Manlibro pri instruado de Esperanto - ILEI

Manlibro pri Instruado de Esperanto
de la instruado de Esperanto estas, ke la internacian lingvon ellernu kiom eble plej da homoj kaj ke ili
kapabliĝu uzi ĝin. Sed ĝi ne estas la nura celo, same kiel Esperanto ne estas nur lingvo.
Surbaze de Esperanto kreiĝis kultura kaj humanisma movado, kies universalaj ideoj kaj celoj
de paca kunlaboro, egalrajteco, solidareco, toleremo kaj interkultura proksimiĝo konsistigas la bazajn
celojn de Esperanto-agado ĝenerale, do ankaŭ la pedagogiajn celojn de Esperanto-instruado.
Propaganda kaj organiza celoj de Esperanto-instruado sendube estas altirado de novaj adeptoj
kaj plialtigo de la membronombro de Esperanto-komunumo. Do la instruado de Esperanto devas reale
kaj konvinke informi la lernantojn, kaj pere de ili ties socian medion, pri la esenco de Esperanto kaj
ĝiaj kvalitoj. Pruvante la praktikajn kaj ĝenerale homajn valorojn de la internacia lingvo,
enkondukante la lernantojn en la etoson de Esperanto-vivo, ĝi devas motivigi ilin resti en la movado,
fariĝi ĝiaj aktivaj partoprenantoj.
Krom bona kompreno kaj konkretigo de la ĝeneralaj celoj de Esperanto-instruado, estas grave
koni ankaŭ la celojn de la lernantoj mem, iliajn motivojn kaj interesojn, pro kiuj ili eklernis kaj lernas
la internacian lingvon, kion ili deziras atingi per la lernado:
• nur supraĵan konon de la lingvo
• aktivan uzkapablon
• eniri novan rondon de amikoj
• ellerni lingvon pli facialan ol aliaj
• prepari sin por partopreno en Esperanto-aranĝoj
• subteni la noblajn celojn de esperantismo
• ebligi al si profesiajn aŭ hobiajn kontaktojn internaciskale
• kontentigi proprajn interesiĝojn pri diversaj temoj (kulturaj, sociaj, politikaj, el la vivo kaj
personaj travivaĵoj)
• uzi novan medion por amuziĝo, turismo, muzikado, ŝercoj ktp ktp.
Ĉiuj tiuj motivoj estas subtenendaj kaj akordigeblaj kun la ĝeneralaj celoj de Esperanto-instruado.
Necesas flegi ilin per konvena informado pri la esenco kaj praktika uzebleco de la internacia lingvo.
Kaj necesas priatenti ilin ĉe difinado de celoj de ĉiu konkreta E-kurso.
La instruceloj de konkreta E-kurso povas koncerni:
• la lingvon mem: evoluigi la lingvokapablojn de la lernantoj, kapabligi ilin kompreni, regi kaj
uzi Esperanton:
o ekspliki la gramatikon
o alproprigi leksikon
o paroligi
o aktivigi la pasivajn lingvosciojn el antaŭa lernado
o pliprofundigi la konon de lingva strukturo
o ebligi ĝuadon de E-beletro, kapabligi por tradukado, ktp
• la pedagogian valoron de Esperanto: evoluigi etikajn valorojn ĉe la lernantoj, instruante
Esperanton instrui pri la homamo, amikeco, interkompreniĝo, egalrajta kunlaboro, empatio,
paco
• la propedeŭtikan valoron de Esperanto: plifaciligi studadon de aliaj fremdaj lingvoj aŭ de la
gramatiko de propra lingvo
• la kulturan valoron de Esperanto:
o enkondiki la lernantojn en la spiriton kaj kulturon de Esperanto-komunumo
o proksimigi al la lernantoj kulturon kaj vivon de aliaj popoloj
• eksperimentan instruadon:
o esplori la lernfacilecon de Esperanto
o kompari efikecon de diversaj instrumetodoj
o esplori la propedeŭtikan valoron de Esperanto
o esplori la eblecojn de interkultura edukado pere de Esperanto kaj
• specifajn bezonojn kaj aranĝojn:
o plifirmigo de la lingvoscio por partopreno en internacia E-aranĝo
o kampanjo de plialtigo de la membronombro
1-5