copione - Silveria Gonzato

Silveria Gonzato Passarelli
CALANDRÌN
Verona, Ottobre 1988

2
PERSONAGGI
CALANDRINO: pittore
BUFFALMACCO: pittore
BRUNO: pittore
MASO: sinore distinto e istruito
BÈPA: ostessa
BERTO: amico di Maso
BATTISTA: amico di Maso
PIERO: amico di Maso
BÈPI: amico di Maso
TOBIA: amico di Maso
ROSA: moglie di Calandrino
GINA: moglie di Bruno
LINA: moglie di Buffalmacco
AGATA: donna anziana
IOLE: paesana
NANI: paesano
MARIO: paesano
TONI: paesano
SILVIO: paesano
ALFONSO: paesano
GINO: paesano
ALDO: paesano
OLGA: paesana
IRMA: zittella
LISETTA: paesana
MARIA: paesana
TERESA: paesana
IDA: paesana

3
Silveria Gonzato Passarelli
CALANDRÌN
ATTO PRIMO
Scena prima
Personaggi: Maso, Ostessa, Berto, Battista, Piero, Bèpi, Tobia, Calandrino,Bruno, Buffalmacco.
La scena si svolge in un’osteria. Calandrino è seduto in disparte, a un tavolo, con il bicchiere davanti.Il
palcoscenico è diviso in due parti: in una di queste si trova Maso, assieme ai suoi compagni e all’ostessa,
nell’altra, Bruno e Buffalmacco stanno dipingendo la facciata di un palazzo.
Maso
Vardè là in fondo Calandrìn el pitór,
el néga nel vin el so malumór.
Berto:
Con la so dòna, de çèrto, l'à barufà,
e questa, caro mio, no l'è 'na novità.
Maso
Sa ghe ne disìo de tiràrghe ‘n bel schèrso?
Sempre el ghe casca, el sarvèl el s'à perso.
Andémoghe vissìn, fémo finta de gnénte.
Battista
El pensa ai fati sói, l'è via co’ la mente.
Maso e i sui amici si siedono a un tavolo vicino a quello di Calandrino.
Maso
Mi fago finta de èssar ‘n sioràsso,
sentì sa ve digo, el sarà proprio ‘n spasso.
Bèpa
Sa èlo che ghe servo a sta gente in alegrìa?
Maso
‘N fiasco de vin e ‘n altro de sangrìa.
Ostessa
De roba forèsta qua no ghe n’èmo!
Maso
De 'na s-ciànta de bira alóra se contentémo.
Ostessa (tra sé)
Sempre più strambi sti sióri i devènta,
più no i se degna de fasói con polenta;
par questi ghe vól léngue de gardelìn,
par no vèrzar la bóca i tól ‘n cuciarìn.
La sangria mi no sò gnanca sa l’è:
de çèrto no l’è roba da lavàrse i pié.
Qualche pòro can el se bée graspìa:
slavaùra de graspe che i sióri no i tól mia.
Anca Calandrìn el vól vin de quel bòn,

e così l’è deventà ‘n gran imbriagón.
Tanto furbo quel òmo mai el de stà,
da quando el bée, indóe l’è gnanca el sà.
4
La so dòna no la vede in che àqua trarse,
e lu, ogni giorno, el vien qua a imbriagàrse.
Mi devo dàrghene, se lu el me paga;
el vól sempre quel vin che sà de fraga.
Gran póche àneme gh’è in sto paesìn,
e i òmeni, così, i se gòde con Calandrìn.
Par passàrse via, no i g’à altra maniera,
qua i schèrsa col baùco e i fa bèla la çiéra.
Maso
Fasìme dimànde su le piére pressióse:
smeraldi, diamanti, robe costose.
Ma forte parlì! Fasìve sentir!
Mi lo sò za quel che g'ò da dir.
Sperémo che Calandrìn qualcosa el capìssa,
ch’el spèta almànco ch’el schèrso el finìssa.
E dopo ch’el béa, ghe dago anca el mio,
ma contento no són se no ghe rido drio.
E adesso avanti, podémo scominçiàr,
se gnénte el capisse, de l’altro se pól far.
Piero
Senti, Maso, ti che te sì 'n intenditór,
de la piéra che t'ò mostrà, me dìsito el valor?
L’ò eredità da la sorèla de me papà,
la dòna piassè sióra che stava in piàssa Brà.
Sta piàssa te la cati davanti a l’ Arena,
le dòne, sul Listón, el dedrìo le ména.
Se védarla te vól, a Verona te gh’è da andàr;
da qua, solo el treno el te ghe pól portar.
Maso
Quel l'è ‘n rubìn, caro amìgo mio,
questi i te costa l'ira de Dio.
Rossi i è tuti come baléte de spinaràti,
par questi i sióri i devènta tuti mati.
Come le me scarsèle mi conòsso Verona,
ghe vago ogni tri dì quando l’è staión bòna.
Là, sul Listón, me sento davanti a ‘n bar,
e quei che passa stago lì a vardàr.
De bèle butèle, a Verona, ghe n’è assè,
le vardo passàr eleganti e incincinè.
Ma ‘n rubìn così bèlo no gh’è dòna che ghe l’à:
el val ‘na fortuna quel che to sia la t’à lassà.
Bèpi
E sa èle quéle piére de color verde?
Maso
Par quéle la gente el sarvèl la perde.
Qua, da noàltri, smeraldi i ghe dise;
se suda, par trovarli, più de sète camìse.
Uno te lo pól crompàr co’ ‘na mùcia de schèi,
se te vendi le to vache, i to tori e i to vedèi,
e zónteghe pura anca tuta la to campagna…

5
Bèpi
Ma se tuto vendo, più no se magna!
Mi, al smeraldo, rivàrghe no posso,
anca se me spólpo fin indóe gh’è l’osso.
Quéla piéra tuta verde late no la fa mia
e gnanca del bòn vin da béar in compagnìa.
Tobia
E la piéra che fa luce e color no la g'à?
Maso
Brilànte la se ciàma, fortunàdo ci ghe l’à.
Calandrino si avvicina al gruppo.
Calandrino
Scusème, sióri, ve sento parlar forte,
par discórar de ste robe no avì serà porte.
Se voàltri segreti proprio no g'avì,
a far quàtro ciàcole vègno anca mi.
V'ò sentìo parlar de piére che no conósso:
brilànti, smeraldi e del bel rubìn rosso.
Da quel che ò capìo, le val dei milioni,
ma indóe se tróveli sti grossi pieróni?
Maso
Ma quài pieróni?! I è sasséti picinìni
par anèi, colàne e anca par recìni.
Calandrino
E così picinìni i val tanti schèi?
Maso
I è sassi minùdi ma i è proprio bei.
No i se tróva dapartùto, i è 'na rarità;
ma mi g'ò 'n segrèto che nissùni sà.
Adesso ve lo digo, ma tegnìvelo par voàltri,
senò, in quel posto, i ghe va anca i altri.
A Bengòdi ghe n’è, 'n posto giocondo,
la contràda piassè bèla de tuto sto mondo.
Là i brusca le vigne nel mese de marso,
el mosto, nel tinàsso, mai l'è stà scarso.
Stròpe no i tól, ma bòne mortadèle,
tuto te magni, anca la pèle.
I mùcia i rami in tante fassìne,
i le tien insieme con lugàneghe picinìne.
"Picenìne" ò dito, ma bòne assè,
te sgióssa l'aquolìna fin zó sui pié.
Con póchi franchi te crómpi 'n'òca
e par regàl, anca ‘n pito te tóca.
E là, in te 'na piàssa, ghe stà 'na montagna,
tuta montà de roba che se magna.
L'è fata de quel formàio che se grata;
i g'à gratacasóle che le pàr 'na cancelàta.
E sóra a quel monte, gh’é sènto e più cóghi
che sóto a le pignàte i taca dei gran fóghi;
l'àqua la sbrómbola e la pasta i buta,
tuti i se magna ‘n paról de pastassùta.

