Antologia Parte I - akinu.it

Cantzonis de
donnya tempus
Antologia delle opere
di Francesco Congia
A cura del figlio dell’autore, Roberto
addì 4 marzo 2011
Annu nou 1993
Tui, annu nou, t’incaras promitendu
Onori a sa justitzia e a s’onestadi
E tanti genti a tui fud’aspetendu
Cun passientzia e credibilidadi.
Ma deu, ki nò ti biu lestru arrangendu
Su lutu ki lassau atrus nos’adi
Nò nau ki puru tui portisti ingannu
Ma mi riservu de ti nai BON’ANNU.
Amori Addiu
Poit’est ki torras tui cirkendu amori
Apusti ki s’amori as seppelìu?
Ddu scis ka nò profumat prùs su frori
Ki tui e totu, ingrata as avitziu!
Jai ki m’as bofiu mortu de dolori
Lassami andai po su distinu miu.
Dd’as bofiu tui, e deu, sentz’e rancori
Morru a s’amori tu cantendu: “Addiu”
Cantendu” addiu”… cantendu “addiu”.
A boxi manna (çascu)
Sa femia ki stimà sind’esti andàda
E m’at lassau sentz’e mi narri poìta.
Ca fut su veru amori m’amostàda
e ancora deu dda creu, no naru atr’ita.
Sa zingara m’at nau: ad a torrài
Sa ki tind’at pigau sa cuntentesa
E sa felitzidadi ad a portai
E t’ad a preni s’omu de bellesa.
Po cussu, deu, a boxi manna, cantu
Abiddiendu s’airi de cramòri
Ki ascurtidi issa is nodas mias de prantu
E i dis ki passu prenas de dolori.
Fortzis issa nò scit ca deu dd’aspetu
Ca dda perdonu ki adi sballiau.
Nerimì, ki dda fatu, ca dd’atzetu
Po tenni prùs s’amori miu provau.
A ora a ora ascurtu e seu timendu
Ki trighit su menjanu a scrariai
Ca in longa e trista noti seu bramendu
Sa luxi cun su sobi a mi torrai.
Po cussu, deu, a boxi manna, cantu
Abiddiendu s’airi de cramori
Ki ascurtidi issa is nodas mias de prantu
E i dis ki passu prenas de dolori.

Amigu de tassa (çascu)
A mei, mi praxit su binu nieddu
Pighendu sa tassa nci tengu sa manu.
Çucau una noti mi seu un pogheddu!
Mi fumiàt sa conca ke unu vulcanu.
Currendu mi bia cun su letixeddu
Rapidu ke trenu de Roma a Milanu.
Donnya amigu miu bufada un tzikeddu
Gé ci at testimongius, nò ddu nau invanu.
Su grandu butàiu, fulanu Diana
Cussu puru, a bortas, provada a bufai.
Sa tass’e su binu dda pigat cun gana
Bufada e acustumada a s’imbriagai.
Nò passat deretu de cost’e funtana
Prangit ca nò est binu po sinci ghetai.
A manu in su muru, caminendu est parcu
Donnya muredda ddi lassat su marcu.
Abadori fetu cun Sisi piddoni
(atra bella coppia beni acumpangiàda)
Narada unu a s’atru: dona atentzioni
La ca nci picigasa a sa cantonàda!
Sisi po arrùga, pigat su spuntoni
Abadoi su muru pigat po pesàda.
Tropu funti arrùtus e si funti ingotus
Curpa de is crapitas a carronis trotus.
Antonicu liu, cussu puru a bortas
Unu pagui è binu provada a bufai.
Bufat ki nò bidi, mancu ki dd’amostas
A manu pigàda, su logu è passai.
Si kesçat ca funti tropu is cosas trotas
Ca nò serbit s’acua po si sçacuai.
Nò usat orbaci, nò cunsumat linu
Ca fintzas si bistit cun pannus de linu.
Ndi bufada Anselmu cant’e unu cuponi
Fueddada assumbressi, paridi africanu.
Arakiu, cun Licu, bufanta a trumboni
Bessinti imbriagus de bonu menjanu.
Bufat Luisicu, veru campioni
Ca est sa mellus pompa de su Campidanu.
Egidiu puru, maistu est bufendu
Nisçuna cannàda dd’acudit cabendu.
A Pepatzu frori, nò gheteis nexi
De is bufadoris, grandu capu scuadra.
Arracundu Concu, bufat fintzas fexi
Gustavu si donat de binu una cadra.
Furriada imbriagu Ludipinu lexi
Fueddendu mabi: “ miseria ladra!”
Akeddu, de binu, ndi indurti po dexi
Bufat po si sçundi e bufat po si strexi.
Ci funti is amantis de sa vernacina
Crocanta povinzas cun sa damigiana.
Flavieddu, bufada… atru ke cantina!
Ma torrada a passu cun Lecu Natana.
In lingua greca, tedesca e latina
Discutinti a longu de cosa nostrana.
Osatrus, a binja, baxi a binnenài
Ca nosu bufendu nò preneus mai!

Antzianus Seddoresus
(Memoria)
S’arregodais is oras de allirghìa
Afestadas cun jogus e brullitas
Ki cudda seddoresa balentìa
De conca sua bogàt ke pani a fìtas?
E is arràllas, in prosa e poesia
Ki in su pibiri e sali fiànta scritas?
S’arregodais de cuddas serenadas
Ki allùi fadianta is lantiasa studadasa?
Insaras si biviada in poburesa
Ca a spendi po cratzai fiat traballosu.
Però, cun meda gana e pagu spesa
Si conkistà seguru un mund’e gosu.
E su doveri nò arreciada ofesa
Puru incurtzendu s’ora a su riposu
Po studiai e fai joiosamenti
Is cosas bella ki nascianta in menti.
Imòi parit sa genti scuncordàda
Puru cun su benesseri in favori.
Nò fait prus cudda vida nomenada
Arrica de rispetu e de amori.
Torrit virtudi ki sind’esti andàda
De bidda nsota, e torrit su splendori
De sa cuncordia sentz’e gelosia
Po bivi mellus tempus de allirghìa.
Movei su passu, antzianus, sempri in pei!
Ponei sa joventudi in movimentu
Nò lasseus narri a kini est prontu a crei
Ca arregallaus is fueddus a su bentu.
Narai a totus su ki naru a mei
Ca impari nd’eus a tenni jovamentu
Scriendu, a litras mannas, in sa storia
De sa cuncordia nosta fama e groria.

Babbai
Ancòra ki deu fillu nò ti fessi
Nudda privàda a mei de t’amirai
Ca injustu iapessi ki nò ti stimessi
Cumenti dinnyu ses de ti stimai.
Ma mi ses babbu puru e ki arribessi
De tui donnya virtudi a mesurai
Citìa, tanti esti stentiu a meravilia
Deus, angelu a ti fai de sa familia.
Oh caru babbu, fatu de amori
Guida segura de sa vida mia!
In su ki sesi, lassa ki t’adori
Atra no invocu mellus cumpanja!
In donnya cosa bella deu ti biu
Acant’e mama in fortza e pensamentu
In sa fatiga e in sa sperantza unìu
Sempri serenu a su doveri atentu.
E batendu t’ascurtu in coru miu
Candu ses tristu e candu ses cuntentu.
In donnya circustantza dinnitosu
Severu, umili, onestu e generosu.
Oh caru babbu, fatu de amori
Guida segura de sa vida mia!
In su ki sesi, lassa ki t’adori
Atra nò invocu mellus cumpanja.

Baulu a sa sperantza
A luxi de sa storia prus antiga
E ancora in tempus nostu est ammostau
Ca sa justitzia, sempri posta in briga
A s’airi is ajutorius at ghetau.
Funti is guvernus grais de origa
A su tzerriu de su diseredau
E ddu lassanta in bratzu a sa sperantza
Morrendu de su fami in s’abundantza.
Donnya partidu postu a guvernai
De destra siada o manca positzioni
Adi a coru cumenti imbrambulai
Su populu portau a ballantzoni.
Aberrit centu bias po arribai
A su paris de donnya corruzioni
E po si tenni su poderi a laba
Narat ca oit sa justitzia, ma est faba.
Cantu fillus,arroscius de aspetai
Si fuinti, indusius a sa violentzia.
Ma cussus funti fillus de cuài
Jovunus perdius de sa cuscientzia.
Cun sa justitzia ki nò arriba mai
A kini nò nci fuit sa passientzia?
Aìci est sa genti spinta a su progressu
Pretzìda in su traballu e in s’interessu.

