pagnà - La Patrie dal Friûl

LAURIN ZUAN NARDIN
Leterature Culture
FOTO GALLERY
Dalai Lama
Fotos di Giandomenico Ricci
Memoriis platadis
Olmis di storie te narative popolâr furlane
di Carli Pup, Buie, 2006
Tenzin Gyasto, Dalai Lama e premi Nobel pe Pâs,
al è rivât ai 10 di Dicembar dal 2007 a Udin,
li che al è stât par 3 dîs. Un event che a nivel talian
nol è stât calcolât, a diference des visitis
di Rome e Milan. Cun di plui i esponents politics
talian(on)s a àn evitât di dâ il just pês a chest
apontament, probabilmentri par no displasê a la
Cine, gnove frontiere dal capitalisim di vuê e nemie
da la autonomie dal Tibet. Une situazion che nus
ricuarde une vore il rapuart Italie e Friûl.
No podevin sedi plui induvinâts di cussì il titul e il sottitul di chest saç
publicât tant che suplement dal numar di Dicembar dal 2006 di “el Tomât”,
pes edizions de innomenade associazion culturâl di Buie.
Un centenâr di pagjinis dividudis in cinc cjapitui, un aparât di notis une vore penç
(ben 153!) e une siore bibliografie. In plui cinc schedis di aprofondiment dedicadis
a Achil Tellini, a la figure di Lilith inte tradizion ebraiche, al imperadôr Magnus
Maximus, al riviel de joibe grasse dal 1511 e a Zuan Minut.
Un libri che al mostre cetancj tesaurs che si platin sot de croste des robis che o
viodìn o che o sintìn. Al è come se l’autôr al ves scrupulât che il teren là che al
poiave i pîts al fos il parsore di une miniere e che al ves vude chê di tacâ a sgjavâ. Al
à viodût subite che e jere une miniere une vore grande e plene di sorpresis. Bastave
vê voi par cjalâ e sgrimie di capî. I mîts, ducj i mîts, a scomençâ di chei classics
dai grêcs antîcs par rivâ fint ai nestris furlans, a nassin di alc, a àn lidrîs fondis
inte storie. Il salvan, par esempli, inte tradizion furlane e no dome furlane, al è un
personaç che nol è integrât inte societât, un strani, un forest, un ‘diviers’. O savìn
che la storie dal om e je stade dute un dâsi la volte di popui che a sotentravin a di
altris popui intun ciert teritori. E, se o lin tant in daûr
intal timp, a dâsi la volte no son stâts dome popui, ma
adiriture specis biologjichis diferentis: baste pensâ ai
neaderthalians (ma, prime ancjemò al homo erectus,
al sapiens…). Chescj passaçs no son vignûts dal vuê
al doman e il popul di prime nol è mai disparît dut
intun colp. Cualchi neaderthalian al varà vivût in
contemporanie cui gnûfs vignûts, a ben che sui ceis de
lôr societât. Isal nassût cussì il mît dai salvans? Ipotesi e
ancje alc di plui di une ipotesi une vore inceose.
Lis cuistions che Carli Pup al fronte a son tantis e dutis
penzis. Nol da rispuestis definitivis, pluitost al tire sù il
vêl de Storie par permetii al letôr di cjalâ sot. E lis robis
che si viodin a son pardabon tantis. Une cercje?
– lis olmis che a àn lassadis inte narative popolâr furlane personaçs sicu Atile,
Paulin di Aquilee, Beltram che a àn vude une lôr impuartance inte storie
martoriade dal Friûl;
– lis corispondencis jenfri i mîts dal Friûl e chei di altris bandis de Europe, magari
viodûts intune lûs diferente (par esempli Atile che, par nô, al è une sorte di diaul,
in Ongjarie al è un personaç une vore spreseât…);
– mîts che no son mîts, ma stereotips e nuie di plui, sicu chel dal furlan ‘salt,
onest, lavorador’, invenzion rude e ancje vonde resinte, tant che chê dal furlan
sotan che al ten simpri il cjâf bas;
– acjadiments che a son lâts in dismentie (dal sigûr no par câs, ma par une
volontât precise dai sorestants di fâju lâ in dismentie) e che dome pe vie de
narative popolâr si podin recuperâ (par esempli cui aial mai sintût a fevelâ dal
riviel di Sarsêt dal1867, duncje a pene rivade la Italie?);
– curiositâts sicu chê des tantis feminis furlanis che une volte a vevin non ‘Sabide’;
– la glesie aquileiese, che e veve ponts di origjinalitât no di pôc cont rispiet a chê
di Rome;
– la cuestion complesse e ingredeade dai bens civics e il so disvilup di lunc dai secui.
E tantis altris considerazions che ogni letôr al fasarà lis sôs.
Insome un libri penç, plen di culture storiche e antropologjiche. Si perdonin
facilmentri l’anacolût di p. 29 (‘Il ricuart de presince e je vive’) e la perle
di p. 23, dulà che la gnot dai Sants si slungje dai 30 di Otubar al Prin di
Novembar… Robis di nuie. Che anzit a dan une note di simpatie in plui.
A ‘nt fossino di libris cussì!
la patrie dal friûl _ ZENÂR-FEVRÂR 2008 _ 27