E in bródo de capón, bóie tante paparèle,
tortelìni col ripién de figadìni e mortadèle.
Nissùni resta sènsa, a tuti i ghe ne dà,
più i ghe ne magna e più i ghe ne fa.
E ai pié de quel monte, córe ‘n bel fosso,
de àqua udo, ma pien de vin rosso.
6
Calandrino
Quel, par mi, l'è ‘n gran bel posto!
Maso
Tré òlte al giorno gh'è polàstro aròsto
e costine de pòrco rosolè su la gradèla...
Calandrino
Par mi quèla contrada l'è proprio gran bèla.
Ma el me diga, siór, ghe falo dei viài?
Maso
Tuti i trenta febràr de l'ano del mai.
Calandrino
E quanta èla la strada par rivàr fin là?
Maso
Quéla che gh'è da là fin qua.
Calandrino
Èla sta contrada vissìn al monte Cuco?
Maso (sottovoce, rivolto agli amici)
Ve l'ò dito mi che l'è ‘n gran baùco.
A voce alta, rivolto a Calandrino.
Su pa zó da quéle bande là,
te ciàpi la strada che passa par de qua.
Calandrino
No l'è mia vissìn, órco quel can!
El posto che 'l me dise l'è massa lontàn;
no g'ò ‘n cavàl e gnanca ‘n musso,
de quei magnarìni proprio no me busso.
El me diga ancora, el porta passiènsa,
lu l'è òmo de mondo e anca de siènsa,
in quéle contrade, de piére ghe n'è?
Maso
"Sì" ò za risposto a la dimànda che te me fè.
Là gh'è 'na montagna tuta fata de smeraldo,
la slùsega come el sól quando l'è alto e caldo;
par lóri quéla roba l'è ‘n sasso de fosso,
'na gramégna de campo, ‘n papàvaro rosso.
Par tór quei smeraldi, no te paghi proprio gnénte,
no i g'à nissùn valor par tuta quéla gente.
Calandrino
Ma ci avaréa dito che gh'è ‘n posto compagno!
Laóro tuto el dì e quàtro schèi mi me guadagno.
Maso
E dopo gh'è 'na piéra che se tróva proprio qua;
l'è proprio 'na maravéia, scólta sa la fa.
Se uno el la ciàpa e in scarsèla el la tien,

nissùno el lo vede se davanti no 'l te vien.
7
Calandrino
Ma "qua" indóe èlo? El me diga de preciso!
Che sta roba la sia vera ghe lo lézo lì sul viso.
Maso
Ma ti, caro mio, ‘n po' massa te vól savér;
adesso più no parlo, beémosse ‘n biciér.
Calandrino
El senta, siór parón, mi són ‘n pòro can,
gnénte el pól costàrghe de darme 'na man.
Maso
Te sì fortunà che són 'n òmo de cór
e lassàrte così, par mi l'è 'n dolor.
Quando gh'è la suta e àqua no ghe n'è,
e i fossi i è udi e no te bagni gnanca i pié,
in mèzo ai campi, indóe el progno el se fa drito,
te tróvi quéle piére…. Adesso te l'ò dito.
Calandrino
El me diga ancora siór, se i è pìcole o grosse,
rotonde o quadrate, bianche, nere o rosse.
Maso
Ghe n'è de quéle grosse e anca de picenìne,
te tróvi dei pieróni e anca de le pierìne;
e dopo el color, se g'ò da dir el vero,
l'è fòrsi a metà fra el bianco e quel nero.
Calandrino
Tuto ò capìo e adesso mi ve lasso,
g'ò da pituràr ‘n vècio e alto palàsso.
Ve ringràssio de tuto e de la compagnìa,
se me tóca andàr, nó l'è colpa mia.
Calandrino si allontana dagli altri e si porta verso il pubblico rivolgendogli la parola.
Calandrino
Mi quéla piéra de çérto la trovarò,
ma Bruno e Bufalmàco adesso çercarò.
Da sempre sémo amìci, diréa quasi fradèi,
insieme émo passà i giorni quei più bei.
Questo l'è 'n segreto, dirlo no podaréa,
ma tegnérlo par mi solo, sta òlta s-cioparéa.
Nissùni lo savarà, solo a lóri ghe lo digo,
quei no i me tradìsse, mi són ‘n so amìgo.
Calandrino raggiunge Bruno e Buffalmacco che, su delle scale, stanno dipingendo la facciata di un palazzo.Tutti
gli altri escono. Rimane solo l’ostessa che si dedica alle pulizie.
Scena seconda
Personaggi: Calandrìn, Bruno, Buffalmacco, ostessa.
Calandrino
Cari e vèci compagni, piantè lì de laoràr!
Sta òlta la richéssa ve fasso mi trovar.
Via tuti quei penèi! Via anca quei colori!

Conósso mi ‘n posto che tuti ne farà sióri.
Là gh'è 'na piéra che sparir la te fa,
nissùni te vede e davanti i te stà.
Prima che i altri i vaga a çercàrla,
corémo noàltri, mi sò indóe trovàrla.
E con quéla in scarsèla, nissùni deventémo,
andémo ne le banche e i schèi ghe gratémo.
Zó da quéle scale! Vegnì subito via con mi!
Come vive i sióri, sta òlta provarì.
Tegnìve sicuri, no l'è 'n'imbroiàda,
el siór che 'l me l'à dito l'è persona fidàda.
Calandrìn, el pitór, fabiòco no l'è mia,
l'è stà co’ la furbìssia che 'l segreto ò portà via.
8
Bruno (sottovoce, rivolto a Buffalmacco)
Baùco l'è questo, come ‘n ràvano ingiassà,
ancora 'na òlta i lo g'à infenocià.
Buffalmacco (sottovoce)
Pampalùgo l'è nato e sucón sempre el resta,
sta òlta sganassémo e fémo 'na gran festa.
A voce alta.
Ascolta, Bruno, senti sa 'l ne dise;
butèmo ne le scaùie ste luride camìse!
Tanto, fra póco, sarémo sioràssi,
andémo subito a çercàr quei sassi.
Bruno (rivolto a Calandrino)
El nome, almànco, dine de quéla piéra,
se l'è pìcola, grossa, bianca, verde o nera.
Calandrino
El nome no ricordo, ma importànsa no g'à,
nissùn el m'à dito che par trovarla i l'à ciamà.
Buffalmacco
Ma almànco el color te gh'è da savérlo.
Calandrino
L'è quasi nera come quel merlo.
Buffalmacco
E la forma quàla èla? Lìssia o sbrufolà?
Calandrino
De ogni sòrta i m'à dito che ghe ne stà.
Ma mi són 'na volpe, són ‘n gran furbón,
par ogni problema, g'ò 'na solussión.
La forma no savémo, el color pressapóco,
de ogni piéra nera, portémo via ‘n tòco.
A fòrsa de çercàr, la giusta trovarémo,
tornémo qua in paese e sióri deventémo.
Bruno
Spèta 'n àtimo e métete chièto,
de quéle pière ghe ne tolémo ‘n caréto;
con massa prèssia, se pól anca sbaliàr,
el mèio modo bisogna studiar.
Sa dìsito, Bufalmàco? Calandrìn l'è ‘n furbón,
ma el sol l'è massa alto, l'è séco el giarón.
A ste ore le piére i è sute e tute ciàre,
no se vede le nere; sa te pàr, compare?

