughen in runzones.
Sun de sos ladros fittianos fissos:
mandigan da-e nois e da issos.

Ma finza cando ‘enit zente noa
pro che furare calchi fiad’ulu,
invec’e l’afferrare a pedd’e culu,
bruttos cogliones, lis faghen de coa,
e gai dana lampante sa proa
chi connoschen sos ladros a su sulu
e chi si prestan cun totu su coro
a diventare cumplizes issoro.
Sos canes nostros, a bentre piena,
non servin ne pro s’ama e ne pro cazza,
ma, pro lis ponner unu pagu ‘e azza,
proemus a los tenner a cadena,
in modu chi, cand’iden zent’anzena,
lis astringan sas dentes che tenazza.
Si los lassamus isoltos ancora
tenimus ladros de intro e de fora.
Cand’essit su masone a chenadorzu,
invec’e ponner fattu a lu tentare,
si brigan pro sa cos’e mandigare,
poi raunzan pro su corcadorzu.
Proemus a los tenner a presorzu,
a razione, lontanos de pare.
Gai nessi, in cadena totu s’annu,
si non faghen profettu mancu dannu.

ADIU, SOLE !
Mirade cant’est fertile sa mente
de sos genios ch’enin da-e mare:
como sun progettend’e trasportare
su sole de Sardigna in Continente,
s’Isula covachende interamente
cun d’un’immensu “pannellu solare”,
chi alimentet a tempus pienu
su “soledotto” sutta su Tirrenu.
Non bastaiat su fagher razzìa
de iscarzoffa, de casu e de lana,
como finza s’ardura soliana
che lean pro produer energia.
Dadu ch’in Piemonte e Lombardia,
sole bellu, mischinos, no bi nd’hana,
luego s’autorizzazione
lis hat cunzessu finza sa Regione.
Cun su sole chi nois lis zedimus
risparmian currente e kerosene
e, de su restu, a bi pensare bene,
de tantu sole it’est chi nde faghimus?
Nois inoghe già nos iscaldimus
reduend’in carvone s’Ortobene
e incunzende caldu cun su fogu
chi ponen in s’istiu in dogni logu.
Hamus criadu sas cundiziones
de fagher fina su sole emigrare,
gai comente saltian su mare
partidas de porcheddos e anzones.
E poi nachi no hamus persones
ch’iscan s’Isula nostra guvernare!
Perun’àter’istadu hat un’impresa
pro esportare simile ricchesa.
Frunan de sole nostru sas centrales,
bastat chi non nos manchet fae e lardu,
però, in cambiu ‘e su sole sardu,
ite nos dana sos continentales?
Forsi calchi mazzetta ‘e cambiales
o calchi’isvalutadu miliardu,
e una classica mossa, pro restu,:
sa manu manca cun su brazzu drestu?

No esistit regione italiana
disposta a travasare sa calura
a ue istad’avara est sa natura
de su chi bramat dogni razza umana.
Su sole no est pappa americana
chi si podet profunder a usura.
Napoli solu hat fattu a meraviglia
su negusciu de s’aria in bottiglia.
Non connoschimus àtera regione
chi che mandet su sole in terr’anzena,
ma nois hamus sambene in sa vena
e damus...totu pro tradizione.
De istrumentos de donazione
s’istoria ‘e Sardigna nd’est piena,
tantu sa cosa ch’hamus e ch’imprèana,
cando non bi la damus, si la lèana.
Da-e custa Sardigna ismentigada
emigrat aterue ogn’elementu:
prima s’inzegnu, s’arte, su talentu,
poi su sole, a ue non bi nd’hada,
e no ischimus s’intro cust’annada
emigrat sa ‘iddìa e-i su ‘entu.
Isperamus chi, senza nostalgia,
emigret prestu sa talassemia.

ITE ISPERAS, LUZZIFFERRU?
Como chi cun manu vile
has brujadu sa cussorza,
Luzzifferru, ite isperas?
Malaighes su cuile,
odias sa messadorza,
sighende vanas chimeras.
Appena su fenu est siccu,
in tempus de unu mese
brujas buscos e forestas.
Como sognas d’esser riccu,
ma miserabile sese
e miserabile restas.
Si recurres a su fogu,
pro coberare siendas,
has sos cherveddos in brou.
S’in conca giughes piogu,
est pius giustu ch’azzendas
su fogu in cuccuru tou.
Ite isperas, Luzzifferru?
De ti cazzare sa runza
semenende su terrore?
Pro ch’iscadenes s’inferru,
non nde faghes de incunza
si non semenas laore.
Sa campagna has postu in luttu,
chi solu su la mirare
ponet in luttu su coro.
Nara como cale fruttu
nd’has pòtidu coberare,
o cale medagli’e oro.
O puru, narami tue,
Luzzifferru possidente,
a su fogu interessadu:
proite propiu inue
de recreu est s’ambiente
bettas su cimentu armadu?
Pro costruire villinos
no hat bisonzu sa zente
de cust’attu criminale.
Brujados chercos e pinos,
non restat pius niente
de bellesa naturale.

Duncas, salva sa bellesa,
ca da unu buscu siccu
pagu e nudda nde conchistas,
e-i sa candel’azzesa,
Luzziffè, poveru o riccu,
ponedila in pibiristas!

RISPOSTA PRO SAS RIMAS
Egregiu Mostru Sacru, chi arroccadu
ti ses de sa cultura in alta chima,
ammitto ch’hapas pèrdidu s’istima
a s’Arcadia, nota in su passadu,
però como, in su tou potentadu,
no azzettas ne metrica e ne rima.
Como chi coltu diventadu sese
ti pones sas ottavas sutta pese.
Si torrat su diluviu universale
e sese tue su padronu ‘e s’arca,
lassas a terra a Dante e a Petrarca
e salvas Quasimodo e Montale.
Ma pro su gustu tou viscerale
non los retiro sos remos in barca,
che zertos chi sa rima han’a fadiga
e agatan s’iscuja ch’est antiga.
Zertos, chi poetende han pag’alenu,
pro poesia barattan sa prosa
e - si coment’est zente imbidiosa -
ispuccin sempre s’operadu anzenu.
S’impotente, de boria pienu,
s’arrabbiat si nuda ‘idet s’isposa.
Mazzone chi non giompet a sa ua
bogat s’iscuja ch’est ancora crua.
Segundu tue, est poeta impignadu
chie faghet su versu a briglia isolta,
ca, pro zert’arruffona zente colta,
sa rima est unu passazu obbligadu.
S’idet chi tue puru hasa proadu
a t’esprimer in rima, calchi ‘olta,
e ca non t’est resèssida sa proa
lassas s’istrada ‘ezza pro sa noa.
A sos poetas improvvisadores
continu segas sos pannos a dossu
e cun frizzas chi passan pulp’e ossu
bersaglias puru sos ammiradores.
Ca non sunu che tue professores
los cheres carralzare in-d-unu fossu,
però, si los apprezzan in totue
sos poetas sun issos e non tue.

Ma ti cheria ponner a su prou,
poetend’in su palcu, in d’una gara,
cun cussa poesia a tie cara
e a calchi Solone amigu tou.
Ponzo su tuju contr’a unu zou
chi sos fruscios s’intenden in Limbara,
poi non restat anima peruna:
restas tue, su palcu e-i sa luna.
Est fazile rezzire su cunsensu
de un’istriminzida “Rosa Mistica”,
ue finza su ruttu est cos’artistica
e pari pari si ‘ettan s’inzensu.
Su populu, però, no est propensu
de poetare in giae futuristica.
Mi meraviglio de calchi Giuria
ch’avallat cuss’abortu ‘e poesia.
Pasche puru novellos “Leopardos”
in cussas tuas riservas de cazza,
ma lassa seberare a sa piazza
sa poesia chi cheren sos sardos:
sos chi pro te sun poetas bastardos,
pro issa sunu poetas de razza.
Sovrana est sa piazza, in fundu in fundu,
non ses tue s’imbìligu ‘e su mundu.

SA MODA TIRANNA
Sa moda est un’imperiu assolutu
chi dettat leze in dogni latitudine
e a issa, sa zente, hat s’abitudine
de s’inchinare ad angulu acutu.
Si unu a non mollare est risolutu
restat tra su marteddu e-i s’incudine.
Si de sa moda no est rispettosu
est iscazzadu che cane runzosu.
Su dominiu sou incuntrastadu,
non solu influit in s’abbigliamentu,
ma mudat fina su cumportamentu
de chie timet d’esser criticadu.
A su sessu gentile hat decretadu
de dare ogn’istajone appuntamentu,
ca est sa moda chi devet dezìdere
cantos prammos de anca fagher bìdere.
Est issa ch’istabìlit a puntinu
su pesu adeguadu a s’istatura,
e gai fissat puru sa mesura
de sos lumbos, de chintu e de su sinu.
E pro cussu, sa femina, est continu
suggetta a istrumentos de tortura,
ca sa moda li dettat sa sentenzia
comente amministrare ogn’isporgenzia.
Sa moda est pro sas feminas s’iscola
chi las faghet brillare che istellas:
cunvintas de si fagher pius bellas,
si pìntana sa cara a istagnola
e cun su pettus a s’imbola-imbola
si creen tottu perfettas modellas.
Cando faeddan, seguras de sè,
cominzan su discursu cun “CIOE’ ”.
Sa femina est chirchende sa manera
da-i dogni cumplessu ‘e s’affrancare,
ma pius creet de s’emancipare
e pius de sa moda est presonera.
A s’omine s’azzurrit che pantera,
ca nach’isse la solit segregare,
ma niunu l’avvertit, nessi a cua,
chi est sa moda, sa tiranna sua.

Ma calch’omine puru, insipiente,
sighit sa moda de sas signorinas:
s’aggeggiat cun collana e oricinas,
cun sa parrucca o cun sa permanente.
Sas modas faghen a rier sa zente,
bidèndelas pro primu in sas vetrinas,
ma poi totu las ponen in usu,
e-i sa zente non riet piusu.

POLITICA ‘ARVEGHINA
‘Arveghes riunidas a cungressu
in custu democraticu meraju,
sa neghe est de su nostru laghinzaju
si non bidimus ispera ‘e progressu.
Nachi tutelat su nostru interessu,
però no hamus erva mancu in maju.
Tota s’attenzione in monopoliu
est pro nostra segnora ‘e su petroliu.
Sos accudidos campan a s’iscrocca
pro cantu drommin sos pastores sardos:
sa chimica ingullende miliardos
e nois rozzighendenos sa rocca.
Si brincamus chisura, sa mazzocca
nos dan in palas, senza riguardos,
e poi si la lean cun s’annada
si falat pagu latte in sa cannada.
Pastorighend’in cust’arida zona,
su mere sognat campagnas amenas,
e nos pretendet sas tittas pienas,
comente sunu sas de sa padrona.
Inutil’isettare annada ‘ona
si non migramus in terras anzenas.
Si no nos alimentat a dovere,
invec’e nois, murgat sa muzere.
Devimus supportare dogni azzottu,
ca tra nois non regnat s’unione,
eppuru, cando truvan su masone,
inue passat una passan totu,
e-i sa chi non sighit su fiottu
rezzit colpos de fuste in su groppone.
Sol’in sa mandra restamus unidas,
ma pasculende semus divididas.
Totu nos dan ispuntadas de pè,
abusend’e sa nostra masedia,
proite semus sa categoria
abituad’a narrer solu “Beee!”.
Nos han regoltu in s’arca de Noè
pro allattare s’umana zenìa,
ma si una reclamat calchi cosa
luego naran chi est baddinosa.

Si nos preservan de calchi malannu
e nos foraggian in tempus de nie,
est pro nos poder murgher dogni die
e pro nos tunder una ‘olta a s’annu.
Però, a cambiare unu tirannu,
no est cumbeniente, cre a mie:
proite ispodestare unu Scià
s’est mal’e peus s’Aiatollà?
Cand’enin da-e fora pro nos tunder,
nos nd’ segamus su poddigh’a mossu.
De su Tirrenu sàltian su fossu,
sos chi non timen sos pes de s’infunder,
cun manu frimma, senza si cunfunder,
no nde segan sa lana da-e dossu.
Ma si puru pastore cambiamus,
‘arveghes fimis, ‘arveghes restamus.
In tota s’ora de cust’interventu,
calchi “Beee” s’est intesu solamente,
però no han cumpresu un ‘accidente,
(est che fagher sa prèiga a su ‘entu).
Si de agire non tenen s’intentu,
sos cungressos non servin a niente,
però, pro dare de forza una proa,
naran “Beee” e s’iscùtinan sa coa.

SA GIUSTISCIA UMANA
( A Paulu Pillonca )
In custu mundu, sa giustiscia umana,
a boltas est dosada a “trallallera”
e no est beru chi s’istraniera
est pius giusta de s’italiana:
a unu reu de morte li dana
s’ergàstulu o trint’annos de galera,
poi, in appellu o in Cassazione,
resultat innozente che anzone.
E s’interpellas calchi magistradu,
ti rispondet luego disinvoltu:
chi hat rejone su chi l’hat assoltu
e-i su chi l’haiat cundannadu.
Non faeddemus, poi, ‘e s’avvocadu:
pro isse ogni brigante est ben’accoltu.
Dogn’avvocadu, sos suos clientes,
cheret assoltos, ca sun innozentes.
Chie s’isettat sa perfezione
da-e s’umana giustiscia s’ingannat,
cand’a issa sa vista si l’appannat,
ruet che caddu zegu in su burrone.
Giudichende sa propia persone,
chie l’assolvet, chie la cundannat.
Ma su chi faghet a rier est custu:
ambos zuìghes han fattu su giustu.
A pius ch’andat a pass’e piogu,
no esprimit giudisciu sempr’esattu,
già chi sa tela ‘e su sou sedattu
a boltas est segada in calchi logu.
S’isbaglias tue ti bullan a fogu,
s’isbagliat issa est totu bene fattu.
E bae e faghe su cuntradditoriu
cun chi’est intro sa turr’e avoriu!
In Catanzaro hamus bidu in s’àula
ministros, generales, colonnellos,
ch’han fattu sa figura ‘e sos pivellos,
creschéndelis su nasu a dogni fàula.
De veridade manc’una peràula,
eppuru fin testimonzos modellos.
Tota zente chi passat a s’istoria
pro tantu pupuine in sa memoria.

Cand’intrat in sa giungla ‘e sos asfaltos,
sa giustiscia s’agatat in guai.
De solitu suzzedit finza gai
cando mazan sos chercos in sos saltos,
chi a sa lande de sos ratos altos
sa mazadorza non b’arrivit mai.
Già lu cumprendet finza unu bastasciu
ch’est pius fazile a colpire in basciu.
Si su zuìghe ponet in presone
un’innozente de bascia cuntrada,
pro su zuìghe pena non bi nd’hada,
ca est unu normale isvarione,
che cando tue, pro distrazione,
ti lassas sa braghetta isbuttonada.
Ponet un’innozente in gattabuja
poi no li domandat mancu iscuja.
Calchi ‘olta s’abbizan de s’errore
cando, su colzu, est in sa Santa Gloria.
Tando l’assolven nessi a sa memoria
e a sos ossos li torran s’onore.
Immaginade su sou fervore,
intro sa tumba, fattende baldoria
e nende, cun rejone, rie rie:
ponidemiche - sas - barras - inie.

S’ISTADU PRIMA E POI
Possibile, o amada terra mia!
chi ti persigat dogni disaura:
prima su “fasciu” de sa dittatura,
como “s’isfasciu” ‘e sa democrazia.
Prima, su vituperiu ‘e sa zente,
fit su nieddu guvernu oppressore,
como regnat sovranu su terrore,
pro neghe ‘e unu Guvernu impotente.
Dogn’assassinu est unu dissidente
ch’ideales politicos profèssada.
Chie de sequestros s’interèssada
est unu chi cuntestat su sistema,
e dogni banda assumit un’emblema,
paret torrada sa “Carboneria”.
Tottu vanu su sàmbene versadu
sutta sa democratica bandela.
Cant’eroismu frundidu in carrela
pro dare dignidade a un’istadu,
e poi, chie l’hat impersonadu,
no est istadu bonu a lu difèndere.
Calcunu tentat como ‘e si lu ‘èndere
coment’e azienda in fallimentu,
sorte ch’àteros populos han tentu
pro un’istraniera egemonia.
Su meccanismu est già collaudadu,
sa tatica est antiga e manifesta:
gai comente brujan sa foresta,
pro fagher logu a su cimentu armadu,
renden inguvernabile s’Istadu
pro chi diventet fazile conchista.
Sa politica puru hat su basista
e dogni nazione hat unu giuda
dispostu a la traigher, senza duda,
che-i su chi traitu hat su Messia.
Ischìdadi, Guvernu italianu!
Non sias priu peus de sa gioga.
Tra sequestros, terrorismu e droga,
curret a rios su sàmbene umanu.
Ma si ses veramente “Cristianu”
dimustra puru coraggiu zivile:
de su tempiu serra su giannile
a sos pagu pulidos trafficantes;
che Gesugristu iscazza sos mercantes
cun s’issoro profana mercanzia.

SEMENE E INCUNZA
S’umanidade, cun sa sua manu,
si procurat su bene e-i su male.
Niunu naschet Santu o criminale,
ma lu diventat pianu pianu.
S’omine creschet malaidu o sanu
segundu s’alimentu corporale.
Gai dognunu assimilat in mente
su chi li dat s’iscola o s’ambiente.
S’in sa presente generazione,
calchi deliriada fantasia,
unit su mitra a s’ideologia
- briva de sentimentu e de rejone -
est cussu tipu d’educazione
chi l’hat incaminada in cussa via,
ca dognun’in su mundu hat sempre agidu
segundu sos consizos ch’hat rezzidu.
Chissà proite, in dogni seminariu
e in dogni politica inchiesta,
trincian giudiscios a manca e dresta
cun d’unu incumprensibile frasariu,
tirend’in ballu s’eternu divariu
(ca nach’ispettat unu puddu a testa),
alimentende gai sas iscujas
de sas brigatas nieddas e rujas.
Ma niunu si solet domandare:
comente mai non naschet laore
in sa campagna, si s’agricoltore
non s’interessat de la coltivare?
Si poden mai fizos educare
cun-d-unu babbu malu educadore?
Non podet dare mai fruttu ‘onu
sa pianta lassada in abbandonu.
Si sa natura est male guvernada
non si rendet possibile sa vida.
S’abba da-i su monte iscaturida
cheret in sensu giustu incanalada,
ca poi chi sa domo est allagada
no est fazile ‘incher sa partida.
Inutile ingulpare sa natura
si niunu de issa tenet cura.

Finza sa belva dozile diventat
cando est allevada cun amore,
ma si pérfidu est s’allevadore
contr’a isse sa bestia s’avventat.
Gai su fizu de ‘occhire tentat
su vituperiadu genitore.
Edduncas non si mustret indignadu
chie regoglit su ch’hat semenadu.
Si gherran prepotente e prepotente,
non diat esser tanta sa dolenzia,
ma s’ispirale de sa violenzia
colpit sempre sa vittima innozente:
calchi sardu partidu in Continente
pro chistiones de subravivenzia,
comente hat colpidu a Pedru Ollanu,
nobile fizu de su Sarcidanu.
Sa cultura, cand’est in fallimentu,
lassat ispaziu a sos criminales,
e non servin pomposos funerales,
ne tantu baccagliare in Parlamentu.
Non lu sullevan cust’ismarrimentu
mancu sas assembleas sindacales.
Oramai, sa putrida ferida,
l’han trascurada e s’est incancrenida.
E cando sa ferida est in cancrena
est inutile fagher alchimia;
lassemus perder sa demagogia,
chi servit solu pro fagher iscena,
e diemus fiduzia piena
a chi’est cumpetente in chirurgia,
pro evitare chi s’infezione
si propaghet a tota sa persone.
Duncas, bisonzat sùbitu operare
prima ch’arrivet su fogu a carrones,
ma zertas nostras istituziones
non faghen nudda pro no isbagliare,
e perden tempus a teorizzare,
ma senza dare disposiziones.
Medas Guvernos si rezene gai:
restan a caddu e non si moven mai.

UNA GITA AVVENTUROSA
Chi hat bisonzu de calchi guida,
pro pigar’in montagna a sa segura,
chirchet s’amigu Vittoriu Mura,
pro non currer perigulos de vida.
Pilota puntuale a sa partida,
lu perdes prim’e giomper a s’altura,
e poi de tres dies de caminu
ti l’agatas a pes de su Cervinu.
Una die chi fattu hamus s’azzardu,
semus rutos che lissa in salamuja:
l’hamus pérdidu ‘e vista cun s’iscuja
chi fimis tres segundos in retardu.
Lu coizamus in Santu Nenardu
e che giompimus a Pischina Ruja,
cun-d-unu sole brujende che fogu,
chirchend’a Mura e Mura no in logu.
Ma s’autista puru - conca macca -
coment’e sempre, Spensatellamente,
senza si render contu de niente,
s’est infiladu in-d-una piteracca,
chi, s’incontramus, pro disgrascia, un’acca,
nos bloccat su caminu malamente.
Deo cun Cannas e Tiu Angheleddu
fimis pro nde girare de cherveddu.
Cando Tiu Angheleddu s’est abbistu
chi Spensatello curriat lontanu,
de lu frimmare hat tentadu invanu,
ma solu abba in su pistone hat pistu
(ca ue non bi podet Gesugristu,
non bi podet perunu cristianu).
Solu poi ‘e tres oras s’est frimmadu,
cando s’est su motore arrebbelladu.
Sa guida non fit abbista tantu,
però nemmancu su guidadore,
ca si non si li bloccat su motore
nos agatamus sutta ‘e Monte Santu.
Ma ambos duos si daian bantu
de guidas alpinas de valore.
Si de guidas gai has una paja,
“col cavolo” conchistas s’Imalaja.

Poi finidu cussu purgadoriu,
torrados tot’a su punt’e partenzia,
bisonzaiat bider s’insolenzia,
s’azza de Spensatello e de Vittoriu:
chie ca “ch’essit fora ‘e territoriu”
chie ca “peccat de intelligenzia”.
Su fatt’est chi, sa neghe ‘e su zoroddu,
si l’han bettada da-i pala in coddu.

A ITE SERVIT CUSTA POESIA?
A ite servit custa poesia
in custos tempos de contos in banca?
lucros de una “mafia bianca”
ch’ispeculat in dogni maladia?
Chi cuntrattat sos lettos in corsia
che chi esserat bendende una tanca?
Grascias a su progressu ch’hamus fattu,
sa vida est compra-vendita e ricattu.
A ite servin a s’umanidade
custos versos rimados e isoltos,
si da-i ‘ucca de presuntos coltos
s’apprendet dogni bestialidade?
Cando trasforman s’universidade
in bolgia de discepulos istoltos,
a ite giuat custa poesia
ue su mitra est ideologia?
A ite servin custos versos sardos,
cando semus che feras in sa tana,
ue barattan una vida umana
pro una pizzigada ‘e miliardos?
chi esigin cun faccia ‘e pistalardos,
che chi umperan abba in sa funtana?
It’est su contributu ‘e su poeta
in custu insambenadu pianeta?
A ite servit custa poesia
de poetas antigos e modernos,
si pubblicos poderes e guvernos
sun inferzidos de massoneria?
E impersonan sa burocrazia
battor culi-cagados padreternos?
Sa poesia, in tantu luridùmine,
est vile lozu in mesu a su legùmine.
Ite contat su versu eloquente,
esternadu cun tanta passione
si oe, su valore ‘e sa persone,
est in sa cifra ‘e su contu currente?
ch’est de avallu a su delinquente
pro poder iscansare sa presone?
Sa poesia est miseru imballaggiu
tra prejos de riscattu e riciclaggiu.

Sos romanticos versos tra amantes
sun farfaruzas de tempus lontanu.
Oe s’aneddu est un’omaggiu vanu
si no est tempestadu ‘e diamantes,
e-i sas proas pius esaltantes
sun sas rapinas a pistola in manu,
pro comporare sos gustos in voga
chi dan sos paradisos de sa droga.
Sa poesia no est mai istada
funtana de ricchesa o de potenzia.
Prima nessi, cun meda riverenzia,
fit da-i mecenates amparada;
como che Cenerentola est trattada
finz’in s’istampa, cun paga indulgenzia.
Un’istampa ch’est sempre... a cagaredda
cun eroes de cronaca niedda.
A ite servit custa poesia,
fruttu de sentimentos dilicados,
in-d-unu mundu de carros armados,
imbasciadores de democrazia?
chi oe, cun feroze tirannia,
assuggettan sos debiles istados?
Sa poesia, in mes’a tant’istraziu,
agatat sempre pius pagu ispaziu.

CANES E PASTORES
Pastore sardu, tue has tantas neghes,
però sa neghe tua prinzipale
est ch’has unu cuile ispeciale
chi contat pius canes che ‘arveghes.
E tando como non ti nde la seghes
si tottu sos dissignos t’andan male,
ca murghes tres ‘arveghes fadigadas
e chentu canes màndigan debadas.
Innanti fisti teracu pastore,
senza mancu ‘entone ne mudanda,
e cumbìnchidu t’hat sa propaganda
a esser tue padronu e segnore.
Ca su padronu fit isfruttadore
has piantadu cuile addibbanda.
Solu chi, a su postu ‘e su cuile,
como t’agatas cun-d-unu canile.
E a su mancu esseran canes bonos
pro custodire s’ama in sa pastura,
invece, senza sestu ne mesura,
isperdiscian su ben’e sos padronos.
Custos canes possedin milli donos,
ma su pius connotu est in sa fura.
Non solu furan issos a dogn’ora,
ma giaman finza ladros da-e fora.
Su mason’est continu miminende,
ma sos canes sun sempre in aumentu,
ch’a pius de su tou allevamentu
sun sos canes anzenos recuende.
De cantos a iscrocco sun campende
bisonzat fagher unu censimentu,
pro disponner de màndigu dezente
innanti chi s’imbolen a sa zente.
Prima chi si t’afferren a runzones,
tènelas sutt’a oju sas provvistas,
ca si trattat de canes camorristas
ispeciales in protezione.
Cun s’iscuja ‘e protegger sos masones
ti ricattan e faghen sos basistas,
finz’a cando, su populu, isfadadu,
no lis dat su buccone avvelenadu.

Ma pro cantu, tra canes e pastores,
sa parte pius forte est sa canina,
tue, pastore, tened’in s’ischina
su pesu de sos tuos protettores,
chi ti nde suzzan samben’e suores
gai comente suzzat s’orighina.
Sos tantos canes chi giughes addossu
ti sunu reduende a pedd’e ossu.
Pastore sardu, troppu t’est costada
sa gana de cuile a contu tou,
ca no nde ‘ogas ne giau ne zou
da-i cust’ama male amministrada:
invec’e murgher latte a sa cannada
lu ses murghende a unu colabrou.
Cun cussos canes chi non ti dan pasu
no has’a giomper mai a fagher casu.
Cun tantos canes chi deves campare,
imbizzados a latte e petta crua,
ìstalis fattu, mancar’a s’accusa,
cando ‘essin su notte a orettare,
ca sun capazes de si che suzzare
finza su latte de muzere tua.
Cand’issa, indrommiscada, est aterue,
los allattat cretende chi ses tue.

POESIAS IN SUSPU
Coment’est sempre abitudine mia,
amigu Mura, ti rispondo a prontu.
Non semus solos a nos render contu
chi su suspu est sa mezus poesia
e chi su membru de ogni Giuria
la premiat, sinò passat pro tontu.
Pro fagher finta d’esser cumpetente
premiat dogni tròddiu ‘e molente.
Non t’ispantes s’in zona disastrada
la faghet de padronu s’isciacallu.
Oe, poeta, est dogni pappagallu
chi faeddat a limba trobojada,
ca sa mafia est sempre preparada
pro dare a sos fizolos un’avallu.
Non t’ispantes si calchi imperadore
faghet su caddu sou senadore.
Sas peraulas gai sibillinas
chi forman sa moderna poesia,
las estrain a tipu lotteria
pro cumponner sas deghe cinquinas,
pro cussu miscian sas cosas divinas
cun sa pius istupida eresia.
Tirende sas peràulas a sorte
podet bessire “vida” e poi “morte”.
Cussas perlas chi tue has seberadu
dimustran cale pedra ‘e paragone
hat in possessu sa “Cummissione”
pro giudicare su nostru operadu,
e presentat ladinu s’ispaccadu
de cust’ottusa generazione.
Nàrami tue si ‘alet sa pena
intrar’a fagher part’e cussa chena.
Regoglin su limone senza suzzu
e in sa matta appiccan sa medaglia;
chircan apposta Giurias de vaglia
pro premiare simile inciappuzzu;
deven giugher istogomo ‘e istruzzu
pro digirire cussa burrumbaglia!
Biada’a chie tenet cuss’impicciu
de ponner istruminzos in su nicciu.

