Arrègulas - Acadèmia de su Sardu

1.1.4 S’atza mala de sa proposta de una lìngua sarda a una norma sceti
S’atza mala de una lìngua sarda a una norma sceti, mancai siat sceti una lìngua
de aministratzioni in bessida, dda bieus, a parrimentu nostu, me is chistionis
afatantis:
a) no fait contu perunu de su tretu stòricu, culturali e econòmicu fatu de sa
Sardìnnia me is ùrtimus duamilla annus, chi at postu sa lìngua sarda, e, innantis de
cussa, finsas su latinu a caminai, a oras po si partziri in dialetus, a oras po si auniri
smenguendi-ndi e arrepranendi-ndi is diferèntzias;
un’esempru de partzimentu ndi-ddu boddeus castiendi su tretu fatu de sa lìngua latina
in Sardìnnia. Custa lìngua, faci a su I sèculu pustis de G.C., fut tocada in totu sa Romània
de tramudaduras fonèticas mannas, bessendi, chi nosi podeus permiti su fueddu, prus
moderna. Su matessi tretu de modernisadura su latinu ddu at fatu in Sardìnnia, foras de
su Cabu de Susu (Barbària), aundi s’est aguantau antigu. Su prus esempru stravanau
ndi-ddu bogaus de sa velari oclusiva surda latina [k], comenti in centum [ʻkentum], chi
si fiat furriada in su Cabu de Bàsciu, che in totu sa Romània, in sa palatali africada surda
[tʃ], centum [ʻtʃentum]. Ma su Cabu de Susu no si fut imbruscinau in sa chistioni de sa
palatalisadura e duncas at aguantau s’oclusiva velari surda [k];
e duncas, de sa lìngua latina, chi in Sardìnnia fiat giai partzia aici, in duas bariedadis,
no ndi podiat bessiri de seguru una lìngua sarda a una bariedadi sceti, ma,
comenti est sutzèdiu, duas bariedadis de una matessi lìngua, una de su Cabu de
Bàsciu chi narat centu e una de su Cabu de Susu chi narat chentu;
un’esempru, po contras, de arrepranamentu de is diferèntzias de is dialetus,
ndi-ddu boddeus de sa faina fata sena de pàsiu de prus de unu sèculu de is cantadoris,
campidanesus e logudoresus, chi funt arrennèscius a ndi pesai, a stravanadura, unu
Campidanesu sceti e unu Logudoresu sceti;
imoi, sa faina de smusciadura de is diferèntzias de is dialetus (campidanesus
a un’atza e logudoresus a s’àtera), est su chi tenit oi in cumoni sa stòria
linguìstica de Sardìnnia, o, mellus, est su tretu chi est faendi oi sa lìngua sarda,
ca est fatu: 1. in duus Logus diferentis (Cabu de Bàsciu e Cabu de Susu); 2. in
sa matessi ora;
in prus su traballu ddu faint: 1. sena de si-ndi incurai giai nemus, siat de su
mundu acadèmicu, in Sardìnnia e in su mundu, siat de su mundu polìticu; 2. de
bàsciu e no de pitzus, chi iat a bolli nai ca su traballu est bòfiu e apretziau de una
basi populari, chi est a) prus che àteru de is biddas o de su sartu; b) fata su prus
de pastoris e traballadoris de sa terra; c) manna meda, forsis de su 90% de is chi
màtziant su sardu dònnia dii; d) sena de tenni boxi me arràdius, TV e giornalis; e)
foras de scolas e universidadis;
sa LSC, prus de sa LSU, no est intrendi po fai tretu impari a sa lìngua sarda; po
contras, si-nci scudit apitzus, che un’arroca manna, strechendi a totus e furriendi sa
stòria a francas a susu;
28