Se là andémo quando el gal el canta,
quando de luce ancora no ghe n'è tanta,
quando la rosàda la fa da paróna,
se vede la nera e quéla che no l'è bòna.
E po’, ancó, l'è giorno anca feriàl,
laóra tanta gente vissìn al canal;
e se ne vede, par caso, qualchedùno,
in mèza giornàda, de sassi no ghe n'è uno.
A reméngo va i schèi e el nostro bel sogno,
métete chièto che de córar no gh'è bisogno.
Calmi spetémo dimàn, che l’è festa
e partémo la matìna, tuti tri co’ 'na çésta.
9
Buffalmacco
Mi són d'acòrdo, Bruno el parla ben;
métete calmo che 'l giorno el vien.
Domàn matìna, quando el gal el slónga el còl,
quando el alsa la grésta par ciamàr el sol,
quando el tordo sul ramo l'è ancora ingrotolìo
e la gente nel lèto la gira el dedrìo,
con passi da gato, la piàssa traversémo
e sóto a quel'àlbaro, tuti se trovémo.
Calandrino
Che vègna dimàn, mi no vedo proprio l'ora,
ma za che ghe sémo, ve ne cónto 'n' altra ancora.
'N paese ghe stà, vissìn al monte Cuco,
credìme, compagni, mi no són ‘n baùco,
Bengòdi el se ciàma e l'è 'na maravéia,
a sentìrghene parlar, anca i morti i se svéia:
fossi de vin e de grana 'na montagna,
bìgoli e mortadèle, de tuto là se magna.
Più te sì sgiónfo e più i te ne dà,
mai ‘n schèo no i à dimandà.
Da quéle bande là, anca smeraldi gh’è;
de roba piassè bèla al mondo no trovè.
I è sassi verdi che i val tanti schèi,
i costa de più de vache, bó e vedèi;
tanti quanti ghe n’è ne la stala de ‘n siór
che, del smeraldo, el conósse solo el color.
A le bestie, el dovaréa zontàrghe anca la campagna,
ma se tuto el vende, la so faméia più no la magna.
Gh’è ‘na bruta notìssia che mi g’ò da darve:
el posto l’è lontàn, no posso invidàrve.
Morémo par strada, se a pié ghe némo,
ai più fortunà quel tesoro ghe lassémo.
‘N siór el me l’à dito, òmo serio e ben vestìo,
de tuto el savéa, l’éra anca istruìo.
Fiducia el m'à dato, quando in fàcia el m'à vardà,
‘n segreto l'è questo, tegnì la bóca ben serà.
Buffalmacco
No gh'è bisogno de far racomandassión,
òmeni sémo de 'na çerta reputassión;
da tanto te ne conóssi e fidàrte te pól,
muti deventémo, se ti te lo vól.
Bruno(sottovoce, rivolto a Buffalmacco)
Sa ghe ne dìsito, compare Bufalmàco?
Sta òlta, de bale, i ghe n'à contà ‘n saco.
Quéla testa da ràvano el le bée tute quante,
óltra che imbeçìle, l'è anca ignorante.

Démoghe corda, fémo finta de crédar
e quel che 'l combìna andémo là a védar.
10
Buffalmacco (sottovoce, rivolto a Bruno)
Ma mi g'ò 'n'idea, el schèrso el sarà dópio,
solo a pensàrghe, dal rìdar mi scòpio.
Inviémosse intanto, te lo cónto par strada
e insieme se farémo 'na bèla sganassàda.
Bruno e Buffalmacco escono.
Scena terza
Personaggi: Calandrino.
Calandrino
Sta òlta la fortuna l’è vegnùa da la me parte,
e pensàr che perdo sempre quando zugo a le carte.
Mi diréa de scominçiàr da le banche de la cità,
indóe gh’è i sióri che de schèi i ghe n’à.
In tute quéle banche, se infìlémo drénto,
ma farlo se deve nel più giusto momento.
Drénto a la cassaforte i è tegnùi i schèi
e quéla, de sicuro, l’è dedrìo ai sportèi.
Quando tuti i è oltàdi da ‘n’altra parte,
uno el tól i schèi e dopo fémo parte.
Finìa la cità, gh’è le banche de paese
e i sarà i più sióri a fàrghene le spese.
I pitòchi, in banca, soldi no i ghe n’à,
i coèrse coi stramàssi quel póco che i s’à mucià.
Ma l’è ‘na miseria, no gh’è gnanca da ris-ciàr,
indóe ghe n’è tanti bisogna çercàr.
Pecà che, coi altri, tre parti g’ò da far….
Mi g’ò la tentassión de tór i schèi e scapàr.
Me giro tuto el mondo in treno e in nave,
solo a pensàrghe, me vien zó le bave.
E adesso anca mi ritorno a casa mia,
ma quando gh’ò i schèi, da lì scapo via.
‘Na dòna ò sposà che la rompe massa:
nei me afàri la scomàra con tuta la so rassa.
Quando vègno da l’ostarìa, la me spèta col bastón,
de legnàde la me pesta su la suca e sul gropón.
De farme ‘n biciér, in dirìto mi me sento:
laóro sóto el sol, no me fermo ‘n momento.
Da sempre no la capìsse quanta l’è la me sé,
finìsso la giornàda che no stò gnanca in pié.
Me se suga la léngua, me se séca la bóca,
e quando torno a casa, de ciapàrle me tóca.
La dise che l’àqua la fa mèio del bòn vin…
Mi me sento ‘n león co’ ‘n fiasco de fragolìn:
me cavo la sé, anca alégro mi devènto
e torno da éla che són pien de sentimento.
Gh’è vèrzo i brassi par strucàrmela ‘n póco,
ma ogni sera, del bastón, ghe ne salta ‘n tòco.
I me schèi i spendarò come me pàr e piàse,
vói andàr tra quéla gente che no varda e tase.
Quando sarò lontàn, a Calandrìn la pensarà
e par de mi desmentegàrse, anca éla la bearà.
Calandrino esce.

11
Personaggi: un ragazzo e una ragazza.
Scena quarta
Luci soffuse. Il ragazzo fa la serenata alla sua fidanzata che sta alla finestra.
Ragazzo:
Se smòrsa i lampioni
e se impìssa le stéle,
la se intòna la luna
a la to bianca pèle.
Lisa, Liséta, spónsa el me cor,
cùnelo pian, con tuto el to amor.
La rosa del giardìn
la scónde el so fior:
parché manco bèlo
del me caro amor.
Lisa, Liséta, spónsa el me cor,
cùnelo pian, con tuto el to amor.
Scólta sta serenàda,
la vien dal me cór,
ne la ósse che canta,
gh’è tuto el me ardor.
Lisa, Liséta, spónsa el me cor,
cùnelo pian, con tuto el to amor.
Dime ancora ‘n sì,
fame solo ‘n gesto,
màndeme a dormir,
sognando el resto.
Lisa, Liséta, spónsa el me cor,
cùnelo pian, con tuto el to amor.
Regina del me cór,
màndeme ‘n baso,
pòselo sul bel fior
che crésse nel vaso.
Lisa, Liséta, spónsa el me cor,
cunélo pian, con tuto el to amor.
Pòrteme, ventesèl,
‘n so biondo cavéio,
e ti, bianca luna,
móstremela mèio.
Lisa, Liséta, spónsa el me cor,
cùnelo pian, con tuto el to amor.
Spèciete nei so òci,
impìsseli come stéle;
de quéle su in cél,
le sarà piassè bèle.
Lisa, Liséta, spónsa el me cor,

cùnelo pian, con tuto el to amor.
12
La ragazza getta un fiore al fidanzato e poi chiude la finestra. Il ragazzo bacia il fiore e se ne va.
Scena quinta
Personaggi: Bruno, Buffalmacco, Calandrino.
La piazza. Luce soffusa. Bruno e Buffalmacco entrano in scena e aspettano Calandrino.
Calandrino (fuori scena)
El me dise el gal de corte che l'ora l'è rivà,
sóto l’àlbaro i me compagni i me spèta za.
Indóe èle le braghe? Me manca ‘n calséto,
me tóca cuciàrme, l'è finìo sóto el lèto;
e adesso la camìsa, el gilè e la giachéta,
i stivài nei pié e in testa 'na baréta.
Calandrino arriva di corsa.
Bruno
Dai, Calandrìn! Svelti! Caminémo!
La zó, nel giarón, in prèssia rivarémo.
El gal el canta sempre, el sol l'è ancora scónto,
ma là, dedrìo al monte, a levar l'è quasi pronto.
Sentì che bavesèla, l’è fresca e anca nèta,
l’alba la riva sempre nóva, sempre chiéta.
L’è l’ora piassè bèla de tuta la giornàda,
l’ànema mia da qualcosa l’è ciapàda:
l’è fòrsi comossión o vóia de poesia,
me sento nel cor ‘na sòrta de nostalgia;
riandàr ai vèci tempi, quando ero de sogni pien
e sentéa ‘n’ emossión che adesso più no la vien.
El s-ciopàa de sperànse, alóra, el me cor,
la vita l’éra eterna e spetàvo l’amor.
‘N’ alba l’éra la me vita da butelòto,
piena de promesse come el vin nel vesòto.
No pensàvo a desgràssie, a dolori, a malatìe,
g’avéa solo sperànse e gnénte nostalgie.
Calandrino
E momento no l’è de far de la poesia.
Bruno
Ò vardà la to fàcia e la vóia la m’è andà via.
Némo al giarón, a çercàr la fortuna,
fin che nel cél, gh’è ancora ‘n tòco de luna.
Calandrino, Bruno e Buffalmacco escono.