In su laore be-i creschet lozu
si sos massajos abbarran drommidos.
Sos laddajones sun sempr’esistidos,
peus pro chie los ponet sutt’ozu,
o chie a sa cadena ‘e su rellozu
si los appiccat che pignos ambidos.
Ma s’azione pius indezente
est dare petta pùdida a sa zente.

UNU MANUALE PRO GUVERNARE
Si has de guvernare sa tendenzia
deves ponner a puntu ogni “minuzia”,
pro poder conchistare sa fiduzia
de sos chi ti supportan cun passenzia,
e si difettas de inteligenzia
bisonzat de supplire cun s’astuzia.
In sa faccia t’est sempre nezessaria
una màscar’e terra refrattaria.
Occurret cussa màscara isolante
pro affrontare sos caldos atunzos;
non pistes in sa taula sos punzos
cando de argumentos ses mancante;
sias sempre gentile e elegante,
però surdu pedrale a sos murrunzos,
tantu tottu protestan e battaglian,
però poi s’increschen e si caglian.
In tempus de campagna elettorale
faghe sempre sas solitas prommissas
(dogni peidru, a forz’e narrer missas,
s’imprimit in sa mente su missale).
Cun sas feminas sias cordiale
ca si ti votan lu deves a issas:
a Eva la cumbinchet su serpente
poi Adamu a issa ponet mente.
Mai sa ‘ucca ti tuppen lentolos
faeddend’a sa zente in sas piattas,
e si pro casu est tempus de pumattas
bae cun-d-un’iscorta ‘e coinzolos.
Sos nostros guvernantes sardignolos
han totu sas prommissas satisfattas,
nos mancat solu, subr’e Gennargentu,
sa fabbrica ‘e su nie e de su ‘entu.
S’in Guvernu resessis a intrare,
impar’a fagher s’equilibrista,
ca sos ch’isettan su turn’in sa pista
non biden s’ora de t’isbilanciare.
Cando si rendet liberu un’altare
dogni santu diventat arrivista.
E si non si teniat sempre abbistu,
faghian fora finz’a Gesugristu.

Si andas in Brasile in missione,
in Argentina o in Venezuela,
non fettas, pro difettu ‘e cautela,
sa figura de unu minchione:
si passas in rivista unu plotone
e deves saludare sa bandela,
non fettas, pro isbagliu, cun sa manu,
un’imponente saludu romanu.
Si ses interpelladu “lì per lì”
non nerzas mai ne “Si” e ne “No”:
risponde solamente “Ni” e”So”
a chie t’intervistat in Tivì’.
S’isbaglias e t’iscappat calchi “Si”
subitamente aggiunghe unu “ Però “.
Siat ogni risposta, ogni postilla,
digna de un’oràculu ‘e Sibilla.
Cando ses invitadu a collocare
sa prima pedra de calch’ispidale,
informa, in su discursu uffiziale,
cantos séculos deven isettare
prima d’esser in gradu ‘e caminare
su baosu coccoi regionale,
(ca si si movet li ‘ettan sa franca
sos cabos de sa mafia bianca).
Si ti deferin a s’Inquirente
pro calchi “bustarella Made in Usa”,
nara chi est un’infamante accusa
pro ti colpire politicamente.
Chie guvernat est sempr’innozente,
salvu calchi persone troppu ottusa.
Però pro cussa puru b’est s’inventu
de s’istitutu ‘e su penetimentu.
Ses suspettadu de corruziones?
E tue affuttidinde de sa ciarra!
Rest’in su postu tou a man’in barra,
già duran pagu cussos trimizones.
Non dias mai sas dimissiones,
sézzidu ses e sézzidu t’abbarra.
Anzis, si times calchi buglia fea,
fàghedi giaittare a sa cadrea.

RUNAGHES IN GHERRA
De cantu oe sa zent’est isterica
da-i pagu sa proa nd’hapo tentu:
cando sa Giunta ‘e “Runagh’e Attentu”
est intrad’in cunflittu cun s’America.
Totta sa zona sua periferica
l’hat zintada cun muros de cimentu,
poi b’hat piazzadu unu cannone
pro distruer sa bomba “al neutrone”.
Bos hat a parrer una cosa comica,
ma su Pentagono est orioladu
ca “Runagh’e Attentu” hat decretadu
de l’attaccare cun s’arma economica,
ca, affuttendesi ‘e sa bomb’atomica,
li hat su casu sardu dennegadu,
e da-i cras, sos Istados Unidos,
màndigan maccarrones iscundidos.
Ma de cant’est distratta, cussa zente,
no l’est passadu mancu in su cherveddu
chi su Consizu ‘e “Runaghe Nieddu”
est de opinione differente.
Rezzida sa notiscia prontamente,
su Sìndigu, ch’est omin’e faeddu,
dichiarat, cun arte dialettica,
sa gherra a s’Unione Sovietica.
E “Runaghe Nieddu” est de peràula,
ca da-i cando appresu hat sa notiscia
(si comente produit ortaliscia)
no l’imbiat pius basolu e càula,
gai sos russos, sèzzidos a tàula,
si nutrin solu a bardu piscia piscia.
Ma bi cheret coraggiu, ite diàmine!
a fagher morrer sos russos de fàmine.
Sunu chirchende sa formula magica
de iscongiuru a simile cundanna;
in Mosca curren da in gianna in gianna
pro si passare sa notiscia tragica;
timende cussa mineta nuragica,
in su Cremlinu si tremen che canna.
Appenas han leadu arrast’e gherra
sun tottu rutos benujos a terra.

E gai puru s’America intrea
hat proadu un’iscossa troppu dura.
Nachi su Presidente, addirittura,
ha tentu una passada ‘e diarrea.
In sa sede de s’Onu, s’Assemblea
- ch’est iscagareddada de natura -
hat dezis’e mandare a sos Runaghes
su Segretariu sou a ponner paghes.
Mirade cantu allargan sos abbissos
sos omines politicos redossos:
non potend’attaccare sos colossos,
sa vera gherra la faghen tra issos,
sighend’ancora sos modulos fissos
de si lear’a calches e a mossos.
No han in domo ne paza ne fenu,
però si ‘occhin pro s’àinu anzenu.
Sos guvernantes nostros ponen cura
in su rattare sas runzas de fora,
però niunu s’abbizat ancora
chi su Runagh’est senza cobertura,
e chi pioet intro a disaura,
in aumentu da-e in ora in ora.
A sos colossos pàrana s’iscudu
e s’isméntigan ch’han su culu nudu.

POESIAS A S’AMMASSU
Comente giughen sa ua a s’ammasu
dogn’annu a sas cantinas sociales,
gai zertas “riservas” culturales
regoglin poesias a ispassu,
inue si dezidit cal’est s’assu
e cales sun sos frillos marginales,
e cun particulare attenzione
a sos terrinos de produzione.
Comente individian cun cura,
sos peritos, s’origin’e su ‘inu,
gai controllan su versu a puntinu
cussos “sommeliers de sa cultura”.
S’est de montagna o s’est de pianura,
si est adulteradu o genuinu,
e cun insindacabile giudisciu
l’incollan s’etichetta de uffisciu.
E pro cantu est zente appatentada,
est garanzia pro su cuncurrente,
ma in zertas iscolas, meda zente,
dat sa patente e patente no hada;
o puru giughet sa mente incrostada
ca est inquinadu s’ambiente.
Gai viaggiat zente isprovvedida
cun faziles patentes de guida.
Zertu, pro unu pessimu autista,
prefero deghe pessimos poetas
chi, mancari cun formulas segretas,
si faghen de trofeos sa provvista,
ma sa patente de camionista
la deven dare persones discretas.
Invece intendo narrer frequente:
“ma chi’est chi t’hat dadu sa patente?!”.
B’est finza su zuìghe chi s’ingannat,
applichende su codice penale,
ma b’hat una giustiscia ispeciale,
chi su fumu sa vista no l’appannat:
s’opinione pubblica cundannat
su reu ch’han assoltu in Tribunale.
Su populu, o contra o a favore,
est s’unica Giuria chi hat valore.

Inue pesan cussas poesias
su pesu podet esser punzonadu,
ma podet esser puru isbilanciadu,
comente nd’hat in zertas drogherias,
ca già s’ischit chi sas controllerias
las faghet dogni sèculu s’Istadu.
Ma, piagat o no, su pesu est custu,
solu Santu Micheli hat pesu giustu.
De poesias in suspu selvaggiu
no nde cumprendo su significadu,
pro cussu, zertas chi nd’han premiadu,
de las legger non tenzo su coraggiu.
Sa poesia est sempre unu “messaggiu”
però non gai “messaggiu cifradu”,
chi no nde podes cumprender un’acca
si non giughes su codice in busciacca.
Ma non faghet peruna impressione
sa patent’e poeta a su diploma,
(b’hat uffiscios appositos in Roma
chi dan finza su titulu ‘e Barone),
est solu una moderna invenzione
pro lottizzare su sardu idioma.
Faghen, pro culturale baronia,
sas chiudendas de sa poesia.

SA PUNTURA ANTISCANDALU
Mirade, ite miscela han inventadu
pro ponner frenu a sa corruzione,
ch’in s’istatale amministrazione
podet dare brillante resultadu.
Chie manizat dinar’e s’Istadu
pius non podet fagher s’imbroglione:
li faghen un’ispezia ‘e puntura
chi lu rendet allergicu a sa fura.
Su ch’est prepostu pro amministrare,
pius non podet cummitter abusu:
appena l’intrat dinar’in piusu
de su chi li bisonzat pro campare,
luego tenet gana ‘e mandigare
su chi piaghet a su carrabusu,
e dogni ‘olta ch’amministrat male,
hat un’attaccu ‘e colica renale.
A dogni pubblicu amministradore
chi de furare l’intrat sa mania,
si l’attaccat luego s’allergia
ch’hat isperimentadu s’inventore,
e no esistit barba ‘e professore
chi lu sanet de cussa maladia.
S’omine ladru restat ammajadu
finz’a torrare su chi nd’hat furadu.
Chie, de Sanidade cumpetente,
s’impippat de sa populassione,
isperimentat in prima persone
su ch’est suffrende sa povera zente,
cale campionariu vivente
de sos males de totta sa Regione.
A chie sa riforma rendet vana
non restat chirriolu ‘e petta sana.
Sos chi curan sa pubblica finanzia,
o sos addettos a su monopoliu,
appena lean fiagu ‘ gasoliu
avvertin de s’alenu sa mancanzia
e sun brivos de fagher alleanzia
cun riccos trafficantes de petroliu.
Solu s’incasciu de una tangente
lis bloccat s’apparadu digerente.

Già ch’in su nostru pubblicu ischedariu
in pagos giughen sas ungias pulidas,
han imminzadu - cosas mai ‘idas! -
un’antifurtu apposta pro s’erariu,
incorporadu in su Funzionariu
chi registrat intradas e bessidas,
pro chi, s’iscriet falzu in su pabilu,
li ‘essat una bua in dogni pilu.
Duncas non semus s’ultima iscobitta,
in fattu de amministrazione.
Forsi semus sa prima nazione
chi hamus s’onestade in ampullitta.
Su chi non dan sas mamas cun sa titta
lu dat sa legge cun s’iniezione.
Nois hamus sa punta ‘e diamante
chi mudat in onestu ogni birbante.
Ma cust’idea de moralizzare
paret una solenne frigadura:
chie de cosas pubblicas hat cura,
no accunsentit a s’immunizzare.
Lampu! Niunu cheret guvernare
ue no est possibile sa fura.
Azzettan solu s’agatan su Magu
chi fetat finta ‘e lis intrare s’agu.

CATULLOS IN SUTTANA
Don Pes e Padre Cubeddu,
de poesia funtanas,
nachi fattu a sas suttanas
giraian su cherveddu.
Custos Vates religiosos,
Don Bainzu e Padre Luca,
de sos sardos in mastruca
fin sos Catullos famosos,
ma invec’e fagher gosos
pro sos Santos de su Chelu,
cumponiana cun zelu
(ma de diversu tenore)
poesias de amore
pro ‘attias e bajanas.
Forsi cussa passione
lis serviat de cunfortu
tra una missa ‘e mortu
e una cunfessione.
S’han fattu calchi cantone
licenziosa o patetica,
fit pro licenza poetica
a su rigore canonicu,
fit solu amore platonicu
pro devotas fittianas.
Ma dia cherrer ischire
Padre Luca ite faghiat,
cando si che corcaiat
su notte, prim’e drommire.
Forsi soliat pedire
sa grascia a Nostra Segnora
chi sa Dama Incantadora
li manderet a sa zella,
o calch’atera donzella
oggettu ‘e sas suas ganas.
Gai puru a Don Bainzu,
su cadduresu Lindoro,
hat confusu anim’e coro
su carrale pistighinzu.
de sa làmpana in s’altare,
a sa candela ‘e comare
s’isaiat dende fogu,
in disizu ‘e disaogu,
de avventuras mundanas.

Cando cun sa penitente
faghian s’oju maduru,
“...sun omines issos puru”
cummentaiat sa zente.
L’ischit finza su molente
ch’issos puru fini mascios,
ma serren in sos calascios
sos amorosos lamentos,
no los lampen a sos bentos
che repiccos de campanas.
Sos Catullos chirigados
ch’in sas venas giughen fogu,
in dogni tempus e logu
sunu sempre zelebrados,
che chi sian esentados
da-i su Cumandamentu
chi faghet impedimentu
a sensuales disizos,
e puros coment’e lizos
cantan sas Doris Galanas.
Ma custos ch’in sagristia,
in bestes sazerdotales
cumponen sos madrigales
a sas Fizas de Maria
a s’issoro gerarchia
forsi sun pagu gradidos,
ca sun che caddos fuidos
da-i s’issoro serragliu,
e impitan pro bersagliu
sas bellas parrocchianas.
Nessi su Rettore Mele,
pro sa sàtira famosu,
a s’abidu religiosu
si mantenzeit fidele,
e creo chi su “nichele”
l’haeret giutu finz’Isse,
ma fuiat che Ulisse
a s’incantu ‘e sas sirenas,
iscazzende sas anzenas
da-i sas suas suttanas.

SA PAGHE DE SOS TEULAJOS
Cun tottu custos sardos paladinos,
sempr’impignados in verbosas giostras,
sighit a piumbare in palas nostras
su nérviu ‘e sos nostros aguzzinos.
Bisonzat bider su coraggiu ch’hana
contr’a sa feudale prepotenzia,
ma paret ch’hapan solu s’incumbenzia
de contare sos colpos chi nos dana.
Tant’est chi, cun filippicas iscrittas,
ovvero cun mirabile oratoria,
non potende ‘antare una vittoria,
dan solu contu de sas iscunfittas.
Su carru nostru non servit a nudda
ca finit sempre in mesu ‘e su pantanu
fin’a cando an sas rèdines in manu
avvocadeddos de pane e chibudda.
Però, a los intender faeddende,
cun boghe arrojolida pro imbizzu,
duces cun manganello e ozu rizzu
paret sa Provvidenzia imbiende.
Grascias a issos devet diventare,
sa Sardigna, s’ottava maraviglia,
e faeddan in sardu pro puntiglia,
mancari chi no l’iscan faeddare.
Ma custos paladinos isolanos,
appena chi faeddan de ‘inari,
sinde ‘ogan sos ojos pari pari
ca tottu be-i cheren ponner manos.
Un’usanzia como est diventada
su si legger sa vida in “limba” issoro,
ma forsi haian tentu prus decoro
s’haian giutu sa limba truncada.
Non creo, su sistema, chi lu giàmbene:
(cando l’han a giambare est troppu tardu)
como, chie si contat pius “Sardu”.
faghet finza s’analis de su sàmbene.
Si segnal’e vernaccia b’hat in mesu,
tand’est de razza sarda verdadera,
ma si b’agatan traccias de barbera,
decretan: “fora su piemontesu”.

Chie de veru sardu hat sa pretesa
pretendet puru s’autoridade,
e s’hat appena un’unza ‘e sardidade
sind’attribùit nessi un’unz’e mesa.
E faghet giuramentos e prommissas
de morrer pro su ben’e sa Sardigna,
però, subra cuss’anima benigna
non giuat mai a fagher iscummissas.
Sun paladinos de natura rara
e pari pari s’istrazzan sas bestes;
sende masedos si finghen arestes
che àinos chi b’hat in s’Asinara.
Sas brigas sun sa negh’e ogni male,
ma bae e nàralu a zente testarda;
pro ironia, “S’Unione Sarda”
restat sol’unu titulu ‘e giornale.
Restat gai, che roda senza rajos,
unu populu dignu ‘e mezus gloria,
ch’in cant’a paghe passat a s’istoria
che-i “sa paghe de sos teulajos”.
S’istranzu sighit criticas a tèssere
contr’a sos sardos, continu in discordia,
Ma si tra sardos bi fit sa cuncordia,
ite razza de “Sardos” dimis èssere?!-

DEUS PERDONA!
Deus perdona, si su nostru dolu
cuntrastat cun sa Tua Volontade,
ca pro su gosu de s’Eternidade
s’Anghelu nostru hat ispiccadu ‘olu.
E no nos servit mancu de consolu
su nos mancare in veneranda edade,
sende cunvintos chi Anghelos gai
devian nascher e non morrer mai.
Deus perdona, si forsi, in cust’ora,
cuntrastamus sos Tuos determinos,
ca sidis de “Rizolos Cristallinos”
sa mente nostra teniat ancora.
Pro nois fit che Lughe ‘e aurora
chi non pariat connoscher declinos.
Forsi sos chi a Tie aman cun zelu,
servin pius in terra che in Chelu.
Deus perdona, si rimpianghimus
sa Lughe de sa cale nos has brivu,
tantu Tue cumprendes su motivu,
si bene appalesare no l’ischimus.
De cust’orfana < Ischiglia > chi tenimus
non fit solu su “babbu putativu”
ma s’appassionadu criadore
chi che fiza cureit cun amore.
Deus perdona, si su sentimentu
appannat calchi ‘olta s’intellettu,
ca no est eresia, ma difettu
de s’umana natura ch’hamus tentu.
Non solu ammiraimis su talentu,
ma Li nutrimis puru tantu affettu.
No est fazil’esprimer in faeddu
sas attrattivas de Ti’Angheleddu.
O Deus, cust’isfogu mi perdona,
perdona si Ti parzo irriverente:
in Chelu has un’esercitu imponente
de Poetas, fatèndedi corona,
ma sèberas sa linfa pius bona
e lassas in su mundu s’iscadente.
Pro forza semus sempre in malas abbas
si morin Cristos invec’e Barabbas.

Deus perdona, si feridu a morte
l’hat calchi frizza de dispiaghere...
Cunforta como fizos e muzere,
rezzendeLu in sa Tua Santa Corte.
Cunzedi a nois puru bona sorte
pro Li render onores a dovere,
e Tue dignu ispaziu Li fettas
in sa “Mistica Rosa” ‘e sos Poetas.

TERRORISMU E PENTIMENTU
Como chi, mancumale, han istanadu
sos mostros de s’italica “vandea”,
totu si poden fagher un’idea
chi sun luzzu e ledàmine impastadu:
a sas domandas de su magistradu
sun che culos de pudda a diarrea.
Como, sos chi a issos ponen fattu
de su chi los isettan leen attu.
Cussos bermes, de sàmbene sididos,
veros modellos de vigliaccheria,
cheren assumer sa fisonomia
de èsseres umanos penetidos
istanende sos àteros bandidos
da-i sa fogna ‘e s’ideologia.
E già calcunu ottenit sa clemenzia
senza nemmancu fagher penitenzia.
Non faghet meraviglia s’in Italia
accomunan sa prata a s’alluminiu,
trattende su ch’est reu ‘e assassiniu
che chie furat un’ispilla balia;
nde seghet una conca o una dalia
han su matessi pesu in s’iscrutiniu.
Su boja cun s’adultera redenta
intran ambos in chelu a manu tenta.
E pro dirittu de rappresentanzia
faghet finza sa femina de boia,
ca podet ness’iscazzare sa noia
a sos cumpagnos, in sa latitanzia,
e si prestat in dogni circustanzia
a fagher issa de caddu de Troia.
E non diventat ruja che coraddu
cando faghet de Troia a su caddu.
Oe, ch’a su feroze terrorista
s’est abberta sa ‘ia ‘e su riscattu,
poi ch’est de istrages sastifattu
presentat de sos cumplizes sa lista;
essende fin’a deris brigatista,
Pubblicu Ministeriu est de fattu,
e cand’est sézzid’in cussa cadrea
chircat finza s’applausu in platea.

Gai, segundu su giudisciu umanu,
- chi est meda diversu ‘e su divinu -
serrat sa carriera, un’assassinu,
cun su còmudu rangu ‘e ruffianu.
Mentre da-i sa leze fit lontanu
in d’unu brincu s’agatat vicinu,
e podet esser puru espatriadu
cun ispesas a gàrrigu ‘e s’istadu.
E cando naro “a gàrrigu ‘e s’istadu”
intendo narrer a gàrrigu nostru.
Liberan e proteggin unu mostru,
ch’est sempre unu sepulcru imbiancadu,
(gai comente, mancar’allizadu,
indoran pro Nadale su olostru)
poi ch’imbolan in sa zella sua
cuddu chi furat un’udron ‘e ua.
Finit ch’in cust’ezzessu ‘e garantismu
naschet su sindacadu ‘e sos pentitos,
e non b’hat duda ch’in zertos partidos
dan alabanzia a su terrorismu,
sighende su sistema ‘e su fascismu
ch’hat fatt’eroes sos suos bandidos.
Già da-i como sos ferros iscattan
pro sos chi - mischineddos! -los maltrattan.

SU PROZZESSU A SA SUPERANONIMA
Cussos superbalentes imputados
chi giughen dogni die a prozzessare,
zertu chi non si poden lamentare
d’essere istados pagu fentomados.
In chentu posas sun fotografados,
chi bind’hat finz’e los imbidiare,
pro ch’hana conchistadu, in pompa magna,
s’unore de sos ferros de campagna.
Custos eroes, ch’ignorados fini
finza da-i sa cronaca locale,
oe triunfan in dogni giornale
umpare cun su Paba e cun Pertini.
Deris hapo confusu a Spadolini
cun sa faccia de unu criminale,
abituadu, in sa “cronaca nera”,
a bider solu faccias de galera.
Bidende calchi sequestradore
in fundu a su giornale, ammanettadu,
tue pensas chi l’hapan pubblicadu
pro ponner frenu a tantu disonore,
invece, calchi teracu pastore,
ch’est finza da-i Deu ismentigadu,
pro haer fama de omine duru
intrat in d’una “Anonima” isse puru.
In custos casos, raccontat sa zente,
chi unu teracheddu pagu ‘e bonu,
domandaiat sempre a su padronu
s’in bidda passaiat pro balente.
In bidda, tue, non contas niente,
li rispondiat cuddu, in aspru tonu.
Tando su teracheddu, pro sa fama,
si tuccat e isparat a sa mama.
S’in sa Regione bi suzzedit briga,
o puru àteras cosas pius feas,
pro dare contu de sas Assembleas,
in su giornale iscrien calchi riga.
Ma sos ch’isfruttan sa “Leze Cossiga”
occupan battor paginas intreas,
ca sind’affuttin de sa libertade,
bastat chi tenzan notoriedade.

Finz’in cuss’arte b’est s’inflazione
de sos chi cheren esser fentomados:
zertos paren bandidos diventados
apposta pro sa televisione,
poi chi che los zaccan in presone,
in-d-un’albergo si cren alloggiados,
e dian cherrer calchi segnorina
pro lis passare sa man’in s’ischina.
Su ch’hat lucradu calchi miliardu
da-i s’industria ‘e su sequestru,
bragosu, ammanettadu, a passu lestru,
paret chi giutat unu pramm’e lardu,
dende s’ispuntu a su cronista sardu
pro render pubblicu ogni sou estru.
E si comente totu faghet brou,
s’istampa est tota canta a contu sou.
Ma, dende risonanzia de badas
a bermes chi de fama sun in gana,
oe, s’istampa quotidiana
est diventada romanzu a puntadas,
caus’e tantas mentes traviadas
chi buffan abba in simile funtana.
Prozzessend’una banda ‘e criminales
diventan personaggios teatrales.

S’ASSENTEISMU CRIMINALIZADU
S’assenteismu est diventadu viziu
in s’impiegu pubblicu, a usura,
ecco chi tando, sa magistradura,
leat su postu de su cabuffiziu.
Ma si s’assenteismu est immorale,
non creo mancu giusta sa pedina
chi su Regulamentu ‘e disciplina
lu surroghet su Codice Penale.
Pro dogn’assenzia ingiustificada
bi est sa multa o sa suspensione,
però non mai sa reclusione,
ch’in casu de reatu est cuntemplada.
Non s’improvvisat autoritariu
unu Guvernu de podere brivu,
ponzende su podere Esecutivu
sutta s’iscettru ‘e su Giudiziariu.
In-d-un’Istadu bene organizzadu
dogni Podere hat una funzione,
ed est signale de confusione
si unu est da un’ateru usurpadu.
Poi de su podere Clericale
hamus connotu su Totalitariu;
com’est de turnu su Giudiziariu,
tot’a colpos de Codice Penale.
Esisitit unu titulu prezisu
ed est “assenzia ingiustificada”
però non devet esser travisada
in “truffa” bell’e bona a s’improvvisu.
A chie mancat in cussa manera
- si su superiore no est zegu -
li poden fagher perder s’impiegu,
ma non mai ficchìrelu in galera.
Ca pratichende cussa sanzione
su circulu diventat quadratu:
sun depenalizzende su “reatu”
e penalizzan cussa “infrazione”!
Gai, sas zellas de sos criminales,
las deven destinare a sos mandrones:
sos “pentidos” isgombran sas presones
e las pienan de iscritturales.

Custa fazzenda ‘e sos assenteistas,
a parrer meu, no est tantu giara,
ch’in Bad’e Carros e in s’Asinara
b’hapat mandrones e non terroristas.
Non meritat, su populu zivile,
una Giustiscia gai cunzebida:
chi liberet sa belva inferozida
e inserret sa bestia ‘e cortile.
Sa Giustiscia perfetta est utopia,
ma de mezoru non dat signu ancora,
s’in s’istrage de Brescia est perdidora
e s’interessat de sa mandronia.
S’assenteismu de sos istatales
cun s’Istadu Giuridicu lu frenas,
senz’isprecare zellas e cadenas,
ne perder tempus in sos Tribunales.

SU PIANETA PAGHE
Sas columbas de dogni nazione
totue porrin messaggios de paghe.
Nemmancu sas berveghes in s’umbraghe
pius no timen lupu ne mazzone;
finzas in sa foresta, su leone,
regnat cun coro modde che ambaghe.
Totu alimentan custu sacru fogu
cun lumeras de paghe in dogni logu.
Tantu s’umanidade nd’est cunvinta,
de viver in su mundu in paghe santa,
chi, a partire da-i su baranta,
de gherras nd’hana fattu chentutrinta!
Ma totu sos Istados faghen finta
chi sa zent’est in paghe tota canta,
e chi sos mostros de sa gherra fini
solu Hitler cun Franco e Mussolini.
Sas marcias de sa Paghe sun de moda,
finz’in su bar su tema est attuale:
faeddende de paghe mondiale
iscolan grappas e Campari-soda.
Ma s’a calcunu li girat sa roda,
si tiran de pistola o de pugnale.
Innant’invocan paghe in sas istradas,
poi giogan s’amigu a istoccadas.
Si pretendet chi ponzat raighinas
s’àrvure de sa paghe in dogn’Istadu,
però, in su matessi frabbicadu,
si nde tiran sos pilos tra bighinas.
Zertos maridos ch’han sas concubinas,
zertas muzeres ch’han s’innamoradu,
sa paghe tra Istados han a coro,
però non tenen paghe in dom’issoro.
Send’in cunvegnos de paghe impignados,
aumentan sas bases militares;
non poden bider samben da-i nares,
però t’aggredin cun carros armados.
Paret chi si cumporten, sos Istados,
che zertas pagu serias comares,
chi, finghende pacificos sentidos,
si furan pari-pari sos maridos.

