SP 12 S- 18 Nus vein tractau la davosa gada la ... - Commonweb

SP 12 S- 18
Nus vein tractau la davosa gada la cumposiziun dallas empremas treis
parts dil cudisch 'siat otg nov'. Il cudisch romontsch fa, sco nus
vein viu, ina schelta dils dus cudischs tudestgs. Il bia vegnan ils
capetels dil cudisch dil 'Schweizer Sprachbuch 9' mintgamai alla fin
dallas differentas parts, mo ei dat era cass, nua che capetels dil
cudisch dalla novavla ein mischadai denter da quels dalla 7avla ed
8avla en. Gest pil capetel 'Tgi ha ils megliers arguments' (p.22)
cun il pugn da partenza 'Igl eroport da Heathrow' para quei uss buc
gest gartegiau a mi, mo jeu enconuschel buc las raschuns, pertgei
ch'igl autur ei sedecidius da metter quei capetel en quei liug.
Lu vein nus aunc dau in'egliada sin in auter problem: tgei san ins
translatar e tgei va buc. Effecivamein ein lunscho ils biars texts
dil cudisch romontsch texts translatai. Ei dat denton capetels, nua
che quei va buc. Ella part 1 ei quei ils capetels che tractan specificamein
il lungatg: 'Lungatg da giuvenils, In pèr dialects tipics
en Surselva' e '5 idioms –ina crusch?' Era per la differenza denter
lungatg plidau e lungatg scret vess ins stuiu schar dar el tgau enzatgei
auter che mo ina translaziun dil tudestg tenor miu manegiar,
mo ei fuss schon buc buc stau sempel d'anflar situaziuns parallelas
en lungatg scret e lungatg plidau. Mo ella fuorma dil cudisch
ves'ins lu era buc fetg bein quella differenza.
Ei dat era midadas da tema e text per motivs culturals, sco nus vein
viu all'entschatta da part 2, nua ch'ei vegn tractau ils giugs auditivs
enstagl da televisiun e video. Ils 'videos' ein era schon puspei
antiquai denton, pia era buc bia pli actuals ch'ils giugs
auditivs. Lu ei la midada dalla 'Brienzer Rothornbahn' alla 'Viafier
retica' en part 3 ina midada per motivs culturals, mo gest bia da
quellas dat ei buc el cudisch.
Nus vevan aunc entschiet la davosa gada cun in auter tema, nua che
ins sa buc semplamein translatar, las poesias. Tier las fablas va
quei aunc senz'auter, schegie cun in pign incap tier la davosa da
quellas, perquei ch'igl ei ina fabla moderna. Gliez ei signalau el
tudestg entras scriver pign ils substantivs, ina raffinessa da quella
fabla va a piarder el romontsch. Translatar ella san ins perquei
tuttina, mo anflar in auter mied ch'indicass, ch'ei setracti d'in
text modern e buc d'in text tradiziunal, ei strusch pusseivel el
romontsch.
Las poesias dil text tudestg ein fetg multifaras, sco nus vein viu.
Schon sin l'emprema pagina dil text tudestg vein nus treis tips fetg
differents da poesias, ina tradiziunala, ina da Christian Morgenstern,
ch'ha scret ina massa poesias da quei gener, p.ex. la renumada
"Das ästhetische Wiesel":
Ein Wiesel
saß auf einem Kiesel
inmitten Bachgeriesel.
Wißt ihr
weshalb?
Das Mondkalb
verriet es mir
im Stillen:
Das raffinierte
Tier
tat's um des Reimes willen.

SP 12 S- 19
La tiarza poesia sin quella pagina lavura mo cun associaziuns: 'Aufgezwackt
cun hingemotzt / angezickt und abgestotzt' etc. Da quei dat
ei lu buc el romontsch; noss auturs ein glieud seriusa. Las poesias
dil 'Schweizer Sprachbuch 7/8' ein veramein tschernidas cun tutta
precauziun, cunzun quellas da p.54 e 55, che duein mussar ritmus,
rema e tun da poesias.
