novembar 06-1 - La Patrie dal Friûl

14 | LA PATRIE DAL FRIÛL | NOVEMBAR 2006 |
Il poster dal concors
I Arbe Garbe, unics rapresentants des minorancis linguistichis storichis in Italie, a àn
partecipât al Liet Festival, concors musicâl des culturis minorizadis davuelt in Laponie
LA MUSICHE
DES
MINORANCIS
Sabide ai 14 di Otubar i Arbe Garbe
si son esibîts par rapresentâ la musiche
furlane al Liet International, il
concors internazionâl par grups e
cjantautôrs che a doprin une des
milante lenghis minorizadis de
Europe. Il concors, che intai agns
stâts si tignive in Frisie, si e davuelt
chest an a Östersund, une spierdude citadine di 50.000
di lôr in Svezie, inmaneât de comunitât sami. Inte fase
finâl dal concors, i Arbe Garbe a àn vût di frontâ la
concorince di altris undis grups, daspò di vê passât la
prime selezion dulà che si jerin presentâts 61 tra grups
e musiciscj des diviersis comunitâts minorizadis europeanis.
Sabide di sere la jurie e à sielt il vincidôr dal
festival: . La serade, trasmetude in direte de radio e de
television svedese, si à podût scoltâle ancje in streaming
sul sît www.sr.se (di siet fin nûf e mieze di sere). Sul sît
dal Liet International (www.liet.nl), invezit, si à podût
votâ pal premi dal public.
Il nestri grup si è classificât secont cul “web e sms
voting” e setim cu la votazion de jurie: une discordance
che e à lassât un tic di gherp in bocje dai Arbe Garbe.
Almancul al è ce che al semee di capî tes peraulis di
Pagnut (Toni Lorenzini), violonist cjargnel di Vile che
al sune cui Arbe Garbe dal 1998 “Se o sin ducj dacuardi
sul prin puest vincût di un grup sami, cualchi alc si
podarès dî sul rest de classifiche, ma no mi plasin lis
polemichis… une robe però o ai di dîle: lis garis a àn
dutis un grant limit, vâl a dî che a son competizions e
invezit par noaltris la musiche e je fieste, sedi abàs sedi
sul palc. Intune gare, une part di cheste fieste e ven a
mancjâ”!
Pagnut nus conte di une trasfierte impegnative, che ju à
puartâts in 4 dîs al circul polâr. “In efiets, une altre
robe che il Festival al varès dibisugne al è un biel pôc di
“Sud”, come che al à dit il Gion, la nestre vôs” al continue
Pagnut. I Arbe Garbe a àn partecipât cun “O moj
sin”, une biele poesie in benecian, la lenghe des vals dal
Nadison, e in furlan scrite di Federico Galvani, il fisarmonicist
dal grup. “O fi gno, cheste e je la traduzion
dal titul, e je une cjançon che ben e rapresente il miscliç
di culture e musiche che o vin voie di puartâ indenant
dilunc dal nestri percors artistic e duncje nus è semeade
la plui adate di presentâ a un Festival internazionâl di
musiche des lenghis minorizadis” al marche Pagnut.
E se no scjampin anticipazions pai progjets futûrs dal
grup, tai ricuarts dai Arbe Garbe a restin i contats e i
moments di confront che a àn vût la pussibilitât di vê
cun chei altris grups, scambiant cui chei altris partecipants
dal Liet Festival lis lôr esperiencis, confermant
une volte di plui che la musiche e rapresente in plui
parts dal Vieri continent inmò une des formis plui fuartis
di resistence des culturis minorizadis.
La presentadore dal
festival e interviste
Gion, il cjantant dal
grup furlan
Toni Lorenzini
“Pagnut”, violinist
dai Arbe Garbe