VUELINS - Ad Undecimum

VUELINS
di Gigi Rupin, oben: Pier Luigi Sguassero
Milan, l'ultin mês di mai prin dal tiarz milèni.
Doprant cun plasê le marilenghe o, miôr, il nestri lengaz, jo, un dai tancj furlans talianizâz, par
contâ cualchi personâl upinion, zemôt clamâle: macacade, curiositât pûc curiose, monade, oben: une
"Gigirupinade" sul vuelin tirant in bal par prin un blicùt di storie. Storie d'Italie, e sichè ancje dal
friûl a partî dal 1922. Duncje, il 21 di otubar di chel an, dopo le marcje su Rome, Benito Mussolini
cul permes di un spaurît re al è deventât capo dal governo, par deventâ subit dopo paron dispotic da
nazion. Un pûc cu li' bunis basadis sui slogans: · credere-obbedire-combattere, dulà che, su chei, al
finive daspes i discors a dêt alzât; · "il Duce ha sempre ragione...", che lu faseve scrivi par dut; Ma
ancje cu le fuarze, se al ocoreve, fasint pestâ i contraris cul strangulin di len (si lei manganel) o
fasint bevi tazzonis di vuelin di riz reont, in pi di un câs, cun cualchi gote di vuelin di machinis par
cusî promitint ai talians, come che a 'nd an simpri fat ducj i pulitics (a partî dal grec Socrate al
roman Nerone e, su, su fin a chei di cumò "ch'e fevelin ben"), che, conche i varessin ducj dât rete e
ubidît si saressin cjatâz contenz, plui bondânze e un miôr avignî: e chist al à durât par un vincj agns.
Inta chel jenfri di timp, ma ancje dopo, e son stadis fatis une vôre di bunifichis soredut par liminâ
chês plais, valadì li' palûz, ch'e arin diluncvie le pinisule, Friûl cumprindût. Grandis palûz a
esistevin inta basse, siore di aghis e di òlis, par cuissà tros km² tra i flums Corno, Ausse e le Marine.
E partivin da Planais e a rivavin fin dongje Zirvignan. Bunifichis costadis un grunon di bêz, ma
ancje di tancj sacrifizis e di faturis patidis da bande dai adez ai lavôrs. Int sielte fra i plui bisugnôs,
tant di cjapâsi alc, ma al ere ancje cualchidun mandât... a rips tal cûl (come che si dîs), racomandât.
Come za dit, lâ a lavorâ in palût nol ere un scherz, parzeche e arin armâz, si po' disi, dome di badîli
e di cariole, e cun 'tai pîs zoculis âltis al dopli dal normâl; o cun stivai di gome fin tai zenoi,
cjalziduris che, par che i duredin di plui, li' onzevin cul saìn o cuntun vuelin apueste, in plui a une
bune dose di... vuelin di comedon! Al va ancje dit che le matine prime di partî, a pît o in biziclete,
scuasi ducj si fermavin in ostarie a bevi un cuintìn di sgnape: "par cjapâ coragjo -e disevin- par lâ a
frontâ chel infiar". Un ciadaldiaul plen di bestiutis e besteatis: lìparis, no dutis velenosis, sanguetis,
savis, capassis... di alti' arbatis, di canelis, stòpis e... po', sul puest un grun di lûr a provedevin a
metisi une mascare (tipo chês che si use conche si vâ dongje i bôz plens di âfs, ma cu le rêt pi fisse,
par parâsi dai moscjaz, grivòns, rains, sgripiòns, e da fastidiosis punturis di rinzinanz nûi di
muscjins; ma soredut di becadis di "anòfelis": li' zanzaris da malarie, malatie infetive che... e pos
"fâ voltâ i scarpez". Mior di stâ dibant, a ogni môt. Cun chei francuz ch'e tiravin il dì da cuindisine e
podevin permetisi di comprâsi pi daspès miez litro di vuelin di ulive o di semenzis variis. Il prin, pal
mignestron e cunzâ tirinis di adric, vuainis, cudumars...; il secont, plui a bonmarcjât, par frizi pes,
croz, sanganelis e dut ze che le cóghe e fâs cuei intal frissurìn. ...Intant si bunificave "robant tiare",
dì par dì, metro dopo metro a li' palûz butant in mâr li' melmôsis agatis malodorôsis di pissóc, di
musanis e di zeâtri, cumprindût sbiz di uzzelaz. Uzzei che si nudrivin ancje di viars che si movevin
intal malsàn pastiel, lâz dismitûz cussì, tanche li' razzis e li' zanzaris. E cumò, fintremai guaridis
chês plais inta braidis da tiari' gnovis al è un biel viodi cressi forment e blave, deventâ alz i
piarsolârs, i filars di vîz e di morârs di fuee; passâ dongje cjamps semenâz a tabac, cumieriis di
arbetis, strops di zivòlis e capûrs, e di une sghìrie di arbulùz di vuelin di riz, fasint disi a pi di un,
stuarzint le bocje: "ancje chêi sacraboz!". Intal ventesim secul e son stadis unevûre di grandissimis
invenzions e scuviârtis, ancje par scombati i tancj flagjei da l'umanitât. Il vazzìn par privignî le
poliomelite e le piniziline, par esempli, antìdots usâz da miliarz e miliarz di personis. Cussì i bogns
risultâz di chiscj miracolôs rimiedis insieme al pi bon aiar post-palûz le cualitât da vite a è