Anflar poesias corrispundentas sursilvanas ei segir buc aschi sempel.
Ina da quellas vein nus aunc tractau la davosa gada. Igl ei ina
poesia tradiziunala, mo da lezzas vess ins lu schon giu meglieras,
schizun per sursilvan. Cunzun il metrum dalla poesia ei catastrofals,
e las remas ein era buc gest fetg surprendentas, auter che
forsa 'ti – mintgadi'. Igl ei ver che las poesias da Muoth ni Tuor,
poesias classicas par excellence, ein magari empau liungas, mo ina
ni l'autra ch'ei era buc pli liunga vess ins schon anflau.
La secunda poesia ei da Pader Alexander Lozza. Enconuschis lez? –
Quei ei in scribent surmiran. Effectivamein ei la poesia sursilvana
ina translaziun dalla poesia dil cudisch surmiran. Gest da basegns
fa quei uss buc; ei dat bia dapli poesias e poets sursilvans che
surmirans, quei che vul bein aunc dir nuot dalla qualitad, mo tuttina.
Igl original ei:
Il scort ed igl nurant
Dadei en scort on sutaro,
en renumo!
Dasper igl scort, en por nurant,
en veir unfant!
Ossa las tgavazzas sen carner
ston star a pêr!
La ti', te scort cun ti'saveida,
scu chella digl nurant – è veida.
Veis capiu il text? – 'scort' = "perdert", nurant' = "ignorant,
tup". Il tetel "Il sabi ed il tup" selain pia giustificar. Pli difficultusas
ein lu las empremas duas lingias. Tgi han ei satrau el
text sursilvan? –
"in renomau"; quei ei il soli object direct pusseivel. E nua han ei
satrau lez? – Buc lunsch naven d'in sabi. Tgi han satrau el text
surmiran: 'Dadei en scort on sutaro'.
Il 'scort'; e quei 'dadei', "daditg", e buc "datier da". E 'renumo'
ei lu ina apposiziun a 'sabi'; "in renomau". Pia "Daditg han ei
satrau in sabi, in renumau."
Lu 'Dasper igl scort, en por nurant'. Tgei ei "en por nurant"? –
"in pauper tappalori". 'por' ei en scadin cass la scursanida da 'pover'
"pauper". Il "pur" vess num pour per surmiran. Per 'tappalori'
stuess ins anflar enzatgei meglier, mo "in pauper tup" va en scadin
cass era buc bein. Il meglier fuss forsa aunc 'tgutg', sin basa da
quei che suonda lu el text surmiran, 'en veir unfant!' "in ver affon",
silmeins spirtalmein. Nua ei 'in ver affon' vegnius vi ella
versiun sursilvana? –
Lez ei vegnius ella poesia dasperas da Theo Candinas, ella quarta
lingia:
Olmas
Dalunsch e damaneivel
dei is sch'igl ei pusseivel
in ver affon!
a nus ord l'autra veta ...

SP 12 S- 20
Leu disturba quella lingia lu veramein ualti fetg! Mo era cheu ei
secapescha la poesia ali giavel cun schar naven quella lingia. El
cudisch surmiran ves'ins gie claramein la structura dalla poesia: 3
strofas tuttina, la quarta lu auter ed era separada da tschellas
treis cun in spazi. Cheu ves'ei ora, sco sch'ei dess ina strofa da
treis lingias e lu duas da duas, ch'han aunc mintgamai in auter ritmus.
Quei fuss lu aunc mender che la poesia dalla Maria Beer; tier
lezza ha tuttina mintga strofa 3 lingias. Mo da spindrar fuss la
poesia aschia ni aschia buc. Sch'ins metta 'in ver affon!' el dretg
liug, maunca la rema 'nurant – unfant' digl original. Mo da remas
s'empatscha nies translatur aschia ni aschia buc la massa: la rema
'carner – pèr' ei ina pura rema dil lungatg da scartira, e la rema
'savida – vita' ei tut semplamein fallida ed ha lu era num 'saveida'
e 'veida' el surmiran. Cheu san ins mo dir: 'Pover pader Alexander'.