Bidda mia
Gei ses bella, bidda mia
De tant’oru seminàda!
Po sa paxi e s’armonia
Ses regina incoronada.
Deus ti donidi allirghia
E fortuna in donnya annàda
De su mundu invidiada
Gei ses bella bidda mia.
Modu garbu e cortesia
Totu sesi unu tesoru.
Aìci fata, deu t’adoru
Gei ses bella bidda mia
Candu sonu e candu cantu
Sempri a tui deu seu pensendu.
Ki t’ascurtu, seu gosendu
Ki ti castiu, deu m’incantu.
Jai de nonnu dd’intendìa
Candu femin a miràda
Ki fu filla tua cantàda:
gei ses bella bidda mia!
Modu garbu e cortesia
Totu sesi unu tesoru.
Aìci fata, deu t’adoru
Gei ses bella bidda mia!

Brullita
Po contzillu de sa musa
E ca praxit puru a mei
A ki ascurta pedu scusa
E saludu cun prexei.
Canc’un vitziu, certamente
Teneus totus, middu creu
Ma is ki criticanta genti
Atrus funti e deu nò seu.
Deu ddu pigu po cantzoni
Su ki intendu e su ki biu
E m’agatu in s’arrexioni
Ki nò abarru mai cittìu.
Fessit vitziu o makiori
O atru fessit, nò sciu ita
De un antzianu muradori
Naru e cantu una brullita.
Sendu in ponti, su maistu
Su palatziu intonakendu
Un manòba, meda abìstu
Dd’acudiat carcia aporrendu.
Però, sempri ki passàda
In s’arruga una jovunedda
Su maistu nò mancàda
De tzerriai: ghetandedda!!!
Nò tenìat, su tzeràcu
Un minutu de assentu
Curri curri ke unu macu
Su maistu a fai cuntentu.
Ma, de is tantis ki passànta
Ca podianta lompi a milla
Su maistu, de acanta
Nò iat biu passai sa filla.
Su tzeracu puru avesu
A dd’aporri cosa grai
Nò at cretiu, cussu pesu
Ca fut mannu, a nci ghetai
Su sçumbullu de gaveta?
Mancu cussu ad ascurtau!
Firmu fudi, a buca abeta
A ddu bii parìat prantàu.
Fu cumprìda sa piçoca
Antzis, bona dd’apu a nai
Ma issu, duru ke s’arroca
Mancu at potziu fueddai.
Su maistu, ca buida
Sa gaveta dd’at lassau
A fai contus agòa cida
Su manoba ad afrusàu:
Teniat pronta, su tzeracu
Sa risposta de ddi jai
Ma de befas unu sacu
Ndidd’at bofiu risparmiai.
Dd’at nau feti ca obìat morri
Ma cun s’anima trankilla
Po nò dd’essi potziu aporri
Né atra femia né sa filla.
Su maistu, prim’ e arrui
Custus fueddfus ddat nau:
maladitu siasta tui
ki asi a filla mia açocau.
Su manoba, solu poìta
Jai fut ora de scapai
De su maistu, sa brullita
Aici at bofiu resumai:
Cun su tzerriu de fusteti
Deu de femia ndi circu una
Ca mi bastada una feti
Mancai benjat de sa luna.

Cirkendu s’amori
A luna e a lugori
S’ntendid anninendu
Su grillu cantadori
Ca sa noti est dromendu.
A luna e a lugori
Atru nò seu bramendu
Nara aundi sesi amori
Ca seu a tui cirkendu.
S’intendidi anninendu.
Donami modu o frori
De ti biri oberendu
Beni carinnyadori.
Su grillu cantadori.
Noti e dì caminendu
Seu cun sinceru ardori
Solu po tui bivendu.
Ca sa noti est dromendu.
Bessi de su candori
A kini esti aspetendu
Po ti stimai, amori.

De unu sonnu
Teniat sa noti in su silentziu arcanu
Citìu su mundu e deu puru dormia
Antzis fui mortu poìta unu sonnu stranu
Mind’iat pigau e in celu jai bivìa.
S’oru mirà de s’eternu menjanu
Liberu ormai de sa malesa mia
Bivendu in forma mistica e sincera
Felicementi una letitzia vera.
Ma unu soavi tocu de campana
Solitu a s’annuntziai s’Ave Maria
Mi scidada e riportada a s’umana
Turmentada e mortali cumpangìa.
Ca deu professu fidi cristiana
Aici lassau mi seui portai a ghia
E cumenti a sa cresia seu intrau
S’ogu a unu caru ogetu apu ghetau.
M’acostu a contemplai cussa sincera
Meravigliosa, angelica figura
bella de totu e de manera
né cosa pariat fata de natura.
Ecu ca subitu intru in sa preghiera
E a Deus domandu cussa creatura.
S’esti intendiu s’arresu andendu a susu
De sa steddada sfera ancora prusu.
Mi rispundit su Sommu: ebbeni, fatzu
Su ki disijas tui cumandu miu
Atentu stài però, ca postu in bratzu
Ti pigas unu pesu e nò pitiu!
Deu ti bivu, ti nutru, bistu e cratzu
Ma volontadi bona in tui ki biu!
Deus dd’at cuntzediu e deu felitzi e gratu
Bivendu cun d’un angelu m’agatu.

De kini est sa nexi?
(Sardinnya 1974)
Su mari ki ti portada imprassàda
T’adi scobertu po ti bi cuntenta
Ma trista fusti e nò ses cambiàda
De candu asut’e s’acua fusti tenta.
Est’ora de scaresci su dolori
De cuddu tempus duru ki as passau
Po nexi de unu e prus de un invasori
Ki t’adi indinnyamenti apatigau.
Ti castiu e mi domandu, poìta mai
Nò sesi stada allirga in tanti vida?
Nò acudis una lagrima a sçugai
Ki nò portisti s’atra jai bessìda.
De pillonis ki bobanta a su scuru
Po fai su mali, nd’adi in donnya logu!
Sequestrant’omis po dinài, opuru
Distruinti is campannias cun su fogu.
Ma de is operas bellas teni annòtu
Mancai pagadas cun penosa spesa.
Nò podis nai ca bandat mali totu
Ki canc’ua cosa est fata cun malesa.
Mira sa arrùga, bella cun s’asfaltu!
S’acua arregorta in su bacinu, aùi
Fata energia, ti ponidi in risaltu
E fait su scuru de sa noti arrùi.
Mira sa spiaggia cun sa villa acanta
Abitada de brunda e varia genti!
Sinnyioris, in su mari ki sonnyanta
Serràu cun fiu de oru egregiamenti.
Prus nò bis su messaiu a fraci in manu
O cun su boi fai srucus de sudòri!
Oi est mietitrebbia a su menjanu
Messendu o arendu un depidu a tratori.
Averti: bis ca sa miseria est binta
De candu ses autonoma regioni?
Nò tenis prus sa domixedda strinta
Ma bivisi in palatziu cun balconi.
Ita est ki tenis ca nò bois arrìri
Anant’e tanti makinas currendu?
Funti motoris cussus, dd’ois sciri?
In bia de su benesseri girendu.
E sa quarta provincia ki as otentu
Nò est cosa bella po ti fai sennora?
E is fabricas, mancai nò sianta centu
Nò ti donanta pani in donnya ora?
Poit’est ki ammosta sempri aspetu tristu
E cantas prantu puru essendu in festa?
Ita ti mancat, musica o maistu?
Su via, arrespundi a sa domanda onesta.
De candu de su sobi seu basàda
Nò prangiu penas cant’apu sunfriu.
Est beru ca seu stetia sakegiàda
De donnya prepotenti ki est benìu.
Ma passu ananti a m’hia amostai prexiada
Po su ki est fatu beni in logu miu
Però, su trenu beçu est abarrau
Cussu ki medas fillus m’at liàu.