Sa paghe vera est unu sentimentu
chi troppa zente lu leat a giogu,
innanti fit su “perigulu grogu”
forte de brazzos e de armamentu,
ma como, in cale si siat momentu,
b’hat una gherra in attu in calchi logu,
e ‘ue sun de gherra a sa vizìlia
non tenen paghe nemmancu in famìlia.
Non mancat mai calchi “colonellu”
ch’est meledende calchi colp’e manu;
su cabu Russu cun s’Americanu
giughen sa bomba sutta su cappellu;
su Paba faghet a sa paghe appellu,
eppuru brigan finza in Vaticanu
e tota ipocrisia est sa prommissa,
cando s’istringhen sa man’in sa missa.
Cristos batteit sa paghe a sa terra
pro omines de bona volontade
ma redenta non s’est s’umanidade,
ca una bona parte est sempr’in gherra.
Ma s’in su mundu non ch’hat cuntierra
e no esistit sa disamistade,
m’ischides narrer cando sun cuntentos
sos negusciantes de sos armamentos?!

PRIMOS ATTORES
Su ch’hat manias de protagonismu
con cabet in ruolu segundariu,
e ti l’agatas sempre in su binariu
chi conduit derettu a su divismu,
pro diventare oggettu ‘e fanatismu,
che sant’in bida, postu in calendariu,
ca, segund’isse, est a li fagher tortu
su lu santificare a pustis mortu.
Isse presumit - si est iscrianu -
de fagher una noa Apocalisse,
e s’est soldadu si creet Ulisse,
cando li ponen un’ispada in manu;
est che puddu chi cantat su manzanu
chi creet chi su sole ‘essat pro isse.
Ma pro ezzessu de ambizione
restat futtidu che Napuleone.
S’omine chi persighit sa chimera
d’esser protagonista a dogni costu,
pro sa libidin’e su primu postu
s’agganzat a sa lòriga ‘e s’aera;
recurret finz’a sa alas de chera,
s’a bolare che Icaru est dispostu,
ma non pensat - de cantu est ispavaldu -
chi sa chera si solvet a su caldu.
Bi cheret sempre su talentu adattu
finza pro fagher truddas e tazeris,
ma zertos faghen milli mestieris
senza nde fagher unu bene fattu,
e cand’agatan cliente distrattu
s’ispazzan finza pro inzenieris.
Ma pagu creditu hat su faularzu
ca s’alga finit in su muntonarzu
Protagonista veru e rispettadu
est unu prim’attore in d’un’iscena,
ca tenet connoschenzia piena
de s’arte sua ch’hat ben’imparadu.
Ma su protagonista isbentiadu
est su chi cheret fagher s’arte anzena,
e isculittat che una bagassa
si s’istampa li faghet de grancassa.

B’hat finza padres e peidros dottos
ch’iscunfinan in partes differentes
e sun che pedrusìmula presentes
in palcos, in tivù e in salottos:
sun cantantes, attores, polizzottos,
politicantes, magos, consulentes.
No esistit cummedia mundana
senza primos attores in suttana.
Finz’in su camp’e sa delinquenzia
non mancat mai calchi debuttante,
chi chircat de si render importante
fatend’a sos attores cuncurrenzia.
Como non b’hat peruna differenzia
tra prozzessu e cummedia brillante:
sos criminales, salvu calch’ostàculu,
dan in dogn’udienzia ispettàculu.
Su prim’attore, pesante che trae,
chi andat de prestigiu a cazza manna,
si li serrades in faccia sa gianna,
che passat finz’in s’istampa ‘e sa giae;
in primu postu piumbat che ae
che chi giuterat pìbere in sa canna.
Mai connotu peus facc’e sola
de sos eternos “primos de iscola”.

SARDORUM REGRESSIO
Finza su sole, isfortunada Mama,
basend’a tie generat discordia;
mancu dispostu a sa misericordia,
su Divinu Pastore, est pro cust’ama,
ch’hat solu brama - de dies serenas,
pro godimentu ‘e suerados fruttos
e de mirare cun ojos asciuttos
sas tuas birdes campagnas amenas.
Finza sas benas - ch’in tempos antigos
abbundaian de limpidas abbas,
sun minettende chi sa vid’accabbas
in arsuras cun pàsculos e trigos.
Sos inimigos - ch’allattas in sinu,
ch’han pro ameddu suridos istranzos,
sos sempre pius miseros balanzos
ti che furan, lassénded’in affinu.
Tristu destinu - ‘e Mama generosa,
ch’hat sempre dadu ma mai hat rezzidu;
in zizzania solu hat progredìdu,
ma de sanos guvernos bisonzosa.
S’unica cosa - inue has su primadu
est in sa morte pro talassemia,
ch’est cumbattende su populu ebbia,
bida sa latitanzia ‘e s’Istadu.
Solu occupadu - t’hat militarmente,
ca de sa Nato ses piattaforte,
inue tantos ordinzos de morte
sun suffoghende sa vid’a sa zente.
De s’Occidente - ses su terzu mundu
ma pronta a diventare su quartu,
tra palpitaziones de infartu
cun sas proas de gherra tot’in tundu.
Colas a fundu - calchi die-a piccu,
che nave in altu mare bombardada.
Mezus ispera pro fizos non b’hada
cand’una mama hat su cabiju siccu.
Senza s’afficcu-de perunu aggiudu
- salvu su chi ti dan pro calch’imbrogliu -
lassan sos sardos custu nudu iscogliu,
ch’est diventende sempre pius nudu.

Ma su revudu - de s’atera ispunda
nde fùrriat su mare in custa terra:
camorra, mafia, cungegnos de gherra,
rendende vana ogn’opera fecunda.
Che moribunda - pizzinna, in su bànzigu,
forsi ninnadu t’han alas de morte
già chi tantu contraria est sa sorte,
chi finza s’abe ti dat mele rànzigu.

IS CRISIS REGIONALIS
Candu guvernat sa genti testarda
mal’est s’istadi e peus est s’ierru:
depit essi’ istetiu Luzzifferru
a imbentai sa Regioni Sarda.
Campat, in sa Regioni, parassita,
troppu genti toccad’a bent’e sobi,
funti coment’e piccioccus de crobi,
sempri certendi senza sci’ poita.
Unu guvernu durat cincu disi,
pustis senza guvernu torra seus,
naraimì ita ndi fadeus
de un’esecutivu sempr’in crisi.
Est una rissa, sa discussioni,
funti sempri coment’e cani e gattu
e tenint unu scorriu fattu-fattu
(ma sempri po su ben’e sa Regioni).
A parti su no sciri amministrai,
custus politicantis de...strapazzu,
creint chi po essir’in palazzu
bastat scetti chi scipianta certai.
E po cumbatti, mellus s’inimigu,
un’àturu sistema hant iscobertu:
faint dognia dì iscol’e certu
in domu insoro, anant’a su sprigu.
Po mantenni’ su tronu in cussa reggia
dognunu tenit su sù segretu
e po boicottai unu decretu
s’esercitant a fai faccia leggia.
Ma oramai già ddu sci’ dognunu
de comenti dda pensat cussa genti:
“Si non faint a mei Presidenti,
porcu Giuda, non faint a nisciunu”.
Totu si ‘ollint a cuadd’e punta,
cuss’est s’iscopu ‘e s’insoru politica,
rendendi sa Regioni paralitica,
senz’unu Presidenti e senza Giunta.
Cand’arrennescint a ndi fai’ una
est sempiri una Giunta scorriada.
Non binti s’ora d’essiri sciusciada
po torrai a tentai sa fortuna.

E aici tiraus a campai:
cun meda crisis e operas pagas;
funt’ancora lingendisì is liagas
però pensendi torra a s’atripai.
Si passaus is crisis in rassigna,
dognuna tenit una scusa bona...
Lollotta puru hat fattu sa “Battona”
cun sa scus’e sarvai sa Sardigna!

PROITE POESIA?
A boltas mi domando deo puru:
“proite serviti custa Poesia?
in d’unu mundu sempr’in tribulia
cun drogas, terrorismu e tempus duru?”
Poi penso chi forsi, in tant’iscuru,
est s’unica lumera ancora ‘ia.
Sa Poesia est donu universale
ed-est, comente s’anima, immortale.
Est Poesia dogni cosa bella
chi hat criadu s’Eternu Fattore.
Finzas in sos puzones in amore
est Poesia s’insoro favella;
coment’est Poesia ogni modella
chi realizat s’estru ‘e su pintore.
Est totu Poesia, a parrer meu,
cuddu chi dat a s’anima recreu.
Subra s’antigu naschet su modernu,
ca dogni cos’a su tempus s’adattat,
ma, a dispett’e chie la maltrattat,
sa Poesia vivet in eternu,
ca Poesia est s’istintu maternu
de ogni mama chi su fizu allattat.
Sa Poesia in dogni criatura,
est linfa incorporada in sa natura.
Sas chi recrean s’ispiritu umanu
non sunu solu sas antologias:
anzis, sas pius bellas poesias,
las cantat sa natura in su ‘eranu.
Godéndedi un’isplendidu manzanu,
senza chi versos leggias ne iscrias,
sias duttore o puru analfabeta,
non faghes Poesia e ses poeta.
In su profumu de ogni fiore
b’hat una Poesia a su criadu.
Proite Poesia? Est prestu nadu:
ca senza Poesia est nieddore.
Si non b’est Issa non b’hat mancu amore,
ne veru sentimentu dilicadu.
Cun Issa podes narrer ch’has s’essenzia
chi dat gust’e calore a s’esistenzia.

Sa Poesia, amigos, favoride,
libera sempre, mai suttammissa.
Finz’in su Sacrifiziu ‘e sa Missa
b’hat Poesia mistica, creide!
Azardo narrer chi, poi ‘e sa Fide,
umpare a sos affettos benit Issa.
Preghemus ch’in perfetta sintonia
regnet paghe, amore e... Poesia!

BENEITTA GIOVENTUDE!
Gioventude! Beranu de sa vida,
proite cun sa droga t’avvelenas,
sighende vanas chimeras terrenas
chi sun flagellos pro s’umanidade?
ne in piuer, sa felizidade,
ne in fiala est mai esistida.
Ah! si podia torrar’a s’edade
de sa cale non ses tue cuntenta!
ti dia giugher deo a manu tenta
a t’insinzare inu’est su tesoro
chi de isperas pienat su coro,
si nde lucrat cun sensu ‘e onestade.
Zertu, si sognas paradisos d’oro,
custa vida ti paret un’inferru;
intro su coro t’intendes s’ijerru
e tot’in giru ti riet beranu.
Ti crees malaidu sende sanu
e pro cura ti dan acidu e cloro.
Non cunfides in s’assassina manu,
chi pro s’irricchir’issa ‘occhit a tie,
ca rughes primadias dogni die
est semenende in dogni latitudine,
e non ti lassat perder s’abitudine
cando ses diventadu fittianu.
Restas tra su marteddu e-i s’incudine,
si t’avventuras intro cussu giru:
su trafficant’e droga est che vampiru
chi si nutrit de sambene innozente.
Si t’isganzas ti ‘occhit prontamente
ca cumprommittis sa sua attitudine.
O gioventude cara! tene a mente
chi Paradisu in terra no nd’esistit.
esser felize in sa vida cunsistit
in fagher Bene, ca Bene ti rendet,
ma chie drogas comporat e bendet
male campat e morit malamente.

IN SU SOGNU CUN TIU ANZELEDDU
Caru Ti’ Anzeleddu! in su disizu
de Bos bider in sognu sempre fia,
pro discurrer ancora ‘e poesia,
intimamente, che tra babbu e fizu.
E istanotte, pro fortuna mia,
ecco chi semus sezzidos umpare
in s’ispunda de custu immensu mare,
cun sa luna ispuntende in Sant’Elia.
Ite cherides a Bos raccontare?
Si Bos est grata cust’orfana Ischiglia?
Eppuru, non Bos fettat meraviglia,
ma dogni die Bos det fentomare.
Nois, pro passione (e pro puntiglia).
la difendimus da-e dogn’attaccu
(in su mundu ch’at sempre calchi maccu
in chirca ‘e attaccare una Bastiglia).
Si tenimus poetas? Si, perbaccu!
sos poetas sun sempre in aumentu:
naschen che cugumeddu ogni mamentu,
in-d-unu sinnu est pienu su saccu.
Su problema est un’àteru argumentu:
si calchi ‘olta tenimus intoppu
est cando sos istranzos sunu troppu
e non bi caben totu in s’appusentu.
Calcunu, poi, arrivit a galoppu
e cheret precedenzia assoluta.
Si lu pregamus: “isetta un’iscutta”
tando pistat sos pes a chi ‘est toppu.
Calch’àteru ‘enit puru in “gran tenuta”
cun medaglias de oro in sa pettorra,
chi toccat terra grascia a sa zavorra,
ma però de ‘olare est sempr’in muta.
De ozu sempr’est piena sa giorra,
solu chi cheret lassadu pasare
e poi umpidu senza morigare,
sinò sa funduluza nd’asciat torra.
Duncas, poetas nd’hamus pro nde dare:
semus pius de unu milione!
Anzis, si hazis calchi occasione,
Ti’ Anzelè, benide a nde leare!

Però non lèdas da-e su muntone,
regoglide s’ispiga coizada,
sa ch’est in sos mannujos assentada
servit pro sèmene e nutrizione.
Si sa produzione est seberada,
“ s’Ischiglia “ ‘Ostra est pius prestigiosa.
ma faghid’Ois puru calchi cosa
Ti’ Anzelè,...a su mancu un’ojada!
Pro esser sempre pius decorosa,
sos poetas chi tenen cuss’impreu,
s’iscola Ostra pratichen arreu
fattend’unore a poesia e prosa.
Pro haer un’Ischiglia senza neu,
sian sos mezus a intrare in raglia,
e... si tenimus poetas de vaglia,
ch’issos non l’iscan, pro s’amor’e Deu!
Sinò cheren luego una medaglia!.

A SOS FRANCOS RIMAJOLOS
Lassare incensurados non podia
zertos indeosados de sa rima,
chi senza metro, ne raspa, ne lima,
s’avventuran a fagher poesia,
e cuncentrados in sa rima ebbia,
su ‘e iscrier poi iscrien prima,
cun sillabas giobadas acchibboe:
a boltas treighi e a boltas noe.
E de cussos poetas rimajolos
chi no han ne orija e ne sustanzia,
in Sardigna che nd’hat in abbundanzia,
e che musc’a sa saba ‘enin a bolos,
fattende su ‘estire a chirriolos
a chie non lis dat tant’importanzia.
E naran - unifiados pro s’affrontu -
“Oe sa rima no est tent’in contu”.
Ti faghen un’ottava inciappuzzada
chi paret minestrone senza sale;
duncas, sa rima tradizionale,
sun issos sos chi l’han assassinada.
Pro gulp’insoro com’est arrumbada
in s’ultimu chizolu culturale,
e pius passat in manos insoro,
pius ancora perdet in decoro.
Chi leat in manu una resorza
est bisonzu chi l’iscat manizare,
non che unu ch’andeit a messare
- giut’a fentomu in tota sa cussorza -
chi, pagu pratigu ‘e sa messadorza,
si nde segheit sa punt’e su nare.
Cand’impittada male est un’aìna
bessit istroppiada sa faìna.
Sos poetas imbruttan sos pabilos
s’in conc’han solu rima e non bideas:
s’idizis cantas nde rezzimus feas
bos bettaizis sas manos a pilos.
Unu nd’hat imbiadu chimbe chilos,
chi pro las legger sun veras peleas.
Pensade, invec’e “totu” iscrien “nudda”
tantu pro fagher rima cun chibudda.

Zertos unos pianghen in latinu,
pro chi s’opera siat pubblicada;
àteros faghen sa raccumandada,
timende chi si perdat in caminu,
o ch’andet a finire in su cestinu
e nos neghemus chi est arrivada.
Totu trassas chi usan pro iscaza
sos mazzones chi han sa coa ‘e paza.
Hat nadu, calchi limba malaitta,
ch’in s’Ischiglia sun sempre sos matessis.
Si haer roba ‘ona non resessis
non la podes mandare senz’iscritta;
cand’has istrazzulada una berritta,
cun sa pius dezente in giru ‘essis.
De s’Ischiglia no est in su costùmene
ponner paza pro fagher bamballùmene.
B’est finza chie si faghet protegger
pro intrar’in s’ispaziu tirannu,
e deves fagher un’isforzu mannu,
cand’est iscritta a manu, pro la legger.
Zertas nemmancu si poden curregger
de cantu irreparabil’est su dannu,
ma, si comente si cren totu mastros,
naran chi faghes fizos e fizastros.

PRO SAS FILIPPICAS IN RIMA
Sa critica a sos francos rimajolos
zertos unos l’han male interpretada:
creen ch’hamus sa rima accantonada
pro bi fagher sa nappa sos ranzolos
e si cren paladinos issos solos
de sa sarda poetica rimada.
S’ISCHIGLIA la preferit - si b’hat suzzu -
amat sa rima ma non s’inciappuzzu.
Chie travisat su meu argumentu
est de solitu calch’inciappuzzeri,
chi cheret fagher su carabineri
ma non rispettat su regulamentu,
e m’accusat de altu traimentu
pur’essende de rimas dispenseri.
Gai pur’in Assise sun fattende:
sos reos si difenden accusende.
Si l’han cumpreu, su disizu meu
est ch’iscriat in rima ogni poeta,
o litteradu o mesu analfabeta,
ma ‘oghet versos in grascia ‘e Deu!
Non naro de non b’haer calchi neu,
ma no isgarret da-e s’A a sa zeta,
dend’a s’endecasillabu sa neghe
ca poddighes nde giughet solu deghe.
Cumponen male sos versos in sardu
cussos ch’a mente no ischin contare,
ma si dezidan nessi a comporare
calchi pallottoleri de bigliardu.
Deo puru, chi so mesu testardu,
cun pedrighinas chirco ‘e m’arrangiare.
Ma unu devet esser troppu tontu
a perder de sas sillabas su contu.
Su rimajolu, postu a sas istrintas,
murrunzat contr’a sos versos isoltos.
Ma cussos sun problemas già risoltos
inue rezzin modernas ispintas
(mancar’igue puru perlas fintas
ispazzen sos ch’han fama d’esser coltos).
Ma chie de su non est inimigu
no arruinet su modellu antigu.

A sos “Poetas” fato sa proposta
d’enner a legger in Redazione
sa calidad’e sa produzione
de sos ch’han dad’insolente risposta.
Dogn’arrogante - paret fatt’apposta -
apende tortu cheret sa rejone,
e hat sa faccia de si dispiàghere
si s’art’anzena no est bon’a fàghere.
Su runzinu ch’iscartan in fiera
si mesurat a fagher s’istallone,
e si coment’hat calchi caizone,
non bàliat ne sedda e ne groppera;
a calches bocchit sa musca in s’aera
si l’arrumbas istanga ‘e carrettone.
S’omine puru a malu puntu t’àttidi
cando l’abbruncas sos males chi pàtidi.
Ancora troppu zente hat s’abitudine
de trascurare istile e calidade,
ma oe in die, in dogn’attividade,
si brujat chie no hat attitudine.
Non bastat haer martedd’e incudine
si non b’hat arte ne capazidade.
Invece de s’isterile filippica,
lasset sa rima e si diat a s’ippica!

DISASTROS E ISTANGADAS
Custu Guvernu, appenas partoridu,
bestid’ancora de pilos bastardos,
hat fatt’ischire senza riguardos
sa trista eredidade chi hat rezzidu:
su grave disavanzu incangrenidu
de chentutrinta miza miliardos.
Ma su chi servit subitu est niente:
baranta miza a tamburu battente.
Dogni Guvernu nos hat informadu
de disavanzos sempr’in aumentu,
però mai nisciunu a didu tentu
nos segnalat sos ladros ch’han furadu.
Guvernu ladru est sempre su passadu,
su nou est giustu a su chentu pro chentu.
Sos disavanzos sun sempre connotos,
però pro manu de ladros ignotos.
Sun cuddos malos guvernos passados
sa causa de totu sos disastros;
sos chi guvernan como sunu mastros,
sos ateros fin totu improvvisados,
mentres a su mortorzu arrodiados
sun sempre sos matessis abilastros.
Ma bastat cambiare ministeriu
chi dogn’iscreditadu torrat seriu.
Guvernu nou? Disavanzu nou!
Cust’est sempre sa solita cantone,
cun su solit’appellu a Pantalone
ch’istringat sa chintorza a chintu sou.
Gai, sempr’aggiunghende abb’a su brou,
fin’a chel’astenare su runzone.
Mudat Guvernu e, grascias a Deus,
su disavanzu est da-e mal’in peus.
Sos demagogos campan preighende
chi terminadas sun sas baccas rassas.
Eppuru, custos fizos de bagassas,
l’ischin chi Pantalone est dejunende
da-e cando li sunu trasformende
in “balzellos” borbonicos sas tassas.
Preigan “taglios” e curas urgentes
ma fattende s’ojttu a sos clientes.

De sos ammancos nisciunu nd’hat neghe
ne direttores e ne guvernantes;
paret chi totu sian ignorantes
e no iscan contare fin’a deghe,
e pagat sempre su populu - ‘arveghe
sa bancarotta ‘e totu sos birbantes,
chi sin reparan da ogni ruina
sutta s’ala ‘e s’America Latina.
Su populu lu faghen a bisera
senza li dar’ispiegazione.
Sa causa de s’alta inflazione
naran ch’est maladia istraniera.
Sos ch’han amministradu a sa lezera,
hapende tortu si faghen rejone
e gira-gira sa neghe la lampan
a sos ch’in pensione a longu campan.
Antizipadu han sas eleziones
brujende miliardos a usura,
ca su Guvernu un’istangada dura
nachi teniat in previsiones.
Ma como, senza tantas chistiones,
custu nos faghet a suppressadura,
a dann’e beffe de chie no hada
mancu s’isfogu ‘e custa Correddada.

IN MANU ANZENA
Dogni populu tenet un’istoria
chi est s’ispiju ‘e su sou carattere.
B’est su chi tenet s’istintu ‘e cumbattere
e gherrat pro conchista o vanagloria.
Su Sardu, da-e punica memoria,
chircat sa libertade in man’ ‘e atere
e pro isolver sa sua cadena
giamat sempre s’aggiudu ‘e zent’anzena.
Oe, fideles a s’antiga immagine,
Amsicoras novellos nachi han bidu
fattende zinnu a s’africanu lidu
(ma est ancora segreta s’indagine)
invochende sas armas de Cartagine
cun d’un’ateru Asdrubale Ispilidu.
Duncas, s’amparu de punicas manos
servit ancora contr’a sos Romanos.
Custu macchine ‘e s’esterofilia
est pecca de sa nostra eredidade:
sos sardos, cando chircan libertade,
cambian solu tipu ‘e tirannia.
Bidides, finza s’Autonomia
giughet s’impronta ‘e sa romanidade,
ma mal’e peus est, segundu me,
giamare un’africanu a Vicerè.
E non nos servit mancu ‘e lezione
s’isperimentu de sos Giudicados,
chi sende da-e sardos guvernados
haian dignidad’ ‘e nazione.
Ma poi, cussu maccu ‘e Barisone,
a Genova los hat ipotecados,
finas chi sa Sardigna l’han divisa
a mes’a pare tra Genova e Pisa.
Sende regnante Ugone in Arborea,
no essende cun Pisa in muta ‘ona,
s’affiancat a Giagu ‘e Aragona,
chi s’impossessat de s’Isula intrea.
e pro cumpensu ‘e sa brillante idea
rezzit su fèudu ‘e sa sua zona.
Poi d’esser pisana e genovesa
diventat, sa Sardigna, aragonesa.

E oe puru, pro mala fortuna,
hamus ancora sardos in martucca,
chi dogni ‘olta ch’abberin sa ‘ucca
che catteddos appeddan a sa luna,
isettende chi brotet tot’in d’una
su “Regnu Sardu”, che semen’ ‘e zucca,
cun sa brama de ponner man’in pasta
e de lu poder poi ‘ender a s’asta.
In dogni tempus, de zent’intrigante
bi nde pioet in dogni partidu,
che muzere ch’istufa ‘e su maridu
si ch’imbolat in brazzos de s’amante.
Ma prestu, sicomente est incostante,
s’avviat pro chircare àteru nidu
e dada s’attributu ‘e “Libertade”
a sos passazos de propiedade.
Si calchi Pancho Villa improvvisadu
tentat de fagher rivoluzione,
s’ismentigat s’antiga lezione
de sos chi prim’ ‘e isse b’han proadu.
Guidare sa sort’ ‘e un’Istadu
no est a guidare unu furgone.
Su sordadu non lograt s’ideale
ponzéndesi sa greca ‘e Generale.

SU NEGUSCIU ‘E SOS CONDONOS
Dadu chi como s’abusu est legale,
pro chie hat capitale in possidenzia,
e-i s’Istadu endet s’indulgenzia
cun s’antigu sistema clericale,
bisonzat chi su codice penale
siat modificadu de urgenzia.
No est pius un’Istadu ‘e dirittu
si non rispettat su chi b’est iscrittu.
Si si cundonat su propietariu
ch’hat cummittìdu un’abusu ediliziu,
accabbat chi non giaman in giudiziu
ne truffadore ne inzendiariu.
e gai nessi s’arricchit s’erariu
cun su sistema pius redditiziu.
Ma restan a marzire in sas presones
solu nullatenentes istrazzones.
Ma cun su votu de sos Senadores
paret chi b’hapat faladu un tronu,
boccende su decretu ‘e su condonu
a opera ‘e sos francos tiradores,
e pro s’abusivismu sun dolores,
ca est unu reatu bellu e bonu.
Sos proponentes finza imbrossinados
nachi si sun che àinos muscados.
A parrer meu, però, li meressit
a su Guvernu ‘e coalizione.
chi hat propostu s’assoluzione
de chie, reu, a pagare resessit:
gai su riccu liberu ndi ‘essit
mentres su pover’intrat in presone.
Su populu ischit como in cale pista
si movet sa giustiscia socialista.
Dogni tantu minetan sa cundanna
de riccos evasores faularzos,
ma est solu prommissa ‘e molinarzos
chi chircan senza meritu un’osanna.
Naran chi sun andende a cazza manna
e poi isparan a sos furferarzos.
S’intenzione insoro no est cussa
de cherrer istanare fera russa.

Custu Guvernu, non fettat ispantu,
si legalizat sa venalidade:
est in istadu de nezzessidade
e a su reu li narat, intantu:
“Ses for’ ‘e leze, ma si mi das tantu,
ti perdon’e ti lasso in libertade”.
Chi’ hat “finanza”, senza tantu zelu,
ottenit grascias in terr’e in chelu.

S’EVASORE E-I SU FISCU
Non balet de su fiscu su rigore
contr’a sos ladros evasores suos,
però pro me sun ladros ambos duos,
tantu su fiscu che-i s’evasore:
de su contribuente pagadore
a chi ’andat s’incasciu, a sos concluos?
Non zertu a sos servizios sociales,
ma si lu partin canes e mannales.
Sa zente si domandat sa rejone
de tantos miliardos isbaidos,
e de sos ispidales costruidos
ch’imbezzan senz’intrare in funzione.
Ma Comunes, Provinzia e Regione
sun ermeticos, surdos e sizidos,
ca segundu s’insoro faccia tosta
su populu non meritat risposta.
S’est in ruina sa pubblica ispesa,
su motivu si podet intuire:
faghen un’ispidale costruire
pro ingrassare cudda tal’impresa,
ma invec’ ‘e l’abberrer in lestresa,
b’est sa mafia pronta a l’impedire,
ca cantu pius bòidu lu lassan
tantu pius sas clinicas ingrassan.
Zertu chi mafiosos, camorristas
nd’hamus in dogni pija ‘e s’Istivale,
e giogan cun su codice penale
a us’ ‘e boccia, che-i sos tennistas.
Però, de totu cussos disfattistas,
nade, cal’est su pius criminale?
Chie sos benes pubblicos isbàidi
o chie a sos tributos si sottràidi?
Chi totos duos sun de cundannare
podimus dare giudisciu prezisu,
ma bos cunfesso chi so indezisu
cal’est su primu de ch’ ‘ettar’in mare.
Però sos ch’hamus postu a guvernare
s’inserran in s’insoro paradisu;
in ateru pensende, non si curan
ne d’evasores ne de sos chi furan.