Igl autur sursilvan ha aunc translatau duas autras poesias dil sursilvan
el surmiran, 'Televisiun' dad Antonia Sonder sin p.56, e
'Paus' dad Andrea Steier sin p.58, era lezzas buc senza ina catastrofetta
ni l'autra, cunzun la davosa. Mo era schiglioc demuossa la
schelta ina nunenconuschientscha eclatanta dalla poetica en general
e da poesias sursilvanas en special. Aschia maunca p.ex. la davosa
strofa ella poesia da Theo Candinas, ch'ha num:
Ha quel che fa dertgira
cun nus in'autra mira
pertgei sto'l schar curdar
nus ord siu maun
giu el pultaun?
Pia ina strofa ualti impurtonta. Plaz vess ei giu el cudisch era per
quella strofa, mo probablamein era ella buc correcta politicamein
pil responsabel da quellas paginas.
Las poesias p.56 e 57 hai jeu buc controllau. Dils auturs ha silpli
Gon Deplazes in cert num era sco poet, era sche la poesia ch'ei vegnida
tschernida dad el s'auda segir buc tier sias meglieras. Mo
p.58 e 59 han bunamein tuttas poesias enzanua in sbagl. Tier quella
da Gion Cadieli ei la 3 strofa spartgida en duas parts. Tier Muoth
stuess ei esser 'Quel tuna ferm e suna clar', buc duas ga 'tuna'.
Tier Andrea Steier stuess ei esser 'ruaus' enstagl 'ruarus' en l.2.
Quella secunda lingia ei era schiglioc lavagada: la versiun surmirana
ha: porta pasch e pôs
cun treis s inizials, e la strofa entscheiva gie era cun 'Puspe'.
Cun midar 'pôs' en 'ruaus' ei il ritmus lavaguas; 'ruaus' ha duas
silbas enstagl mo ina. Lu vegn era la rema fallida cun duvraus duas
gadas 'ruaus' enstagl 'pôss' e 'clos' sco egl original; ins astga
buc metter duas gadas il medem plaid ella rema.
Tier la proxima poesia da Gian Fontana ei tetel fallius. Lez stuess
esser 'Èrs madirs'; las 'Medunzas' vegnan dalla poesia da Flurin
Darms. Ella tiarza lingia dalla secunda strofa stuess ei esser
'sesbleha' da 'sesblihar', buc 'sesbeha', ed ella proxima lingia
'fretg' e buc 'frestg'. "ei tut il frestg a mun" dat uss veramein
negin senn. Ella secunddavosa lingia dalla poesia eis ei era 'canzuns'
sco ella davosa, poeticamein secapescha meglier.
Sin p.59 ha Flurin ha num 'Darms', buc 'Dams', ed ella secunda lingia
eis ei 'ellas', buc 'ella', numnadamein las medunzas e buc la
biala. Ella secunda lingia dalla davosa strofa stuess ei esser 'cun
staunchel maun, mo egl rient'. Probablamein ha il responsabel capiu
'ęgl rient' enstagl 'ēgl rient', ed ha lu currigiu, mo aunc lu sa
Flurin Darms segir meglier, tgei che s'auda ella poesia ch'igl autur
dil cudisch sursilvan. La poesia dalla Maria Beer hai jeu buc saviu

SP 12 S- 21
controllar, mo lezza ei aschia ni aschia buc gest in hit. Quei vesa
ins relativamein spert tier las remas, ch'ein savens fuormas verbalas:
'arriva – viva; fittai –ruinai, calar – car, alzein – instantamein,
segira – pertgira'. Tier Darms eis ei mo 'rient – murend', e
leu aunc en duas categorias grammaticalas differentas. Cunzun remas
cugl infinitiv, dil tip 'gratular – fiasta far', ni da quellas sin –
ein, 'nus gratulein – il migiel alzein' ei aschi tipicas per quei
gener da poesias.
Lu lasch jeu cun quei per las paginas 55-59. Sche jeu savess far
quei, cussegliass al scolasts da tagliar or quellas en tut ils cudischs
da lur scolars, per evitar che lezs piardien tut il respect
per poesias sursilvanas.