Dinghiaranna
Dinghiri, dinghiri, dinghirianna
Dinghirianna dinghirianedda
Natura bisti sa mata prus manna
Natura bisti donnya matixedda.
Candu su Meri de donnya prodesa
Su mundu e totu s’est postu a creai
Postu adi in esseri vida e grandesa
E a sa natura donau at sa crai.
Dinghiri, dinghiri, dinghirianna.
Aici issa, arrica de tanti valori
Fata rejna nd’assumit sa cura.
Virtudi, gratzia, talentu, splendori
Ponendu in usu cun larga mesura.
Dinghiri, dinghiri, dinghirianna.
Provididi issa cun puntualidadi
A fai su campu ridenti e froriu
Fait sa stasoni, s’ierru, s’istadi
Movit su bentu, su mari, su riu.
Dinghiri, dinghiri, dinghirianna.
Portada in bratzu su genere umanu
Justa cun totus donendu sa luxi
Ma tropu genti ddi trantzit sa manu
E pogus’est ki si ponidi in gruxi.
Dinghiri, dinghiri, dinghirianna
Dinghirianna dinghirianedda
Natura bistit sa matta prus manna
Natura bistit donnya matixedda.

Dispetu a sa morti
De tui seu meri deu, m’at nau sa morti
Casi ca fù joghendu cun sa vida
Candu credia de podi fai su forti
E luegus a m’averti fut benida.
Poi m’at lassau, nò sciu po cali sorti
Nè po candu fissau at sa partida.
Solu m’ad afoxau in su turmentu
De unu profundu e seriu pensamentu.
S’arrexioni portau m’adi a detzidi
De fai contr’a sa morti unu dispetu.
Mi seu transìu e postu aundi nò bidi
Fini sa vida e stai sa morti a tretu.
Tenia premura de studai su sidi
Ki portat prus a bivi cun rispetu.
Serbiu mi seu de cussu avertimentu
Po bivi prus a longu e prus cuntentu.
Mali at fatu sa morti a si fidai
E a nò essi fatu insara un atru contu
Poìta apu acurtu a mindi vendicai
E seu, ki mi oid bocìri a morri prontu.
Ma prus nò benidi issa a ndi pigai
Ki nò s’arrestu de unu corpus tontu.
Candu ad a crei de mi lassai bocìu
Ad a bii seu sanu e ancora biu.

Dromi ninna
(Ninna a Francesca)
A imagin’e s’arrosa
Modellu de candori
At fatu, generosa
Mama natura un frori.
Cirkendu a ki dd’ondi
Donnya disigiu at biu
Benìda est a ddu portai
A su jardinu miu.
Dromi ninna, fai sa nanna
Fai cuntenta sa ninnìa
Ke Gesus in sa capanna
Siasta atendia de Maria.
Jai ki cun tanti afetu
A mei dd’adi afidau
Fatu de amori ogetu
Su beni apu atleta.
Gratzia ddi nau de coru
Cuntenta,gè mi bidi, domandit ki dd’adoru
A deus, ca Deus ddu scidi.
Dromi ninna…
Su numeru prù mannu
De angelus benendu
Ddu salvinti de dannu
Cumenti seu preghendu.
A mei, ca est mia premura
Ki nò ddi tokit bentu
Lessidimì sa cura
De jardineri atentu.
Dromi ninna…

Fai sa ninnia
(Ninna a Francesca Virginia) (boxi arta)
Su celu, cant’amori
Cantu joia s’at jau
Mandendusi un frori
Bellu, caru e stimau.
Gratzia a tanti favori
Su sobi s’at portau
S’at de veru splendori
Sa vida illuminau.
(boxi de basçu)
Ninna dromi
Fai sa nanna
Fai cuntenta
sa ninnia.
De pitica cantu a manna
Deus ti tenjat
Cumpanja.
Dromi ninna
Sorridendu
Nò ti tokit
Mai dolori
Mai ti mankit
Su candori
Dromi ninna
Ninna hoo..
Dromi, ninna
C’est s’amori vigilendu,
babu, mama
funti po tui preghendu
funti prontus amendu
su coru a donai
funti amori donendu
ki nò morrit mai!
Citi, citi su prantu
Bivi de allirghia!
Nò ti fatzada spantu
Su mundu in tribulia.
De Franciscu su santu
De santa Viorginìa
Ses in bratzu cun vantu
Ninna nanna ninnìa

Faciana
De connosci nò credìa
Femia nascia po furai
Ca ladrona nò dda biia
Nò fia tentu a dd’acusai.
Dda ponìa po essi santa
Delicada e joiosa
De bellesa, posta acanta
Mellus fata de sarrosa.
Femia naru, de rigòri
Juditziosa, intelligenti.
Sprigu craru de onori
Cosa rara veramenti.
Po su tanti nò ddu negu
Ki siat frori de alabài
Ma su bellu ki ndi segu
Nò seu s’atru a ddi cuai.
Ddi stai justu a narri: bona!
Ecisera e prus ancòra
Ma dda batiu deu ladrona
O faciàna incantadora.
Oi, ca prova nd’apu tentu
Nò mi stentu a decrarai
Ca ddi bastada un momentu
Una fura a cumbinai.
E furendu tenid’arti
Ca dd’ajudat sa bonesa
E sa gratzia pigat parti
Po fai totu cun finesa.
Ki disijada un ogetu
Gè connoscit donnya pista
Tanti s’ogu imbiat deretu
Ki ddu furat cun sa vista.
Bastada una castiada
Cun is ogus de fastiju
Po si ponni in s’arretzàda
Su ki tenidi in disiju.
Furat corus de sa genti
Mancai posta a su riparu
Ki dd’arribada a sa menti
Predi o para sarvat raru.
Ki s’acatat ca esti in frori
Puru andendu contra bentu
Cun is trassas de s’amori
Ponit s’omini in trumentu.
Aici est issa bona meri
S’unu o s’atru e assogai
Ma dd’abarrit su doveri
Prus de un coru a nò furai.

Festa de is antzianus
(sa dì trexi de donnyasantu 91)
In custu bell’incontru seu cirkendu
Cumpanjus becittedus cant’e mei
Ma nisciunus mi parridi imbecendu
E ca nemus est beçu sigu a crei.
Cun sa festa ki oi seus gosendu
Nci cabat donnya frunza asut’e pei.
E… cuddus ki s’edadi nosta scinti
Si castianta, ma beçus nò si binti.
Nosu seus ke cinixu in giminera
Candu su fogu paridi studau
Bastada a ddi ghetai un stiddi’e cera
Po biri cantu asunta est arbigau.
Speraus de sighì a bivi sa dì intera
Cun sa gratzia ki in donu Deus s’at jau
E a kini de nosatrus tenit cura
Scusa pedeus ki donaus secatura.
Fortza de su dinai
Cumenti su dinai fait propiedadi
A s’omi ponid ungas de lioni.
Jogat cun is leis, bocit s’onestadi
Suterrat su diritu e s’arrexioni.
Spingit cand’ollit cun fatzilidadi
S’abisonjosu a vili obrigatzioni.
Tenit sa genti e is cosas in poderi
E de fai beni o mali est meri.
Ki s’eletricidadi fessit cosa
De ponni in usu a modu de dinai
Sa timorìa po nò pigai sa scossa
Aìada a fai a s’avidu pensai.
E sa ki est oi tensioni dinarosa
A volumini justu iad a torrai.
Scunfiantzendu cuscientziosamenti
De su dinai sa malaidì’e sa genti.
Luna gelosa
Narami, luna poìta su lugori
Mi negas e dimostras gelosìa?
Nò bois ki canti e juri eternu amori
A sa pretziosa e cara stella mia?
Issa, prus bella, faidi atru splendori!
De mei pigau at donnya simpatia.
Ses risentida e nò t’incaras, luna
Ma deu ndi stimu meda una e sol’una.
Po nò ti fai dispetu
Po nai cantu dd’adoru
Mi privu atru diletu
Ma cussa stella imploru.
Cun devotu rispetu
Cun is alas de oru
Costanti me’ s’afetu
Nciddi mandu su coru.
Luna gelosa, mirendu s’incantu
T’agatu trista, in sa noti steddàda
De nuvolas coberta in d’unu mantu
E ti cumprendu ofendia arrenegàda.
Ma tui nò siasta a m’inviudai su cantu
Abarrendu in su scuru incordiolàda.
Bessi puru, nò creta ski m’atonti
Ki tui ses prima a ddi basai sa fronti.