Sos ch’amministran non cheren cumprèndere
chi su sistema insoro est cundannadu:
creen chi totu su ch’han incasciadu,
o bene o male, lu deven ispèndere.
A nois, poi, nos dan a intèndere
chi sanan sa Finanzia ‘e s’Istadu.
Ma già l’ischimus chi su ch’han in coro
est s’interessu ‘e s’animaccia insoro.

SA MARCIA DE SU DISISPERU
In cussa dura, zivile protesta
da-e sos ogliastrinos posta in attu,
totu sos sardos lis han postu in fattu
cun parrocos e sindigos in testa.
In dogni logu lis han fattu festa.
cumbintos chi fit s’ora ‘e su riscattu.
Cun issos sun ‘istadas solidales
totu sas cumponentes sociales.
Coment’e ch’hapat falad’unu raju
subra su seculare muraglione,
sos sardos agatadu han s’unione
in cussa marcia ‘e su mes’ ‘e maju,
da-e su pius umile operaju
fin’a su Presidente ‘e sa Regione.
Zente chi s’iscanneit tota vida,
reclamende trabagliu s’est unida.
Sa massa, gai varia e cumpatta,
creo chi forsi mai si fit bida.
Pariat tota s’Italia unida,
cun Craxi e cun Pertini in sa piatta,
in sa protesta fit sa zent’attatta
assoziad’a sa zente famida,
tantu chi m’agatei domandende:
“ma custos, contr’a chie sun gherrende?”.
Fit coment’e a bider un’Armada
cun bandelas de dogni nazione,
chi est pront’a intrare in azione
ma però avversarios non b’hada,
già chi sa parte avversa s’est misciada
a sa chi fit in agitazione.
Gai dogni battaglia andat a monte
cando non b’hat inimigos de fronte.
S’animale politicu modernu
si presentat in best’ ‘e protettore,
e-i sa gulp’ ‘e ogni marigore
paret chi l’hapat su babbu eternu.
Cando protestas contr’a su Guvernu
sos ministros ti ‘enin in favore,
tant’ischin chi non cambiat niente
fattende fess’e cuntenta sa zente.

Intantu zessan totu sos furores
poi chi s’est dogn’animu isfrittadu,
e de sa sorte ‘e su disoccupadu
s’ismentigan sos santos protettores,
cun su disgustu de sos marciadores
ch’invanu sas iscarpas hat frazadu.
Su diciu antigu torrat sempr’a prou:
“Sutta su sole niente de nou”.

CHE BOE TROBEIDU
Sa carcerazione preventiva
- sa beffe pius manna italiana -
est ludu chi buluzat sa funtana
de sa nostra Giustiscia positiva
ca, sende senza proas punitiva,
no hat bisura de giustiscia umana.
Est una leze barbara, oppressora
chi chissà cantu hat a durare ancora.
Si calchi guvernante, pro indiziu,
in galera finiat innozzente,
forsi diat pensare a canta zente
b’hat in preson’in attes’ ‘e giudiziu,
pro gulp’ ‘e unu pubblicu serviziu
ch’in lestresa non brillat pro niente,
da una dura leze abbilandradu
che boe, trobeidu e aschiladu.
Però ministros e parlamentares,
pro difender s’insoro libertade,
asseguradu s’han s’immunidade
e gai si proteggin tra compares
(ca sun diversos, cussos esemplares,
da-e su restu de s’umanidade).
S’in presone s’amigu han da-i ora,
lu faghen deputadu e nd’essit fora.
Ma totu sos lamentos sunu vanos
pro cuddos chi non tenen part’in corte
e ch’augùran sa matessi sorte
a sos chi si nde sàmunan sas manos.
Poveros innozzentes cristianos!
chi si non tenen Fide e coro forte,
pro sa Giustiscia senza cunsideru,
morin de crebacoro e disisperu.
Sos nostros infallibiles “solones”
medas boltas murrunzan indignados,
critichende sos àteros istados
ca penalizzan sas opiniones,
e inoghe pienan sas presones
de zittadinos senza prozzessados.
Brujadu han s’odiosa dittatura
lassend’in pe’ sa barbara tortura.

Bidende sa Giustiscia in cussos pannos
nos domandamus si cust’est “Progressu”,
fagher penare che reu-cunfessu
un’innozzente, a pius de sos dannos,
lassendel’in presone annos e annos
prima de l’istruire un prozzessu.
Sa pen’ ‘e morte l’han a malu géniu,
ma faghen morrer sa zent’a isténiu.

A SOS CANTADORES DE GARA
Cantadores, custa proa
la devides superare:
chircad’’e bos presentare
cun calchi cantone noa!
In cantones abbundadu
no hazis, che-i sos mannos,
s’in su giru ‘e chimbant’annos
tres solu nd’hazis cantadu:
“Canarinu avventuradu...”
(su vessillu ‘e ogni gherra)
“A disora una chiterra...”
“Torra rundine lontana...”.
O forsi no nd’hazis gana
custa proa ‘e superare?
Cussas tres bellas cantones
- mai cantadas intreas -
como paren finzas feas
poi ‘e tantas istajones.
Sos cantadores mandrones
solu cussas han in laras;
in mesu seculu ‘e garas
totu las han isvilidas
e cheren sostituidas
cun calchi cantone noa.
A propositu de “Nou”
lassade sa oghe anzena,
cantade a boghe piena
dognunu in su traggiu sou.
Sas puddas ch’han fattu s’ou
han su matessi tenore,
però, dogni cantadore,
si distingat da-i tesu.
Non ponzedas ancu in mesu
superade custa proa!
A belvas e a molentes
lassadelos sos acutos,
e cando cantades mutos
sian sempre differentes.
Sos bezzos e iscadentes
est ora ‘e los seppellire;
est tempus de la finire
cun “...los canto generosu”
ca su lardu tusconosu
no est cosa ‘e presentare.
Chircad’e bos presentare
cun calchi cantone noa!

POESIA INCUMPRENSIBILE
Sos disastros non benin mai solos
ca sun finz’in sa Musa accoppiados
da-i cando si sun iscadenados
cuddos ch’ispiccan pindaricos bolos.
A sa zenia de sos “Rimajolos”
si sun aggiuntos cuddos “Invasados”
chi de rappresentare hat sa mania
su color’’e su ‘entu in poesia.
Finz’in sa Musa, che in religione,
b’est su cattolicu e b’est s’ortodossu,
ma zertos tipos s’iscrien addossu
pro ignoranzia o presunzione:
tentan de fagher unu “paragone”
e nde lis bessit unu “paradossu”.
Finzas sa luna, a boltas, restat male
paragonad’a una ranz’ ‘e sale.
In dogni tempus, sa “similitudine”,
han sempr’usadu poetas in gamba;
cando troppu salida e cando bamba,
ma senz’essire fora ‘e latitudine;
com’invece leadu hat s’abitudine
de inventare sa pius istramba.
Su ch’iscrien in suspu pro cumparrer,
manc’issos l’ischin ite cheret narrer.
Su poetar’in suspu dat decoro,
già chi zertas giurias lu pretenden,
ma si comente pagu si nd’intenden,
dan a s’inzertu medaglias de oro.
Sos politicos han su suspu insoro,
però nessi tra issos si cumprenden:
invec’in sos poeticos manizos
non si cumprenden tra babbos e fizos.
De su ch’iscrien in cussa Babele
no nde cumprendet mancu su Pretore:
pro issos finza su tronu hat sabore
e-i sas roccas sun dulches che mele.
Comente faghet a l’esser fidele
s’isposa a unu simile iscrittore,
poi chi l’imbreagat sos cherveddos
cun d’una macedonia ‘e faeddos?

A l’ischire non fimis a-i como
ch’iscriende bi cheret fantasia,
però, cand’est lassada senza ghia,
sa fantasia est sa macca ‘e domo.
Duncas si buffet unu pagu ‘e bromo
chi’est delliriadu in poesia,
fattend’in modu, si tenet carattere,
de si cumprender isse prim’ ‘e atere.
Oe, su poetare ultramodernu,
lu memorizan a us’ ‘e “Robò”
e cun trinta faeddos, si e no,
registrados in d’unu discu internu,
appenas faghen girar’unu pernu
nd’essit sa poesia in “menabò”.
Gai su poetastru, s’est astutu,
binchet su primu premiu assolutu.
A bellos paragones e immagines
no est in mente mia fagher gherra,
ne chelzo mancu intrar’in cuntierra
pro zertos gustos de zertas cumpagines;
cundanno solu sas istupidaggines
chi non rezen in chelu e ne in terra,
ca bisestran sa limba naturale
cun versos in limbazu curiale.

ASSISTENZIA IMMORALE
Pro cumpensare su salariadu
de su chi perdet cun s’inflazione,
in aggiunt’a sa retribuzione
s’Iscala mobile han istudiadu,
e siat generale o appuntadu
esigin sa matessi porzione.
Gai sun a su propiu livellu
su professore umpare a su bidellu.
In custa nostr’amena nazione
si campat in regim’ ‘e assistenzia,
cun salarios senza differenzia
mortifichende sa professione.
Solament’in sa televisione
pro zertas divas faghen preferenzia,
ca mustran, pro fantasticas offertas,
coscias istraccas de istar’abbertas.
No esistit peruna discrescione
pro sa demagogia italiana:
han iscobertu un’atera funtana
chi est sa “Casc’ ‘e integrazione”,
e si comente pagat Pantalone,
durat pro un’eternu fittiana.
Non nego chi calcunu bi remittat,
ma una bona parte nd’approfittat.
E a pius de sos casc’integrados
- ch’a restar’a ispassu sun custrintos -
poi bi sun sos invalidos fintos
ch’a trint’annos sun già pensionados.
Fin sanos, ma si sun raccumandados
e como sun invalidos cunvintos.
Grascias a s’Onorevole Padrinu
sa vid’insoro est in su butteghinu.
Sun che piantas chi non bogan fruttu
zertas frabbicas, prontas a serrare,
ma las faghen sighire a trabagliare
mancari chi non bendan su produttu
(ca sos ch’intr’ ‘e inie han sempre suttu
no est fazil’a nde los istittare).
Fraigan cattedrales in sa rena
ma si rezen in pe’ a malapena.

S’assistenzialismu illimitadu
est su sistema pius indezente,
ca livellende sa vid’a sa zente
dogni valore umanu est sutterradu.
Pro viver totu a gàrrigu ‘e s’istadu
sun iscorzende su contribuente.
Foraggian tantos partidos politicos
ma no assistin bezzos paraliticos.

DELENDA SARDINIA!
Cand’han intesu cuss’ammonimentu:
“Ist’attenta, Sardigna, a su chi faghes!”,
Si sun trémidos finzas sos nuraghes,
su sole s’est cuadu in Gennargentu;
sos masones, a s’ùrulu ‘e su ‘entu
si sun fuidos da-i sos umbraghes.
Totue han minetadu s’isterminiu
sas iras de Ciriacu e Flaminiu.
Sos fogos s’azzendìana de sè
reduende sos buscos in chigina:
da-i Limbara fin’a sa marina
non b’hat restadu unu suerz’in pe’.
In su Palattu de su Vicerè
fit totu su Consizu a iscossina,
bidend’annientada in d’unu sulu
cust’Autonomia ‘e aminculu.
Pro perder calch’iscannu in sa Regione
naschen sas iras pagu cristianas.
Finzas sas minieras sulcitanas
han bombitadu montes de carvone,
pro cuss’istogomosa impressione
ch’han fattu sas filippicas romanas,
paragonende, cun falzas iscujas,
sa zente Sarda a sas brigatas rujas.
Sos Don Rodrigos de tempus modernu
sun sos matessis, devides ischire,
chi pro si cherrer de candor’ ‘estire
iscomodein su Babbu Eternu,
invochend’autonomu guvernu
in Zambia, in Uganda e in Zaìre.
Pro sos Sardos, però, han invocadu
su guvern’autonomu (crastadu).
Sun cristianos, ch’isfiniga-isfiniga,
lean sos Sacramentos pro usanzia
e si mustran devotos cun costanzia
iscultende sa missa sa dominiga,
poi, su lunis, bettan s’iscominiga
a chi ‘affrontat s’insor’arroganzia.
Han trasformadu sa “Democrazia”
- pro us’insoro - in “De-Mitologia”.

Custu populu nostru, disunidu,
ponet fattu a tantos istendardos,
e puntan a diversos traguardos
sos membros ch’hat su populu eligidu:
pensend’a s’interessu ‘e su partidu
lis fuit da-i mente d’esser Sardos.
Su Partidu, però, curat sa runza
inue faghet pius bon’incunza.

AMMENTENDE UNU MASTRU
Mi paret de torrare a cando fia
in s’iscrittura sarda un’iscrianu,
cando pro mastru haia su Decanu
de sa logudoresa poesia,
ch’in fattu de pronunzia e grafia
possediat sos numeros in manu.
Musas sardas l’haian allattadu
e poetend’in sardu est ispiradu.
Contr’a su chi da’ Isse haia appresu
àteros mastros como hapo connotu,
chi sun dissutterrende s’ostrogotu
pro insinzare su logudoresu,
e inferzende su campidanesu
cun ellenicu, turcu e visigotu.
Custa limba, chi fit neo-latina,
paret torrad’a cumassar’in Cina.
Zertos chi oe si reputan mastros,
sun ischentes in best’ ‘e professores,
e che improvvisados istruttores
fattend’iscola provocan disastros.
Poi ch’immuzzurradu han sos ozastros
- cun sa pretesa de inferchidores -
non connoschende su tass’ ‘e s’olia
t’inferchin sos ozastros a tiria.
Pro negh’ ‘e zertas iscolas mezzanas
sun de su sardu fattende masellu.
Presumin de lu fagher pius bellu
cun limbas de origines lontanas:
fenicias, bizantinas, africanas,
cun cappas e tizetas pro puntellu.
Ma cussu sard’insoro est cos’ ‘e rìere:
non l’ischin faeddare e ne iscrìere.
Mastros de Cabesusu e Campidanu
ordinzan dogni tantu unu glossariu,
ma cun pretesas de dizionariu
chi s’affuttit de Porru e de Ispanu!
E gai dogni sardu hat a sa manu
unu testu pro dogni circundariu.
E ba’e chirca, in tota cuss’istula,
s’est mezus su ‘e Bitti o su ‘e Pula.

Dognunu hat unu mastru in custa vida,
deo puru nd’haia un’importante,
e lu cheria vicinu un’istante
intro de calch’iscola “limbicida”,
pro mi dare consizu e pro guida
- coment’hat fattu Virgiliu a Dante -
cando mi naran: “Intra in cust’iscola,
chi t’imparo sa limba Sardinzola!”.

BENE AUGURENDE
Auguramus chi cun s’annu nou
bincat su bene contr’a tantos males.
No esistan sas drogas infernales,
comente no esistit pilu in s’ou.
Sa Giustiscia, cun s’altu iscettru sou,
trunchet sas corruttelas attuales.
In Tribunale peruna madrighe
intacchet s’onestad’ ‘e su zuighe.
De s’onore nde fettan un’altare,
tantu zuighe che accusadore,
e si lis mancat su sensu ‘e s’onore
hapan nessi cherveddu pro pensare
chi s’imputadu podet diventare
unu “pentidu collaboradore”.
Si no est un’istincu ‘e santuariu,
a boltas, est su male nezzessariu.
Cussas chi oe paren utopias,
cras potan dare bonu resultadu,
e tra sos servidores de s’Istadu
non si cuen ignobiles ispias,
ca sun vilesas e traitorias
ch’han mafia e camorra alimentadu,
e non sa tant’abborrida “omertade”
ch’est un’istadu de nezzessidade.
No est giustu trattare in modu duru
sos indifesos già postos in rughe,
si da-i chie dimis bider lughe
semus invece bidende s’iscuru!
Sos pezzos russos, a coro seguru,
pagan sos “Killers” cun crios de nughe.
Ma forsi già movende s’est s’iscola
in su chircare su cab’‘e s’azzola.
Duncas, auguramus chi occannu
accabben custas tempestas de ludu
e chi umpare a su pische minudu
in sa rete bi ruat pische mannu:
pische chi mai hat connoschidu dannu
ca su Podere l’hat fatt’ ‘e iscudu.
Però, sos ch’han sas proas, no isèttene
ch’ ‘enzan de sè sos nodos a su pèttene.

Auguramus chi prima d’ ‘eranu
nos liberemus de custa zavorra
e terrorismu, mafia e camorra
siat ebbia un’ammentu lontanu
Infine, a Presidente Italianu,
Pertini cunfirmadu siat torra
e, pro pius cunsensu, a l’assignare
siat su “referendum” populare.

ISTRAGES SENZA SENSU
Segundu su dissignu criminale
de sas brigatas de ogni colore,
cun sos infames attos de terrore
destabilizzan s’ordine sociale.
Ma s’insoro deliriu mentale
los rendet zegos de fronte a s’errore,
ca sas istrages de sos innozentes,
anzis, unin partidos e currentes.
Est terrorismu zegu e insensadu
senz’iscopu ne ideologia,
e cun sa sua vile istrategia
ottenit negativu resultadu,
ca pius forte diventat s’Istadu,
pius difendet sa democrazia.
Contr’a su terrorismu tot’unidos
cumbattin sindacados e partidos.
Massacrana su populu innozente
senz’ischire pro cale oscur’intrigu
(eppuru narat su prezzettu antigu
chi niente si faghet pro niente).
Ma sas istrages servin solamente
pro si fagher su populu inimigu,
ca sas belvas de cussa calidade
sun inimigas de s’umanidade.
Dittadores, tirannos senza frenos,
rebelles de istintu sambenariu,
in dogni tempus bocchin s’avversariu
pro usurpare poderes anzenos.
Ma su ponner sas bombas in sos trenos
provocat solu s’effettu contrariu.
A pius chi non rozzigan niente,
in sa cundanna accomunan sa zente.
Duncas, sas bombas in sa Ferrovia,
no han matrice politica vera
ma, simmai, matrice istraniera
pro manu ‘e paranoicos ebbia.
Non s’attribuit ideologia
a sa ferozidade ‘e sa pantera,
ca est a dare valore ecumenicu
a sos attos de un’ischizofrenicu.

Ma su fattu pius ancora istranu
l’hamus a bider poi, a su momentu
chi calchi terroristicu elementu
de sa Giustiscia hat a ruer in manu.
Tando pretenden trattamentu umanu
pro cussa belva senza sentimentu,
e prestu calchi politicu ottusu
hat andar’a li lingher su pertusu.

SA GIUSTISCIA E-I SA DROGA
In Santu Patrignanu est operante
unu Centru ch’isvizzat sos drogados
e ottenit brillantes resultados
cun s’opera de Muccioli costante
(ca sende su guvernu latitante
bisonzat chi si movan sos privados).
Tantos lu deven a s’impignu sou
si sun torrend’a viver da-i nou.
Ma sa trista tragedia mundana
ponet a dura proa sa persone
chi, fattend’opera ‘e redenzione,
s’agatat contr’a sa giustiscia umana.
Diffatti a Muccioli infligidu l’hana
un’annu e otto meses de presone.
Duncas custa giustiscia est veramente
lontana da-i s’anima ‘e sa zente!
Domando a dogn’onestu zittadinu
si l’ispirat fiducia o terrore
chie cundannat su benefattore
e assolvet su barbaru assassinu.
Su Tribunale Supremu Divinu,
zertu, chi det sanare dogn’errore,
ma isettende s’appellu Supremu
semus da unu a s’ateru estremu.
Chie si cheret disintossicare
andat a viver in comunidade,
però andat de sua volontade,
ca niunu lu det sequestrare,
e invece han chérfidu accusare
a Muccioli de cussa infamidade.
Forsi cren de cumbatter s’eroina
senz’imponner peruna disciplina.
In su mundu, de Santos Patrignanos,
nde dian nascher a sufficienzia,
ma sos guvernos, de cust’esigenzia,
paret chi si nde sàmunen sas manos,
e si bi pensan bonos cristianos
los imputan de fura e violenzia.
Fattende gai, sa giustiscia umana,
s’arma contr’a sa droga rendet vana.

Sa droga est sa pianta ‘e tantos males
chi han leadu pessima piega,
e non servit s’inutile refrega
senza sas istrutturas sociales.
Non si cumbattin in sos tribunales,
ne a colpos de codice a sa zega,
ma andend’in aggiudu a sa persone
ch’hat abbrazzadu cussa missione.

MANZONI DERIS E OE
Calchi manzonianu personaggiu
a mie paret ch’esistat ancora:
sos Don Rodrigos de marca oppressora
naschen e creschen in dogni paraggiu.
Don Abbondios brivos de coraggiu
nd’hamus in sagristia e nd’hamus fora.
Ma sos prommissos isposos de como
si cheren cojuare e no han domo.
Si calchi Fra Cristoforo, oe puru,
sos debiles difendet in Palattu,
agatat s’ambiente pagu adattu
e lu dispaccian cun limbazu duru.
In dogni tempus, su pische maduru,
hat sos pisches minudos subraffattu.
Anzis, calchi modernu Don Rodrigu,
paret pius dispoticu ‘e s’antigu.
“Bravos” nd’hamus in bidda e in campagna
(ch’in Sardigna s’ispazzan pro “balentes”).
Pro diventare prestu possidentes
su sequestru est s’unica cuccagna
e costoin in tanas de montagna
bezzos e criaduras innozentes.
A cunfrontu de zente gai vile
S’infame Grisu fit pius zivile.
Finz’Azzecca-garbugli est attuale
ma faeddat a sonu ‘e miliones:
restat senza mudandas ne calzones
su poveru giamadu in tribunale.
Si Renzo chircat oe unu legale
non si presentat cun battor cabones:
a s’avvocadu andare devet lestru
cun s’incasciu de unu sequestru.
Sa “colf” (sa Perpetua de como)
a Don Abbondiu li servit ancora,
ma pius che in best’‘e servidora
servit de ornamentu pro sa domo.
Cun iscarpinas de “vitello cromo”
dat consizos de moda a sa segnora.
Non torrat a coghina, malinconica,
cun su caul’’e s’ortu ‘e sa canonica.

Cantos Innominados penetidos
ispuntan che antunna ogni momentu,
però non naschet, su penetimentu,
da-i sos evangelicos sentidos,
ma si comente los hat favoridos,
sa giustiscia nd’hat fattu un’istrumentu.
Gai, senza tortura, impunemente,
si salvan accusende un’innozente.

IN TEMPUS DE ELEZIONES
Sos candidados de dogni partidu,
cando sun sutta sas eleziones,
han su matess’istintu ‘e sos puzones
chi chircan fenu pro fagher su nidu:
cuddu mai connotu e mai ‘idu
ti l’agatas in totu sos chizones.
Finz’in mesu sas matas de prunizza
chircan lana arveghina pro moddizza.
Intran totue, gentiles cun totu,
prommittende s’insoro e-i s’anzenu.
Cuddos chi mai lis bessit alenu,
cun bellos modos ti pedin su votu.
Turdos chi mai has bidu ne connotu
t’ ‘ettan s’ala pro unu camb’ ‘e fenu,
e furfurinos chi sempre s’han fattu
su nidu in calchi trae ‘e su Palattu.
Tantu sos aspirantes deputados
che-i sos aspirantes assessores,
partin a cazza de sos elettores
appenas sun in lista candidados,
gai comente subra sos cunzados
bolan chirchende puddas sos astores.
E a forz’‘e tentare, cando ‘essin,
a nd’afferrare calcuna resessin.
Nidos bi nd’hat de dogni calidade,
ca b’hat aes de gustos differentes,
gai, sos candidados cuncurrentes,
sun puru de diversa identidade,
e cunform’a s’insoro abilidade
seberan sos adattos ambientes.
Pro nois, nachi, est civicu dovere
de lis ponner in manu su Podere.
Sos chi s’han post’in conca ‘e “arrivire”
faghen de sa politica tesoro
e chircan sas poltronas ch’han a coro
(tantu mezus s’han modu ‘e s’irricchire)
pro poder bonos fruttos regoglire,
chi aggradessan a su gust’insoro
e pro nde render a pienas manos
a sos affettuosos fittianos.

Ti prommittin sa luna in sa pischina,
prima chi a s’iscannu appoggen s’anca;
fattend’inchinos a drest’e a manca
a isquadra tonchinan s’ischina;
poi chi nd’èssis da-i sa cabina
est che ch’idan un’àinu in sa tanca.
Postu ch’hapan s’iscettru in man’a issos,
favorin solu fittianos fissos.

SU COJU DE BOBORE
Una die, bugliende, l’hapo nadu:
“e a cando, Bobò, sa confettura?”
ma no m’hat dadu risposta segura
ca ne tempus ne femina hat fissadu,
ma solamente m’hat asseguradu
ch’isposat una monza ‘e clausura.
Allergicu a sa femina trucada,
la preferit ruspante e...illibada.
In cantu a su modellu ‘e su ‘estire,
ispeciale chircat una sarta,
chi no uset modellos de Giacarta,
mustrende su chi devet costoire.
Sa ‘este a pes li devet arrivire,
comente s’usaiat in Isparta.
Anzis, pro chi non bessat a birgonza,
li ponet sa ch’haiat sende monza.
E pro si fagher sa fotografia,
in s’istiu, cand’andat a su mare,
sas ancas nudas non devet mustrare:
bastat chi s’idat su cambuzzu ebbia.
E pro rispettu de s’ecologia,
non devet haer su visciu ‘e fumare,
ca non semus nemmancu in Casablanca
a si fumare sa cannedd’‘e s’anca.
Eppuru, cando fit in Continente,
nd’hat haer bidu de dogni manera,
ma ca fin totu de conca lezera,
no li sun aggradadas pro niente.
Poi la cheret puru possidente
e de casteddos ereditiera.
S’andat in domo povera a finire,
bisonzat ch’essan ambos a pedire.
Hapo tentadu finz’ ‘e l’ammentare
chi morin solos sos bajanos mannos,
però nachi preferit cussos pannos
si s’ideale non det incontrare.
S’est bella, ricca e sabia, gosare
podet cun issa su rest’ ‘e sos annos,
ma no lu futtin a ponner s’aneddu
a una ch’est iscasciad’ ‘e cherveddu.

S’isposa pius unica che rara
Bobore chircat cun sa fantasia.
Guai si l’ispirat gelosia
fissend’àteros omines in cara!
Isse la cheret fidele che Sara,
ca est tipu de araba zenia.
No esistit, in fattos de amore,
un’ispizzecche simile a Bobore.

POBERA CULTURA!
Troppa zent’impostora e faulalza,
premiende, ricamat in sa seda:
su chi bandit su premiu in Campeda
binchet su primu premiu in Rudalza;
a su ch’est de giuria in Chirialza,
in Enas dan su premiu in moneda.
S’iscambian tra issos pari-pari
coppas, medaglias, targas e dinari.
Su chi laureadu s’est “poeta”
in Fràigas, promor’ ‘e su padrinu,
podet contare ch’hat fattu caminu
e cun onore est giompidu a sa meta.
Mancari siat mesu analfabeta,
in su Parnasu est su beniaminu
ca tantu, in sa moderna poesia,
non b’hat sintassi, metro e prosodia.
In mes’a tantos poetas ermeticos
baz’e chircade impronta culturale.
Oe, sa poesia “essenziale”
est praticada in termines sinteticos;
a base de “silenzios poeticos”
imitan Quasimodo e Montale.
De s’iscrittura nde faghen a mancu
e s’esprimin cun versos in biancu.
Zertos iscrien solu unu faeddu
pro fagher unu versu senza filu;
travasan da-i conca a su pabilu
sos bòidos ch’han intro su cherveddu,
bisende calchi coppa in Cantareddu
o puru calchi targa ‘e mesu chilu.
Si non rezzit inie sa “patacca”
unu poeta non balet un’acca.
Custa chi giaman “poesia pura”
- fiza de sa currente futurista -
parente de sa mistica fascista,
rappresentat sa perla ‘e sa cultura.
Bluffende cun sos giogos de bravura,
chie negusciat fumu est un’artista,
già chi segundu calchi estimadore,
sa poesia in suspu est de valore.