Il rest dalla part 3 ein lu puspei translaziuns. Ina caussa ni
l'autra ei lu puspei ida empau crutsch tier in text ni l'auter, e
tier in capetel ni l'auter san ins sedumandar, schebein ei vess buc
dau enzatgei pli adattau alla situaziun romontscha che quei ch'ils
capetels tscherni ein. p.75 vegn p.ex. descret in accident d'in
aviun sin la sdrema centrala da l'autostrada Genevra-Losanna (7/8,
82), e p.76 e 77 problems dil "Hallenbad City Zürich" (7/8,84f.),
translatau cheu cun "il bogn cuvretg dalla City a Turitg". Schebein
quella translaziun ei correcta ni buc, sai jeu era buc giudicar. Jeu
supponel che 'City' seigi plitost in num, buc in liug, e lu stuess
ei esser "Il bogn cuvretg City a Turtig", mo segirs sun jeu buc,
malgrad Google. Era la 'Show dalla „Titanic‟, p.79, para uss buc
dispet in text fetg adattau per igl ambient romontsch. El vegn dil
cudisch dalla 9avla (p.63), mo ins vess tuttina era aunc giu autras
pusseivladads. In tec dapli adatg vess ins era saviu dar tscheu e
leu. p.78, tiel text cul tetel 'Vandals a Seewen', vess ins era saviu
prender x-in vitg el Grischun ch'ha ina staziun, cunzun ch'ils
biars scoalsts e scolars vegnan buc a saver, nua che Seewen ei, ed
ei dat schizun dus loghens cun quei num (SZ, SO). Era per 'Roger
Bürgler, Lauerz' (SZ), vess ins saviu anflar enzatgei pli datier dil
Grischun. Il cudisch surmiran ha silmeins schau naven 'Lauerz', mo
il cudisch sursilvan ha puspei introduciu il liug cheu ed el proxim
text. Cun schar cheu ils nums tudestgs ves'ins gie scochemai, ch'il
text ei translataus e buc originals.
Lu schein nus cun quei, quei che pertucca la tiarza part. Dat ei
aunc damondas tier quella? –
Lu mo aunc cuort tier la quarta part, 'Scriver texts', p.80-130, 27
capetels en tut. En quella ei praticamein tut translatau, entschiet
cul text da Franz Hohler silla pagina da tetel, p.80 dil cudisch romontsch,
p.90 dil 'Schulbuch 7/8'. Ils biars temas derivan dil
'Sprachbuch 7/8', ils davos 7 denton dil 'Sprachbuch 9'. Ina midada
pli gronda ha ei mo dau sin p.104 dil cudisch romontsch, nua ch'in
auter cudisch ei tractaus che sin p.116 dil 'Sprachbuch 7/8', mo il
cudisch presentaus el cudisch romontsch ei era in cudisch translataus
dil tudestg. Era il text che suonda ei lu puspei translataus:
in raquent d'in cert Hermann Heer cul tetel 'Bob Whiston', ch'han
segir domisdus aunc mai udiu enzatgei dil romontsch.
Lu dat ei aunc ina pintga midada sin p.117 dil cudisch romontsch,
nua ch'ins ha La Quotidiana sco funs enstagl dalla NZZ ed x-in Tagblatt
el 'Schulbuch 9', p.89, mo cheu pertucca la midada mo la fotografia
dil funs; il text ei il medem. Il medem vala per p.118, nua
ch'il funs ei midaus, il text sco tal denton buc. Lu ein aunc las
fotografias sin p.120-123 differentas da quellas dil cudisch tudestg

SP 12 S- 22
(9,96s.), medemamein ils nums, mo il tema ed il text sco tal ei
restaus il medem. Quella part ha pia las pli paucas midadas visavi
ils text originals, ton sco jeu vesel.