Maju froriu
(Ninna a Mauro)
Bistiu de prata
Su mesi frorendu
Tenia s’arrosa
Cun donnya frori
Candu, unu pipiu
Caru, fut nascendu
Justu a sa mesura
De unu grandu amori.
Nò s’est biu mai
Su sobi luxendu
Cantu cussa vida
Portada splendori!
In su petu miu
Dd’ascurtu batendu
Paris a unu tocu
De amorosu ardori.
Candu torrat maju froriu
Ninna! ki t’agatit crescendu
Bellu cument’oid coru miu
In gratzia de Deus bivendu.
Ora siat de sobi o de luna
Ninna! Ki ti portit talentu.
Beni nò ti neghit fortuna
Prexu s’aria, s’acua e su bentu.
Ninna nanna ninnia
Finu a candu ad essi
Babu beçu mannu
Dd’as a tenni acanta
Cun is consillus susu.
Nonnu jai bistiu
De diversu pannu
Passau a sa vida
Ki nò morrit prusu.
Atentu preghendu
Donnya dì de s’annu
Ad’essi po tui
Po is disijus tusu.
Mauru su santu
Ti salvit de dannu
E dd’hollat cun Deus
Su cor’e Jesusu.
Candu torrat maju froriu
Ninna! Ki t’agatit crescendu
Bellu cument’oid coru miu
In gratzia de Deus bivendu.
Ora siat de sobi o de luna
Ninna! Ki ti portit talentu.
Beni nò ti neghit fortuna
Prexu s’aria, s’acua e su bentu.
Ninna nanna ninnia.

Mama
Cand’est dì cand’est noti fadendu
Candu scuru est su celu o brillanti
A tui, mama, seu sempri pensendu
Nò ti possu scaresci un istanti.
Deu lassau t’apu atesu prangendu
Sa partenza arregodu strazianti.
Ma sa curpa nò est mia ki sunfrendu
S’abisonju m’at fatu emigranti.
Mama tui s’est pedronu continu
Tui cunfortu, difesa e amori.
Nò ses rosa, gravellu o gesminu
Ma su mellus de donnya frori.
Sa fatiga e sudori ki agatu
T’assiguru nò mi onanta pesu.
Cument’oit su distinu andu avatu
Sentu feti ca tui ses atesu.
Però, mama, nò siasta in tristura
E nò tenjas po mei pensamentu.
Di essi sana fai stima e procura
Ca mi torra su coru cuntentu.

Mama premurosa
(Mama)
Fai dixiot’annus, justus a cust’ora
Ki tui bussasta s’enna de sa vida
Pronta in su mundu po pigai dimora
Antzis nascendu, t’apu biu, impressida.
Ma filla mia, nau nò t’apu ancora
Cussu ki portu in conca, scida scida.
Donami ascurtu e presta atentzioni
Ca sa leztioni depisi imparai.
(Filla)
Filla nò seu priva de difetu
Ddu riconosçu, nò potzu negai
Ma ca t’ascurtu cun santu rispetu
Mama, ti pregu de nò dubidai.
Cumenti cara mi sesi in s’afetu
Cara ti tenju po mi contzillai.
Deu ti domandu, prus k’a mi protegi
A mi curregi e perfezionai.
(Mama)
Nascidi in terra donnya creatura
Jai cun su sessu bell’e distinau
Ma tortu a nosu fatu at sa natura
Ca indietru is mascus nascendu at lassau.
Crescinti in monjas, foras de mesura
Pagu at sa femia paras strobau!
Tocada a nosu donnya attenzioni
Ki olleus pilloni in sa arretza cassai.
(Filla)
Ita mi naras, mama premurosa
Tui timis, fortzis, po nò m’arrebai!
Prus no nçat gherra, po is mascus dannosa
Tanti sçat omis po ndi scavuai!
Candu ddu bollu mi fatzu a isposa
Nò timu nudda! Ddu potzu jurai.
Naramì feti ita modu asi usau
Candu cassau tui asi a babai.
(Mama)
Babu fut justu, bonu cassadori
Ma nò adi acutu fusili a pigai.
Mirat de atesu, po nò ddu essi stiori
Sa trutiredda po nò ndi furai.
Deu, ca ddu biia bellu ke unu frori
Fia de sa mata pronta a ndi cabai.
Allokiau dd’apu cun i s’ogu
E postu fogu po m’adisijai.
(Filla)
Jai ki ddu scisi, narami cumenti
S’omi sintzillu potzu sçoberai
Po nò cunfundi cun d’unu molenti
Ki mancat feti de corroxiai.
Su croxiu a foras si bi solamenti
Ki tanti est brutu de nò castiai.
Ma de su coru, po ddi bi figura
Cali cresura si podit satai.
(Mama)
Cumenti at postu sa domanda ananti
Deu t’arrespundu cun s’avertimentu.
Portada sprigu, su coru costanti
Sprigu su falsu o veru sentimentu.
Siasta prudenti ca, s’omi est birbanti.
Ligiddu aintru e porta s’ogu atentu.
De su ki narat nò cretas fueddu
Ma su ciorbeddu impara a murigai.
(Filla)
Beni cumprendu ca tui ses cuntenta
Ki doni prova de sa fortza mia.
Lassami spatziu e movu sa prus lenta
Ki a tui parrit pampa e nè frerìa.
Jai ki ses posta po mi fai atenta
Usamì puru un atra cortesia.
Tenidi pronta e beni a mei currendu
Ki bis tenendu fogu de studai.

Impari
Nò sola sempri bastat sa mirada
Po movi speddiu e cumparri de prusu
Meda conkistas gunnedda incrutzada
Ki siada un pramu de genugu in susu.
Tanti sa femia bessidi spollada
Nò es prus pecau su dda ponni in usu.
Bastat s’allogu de su veru frori
Cun cussu amori ki nò morrit mai.
Melodia seddoresa
Sa musica nò cumprendu
Ma connosçu sa sonada
Dda cantu innoi provendu
Ca fortzis d’apu imparada
De meda dd’apu ascurtada
E mi parri de dda scii.
Una antiga melodia
Arregodu m’at lassau
Narat de sa terra mia
Candu Amsicora esti stau.
Dda cantu po allirghia
Ma cun su coru segau
Pensendu a sa nostalgia
De donnya sardu emigrau.
Sa musica nò cumprendu
Ma connosçu sa sonada…
Deu dd’afidu a su bentu
Ca monti passada e pranu
Candu fiskiat cuntentu
E bobada in s’oceanu.
Ollu ki cun sentimentu
Midda trasportit lontanu
Cun d’unu saludu e centu
Milla strinturas de manu.
Sa musica nò cumprendu
Ma connosçu sa sonada…
Su cantu a su bentu imbiu
Ca podidi in susu andai
E donnya suspiru miu
A su celu cunfidai.
Preghididdu ca puniu
Nò potzu prus abarrai
Ma de nuvolas pulliu
Mi fatzat mellus cantai.
Sa musica nò cumprendu
Ma connosçu sa sonada…