13
Personaggi: Calandrino, Bruno, Buffalmacco.
Greto del torrente. Entrano i tre amici.
Buffalmacco
Èco el giarón, atènti che qua se sbrìssia,
móia de rosàda, la piéra l'è tuta lìssia.
Se ‘n pié el parte, te ciàpi 'na stramenciàda,
'na paca ne la schéna e 'na bèla sculatàda.
E se ben la te va, te te sbréghi i zenòci,
caminè pian pianìn e verzì i vostri òci.
ATTO SECONDO
Scena prima
Calandrino fa subito uno scivolone e cade.Si alza dolorante e anche umiliato.
Calandrino
Par póco no cascavo, ‘n bel spaènto me són ciapà.
Bruno
Me paréa ch’el dedrìo par tèra el te fosse andà.
Calandrino (massaggiandosi il sedere)
Ma schèrsito, Bruno, su ‘na corda són bòn de nar!
Bruno
E alóra va avanti e finìssela de gratàr.
Sémo solo noàltri, nissùni è rivà,
la nostra piéra l’è ancora qua.
Par no stracàrve, pensè ai schéi,
ne spèta dei giorni de quei gran bei.
Le nostre dòne le sarà le più eleganti,
ghe crompémo ori e de séda guanti.
I nostri fiói i mandémo a scóla,
i g’à da savér scrìvar ogni parola.
Se fémo ‘na casa più alta del campanìl
e mi, par nar a càcia, me crómpo ‘n fusìl.
Bruno
El me tempo passarò andando a pescar
e guai a quei che me vien a disturbàr.
Rivolto a Calandrino.
E ti, Calandrìn, sa pènsito de far?
Calandrino
L’è presto ancora, ghe devo pensar.
Tra sé.
Se i crede che i schèi mi i spenda in semàde.
quei i g’à le teste za bèle che consumàde.
A voce alta.
Òrpo, mi la çésta no l'ò mia portà!
Buffalmacco
Anca noàltri se l’émo desmentegà.
Bruno
No l'è ‘n disastro, impinémo le camìse
e anca le scarsèle, fin a farle tute slise.

I tre amici cominciano a raccogliere pietre saltellando qua e là. Calandrino se le infila sotto alla camicia e nelle
tasche. Gli altri due ne prendono solo alcune.
Calandrino
Ma qua de piére scure ghe n'è a ogni passo,
ne tóca catàr su proprio ogni sasso.
I botóni del gilè, tiràdi za i me salta,
el peso, qua davanti, el me piega, el me rebàlta.
Póco ò dormìo e me sento gran fiàco,
con tuto sto peso, mi subito me straco.
Me va tuto in tèra, se sbrégo sté strasse
e qua no g’avémo né çésti né casse.
Tuti sti sassi come fago a portàrli?
Se tórli no podémo, l’è inutile çercàrli.
Buffalmacco
Qua se zughémo tuto el nostro futuro,
cata su ancora e tègni duro.
Calandrìn
Mi tègno duro, ma fago ‘na gran fadìga,
e no gh’è tanto tempo, ocór che me sbriga.
I passa i minuti e le córe le ore….
Buffalmacco
Se vien altra gente, la sperànsa la móre.
Gh’éra dei altri quando el siór el parlava?
Calandrìn
Gh’éra i so amìssi che atènti i lo scoltàva.
Buffalmacco
Pòrca miseria, qua bisogna sbrigàrse:
càvete le scarpe e impenìssi anca le calse.
Calandrìn
Le calse i è sbuse, le piére le va fóra;
no sò più cosa far, ne va tuto in malora!
Buffalmacco
Più grossa del buso la g’à da èssar la piéra,
ne la calsa la resta e no la va par tèra!
Calandrino
Te gh’è resón, t’è parlà proprio giusto,
le scarpe mi me cavo e ghe tróvo anca gusto.
Calandrino fa per piegarsi per togliersi le scarpe, ma non ci riesce a causa delle troppe pietre che ha
infilato nella camicia e nelle tasche.
Ritiro le parole, t’è dito ‘na gran boiàda,
piegàrme mi no posso, ghe perdo ‘na giornàda.
Le piére che ò tòlto su, dal còl le me vien fóra…
su la sbèssola le me sbate e in tèra le va ancora.
Bruno
Spampàna ben el peso, sul davanti e sul dedrìo…
Calandrino, con mosse buffe, fa quello che gli ha suggerito l’amico.
Bruno
Adesso te pól piegàrte, gràssie al consìlio mio.
14

Calandrino si piega e si leva scarpe e calze.
15
Bruno
‘Na fiàsca de vin fresco da casa mi ò portà
béeghene ‘n gósséto e le fòrse le tornarà.
Calandrino beve il vino con avidità. Bruno gli toglie il fiasco.
Pòrca miseria, te sì pèzo de ‘n seciàr,
anca par noàltri ghe ne deve restar.
Questo l’è ‘n vin de quei bòni che maca,
se ciùco te sì, no te cati gnanca ‘na vaca.
Invésse de la piéra che invisibile la te fa,
te cati su sassi che par gnénte i te pesarà.
El to pìcolo sarvèl a rilento el te funsióna,
figurémosse se te tróvi la piéra quéla bòna!
Ma la fortuna, de le òlte, la manca la mira,
e a l’òmo sbalià ogni ben la ghe tira.
Sottovoce, rivolto a Buffalmacco.
Lassémolo saltar, qua e là come ‘n cavréto,
'na piéra o forse dó, in scarsèla mi me méto.
Quando sarà el momento, ‘n segno mi te fago,
no métarte a sganassàr, démoghe ancora spago.
Quando sarà tempo de andàr par el disnàr,
alóra Calandrìn fémo finta de çercàr.
Calandrino continua a cercare la pietra. I due amici fingono di fare altrettanto.
Buffalmacco (facendo un segno con il braccio a Bruno)
Senti, Bruno, qua gnénte mi ò trovà,
Calandrìn mi no lo vedo, èlo za scapà?
Bruno
Ma nò, sa dìsito? L'éra proprio qua davanti;
te vedarè che lo trovémo, no sémo mia in tanti.
Buffalmacco
Mi no lo vedo, qua no 'l gh'è mia,
quel el g'avéa fame e l'è andà via.
E noàltri, baùchi, qua ancora a çercàr,
quel là l'è più furbo, l'è andà a disnàr.
Adesso l'è là, nel caldìn de la so casa,
vissìn al camìn indóe s-ciòca la brasa;
davanti a ‘n bel piàto de bìgoli e sardèla,
el ride quel gran drito, el l'à fata proprio bèla.
Bruno
Atènto mi ero e no l’ò visto nar via;
l’à trovàdo la piéra e l’à lassà la compagnia.
Te l’ò dito mi che no gh’éra da fidàrse,
se più no lo vedémo, gh’è da rassegnàrse.
Adio schéi, fortuna e moiér contenta!
Dovémo tornar a la solita polenta.
Lu el magnarà robe bòne de ogni sòrta.
Adesso ghe ne diréa ‘n saco e ‘na spòrta.
Buffalmacco
Se ancora l’è qua vissìn, sentìrte el pól,
dìghene par i pòrchi, se proprio te lo vól.
Ma no credo che a lu, tanto ghe interéssa,
la piéra ch’el çercàa in scarsèla el se l’à messa.
Bruno (a voce alta)
Bruto farabùto, delinquente e ladro!

