Unibertsitateko ikasleen ariketa fisiko ohiturak, egoera ... - Euskara

Hitzaurrea
Aspaldi dakigun kontua da ariketa fisikoak hainbat onura sortzen diela ume eta
gazteei. Besteak beste, hezkuntzan, sozializazioan, jokabide arriskutsuak
saihesten, norberenganako konfidantza hartzen eta osasun fisikoan zerikusi
handia du. Ezaugarri hauetako batzuk behin hartuz gero, bizitza osoan zehar
mantendu daitezke (esate baterako, kirola egitean ikasten den diziplina eta
araudien errespetua). Baina beste batzuetan aldiz, ariketa fisikoak sortzen duen
onura aldi bateko da eta onurak mantendu nahi badira ariketa fisikoa bizitza
osoan zehar egin behar da. Honen adibide argia da ariketa fisikoak osasunean
duen eragina.
Mendebaldeko gizarteetako osasun arazo ohikoenak, bizitza-ohiturekin erlazio
zuzena dute. Horien artean elikadura ohitura desegokien ondoriozko obesitatea
eta sedentarismoa, gaixotasun kronikoak pairatzeko arrisku faktore aldagarri
oso garrantzitsuak dira.
Bizitza-ohiturak eta hauen artean ariketa fisiko ohiturak txikitatik jasotzen ditugu
eta horregatik oso garrantzitsua da ohiturak barneratzen ditugun momentuan
ohitura osasuntsuak sustatzea. Unibertsitateko ikasleak, bere adina eta
egoeragatik ohiturak aldatzeko momentuan aurkitzen dira, beraz euren ariketa
fisiko ohiturak eta egoera fisikoa ondo ezagutzea eta egituratzea ezinbestekoa
da etorkizunean gazte hauek bizi ohitura eta hauen artean ariketa fisiko ohitura
osasuntsuak izan ditzaten.