Dat ei aunc damondas tier quella part? –
Lu vegnessen nus lu tier quellas parts dil cudisch ch'han buc da far
directamein cullas quater capacitads da lungatg 'tedlar – discuorrer
– leger – scriver'. El cudisch romontsch ei quei treis parts: part 5
'Observar il lungatg', part 6 'Veser sbagls – evitar sbagls', part 7
'Rumantsch grischun'. Part 7 croda secapescha naven els cudischs tudestgs.
Ei dat era buc leu ina part che vess num 'Hochdeutsch'; il
diever da lez els cudischs secapescha da sesez. Ils tetels dallas
autras duas parts derivan dil 'Sprachbuch 7/8'. El 'Sprachbuch 9'
ein quellas duas parts buc repridas pli. Leu ha ei denton era ina
part supplementara a quellas dallas capacitads, ch'ha denton num
leu: 'Sprache verwenden – den Sprachbau durchschauen'. Sco nus vegnin
lu aunc a veser, ein denton era differents temas da quella part
dil 'Sprachbuch 9' vegni integrai el cudisch romontsch. Quei ei lu
parts, nua ch'ei astgass lu esser in pulit tec pli difficultus da
translatar dil tudestg, perquei ch'il lungatg ei cheu il tema, buc
quei ch'ins sa far cul lungatg.
Il cudisch romontsch entscheiva la part 5 cul tema: 'Era il lungatg
semida', p.132, che vegn el 'Sprachbuch 7/8' sco secund tema da
quella part, p.150. Il cudisch tudestg ha avon aunc il tema 'Andere
Zeiten – andere Sitten' (p.148), nua ch'ei va d'ina vart per mussar
las midadas enteifer il sistem da saltar denter ils 1900 ed ils
2000, da l'autra vart dallas modas e manieras da magliar, mo lezza
pagina ei buc fetg consistenta. Quei duei esser ina introducziun el
tema 'midadas', che sto uss denton buc dispet esser e ch'ins sa
schar naven cun buna cunscienzia. En scadin cass vess ins stuiu
prender midadas ch'ein pli datier dalla situaziun dil Grischun, mo
da lezzas vess ei era dau avunda.
Il 'Sprachbuch 7/8' (p.150) muossa la midada da cun l'emprema strofa
d'ina canzun da baselgia, cun exempels da 1545 tochen 1952. Ei vessen
secapescha era saviu ir anavos tochen egl 8avel tschentaner,
schegie buc gest cun quei text. Agl autur dil cudisch sursilvan ha
quei lu buc tunschiu; lez va anavos sin in text ch'el indichescha
cun ina scartira fetg speciala. Enconuschis il text? –
El indichescha sut 'Versiun interlienara da Nossadunnaun'; 'Nossadunnaun'
stuess ins scriver ensemen. Nua ei quei? –
Quei ei la denominaziun romontscha dad 'Einsiedeln'. Quei era in
liug da pelegrinadi aschi enconuschent ch'el veva survegniu in num
sursilvan. Ina fotografia dalla versiun interlineara da Nossadunnaun
dat ei ellas Funtaunas I. Schon la pagina da tetel da quei tom ha
quei text sco funs. Il text romontsch ei mintgamai screts sur ina
liniga vi, aschia ch'el stat denter las lingias dil text original,
ch'ei per latin. Il text romontsch entscheiva tier igl S grond e va
mo sur in pèr lingias. L'entira pagina ei copiada sin p.51, mo
ch'ins vesa strusch il text romontsch leu. Schon la pareta ch'il
text ha survegniu el cudisch da scola ei totalmein fallida, e sco
sursilvan sa il text era buc valer senz'auter. Screts eis el probablamein
a Faveras/Pfäffers sur Bad Ragaz. Lu cuntegn il text dil cudisch
da scola era aunc differents sbagls. Schon igl emprem plaid ei
fallius; el text stat afunda, ed igl ei screts per [v]; il plaid
ei 'avunda'. Lu ei 'tutilo', l.4, ei scret ensemen el text orginal,
mo Deplazes sparta era aschia ellas Funtaunas, silla pagina visavi
la fotografia, aschia ch'ins sto schar ir atras quei. Era 'quilhomo'
ei scret ensemen egl original, denton spartiu tier Deplazes, mo en

SP 12 S- 23
scadin cass eis ei mo in –i- tier 'quil', buc dus. Deplazes inidchescha
lu era mo qu il hom. 'mopotesille' ei era scret ensemen, mo Deplazes
ha la medema separaziun. En scadin cass ei era il tierzdavos
plaid fallius; il secund –e da 'sillee' ei da memia. Quei text vess
jeu en scadin cass schau naven; el fa dapli problems che quei ch'el
illustrescha la historia dil sursilvan.
