Musiche furlane - La Patrie dal Friûl

CHRISTIAN ROMANINI
Il numar
O vin decidût di sierâ “in musiche” chest
2007 cuntune panoramiche su la vivarose
realtât musicâl dal Friûl. Par chest o
domandìn scuse se o vin lassât fûr alc, ma
la sfide e jere pardabon grande: di agns i
nestris musiciscj a produsin tante e buine
musiche e al è stât une vore dificil meti
adun un struc. Dal sigûr no vin la pretese
di vê realizât une antologjie complete, ma
se no altri di fâ cognossi un mont, chel de
musiche, che forsit i stes furlans no san
fint insom di trop siôr che al è.
Po dopo o vin lis nestris rubrichis fissis
e lis gnovis de atualitât cu la analisi de
situazion de politiche in Provincie di Udin
e la aprovazion de gnove leç regjonâl di
tutele de lenghe furlane.
Il gjornâl si siere cu la riedizion a pontadis
de “Cuintristorie dal Friûl” di pre Bepo
Marchet e pre Checo Placerean, cu lis
ilustrazions di Gianni Di Lena: un libri
che al rapresente un manifest politic di
denuncie cuintri de storie dai “parons”
e mostrâ ce che al è sucedût chenti ai
furlans cuntun voli difarent dal solit: la
storie viodude cui voi e la inteligjence di
doi grancj autonomiscj.
Il senatôr Tiziano Tessitori:
cence furlaniscj,
no sarès nancje stade
la regjon Friûl - Vignesie Julie
DREE VENIER
L’editoriâl
Culture e je inovazion
I regâi de Patrie
La prime
Juste ae fin di Novembar, vie che o jerin par mandâ in stampe il gjornâl, e je rivade la buine
gnove de aprovazion de leç pal furlan, plui voltis rimandade. Par chest motîf no rivarìn a
fâ par cumò l’aprofondiment che al merte il teme, ma o cjatarês a pagjine 15 il comunicât dal
Comitât 482 che al fâs un prin struc di dut. L’aprofondiment lu rimandìn al numar unic dal
gjornâl di Glesie Furlane, che i nestris abonâts a ricevaran in regâl (viôt il box in bande sot).
Si respire aiar di sodisfazion jenfri i furlans: ae fin al pâr che e sedi stade madressude une
leç che e fâs fâ cualchi pas indevant pe promozion de marilenghe. Par chest bisugne marcâ
l’impegn di bande dal President de Regjon Illy, che al à spindût dal so par rivâ insom ae leç, e
dal assessôr Antonaz.
La pôre e jere che la tutele de marilenghe e les a cessecûl, massime par cemût che e jere lade
indevant la discussion, tai media e jenfri i nestris sorestans. Un dibatit, come che o vin bielzà
marcât, di nivel une vore bas. Nivel bas confermât ancje de discussion te aule dal Consei
regjonâl, che su cierts “tocs di autôr” al è miôr tasê, par no fâsi vignî imbast.
Ma no si à di tasê suntun fat: chestis ignorance e sieradure arudis di bande di un grant trop
di conseîrs a àn fiscât ben e no mâl la prime version dal dissen di leç, che e jere une vore plui
avanzade. Une leç che e deve mût ancjemò di plui di sfrutâ la grande oportunitât che o vin in
regjon: praticâ in concret dôs (e plui) lenghis diretementri sul teritori.
Dâ plene dignitât al furlan (e a lis altris lenghis nostranis) a vûl dî fâ rindi chest bilinguisim:
par esempli, fâ lavorâ i fruts su lis problematichis dal passaç di une lenghe a chê altre al favorìs
l’aprendiment di une tierce dopo.
No nome i nestris conseîrs no si rindin cont di chest tesaur che o vin, ma nancje no savevin
de esistence dal “insegnament veicolâr” (insegnâ une materie te lenghe di imparâ, cussì di
rindile pratiche), di leterature furlane o adiriture di storie furlane, che se o vin la regjon speciâl
al è soredut in gracie di furlaniscj tant che, par esempli, Tiziano Tessitori. Cussì come che si à
scugnût organizâ un viaç in Catalogne – che al pâr che al sedi stât determinant – par fâju rindi
cont che al esist un mût seri di tutelâ la lenghe di un teritori, e che al rint.
Ve ca une prove pratiche di cemût che la culture e je un element concret di inovazion e duncje
di progrès: se i nestris sorestans a vessin vût plui culture, a vessin savût di plui dal mont, a
varessin fate une leç che nus proietave ancjemò di plui viers il futûr, viers la Europe e viers il
mont, dant mût ae nestre mularie di cjapâ sù une mentalitât plurilinguistiche, buine par
un mont simpri plui globalizât. Invezit cumò o vin di contentâsi.
Si à di sperâ di miorâ te leç che magari e vignarà, e intant a son pierdûts chei cinc
o dîs agns che, come che a van sveltis lis robis cumò, a son une Ete! Ritarts che a
costaran: altri che i coscj de culture!
E nus vegnin i sgrisui a pensâ ae future riforme de istruzion in regjon, cumò
ferme: un cantin cussì delicât al mertarès dibatits e personis plui profondis.
Personis profondis e di grande culture come Giorgio Ferigo, che il mês passât nus
à lassâts, bot e sclop, cause di une malatie brute tant che svelte. Si siere cussì un an
sfortunât pe culture furlane, fis di pierditis dolorosis, come chê di pre Toni. Il nestri
impegn al à di jessi di no dismenteâlis, di ricuardâ, studiâ, atualizâ il lôr pinsîr.
Visâsi di chest passât, par nô restâ indaûr.
Intant, cuasi no mi visavi che o sin dongje des fiestis: bon Nadâl e bon principi di bande di
dute la redazion.
Cun chest numar i nestri abonâts a àn ricevût un piçul regâl: un segnelibri. Un piçul imprest par tignî il segn tai libris
ma ancje te storie: par nô dismenteâ lis grandis figuris dal autonomisim furlan. Chest prin al è dedicât ae figure dal
nestri fondatôr: Felix Marchi.
Chei letôrs che a àn sielzût di abonâsi, in Zenâr a ricevaran ancje il numar anuâl dal sfuei di Glesie Furlane, «Patrie
dal Friûl», cussì come l’an passât. Di fat noaltris si fermìn, stant che o vignìn fûr par undis numars intun an, ma no
volìn lassâ un mês i furlans cence une bocjade di marilenghe: di cheste volontât al ven fûr l’acuardi cun Glesie Furlane.
O sperìn che chescj piçui regâi us plasin e us tornìn a fâ i auguris par buinis fiestis.
la patrie dal friûl _ DICEMBAR 2007 _ 3