Gizarte eta nazio errepresentazioa telebista-albistegietan - Euskara

Gaien bidez ere zirriborratzen da zein den Euskal Telebistarentzako lur-eremu
erreferentziala.
Informazio Unitateetan Ekintzak duen marka geopolitikoa da, duda barik,
ondoen erakusten duena telebista-kate honen muga-jartze lana: bere burua
non kokatzen duen. Azpiatal honen izenburuan idatzi dugunez, bikoitza da
ETBk eskeintzen duen barruti sozio-politiko eta informatiboa: EAE eta EH-4.
Bi dira Ekintzen osagarri geopolitikoa eskeintzen duten elementuak: Non
gertatua den IUan azaltzen dena eta Noraino zabaltzen dituen bere eragin edo
ondorioak.
Elementu pare honekin Teleberrin zirriborratzen diren lur-eremuak bi dira
nagusiki: Euskal Autonomi Elkartea eta Hego Euskal Herria.
Oro har, Ekintzak non gertatu izan diren aztertuz, begien bistakoa da IUen
enplazamenduak askotan EAEko hiriburuak edota lurraldeak (NFK-ak ez du
esistitzen informatiboki) izaten direla: %36,7an. EAE mailan lekutu daitezkeen
Ekintzak ere askotxo dira (%21,7). Azkenik, Hego Euskal Herri osoan gertatu
izan diren Ekintzen aipamena, kasuen %26,5ekoa da. Beraz, hiru esparru
orokor ager daitezke: lurraldea maila arterainokoa, EAE eta EH-4. Hortik
gorako, enplazamendu notizigarriek ez dute ia lekurik aurkitzen ETBren
albistegietan. Aipagarria den kasu bakarra Estatu espainiarrarena da Ekintzen
%6a bertan lekutzen direlarik.
Ekintzen kokapenari dagokionez beraz, Teleberrin kontatzen diren
gehienak EAEko hiriburu eta lurraldeak, EAE bere osotasunean eta Euskal
Herri penintsularrekoak dira.
Desberdina da, oso, ahoz aipatuak izan diren Ekintza horien Eraginari
begiratuz zirriborratzen den mapa.
Oinarri metodologikoetan azaldu dugun bezala, Ekintzen Eraginaren
bidez, kontatzen den IUak norainoko influentzia eta notizigarritasuna duen
argitzen da. Guk, Eraginaren esparru geopolitiko hau lurraldetasun proiektatua
ere deitu izan dugu.
Euskal Telebistan pantailaratzen diren IUen Eragin esparruen artean
nagusi bi: EH-4 eta EAE. Hemen ere NFK-aren erreferentzialtasunak ez du
lekurik aurkituko.
Ekintzen kokaleku gisa EAEko hiriburu eta lurraldeak haintzakotzat
hartzeko modukoak diren bezala, ez da hala gertatzen Ekintzen Eragina
aztertzerakoan. Gutxi dira esparru geografiko estu horietan Eragina dituzten
Ekintzak eta gehienetan proiektatu egiten dira EH-4 eta EAE mailakoetara.
IUetan agertzen diren Ekintzetatik gehientsuenetan, EH-4ra bere Eragina
zabaltzen dutenak aurki daitezke, modu honetara Euskal Herri penintsular
osora influentzi-gune eta esparru geopolitiko eta sozialaren eraikuntza
zabalduz. Baina, aipatua bezala, Euskal Autonomi Elkartearen
lurraldetasunaren marka ere oso presente dago ETBren hainbat Ekintzen
Eraginean: %30,1ean.
EH-4tik gorako lur-eremuen proiekzio informatiborik ez da ia ageri ETBn.
Baina, datuak globalizatuz, ikus dezakegu Teleberriren edukinean dibujatzen
den lurraldetasuna %88,8 eta %91,4 bitartean koka daitekeela. Bi horiek dira
Ekintzetan markatzen diren Non eta Noraino marka erreferentzialak.
Ekintzen kokalekua eta Eragin informatiboaren azterketaz hasi eta, EAE
eta Hego Euskal Herriaren lurraldetasun proiektatuak nagusi direla esan dugu.
____________________________________________________________
GIZARTE ETA NAZIO ERREPRESENTAZIOA TELEBISTA-ALBISTEGIETAN.
Euskal Herria Teleberri, Telenavarra eta Telenorte albistegietan. 386