Como cun trampas e colpos de manu,
sun attuende su boicotaggiu:
cun s’iscuja de calchi gemellaggiu
bandit cuncursos in italianu.
Pius pegos recuin de lontanu
e pius abbundante est su foraggiu.
Sos sardos pagan, cuntentos e fessos,
pro pagu “culturales” interessos.

BABBU SANTU!
Babbu Santu! Lassende sa Sardigna,
ammentadi cant’has intesu e bidu:
de sas proas de Fide chi has rezzidu,
mancari, a boltas, in manera asprigna.
Tue chi ses fidele a sa cunsigna
chi Cristos hat a Pedru cunferidu,
faghe cant’est in Tua podestade
pro tanta zente ch’hat nezzessidade.
Tene presente sa Sardigna vera,
in aziones e pregadorias.
Ammenta su ch’han nadu tantas bias
sos minadores in sa miniera:
chi sun coment’e una bulverera
sas inutilizzadas energias.
Pensa chi sa Sardigna est sa Regione
chi hat pius disoccupazione.
Su ch’has intesu in Nùoro l’ammenta
dai sa ‘oghe de unu pastore,
sididu de giustiscia e de amore,
ca fort’est s’òdiu, sa giustiscia lenta.
Pro esser ruta vana ogni lamenta
imperat in Barbagia su terrore,
chi paralizat s’iniziativa
de dogn’impresa onest’e attiva.
Has bidu sa Barbagia genuina
chi de sa Fide hat su sublime donu;
intesu has su messaggiu de perdonu
de Eva Cannas, sa mamojadina.
Messaggiu chi un’atera femìna
hat fattu in Oniferi in cussu tonu,
cando barbaramente l’han bocchidu
su fizu caru umpare a su maridu.
In Boncamminu intesu has su lamentu
de cussos chi, pro pagu, han tent’isfogu;
tantos annos patende in cussu logu
senza lis fagher su dibattimentu,
ca sa giustiscia est unu bastimentu
chi arrancat a tempus de piogu.
Tra sas tantas rejones, una est custa,
proite sa giustiscia no est giusta.

O Babbu Santu! Tene in sa memoria
su chi da-i sa zente has iscultadu,
a costu ‘e olvidare su ch’han nadu
politicantes pienos de boria,
chi dian cherrer passar’a s’istoria
solu pro t’haer sa manu toccadu,
e pro s’ispèrperu a manu piena
de miliardos, pro fagher iscena.

TIU ANGHELEDDU, POETA GENTILE
Battor annos passados sun da-e cando
Ti’Angheleddu nos hat nadu: Adiu!
Eppuru ancor’est Isse a ponner briu
a sos poetas de como e de tando,
tantu chi calchi ‘olta mi domando
s’in su mundu, pro casu, ancor’est biu.
Est che cando su sol’est in eclisse
e totucantos faeddan de Isse.
Pro cantu brillat in su chelu un’astru,
totu l’ammiran, ma cun noncuranzia,
appenas notan sa sua mancanzia
est chircadu cun oju ‘e abilastru.
E gai como chi mancat su Mastru
lu chircat tota sa manovalanzia.
Sutt’a mastru fin totu emancipados,
senz’Isse paren disorientados.
Brillat sa luna, sas istellas puru,
pro cantu lughet su sol’in s’aera,
ma si s’istudat sa sua lumera
totu su firmamentu est a s’iscuru:
de caminare cun passu seguru,
su ch’est inzertu, non tenet ispera.
Finz’in su mundu de sa poesia
occurret sempre una segura ghia.
De unu babbu chi ghiat sos fizos
Ti’Angheleddu teniat s’intentu
e, pro su chi est umile e attentu,
servin ancora sos suos consizos.
Zertu, sos tantos Narzisos e Lizos,
chi sun a iscossina de talentu,
no han bisonzu de sole e de luna
ne reconnoschen iscola peruna.
Ti’Angheleddu, poeta gentile,
hat dadu finzas proas de coraggiu,
cundennende s’ingiustu vassallaggiu
impostu a sa Sardigna in modu vile.
Ma cal’est oe s’impignu zivile
de sos tantos “aedos” in rodaggiu?
Pro coraggiu sun pagos sos ch’ispiccan
ca nachi sos poetas los impiccan.

Ti’Angheleddu, sas avversidades
hat affrontadu sempre cun puntiglia;
trint’annos faghet fundeit S’Ischiglia
in d’unu mare de difficultades;
Rivista ‘ue s’incontran tantos frades
formende unu cuncordu a meraviglia.
Pro custu bene chi S’Ischiglia fàghede,
Ti’Anghelè, chi Deus Bos lu pàghede!

SU DIRITTU A S’ISTUDIU
Su Podere politicu imperante,
cando de sas iscolas no hat cura,
s’idet ch’est inimigu ‘e sa cultura
ca timet de restare menguante.
Guvernar’unu populu ignorante
est tra oligarchia o dittatura.
Est un’ispezia ‘e feudalesimu
praticadu in su séculu vintesimu.
Da-i su movimentu illuminista
sunu gia duos séculos passados,
e como paret chi semus torrados
a sa reazione oscurantista,
cun sa politica ostruzionista
de sos burricos privilegiados.
Finghen de haer sa cultura a coro,
ma pro burricos eredes insoro.
Cun su pretestu de s’inflazione,
sa cultura diventat unu lussu,
ma su veru motivu no est cussu
- ca tantu pagat sempre Pantalone -
S’iscop’insoro est chi s’istruzione
servat solu pro calchi pezzu russu.
Sa cultura, madrighe de riscattu,
est una mina sutta su Palattu.
Cun sa protesta de sos istudentes,
tantos males a pizu sun bessidos:
sos ateneos a prejos salidos
non sun pane pro chie no hat dentes;
mancan iscolas, mancan sos docentes,
però sos guvernantes sun dormidos.
Naras chibudda e ti risponden azu
e si giran a s’ateru costazu.
Famosu fit Federicu Segundu
pro haer sa cultura in contivizu.
ma custos han leadu su consizu
da-i calch’isceiccu vagabundu,
c’a sos magnates de su Terzu mundu
su populu istruidu dat fastizu.
Sos teracos sun sempre mezus tontos
in modu chi no iscan fagher contos.

Un’iscol’arretrada ‘e chimbant’annos
non podet esser si no in ruina.
Franca Falcucci est solu una pedina
tra sas Francas de Falcos pius mannos,
chi riformende faghen pius dannos
de cudda banda culturale in Cina.
Ateru che de Mao sa muzere,
sa banda ch’hamus oe a su Podere.

SA REPUBBLICA ‘E SAS TASSAS
Sa nostra, est sa repubblica ‘e sas tassas:
dogni tantu nd’imminzan una noa:
ma no affrontan cussa dura proa
ne riccos evasores ne bagassas.
Fatta sa legge istudian sas trassas,
sos illustres mazzones senza coa,
e gai, a esser sempre isozigados,
sun trabagliantes e pensionados.
Sos ministros chi passan a s’istoria
sun sos ch’ispilin sos contribuentes;
sos fiscales passados e presentes
han a restare sempre in sa memoria,
pro ca si sunu cobertos de gloria
presténdesi a su giogu ‘e sos potentes.
Famosos Cavallotti e Mussolini,
mal’e peus Vanoni e Visentini.
In dogni tempus naschen faccias tostas
cun duos tipos de cumportamentu:
prima mandan s’istadu in fallimentu
poi lu salvan inventende impostas.
A chie poden contare sas costas
nde li surzin su samben, a momentu,
ma non s’attrivin a fagher salassos
subra sa pedd’ ‘e sos mannales rassos.
Si calchi legge giusta est approvada
restat in su calasciu a ponner muffa:
dogni prommissa fatta est una truffa,
che-i sas pensiones de annada.
Ma si devet partire un’istangada,
cun sos decretos paran sa baruffa,
seguros chi cunsighin dogn’intentu
cun sa fiduzia ‘e su Parlamentu.
Dogni ministru chi s’est divertidu
a inventare sa noa gabella,
discurret cun Enrica e Raffaella
de s’affoghizu chi hat parturidu
(s’isceneggiada est s’ “hobbi” preferidu
in cust’amena terra ‘e Pulcinella).
Però b’hat calchi ministru propiziu
a fagher de “giullare” a Mauriziu.

Sos ministros fiscales senza frenu,
pro cumpletare sas invenziones,
mancat solu ch’a totu sas persones
ponzan unu tassametru a s’alenu,
in modu chi registret a pienu
s’aera chi respiran sos pimones.
Duncas, contribuente, suffri e balia
sos ch’amministran s’azienda Italia.

SA MAFIA BIANCA
Eh no , Signor Ministru! no est giustu
chi trattet unu méigu attuale
comente unu comune mortale,
chi de curare hat perdidu su gustu.
Su méigu est su Cesare Augustu
de cust’Imperiu Assistenziale,
chi prescriende analisi ebbia
hat mezoradu solu in sa grafia.
Sos méigos chi oe bos fentomo
non sun pius sos méigos antigos,
chi pius che duttores fin amigos
e faghian sas visitas a domo.
Si ses grave, sos méigos de como
non los catturas mancu cun sa Digos.
Bisonzat ch’andes a s’ambulatoriu
e faghes da ‘inie a zimitoriu.
Duncas, cust’assistenzia est pagada
mancari non ti servat pro niente;
però, cand’has bisonzu veramente,
ispendes pro sa visita privada.
Sa Sanidade, goi amministrada,
est una truffa legale indezente;
però, sos de sa “Mutua Locale”,
pretenden trattamentu ispeciale.
Sos ispidales mandan in malora
ca su preju privadu est arbitrariu,
e-d-est pro cussu chi calchi primariu
pagadu in s’ispidale operat fora.
Balanzat miliones in-d-un’ora,
ma sempr’in beste de missionariu.
E cando cheret iscioperat puru,
tantu s’incasciu de fora est seguru.
B’hat finzas calch’illustre professore
ch’arrivit a s’estremu ‘e s’imperizia:
andas pro ti curare un’iterizia
e ti cumbinchet ch’has unu tumore;
però li passat lisciu dogn’errore
senza l’assegurare a sa Giustizia,
ca su potente Ipocrate modernu
hat podestades de Babbu Eternu.

Bestit biancu cun coro nieddu
rendende s’assistenzia illusoria.
Sa mafia bianca est antigoria:
non lassat logu a méigu noeddu,
che chie su Repartu hat in Casteddu
e in Londra sa sala operatoria.
Sos guvernantes isperden gasie
sos miliardos inogh’e inie.

S’ISTAMPA SARDA
A dispettu de tantos paladinos,
de su limbazu sardu defensores,
non sun ebbia sos legisladores
de s’idioma nostru sos Cainos;
ma sos veros morales assassinos
dimustrados si sun sos editores
de giornales de Tatari e Casteddu,
ch’a sos sardos negadu han su faeddu.
Innanti, su giornale turritanu,
pubblicaiat calchi poesia;
como forsi l’est pàrfida eresia
misciare cun su sacru su profanu
e pro rispettu de s’italianu
de su sardu nd’hat fattu pulizia.
Ecco ch’hat postu fine a dogn’abusu
e sardu no nde pubblicat piusu.
S’opinione mia personale
est chi pro fagher s’abolizione
han profittadu de s’occasione
cando modificadu han su giornale;
e in Casteddu han fattu tal’e cale
cand’han modificadu s’ “Unione”.
Ca su padronu nou fit guvardu
hat abolidu sa rubrica in sardu.
Duncas de narrer forte hamus dirittu
chi a bocchire su sardu idioma
non tentat solu su guvernu ‘e Roma,
ma tramat puru su pabilu iscrittu.
Pro cantu cun s’istampa est in cunflittu
sa limba sarda restat sempr’in coma,
e cando tentat de leare fua
s’abbizat ch’est istranza in domo sua.
Non b’hat cunvegnos ne taulas tundas
chi potan a sa limba dare alenu;
totu sas ciarras sun fogos de fenu
chi sind’istudan cun sas baraundas.
Sas limbas mai diventan fecundas
cando s’istampa las tenet a frenu,
ne si tramandat peruna cultura
si no est affidada a s’iscrittura.

De sos nostros giornales, veramente,
non cumprendo sa tanta ostilidade;
ma forsi timen chi sa sardidade
lis potat infestare s’ambiente
e cun sos frades de su Continente
bi perdan de istile e dignidade.
De rinnegare sa Sardigna tèntana
però de linfa sarda s’alimèntana.

BONANOTTE RAFFAELLA!
Divina, Onnipotente Raffaella!
chi cun su tou imbiligu indoradu,
in terra americana has isbarcadu
cun sa trupp’ ‘e sa tua caravella;
manc’a Colombo deit Isabella
su chi Mama Tivù a tie hat dadu.
De su guvernu custas sun sas proas
proite hat inventadu tassas noas.
Sun legges de natura senz’iscrittas,
dogni terr’hat su sou monopoliu:
sos isceiccos esportan petroliu,
nois, invece, nadigas e tittas,
pro las suzzare azìs’ ‘e ampullittas
chi cuntenin essenzia ‘e rosoliu.
Dognunu mustrat sa sienda sua,
nois mustramus lana e petta crua.
Sublime Raffaella in calzamaglia!
cun sa lagrima pronta in pibiristas,
partis cun d’un’esercitu ‘e artistas
pro fagher ispettaculos de vaglia,
invece has presentadu burrumbaglia
e nos has subbissadu ‘e intervistas
a suggettos chi nois, pro isfogu,
che mandaimis a-i cuddu logu.
Fors’in programma no haisti solu
s’ispaccu fin’a chintu in sa munnedda,
ma mustràredi finzas bravighedda
faeddend’in inglesu e ispagnolu.
Bessis che fae frisca in corrintolu,
ma s’idet chi ses già nasiniedda.
Anzis, lu mustrat propiu s’ispaccu
chi ses accurz’a finir’in su saccu.
Ses accurz’a lassare cuss’armada
de pegos chi t’allattan e ch’allattas;
poi de tantas intervistas fattas
accabbas tue puru intervistada,
e de cust’ultima americanada
pius non restan ammentos ne trattas,
ne che prezisos relozos isvizzeros
t’iscortan Japinos e Giannizzeros.

Cand’has a esser tue in pensione
ateras han a fagher ispettaculos,
ma non santas chi fettan sos meràculos
ch’has fattu tue in televisione.
Tue, via satellite in persone,
che ruspa isgombraisti sos ostaculos.
Cun tegus tramontende est un’istella...
Bonanotte, Divina Raffaella.

PADRE LAMENTU
Cust’attributu de “Padre Lamentu”
bi l’hap’ ‘eo matessi appizzigadu,
pro ca si mustrat totu addolimadu
zelebrende sa missa in su cunventu.
Mancu Cristos de tantu patimentu
in sa rughe s’est gai lamentadu.
Paret chi dogni male suffrat issu
pius de su Messia cruzifissu.
S’iscena ‘e custu padre attitadore
conturbat finza sa Fide Apostolica,
cando trasformat sa missa cattolica
in d’un’isceneggiada ‘e prim’attore:
paren lamentos de ‘attu in calore
o de unu chi hat attaccu ‘e colica.
In su fervore de s’orassione
assumit sa ‘isura ‘e s’istrione.
Cand’ ido custu padre franziscanu
amministrende s’offisciu divinu,
cuddu romanzu de Fra Ciavolinu
mi torrat a sa mente fittianu,
chi preighende s’amore profanu
fit de sas damas su beniaminu.
Forsi, custu novellu Geremia,
cun sas dòlimas chircat simpatia.
Tra sos tantos lamentos ch’iscultades
b’hat finz’un’ater’incunveniente:
chi su missale sou est differente
de su chi usan sos suos cunfrades.
Tand’invec’ ‘e pregare criticades
e-i sa missa non balet niente.
Finza su “Credo” paret noiosu
in bucca ‘e custu padre latrangosu.
E a pius chi si leat su gustu
de trasformare sa missa in missone,
a boltas, poi ‘e sa comunione,
si sezzit e si faghet unu sustu.
Ateras boltas dat a tempus giustu,
senz’intervallu, sa beneiscione.
Cando finit in presse, han appuradu
chi est a diarrea o s’est purgadu.

Padre Lamentu est sempr’in discunfortu
da-i s’ “Oremus” fin’a s’ “Offertoriu”.
tantu chi una missa ‘e isposoriu
s’assimizat a una miss’ ‘e mortu.
Finz’in sa missa pro Cristos Risortu
regnat s’atmosfera ‘e s’obitoriu.
Su postu sou, adattu a su piantu,
est capellanu fissu in campusantu.

SU PIANETA CUNCORDIA
S’ esotica pianta ‘e sa cuncordia
in terra sarda no attecchit mai.
Da-i séculos semus sempre gai:
gherrende pro su pumu ‘e sa discordia,
ma da-i Deus sa misericordia
pretendimus si semus in guai.
Alimentamus odiu rezelu
isettende s’accordu da-i chelu.
Hamus inciappuzzadu una Regione
ch’est una tan’ ‘e lupos abbramidos;
sa libidine ruza ‘e sos partidos
sutterran dogn’ispera ‘e unione.
Sos porcos, mandighende in d’un’ajone,
sun pius rispettosos e pulidos.
E poi, de sos nostros milli males,
damus sa neghe a sos continentales.
Ite bene podimus isperare
da-i custu perenne azzuffatoriu?
S’insultu est su passazu obbligatoriu
pro cherrer s’avversariu affrontare,
e gai, invece de amministrare,
reduin sa Sardigna a zimitoriu.
O siat pro puntiglia o pro ‘inari,
si nde ‘ogan sos ojos pari-pari.
Cust’est sa classe colta sarda eletta
chi faghet sa Sardigna prosperare.
Cheren sa limba sarda unificare
e s’istrazzan s’afforru ‘e sa gianchetta.
Dognunu hat s’infallibile rezzetta
chi niun’est dispostu a variare.
Sos sardos mai han haer limba unida,
salvu chi Wagner non torret a bida.
Discurrend’in s’internu ‘e sos partidos
s’iscadenat s’ignobile canaglia.
Sos cungressos sun campos de battaglia
inue ruen mortos e feridos.
Paren cumbattimentos tra bandidos
prontos a s’iscannare pro sa taglia.
E da-i custa iscazzottada indigna
diat dever rinascher sa Sardigna?!

Han semenadu sa disamistade
Punicos, Ispagnolos e Romanos,
Ligures, Bizantinos e Pisanos...
sempr’in lotta tra babbu, fizu e frade.
Hamus in sinu da-i antighidade
s’odiu zegu tra coros umanos.
Si zesserat s’eterna disanìa
non dimis esser de sarda zenìa.

S’ATEISMU
Chie si ‘antat d’esser miscredente
e non connoschet ne deos ne santos,
si podet dare puru milli ‘antos
però non b’hat de li creer niente.
Dogni bragheri contat a sa zente
de s’ateismu sou sos ispantos,
però, cando sas forzas no l’assìstini,
invocat santos chi nemmancu esìstini.
Pro su piusu, chie ischit pregare,
cominzat sempre cun s’Ave Maria,
ma s’ateo, dejunu ‘e gerarchia,
no ischit da-i chie cominzare.
Tando ‘ettat sos santos tot’a pare
ma no li ‘alet sa pregadoria,
ca cominzat preghende a Gesugristu
chi domandet sa grascia a Santu Sistu.
A Sant’Antoni l’invòcana totu
e nott’e die dognunu lu pressat;
ma s’ateo, birbante, s’ingrammessat
a unu santu ch’est pagu connotu
ca, salvu calchi ‘olantigu devotu,
hat paga clientela e s’interessat.
Coment’e chi sos santos, a istentu,
fettan sas grascias pro appuntamentu!
Dogn’ateo che puddu alzat sa cresta
si l’accumpagnat su tempus suave,
ma cand’est imbarcadu in calchi nave
si cagat si su mare est in tempesta.
Invocat santos a manca e a dresta
e prommittit, in s’ora pius grave,
sa candela cant’unu candaleri...
ma est sempre prommissa ‘e marineri.
Dadu chi sos istintos bestiales
si manifestan in s’omine puru
- chi senza Fide innaspat in s’iscuru,
causend’in su mundu tantos males -
de s’ateismu de sos animales
cunfesso chi nemmancu so seguru.
Nachi Santu Franziscu hat cunvertidu
finzas su lupu appenas chi l’hat bidu.

Duncas, naramus chi cust’ateismu
est un’ispudorada finzione,
a sa cale recurret s’isbruffone
pro cuare su sou bigottismu
( a su contrariu ‘e su terrorismu
chi si ‘estit cun peddes de anzone ).
E rezitan, cumparsas e attores,
falzas columbas e falzos astores.

LEGGES E COSTUMENES
De sos italianos determinos
diffizil’est cumprender sa rejone:
ponen ladros de puddas in presone
e liberan ferozes assassinos.
Han postu for’ ‘e legge sos casinos
e ammittin sos “Ghei” in Cannigione.
Como non s’ischit s’est pius legale
o sa bagassa o s’omossessuale.
Duncas no est motivu ‘e vituperiu
dare su chi fit prima proibidu,
ca pro fortuna b’hat calchi partidu
chi leat ambas artes in su seriu.
Paret chi unu nou ministeriu
hat a esser apposta istituidu.
Su titulu est cunform’a su costumene:
pederastas, nudismu, e bagassumene.
Cuddos cheren su “Gruppu” in Parlamentu,
custas cheren sa Cascia ‘e Previdenzia,
ma pro render legale un’indecenzia
occurret unu nou ordinamentu.
Pro cussu sun arreu in movimentu
invochende sas legges de urgenzia.
E faghen importantes seminarios
cun ministros e sottosegretarios.
Non si prestan a fazile giudiziu
cussas artes de biblica memoria,
ca non prezisat nemmancu s’istoria
si sun pro maladia o sun pro viziu.
S’iscenzia non dat perun’indiziu
e gai finit dogni salmu in gloria.
Ma su fatt’est chi cuss’istadu insoro
cheren chi si lu dian totu a coro.
In Cannigione dan zertos permissos
forsi ca est de moda sa ‘irdura.
ma creo ch’in sos campos de Caddura
servian pius Issas chi no Issos.
Si cussos centros “Ghei” sun ammissos,
permittan de sas “Domos” s’abbertura,
ca no est giust’in su mund’ ‘e su viziu
abberrer solu s’intrada ‘e serviziu.

In sas fazzendas matrimoniales
sas muzeres assistin sos maridos;
sos chi no han muzere e sun famidos
noleggian assistentes casuales,
e invece sos omossessuales
sun issos sos chi cheren assistidos.
Sos ch’han bisonzu de femin’anzena
non chircan surrogadu in Arzaghena.

IN CUNFIDENZIA CUN TIU ANGHELEDDU
Caru Ti’ Angheleddu, ogni Nadale
nos ammentat sa ‘Ostra dispidida,
ma nos ammentat puru ch’in sa vida
hazis lassadu un’opera immortale,
fundadu una Rivista Culturale
da ogni veru sardu aggradessida.
Sezis tra sos Mazores mente insigna
chi hazis fattu onore a sa Sardigna.
De sos poetas fizis su docente
e bos haian istima sinzera.
Tando faghian poesia vera,
impignende su coro e-i sa mente;
como l’impastan meccanicamente
che calcestruzzu in sa betoniera.
Bi ‘ettan s’alfabeto, paza e bentu
e nd’essit fora su cumponimentu.
O in die, cust’Isula fantastica
contat pagos “Rizolos Cristallinos”;
pro sa mazore parte sun trainos
chi trazan arga e saccheddos de plastica.
Como dogn’arte est diventada elastica
e han libera fua sos ciappinos.
Sovrana est s’anarchia in dogni logu:
chie non bettat lua ponet fogu.
Cando calchi Nerone facci-mannu
s’incoronat “poeta” a prepotenzia,
non mancat mai sa pua presenzia
in sos cuncursos chi brotan dogn’annu.
Creo chi ‘Ois da-i cuss’iscannu
bos abbizedas de sa differenzia
tra Poesia chi podet cumparrer
e “poesia” pro modu de narrer.
De sas chi sun in su ‘Ostru volùmene
manc’una poesia est premiada;
com’invece, sos “Vates” de annada,
de premios nde faghen bamballùmene;
cun perigulu mannu chi s’istrùmene
si s’opera non benit pubblicada.
Pro sos ch’incunzan medaglias de lama
non contat su valore ma sa fama.

Bois, non solu sa fama hazis tentu,
ma su valore, s’istima, s’affettu,
senza Bos ingrusciare a su cuspettu
de criticos de dubbiu talentu,
chi pro mesu de calchi allisciamentu
accomunan s’istagnu a s’oro nettu.
A Bois non servian sas patentes
ch’imbuffan oe zertos cuncurrentes.

LIBEROS MACCOS IN LIBERU ISTADU
De “Guvernantes Maccos” su binomiu
s’han meritadu cun rejone santa
sos ch’han fattu sa legge “chentottanta”,
timende de finire in manicomiu.
Segund’issos merìtan un’encomiu
c’han abrogadu sa mala pianta
e, senza cunsideru e cautela,
han postu sos dementes in carrela.
Su abolire sas domos de cura
‘ue fin sos malàidos de mente,
senza pensare antizipadamente
de fagher un’apposita istruttura,
o est sa legge isàpida ‘e natura,
o est s’esecutivu incumpetente.
O puru, trascurende sos doveres,
sun senza sal’in conca ambos poderes.
Indifferentes, sos politicastros,
lassan currer sos traos senza loros:
non sun capazes de fagher mezoros
però cumbinan fatales disastros,
tantu ch’idende zertos impiastros
diventan finzas pallidos sos moros.
Como t’agatas custa legge in manu
chi faghet benner maccu su ch’est sanu.
Politicantes de pessima fama
nd’hamus connot’in totu sos consizos,
ma sos ch’han dadu sos peus fastizos
criadu han custu tristu panorama:
fizos maccos chi ‘occhin babbu e mama,
babbos maccos ch’impìccana sos fizos.
Ateros maccos, senza ghia adatta,
ch’isparan a su pubblicu in piatta.
S’istadu de su maccu furiosu
zertu no est ne comodu ne bellu;
un’ispidale de nou modellu
li diat esser pius profettosu.
Ma su maccu pius perigulosu
est cuddu chi l’abberit su cancellu.
No est solu su maccu, su guai,
ma finzas chie approvat legges gai.

Ma forsi no est giustu a narrer male
contr’a sa legge de sa Sanidade,
chi cunzedit piena libertade
finzas a su malàidu mentale,
( e no l’azzettan mancu in s’ispidale
si no intrat de sua volontade).
Eppuru che cheriat, a sa fine,
custa legge ch’abrogat su macchine.

RECURRIDE A RAFFAELLA
Si aereos e naves
iscioperan a cadena;
si oe in sa Madalena
curren perigulos graves;
si brujan feras e aves
e dogni zona buscosa...
pro calesisiat cosa
recurride a Raffaella.
S’in Casteddu a remiarzos
bettan vasos a tramattas
in carrelas e piattas
usadas pro muntonarzos;
s’assessores faularzos
in Tivù sun sempr’in posa...
pro calesisiat cosa
recurride a Raffaella.
Cando in sas riuniones
si discurret de ‘inari
e s’inzunzan pari-pari
tra Opus Dei e Massones;
rassignan dimissiones
fattend’iscena odiosa...
beh! finzas pro custa cosa
recurride a Raffaella.
Si timende - oe che deris -
vindittas e secruestos,
pro difender sos onestos
bos mandan carabineris,
e cun cussos furisteris
nde ‘irades che gazosa...
tando faghinde una cosa:
recurride a Raffaella.
S’in calch’istabilimentu
protestan sos dipendentes,
ca cessos suffizientes
non tenen in godimentu;
e si calchi traimentu
b’hat tra isposu e isposa...
pro calesisiat cosa
recurride a Raffaella.

