Musiche furlane - La Patrie dal Friûl

Musiche furlane:
indagjin su Internet
Il media web al pues dâ gnovis pussibilitâts
ae musiche furlane
MARA PICCOLI
Ducj chei che a amin la musiche
furlane si rindin cont che dal spes no
bastin lis manifestazions esistentis (prime
fra dutis il Premi Friûl), la ativitât des
radio locâls (la part dal leon e je cjapade
di Radio Onde Furlane) e i concierts…
Nus ven in socors alore il mont di Internet
e se si cîr su cualsisedi motôr di ricercje “ a
vegnin fûr mil oportunitâts par esplorâ lis
realtâts musicâls furlanis, ancje di lontan.
Se si à intenzion di vê une idee gjenerâl
su come che e je gambiade la musiche
furlane, dai cjants di glesie e des vilotis a
lis ultimis produzions, si varès di lei www.minud.com/Art/Musiche.
Une altre font impuartante di informazions e je dade dai blogs furlans (par cjatâju
baste digjitâ «blog furlan» su cualsisedi motôr di ricercje) e dai sîts furlans che a àn
dedicât ae musiche un spazi impuartant a lis notiziis musicâls. Chest al rapresente un
impuartant sisteme di distribuzion des informazions che e fâs di jutori a une rêt di
distribuzion scjarse e al pôc
interès manifestât in diviersis
ocasions pes iniziativis
musicâls de stampe locâl e
des istituzions, come che a
cognossin i adets ai lavôrs e
come che si pues aprofondâ
te interessante indagjin
dal 2004, presentade de
Universitât dal Friûl e dal
Centri Interdipartimentâl pe Ricercje su la Culture e la Lenghe dal Friûl che e mostre
une fotografie des opinions dal public e dai musiciscj coinvolts (www.uniud.it/cirf).
Ma simpri di plui si sfrutin lis oportunitâts dal WEB par difondi la musiche in lenghe
furlane: cuasi ducj gli artiscj a àn viert un sît dulà che si pues scoltâ e discjariâ un toc de
lôr produzion, a son presintis racueltis di CD che si puedin ordenâ, si pues aprofondî
tematichis musicâls e jessi in particolâr informâts di iniziativis che a rivuardin il
mont musicâl furlan, come la scree di une sale di incision a Glemone, conferenzis
su cemût miorâ la distribuzion, iniziativis particolârs (altri lucs di viodi: www.
musichefurlanefuarte.com, www.musicologi.com). In some, al samee che il mont dal
WEB al sedi daûr a mostrâ
dutis lis potenzialitâts
e i operadôrs dal setôr
musicâl a sedin daûr a
valutâ chestis ocasions
par sfrutâlis in maniere
apropriade. Sperìn che
lis buinis ideis no ledin
pierdudis…
AI 32 DI MAI
Musiche Speciâl
BETE DI SPERE
O ce biei i cjargnei a Udin
Chê menade dal ûf e da la gjaline e je nome un mût
di dî. Par cui che al cres in Friûl, il veri dileme al
è un altri: ise nassude prime “O ce biel cjiscjel a
Udin” o “Vegnin jù i cjargnei de Cjargne”?
O vês ducj in iniment chês dôs cjançons, no? Ben:
la musiche e je chê, propite compagne, tant che o ai
simpri crodût che e fos une cjançon sole.
Mi sameave che dut al ves un sens: i cjargnei a
vegnin jù parcè che ur plâs il cjistiel e ancje parcè
che a Udin e je une biele zoventût. Al è logjic: se
zoventût come a Udin no si cjate in nissun lûc, no si
cjatarà nancje in Cjargne, no?
La uniche robe che no rivavi mai a capî ben e jere
cui che al fos chel che al leve a bussâ lis fantatis, se
un udinês o un cjargnel. Nome che dopo mi pierdevi
vie daûr dal paradòs da la bussade e da la pinitince
e mi dismenteavi di chês altris cuestions: cence
stâ a cjalâ lis ripetizions, lis strofis a contin di chel
fantat chi, che al busse une femine brute, cussì il
predi i da une penitince: chê di tornâle a bussâ. E
li di piçule mi domandavi simpri cemût che e sarès
podude lâ a finî la storie, parcè che se la pinitince
e jere compagne dal pecjât, chel li al varès vût di
confessâsi ancjemò, e il predi i varès dit di fâ la
stesse robe, e li al sarès scomenciât dut dal biel
principi e e podeve ancje no finîle mai.
E cussì di chê strade no mi preocupavi plui di savê
se chel puar zovin che al veve di passâ dut il rest da
la sô vite intor di un orcolat di femine al fos vignût a
Udin par viodi il cjstiel o no. Ancje parcè che jo chês
dôs cjançons lis ai simpri sintudis cjantâ une daûr
di chê altre, e mai di bessolis: une sorte di medley
obleât, come che al sucêt cun “Meu amigo Charlie”
e “aeiouy” a lis fiestis dal ultin dal an.
Ma doi o trê dîs indaûr o soi lade a viodi su Internet
par cirî di visâmi ben lis peraulis, e o ai discuverzût
che secont di Vichipedie, la enciclopedie online
par furlan, “O ce biel cjiscjel a Udin” o “Vegnin jù i
cjargnei de Cjargne” a son dôs cjançons difarentis.
Cemût mai àno la stesse musiche, alore? Cui isal
stât a copiâ? Cuale ise vignude prime? E l’autôr di
chê dai cjargnei cemût mai aial scrit une cjançon
fate di nome dôs strofis? Ma soredut: trops sono
i furlans che a san l’ordin esat da lis strofis e si
ricuardin cuale da lis dôs cjançons e fevele di chel
puar fantat da lis bussadis? Dutis lis rispuestis a
laran pierdudis tal timp: “O ce biel cjiscjel a Udin” e
“Vegnin jù i cjargnei de Cjargne” no si cjatin in mp3,
cussì i zovins di vuê, di furlan, al massim a tegnin
tal iPod la Crazy Ethilic Band e Toni Merlot.
Secont di une vôs che o ai sintût, il sôl a savê la
veretât su cheste robe al jere un om di Buri, ma
dopo di une brute storie in famee, cumò purtrop al
pâr che al sedi lât in Canadà.
la patrie dal friûl _ DICEMBAR 2007 _ 15