deventade zetant miôr. Duncje finalmentri a é stade batude ancje un'âtre magagne, amancul in
Italie: le malarie. L'infezion, ch'e fâs alzâ pericolosamentri le linie dal termometro, ch'e fâs
ingruessâ smilze e fiât, fasint vignî une panze cussì, come rimiedi e son i confez di chinin. E
continue, invezi, l'eterne lote, che a chi di nun e durarà simpri, par prucurâsi mangiativis

sostanziôsis e vitaminichis avonde par che no vignidi le pelae. Batae ancje chiste vinte cuintri une
(zemôt definîle?) malatiate che, simpri in Friûl, e parte a un lontan passât fin a nancje capî ze che ûl
disi chê peraule. Di dutâtri gjenar il malan pront in ogni moment a tormentâ li' panzis di dute le int
ch'e vîf su le tiare. Disturbo ch'al à dât "fîl di stuarzi" ancje ai miedis, si capis, e che par lunc timp
parares ch'al fos stât il re da terapîs di tancj (e disin cussì) tipos di mâl di panze. Zemût cui? Il
vuelin di riz, no!? Ma seben ch'al à un efiet sigurât, in pûs lu ciolin masse volentêr. Ni i grancj, ni i
pizzui, che però bon o no bon si scugne bevilu (ancje l'alcul doprât par disinfetâ li firidis al bruse,
ma bisugne metilu). E badifate ch'al è, par chel, fasint un esempli: intal an di grazie 193... su le fin
di avost sotsere Giovanin, sui dîs agns, saltant sù: "mame mi dôl le panze". Ài, pal frut a è stade
fate. Le mari preocupade pal so ninin che nol stave tant ben, molât di bot ze che stave fasint, lavadis
lis mans, passant dal pulinâr a è lade sburide in spiziarìe. Ma ze âtri varessie podût fâ? Duncje, pene
entrade, tirât fûr da sportule tre ôfs e une butiliùte, iu à poiâz sul banc ordenant: "Trecuarz di ônze
di vuelin di riz par plasê, sior dottôr, e mi scusi tant, ma saial ze che al po' capitâ vuê! Jissint zenze
un boro, come paiament i lâsi chiscj trê ôfs 'pene cjoz sù, frischissins di pudî beviju". "Va ben,
siore, va ben -tornant le butiliùte scuasi plene- i racomandi, eh?, dut intune vôte, po' vie a durmî...
zenze zene, si capìs!". "O crodarai ben, dotôr, dât che chel mostro di frut mai passût e golosàt al
varà mangjât zêspis ancjemò crudis, pomi' coladis, miluz codògns o ze sao jo.. e cumò che li'
purghi! Grazie, dotôr, bune gnot". Tanche le aghe zenze colôr, ma penz, dal odôr e dal savôr dut fûr
che bon... "Uh, ze rubàte!"... il vuelin di riz, tra ducj i midisinâi al è un dai plui triscj di cjoli. Par
chist a cui ch'al scugnive bevilu i metevin in bocje une ponte di sidòn di zucar e une sclìpigne di
marsale cu le intenzion di invoiâlu a gloti plui a le svêlte. Ziart, e son bunis intenzions, dome ch'al è
piês parvie che il gust dal zupâ al dure un moment, e il pastroz vuelin-zucar-marsale, par nuie
sbrissiòt, cun chel su e jù pal sgraseâl, fasint rutâ, al slungjave le pinitînze. Brutis esperiênzis,
pardabon. Alore i fruz, ch'e son plui furbos di chel ch'e crodin i grancj, al massimo e restavin freâz
un pâr di vôtis. Une tiarze miôr schivâle: "pitost chê porcarie lì al è zent vôtis miôr soportâ un pu' di
mâl di panze par cualchi urùte, tant..." come scuviart ancje da Bipùt. Al va vie dibessôl e, intal
doman, dopo jessi stât a sbrocâsi intal comut, dopomisdì al à za programât di lâ a tirâ jù un pu' di
zarviesis, nol impuarte se no dal dut madùris, ma nistes tant bunis! "Se po' mi vignarà un dulurùt
achì, chel vueleàt no lu bevarai". Ma conche il funzionâl purgant lu ordenave il miedi, nissun le
passave lisse. Le "vitime" e scugnive bevilu ancje cu le fuârze, s'al fos ucurût. Al podeve ben
"rontâ" chel frut: "No no, no mi plâs... daitmi le magnesie, pitost!" e zirî di scampâ. A le fin, tignût
dûr pa mans e pîs i viarzevin le bocje... e jù! Le senùte e podares semeâ inventade: nuie di plui vêr,
invezzi! Chist al capitave pi daspes di ze che si crôt. Ma al è zuzzidût ancje che par une vôte, che si
savedi, le ezezion a 'nd à smintût le regule: eco culì. Intal nestri Sanzòrz, e pa prezision intune
fraziunùte, intun curtilòn cundune vore di fameis e une sghìrie di fruz, e are a stâ une zovinute di
non U... che, sintît sintît, il vuelin di riz i plaseve di maz (Ze le mêl! cuai gjelatos! dulà
malvasìe!...), tant che, cuant che il purgant lu veve finît, fat fûr planc a planc par gjoldisal miôr,
displasude, par cjapâ sù li' gòtis restadis inta tazze, e zirave un dêt e s'al meteve in bocje zupantlu e
netantsi i lavris: "mm, ze bon... zêsal di miôr, chist al è il vêr "rosòlio", chist sì ch'al è tant bon".