Messaiu ofendiu
Ocannu band’arai a campusantu
Ca s’atra terra est totu maladita.
Sa ki apu traballau, fadiada incantu
Passàda a panga, totu, a fita a fita.
Gè dd’ia cumbatia meda…e scieis po cantu?
Po ndi tenni a sa fini una scunfita.
Pariat de mi donai un paradisu.
E invece è trigu apu messau cinisu.
Deu seu sa pmpa de una candebedda
Sighida de su bentu a manca e a drita.
Seu postu asuba de cudd’erbixedda
Ki a sa prim’acua spunta, fita fita.
A tempus bellu, in donnya follixedda
Ddoi bìu una noda de sperantzia scrita
Ma cuatru landireddus a stracìa
Bastanta a decretai sa fini mia.
Asuba ca est su tempus traitori
Sa vid’e su messaiu a poni in jogu
Ecu, sa manu de unu malfatori
A ddu bocii cun d’unu mar’e fogu!
Ira de belva umana, odiu, furori
Ki nò lassada sçutu nisçun ogu.
Ita mi pongiu a fai, preghendu a proi
Po bivi crasi ki seu jai mot’oi?
Donnya dì kitzi nci bessia, prexiau
Po fai sa fit’e pani prus seguru
E fessit tempus bellu o tempus mau
Nò m’iais a bì, ma fui arendu a iscùru.
Bessiat su sobi e m’agatat sudau
E mi lassat tenendu s’acua puru
A skina curva, sempri a fundu andendu
Po nò agatai sa morti e fui morendu.
Nò ti bastada a tui, o belva umana
Cussa fatiga, frius, basca e sudori
Su apatigai su fangu a pagu gana
Maladiu e privu de donnya favori?
Nò portas tui in su coru una campana
Ki sonit prus rispetu e prus’amori?
Nò bisi ancora, luridu serpenti
S’opera tua, ca fait morri sa genti?
Ma tui ti prandis de diversu pani
Ti nutris cun buconis de velenu!
Tui, ca ses tui su peus de donnya cani
Mostru infernali de livori prenu!
Sprofundadì, prima ki deu ti stani
E a morri bai, po mi torrai serenu.
Gei pregu deu ki un lampu a tui deretu
Tindi stakit su coru de su petu.

Musa
Musa gentili e cara!
Est tempus ki t’implori
Intonami su lara
Infundimi fervori.
Musa gentili e cara!
Torrendu a tui s’onori
Donami nota crara
Cantu in tonu majori.
Musa gentili e cara!
T’apessi serbidori
Cant’est semplici nara
Su sardu cantadori.
Musa gentili e cara!
Cun s’auguriu miliori
Un saludu prepara
Po donnya ascurtadori.
Musa gentili e cara!
Po nò cumiti errori
Su ki fiat cantu insara
Mostra cun su folk lori.
Lara lara lara lara

Nemo Propheta
In bidda mia nò ddu at un pesu fatu
De podi nai ca pesat justu e tali.
Unu pesendu es basçu e s’atru est atu
Totus diversus e manc’unu uguali!
Po cussu deu, in forasa m’agatu
De su ki est su pesu miu reali.
A kini crei, ki m’at mandau pretzisu
Unu a s’inferru e s’atru in paradisu?
Ca nemus est profeta in patria sua
Dd’at nau su Primu Grandu Sapienti.
In logu nostu est sempri s’aria trua
Nò bieusu steddu, mancai siat luxenti.
Po nai de nosu mali, a lingua crua
Intraus in donnya coru e in donnya
menti
Però, a su strangiu, cantu prus podeus
Ddi naraus mellus ki de nosu est peus.
Su pesu nostu, o est tropu arruginiu
E firmat sa lantzeta a mesu tretu
Opuru, po tropu ollu, esti impressiu
Nò bì su sinnu e nci passat deretu.
A si pesai nò faidi in logu miu
Ca funti is pesus prenus de difetu.
Nò torrada in nisçuna pesadura
Su pesu ki donau s’at sa natura.
Otu in cincu
Ca su cantu m’est amigu
Ma su jovunu nò sigu
Su modernu po s’antigu
Ddu trascuru e nò ddu pigu
Ca su cantu m’est amigu.
Torru asegus e mi sbrigu
Asinuncas nò sodìgu
Cun su sonu ddu murigu
Ddu cunfrontu e poi ddu ligu
Ca su cantu m’est amigu.
Ki de sobi nò seu sprigu
Nò seu fatu de otigu
Bivu beni me in s’aprigu
Ki nò dromu mindi frigu
Ca su cantu m’est amigu.
Pagu fatzu a s’arti intrigu
Ca deu s’ossu m’arrosigu
Ma ki cantu e m’afatigu
Nò ndi meritu castigu
Ca su cantu m’est amigu.
Sid’è ixibi o de figu
Nò ndi matziu e ne cacìgu
Ma dd’assoddu e dd’aparigu
Fatu a fitas o fustigu
Ca su cantu m’est amigu.

Orfanesa
Tui nò fiasta gradessia, creatura
Nò ses benida de nisciunu amori.
Ses nascia de un acapiu fatu a fura
Cumbinau cun tropu lebiori.
Po kini t’at portau a cuadura
Fiasta bregunja,strobu, disonori.
E in d’unu muntonarju afangotada
Scavuau tinci at po morri abandonada.
Ma, cumenti natura adi ammosta
Fortza po ti donai su nascimentu
Donnya atru strobu po ti perdi usau
Totu cantu est arrutu in fallimentu.
Aici su sobi, a t’amostai incarau
Sa bia adi abertu a su sucurrimentu
E, po una prima, e poi atras personas
Nò ses finida pastu de is merdonas.
Arregorta e portada cun premura
Aubì rennyada amori verdaderu
Bivis e ses crescendu in ermosura
Tanti de t’amirai su mundu interu.
Su Celu ki de tui pigau nd’at cura
T’at donau puru un beni assentaderu
Ca ddu minescit s’innocentzia tua
Cristu t’assistit cun sa mama Sua.
Paridadi
De nasci mascu o femia, su fatu
Ddu tenidi in segretu sa natura
E diferentzia in s’opera nò agatu
Puru essendu diversa sa figura.
Po paridad’e sessu deu mi batu
Ca tenju a coru s’aparixadura
E ca dda pensu, in modu craru e tundu
Naru ca un sessu a s’atru nò est segundu.
Ki s’omini s’amostat ceroteri
Scaresciu ca de femia issu est fillu
E si nominjat sessu cuadderi
Nò dd’esti a setiu po si ponni a pillu.
Ca sa femia, fata de paperi
Dd’aterrat feti ki ddi movit cillu.
Ecu poìta Natura a perfezioni
Ndi bistidi a gunnedda e a pantaloni.

Pinna e tinteri
(metafora)
Tanti tempus allogàda
Fù sa pinna, domandendu
Ki ndi dd’essinti bogàda
Ca de scrii fù disigiendu.
S’intendiada arrabiosa
Sempri a s’acorru sugeta
Prepotenti, furiosa
Ke una pibera inkieta.
Su scrivanu e su paperi
Jai pensanta ita ddi fai
Mancà solu su tinteri
Po dda podi acuntentai.
S’apu a nai ca in su momentu
(paìat propiu fatu a posta)
Si presentada scuntentu
Su tinteri faci tosta.
Cussu puru si kesçàda
Stancu meda de sunfriri
Ca una pinna disijada
Ma ki fessit pronta a iscriri.
Pagu mali ca s’apretu
Fatu at movi su scrivanu
Aici est’issu andau deretu
Cun sa pinna jai a manu.
E fatu adi una scridùra
Manna cantu fu’ paperi
Racontendu sa bravura
De sa pinna e su tinteri.
Tenei contu de una cosa
Ca is lamentus fianta dusu
Oi, de pinna disijosa
Nò ncind’at manc’una prusu.