Ste tre parole i è come ‘n to quadro.
Se anca ‘n solo àtimo, védar te te fè,
te ne dago così tante, che te cede i pié.
Bruto imbriagón, traditor de l’amicìssia,
fin a la fine, çércarò giustìssia.
16
Buffalmacco
Buta quéla piéra e mostra el to muso,
a la gente che no se vede, mi no són uso.
El coràio te gh’è come quel de ‘n cunèl,
da solo no te fè gnénte, te sì sènsa çarvèl.
Se te vè ne le banche, subito i te liga
e quando i te ciàpa, no dir che l’è stà sfiga.
To moiér la g’à resón, te sì ‘n pòro desgrassià,
cissà come mai quéla dòna la t’à sposà.
De pecà te gh’è fato, questa l’è ‘na spiegassión,
e dopo, par zónta, la s’à trovà ‘n imbriagón.
Te pitùri col penél ciapàdo a la roèrsa,
za de matìna la to mente l’è persa.
No dìsito gnénte? No te difèndito gnanca?
Orgòlio e dignità dal tuto i te manca.
Calandrino (tra sé)
Mi són qua e quei no i me vede,
ò fato ben a avérghe fede.
A casa i me crede, vissìn al fogolàr,
mi vago via e i lasso a çercàr.
Lóri no i me vede, la piéra l'ò trovàda,
adesso me la svigno, l'è stà 'na gran giornàda.
Le ofése de quei là mi gnanca le sento,
lasso che i parla, són massa contento.
I me crede viliàco, ma i sbàlia de grosso,
me magno ‘n león, se béo del vin rosso.
E quéla bràa dòna che me cato drénto casa,
adesso la miseria la se magna e la se snasa.
Mi, de quel bastón, me passà la paura,
a fòrsa de legnàde la m’à fato la so cura.
‘Na dotóra l’è stà de quéle proprio strasse:
el vin ancora el gira nel rosso de le me ganàsse.
Sighè! Sighè! No me importa ‘n figo séco,
la vita la me fa siór e voàltri la ve tien a stéco.
A sta fàcia che g’ò qua, muso i ghe ciàma,
l’è quéla, cari mei, che m’à fato la me mama.
A mi la me piàse, me la vardo volentiéra:
el naso ghe l’ò drito e bèla l’è la siéra.
Se la Rosa la m’à sposà, qualcosa l’à visto:
ero ‘n bel òmo e su questo mi insisto.
El tempo el passa e qualcosa se fiàpa,
ma dòna no gh’è che da sto òmo la scapa.
La Rosa la m’è tacà come l’edera al muro,
ma el bastón che la g’à lo tróvo massa duro.
E dopo i me dise che no són inteligènte:
mi g’ò la piéra e lóri no i g’à gnénte.
Bruno (rivolto a Buffalmacco)
Sèto sa te digo? Calandrìn l'è 'n imbroión,
se qua ancora el fosse, ghe tacaréa ‘n bel s-ciafón.
Le réce ghe sbregaréa, ghe le faréa magnàr,
ma lu più no ‘l se vede e me tóca soportàr.
Me trema fin el brasso par la óia de dar pugni,
co’ la fòrsa che me sento, spacaréa çènto grugni.
E par primo ghe tocaréa al slandrón de Calandrìn,

par ciapàrlo de sicuro, me faréa più vissìn.
Bruno va verso Calandrino.
Varda, Bufalmàco, come l’è che faréa…
Bruno sferra un gran pugno e colpisce in piena faccia Calandrino.
De quanto mi són forte, no te pól avérghe idea.
17
Calandrino si porta le mani alla faccia e si piega dal dolore.
Calandrino (tra sé)
Mama che sgnàcara, me làgrima i òci,
più no ghe vedo e me se piega i zenòci.
El me naso, poaréto, l’éra bèlo che no se sà,
me lo sento za sgiónfo, tuto stòrto el restarà.
Come fago a scapàr via? La strada no la vedo,
l’è stà ‘n puro caso, che i me veda mi no credo.
Buffalmacco
E mi co’ sto maròcolo che strénso ne la man,
nel calcagno lo ciaparéa, sto bruto fiól de 'n can.
Buffalmacco lancia un sasso mirando al tallone di Calandrino che, colpito, cade a terra.
Calandrino (tra sé)
Òstrega, che sassàda! Quel mato el m'à ciapà,
e proprio nel calcagno, el m'à mèzo sacagnà.
L'è mèio che me móva, sti qua i me sassìna,
e mi, se digo "ahi", vago incontra a la rovina.
La piéra che ò trovà la me ósse no la scónde,
se vien fóra ‘na parola, quei du i me risponde.
Subito i capìsse in che posto mi me tróvo
e i me tira ‘n altro sasso, fòrsi grosso più de ‘n óvo.
Calandrino cerca di fuggire, ma accecato dalle lacrime e azzoppato dalla sassata, non fa che girare su se
stesso.
Bruno
Più restémo qua e più rìdar lo farémo,
mi vago a casa mia, no són dal tuto sémo.
La me dòna la me spèta, el disnàr l’à preparà,
spero de trovar lalésso, codeghìn e pearà.
L’è mèio che anca ti te torni a casa tua,
se fémo massa tardi le ne smòrsa anca la stua.
S’el magnàr l’è tuto frédo, mi fago indigestión,
càlmete ‘na s-ciànta, no pensar a quel sucón.
Buffalmacco
Védito sto sasso, rotondo e così grosso?
E anca tuti i altri che i stà in questo fosso?
Coi brassi che me tróvo e con tuta la me fòrsa,
de la schéna de Calandrìn, blu ghe faréa la scòrsa.
Buffalmacco lancia un altro sasso mirando alla schiena di Calandrino.
Calandrino (tra sé)
Mama che gran mal! Quel là proprio el me cópa,
e córar mi no posso, 'na gamba ghe l'ò sòpa.
I làgrima i me òci e ancora no ghe vedo,
l’è sempre ‘n puro caso, che i me veda mi no credo.
Ma i casi i è za tri, i scomìnçia a èssar massa,
e no posso caminàr, par quanti sfòrsi fassa.

18
Calandrino cerca di mettersi in salvo, ma non riesce a camminare velocemente e nella giusta direzione
perché zoppica a causa della sassata nel tallone e ancora non ha ripreso completamente la vista. Buffalmacco
lancia un altro sasso.
Calandrino
Pòrca la piéra nera, èco 'n altro sasso,
ne la récia el m'à ciapà, quéla fàcia da paiàsso.
G'ò pache dapartùto, le còste i m'à za róto
e córar mi nó posso da mal che són ridóto.
Calandrino, con le mani, si sfrega gli occhi,
Qualcosa adesso vedo, i òci i me s’à sugà,
anca sòpo mi camìno, lontàn da quei du là.
Forse són in salvo, adesso gh'è el dassiàl,
sicuro che 'l li ferma e no i me fa più mal.
Scena seconda
Personaggi: Calandrino, Bruno, Buffalmacco, daziere.
Entra il daziere.
Bruno
Bongiórno, siór dassiàl, come èla che la va?
Daziere
Lamentàrse no se pól, ma sa èlo che g'avì qua?
Buffalmacco
Quàtro o çìnque piére, ‘n buso gh'è da giustàr,
ma adesso sémo strachi, le podémo anca butàr.
Bruno
Par caso alo visto l'amìgo Calandrìn?
Da póco l'è passàdo, più spórco de ‘n camìn.
Daziere
In tuta la matìna, do dòne i è passà,
ma el vostro Calandrìn, mai l'ò visto qua.
Calandrino
Nissùni qua me vede e són a póchi passi,
lassémoli çercàr sti pòri du paiàssi.
Mi adesso vago via, l'è za tardi par magnàr
e 'n imbròio par far soldi mi g'ò da strolicàr.
Calandrino esce di scena.
Personaggi: Bruno, Buffalmacco, daziere.
Bruno
Gràssie, siór dassiàl, l'è stà ‘n gran artista,
paréa che la persona no 'l l'avésse proprio vista.
Dassiàl
Tuto mi ò fato, secondo le istrussión,
ò ridùo come ‘n mato vardàndo quel sucón.
Scónto mi me són, dedrìo a quéla sésa,
el tempo che ò perso el g’à avù ‘na bèla resa.
El stómego el me fa mal a fòrsa de sganassàr,
par farlo in silènsio, me sentivo sofegàr.
Scena terza