Como in televisione
s’avverat dogni meraculu:
totu faghet ispettaculu,
Giustiscia e Religione,
Politica, Istruzione,
Moda, Poesia e Prosa...
pro calesisiat cosa
recurride a Raffaella.

SU PIANETA ONESTADE
Mai che oe, chirchende onestade,
mi so abbistu cantu costat cara:
est diventada una pianta rara
chi non creschet pius in povertade.
Chirchende una funtana frisca e giara
est tanta zent’ ‘e giustiscia sidida,
ca a render penosa custa vida
sos criminales sun fattende a gara.
Cuddu ch’hat sa cuscienzia pulida
est oggettu de beffe e de isfregiu
dai sos ch’hana dogni privilegiu
in sa classe politica iscadida.
Non podet esser, su ministru egregiu,
assuggettadu a sa giustiscia umana:
s’immunidade sua est soberana,
sacra pius de su Podere regiu.
Duncas, resultat un’impresa vana
chircare s’onestade in custu mundu,
ca si chircamus bene a fund’a fundu
sa crisi no est solu italiana.
Paba Giuanne Paulu Segundu
est preighende s’Evangelu invanu,
già chi dogni prezettu cristianu
est cattigadu in modu inverecundu.
Su chi ti paret santu su manzanu,
su sero ti l’ispidin in galera,
ma poi finit totu a trallallera,
segundu su sistema italianu.
Duncas, est s’onestade una chimera
s’inue chircas lughe b’hat iscuru.
Sempre pius nieddu est su futuru
si mancu brillat su sol’in s’aera.

SU NEGUSCIU DE SAS INDULGENZIAS
Don Stellerinu, Rettore abruzzesu,
mere de una televisione,
est bendende pro unu milione
unu post’in su chelu affacc’a Gesu.
Appenas cussa notiscia han intesu,
medas han fattu prenotazione,
ca già s’ischit, sa zente est fatta gai:
abbuccat sempre ca....non s’ischit mai.
A Santu Pedru a Vasco, in campanile,
hat collocadu sa sua emittente,
da inie barattat cun sa zente
su Paradisu a usu mercantile.
S’intrallazzu no est tantu deghile,
ca s’assimizat a una tangente,
già chi deven pagare a dogni costu
sos ch’in su chelu cheren unu postu.
Su minimu est unu milione,
pro chie ‘e pagu logu si cuntentada,
ma si calcunu s’offerta aumentada
mezorat finzas sa posizione:
tenet dirittu a unu cadreone
appena in Paradisu si presentada.
E si sos miliones sun chimbanta
pro cumpagnia li dan una santa.
Deo supponzo chi Don Stellerinu
giutat calchi profeta incorporadu;
o est un’ateru verbu incarnadu
chi sa mama abruzzesa hat tentu in sinu,
già chi a lottos su regnu divinu
est barattende a chie est prenotadu.
No hat bisonz’ ‘e apostulos como,
ca tant’ognunu hat sa Tivù in domo.
Che agenzia chi prenotat gitas
paret cust’agenzia ‘e su Rettore,
ma forsi s’affluenzia est mezore
ca cunfortat sas animas cuntritas.
Est puru beru chi sun infinitas
sas vias pro andare a su Segnore:
chie preghende cun Fide perfetta,
chie paghend’in cheja sa mazzetta.

Però non so seguru chi Gesusu
appogget cussa truffa bella e bona.
Imbrogliende sa zente credulona
chiesisiat cummittit abusu,
nende chi chie pagat de piusu
finz’in su chelu agatat sa poltrona.
Ma pro sos mammaluccos chi bi crène
cussu parrocu ch’han lis istat bene.

SU MALAIDU EST MALE ‘IDU
Si bi faghides bene attenzione
su malàidu tenet sempre tortu.
Cando pius bisonzu hat de cunfortu
tando pius li dan tribulascione.
De ogni male est isse sa cajone,
tantu chi si disizat mezus mortu.
In sas puddas s’istintu est uguale:
totu biccan sa pudda ch’istat male.
Si has s’artrosi o ti dolet s’ischina,
opuru accusas ateros dolores,
luego totu diventan duttores
e ognun’hat sa sua meighina.
B’est chie ti consizat s’aspirina,
chie pappinos d’ervas e fiores.
E si non des a totu accunsentire
naran chi ti piaghet a sunfrire.
M’amment’ancora su ch’est capitadu
a un’amigu ch’in s’iscala est rutu:
luego a s’ispidale che l’han giutu,
ca giughiat un’ossu fratturadu.
Però cand’in familia est torradu
est pro fortuna chi no l’han iscutu.
L’han trattadu de fessu e de coglione,
ca già podiat dare attenzione.
Lassemus sa persone ch’est distratta
e ch’est suggetta a calchi trambuccada,
ma nademi, unu ite gulpa nd’hada
cando li ‘enin dolores de matta?
E puru finzas tando b’hat cumbatta,
ca suspettan in calchi picchettada,
e l’attribuin chi hat fattu festa
cun calchi pietanzia indigesta.
E ite narrer de su trattamentu
a su ricoveradu in s’ispidale:
est cosa rara ch’in su personale
b’hat calchi benemeritu elementu.
Pro su pius lu curan a istentu,
chi paren assistende un’animale.
Sa cronaca ogni die est testimonza
chi est sa Sanidade una ‘irgonza.

Su malàid’in clinica est in pena
ca est custrint’a sunfrire a s’acua.
Già unu est de istrobbu in domo sua,
figuradebos s’est in dom’anzena.
S’a narrer ohi! s’attrivit appena,
a bell’apposta l’abbruncan sa bua.
Invec’ ‘e haer trattamentu umanu,
su malàidu tollerat su sanu.

FEMINISMU IN SALZA PICCANTE
Poi ‘e s’iscandalu ‘e prinzipessas,
suzzessu in s’Inghilterra puritana,
hat dezisu sa cheja anglicana
de ordinare sas sazerdotessas.
In proa vintinoe soldadessas
hat assuntu sa truppa italiana.
Corte, caserma e cheja protestante,
han fattu cronaca in salza piccante.
Cust’est sa “Paris opportunidade”
chi reclaman sas feminas modernas;
solu ch’appiccan istola e gibernas
in su periodu ‘e maternidade,
ca reconnotas pro sa Sanidade
sunu sas esigenzias maternas.
Tand’est ch’intran in crisi in sagristia
e in sos rangos de sa polizia.
Ma no est solu istola e istellettas
chi sas feminas cheren indossare,
ca dian cherrer puru cumandare
mercantiles, vascellos e corvettas,
pro fagher bider manovras perfettas
in nottes de tempesta in altu mare,
e dare esempiu a s’equipaggiu
de valore zivile e de coraggiu.
E ite narrer de sas pompieras,
chi han già tantos fogos istudadu?!
Ma non s’ischit proite arruoladu
no han ancora sas carabineras,
ne seberadu sas corazzieras
pro iscortare su Cabu ‘e s’Istadu.
S’est in bichini, sa gentile iscorta,
sos “pistoleros” han sa manu morta.
Si sas militaressas in colonna
marcian in “slip” che-i sas bagnantes,
tando sas peidressas protestantes
poden narrer sa missa in minigonna.
Si sun bestidas che-i sa Madonna
sun for’ ‘e moda e pagu elegantes.
Mesu nudas non peccan de seguru
ca mesu nudu est Gesugristu puru.

Cheria intender s’est cunsenziente
su generale ‘e armada Mambrini:
ponner sas soldadessas in bichini
- ma seberadas appositamente -
che Carmen Russo, cun sinu isporgente,
ancas che Parietti e Cuccarini.
Bastat chi non si dìana malàidas
e non torren a domo totu ràidas.

A MORTE SOS GIUBBILADOS
Sa pubblica Azienda Italiana
forsi non fit istada in fallimentu
si no haiat a garrigu tentu
una marea de zent’anziana,
chi pro si nde cazzare dogni gana
isperdisciat dinari e alimentu.
Ecco proite tentan, sos istados,
de abolire sos pensionados.
Cando su Fiscu los tartassat forte
est pro su bene de sa nazione,
e-i sos guvernantes han rejone
de invocare sa Celeste Corte
chi fettat coincider cun sa morte
sa data de andare in pensione.
Intantu han decretadu s’aumentu
de s’edad’ ‘e su pensionamentu.
No est tantu sa misera tangente
chi faghet su guvernu indepidare,
ma sa ispesas chi devet pagare
dende sa pensione a tanta zente,
ch’a ottant’annos, isfacciadamente,
gosan sa vida senza trabagliare.
Finz’in sa mesa sun ischizzinosos,
c’a pius chi sun bezzos sun visciosos.
Osservad’in sa Posta, a fin’ ‘e mese,
sas filas longas chi non finin mai;
ecco proite est reduidu gai,
s’Istadu, chi non rezet manch’in pese,
mantenzende debadas tantos rese
chi viven solu iscultende sa Rai:
isettend’una legge adeguada
a tantas pensiones de annada.
Poi b’est s’oziu, su babb’ ‘e sos vizios,
ch’iscadenat istintos bestiales,
chi pro sos giubbilados sun fatales
a causa ‘e sos tantos pregiudizios,
ca chircan finzas sos logos propizios
pro fagher violenzias carnales.
Ma, in s’antighidade, ite faghian?
Sos anzianos los irroccaian!

Duncas, dadu ch’est cosa istabilida,
chi sos pensionados costan troppu,
e-i s’inflazione est a galoppu
ca tropp’a longu los tenen in vida,
cumbenit de serrare sa partida
cun duna legge urgente sens’intoppu,
pro chi sa zente, appenas giubbilada,
che a s’antiga siat irroccada.

UNA LEGGE INUMANA
Ma cando mai unu sequestradu
podet in sa Giustiscia cunfidare,
si chie tentat de lu liberare
est che delinquente incarceradu,
e de sos benes suos est privadu
pro chi non potat riscattu pagare?
Duncas, sos peus inimigos suos
- prima fit unu - como sun in duos.
Prima fit su dissignu criminale
de s’inumanu sequestradore
chi a s’ostaggiu faghiat terrore,
suggettu a trattamentu bestiale.
Como finz’in materia penale
est inumanu su legisladore,
ca s’istruminzu de legge ch’hat fattu
l’impedit de pagare su riscattu.
Chissà inue hat postu su sentidu
chie de fagher legges hat podere,
si non cuntemplat chi est in dovere
de fagher istanare su bandidu.
Sa mafia sequestrat su maridu,
sa legge sequestrat sa muzere.
Oramai niunu hat su coraggiu
de s’arriscare a salvare un’ostaggiu.
Non mancaiat su codice nou
pro render sa Giustiscia illusoria:
a pius ch’est sa legge vessatoria
l’amministrat dognunu a modu sou.
Sun barant’annos, sas concas de ou,
continu troppiende sa memoria,
pro cussu resultadu originale:
una cura ch’est peus de su male.
Tue, legisladore, non bi crese,
si non rues in manu a s’assassinu,
chi vittima est s’onestu zittadinu
de zertas legges fattas cun sos pese.
Bastat chi ciarres in “politichese”
pro te est sempr’in paris su caminu.
Mezus chi mai ti ponzas a tessere
s’est pro aumentare su malessere.

Zertu, chie no ischit it’est pena
non pensat a su dannu ‘e cussa cura.
Zertos approvan sa “linia dura”
ca tantu est praticada in pedd’anzena,
ma non chie proadu hat sa cadena
o ateros inventos de tortura.
Nemmancu tue l’haisti approvada
s’haisti tentu s’orija muzzada

SU PRESIDENZIALISMU
Su “presidenzialismu” isvisceràdu
est maladia cronica infettiva;
paret sempre dispostu a s’offensiva
chie da-i cuss’ “ismu” est contagiadu,
siat su presidente ‘e un’istadu
o presidente de coperativa.
E si cheret proteggidu e succùrridu
ogni ‘olta ch’intendet calch’istùrridu.
Si su partidu democristianu
benit a pattu cun su promotore,
acquistat potenzia mazore
finzas su Presidente italianu,
che-i su Presidente americanu
( chi segundu su Melzi est dittadore ).
E gai fatta sa riforma ottusa
hamus sa dittadura Made in Usa.
Custa pabedda presidenziale
est fazile chi siat calchi frina
chi l’hat battìda da “oltrecortina”
paris cun sa “cinesa” influenzale,
e investidu hat su Quirinale,
Palazzo Chigi cun sa Farnesina.
Poi, cun sos politicos cuntattos,
han infettadu varios palattos.
Est unu male ch’intrat prepotente
in sos cunfines senza passaportu.
In Italia est già intradu in portu
e incontradu adattu hat s’ambiente:
cando unu diventat presidente
abbaidat a totu a oju tortu.
A tot’isfidat, cun totu s’isbragat,
totu li deven, niunu lu pagat.
Su populu già tenet bell’afficu
si dogni presidente hat un’ispada
e provocat sa zente a man’armada
ogni ‘olta chi tenet calchi annicu.
Tando proibin finzas su burricu
de poder troddiare in sa pigada:
s’accurzu presidentes b’hat pro casu,
luego in culu li ficchin su nasu.

Proite, beneittos presidentes,
- de sa proloco o de su condominiu -
cherides cun su ‘ostru predominiu
fagher s’istrage de sos innozentes?
Non meritades, gai prepotentes,
nemmanc’una medaglia ‘e alluminiu.
S’hazis vocazione a sa filippica,
o presidentes, dadebos a s’ippica!

POTENTE SEGNORA
Burocrazia, potente segnora,
chi màstigas pabilu a tunnelladas,
sempre famida de cartas bulladas,
ses de ogni regime protettora.
Burocrazia, bezza e paralitica,
ses destinada a fagher in eternu
sa ruffiana de ogni guvernu,
disposta a digirire ogni politica.
Dogni partidu ti faghet sa critica,
fin’a tenner in manu su Podere,
poi de te si servit a dovere,
pro mandare a...”ramengo” ogni riforma,
ca bastat una borbonica norma
pro reterdare finzas s’aurora.
Burocrazia, piena ‘e ruinzu,
ca non faghes perunu movimentu,
tue dogni modernu ordinamentu
lu faghes diventare un’istruminzu.
Appena de riforma ‘ides imminzu
- tantu devet passare in manu tua -
subitamente li bloccas sa fua
cun sas tuas trobeas ben’istrintas,
firma che rocca a totu sas ispintas,
resultas sempre tue binchidora.
Sas riformas sun sempre destinadas
a morrer in su tou labirintu,
de custu su guvernu nd’est cunvintu,
prim’ancora chi ‘enzan approvadas,
tantu chi, calchi ‘olta, sun passadas
senza fissare s’istanziamentu.
Ma pro fagher su populu cuntentu
li pienas de sognos su calasciu,
in modu chi, cand’hat umore basciu,
sos bellos sognos nde ‘oghet a fora.
Burocrazia, sempre inopportuna,
restia a dogni noa conquista,
paret chi non ti sias mancu abbista
chi arrivadu est s’òmine a sa luna.
Non poden fagher riforma peruna,
si prima non riforman bene a tie.
Ma non creo chi ‘enzat cussa die,
ca su guvernu ti preferit gai,
in modu chi non fetat nudda mai
e anden sos programmas in malora.

Sos ch’amministras cun podere immensu,
de te no han istima e ne amore,
ca pesas che montagna pro rigore,
ma non tenes un’unza ‘e bonu sensu.
Cando das milli francos de cumpensu
nde cheres deghemiza pro marchettas.
Pro incasciare che lupu ti ‘ettas,
ma pro pagare ses surda pedrale.
Ses personificada in s’istatale,
finzas cun isse mala pagadora.
In duna fitta giungla burocratica
isperdes sos dirittos de sa zente,
a dolu mannu ‘e su contribuente,
s’in manos tuas ponet una pratica.
De bizantinos erede fanatica,
los superas in s’arte ‘e sos cavillos.
Podet dormire sonnos tranquillos
chie chircat in te giustiscia umana.
Però sa nostra babele romana
si cret sa mama de dirittu ancora.

SA GIOGA PURU IN GRIGIO-VERDE
Un’operazione militare
hat fatt’ispantu in Capo Teulada,
chi mancu sa famosa Ottava Armada
battaglias gai hat dévidu affrontare.
Si coment’in Sardigna terra e mare
est tota zona militarizada,
sos militares chi sun in su postu
la deven controllare a dogni costu.
Ma unu réduce ‘e s’ultima gherra,
unu zertu Dessì de ottant’annos,
ignorende de fagher tantos dannos,
intrat chirchende gioga in cussa terra,
chi est tra Porto Pino e Cabuterra,
gai comente faghian sos mannos.
Ma cuss’azardu istadu l’est fatale
pro s’ de unu uffizziale.
Su cale, senza fagher chistione,
li sequestrat gioga e bicicletta
( mancu male chi fit senza manetta,
pro che lu giugher che ladru a presone),
ca cussa gioga est de su battaglione,
mancari chi no giutat istelletta,
Chi bicicletta, gioghitta e coccoi
sun corpos de reatu ischidu hat poi.
Intantu Tiu Peppe for’ ‘e sè,
pensende a s’oriolu ‘e sa pobidda,
istraccu mortu, pro torrare a bidda
s’hat fattu ses chilometros a pe’.
Custa critica fatta da-e me
no lis bogat de sambene un’istidda
a sos chi sutta s’arma democratica
ponen legges borbonicas in pratica.
Zertu, Signor Ministru ‘e sa Difesa,
como has su motivu chi los bantes
cussos uffizziales chi zelantes
sun de s’issoro compitu a s’altesa.
De sa gioghitta sa nobile impresa
servat d’esémpiu a sos cumandantes,
pro chi difendan sempre cun coraggiu
sa gioga, parte de su casermaggiu.

Ma fin’a fagher su dibbattimentu
da-e Dessì sa gioga est custodida.
Sa multa l’hat sa legge istituìda:
seschentamiza francos a su ‘entu.
E ca sas giogas fin pius de chentu,
sa cifra est oramai istabilida.
Si lu cundannan pro malafortuna
li costan battomiza francos s’una.
Duncas, como no han pius iscampu
sos chi sa gioga l’haian a coro,
ca si s’abbizan de s’arrivu issoro
sos militares piumban che lampu.
Decorare lu deven in su campu
s’uffizziale cun medaglia ‘e oro,
ca pro su sou eroicu ardimentu
sa gioga puru est de su Reggimentu.

ARTE E PODERE
Est appuradu chi su mundu ‘e s’arte
non s’assuggettat mai a su Podere,
e si li faghet calchi piaghere
de su lucru no intrat mai in parte.
Sicomente s’artista est senza mere,
operat in piena libertade
e non supportat autoridade
nemmancu da-e parte ‘e sa muzere.
Socrate, esempiu ‘e s’antighidade,
mente fecunda de filosofia,
fit vittima ‘e sa greca tirannia
e de Santippe, priva ‘e piedade.
Forsi in passadu calchi monarchia
hat cherfidu a sas artes dare ispaziu,
comente hat fattu Augustu a Oraziu,
ca fit amante de sa poesia.
Dante però suffridu hat un’istraziu,
ca l’han da-e Firenze esiliadu.
Pro cussu hat in s’inferru collocadu
zertos potentes de Tuscana e Laziu.
Manc’oe su Podere est cambiadu,
ca patit sempre cuddu male antigu:
si s’autore l’est fidele amigu,
si podet reputare fortunadu.
Sos Entes chi si prestan a s’intrigu,
de operas pienan magasinos,
in modu chi fizolos e padrinos
ispazzen poi sa paza pro trigu.
Oe che deris grecos e latinos.

SOS EREDES DE LUZZIFERRU
Eredes de su vile Luzziferru
sun esistidos sempre in dogni logu,
naschidos cun s’istintu ‘e ponner fogu,
trasforman s’ambiente in dun’inferru.
Pro issos oramai est unu giogu
reduire sos buscos in chigina.
Prima punida fit cussa faina
cun su rigore ‘e sa Carta de Logu.
Como b’est solu sa manu divina,
ca non bastat pius sa legge iscritta,
pro frimmare sa manu malaitta,
chi est sa causa ‘e tanta ruina.
B’est chie ponet fogu pro vinditta,
chie pro beffe a s’Autoridade;
senza perunu sensu ‘e piedade,
semenan su terrore a mente fritta.
Ma, narzemus sa giusta veridade:
sa campagna no est presidiada,
ecco proite ispuntan dogn’annada
foghistas in piena libertade.
Poi chi sa foresta est allummada
a pagu servit s’Aviazione,
ca s’importante est sa prevenzione,
pro bloccare sa zente iscellerada.
Ispendet miliardos sa Regione,
pro s’impiegu ‘e sos aeroplanos,
mentres sos barranzellos paesanos
servin pius in cussa funzione.
Contr’a sos Luzziferros fittianos,
sos aereos sun un’isperdiziu,
ca s’ischin chi b’hat rundas in serviziu,
da-e sos buscos che restan lontanos.
Duncas, decreten cun pius giudiziu.

RIFIUTOS A PESU
Zertamente bi cheret fantasia,
pro calculare a pesu s’immondizia,
ma cust’Italia -pro rughe e delizia-
hat inventores de ogni zenia.
Sa politica est s’area propizia
pro ponner in piatta sas bideas,
no importat si sun bellas o feas,
ne si renden pius vera giustizia.
S’interessante est chi diat cadreas
a fideles amigos e parentes,
poi bi pensan sos contribuentes,
cand’aumentan tassas e peleas.
E no han a mancare sas tangentes,
ch’han a dever pagare sas impresas,
pro fagher fronte a totu sas pretesas
de totu sos offiscios cumpetentes.
Approvan miliardos de ispesas
- tantu devet pagare Pantalone -
pro appagare calchi ambizione,
fruttu de sas umanas debilesas.
Isperamus chi cussa invenzione
non potat mai ottenner su brevetto,
ca bastat s’attuale cascionetto,
cun sa sua modesta funzione.
De cundanna morale su verdetto
pronunziadu han già sos zittadinos
contr’a sos malaittos aguzzinos,
sempre prontos a ponner su colletto.
Però cussos assurdos determinos
creo chi no approden a niente.
Sos chi contan sos pilos a sa zente,
sun de sa libertade sos becchinos.
Ed est coment’e contare sos pilos,
tassare s’alga cunfromm’a sos chilos.

S’ANNUZU TRA PROCURAS
Su esser in annuzu tra procuras
est pro sos criminales una festa;
fatalidade pro sa zente onesta,
suggetta a sequestros e usuras.
Ma custa crisi goi manifesta
non turbat sos Poderes de s’Istadu,
ne si curat perunu magistradu
de sos collegas sutta ‘e inchiesta.
Ma poi ch’isse puru est indagadu,
invanu isettat s’issoro difesa.
Tand’iscoberit chi sa parte lesa
est su pentidu chi l’hat accusadu.
Ma ancora no l’han bene cumpresa
custa filosofia ‘e sos pentidos:
mentres finas a deris fin bandidos,
han de giustizieris sa pretesa.
Da-e s’Istadu sun retribuidos
pro narrer solu su chi lis cumbenit.
Ite Giustiscia est custa, chi sustenit
criminales chi restan impunidos?
B’est finzas chie sa mazzetta ottenit
da-e sa cosca ch’est servende ancora,
nende chi da-e su “giru” nd’est fora
e invec’ispiende andat e benit.
Sempr’informada fin’a s’ultim’ora,
sos collaboradores de Giustizia,
bastat chi dian falza una notizia,
sa malavida nd’essit binchidora.
Mentres sos reos campan in letizia,
tra sequestros, rapinas e drogas,
in su Palattu s’istrazzan sas togas,
pro neghe ‘e sos pentidos cun furbizia.
Su pentimentu de occasione
est diventadu una professione:
veru istruminzu ‘e sa leggisladura,
bettat velenu in sa magistradura.

S’IPPOCRENE SARDA
Bonorva oe est sa Sarda Ippocrene
- funtana cristallina ‘e poesia -
tantu famosa in sa mitologia
ch’hat tentu origine in s’antiga Atene.
Su paragone no est eresia,
si pensend’a sa mitica funtana,
cumparin Musas in figura umana,
buffende s’abba de Santa Lughia.
Ma forsi mai sa Musa est profana,
cando de s’anima est espressione,
e venerat in custa occasione
sos astros de un’epoca lontana.
Non b’hat de Mossa peruna cantone,
ch’in dogni festa non l’hapan cantada,
e preferida in dogni serenada
pro sas bajanas sutta unu balcone.
In custa die a Mossa dedicada,
no m’isco dare tema differente,
ca istupendos mi torran a mente
cuddos versos a Clori angelicada.
Ne sun de trascurare in su presente
tantos poetes de fecunda mama,
ch’in tota sa Sardigna tenen fama,
e tra sos sardos in su Continente.
Oe ch’inoghe riunida est s’ama
de sos amantes de sa poesia,
pensade a sa profunda nostalgia
de s’emigradu, e a sa sua brama.
Sos disterrados pro sa carestia,
in chirca de trabagliu in terr’anzena,
liberos sian da-e ogni pena
e torren prestu a sa terra nadìa.
Ma laudemus como su Pegasu
ch’hat fattu nascher s’Ippocrene Sarda,
‘ue buffadu han sa linfa gagliarda
Luca, Pes, Mossa, Mele, Satta e Casu.

INDIPENDENZIA A S’ITALIANA
In custa nostra repubblic’amena
si reputat dognunu indipendente:
niunu rendet contos de niente
e non connoschet ne legge ne pena.
In sa Giustiscia che in su Tesoro
han sa pretesa d’esser totu meres:
sos ch’han in manu pubblicos poderes
paren amministrende in dom’insoro.
Su magistrad’in sa sua faina
reclamat assoluta indipendenzia
( finzas cando cummittit s’imprudenzia
de dare via libera a Mesina ).
O puru, giudighende a sa lezera,
faddit cumpletamente su bersagliu
e pro su sou giuridicu isbagliu
calch’innozente finit in galera.
Indipendenzia, in sa Sanidade,
cheret narrer lissenzia ‘e ‘occhire.
Ippocrate est s’iscola ‘e arricchire
sos ipocritas senza umanidade.
Morit sutta sos ferros su malàidu
ma s’operazione est bene fatta.
Si calchi pinza ismentigan in matta
est che ismentigare abert’un’àidu.
Cando mai sa legge dat su tortu
a su duttore ch’isbagliat sa cura!
Sa neghe est de su ch’est in sepoltura,
peus pro su malàidu, ch’est mortu!
S’erariu presentat su quadru
de un’appartamentu isvaligiadu.
Isbòidan sas cascias de s’Istadu
ma... proa a narrer ch’est guvernu ladru!
Indipendenzia, in su monopoliu,
est liberu intrallazzu ‘e sos birbantes,
vera cuccagna pro sos trafficantes
de armas, drogas, tebaccu e petroliu.

Mai s’ischit sa giusta veridade
cand’un’iscandalu est nazionale.
Finit in zella calchi manovale,
ma sos barones han s’immunidade.
Indipendentes sun sos piduistas,
mafiosos, illustres mascalzones,
e-i sos ch’inchen sas eleziones
cun su suffragiu ‘e sos camorristas.
Indipendenzia a s’italiana
significat: rapina a manos francas,
truffas in frac, collassos de bancas,
agganzos in s’isfera vaticana.