La canzuun da 1625 vegn dalla Crestomazia, sco quei ch'ins vesa
dall'indicaiun [p.233] aschi ca. enamiez; lezza indichescha mintgamai
las paginas dil original en parantesas quadras. (Crest.I,47).
Tgei vul 'Er en quel miedi' dir? –
"Era en quella melodia", numnadamein quella ch'ei indicada tier la
canzun che preceda. Tgeinina che gliez ei, ston ins lu halt mirar
ella Crestomazia, sch'ins remarca, che la canzun vegn da leu, ni lu
egl original, ch'ins vegn denton strusch a ver a disposiziun.
La canzun da 1685 vegn dil cudisch da cant 'Canzuns devotiusas (…)'
da P. Zacharias da Salò. Il cudisch da scola sursilvan ha era quei
text dalla Crestomazia (I,123), mo che la canzun ha leu 22 stofas.
Il rest fan lu texts en prosa pli cuorts. Ils dus emprems vegnan era
dalla Crestomazia (I,753), e quel da 1811 era (I,507). Danunder
ch'el ha lu ils pli novs, hai jeu buc controllau.
Tier quei tema ha il cudisch sursilvan pia tscherniu in auter proceder
ch'il cudisch tudestg. Lez lavura igl emprem en scadin cass
adina cul medem text, ferton ch'il sursilvan ha differents texts, en
principi dus per tschentaner, dapi ch'ei vegn scret empau pli frequent
romontsch. Il cudisch surmiran ei suandaus il model dil cudisch
tudestg. Lez ha effectivamein era adina il medem text, sco il
tudestg, denton il 'Bab nos' ni paternies. Quel anfl'ins secapescha
praticamein en tut ils catechissems, aschia ch'ins ha ina pulita
schelta a disposiziun. Il surmiran ei vegnius screts e surtut publicaus
bia pli tard ch'il sursilvan, mo Faust Signorell ei tuttina
vegnius tier 5 texts differents. Pil sursilvan vess p.ex. era saviu
prender texts ord ils evangelis. Lu vess ins saviu entscheiver cun
la translaziun dil NR da Luci Gabriel da 1648 e cumparegliar lezza
inaga cul text corrispundent ord las 'Epistlas ed Evangelis' da Balzer
Alig da 1674. Ina nova translaziun dils 'Evangelis ed Epistolas'
ha Franzesg Damian Gallin fatg 1737. Lu vess ins saviu prender in
text dall'ediziun dil Niev Testament da Luci Gabriel da 1820 e lu
dad ediziuns pli novas u dil Niev Testament da vart protestanta ni
dils 'Evangelis' da vart catolica el 19avel e 20avel tschentaner.
Ins vess pia era anflau texts avunda per far quella cumparegliaziun
cul medem text sursilvan. Sch'ins vess giu adina il medem text, vess
ins forsa saviu far enzatgei cun quels; lu vess ins eventualmein saviu
cumparegliar in ni l'auter plaid el decuors dil temps. Mo tgei
ch'il scolast duei far cun quels texts ch'ein dai cheu, sai jeu lu
era buc propi.