Pisci de soddu
Asuta de ponti
Tenemu, prexiada
Cun s’amu sa lentza
Jai pronta e ghetàda
Cirkendu unu pisci
Ki in s’acua sartàda
In d’una tirada
De podi piscai.
Po unu pisci de soddu
Ki m’apu papau
Mirai cantu m’adi
Sa brenti ingrassau.
Nimancu un minutu
Deu femu aspetendu
Ki jai fut su pisci
Sa lentza tirendu.
Cumenti s’est moviu
Su fundu cirkendu
Apitzus currendu
Ndidd’apu acollàu.
Po un pisci de soddu…
Macioni nò fudi
Pagellu o mugheddu.
Nò fudi spirritu
Ma pisci a capeddu!
Su nomini justu
Bosatrus nareddu
Ca, in atru fueddu
Deu lissa ddi nau.
Po un pisci de soddu…
Sa pressi nò at bofiu
Ki m’essi stentàda
Ma postu in d’un nudda
Dd’apu in sa pinjada
Segura aspetendu
A buca aparàda
In d’una papàda
De ddu divorai.
Po un pisci de soddu…
Apena ki in buca
Cidd’apu incarau
Interu e deretu
A brenti est cabau
Ki fessit, su pisci
De dd’essi sconcau
Su kinzu ingrussau
Nò dd’emu a portai.

Po’ sighi sa moda
(Coru)
Morendu si bit s’orizzonti
Su sobi de monti
E de mari est cabàu.
Su celu si steddada e bruna
S’incarat sa luna
Ma mort’est sa dì.
(Mama e babu)
It’est su ki mind’at bitiu
Torrendu de su continenti?
It’est custu lussu ki biu
De falsa rikesa luxenti?
It’est sa moda ki at sighiu
Su trucu po illudi sa genti?
Naràddu ita portas in menti
Ca babbu(mama) impazienti
Dd’ollidi scii.!
(Coru)
Morendu si bì s’orizzonti…
(Mama e babu)
Rajunta sa majori edadi
de domu su bolu at pigau.
Po bivi in sa grandu tzitàdi
A nosu prangendu at lassau!
Sighendu sa tzivilidadi
Sa faci e is ungas t’at pintau
Ma pagu juditziu at portau
S’onori illibau
Cunservendudi.
(Coru)
Morendu si bì s’orizzonti…
Mama e babu
De domu tinci ses andada
Arroscia de bivi modesta.
De mama e de babu adorada
Ca fusti virtuosa e onesta.
De nosu gèi fusti aspetada
Ke santa po ti fai festa
Ma lutu si portas e pesta
Sa vida funesta torrendusì.
Coru
Morendu si bì s’orizzonti…
(Mama e babu)
Sa primavera cun su frori
S’arrundibeddu nd’at portau.
Cuntentu su sobi a s’arbori
Su basu joiosu at torrau.
Ma in domu nò nc’est prus amori
Ca tui s’amori dd’as befau!
Bai, curri e bregunja e pecau
Cument’ as portau
Torrandi a boddi.
(Coru)
Morendu si bì s’orizzonti…

Prejuditziu
Nò ncind’at famosu, braberi marjatzu
Ki ponjada in mostra simbili mustatzu!
Canc’unu malinu, mancu dd’ad a crei
Ca de nascimentu portu su mustatzu
Ma kini cuntestada, ascurtendu a mei
In d’un modu o s’atru, cumbintu ddu fatzu.
Nò ncind’at famosu…
Meda genti scìdi ca in sa gravidanza
Sa femia nò depid disiju cuài.
Totu su ki bidi, po nò arrui in mancanza
Prima ki atru fatzada ddu depid tocai.
Nò ncind’at famosu…
Ca su ki nò tocada, tenediddu a vista
Ponidi a sa femia s’arrìscu e strumài
O ki manu movidi, cambiendu pista
Finidi a su fedu de nciddu imprentài.
Nò ncind’at famosu…
Po cussu est ki mama, biendu un lioni
Dereta a is mustatzus sa mira at ghetau
Tokendusì in buca cun pagu atentzioni
Su mustatzu a mimi nd’est arrisutau.
Nò ncind’at famosu…
Imoi, candu bessu de domu a sa bìa
Sa genti si firmada a mi cadebai.
Cumentusu intendu de donnya ginìa
E un atru bafu megant’e mi fai.
Nò ncind’at famosu…
Mi fainti un bafu, ki mi funti a manu
Su cap’e guvernu, su parlamentari
Su carabinieri, su vigili urbanu
Sa magistratura totu cantu impari.
Nò ncind’at famosu…
Ma nò portu feti bafus de lioni
Portu puru s’unga po scarrafiai
Ki unu s’afracada cun mala intenzioni
A fitas sa cara ddi fatzu mudai.
Nò ncind’at famosu…
Tempus de bos’atrus nò ndi furu
Ca de su mustatzu totu s’apu nau
Ki nò dd’eis gradessiu fiskiaimi puru
Aìci un atru bafu tenju procurau.

Regulariu
Su tempus esti incurtzau.
Passat sa vida terrena
Jai su mundu de sa scena
Esti a isparessi inbiau.
Coru
Bonu e justu est su Sinnyori
Deus de sa fedeli dadi
Ca de sempri est beridadi
De salvesa e de amori.
Ma de su ki seus in totu
Depeus contu a Deus torrai
Mellus prima a lagrimai
Ki nò a prangi pustis motu.
Bonu e justu…
De sempri caridadosu
Deus ammosta s’at sa bìa
Su Fillu ponendo a ghia
Po si portai a su gosu.
Bonu e justu…
Biadus is poberus kietus
Biadus is mali trataus
Is corus bonus pistaus
C’andanta in celu deretus
Bonu e justu…
Ca promitida sa vida
Si dd’at Deus cun siguresa
Ki olleus tenni sa salvesa
Nò pigheus sa bia faddìda.
Bonu e justu…

Rusignolu
Gentili rusignolu, ses torrau
Cun su matessi cantu in su boskitu
Ma nò agatas su ki as lassau
Tristu est su logu e deu tropu aflitu.
Piga atru cantu e lassa su prexiau
Ca s’allirgu nò torrat de diritu.
Canta su dolu cument’eu intendu
S’eco ki torrit sa noda prangendu.
De mei teni contu e rispetu
Ca ti spiegu it’est, it’est dolori.
Frima su bolu, nò passit deretu
Tui, ca ses famosu cantadori.
Canta languidu, flebili e perfetu
Imitendu s’afannu distruttori.
Fai de rincontru a su distinu ingratu
Angustu cantu e benimi avatu.
Deu t’intendia gaiu e cuntentu
E manna fut sa joia ki tenia!
Sa boxi tua, cantu lenimentu!
Ma diversa mi parit s’armonia.
E motivu est su miu de lamentu
Ca perdidu apu s’arrikesa mia.
Cantami tui, ca beni fais su cantu
Deu torru a su silentziu e a su prantu.

Sa Bella de Seddori
Sa storia nò racontat totu cantu
Ca meda cosa perdidi in caminu
Ma un fatu acinnat issa e deu ddu cantu
Mesu po fatu e mesu ddu cumbinu.
Ca mi donada spuntu e, asut’est mantu
Mi fait bi veru su pensai malinu.
Curru aundi currit boxi e in d’unu tratu
De sa tumba ndi bogu mortu e fatu.
De omis e de armas fatu forti
Su jovunu Martinu aragonesu
Movidi a is sardus guerra e sangui e morti
Semiada in s’occidroxiu seddoresu.
Bintu e portau s’at donnya beni a corti
Su sardu, o lassat mortu o vilipesu.
Sotomitia bivìat sa femia bella
E meri fut de donnya verginella.
Ma sa bella tra is bellas fu Simona
De una bellesa ki mai prus s’est bida.
Famìu nò fut su rei de Aragona
Ma sa gan’e papai ddi fut benda.
Ca fiat, sa bella, pronta e nò mandrona
A dd’invitai su pranju s’est ofrida.
Apetitosu cibu prelibau
Sa bella de Seddori dd’at donau.
Un pratu asub’ e s’atru e un atru ancòra
Unu fut prus de s’atru saboriu!
“Avanti”, ddi narada, “via, divora…
Totu est su tuu su ki fut prima miu!”
Su rei, papendu, nò iat perdid’ora
Finacandu su coru dd’est citiu.
Arrutu nd’est de sedda e in corti, a tortu
Nau anti poi ca de malaria est mortu.

