bollettino ufficiale - amtsblatt - Regione Autonoma Trentino Alto Adige

Bollettino Ufficiale n. 13/I-II del 26/03/2013 / Amtsblatt Nr. 13/I-II vom 26/03/2013 34
Provinzia Autonoma de Trent
LEGE PROVINZIÈLA dai 20 de mèrz 2013, n. 3
Mudazions te l’artìcol 8 de la lege litèla provinzièla, en cont de coche vegn metù
adum la Jonta provinzièla
L CONSEI PROVINZIEL
À APROÀ
No l’é stat portà dant neguna domana de referendum
chesta lege:
L PRESIDENT DE LA PROVINZIA
mana inant
Art. 1
Mudazions te l’art. 8 de la lege provinzièla dai 5 de mèrz del 2003 n. 2 (lege litèla
provinzièla)
1. L coma 1 de l’artìcol 8 de la lege litèla provinzièla l vegn mudà fora con chest:
“1. La Jonta provinzièla, lascian a valer chel che l’é pervedù dal coma 2, la é metuda
adum dal President de la Provinzia e da no più che sie assessores, anter chi che
un à la funzion de vizepresident, nominé dal President anter i conseieres
provinzièi.”
2. L coma 2 de l’artìcol 8 de la lege litèla provinzièla l vegn mudà fora con chest:
“2. Dant da diesc dis da la proclamazion, l President de la Provinzia l nomina i
assessores e, a un de chisc assessores, l ge dèsc sù la funzion de vizepresident.
Apede ai assessores nominé aldò del coma 1, l President pel nominèr un
assessor cernù anter i sentadins che no fèsc pèrt del Consei Provinzièl, purché
l’abie i requisic per vegnir lità e l sie compatibol per la encèria de conseier
provinzièl”.
3. L coma 3 de l’artìcol 8 de la lege litèla provinzièla l’é stat tout jù;
4. A la fin del coma 6 de l’artìcol 8 de la lege litèla provinzièla l’é stat enjontà chest
paragraf:
“Enscin a la sentèda del Consei, chiamèda ite per l jurament aldò de l’artìcol 48 bis,
prum coma, del Statut spezièl de autonomìa, la Jonta provinzièla la se cruzia di
mestieres de ordenèra aministrazion”.
5. Chel che vegn desponet da chest artìcol l vegn metù en doura a scomenzèr da la
legislatura dò da chela che l’é jit en doura chesta lege.
Chesta lege la vegnarà publichèda tel Boletin ofizièl de la Region. L’é obligh per
duc de se tegnir a chesta lege e de la fèr respetèr desche lege de la Provinzia.
Trent, ai 20 de mèrz del 2013
L VIZEPRESIDENT DE LA PROVINZIA f.f.
Alberto Pacher