Arrègulas - Acadèmia de su Sardu

Esempru n. 1.
VENUTU LOBINA, Po cantu Biddanoa, 2D Editrice Mediterranea. De su sarcidanesu
de Biddanoa de Tulu a unu Campidanesu comunu literàriu. Grafia e tradutzioni de
s’autori, pàg. 36 parti segunda.
“... Su primu domìnigu ‘e carèsima, fàccias a is tres, si pinnigànta in sa Prazzitta
ottu o dexi giòvunus a cuaddu, sedda, istàffas cùrzas. Donniùnu portàt unu fusti o
una màniga ‘e scova longa unu metru. Candu Tiu Perantoni infilàda in sa funi sa
primu pingiàda, Efiluisu, de pizzu de sa muralla, donàt s’òrdini po sa partènzia:
“Antoni!”. Antoni cun d’unu corpu ‘e sproni, partìat a totu fua, is arrèdinis in sa
manu ‘e manca, artu su fusti in sa manu deretta. Lòmpiu asutta ‘e sa pingiàda s’indi
pesàda in is istàffas e bum! Unu corpu a sa pingiàda e sighìat a curri finz’a Cuccuru
‘e Callia, ca prima no arrennesciat a firmai su cuaddu.”
Esempru n. 2.
FRANCISCU CARLINI, Basilisa, Condaghes. De su Sardu maurreddinu de Biddaramosa
a unu Campidanesu “tzitadinu” comenti narat Màssimu Pittau, su linguista e professori
de s’Universidadi de Tàtari. Grafia de s’autori e tradutzioni nosta, pàg. 119.
“... Finas de s’istadi de su primu annu chi fiant in Roma, Fida e Allirga andànt
a spigai in is terras de su principi de Torlonia chi si sterriant sena de lacanas accanta
de sa burgada. A Micheli ant cumenzau a si ddu portai avatu s’urtima istadi, candu
fiat giai matucheddu, in mesu de una carca de genti chi scussuràt de sa burgada
che pibizziri famiu, sartendi unu ananti de s’ateru po nd’agafai una spiga appenas
appubada. Andànt a pustis de is feminas chi teniant derettu de spigai po primas
camminendi avatu de sa macchina po messai, mentras issas depiant scioberai in
mesu de spighixeddas bizzas.”
Esempru n. 3.
NÀSSIU LECCA, Sciuliai umbras, Condaghes. De su Campidanesu ocidentali de
Biddexidru a unu Campidanesu normalisau chi totus podeus cumprendi. Grafia de
s’autori e tradutzioni nosta, pàg. 76.
“...Antoni Maria Pes fiat pesau cun Giuanni Arrei. Fillu de Angiullina Arrei,
serbidora in domu de don Ciccitu Zanda, candu fiat nàsciu in bidda non fiant mancadas
is cràstulas, a su meri, narànt, cussa dì fiant nàscius duus fillus: sa pipia de
Felicina Mereu, sa mulleri, e su pipiu de sa serbidora. Angiullina fiat cojada cun
Pedru Pes ma issu, sempri avattu de su bestiàmini de don Ciccitu, biviat prus in su
sattu chi non in domu sua.”
42