novembar 06-1 - La Patrie dal Friûl

[ MINORANCIS ]
| LA PATRIE DAL FRIÛL | NOVEMBAR 2006 | 19
A Bolzan une cunvigne di puartade europeane
li che i protagoniscj a son i zovins.
MINORANCIS, DIRIT E DIRITS
La setemane stade si è davuelte a
Bolzan la cunvigne su lis minorancis
Minoranze – Diritto e diritti. La
proiezion in anteprime nazionâl dal
film di Ken Loach “Il vento che
accarezza l’erba”, premiât cu la
“Palma d’Oro” al ultin Festival di
Cannes, e à viert la cunvigne miercus
di sere, dant daurman ae manifestazion
un respîr european.
PRIME ZORNADE
Il titul al jere La Union europeane e
lis minorancis linguistichis. Michael
Ebner, deputât dal Parlament
European, al à presentât cemût che
la Union europeane e il Consei di
Europe a puedin tutelâ lis minorancis
linguistichis. Francie Molloy,
membri dal Sinn Féin, al à fevelât
dal procès di pâs e dai cambiaments
in Irlande dal Nord, metint in lûs
cemût che il disvilup economic si è
leât al procès di pâs e cemût che il
status dal irlandês al è cressût di
cuant che al è deventât une des lenghis
uficiâls de Union Europeane.
Po dopo Miren Azkarrate, puartevôs
dal Guvier basc, e à fevelât de
culture basche e de societât civîl
dilunc e daspò de ditature di
Franco.
Dopomisdì i partecipants a àn partecipât
ai workshop su lis minorancis
linguistichis europeanis in rêt, su
la partecipazion dai zovins intes
organizazions di minorance, e su
minorancis e lenghe. La zornade si
è sierade cul Marcjât dai popui, une
mostre dulà che i zovins de
Associazion dai zovins des comunitâts
etnichis europeanis (YEN) e
àn esponût i materiâi produsût tes
lôr lenghis.
VINARS
L’argoment dai intervents al jere la
promozion dal aprendiment des
lenghis minoritariis jenfri i zovins.
Meirion Prys Jones, President dal
Welsh Language Board, al à presentât
lis lôr strategjiis di marketing
par svicinâ i zovins ae lenghe galese.
Miquel Strubell, professôr de
Universitat Oberta de Catalunya, al
à fevelât dai vantaçs che si à se si
studie une lenghe minoritarie. Tom
Moring, professôr di gjornalisim ae
Universitât di Helsinki, al à fevelât
su lis lenghis minoritariis par radio,
in particolâr sui programs pai
zovins.
Dopomisdì si è fevelât di situazions
pardabon pôc cognossudis. Sotirios
Bletsas, grêc di origjin rumene, al à
presentât la realtât dificile dal so
paîs che nol ricognòs lis minorancis.
Paul–Eerik Rummo, Ministri pes
cuestions demografichis e etnichis
de Estonie, al à fevelât de situazion
tai Stâts Baltics. Rudolf Sarközi
infin, president de Associazion culturâl
dai Rom Austriacs, al à descrit
la situazion dai Rom inte UE.
SIERADURE
I lavôrs a son stâts sierâts di
Romedi Arquint, President de
Union federaliste des comunitâts
etnichis europeanis (FUEV) che al à
marcât il dât positîf de presince di
une vore di zovins e che al à citât il
sproc de gnove campagne publicitarie
de Universitât dal Friûl: F=MC2
Furlan = mieç di comunicazion al
cuadrât. Un biel ricognossiment pai
furlans presints.
FEDERICA
ANGELI
sot de lint
j
ORGANIZADÔRS
La organizazion clamade Yen (Yout European Nationalities o
a seconde de lenghe dal acronim JEV, MHE, JCEE ) e je une
associazion apolitiche che à come fin chel di meti in contat
zovins europeans che a apartignin a minorancis etnichis o a
groups etnics minoritaris.
Al è un organisim finanziât dal Consei de Europe. La principâl
iniziative che a organize al è il seminari pascuâl che si
ten vie pe setemane prime di Pasche intun dai paîs di provignince
des associazions che ‘nt fasin part. La cunvigne e je
vierte ancje a associazions di zovins che ancjemò no son
dentri ma che a àn voie di partecipâ. Il prossin apontament
si davuelzarà dai 8 ai 13 di Avrîl dal 2007 a Tarba in Ocitanie
(Fra).
Va a viodi il sît internet de organizazion:
http://www.yeni.org/