Sa coia mia
Sa coia mia, ca fudi annuada
Noetsta passada
Prova nd’at donau.
Prova nd’at donau, gè si bii cumenti
Pobideddu miu m’adi afraddocau.
In s’ora prus bella,tontu ke mobenti
m’at, foras de postu, cosa domandau.
Po dd’essi negau
Cussu cumprimentu
Ecu ca scuntentu
S’est postu a arropai!
Sa coia mia…
S’est postu a arropai, mancu un sreghestanu
Tocada arroseri aici arrepikendu!
Lestru fudi e sudru de pei e de manu
Atru ke tratallu, a mei arropendu.
Prus mi biat prangendu
Prus bussàda a forti
Fintzas a sa morti
Timiu de acostai!
Sa coia mia…
Nò at tentu contu de ponni a luketu
Su cadasçu e s’oru prus apretziau.
Ca ddi fut prus caru, obìat su libretu
Poìta tengiu in posta dinai allogau.
Cussu m’at circau
Credei deretu
Prima ki su letu
Podessi incinjai.
Sa coia mia…
Bungius cantu portu cun lidòri in prupa
Unu avat’e s’atru nò potzu contai
E totu est s’amori a ndi tenni crupa
Ca pressi m’at postu de mi coiai.
Prim’e mi sposai
Nò ddu connoscìa
Feti ddu credìa
Pober’e dinai.
Sa coia mia, ca fudi annuada
Tenei annotada
Prim’e fastijai.
Sa fortuna
Deu, sa fortuna, nò dda sciu pensai
Diversamenti de unu stiddieddu
De acua, bellu e prontu a si stacai
De asut’e gronda o de unu canabeddu.
Prim’e nd’arrui, mancu issa ddu scit nai
Ki agatit conca nuda o cun capeddu.
E nò nareis a mei ca portat ogu
Ki arruidi a bortas a su propriu logu.
Però, ca nò si movit po bocìri
E bivit cun d’un atru intendimentu
Cadebadda ca mellus dd’eis a biri
In s’opera ki faidi onnya momentu.
E nosu seus sa gratzia a ndi fruiri
Ca de bona saludi est nutrimentu!
Contai, ki mali at fatu sa fortuna
O ki at persona ofendiu, conteind’una.
Sa scola primaria
Funti cincu annus currendu
Ki anti a sa scola imbiau
Tanti lillus oberendu
E cura nd’apu pigau.
Ma necessariamenti
Pensu de ddus tramudai
Ca ointi sobi prus ardenti
Po sighì a scuguddai.
Coru
Donnya teneru frori
Bivi felitzi e cuntentu
Ki esti assistiu de s’amori
A riparu de su bentu.
Ki sia dispraxia nò negu
Ca mindi depu privai
Ma, ki debadas nò pregu
Atru semi ad’a spuntai.
Oh, cara’ mamas, acanta
Cument’ e sempri si ollu
Ca,de sa scola, sa pranta
Ki sola abarru nò indrollu.

Sa vida, su sonu ,sa bellesa.
Sa vida
Deu seu sa vida, fata de grandesa
Beni ecellenti, de immensu valori.
A mei si depit ki esisti proèsa
Ca seu de totu sa fortza motori.
Seu sa prus manna, sa mellus rikesa
S’unica stella, su veru splendori.
Feti a mi nominai est importanti
Ca fui e seu e sempri apa essi ananti.
Su sonu
Deu seu su sonu, e su poderi miu
Esti aici mannu ki nò fini mai.
Potzu narri ca su ki totu est biu
Bivit de mei e megu e dd’amostai.
Sentza de mei nò nascidi unu piu
nisçuna vida podit respirai.
Duncas, gè mi bieis cantu seu forti
Ca ki mi citu esti a si jài sa morti.
Sa bellesa
Seu sa bellesa e feti ca s’intendu
M,’acatu ca si mancada armonia.
Nò teneis contu osatrus ca rennendu
Nò seis potentis a mesura mia?
Ki m’arretiu deu, fortzis bivendu
Abarrat calincuna balentìa?
A ita serbit su sonu ki est rumori
E sa vida ki fata est de dolori?
Sa vida
Ki tenjas canc’un donu ddu cumprendu
E mi cumpraxiu de si biri in frori
Ma ddu depeis a mei ki seis bivendu
E a mei su mundu interu est depidori.
Però, ki sorris seus, e deu m’intendu
Agòa nò est nascia sa sorri majori.
Torrai a passu in su ki si pretzedu
Abarrai su ki seis e prus nò pedu.
Su sonu
Ki est aici, atzetu deu po primu
Tanti ca abàrru su ki seu campioni!
Sa bellesa
Deu puru seu cuntenta e nudda timu
Ca avanzu ki seu posta a paragoni.
Sa vida
Fadeus un patu, cument’eu ddu stimu
Poneus su beni nostu in comunioni.
Impari
S’acordiu est fatu e cantu seus ballentis
Serbada a fai felitzis is bibentis.
Coru
Donnya teneru…
Sa faba
Sa faba esti arrodada a donnya pei
Bessat de buca o pagin’e jornali.
Intrada in donnya origa e po dda crei
Si bistit de candori celestiali.
Ki agatat fidi, setzit cun prexei
Ma nemusu dda tenti a murrali.
Pigada is cosas cument’oidi a s’aba
E faidi a beru su ki totu est faba.
Sa bregunja
Sa bregunja, sfacìda
Tretu mannu est fadendu
A mudandas currendu
De s’acorru fuida.
Prima biviat cuàda
Timendu de bessiri
Nò fadiada a dda biri
Mancu in domu incarada.
Oi si bidi in sa genti
De sa moderni dadi
Amostendu su ki adi
De prus compromitenti.
Binta de sa tontesa
Si presentat trucada
De bellesa mancada
Totu pren’e brutesa.
Nò dda serrat pru’ muru
Nò dda frenat pudori
Sa bregunja est ludori
De progressu seguru.

Sa carruba
A s’annu sessanta
Nd’açunçu atrus tresi
Ki nascida sesi
Friscurosa pranta.
De cuddu menjanu
Ki sesi spuntada
Sa domu pintada
Midd’as de beranu.
In artu artziendu
Ses sempri de prusu
De basçu e de susu
Su logu mudendu.
Ti biu imponenti
De truncu e de sida
Cun frous bistida
De folla luxenti.
Cant’ollit natura
Ti lessit bivendu
A domu portendu
bellesa e friscura.
Sa vida
Sa vida nosta, po dd’arretratai
Dd’assimbillu a una bia abunjonada
Aubì seus postus nosu a caminai
Cun sa bertua de is disijus artuada.
Pareus segurus de nò lissiai
Seghendu tretu a camba sparrancada
Ma nò si mancat, prim’e lompi a innùi
Can c’una cosa ki si faidi arrui.
Deu stimu in s’ora sa durada mia
Cun issa seu andau e bandu ancora
A manu strinta in s’afossàda bia
Po acudi a fai su ki capidi in s’ora.
E seu passau aubì passai podìa
Cun centu e una promissa ingreghiadora.
Ma, ki domandu aubì m’adi a lassai
M’ascurtat sì, ma nò arrespundit mai.
Cumenti castiu su merì cabendu
S’ora prus bella megu de assaborai.
Oi, ca sa vida prusu dda cumprendu
Mi creu ki mellus nò apa biviu mai.
Un son’est passau avatu miu intendu
Sa bertua est ora de nci scavuai.
Gè nd’apu ingurturau de acua trua
Oi m’ind’acatu e nò ddu portu a cua.
S’atra faci
Su essi stetiu in continenti
Ann’e mesu de sodrau
M’est serbiu po scì cumenti
Su progressu est avanza.
Po contai su ki apu biu
Nò est cosa mancu ‘e crei!
Ma si contu un fatu miu
Mancai tristu siat po mei.
Po sighì donnya scrobeta
Ita ballit sa scridura?
S’omi prus a vista aberta
Nudda bii, ki ddu at cresura!
Donnya dì, candu bessia
De caserma a sa tzitadi
Centu passus nò fadia
Sentz’e bii una novidadi.
Ma un merì de dì afannosa
Acostendu a una vetrina
Beni fata ke s’arrosa
Apu biu una sinnyorina.
Po sighì donnya…
Totu s’oru de su mundu
Baliat feti sa mirada.
Si cunfessu, craru e tundu
Ca fu’ bona, sçaberada!
Femia aici cali ad’essi
S‘omi a nò dd’addisijai?
Po cuss’est ki fogu e pressi
A mei fatu at delirai
Po sighì donnya …
Sighendidda passu a passu
Lompiu seu a domu sua
Deu narendu: nò ti lassu!
Issa a mei:seu totu tua!
Ecu infinis ki dereta
Fata bii s’est de asuta
Ma fut mascu de bragheta
E aximai cabau m’at guta.