Aunc damondas tier quella pagina dubla? –
Lu vegn p.134-135 ina brev d'amur, secapescha puspei ord la Crestomazia
(I,296s.). Il text ei segir interessants, mo sch'el ha success
en scola secundara, sai jeu lu buc. Il cudisch surmiran ha duas descripziuns
da Planeiras en quei liug, ina dil 1903, l'autra dil
1998, lauvra pia vinavon plitost cul cuntrast 'pli baul – oz', buc
semplamein cun in text pli vegl da 1741. La versiun dil cudisch surmiran
vegn dil 'Sprachbuch 9' (p.130s.), nua ch'ei ha era dus texts
semeglionts dil 'Weissenstein' sper Solothurn, mo che lezs texts
schain lu aunc pli ditg in ord l'auter, 1840 e 1985. Quels texts
stattan era el 'Sprachbuch 9' sut il tetel 'Sprache im Wandel', sco

SP 12 S- 24
ils exempels sin p.150/151 el 'Sprachbuch 7/8. El cudisch surmiran
han ins pia gest priu il tema cul medem tetel dil 'Sprachbuch 9' en
quei liug. Cheu va ei buc en emprema lingia per l'ortografia differenta
denter ca. 1900 e 2000, mobein pils differents pugns da vesta
dalla descripziun dalla cuntrada. Quei entscheiva gie schon tier la
fotografia: alvner visavi colurs, semuossa lu denton aunc pli specificamein
el text. Dalla 'stupenta tgesa de scola' da Lantsch dil
text da 1903 stat lu secapescha nuot pli el text da 1998; lu secapeschen
stupentas casas da scola da sesez.
Lu vegn sin p.136 e 137 il tema 'Rumantsch – divers idioms', quei
che sa secapescha era buc vegnir dil cudisch tudestg. Effectivamein
ha il 'Sprachbuch 7/8' sin p.152 e 153 in auter tema, numnadamein
'Mundarten gibt's nicht nur in der Schweiz'. Vesis la differenza
denter quels dus temas? –
'Mundart' ei normalmein 'dialect' per romontsch, buc 'idiom'. Dat ei
buc dialects tier nus? –
Secapescha, e schizun fetg expressivs, maneivel aschi expressivs sco
certs dialects svizzers. Ver ei denton, ch'era il text tudestg distingua
buc directamein dialects en sia carta, mobein regiuns dialectalas.
Perquei ei p.ex. il tudestg svizzer mess ensemen cugl austriac,
bavares, svob e franc, quei ch'ils Tudestgs svizzers vegnan
buc a veser pli ch'in ton bugen. Persuenter ha lu il cudisch romontsch
priu ina carta ch'ils Romontschs vesan bugen, mo ch'ella
constat buc. Ella indichescha numnadamein il territori dallas vischnauncas
che vevan 1860, pia avon 150 onns, ina maioritad romontscha.
Ozildi eis ei mo aschi ca. la mesadad da quei territori ch'ha ina
maioritad romontscha. Tenor ils medems criteris sco 1860 veseva la
carta or 1980 aschia sco el Radioscola, mo jeu hai creig jeu schon
mussau quella inaga a vus. Aschi ca. la mesadad dil territori ch'ei
attribuius cheu al romontsch s'auda pia denton al tudestg, p.ex.
Flem, Domat, Sarn, Andeer, Bravuogn, San Murezzan e Samedan. Ozildi,
30 onns pli tard, vesess la carta or aunc mender, mo ozildi san ins
buc mussar quei aschi bein. La damonda suenter il lungatg ei vegnida
midada tier la dumbraziun dil pievel da 1990, e 2010 ha ei insumma
dau negina dumbraziun dils Romontschs. Ei fan lu pér puspei ina dumbraziun,
cu ch'ei dat negins pli. Mo da mussar ina carta actuala
fuss forsa tuttina stau empau schoccont.
Ei dat lu era pensums tier quellas duas paginas, quei ch'ei buc il
cass tiel text tudestg corrispundent. Mo ils pensums ein schon da
sligiar.