Altriché, U... e are doventade tant famôse che mai, tant che une vore e levin a viodi il sgrisulôs
spetacul titulât: "le frute ch'e bêf trecuarz di ônze di... rosolio. Prosit, biele ninine. Secont li' ultimis
stimis su le tiare e son scuasi 20 mîl li' plantis dulà che si gjavin prodoz curatîfs o di spiziarìe. Tra i
prins al è chel strucât di grans di un morâr di divignînze asiatiche, tanti' vôtis nomenât, penz e
trasparent: il vuelin di riz. Vuelin ch'al mertares une vore di ricognossînze nol fos âtri pai potros
mâi di panze che al fâs lâ vie! Anin mo', zemût si fasie alore a disi cussì mâl di lui. Ma, tant al è...
nancje che si fos tratât di un "passeperaule". Le int a 'nd à scomenzât a lâ simpri mancul daspès in
spiziarìe cuntune butiliùte... dopo vî fat tant dal ben il vuelin di riz al è stât snobât, ancje se al ven
ancjemò simpri usât in tanti' ocasions e manieris: par fâ clisteris, par esempli e... inta casêrmis. Sì,
propi in casêrme al ere ritignût "une panacee" (par dîlu a talian vie) e lu davin di bevi ai soldâz cul
mâl di panze. Ma ancje a chel che si stuarzeve pal dolôr a une spale, o a cui ch'al zuetave par vie di
une stuarte di cuel di pît! Eco che alore une part di chêi grans e vegnin sfrutâz par produzi brilantine

(che simpri di vuelin si trate), vasiline, unzìnz... Ma alore, zemût rimedeâ ae sô triste fame? Nuie di
miôr che di inventâ un lassatîf no plui zenze colôr, e mancul penz: le virmuline, ch'al parares zetant
mancul funzionant ma plui bivibil. Ma distes nol à tacât masse. Vuelins, vuelins, vuelins... trops
sarano li' cualitâz di vuelin? Unevore, e di trê origjinis: · nemale, · vegjetale, · minerâl. E trops sono
i môz di usâlu? Ma, par no lâ tant lontan eco une tabelute di altris vuelins a scomenzâ di chel di
bacalà. Che par âtri al parares ch'al vedi fat il so timp, ancje se no ducj lu san che dutis li' matinis e
davin une misurùte ai fruz ch'e vevin bisugne di jessi rinfuarzâz. Po' al è il mancul nominât vuelin
di lin, consumât pi che âtri dai pitôrs par fâ sù i colôrs. Cugnussutissin al è, invezi, il vuelin di
vasiline, ch'al va ben un pu' par dut. Ah!... nol va mai dismenteât il vuelin speciâl ch'al servìs par
onzi l'ingranagjo ch'al môf cui che "al conte" par ch'al sburtedi le nestre pratiche, ferme cuissà
indulà... Dulcis in fundo di chiste cjacaradùte sul vuelin, o lassìn l'ultin slàmbri di discors par chel
di mandulis. Un vuelin tant bonodorôs che il pastizzêr al ten simpri a partade di man un vasùt, par
sparnizâ gotis su li' tôrtis, fuiazzis, gjelatos, par zontâi savôr, rindint lì ator l'aiar "ch'al è un gust che
mai nusâlu!". E cun chist, a cui che i dolz ju gjolt, i lassìn le bocje bune. Bon pro. Chisti' pagjinutis,
che no fasin ni ridi e ni vaî, e par chel e san di nuie, e son stadis mitudis dôngje juste dome par
menzionâ pizzui faz di un pizzul mont passât, inche vôte scuasi dal dut rurâl e di sotâns (gjave
cualchi scuelât, sior e siurùt). E son cjossis lamiis, ma verissimis! Garantidis dal sotscrit, testemoni
in plui di un câs. Ma ancje... e ze pratêsis!!... par fâ dismovi le memôrie a cualchi anzian!