COMENTE FAGHEN IN BOSA
Comente faghen in Bosa, l’ischimus,
ch’est unu modu de narrer antigu
in risposta, pro buglia, a calch’amigu
cand’in difficultade lu ‘idimus,
o si dare consizu non cherimus
a chi’est trobojadu in calch’intrigu.
Cando mes’imbrogliada est una cosa,
naramus: “Faghe coment’e in Bosa”.
S’in Bosa han fattu sa Sotziedade
de una limba sarda a mod’insoro,
zente de Campidanu e Logudoro!
no la lèdas pro Universidade.
Anzis, su De Profundis intonade
a kappas e tizetas tot’in coro,
ca est che fogu ‘e paza in logu nettu
chi non faghet ne dannu ne profettu.
De custos “Babbos” de sa limba sarda,
ch’ispuntan che antunna in dogni zona,
sempre calcunu preigat in trona
cun boghe autorevole e gagliarda,
disattinende sa zente testarda
chi lis cuntrastat s’ambìda corona.
E si sa limba nostra hat calch’intoppu,
est ca de Dantes sardos nd’hamus troppu.
Ch’in pagu tempus suzzedit guastu
l’immaginamus pro isperienzia.
Insedian consizu e presidenzia
cun su sistema de rugh’e de crastu,
poi luego naschet su cuntrastu
tra mostros sacros de incumpetenzia.
Si puru ‘e s’Atenèo han su fiagu,
lessicu sardu nde mastigan pagu.
Edducas, finza su cunsessu ‘Osanu
lassat su tempus chi hat agatadu,
ca niente de nou hat insinzadu
a chie de su “Sardu” est fittianu.
A sos testos de Porru e de Ispanu
no han aggiuntu nudda e ne bogadu,
ca cussa limba sarda genuina
no hat bisonzu ‘e lua bizantina.

Comente faghen in Bosa? Est ladinu:
lassan pioer cand’est pioende!
Gai totu sos sardos sun fattende,
lassende currer s’abba in su traìnu.
Sa “Limba” sighit su sou destinu
a ciascu ‘e chie l’est istroppiende.
Si puru calchi “Sardinzolu” isgarrat,
“Sardigna” fidi e “Sardigna” abbarrat.

BOIDOS PIENOS DE NUDDA
Titilìas de giàmidos mustrengos
fischinidas de luna sutt’aghedu,
attitidos in rughes de meledu,
che ruéddulas bòltulan sos crastos.
Sos bentos, buluzende sos arrastos,
azzenden trimizones de ammentu;
sas chilandras agatan s’ausentu
in trighinzos de lughes ruinzadas.
Chizas de filighe ispamparradas
si ninnan in sas ràidas isperas,
carignende sas boidas chimeras
chi brotan in su nudda mori-mori.
In sas mindas de Santu Chirigori
calan runzosas sas interinadas
ca sas roccas, a friscu ingraidadas,
sun isguttende lagrimas de ferru.
Su rù narat corrudu a s’aliderru
in nottes de degogliu e de fadigas,
sueran in sa tanca sas ispigas
imberriadas riend’a s’aera.
Cun coronas de chercu e prammaera
sas pantàsimas mudas e chietas
iscràffian sa conca ‘e sos poetas
battizados a nou in Cantareddu.
Remonidasi in d’unu moiteddu
sun farfaruzas de laru e inzensu
cun metaforas bambas senza sensu
piscadas senza tempus e ne logu.
In sos disterros de su nie grogu
traccheddosu che ranos de pabassa,
isperrian disizos de melassa
cun trastes d’ambissìas iscoradas.
A mesudie sas noales fadas
coghen su tipidiu arribisale,
in sos chercos de fumu sa ‘istrale
semenat una tula de suspiros.

S’avrèschida colada in sos chiliros
faghet sos caddos birdes a cadassu;
giutende sos cherveddos a s’ammassu
naschet sa poesia in sos aembros.
Lunas istranzas in chelos colembros
s’isbattulan in mare a manzanile
e in su cagaranzu a s’impuddile
sas mariposas sun in appiccòniu.
Cando bi ponet coa su dimòniu
si ‘oltan sos mannujos in frastimos;
sos ultimos arrivin sempre primos
indeosados de brundos marengos.
Titilìas de giàmidos mustrengos.

S’ONOREVOLE CICCIOLINA
Mai su Parlamentu italianu
che oe a su cumpletu haimis bidu:
bi fit s’isporcu umpare a su pulidu,
su làicu, su pagu cristianu,
su fariscu, su samaritanu,
su piduista e finzas su bandidu.
Però, pro cumpletare sa vetrina,
bi mancaiat solu Cicciolina.
Est fatale ch’a unu Parlamentu
arrivet dogni istratu sociale:
su camorrista, s’intellettuale,
su bon’a nudda e-i su violentu.
Duncas, totu su populu cuntentu
non podet esser mai in generale.
Ma non bastan sas disputas de fora:
intro faghen pius casinu ancora.
Pro issa s’est su populu indignadu
- ca su cumportamentu est pagu seriu -
ma cuntemplan cun aria ‘e misteriu
s’onorevole super-imputadu,
su cale, invece d’esser prozzessadu,
s’afferrat sempr’a calchi ministeriu,
ca forsi salvat su mund’economicu
sa gobba ‘e su ministru-cabucomicu.
Ma niunu hat fattu vilipendiu
a su Podere pius importante,
cand’unu Toni Negri, latitante,
de deputadu haiat s’istipendiu;
e-i com’alimentan cust’inzendiu
pro una Cicciolina esuberante!
Ma si l’han fattu ‘incher s’iscummissa
b’est chie s’identificat in issa.
Si no est bona mancu a faeddare
no nde ‘alet sa pena ‘e fagher critica,
ca s’arte sua no est sa politica,
ma solamente s’arte ‘e s’ispozare;
e si li dan motivu ‘e protestare
hat a cumparrer in beste adamitica.
Cando s’ostilidade est cominzàda
dognunu gherrat cun sas armas ch’hada.

Zertu ch’est tot’improvvisazione
chi sa vera politica traviat,
si s’arte sua dognunu faghiat,
diat zessare sa confusione.
De pornostar, de cantu e de pallone
s’Assemblea bisonzu non teniat.
Ma est possibile ogni cos’istrana
in cust’Italia Ciccioliniana.

AMMINISTRENDE S’INFERRU
S’in zertas biddas lean a sa mèria
sos amministradores comunales,
si trattat de istintos bestiales,
de un’antiga mentale miseria.
Pius che haer origine seria,
est fruttu ‘e gelosias criminales:
senza rejone cheren bider mortu
unu chi d’esser Sindigu hat su tortu.
Chie costòit sa mortale insìdia
tenet istintu de pessima lega
e in totue isfogat a sa zega
cussa sua satanica perfidia:
est capaz’ ‘e ‘occhire, pro imbìdia,
finzas su ch’hat su bar o sa buttega.
Inutil’est chircare su “movente”
inue ‘occhin a balla pro niente.
S’omine ch’hat sa mente deformada,
hat s’odiu pro unicu alimentu,
e isfogat su sou avvilimentu
contr’a sa zente pius istimada.
In Oniferi Sindigu non b’hada
ca sa Giustiscia hat fattu fallimentu,
ma su Guvernu li dat pagu pesu
e lassat cussu populu indifesu.
A pius de sa vile infamidade
de cussos criminales delirantes,
bessin a pizu sos politicantes
chi attribuin totu a povertade,
pro reclamare, senza dignidade,
contributos suzzosos e costantes.
Difatti, calchi “anonima” colpida,
fit tota zente misera e famida!!!
B’hat zente chi si faghet paladina
finzas de bandas de odiu gràidas;
b’est chie puru faeddat de fàidas,
chi sun de sas familias ruina;
ma sa feroze furia assassina
est solu fruttu de mentes malàidas,
e pro bi ponner rimediu urgente
non bi cheret Giustiscia renitente.

Cando servit Giustiscia a dogni costu,
devet esser presente ue bisonzat,
ca est dovere chi su frenu ponzat
a chie hat su carveddu for’e postu;
invece chie pro cussu est prepostu
est latitante e non si nde ‘irgonzat.
Gai, pro dogn’interventu mancadu,
faghen sa beffe a isse e a s’Istadu.

METAPOESIA ADDOLIMADA
Cand’unu ch’essit da-i s’istradone
pro che trocher in d’una pitteracca,
giustificat s’idea sua macca
disturbende Aristotele o Platone.
Com’hapo appresu in televisione
chi poetica noa hamus affacca:
un’atera currente han post’in bia
e l’han giamada Metapoesia.
Sos poeteddos ch’ischivin sa rima
como pratican custa e lassan cudda,
ca tenen sa virtud’ ‘e sa chibudda
chi s’adattat luego a dogni clima.
Già si nde cumprendiat pagu prima,
como, però, no nde cumprendes nudda:
est unu tipu ‘e poesia tisica
a manu tenta cun sa metafisica.
In custa poesia “interiore”
han a esser pius agevolados
cuddos poetas sempre addolimados
coment’e tantas battos in calore,
chi forsis finza fattende s’amore
s’abbrazzan sa muzere angustiados.
In s’insoro poeticu frasariu,
su mundu est un’immensu cronicariu.
Non lis cunfaghet ne abba ne bentu,
e ne sole, ne luna, ne istellas:
fentomende sas cosas pius bellas
bi ponen sempre lua a cundimentu.
Non zessan mai s’insoro lamentu
mancu si sun suzzende caramellas.
E linghen zertos criticos, ch’istiman
sos ch’a furi’ ‘e tuncios si subliman.
Como, totu s’ischeddu ‘e sa cultura,
faghet de cussa poesia ispreccu:
siat in Othieri o in Rebecu,
sa chi triunfat est sa disaura.
Cuddos pianghijolos de natura
sun imparend’a piangher in grecu,
e poi si cimentan in sa proa
cun custu tipu ‘e poesia noa.

Zertu chi custu Metapoetare
faghet pensare a su metabolismu.
Ma abbandona su romanticismu
e lassa perder su crepuscolare,
caru poeta! Pensa ‘e ti purgare
- cun sal’inglesu o cun s’interoclismu -
pro chi, pulidu da’ ogn’imbarazzu,
cuncurras a su prossimu... intrallazzu.

VANDALOS IN VILLA DEVOTO
Sos ch’in Casteddu pigan a Palattu
cun sambene vandalicu in sas venas,
meritaian postos in cadenas
cand’a s’opera antiga mudan trattu.
Sos vandalos modernos forsi han fattu
pius dann’ ‘e sas ciurmas Saracenas,
cand’un’antigu manufattu edìle
o l’han distruttu o cambiadu istile.
Sos Gensericos ch’in Villa Devoto
in custos barant’annos han regnadu,
s’impronta sua ognunu hat lassadu,
che cando passat unu terremoto.
Cant’han ispesu ischire no lu poto,
ma zertu ‘inari nd’han isperdisciadu.
Però tramandan a s’eternidade
sos muntonarzos intro ‘e sa zittade.
Finza su mur’ ‘e zinta, pro puntiglia,
l’han demolidu pro lu fagher nou,
mentres fit mezus in s’istile sou,
cun su coronamentu a barandiglia.
Ma non faghen peruna meraviglia,
custos chi giughen su carveddu in brou:
si podet dare chi calchi mancante
cras nde ‘ettet sa Turr’ ‘e s’Elefante.
Si nd’ ‘ettan calchi cheja o cunventu,
sutta-sutta b’hat sempre calch’intrigu:
su ch’hat distruttu su mercadu antigu,
podet distruer dogni monumentu.
Un’omine chi tenet cuss’intentu,
de sa zittade sua est inimigu.
Est capaze de ponner, pro prinzipiu,
finzas sa dinamite in municipiu.
Ma, torrend’a sa Villa ‘e sa Regione,
chi nachi servit pro rappresentanzia,
b’hat locale e terrinu in abbundanzia,
però intro b’hat solu una persone.
Nemmancu a calch’istranzu cabuzzone
paret chi siat utile un’istanzia.
Ma tando, si non servit a niente,
abberzan nessi su parcu a sa zente!

Ma forsi - a su chi s’idet da-i fora -
sun preparende cussu parcu apposta,
già ch’in Consizu han fattu sa proposta
de dare a tantos zingaros dimora,
e gai creschen su degradu ancora
( si sa zittadinanzia est disposta ).
Sos zingaros los hana tantu a coro,
però allargu da-i dom’insoro.

TOTU FAGHET ISPETTACULU
In su mund’ ‘e sa televisione
diventat ispettaculu ogni cosa:
sessu, camorra, poesia e prosa
politica, ateismu e religione.
Intrat in domo, in cheja, in presone,
mustrat zente simpatica e pazosa:
bindigh’oras sa die istat azzesa
isfruttende s’umana debilesa.
Ue istudios sun televisivos
nott’e die b’hat “ospites” in lista:
feminas cun sas coscias ben’in vista
e omines “gagà” presuntos divos,
magos, zanfarajolos abusivos,
fanaticos ch’isettan s’intervista.
Pro sa tivù non b’hat perun’ostaculu,
dogni bragheri faghet ispettaculu.
Calchi tivù però non si cuntentat
de sa solita cronaca mundana,
e tando, che perfetta ruffiana,
su “Giogu de sas coppias” inventat,
gai sa gioventude inie tentat
s’avventura ch’istuzzigat sa gana:
totu chircan, in bidda o in zittade,
nessi mesora de zelebridade.
Ma sicomente non totu un’istella
in cussu firmamentu han in favore,
pro poder fagher s’ “ospite d’onore”
de Baudo, d’Enrica e Raffaella,
tando cumbinan calchi “marachella”
pro chi los giamet nessi su pretore;
chie sorte no’ hat pius propizia
dirottat su furgone ‘e s’immondizia.
Pro chi non restet in s’anonimadu,
calcunu tentat sa rapina in banca;
no l’importat si non la faghet franca,
s’important’est bessire ammanettadu.
Calch’ateru, pro esser fentomadu,
chircat de ponner fogu a una tanca:
già chi non podet esser eccellente,
mezus pessima fama che niente.

Paret chi siat destinu crudele
pro chie in video non s’est bidu mai,
pro cussu a Berlusconi e a sa Rai
curret sa zente che musca a su mele,
o pro risolver quizis in tele
o lamentare s’insoro guai
a Tortora, a Costanzo, a Badaloni,
ch’in terra han su podere ‘e Sant’Antoni.

PRO SOS FALZARIOS
DE OGNI ZENIA
In custu mundu no’ esistin solu
ispazzadores de falza moneda:
de zente falza si nd’agatat meda
e si costoit in dogni chizolu.
In sas piattas su zanfarajolu
ispazzat roba ‘e nailon pro seda,
gai comente in astas ambulantes
benden pro veros sos falzos brillantes.
Esistin tantos falzos integrales
chi si prestan a totu sos bisonzos,
e non solu ingrangùgliana sos gonzos,
ma finzas magistrados e legales.
Immaginade in cantos tribunales
recurren a sos falzos testimonzos
pro fagher cundennare un’innozente
o pro assolver su delinquente!
E cantos falzos quadros antigos
barattan pro “quadru ‘e autore”!
Duncas, si non ses bonu intendidore,
non t’abbizas de truffas e intrigos:
podes connoscher sos falzos amigos
ca si fuin a s’ora ‘e su dolore,
ma t’ispazzan pro unu Modigliani
calchi quadru ch’hat fattu Fanfani.
Pro falzidade, in epoca antigoria,
fit famosa sa zente farisea.
Ma lassemus s’antiga razza Ebrea
e torremus a nois senza boria,
ca finzas in sa nostra sarda istoria
b’est su famosu “falzu ‘e Arborea”:
su popolu ‘e s’istoria est fieru,
ma no’ ischit s’est faula o s’est beru.
Sa falzidade triunfat gagliarda
in poesia, in musica, in pintura.
Deus nos salvet da-i sa cultura
de sos falzarios de sa limba sarda:
sa faccia nostra nde restat guvarda
solu leggende s’insoro iscrittura!
E puru b’est su chi faghet de palu
a zente falza che dinari malu.

Ancor’esistin sos falzos profetas
chi annunzian ateros Messias,
comente puru b’hat falzas giurias
indeosadas de falzos poetas,
chi disturban istellas e cometas
pro imbellire istranas poesias
cun termines, in usu tra falzarios,
piscados a sa zega in sos glossarios.

BELVAS TRAVESTIDAS
Resultat da-i calchi censimentu
chi zertas belvas sun a su tramontu,
ma si chie lu faghet no est tontu,
s’abbizat puru, in su rilevamentu,
chi sas belvas sun sempre in aumentu
si ponen zertos omines in contu:
bi nd’hat chi faghen parte ‘e cussa rese
pius cun duos che cun battor pèse.
Leggimus dogni die in sos giornales
sas impresas de omines “balentes”:
istrages de pizzinnos innozentes,
rapinas, violenzias carnales.
Est a offender cussos animales
su los paragonare a sos serpentes;
duncas, sas veras belvas pius viles
si travestin de omines ziviles.
Sas chi sun in forestas o in tancas,
anzis, dan pius paga impertinenzia,
ma sas chi renden dura s’esistenzia
sun sas belvas chi giughen duas ancas.
Giughen cravatta e camijas biancas
e campan in su mundu a prepotenzia:
finz’in presone, zertos terroristas,
cheren esser trattados che turistas.
Sas belvas, cando cheren petta crua,
andan in chirca ‘e differente fera,
tant’est beru chi mai una pantera
hat divoradu sa simile sua;
non bocchin ne cun drogas ne cun lua,
che ateros avanzos de galera:
sas ienas tra issas fraternizan,
sos omines, invece, s’istocchizan.
Cust’est s’omine tantu zelebradu,
capaze ‘e ogni barbaru assassiniu,
s’omine chi de zincu o alluminiu
paret ch’hapat su coro corazzadu.
Deus cun ludu s’omine hat criadu
pro gestire su mundu in condominiu,
ma imbruttadu invanu s’hat sas manos
cretende ‘e fagher esseres umanos.

Su chi semenat luttos e terrore
deviat esser simile a s’istria,
ca narrerli “omine” est un’eresia
e giamarelu “belva” est un’onore:
E puru, su Divinu Criadore,
l’hat post’in mesu a s’umana zenia:
l’aggiunghet vida pro si cunvertire
e isse, invece, sighit a bocchire.

INSABBIADURAS EVANGELICAS
S’Italia non brillat in decoro
cun iscandalos goi frequentes
chi ordinzan a turnu sos Potentes
pro arricchire sa busciacca insoro:
astas truccadas, carceres de oro,
fundos nieddos, bustas e tangentes.
Sos areniles biden dogni die
sas brutturas ch’insabbian inie.
Male mandigadore a cundimentu
est cust’ispezia de epidemia:
da-i su centru a sa periferia
si propagat che peste ogni momentu.
S’in su Guvernu tirat cussu ‘entu
sas giuntas sun in bona cumpagnia:
oramai remediu non b’hada
ca sa corruzione est in falada.
Dogn’omine politicu ingulpadu
pro su partidu sou est innozente,
e lu difendet accanidamente
da-i s’ “arbitriu” ‘e su magistradu.
Pro su ministru e pro su deputadu
b’est sa Cummissione inquirente,
da-i sa cale - a cantu hamus connotu -
benin puntualmente assoltos totu.
A su populu faghet meraviglia
chi finan totu sos salmos in gloria,
e sighit sempre sa matess’istoria
de ladros cun s’onesta mascariglia.
Chie de su Podere hat sa maniglia
intrat e furat e cantat vittoria,
sos rapinados finin in presone
reos de grave diffamassione.
A sas vittimas restat su cunfortu
de sa suprema giustiscia Divina
- ca Deus punit sa mala faina
in cudd’eterna vida, poi mortu -
Si criticas sos ladros ses in tortu,
lu narat finzas sa Santa Dottrina;
duncas, in vida, su rapinadore
hat finzas s’Evangeliu in favore.

Penso chi cando sa Cummissione
giudicat calchi ministru imputadu,
totu s’ammentan chi Cristos hat nadu
( impedend’una lapidassione ):
“Bettet sa prima pedra sa persone
ch’in mesu a bois est senza peccadu”.
Tando totu s’abbaidan appare
e assolven invec’ ‘e cundennare.

S’ISCOBERTA DE SOS BARRANZELLOS
Poi de tantu tempus ch’han pistadu
su bruncu in mesas tundas e ovales,
sos amministradores regionales
han iscobertu su Barranzelladu.
Cantos dannos haian evitadu
si fin istados pius puntuales!
A sequestros, a furas, a fogos
haian postu frenu in tantos logos.
E mancu male, poi ‘e barant’annos
de autonomia...e de cuccagna,
chi chie lis est intrada in sa meragna
s’isperienzia ‘e sos bezzos mannos,
chi prevenian delittos e dannos
solu presidiende sa campagna:
sos Barranzellos, ca sun de su logu,
miran su ch’est avvesu a ponner fogu.
Ma sos ch’han man’in pasta in sa Regione
sun sempre surdos a dogni protesta:
sos miliardos a manca e a dresta
isbain ( tantu pagat Pantalone )!
A pagu servit s’Aviazione
poi chi leat fogu una foresta,
ca est che cando calchi conchitortu
ponet su buscicante a unu mortu.
Sos Barranzellos connoschen sas pistas
inue passan sas belvas umanas
e poden dare sa cazza in sas tanas
a bandidos, furones e foghistas.
Presidiu ‘e sas zonas pius tristas
sun istados in epocas lontanas,
e finzas como salvan sos padentes
in sas zonas inue sun presentes.
Sos Barranzellos sardos fin pigados
a sos unores de s’antiga istoria,
ma sos chi tenen curza sa memoria
de issos si nde fin ismentigados
e-i sos luzziferros patentados
pro barant’annos han fattu baldoria.
Ma como ponen fine a sos bistentos
e nd’assumin tremiza e chimbichentos.

Bos auguro, caros Barranzellos:
Deus bos diat fortuna e coraggiu,
isse ghiet in dogni viaggiu
pro salvare sos buscos pius bellos.
Rispondedas a totu sos appellos
ponzende in libertade dogni ostaggiu
e in galera sa zente maligna
chi faghet disonore a sa Sardigna.

S’ACCADEMIA DE SU CORTEGGIAMENTU
Pro sa cultura ‘e su genere umanu
sas facultades sun in aumentu;
un’atera est pro nascher a momentu,
adatta a su “gallismu” italianu:
a Napoli, a Roma e a Milanu
faghen iscola de corteggiamentu,
inue azzettan zigantes e bascios,
lesbicas, floscios, feminas e mascios.
Su docente de custa disciplina
est unu zertu Zuseppe Cirillu,
chi poi ‘e haer fattu su “mandrillu”
hat inventadu sa noa dottrina
e como insinzat s’ojada assassina
ch’attraet finzas unu coccodrillu:
su ch’est de cussas armas in possessu
faghet istrage de s’ateru sessu.
S’annu accademicu ‘e custa materia
hat sa durada ‘e battordighi dies,
(tue, lettore, forsi ti nde ries,
invece, custa, est una cosa seria!).
Dadu ch’est sa quota una miseria,
si mi das retta, b’andas e t’iscries:
ti diplomas in s’arte ‘e sos iscancos
solu cun chimbighentamiza francos!
A chie de cuss’arte hat sa pagella
no li resistit niunu in s’amore;
cun su diploma de conchistadore
luego incontrat s’anima gemella,
e si s’arruffianat cun Pannella
diventat senatrice o senatore:
cun ojadas e mossas a effettu
che trazat tota s’assemblea a lettu!
Chie cheret un’arte praticare
non podet zertu imparare a sa sola:
in America abbertu han un’iscola,
ch’insinzat s’arte de limosinare!
Duncas, non b’hat de s’inscandalizzare
pro custa facultade noitola
chi ammaestrat sa zente ‘irgonzosa
a conchistare s’isposu o s’isposa.

Como abolire in s’Universidade
deven s’inzegneria mineraria,
ca reputadu han pius nezessaria
sa noa cortigiana facultade.
Cuddos chi tenen una zerta edade
arriscan s’ ‘ajania involontaria,
ma ecco chi s’appositu diploma
dan in Milanu, in Napoli e in Roma.

SOS MEMBROS ARTIFICIALES
In d’una indagine ‘e sa Sanidade
fatta da-i sos membros cumpetentes,
han contadu sos “membros” impotentes
pro li torrare sa virilidade.
Già ch’in sa Vintunesima Unidade
b’haiat casos pius frequentes,
luego han prenotadu, puntuales,
dughentos “membros” artificiales.
Ma cando han iscobertu chi s’ispesa
su miliardu e mesu toccaiat,
si sun abbistos ch’isbagliu b’haiat
e fattu han torra su contu in lestresa.
Tando restada male b’est s’Impresa
chi frunire sas “protesi” deviat,
dadu chi su contabile, confusu,
b’haiat postu unu zero in piusu.
Si no haian tentu sa prudenzia
de controllare cuss’isbagliu mannu,
Casteddu haiat binchidu su pannu
in su campionadu ‘e s’impotenzia.
Poi nachi no hamus assistenzia,
cun totu cussos “membros” in-d-un’annu
ch’haian soddisfattu zertamente
sos bisonzos de totu s’Occidente!
Bastat un’iscrianu disattentu
pro imbrogliare su populu-arveghe
Si calchi dattilografa nd’hat neghe,
l’hat haer fattu cun nobile intentu;
infervorida da-i s’argumentu,
moltiplicadu hat su vinti pro deghe:
calcuna inie puru sempre b’hada
a sa virilidade interessada.
Cun cussos “membros” a su silicone
nos han mustradu cant’est ruta in basciu
sa Sanidade, e chi est a s’isfasciu
pro sas ispesas senza discriscione.
Ecco proite finin in presone
cussos chi ponen manu a su calasciu,
ca oramai leadu han su visciu
de s’interessu in attos de offisciu.

S’ “Azienda Salude” est già in coma,
ma s’isperdisciu ancora est niente.
Assumancu lis benzat a sa mente
de mutuare “vaginas” de goma!
Nos hat a parrer sa “Marcia su Roma”
de su sessu virile impenitente:
mezus recurran a sos ispidales
chi no a violenzias carnales.

ANDREOTTI A SA CORRIDA
Su tres de cabidanni ‘e s’ottantotto
Corrado hat presentadu a sa “Corrida”
su ministru gobbosu, chi ogni chida
dat sempre calchi numeru a su lotto.
Ancora esistit calchi buccalotto
chi l’adorat che unu santu in bida,
massimu cando giampat sa chisura
tra ministeriu e buffonadura.
Ma tando no est sola Cicciolina
attrice e deputadu senz’ostàculu,
già ch’in Tivù dat finzas ispettàculu
su “Rigoletto” de sa Farnesina.
Prima fit solu sa manu divina
a fagher unu simile meràculu,
ma como ch’in Tivù est tot’elàsticu
hamus a bider su Paba in “Fantàsticu”.
E puru sa “Corrida” est attrezzada
cun istrumentos de ogni zenia
pro poder replicare a s’ironia
fattendeli unu tipu ‘e “Correddada”.
Invece, una segnora impampinada
l’hat rendidu un’omaggiu in poesia.
E poi una marca ‘e cortigianos
l’han saludadu zocchende sas manos.
In totue, coment’e Sant’Antoni,
de s’ “esibire” non s’istraccat mai:
cando non ti l’agatas in sa Rai
l’incontras in s’imperu ‘e Berlusconi.
(Tenet rejone Corrado Mantoni
cando ripitit: “Ma non finit gai!”).
Est diventadu, pro sos giornalistas,
su pedrusimula ‘e sas intervistas.
Cuddos chi curren a l’intervistare
de Andreotti tenen tropp’istima,
e tentan de ischire in cale clima
sa politica solet navigare;
ma poi ch’han finidu ‘e l’iscultare,
dognunu nd’ischit pius pagu ‘e prima,
ca isse ponet sempre s’impero
e non rispondet ne Si e ne No.

Andreotti possedit sa rezzetta
de sa pindula adatta a dogni male.
Pro su populu nostru geniale
hat iscobertu sa cura perfetta:
nos cunfaghet pius sa barzelletta
chi non sa Corte Costituzionale!
Custu ministru de brillante idea,
emmo cras ti l’isgombrat sa cadrea!