Lu vegn il tema 'Duvrar vocabularis', p.138, che corrispunda al tema
'Was Wörterbücher meinen' el 'Sprachbuch 7/8' (p.156s.). Era cheu ha
secapescha il bia stuiu vegnir midau, sulettamein il 'Bedeutungswörterbuch'
dil Duden, il clar-verd ei era reprius el romontsch, denton
buc semplamein ord la versiun tudestga, che muossa mo la part sura
da quei vocabulari, mobein igl entir. Era il text reprius ord il
'Bedeutungswörterbuch' el cudisch romontsch ei auters che quel el
cudisch tudestg. Daco savess ins ver schau quei vocabulari el cudisch
romontsch? –
Enzatgei aschia dat ei secapescha buc per romontsch. Sch'ins vul pia
mussar differents tips da vocabulari, resta buc bia auter che prender
in exempel tudestg. Effectivamein ein ils exempels sin p.138
d'ina vart il NVS, da l'autra vart il Vocabulari romontsch tudestgsursilvan,
che datescha dil reminent da 1975 e ch'ei cun quei schon
buc pli sill'aulta. Lu dat ei aunc il pledari grond en fuorma electronica,
e lu eis ei lu alla fin cun quei ch'ins sa presentar per
romontsch sco vocabularis. Ei dat aunc in vocabulari per tiarms

SP 12 S- 25
specials, il 'Vocabulari administrativ-giuridic' ed in pèr broschuras
da quei gener, mo buc la massa. Pil ladin e pil sursilvan vess
ei aunc dau il schinumnau 'Vocabulari fundamental', ch'ei empau
in'autra fuorma da vocabulari.
Sch'ins mira lu sils vocabularis romontschs e sils tudestgs che
vegnan citai, tgei croda en egl? –
Tut ils vocabularis tudestgs ein mo tudestgs; il cavazzin tudestg
vegn declaraus per tudestg. Ils vocabularis romontschs ein tuts bilings
romontsch-tudestg; in vocabulari puramein romontsch dat ei
buc. Schon quei muossa secapescha ina fleivlezia fundamentala dil
romontsch; ei dat negina descripziun dil romontsch per romontsch.
Era il DRG ei gie screts per tudestg, buc per romontsch, e tut ils
exempels romontschs vegnan translatai leu per tudestg, secapescha
per contonscher in public empau pli vast che mo il public grischun.
Bia pli che 100 exemplars dil DRG vegness ins gie strusch da vender
schiglioc.
Ils pensums ch'ein da far sin quellas paginas ein lu ualti differents
el cudisch romontsch ed el cudisch tudestg. El cudisch tudestg
va ei mo per anflar or, tgei che 'armierter Beton' ei. Ins vesa lu,
ch'ins sto schon ir silmeins tochen tiel 'Wahrig' per insumma anflar
il plaid 'armieren', ferton ch'il plaid 'Beton' ei d'anflar en tut
ils vocabularis. 'armiert' s'auda tiel scazzi da plaids special,
ferton che 'Beton' s'auda tiel scazzi da plaids cumin. In pensum semegliont
dat ei era el cudisch romontsch sco davos, mo ch'ei va leu
per il plaid 'cabaret'. Quel vegn bein era avon en tut ils 4 exempels
dil cudisch romontsch, mo tgei ch'el vul effectivamein dir, anfla
ins lu era mo el 'Bedeutungswörterbuch' dil DUDEN, pia el vocabulari
tudestg. Pia gest in bien test per la qualitad dils vocabularis
romontschs eis ei buc.
Ils auters pensums han plitost la funcziun da sfurzar ils scolars da
duvrar il 'NVS'. Igl ei da mirar, tgei plaids cumponi ch'ins anfla
tut sut 'cudisch', lu co ch'il verb 'far' ei ordinaus. Cu ch'ei han
lu mirau atras lez, han ils scolars lu avunda dil vocabulari, probablamein.
Il pensum ei fatgs per il Vocabulari surmiran', ch'ei in
pulit tec meins exhaustivs ch'il NVS, aschia ch'els ein bia pli lungurus
per sursilvan che per surmiran. Cheu fussen probablamein pensums
cun pli paucs exempels stai didacticamein megliers. Lu eis ei
da mirar las scursanidas sin p. roman 22-25, quella gada el vocabulari
tudestg-romontsch. Quei pensum va uss; igl ei mo bien 50, ed ei
van mo tochen p.24, mo persuenter ein tuttas per tudestg.
Aunc damondas tier quei tema? -