Gizarte eta nazio errepresentazioa telebista-albistegietan - Euskara

Goiko grafikan ikus daitekeenez, Teleberrin Akontentzialitateak (%48,7)
indar portzentual handia du. Errepresentazio moeta hau da, zalantza barik,
indar espresibo gehien duena: tokian-tokiko, momentu berean edo
partehartzaileak direnak erakusteaz baliatzen delako. Definituriko bost azpitipologietatik
gertaerara gehien urreratzen dena dugu Akontentziala.
Akontentzialitateak duen gertutasunaz aparte, irudi Mediatzaileak dira
ETBn gehien erabiltzen direnak: %41,1az. Mediatzaileak dira, nolabait,
Akontentzialitatearen balio guztien kontrara ageri den errepresentazio moeta.
Irudi Mediatzaileen bidez kamarari begira, gertaera hitzez kontatuz, agertzen
diren pertsonak ditugu: kazetari profesionalak edota bozeramale lanean
dabiltzanak.
Irudi Akontentzial eta Mediatzaileez aparte, bestelako irudien erabilera
nahiko urria da Euskal Telebistan. Grafikan agertzen denez, Sinbolikoa
(%12,3), Metonimikoa (%10,2) eta Anbientala (%9,3) dira irudien Balio
errepresentazionala neurtzeko markatu ditugun gainontzeko tipologiak.
b)Irudien edukina
Irudien bidez kontatzen dena aztertuz bi elementu hartu ditugu kontuan:
tematikoki SEGIak zertaz diren eta, erakusten diren imajinen bidez, nolako
konnotazioak somatzen diren.
Tematikoki, SEGI gehienak definigaitzak dira, erakusten diren irudiek
hitzezko informazioaren laguntzarik gabe zertaz diren jakitea ezinezkoa delako.
Irudien bidez SEGIaren tema zein den ez jakiteak zeresan garrantzitsua du
irudi Mediatzaileak hain ugari agertzeak.
Edukin tematikoaren azterketa burutu ahal izateko, hutsunean dauden
guztiak kenduta gero, zortzi gai multzo definitu ditugu, hitzezko informazioaren
azterketan egin dugun bezalaxe.
Irudien bidez ezagutzera ematen diren Gaien artean, Politikak (%53,3)
berebiziko pisua du, ondoren datozelarik: Kirolak (%15,1), Ekonomia (%12,4),
Gizartea (%10,7) eta bestelako guztiak.
(86. grafikoa: ETBren SEGIen edukin tematikoa)
____________________________________________________________
GIZARTE ETA NAZIO ERREPRESENTAZIOA TELEBISTA-ALBISTEGIETAN.
Euskal Herria Teleberri, Telenavarra eta Telenorte albistegietan. 397