SOS INVASORES DE SA RAI
Oramai sos centros de Podere
l’ischimus chi sun totu lottizados:
pro sos chi sun in Palattu arroccados
est diventadu dirittu-dovere,
e a chie lis faghet piaghere
affidan sos poderes delegados.
Han lottizzadu istampa e Rai puru
coment’e tancas serradas a muru.
In radio e tivù non mancan mai
sos chi unin su lucru a sa mania:
sun professores de “Tuttologia”
chi mandigan e dormin in sa Rai.
Però, si pro vint’annos sighin gai,
a si nd’appoderare issos ebbia,
finit chi radio e televisione
lis ispettat pro usucapione.
No isco in su cuntrattu it’han iscrittu,
però deo, a su postu de cuss’Ente,
lis haia cunzessu s’emittente
solu s’haian pagadu s’affittu.
Invece, ca los pagan, han dirittu
de ciarrare a ispesas de s’utente.
Meda sa ciarra, sustanzia nudda:
aria frissa cun azu e chibudda.
Ma custos logorroicos docentes
chi occupan sa Rai nott’e die,
forsi mantenen sa cattedra inie
pro istruire sos teleutentes.
In milli disciplinas cumpetentes,
non serran bucca mancu a mesudie.
Sos faeddos pioen a diluviu
chi paret chi nd’istuden su Vesuviu.
E cando sun in duos o in trese,
paren arrejonende in su gaffè:
su professore est su divinu Re,
sos invitados li unghen sos pese.
Gai pro trinta dies a su mese,
tantu pro tenner su “programma” in pe’,
ca, segund’issos, una cosa est zerta:
chi sun tot’iscultende a bucc’abberta.

Però sa Rai hat s’obbligu ‘e difender
s’utente da-i cussos invasores,
ch’impittan radio e televisores
pro giugher fumu senz’arrustu a bender.
Sos chi los cheren bider e intender
(muzeres, fizos e ammiradores),
si non suffrin de fidigu o de coro,
si nde cazzen sa gana in dom’insoro.

GALLERI IN GALLERIA
Tathari podet bantare un’artista
chi no est mastru in su pinzellu ebbia;
no est solu famosu in galleria,
figurativu e caricaturista,
ma brillat puru in sa nostra Rivista
unorende sa sarda poesia.
Sas pinturas han doppiu valore
cand’est finzas poeta su pintore.
Isfogliende S’Ischiglia, unu manzanu,
de Sant’Andria ‘e su chimbantasese,
agato “Su cuncordu ‘e sos tres rese”
- sa poesia de Agniru Canu -
ue Galleri cun abile manu
l’hat caricaturadu, in cussu mese;
lanzu che corru e arranchende istraccu,
sutta su brazzu istringhet su paraccu.
“Ciaccuttendi pa Sassari” Galleri
hat su liberu sou intituladu,
inue hat sa zittade immortaladu
da-i su zappadore a s’inzegneri.
E, sicomente fit ferrovieri,
finzas sa Ferrovia hat unoradu
(cand’ancora fit altu su decoro
senz’impreare lentolos de oro).
Cun poesias e caricaturas
Galleri s’est distintu in cuss’impresa:
su mezus de sa “cionfra” tatharesa
isse esprimit cun versos e figuras.
Sos ch’hana ‘idu sas suas pinturas
dognunu nde decantat sa bellesa.
Zertu ch’in s’istatura est menguante,
però in s’arte est sempre unu zigante.
Est sempre istadu in cazza ‘e macchiettas,
Galleri, artista de altu livellu,
e si non trattat pinna e ne pinzellu
t’imminzat unu saccu ‘e barzellettas.
Hat de su bonumore sas rezettas
sempre prontas in fundu a su cappellu;
si calchi die cun isse passizas,
si faghet notte e mancu ti nd’abbizas.

Paulu, ch’est de fertile memoria,
ischit dogni loroddu ‘e sa zittade
e lu raccontat cun semplizidade,
senza presunzione e senza boria,
tantu chi, cando contat calch’istoria,
paret chi siat pura veridade.
Però, dadu ch’hat fazile peraula,
creo chi pintet finzas calchi faula.

SU DIAULU IN TORINU
Su Diaulu esistit, e comente!,
già ch’hat tentadu finz’a Gesugristu,
e si comente como s’est abbistu
ch’a sos cunvegnos b’andat meda zente
- e mancari non servan a niente,
pro calch’albergo est sempre un’acquistu -
tando, cun infernale determinu,
pro isse si nd’hat fattu un’in Torinu.
Sos ch’han leadu postu in cussu tàulu
totu pontificadu han a sa seria
chi parian esoertos in materia
pius de Santu Pedru e Santu Pàulu,
tantu chi tando finzas su Diàulu
tra isse hat nadu: “Ma, porca miseria,
proit’est chi de me faeddan gai
si deo, a maccos, non mi mustro mai?”:
Eppuru in su cunvegnu calchi espertu
s’esistenzia sua hat cunfirmadu,
e chi non solu a Cristos hat tentadu,
poi chi che l’hat giutu a su desertu,
ma finzas oe in die han iscobertu
ch’est guvernende ancora in dogn’istadu,
e cando faghen guvernos de nou
delegat sempre unu ministru sou.
Sos ministros chi ponet in guvernu
non sunu mai senza portafogliu,
e si comente est abile in s’imbrogliu
puntat a sa Giustiscia e a s’Internu.
In sos Esteros regnat in eternu
imminzende cunflittos e degogliu:
su Diàulu sempre hat dadu proa
ch’in dogni accordu bi ponet sa coa.
Est ladru, mafiosu e camorrista,
tentat calchi ministru italianu;
oe si mustrat democristianu,
cras cun sa tessera ‘e socialista,
a boltas faghet finzas s’affarista
bestidu ‘e cardinale in Vaticanu.
Ordinzat sequestros in combutta
cun sos bandidos intro ‘e calchi grutta.

L’han cunfirmadu finzas in Torinu
chi su Diaulu est continu in gita:
a boltas si trasformat in De Mita
e a boltas surrogat a Bettinu.
Cando dezidit de fagher casinu
si presentat bestidu ‘e gesuita:
inue b’hat radunu ‘e battigorros
isse ficchit sa coa e-i sos corros.

SA GIUSTISCIA INGIUSTA
Sa Giustiscia, in s’epoca romana,
rappresentada fit che una dea:
in d’una manu haiat s’istadea,
in s’atera un’acuta durlindana.
Issa fit simbulu ‘e virtude umana
e puniat sa zente chi fit rea;
già chi sa sua immagine fit custa,
sa zente presumiat chi fit giusta.
Però como sa fama est differente,
c’applicat su dirittu a su contrariu;
ma non pro calchi errore involontariu,
a su cale est suggettu ogni vivente,
ma pro gulpa de calchi prepotente
chi si cumportat in modu arbitrariu,
tantu ch’est boghe ‘e populu costante
chi sa legge favorit su birbante.
Medas boltas bidimus magistrados
chi servin sa giustiscia malamente,
ca invece ‘e puntare a oriente,
ue sos criminales sun cuados,
cun d’unu giru ‘e chentottanta grados
boltan sa faccia e tuccan a ponente,
e andan a chircare su bandidu
in s’ortu de su colzu ch’han bocchidu.
In Oniferi sa Giustiscia, a tortu,
hat aggiuntu dolore a su suffrire
cand’hat dispostu de perquisire
sa domo ‘e tres onestos ch’hana mortu.
Muzere e mama, invece de cunfortu,
cuss’infamia han devidu patire,
provochende isfidùzia legittima
in chie ‘e sos delittos est sa vittima.
Su ch’operat cun tale determinu
hat un’ “alibi” sempre preparadu:
chi sa gulpa no l’hat su magistradu,
ma sa legge ch’osservat a puntinu,
che chi non tenzat neghe s’assassinu
ma su fusile ch’isse hat isparadu!
E cun s’amparu de cuss’istrumentu
mai lu toccat ne abba ne bentu.

Si sa Giustiscia ti serrat sa gianna,
non balet nudda sa tua protesta:
cando ses in balìa ‘e sa tempesta
nd’has aju ‘e l’invocare a boghe manna!
Ma non si salvat da-i sa cundanna
chi decretadu l’hat sa zente onesta:
sa pubblica cundanna est un’accontu,
ma sa divina est chi saldat su contu.

SA ZINTURA DE SEGURESA
A bi creides chi m’hat fattu pena
su ider custu populu indolente
in d’una diventadu ubbidiente,
de manu sua ligadu a cadena?
Tanta zente de boria piena
est como a suttapanza che molente,
però m’abbizo chi sa zent’istolta
fors’est mezus ligada che isolta.
Ma custa invenzione ‘e sa zintura
como m’hat fattu ‘enner a sa mente
chi non cheren ligados solamente
sos chi viaggian intro una vettura,
ma finzas sos artistas de sa fura
cun ministros ch’han s’hobby ‘e sa tangente:
ladros ch’han campu liberu ‘e furare
chi paren cun sa legge a mesappare.
E cantos assassinos terroristas
cust’istrana giustiscia hat liberadu!
Pentidos ch’han onestos ingulpadu,
mafiosos, bandidos, camorristas,
ch’in virtude de legges “garantistas”
campan a ufu a gàrrigu ‘e s’istadu.
Cando sun in combutta in sos impreos
cheren ligados zuìghes e reos.
E proite lassare in libertade
ninfomanes de lussu ‘e altu rangu
chi cun s’iscuja ‘e ballare unu tangu
si prostituin in soziedade?
Si no han sa zintura ‘e castidade
andan a lettu finzas cun s’orangu,
cun legittimu orgogliu ‘e sos maridos
cuntentos d’esser de corros frunidos.
Si troppu duru so, domando venia,
però de protestare hapo rejone.
Proite non ligare a su timone
sos Carontes ch’imbarcat sa Tirennia
chi sa Sardigna han leadu pro Kenia
e sun continu in agitazione?
Ma pro chi sos “marò” non sian solos,
lighen puru sos meres de sos bolos.

B’hat zente meda ancora de ligare
umpare a sos piratas istradales:
maniacos, tifosos criminales
chi andan a su campu a s’zzuffare,
politicos ch’han s’azza ‘e cadreddare
appena lis abbrùncana sos males:
s’haian nessi un’aìzu ‘e decoro
si ligaian goi a manu insoro.

REST’ AINU, LINTU E PINTU
Rest’àinu, si gai ti cumbenit
già chi non podes caddu diventare,
tant’in Sardigna su tou orriare
disturbat solu a chie ti sustenit.
Chie sutta sa mola andat e benit,
non si podet in giru abbaidare.
Non bidet ite b’hat for’ ‘e giannile
chie giughet trint’annos su facchile.
Rest’àinu, non cambies bisura,
si de sa “limba” non ti ses abbistu,
ca non bi podet mancu Gesugristu
cun àinos ch’hat fattu sa natura.
Ti dat fastizu ogn’àtera cultura
ca ses abituadu a su crabistu.
S’abitudine tua est una sola:
d’esser tiradu tirende sa mola.
Rest’àinu, mancari cattedraticu,
iscazzadi sa musca cun sa coa;
a orriare in sardu nessi proa
e gai forsi ses pius simpaticu,
e podes esser finzas pius pràticu
cando ti ponen sa latranga noa.
Chirca de non nde fagher unu dramma
cando t’agatas sa “limba” in programma.
Rest’àinu, masedu e imbastadu,
su visciu ‘e orriare ‘ogadichelu,
ca tantu òrrios tuos a su chelu
de seguru non nd’hat mai arrivadu.
Solu calchi collega has ischidadu
e tand’isse rispostu t’hat cun zelu.
Ma forsi tue ses cumbintu ancora
chi s’òrrias ispuntat s’aurora.
Rest’àinu, comente ses naschidu,
lassa limba, cultura e nazione;
si non t’aggradat sa Sarda Regione,
su mundu est mannu, chirca àteru lidu.
Ma pro cant’in Sardigna tenes nidu
non dias tortu a chie hat sa rejone.
Si ses amant’ ‘e viver in colonia
ti che podes andare in Patagonia.

Rest’àinu, ma zessa ‘e calchidare,
reduende sa “limba” a dialettu.
Has de su culilughe su difettu,
chi diat cherrer su sole oscurare,
pro chi resessat sol’isse a brillare
inu’est oscuradu ogn’intellettu.
Cun tegus paret chi sian torradas
feras famidas de limbas truncadas.

LIMBA E DENTES
Comente dogni limba in dogni ‘ucca
da-i sas dentes est inghiriada,
gai sa limba sarda est circundada
da’ una cricca de concas de zucca.
Si ‘estin in berritta e in mastrucca
chincaglieris e zente istudiada,
e cun s’iscuja de fagher cultura
paschen inue b’hat bona pastura.
Cun sas dentes acutas che resorza
sun che runzinos in chirca ‘e proenda:
sa limba isfruttan che una sienda
e si nde servin pro mandigadorza.
Faghen bardanas in dogni cussorza
accabarrende poetas in prenda,
subra sa limba mandigan e bien,
ma male la faeddan e l’iscrien.
Inventan cunferenzas, seminarios,
gemellaggios in terras furisteras,
futtin su prossimu in milli maneras
in beste ‘e criticones letterarios;
accampende dirittu a onorarios,
pontifican in festas e fieras,
invece su poeta premiadu
rezzit sa paga ‘e su ‘oe domadu.
E gai in dogni festa ‘e poesia
sa festa bella la faghen sos criticos
ameddados appare a sos politicos
chi dan de contributos garanzia.
In pompa magna sezzin in giuria
cavaglieris de braga apocalitticos,
e sicomente de totu s’intenden,
totu regoglin, istampan e benden.
Ma isperamus ch’hat a benner s’ora
chi sos cuncursos resten in biancu,
gai zertos trumbones, assumancu,
da-i s’iscena ch’istuppan a fora.
Ma si poetas bi curren ancora,
sighit su culturame a tenner bancu,
e, pro cumparrer in primu pianu,
sos autores mantenen lontanu.

Sos poetas sun nudos che suerzu
ca ateros si ‘enden su ‘ortiju:
de s’ ‘acca sarda suzzan su cabiju
ch’allattat tantos canes de isterzu.
Rezzin calesisiat improverzu
però mai si miran in s’ispiju,
ca timende de perder sos proventes
istringhen su cabiju cun sas dentes.

SA MISSA DE SA DOMINIGA
Sa dominiga a missa ‘e mesudie,
sun in gara pelliccias e profumos:
chi semus in d’un’epoca ‘e consumos
chie non l’ischit l’apprendet inie.
Sas segnoras, tra issas, rie-rie,
arrejonan de corros e istrumos,
tantu chi nde pienan sa busciacca
finz’a sa zente chi giughen affacca.
Chissà tot’ite lis passat in mente
propriu a s’ora ‘e su ritu divinu:
tot’a su gira-gira istan continu,
che chi esseran isettende zente,
criende in cussu misticu ambiente
s’atomosfera de unu casinu:
paren dende una festa in domo insoro
tra tualettas e collanas d’oro!
Ti fàghene pensare a Casablanca,
cun cuss’atteggiamentu ‘e palcoscenicu.
Dende sa manu pro s’attu ecumenicu,
issas dispensan a dresta e a manca
calchi elegante foscigada ‘e anca,
calchi isganzada ‘e risu fotogenicu,
cun arte de segnoras istruidas
chi paren ispozadas sende ‘estidas.
Prus ti mustran una faccia bella,
pius ti creschet sa... devozione,
e poi, a s’ora ‘e sa comunione,
ti godis s’isfilada in passerella:
totu caminan a passu ‘e modella
ponzende in mustra cincillà e visone
e mirende, cun s’ostia ancora in bucca,
si sa ‘e nanti est o no in pilucca.
E cando passan cun sa suafatta
(finz’in sa missa su Deus dinari!)
s’ispian sutta oju pari-pari
pro ischire cant’est s’offerta fatta.
Si creen in su bar de sa piatta,
dende sa mancia poi ‘e su Campari:
registran totu su ch’ ‘iden inie
pro lu contare in su restu ‘e sa die.

Issas osservan cun s’ojada clìniga
tota sa zente coment’est bestida:
non bastat su loroddu ‘e tota chida,
ca su pius piccante est sa domìniga!
Et ecco a ite, isfìniga-isfìniga,
sa missa ‘e mesudie est reduida:
pius civetteria che fervore,
trampende a Deus e-i su Rettore.

CUN SU MINISTRU IN DISCOTECA
Deris ballende mi so’ sonniadu
cun De Michelis in d’una balera.
In d’una cordiale atmosfera
hat a sos ballerinos regaladu
cuddu liberu sou intituladu
Dove andiamo a ballare stasera.
Cumpleta pubblicadu hat una mappa
de discotecas ue hat fattu tappa.
Mi so’ ‘isadu d’esser in Milanu
in d’una discoteca ispaziosa:
unu locale de Via Certosa
inue su ministru est fittianu.
Ballan da-i su sero a su manzanu
ballittos birdes o ballittos rosa:
in d’unu lettu mannu, tot’umpare,
s’isterren cando han gana ‘e riposare.
Hapo connotu, ballende in sa pista,
a Pilliteri e a Marta Marzotto;
b’haiat finzas calchi polizotto
pro sorvegliare su ministru a vista.
Milly Gardini, ch’est sa gallerista,
fit sa reina de cussu salotto;
de domo puru fit Leo Castelli,
bi mancaiat Craxi cun Martelli.
Custu dimustrat ch’in sa Farnesina
regnat in dogni tempus s’allegria:
Andreotti brillante in s’ironia,
De Michelis cun s’anca ballerina.
Ma cando ‘enit su turnu ‘e Cicciolina
est su triunfu ‘e sa .
e finzas su Pontefice Romanu
la rezzit mesu nuda in Vaticanu.
De Michelis, Ministru capellone,
si comportat che giovanu modernu,
non pro nudda l’han postu in su guvernu
a su postu de calchi bacchettone.
De custa noa generazione
nde diat bisonzare unu a s’Internu;
auguramus chi custu criteriu
l’adotten puru in dogni ministeriu.

Ma pro non s’avverare su meràculu,
zertos partidos imminzan s’imbrogliu:
cand’est liberu calchi portafogliu,
pro sos giovanos b’est sempre s’ostàculu.
Revocan su ministru ‘e s’Ispettàculu
e che lu ponen in su Campidogliu,
pro fagher sezzer in su postu sou
su culu ‘e calchi ‘ezzu colabrou.

CUMPROMISSU ISTORICU IN FAMILIA
Su cumpromissu istoricu l’han fattu
tra maridu e muzere in Masainas,
in barba a sas politicas dottrinas
chi no ammittin simile cuntattu.
Su chi no est possibile in Palattu
l’attuan in domesticas fainas.
Zessada in su Comune sa maretta
torran ambos a domo a sa brazzetta.
Fin candidados in diversa lista
e dezis’hat su populu sovranu:
isse assessore democristianu
e issa consizeri comunista.
In aula s’iscontru est sempr’in vista
ma poi in domo s’istringhen sa manu.
Si sa politica est “divisione”,
su matrimoniu est “addizione”.
Non s’iscannan pro haer su Podere
ca non lis faghet ne frittu ne caldu;
a sa facc’ ‘e De Mita de Arnaldu
corcan umpare maridu e muzere,
e cand’han fattu s’insoro dovere
sun ambos duos pagados a saldu.
Si puru in su Comune a boltas brìgana,
in domo ‘e sos partidos si nde frìgana.
Sos cumpromissos los faghen ancora
inue de sa paghe han contivizu,
e cando si riunini in Consizu
Occhetto cun Cariglia restan fora.
Forsi han cumpresu ch’est bennida s’ora
de s’intender su babbu cun su fizu,
e si nd’affuttin de Nilde Jotti,
de Craxi, de Martelli e Andreotti.
Si duos membros de una famìlia
chi servin duos diversos partidos,
polemizan però restan unidos
(senz’acchiccare fogu a sa mobìlia)
su cumpromissu istoricu in Sicìlia
podiat dare fruttos garantidos.
‘Ue sa mafia est fattende istraziu
forsi teniat pius pagu ispaziu.

Sos cumpromissos sun coniugales,
ma finz’amministrende han una logica.
Invece, cun sa trampa ideologica,
mascaran interessos colossales,
accabarran immensos capitales
sos espertos in s’arte demagogica.
Totu sas economicas manovras
las cumandan partidos e piovras.

SU BANDU A SOS BANDIDOS
Si ‘ettat custu bandu
a totu sos bandidos
chi han sas tanas in su Supramonte:
informat su Cumandu
ch’arrivin trasferidos
sos ch’han fattu su “blitz” in s’Aspromonte.
S’Arma, sa Polizia
Finanza e Fanteria,
umpare forman un’unicu fronte
e da-i sa peagna
purgan prammu pro prammu sa montagna>.
Mancu delinquentes
poden leare in trampa
cun su dirittu a s’informazione.
Sos missos cumpetentes
prima avvertin s’istampa
e poi faghen s’operazione;
cun regias perfettas
s’assaltu a sas pinnettas
faghen bider in televisione.
Intran senza timore
ca tant’intro b’est già s’operadore.
Su bandu est nezessariu
pro chi sos criminales
iscappen e non sian de ostàculu.
Ischin finzas s’orariu
de sos telegiornales
chi deven trasmittire s’ispettàculu.
Duncas de sos bandidos,
chi si sun già fuidos,
non si nd’ ‘idet manc’unu pro meràculu,
ca sun fora ‘e bersagliu
riende in domo insoro a iscarcagliu.
De su “blitz imminente”
rézzini s’imbasciada
Campania, Calabria e Sicilia,
ca s’ “onorada zente”,
già ch’est organizada,
hat in Palattu amigos de famìlia.
S’arrestu ‘e criminales
in Tivù e giornales
est pubblicadu da-i sa vizìlia.
E dogni informadore
s’ idet chi tenet santos in favore.

GHERRA E PAGHE
Totu sos guvernantes de sa terra
sun potenzialmente criminales,
cand’isbain immensos capitales
comporend’e bendende armas de gherra.
Bastat una banale cuntierra
- cando pienos sun sos arsenales -
pro passare sa ‘oghe a su cannone
chi a su pius forte dat rejone.
Si sun duos istados in cunflittu,
sos àteros sas armas lis procuran;
de sas vidas umanas non si curan,
ne de su ch’hat a esser iscunfittu.
Issos connoschen solu unu dirittu:
alimentare sas gherras chi duran,
e mascaran s’ispeculazione
cun s’aumentu ‘e s’occupazione.
Simulan cristianos sentimentos,
s’ànima pius càndida ‘e s’ambaghe;
masedos che anzones in s’umbraghe
benden totue mortales inventos.
Prim’invadin su mundu ‘e armamentos
poi promoven marcias pro sa paghe.
Sos ch’a Sàtana ‘enden s’animaccia
preghend’a Deus si salvan sa faccia.
Duncas, custos pacificos istados
- tra sos cales s’Istadu italianu -
invocan paghe a sero e a manzanu
bendende bombas e carros armados.
Ma ne guvernos e ne sindacados
pro l’impedire bi ponen sa manu,
ca sos guvernos sun cun sas finanzias,
sos sindacados cun sas maestranzias.
Però sa nostra Costituzione
cuntenit un’articulu importante,
chi sa gherra ripudiat costante
(salvu pro causa ‘e aggressione).
Ma niunu nde faghet menzione,
nemmancu su legittimu .
De su chi cussu liberu cuntenit
attivan solu su chi lis cumbenit.

Cussa Babele inutile - ch’est s’Onu -
como cundennat su boja irakenu;
ma cando s’arsenale l’han pienu
no han pensadu si fit malu o bonu.
Si l’han fattu de s’atomo padronu,
non si mesuren a li ponner frenu,
e no invochen, semenende peste:
benzat a nois su Regnu Celeste!

ANNOTU DE IMPRENTA
LARENTU ILIESCHI
SU RISU, S’AMARGURA
A UNA SANTICA
A BERANU
IN FAMILIA
A CHIE INGANNAT SU TEMPUS
FAMA E PRESUNZIONE
RISPOSTA A PANTALEO SERRA
VIAGGIU A SA LUNA
SU DIVORZIU
GUVERNU DE ANIMALES
SAS IMMONDISCIAS DE CASTEDDU
CAMPA, SARDIGNA!
SU TOTOTRUFFA
CUNTRASTOS DE SARDIGNA
SAS RIFORMAS
ATTITIDOS A PREMIU
MALE SENZA RIMEDIU
PRO MERITU DE SA PINNA A SFERA
SOS EUFEMISMOS
FASSONIS PO SA MARINA
SA LEPPA LUSSURZESA
IS PRESENTADORIS
SU PIANETA AUTONOMIA
SOS TRES PODERES
BILINGUISMU
CANES DE ISTERZU
ADIU, SOLE!
ITE ISPERAS, LUZZIFERRU?
RISPOSTA PRO SAS RIMAS
SA MODA TIRANNA
POLITICA ‘ARVEGHINA
SA GIUSTISCIA UMANA
S’ISTADU PRIMA E POI
SEMENE E INCUNZA
UNA GITA AVVENTUROSA
A ITE SERVIT CUSTA POESIA?
CANES E PASTORES
POESIAS IN SUSPU
UNU MANUALE PRO GUVERNARE
RUNAGHES IN GHERRA
POESIAS A S’AMMASSU
SA PUNTURA ANTISCANDALU
CATULLOS IN SUTTANA
SA PAGHE DE SOS TEULAJOS
DEUS, PERDONA
TERRORISMU E PENTIMENTU
SU PROZZESSU A SA SUPERANONIMA
S’ASSENTEISMU CRIMINALIZADU
INDICOS

SU PIANETA PAGHE
PRIMOS ATTORES
SARDORUM REGRESSIO
IS CRISIS REGIONALIS
PROITE POESIA?
BENEITTA GIOVENTUDE!
IN SU SOGNU CUN TIU ANZELEDDU
A SOS FRANCOS RIMAJOLOS
PRO SAS FILIPPICAS IN RIMA
DISASTROS E ISTANGADAS
IN MANU ANZENA
SU NEGUSCIU ‘E SOS CONDONOS
S’EVASORE E-I SU FISCU
SA MARCIA DE SU DISISPERU
CHE BOE TROBEIDU
A SOS CANTADORES DE GARA
POESIA INCUMPRENSIBILE
ASSISTENZA IMMORALE
DELENDA SARDINIA
AMMENTENDE UNU MASTRU
BENE AUGURENDE
ISTRAGES SENZA SENSU
SA GIUSTISCIA E-I SA DROGA
MANZONI DERIS E OE
IN TEMPUS DE VOTASCIONES
SU COJU DE BOBORE
POBERA CULTURA
BABBU SANTU
TIU ANGHELEDDU, POETA GENTILE
SU DIRITTU A S’ISTUDIU
SA REPUBBLICA ‘E SAS TASSAS
SA MAFIA BIANCA
S’ISTAMPA SARDA
BONANOTTE, RAFFAELLA
PADRE LAMENTU
SU PIANETA CUNCORDIA
S’ATEISMU
LEGGES E COSTUMENES
IN CUNFIDENZIA CUN TIU ANGHELEDDU
LIBEROS MACCOS IN LIBERU ISTADU
RECURRIDE A RAFFAELLA
SU PIANETA ONESTADE
SU NEGUSCIU DE SAS INDULGENZIAS
SU MALAIDU EST MALE ‘IDU
FEMINISMU IN SALZA PICCANTE
A MORTE SOS GIUBBILADOS
UNA LEGGE INUMANA
SU PRESIDENZIALISMU
POTENTE SEGNORA
SA JOGA PURU IN GRIGIO-VERDE
ARTE E PODERE
SOS EREDES DE LUZZIFERRU
RIFIUTOS A PESU

S’ANNUZU TRA PROCURAS
S’IPPOCRENE SARDA
INDIPENDENZIA A S’ITALIANA
COMENTE FAGHEN IN BOSA
BOIDOS PIENOS DE NUDDA
S’ONOREVOLE CICCIOLINA
AMMINISTRENDE S’INFERRU
METAPOESIA ADDOLIMADA
VANDALOS IN VILLA DEVOTO
TOTU FAGHET ISPETTACULU
FALZARIOS
BELVAS TRAVESTIDAS
INSABBIADURAS EVANGELICAS
S’ISCOBERTA DE SOS BARRANZELLOS
S’ACCADEMIA DE SU CORTEGGIAMENTU
SOS MEMBROS ARTIFICIALES
ANDREOTTI A SA CORRIDA
SOS INVASORES DE SA RAI
GALLERI IN GALLERIA
SU DIAULU IN TORINU
SA GIUSTISCIA INGIUISTA
SA ZINTURA DE SEGURESA
REST’AINU, LINTU E PINTU
LIMBA E DENTES
SA MISSA DE SA DOMINIGA
CUN SU MINISTRU IN DISCOTECA
CUMPROMISSU ISTORICU IN FAMILIA
SU BANDU A SOS BANDIDOS
GHERRA E PAGHE