Se forte mi ridéa, in aiuto el me ciamàva,
vegnér fóra mi dovéa, la comèdia la se fermava.
Come el sia riussìo a no métarse a sigàr,
par quanto mi ghe pensa, no rièsso a spiegàr.
Ma ben la ghe stà, no l’è ‘n òmo onesto,
a ladro deventàr l’à fato proprio presto.
No me importa sa ‘l farà, quel che val l’è l’intensión,
la se merita la galèra quéla testa da portón.
Védar me piasaréa l’incontro con so moiér,
mi vègno in paese, no perdo sto piasér.
19
Bruno
Adesso se inviémo, némoghe par dedrìo,
el più bèlo del spetàcolo ancora no l'è finìo.
Vìvar in sto paese me piàse proprio tanto:
l’è fato a me misura, come s’el fosse ‘n guanto.
Me godo la campagna, el cambiar de le staión,
stago in compagnia e rido con quel moltón.
Se Calandrìn el partìsse e l’andàsse via lontàn,
monco me sentaréa, come uno sènsa man.
Quel, par mi, l’è pèzo de ‘n buteléto,
ch’el spèta el so tesoro da métar sóto el lèto.
Ci èlo quel poaréto che no sogna la fortuna?
Mi, de ste persone, ghe ne cognósso più de una.
El torto de Calandrìn l’è de èssar ignorante
e se massa vin el bée, el se sente anca importante.
La so mama, poaréta, ‘n sarvèl la ghe l’à fato,
ma ghe manca ‘na ruèla a quel che gh’è stà dato.
La busìa no ‘l sospèta ne la gente che la conta,
la so mente de butìn a scoltar l’è sempre pronta.
Buffalmacco
In santa Lùssia, són convinto ch’el crede
e quando se fa nòte, le streghe lu el vede.
Fòrsi l’è proprio par sta sorta de inocènsa,
che ancora so moiér la porta ‘na gran passiènsa.
La lo legna ogni tanto, la ghe siga come ‘na mata,
l’à vól darghe ‘n’educassión che mai la gh’è stà data.
Finora, pòra Rosa, l’è stà tuto tempo perso
e ‘n òmo la se cata sènsa drito né roèrso.
Se quel che avémo fato da lessión el gh’è servìo,
mi godo ne ‘l pensarlo, sperando nel bòn Dio.

20
ATTO TERZO
Scena prima
Personaggi: Rosa, Gina, Lina, Agata, Iole, Olga, Irma, Lisetta, Maria, Teresa, Ida, Nani, Mario, Toni, Silvio,
Alfonso, Gino, Aldo.
La scena si svolge in piazza. Sul palcoscenico si vede anche l’interno della casa di Calandrino.
Rosa
La senta, sióra Gina, el so Bruno èlo tornà?
El mio l’è ancora in òlta e són preocupà.
In giro, su le strade, se incontra dei caréti,
tori che bussòna, vache e vedeléti.
Se l’à beù ‘n po’ massa e cìncio l’è ‘na s-ciànta,
pericoli lu no ‘l vede e paura mi ghe n’ò tanta.
Quando lo vedo vivo e sò ch’el stà anca ben,
nel so piàto de minestra, mi metaréa el velén.
Ma quando l’è in òlta e sò che no ‘l laóra,
g’ò paura ch’el staga mal e che parfin el móra.
La me scusa, sióra Gina, ancora no l’à parlà…
Gina
L'è 'n'ora che l'aspèto, ancora no l'à magnà.
Ancó l'è dì de festa e ò còto ‘n bel polàstro,
a fòrsa de scaldarlo, l'è nero che l'è ‘n disastro.
‘N risòto co’ la suca g'ò anca preparàdo,
el riso el ghe va incontro e lu no l'è tornàdo.
Són tuta ‘n tremàsso, qualcosa gh'è capità,
me penso za in nero, za vedova són restà.
Rosa
Da éla me spetàvo de èssar consolàda,
ma fòrsi l’éra mèio spetàr par ‘na giornàda.
Sa fago mi adesso? Lo vago a çercàr?
Par tornar a la so casa, ‘n’altra strada el pól ciapàr.
Stanòte ò fato ‘n sogno ch’el m’à tanto spaentà:
tuto sangue mi ò visto, el me òmo l’è stà copà.
L’ò sognà verso matìna, fòrsi lu l’éra za via;
i sogni de quéla ora a mi no i me piàse mia.
‘Na òlta i m’à dito che i è quei che devénta veri,
me sento sofegàr, i è gran bruti i me pensieri.
Me scomìnçia le orbaróle, mi vago in svaniménto,
tegnìme par i brassi, che passa sto momento.
Agata, la più anziana di tutte le donne, schiaffeggia leggermente le guance di Rosa. Lisetta, una vicina, le porta
un bicchiere d’acqua.
Lisetta
Fòrsa, sióra Rosa, àqua fresca mi g’ò portà,
la le béa tuta quanta, el malèssar el ghe passarà.
Rosa
G’ò ‘n gropo qua in gola ch’el me sèra el canalùsso…
Maria
Se quel òmo no l’è morto, se pól dir che l’è ‘n musso.
Teresa
La senta, sióra Rosa, tuti tri i è fóra in òlta,
morti no i è mia, la se calma e la me scólta.
Se al so Calandrìn, qualcosa gh’è capità,
uno dei altri du, de sicuro, el saréa za qua.

Se l’è morto o ferìo, a dìrghelo el saréa vegnù,
la béa sta àqua fresca e la le tira ‘na sciànta su.
21
Rosa beve l’acqua contenuta nel bicchiere.
Olga
Mi són d’acòrdo co’ la sióra Teresa,
motivo no gh’e de finir lónga destésa;
da ‘n momento a l’altro, tuti tri i tornarà
e quel che è sucèsso de sicuro i spiegarà.
Rosa
Gràssie tante, care sióre, m’avì proprio consolà,
mi adesso stago mèio e aspèto quel malcunà.
Lina
La testa mai se liga prima de insucàrse,
se mal sempre pensémo, l'è mèio qua copàrse.
Bufalmàco stò spetàndo, anca mi da ‘n bel pèsso,
la tòla l'è preparà, anca i fiori mi g'ò messo.
El paról de la polenta l'è ancora sul fogolàr,
ma ancora mi no tremo e són qua a aspetàr.
I gnòchi ancó g'ò fato, de patate e de farina,
i è tuti 'na paltèca, qua tuto se sassìna.
Questa el me la paga el me caro Bufalmàco,
ghe tiro 'na savàta e ghe ne digo ‘n saco.
Agata
Sposéte sì ancora, el cal no 'l ve s'à fato,
su la tèra no gh'è òmo che no 'l sia ‘n póco mato.
Scoltè sta vècia dòna, a bèar quei i è andà,
strapegàndosse l'un con l'altro, a casa i tornarà.
L'è inutile rabiàrse, i fa sempre quel che i vól,
parché le braghe i porta, de tuto far i pól.
Se ‘n giorno la bicicléta volantiera avì acetà,
adesso , care dòne, pedalè e morta qua.
Irma (tra sé, lavorando a maglia)
‘N drito e ‘n roèrso, ‘n drito e ‘n roèrso…
e ‘n rospo in gola che 'l me stà par traèrso.
I è tute maridàde e de piànsar le g'à el coràio;
le maledìsse el giorno che le à fato quel savàio.
I è brute come l'orco, catìe più de la peste,
le à ciapà dei pampalùghi con moine e tante feste.
E mi che són gran bèla, zitèla són restà,
'na strassa de marì mai me són catà.
Ma questo no l'è giusto, la vita la me fa torto,
l'è dal giorno che són nata che tuto me va stòrto.
‘N drito e ‘n roèrso, ‘n drito e ‘n roèrso…
e ‘n rospo in gola che 'l me stà par traèrso.
Carte false mi faréa par ‘n tòco de marì,
de tuto soportaréa pur ch’el fosse vissìn a mi.
Gina
A tòla i torna sempre, ma mai a la stessa ora,
ma apéna i à finìo, de nóvo i córe fóra.
El pàr che la casa la ghe casca su la testa
e così i passa in òlta anca tuti i dì de festa.
Irma
Ma de nòte, care spóse, lóri i è lì a scaldàrve i pié,
ma mi resto sola e de frédo ghe n’ò assè.

