Gizarte eta nazio errepresentazioa telebista-albistegietan - Euskara

Aurreko azpiatalean ikusi dugun bezala, telebistan hitz eginez agertzen
direnetatik nagusi dira "koalifikazio" sozio-politikoa duten Aktanteak: kazetariak
eta bozeramaleak.
Zalantzarik gabe, Aktante hiztun horien nortasun sozio-politkoari so
eginez, Sistema-egiturakide gisakoa nagusituko da. Izan ere, Aktante guzien
izakera hori aztertu ondoren Sistema-egiturakoen partaidetza ikaragarria soma
baitaiteke.
Pertsonalizazioari dagokionez Gizabanakoak atentzioa deitzen du
ehuneko 68,8az, hauetatik emakumezkoak %2,6az. Bestalde, multzoen
pertsonalizazio maila ezagutuko dutenak %17,4a da.
Sistema-egiturako Aktanteak gauzak eginez agertzen direnean pantailan ,
bisualizatzen diren Ekintzak hauek dira: Esateak (%52,4), Egite aldakorrak
(%21,8), Egonean daudenak (%18,1) eta Egite erritualak (%7,7).
Aginteak egituraturiko maila desberdinetan koka daitezkeen tipologia
sozio-politiko hauek burutzen dituzten Ekintzak, nagusiki, neutralak (%79,8)
dira, kontsentsualen kopurua %18,6koa da, eta negatibotasunak ehuneko 1,6a
ezgutuko du.
Sistema-egitura osatzen duten hiru tipologietatik bi dira, gainera,
azpimarratuenak (eta guk bereziki aztertuko ditugunak): Gizabanako
Espezialduak eta Erakunde politikoak. Bigarren hauen bidez alderdi politiko eta
sindikatuetako kideen agerpen bisuala neurtu daiteke. Gizabanako
Espezialduen artean nagusi dira komunikabideetako profesionalak eta,
portzentualki atzerago, kirolariak.
Erakunde politikoen agerpen ikonikoa %28,4koa da, beraz garrantzitsua.
Gizabanakoaren pertsonalizazio maila da ohizkoena eta Esateak (%56) ditu
zeregin arruntena, Egotea (%27,2) eta Egite aldakor (%13,6) eta erritualen
(%3,2) aurretik.
Ekintza hauek oso gutxitan izaten dira konfliktiboak (%3,2),
kontsentsualitate maila (%12,8) baxua izan arren, neutralitatearen kopurua
ikaragarri altua delako: %84. Edozelan ere, Sistema-egituraren barrukoen
artean konfliktibitate maila altuena dutena Erakunde politikoak dira.
Gizabanako Espezialduak, alegia, Sistema-egituraren barruko tipologia
sozio-politikorik, oparoena da. Hiru Aktanteen artetik bat (%33,6) kategoria
honetakoa da, garrantzi berezia duelarik kazetari eta kirolariek. Nortasun hau
dutenen pertsonalizazioan gizabanakotasuna (%58,7) nagusi izan arren jende
multzoek ere bere garrantzia dute.
Gizabanako Espezialduek burutzen dituzten Ekintzen artean altua da
Esateak (%44,6) eta, baita ere, Egite aldakorrak (%40,5), ezer egin gabe
Egotearen kopurua (%6,1) oso apala delarik. Aurrera ateratzen dituzten
Ekintzen artean konfliktibitate maila baxuenetarikoa ematen du: %1,4koa.
Kontsentsualitatea aldiz %27an kokatzen da.
Sistema-egiturakideei eginiko errepasuaz amaituz, Aktanteen artean
Instituzio politiko-administratiboen (%14,1) nortasuna dutenak aztertuko ditugu.
Ezagutuko dituzten pertsonalizazio desberdinen artean Gizabanakoa
(gizonezkoa bereziki) da nagusi (%77,4). Bost pertsonatik gorako multzoen
presentzia %14,5ekoa da, eta bikoteena %8,1ekoa.
____________________________________________________________
GIZARTE ETA NAZIO ERREPRESENTAZIOA TELEBISTA-ALBISTEGIETAN.
Euskal Herria Teleberri, Telenavarra eta Telenorte albistegietan. 408