E se dei gran s-ciantìsi, i sbrega el nero del cél,
e el s-ciòco del so tòno el te spaca el sarvèl,
lóri i è ancora lì, su ‘n fianco voltàdi zó,
e mi, a la me destra, g’ò solo ‘n comò.
Ve sveiè a la matìna, fasì insieme colassión,
mi anca se no magno, fago istésso indigestión.
A màia mi laóro par crompàrme da magnàr,
voàltre podì sponsàrve, l’è lu ch’el va a laoràr.
‘N drito e ‘n roèrso, ‘n drito e ‘n roèrso…
e ‘n gròpo in gòla ch’el me stà par traèrso
22
Iole (rivolta verso Irma)
Ti gnanca te sì degna de tuta la to fortuna,
se ancora te te lagni, a mi me vien la luna;
lìbara te sì, come ‘n léoro in mèzo al pra,
te vè a spasso tuti i giorni e te vedo ben sponsà.
A noàltre la n'è tocàda sta bèla e gran cucàgna,
mi più no posso védar le zitèle che se lagna.
Vuto che te passa ‘n póchi dei me mestieri?
Sempre g'ò da rifàr quel che mi ò fato ieri.
Nani
Quel ch’el ve ascólta, el ne crede farabùti,
noàltri laorémo e i schèi ve li démo tuti.
‘N póchi da métar via par quel che no se sà mai,
par la dote de le fióle e se capita dei guai.
Altri ancora par la spesa, altretànti par el vestìr;
se netémo le scarsèle e voàltre g'avì da dir.
Olga
E con cosa mai paghèo quando andè a l'ostarìa?
Tirchia l'è la Bèpa e credito no la ve fa mia.
E con cosa lo comprèo el tabàco da snasàr?
Par tirar in su col naso, sì lì sempre a sprecàr.
Mario
Se nasse 'na òlta e par sempre se móre,
laorémo come mussi e el tempo el córe.
Se nati sémo tuti par solo tribular,
alóra, care mie, l'è mèio qua crepàr.
'Na snasàda de tabàco e de vin qualche biciér,
par 'n'ora o forse do, i fa tasér el dispiasér.
Ida
E noàltre a casa stémo a ponciàrghe i calséti,
le scarpe ghe netémo e arlevémo i buteléti;
stirémo le camìse, tachémo su tassèi,
con l'ùcia laoràndo, se sbusémo tuti i dièi.
A casa lóri i torna, in poltrona i se stravàca,
se solo parlar proémo, se ciapémo 'na gran paca.
Lisetta
Bel afàr avémo fato quando sémo maridà,
el miél l'è consumàdo, solo luna è restà.
Prima nostro pare a bachéta el comandava,
a l'altàr el n'à portà e i altri i ne vardàva.
"Fiói mas-ci, evìva i spósi": così sigàa la gente,
de fiói ghe n'è rivà, dal marì no me vien gnénte:
manco 'na caréssa, né 'na s-ciànta de comprensión,
laóro nóte e giorno e mai 'na consolassión.

Maria
Slise g'ò le mane, a fòrsa de far la lìssia,
sempre mi me also, prima che 'l se dismìssia:
'na scuèla de late caldo, ‘n panéto biscotà,
‘n ovéto ben sbatùo, nel cadìn l'àqua scaldà.
A le sié no 'l rónfa più, el scomìnsia a sveiàrse,
el smastega parolàsse ancora prima de alsàrse.
23
Teresa
Portè passiènsa, dòne, qualcosa cambiarà,
sperémo che le nostre fióle le sia più fortunà.
In dote coi ninsói, ghe démo ‘na bèla méscola,
se i spósi i fà i mati, da lóre i se le briscola.
Du brassi qua g'avémo, solo e sempre par laoràr,
scominçiémo anca noàltre ogni tanto a bastonàr.
Toni
Sentì come le sbàtola, la pàr 'na passaràra,
a ci più ne dise su, quéle le fa la gara.
I è léngue maledéte, no sò cosa me tien,
a testa in zó le mèto, par farghe spuàr el velén.
Le so mane i è tute rosse, la schéna la ghe se spaca...
A le çìnque de la matìna, mi za mónso la vaca.
Silvio
Vècio són deventà e ancora mi comando,
se la ósse ‘n pó' la alsa, a reméngo mi la mando.
'Na briscola me la fago, me béo el me biciér,
la tòla l'è sempre pronta, la fa el so dovér.
E se 'l muso la g'à stòrto, mi proprio no la vardo,
vago a l'ostarìa, no me fago nissùn riguardo.
Rosa esce e entra nella sua casa.
Scena seconda
Personaggi: tutti quelli della scena precedente, tranne Rosa.
Alfonso
E finìla de becàrve, me parì tanti galéti,
come fóssi creature, ancora ve fè i dispèti.
'Na s-ciànta de giudìssio, proprio no ghe l'avì;
adesso mi me imbèstio se tuti no tasì.
Gino
Ieri me són sposà, a la Nina ghe vói ben,
no l'è vera che le dòne le spua solo velén.
Rosa l'è la so pèle, biondi i so cavéi,
i òci color del cél, mai visti de così bei.
La parla a voce bassa, la me dise "par piasér",
a casa, vissìn a éla, me béo el me biciér.
Aldo
Spèta 'n altro póco, l'è presto par parlar,
ancora le to camìse no l'à tacà a stirar.
La lìssia no l'à fato, de fiói no ghe n'è ancora,
spèta almànco 'n ano par èssar mandà in malora.
Ida
Ci vól óvo, galìna e caldo el dedrìo,
malmaùro l'è ancora come el marì mio.

Le donne e gli uòmini escono.
24
Personaggi: Calandrino, Rosa.
Scena terza
L’interno di una stanza nella casa di Calandrino. Calandrino ha appena aperto la porta e sta entrando. La moglie
è seduta in un angolo.
Calandrino
Sempre e forte el siga sto vècio cadenàsso,
mai te pól nar drénto sènsa far del ciàsso.
De sicuro la me dòna più de 'n bisso l'è rabiósa,
par ‘na s-ciànta de ritardo, la fa sempre la tignósa.
Sta òlta Calandrìn no 'l se ciàpa parolàsse:
sta fàcia no la vede e gnanca le me strasse.
Varda che ingrugnà, l'è là che la me spèta,
mi pòso le me pière e me cavo la baréta.
Rosa
Bruto e gran slandrón, èla ora de tornar?
L'è a mesodì che qua se vien a magnàr.
Da anca più de 'n'ora són qua che te aspèto,
ma mai te te lo cavi sto vìssio maledéto.
Tré òlte ò riscaldà sto piàto de minestra
e sempre són stà qua a vardàr da la finestra.
In paese tuti quanti, a sta ora, i à za magnà
e a mi, par i to comodi, me tóca restar qua.
Calandrino
Ma quéla la me vede e la pàr proprio sicura!
Rosa
Ma sa èlo che te gh'è in quéla testa dura?
Me crédito forse orba o me pènsito inseminìa?
La to fàcia mi la vedo come questa óngia mia.
E se proprio la verità te vól savérla tuta,
la to fàcia da baùco l'è sempre ‘n po' più bruta.
Calandrino
Strega maledéta, te m'è proprio sassinà:
da la piéra la virtù, tuta te l'è cavà.
Ma adesso te straméncio, de bòte te impenìsso,
ciàpete sto scufiòto, te lo dago proprio fisso.
Impara a rispetàr ci se ciàma Calandrìn
e cùchete sta sgnàcara qua sóra sul copìn.
Te ciàpo par i cavéi e qua in mèso te strapégo
e questo bel vestito, mi tuto te lo sbrégo.
Senti st'altra sventola qua sóra su la testa,
adesso Calandrìn el te fa proprio la festa.
Varda che bòna mira! No sbàlio 'na scarpàda,
la parte che stà in basso l'ò za tuta botàda.
Rosa
Basta, Calandrìn! Te lo domando par pietà,
són quasi tuta róta, te m'è proprio sassinà.
Pietà par l'amor nostro, me méto in zenòcio!
Calandrino
E mi te fago blu anca quel'àltro òcio.
In casa te m'è portà rovina e desgràssie,
adesso, a modo mio, te dago el me gràssie.

Indóe èlo quel bastón ch’el me dava le legnàde?
Sta òlta te sì sènsa, le difese i è cascàde.
Quéle che ò ciapà finalmente te le ridàgo,
se ferma no te stè, mi te ligo co’ ‘n spago.
25
Rosa
Aiuto, brava gente! El marì el me stà copàndo,
qua a casa, in pensièr, mi lo stavo aspetàndo.
Discorsi el stà faséndo da òmo proprio mato,
l'è via de sarvèl, qualcosa i ghe g'à dato.
Calandrino la picchia ancora.
Basta! Par pietà! Ghe n'ò ciapà bastànsa,
són tuta za macà fin sóra su la pansa.
Calandrino
Ciàmete fortunà che adesso són ‘n po' straco,
'na s-ciànta qua me sènto e dopo 'n altro fraco.
Rosa
E adesso, pòra mi! Cosa èlo che g'ò da far?
No me tègno gnanca in pié, come fago a scapàr?
In fàcia l'è tuto rosso e i òci el g'à da mato,
sigàndo el m'à spaentà anca quel pòro gato:
el s'à scónto nel cantón, là sóra sul fogolàr,
con la schéna ingobà, el contìnua a smiagolàr.
Si sente miagolare il gatto.
El pél el ghe l'à drito come l'erba de quel pra,
la cóa el ghe l'à sténca che la pàr come ingessà.
Scena quarta
Personaggi: Calandrino, Rosa, Bruno, Buffalmacco
Arrivano Bruno e Buffalmacco.
Bruno (dall’esterno della casa)
Calandrìn! Calandrìn! Lo sò che te sì lì,
qua gh'è Bufalmàco e qua ghe són anca mi.
Bruno e Buffalmacco entrano nella casa di Calandrino. La porta era accostata.
Calandrino
Fasìve pure avanti e tolìve 'na caréga
e no stasì far caso a quéla bruta strega.
Bruno
Bruta no la me pàr e strega proprio gnanca,
par avérla così consà, 'na ruèla qua te manca.
E sa fai tuti sti sassi par tèra spampanà?
De farte 'n'altra casa fòrsi èto pensà?
Buffalmacco
Sa èlo quel bruto tiro che te n'è fato al giarón?
A farne quel bel schèrso, te sì stà ‘n gran slandrón.
Prima che 'l sol el léva, tuti du te n'è fato alsàr
e 'na piéra miracolosa tuti tri dovéino çercàr.
Insieme sémo andà nel posto che t'è dito,
ma dopo qualche ora, t'è volùdo far el drito.
In mèso ai sassi neri, da soli te n'è lassà,
e a védarte sparìo, sémo anca spaentà.
Questi no i è tiri che se fa a ‘n amìgo
e quel che g'ò da dir, adesso te lo digo:

26
da ancó, a l'ostarìa, da solo te ghe vè,
lontàn dai nostri òci e fóra dai nosri pié.
Calandrino
Gnénte avì capìo, l'è stà ‘n malintéso,
a mi me despiàse se qualchedùn el s'à oféso.
Là zó, in quel giarón, la piéra l'ò trovàda,
voàltri no me vedévi, no ò ciapà la strada.
E quando gran rabiósi, tiràvi grossi sassi,
mi ero giusto lì, proprio a quàtro passi.
L’è stà solo ‘n caso, de questo són sicuro,
ma i sassi che volàa i era de marmo duro.
Se 'na prova g'ò da darve de tuto e anca presto,
nel calcagno e ne la schéna, són proprio tuto pesto.
Anca ‘n pugno ò ciapà, qua in mèzo, sóra el naso,
vardè che gran canòpia, sempre e tuto par puro caso.
Buffalmàcco
Bruno, èto sentìo? La so storia l'éra vera,
sto òmo el l'à trovà quéla strana e nera piéra.
Calandrino
Ma sta dòna maledéta la m'à subito rovinà,
'na piéra come tute anca quéla l'è deventà.
Nissùni me vedéa, come aria caminàvo
e drénto la camìsa, ste piére me portàvo.
Ma apéna ò tirà el cadenàsso de la porta,
come prima són tornàdo, par fàrvela più corta.
La colpa l'è tuta sua, 'na dòna quéla l'è,
e par farme desperàr, l’è sempre qua fra i pié.
La virtù de quéla piéra miracoli la fa,
se i òci de 'na dòna mai i la vardarà.
El rospo no 'l va zó, ghe dago ancora bòte...
Bruno
Ti te stè lì fermo, le coste te ghe i è za róte.
De quel che è sucèsso, la colpa l'è solo tua,
la storia no me béo che ti te m'è vendùa.
Là in fondo, nel giarón, la piéra t'è trovà,
dìrnelo a noàltri onesto el saréa stà.
Ma ti no te volévi spartìr la to fortuna,
adesso no te resta che 'l ciàro de la luna.
E se de piére e dòne la storia te savéi,
no vedo el bisógno de sbregàrghe anca i cavéi;
bastàva solo dirghe de no farse qua trovar
e adesso la to piéra te podaréssi anca usar.
La colpa l'è solo tua de tuta sta facènda,
cura tó moiér con impàchi e 'na lónga benda.
Ciàpa el to penèl, te spèta tri palàssi,
stùpete le réce e lassa star i sassi.
Calandrino (inginocchiandosi davanti alla moglie)
Te dimàndo perdón, cara spósa mia,
la vóia de fortuna el sarvèl la porta via.
Sènsa pensàrghe, deventàvo disonesto,
l'òmo, a cambiàrse, el fa massa presto.
Catìo mi són stà, con la me cara e brava dòna,
"scusa" te dimàndo e ti, se te pól, perdona.
Calandrino porge la mano alla moglie, che è ancora per terra e l’aiuta ad alzarsi.

Rosa
Mi tuto perdono, anca quel che no sò:
rancor e bastón mi più no ghe i ò.
Mi pronta són sempre a tuto perdonar,
ma volér no te pól che possa desmentegàr.
Dei ani insieme, ricordo el bèlo e el bruto;
nel ben e nel mal, el me cór mai l’è stà muto.
T’ò dato bastonàde, ma anca tanto amor,
mi sola te capìsso e te vardo drénto al cor.
‘N òmo te sì che par ‘na s-ciànta el s’à perso:
al vin el s’à tacà, deventàndo roérso.
De la vita te vedevi fadìghe e privassión,
nel biciér te udàvi ogni to delusión.
Al vin la se missiàa e la paréa sparir…
indrìo i te crede solo quei che no sà capir.
El vin l’imbròia, el dise sempre falsità:
alégro te te senti, el scancèla la verità.
La vita, caro mio, l’è ‘n drito e ‘n roèrso
e i dolori proà no i è tempo perso:
l’amaro in bóca, el dólso el fa più bòn,
el te fa gustar la più scónta emossión.
El te spinse a gustar i momenti passàdi,
che ben no i faréa se i fosse desmentegàdi.
Desgràssie e sbali i te porta a mauràr
par ciapàr ‘n’altra strada e la vita cambiar.
27
Calandrino
Cara la me Rosa, mi són comòsso,
anca sènsa vin, són devèntà tuto rosso.
Adesso mi vedo le figùre che ò fato,
e tuti i pensieri che par ani t’ò dato.
Da ancó mi béo solo aqua de pósso,
ogni vin mi rifiuto, sia bianco che rosso.
Calandrino si ricorda della presenza degli amici.
Se tuto avì sentì, mi proprio no me vergògno,
ma de star co’ la me spósa, adesso g’ò bisogno.
Anca in casa vostra gh’è ‘na dòna che spèta
e quando la vedì, cavève orgòlio e baréta.
fine