S’ainu
Totu impari-truu, mobenti-!
Sa carreta seu tirendu
Incrubau ascurtendu
Is injurias de sa genti.
Coru
Iih..oh…
Sentz’e lagna seu po crei
Ca de donnya animali
Fatubeni o fatu mali
Su prus tontu binti a mei.
Iih…oh…
Fortzis poita nò murrunju
Ki m’acapianta a sa moba
Ki nò mi onanta fa noba
O fa beça, po ingaunju.
Iih…oh…
Ki sia nasciu deficenti
A dd’amitti seu su primu
Po essi prusu nò mi stimu
Seu burricu, certamente!
Iih…oh…
Ma mi pongiu a domandai
A i ski bantanta intelletu
Cal’est s’omi ki deretu
Prus de mei scid’andai.
Iih…oh…
Jai ki est issu, e deu nò seu
Meri de sa libertadi
Ita faidi in sotziedadi
Prus de cantu nò fatz’eu?
Iih…oh…
Fatzau cointus un pogheddu
Cun su metru e sa mesura
Ki fait prusu arroga dura
Su corroxiu o su fueddu?
Iih… oh…
Kini cranciat, prus a duru
Kini prus est prepotenti
Ki est frabanciu e insolenti
Ki est prus s’omi o deu ki furu?
Iih…oh…
Ecu, basta! seu burricu
Totu interu, nò ddu negu
Ma ki conca m’indi segu
Sa de s’omi nò m’apicu.
Iih…oh…
Atra cosa potzu nai
Ma mi citu, ca esti in prusu
Tanti s’omi ballit dusu
Ainus maus a domai.
Iih…oh…

S’ambulanti
Ecu, allòddu, s’ambulanti
Donnya articulu esponendu
Su ki porta postu ananti
Totu craru est amostendu.
Cun su pretziu in donnya ogetu
Ddu esti scrita sa mesura
Pesu lordu e pesu netu
Po nò incurri in secatura.
In d’un nudda tanti genti
A sa tenda est acostàda
Ma nisçunu compra nienti
Feti castiada spantada.
Ddu at arengu, ddu at prosçutu
Scatulami e mortadella
Oll’e semi, pani e strutu
E donnya atra cosa bella.
Ma nò est cussu ki sa genti
Mirat fissa de continu
Solu bidi, stranamenti
Sentz’e pretziu un salaminu.
Nò si parrat cosa strana
Ki nisçunu fut comprendu
Po ki ddu essit fami e gana
Ca ndiat medasa caskendu.
Su silentziu parìat santu
Finu a candu una clienti
Fatu largu s’adi e spantu
Puru at fatu a tanti genti.
E dereta a s’ambulanti
Domandau dd’at salaminu
Narendiddi: “ndi ollu tanti”
Ki su pretziu nò est malinu.
S’ambula nti, jai sciendu
Ca su pretziu nò dd’iat postu
Dd’arrespundit:”seu bendendu
Totu interu asut’e costu”.
Sa clienti, meda pronta
Dd’at torrau:”deu dd’ollu totu
Ca sa menja tenju pronta
Cun su pratu buidu apòtu”.
E at sighìu:”beneus a patu
Prima de ddu ponni a pesu
Cument’est ddu pigu e fatu
Mancai pesit kill’e mesu”.
S’ambulanti… “e siada”, at nau
“dd’onu gratis, pigandeddu”.
Ma sa clienti, jai pigau
Dd’iada e postu in su scateddu.
Abarrada esti in mestitzia
Lamentendusi sa genti
E naranta:”ita injustitzia!
A issa tropu e a nosu nienti”.
Coru
Is ki agatanta ocasioni
Po salami specialmente
Nò ndi fainti distinzioni
Siat de procu o de mobenti.

Si saludu
Si saludu cara genti
E mi spollu sa berrita
Nemus olla ki mi çita
Ma gradessat ki ddu stenti.
Seu su sonu seu su cantu
De su tempus imbeçau
Prontu candu seu circau
Siat po gosu o siat pro prantu.
De s’edadi e’ su pilloni
Bivu in monti e bivu in pranu
Cresiasticu o profanu
Seu cand’ollu in sa cantzoni.
Mancai pagu allikidiu
Mi presentu ke gurrei
In s’origa ponju pei
Beni o mali sia arreciu.
S’adiosu
De forma umana e prupasa spollau
Serrau in custa pedra, sbisurìu
Su carru lassu ki apu tirau
Lissia lissia in su caminu miu.
Sa morti ki timìa apu passau
E lompiu seu a su logu pedìu
De donnya miu parenti postu in contu
Ki nò tenit tramontu.
Scidai
Scidai! scidai!
Deu naru a totus:
“Scidai! scidai!”
Fadei ki nò s’agatidi in orvidu
Su mer’e domu, ca podit torrai
Ananti nostu sentz’e fai scidu.
E, benjat prima o apustis su cantai
Ki fait caboni, nò aspetti a buidu.
Timei po candu torrada, labài!
Deu ddu naru po totus:
“scidai! scidai!”

Poesia
Sa poesia nascidi in sa menti
De kini a coru tenit donnya cosa.
Intimu don’e gratzia trasparenti
Arti de intendi e narri armoniosa.
Frutu de beridadi cumbincenti
Manera de si esprimi virtuosa.
Sa poesia stadi in s’amostai
Su mellus modu de kistionai.
Su soneteddu miu
Su soneteddu miu nò sonat prusu
Prus nò fait gala in su divertimentu.
Est un poghedd’e tempus ki nò dd’usu
K’est torrau casi inutili strumentu.
Candu sonàda e fu’ me is froris susu
Insaras jai mi fadiat cuntentu!
Feti ki ddu toca’, parianta dusu
Foddis tirend e sonatoris centu!
Oh soneteddu miu, tui ca pomposu
Sa scala fusti bonu a fai currendu
Pigadì paxi e meritau riposu
Ca sesi stancu sempri stau sonendu.
Dromi, ca indietru a rinnovai su gosu
Torraus impari, mancai siat sonendu.
Torraus a candu fatu anti scalpori
Sonetu bellu e mellus sonadori.
Imui est beçu, tristu e deu ddu scusu
Ca nò nci at arrexioni de fai lamentu.
Ki fu’de nai ca nò nd’ia fatu abusu!
Ma in donnya festa nò perdìa momentu.
Ki butoni toca’, de basçu a susu
Prontu intendìa su melodiosu acentu
E, candu un petzu classicu sonada
Bemolles e diesis intonada.
Oh, sonetedu miu, tui ca pomposu
Sa scala fusti bonu a fai currendu
Pigadì paxi e meritau riposu
Ca sesi stancu sempri stau sonendu.
Dromi, ca indietru a rinnovai su gosu
Torraus impari, mancai siat sonendu.
Torraus a candu fatu anti scalpori
Sonetu bellu e mellus sonadori.
Bellu in cuntzertu e bellu in sinfonia
Feti fu’ durrutzosu a fai s’assolu
Però, ki a fai su trillu ddu ponìa
Beru pariada un grandu vardarolu.
Tempus de gosu fudi e allirghia
Sempri prexiaus e mai tristesa o dolu.
Fudi issu a mi portai de festa in festa
E deu fia sempri sonadori in testa.
Oh, soneteddu miu, tui ca pomposu
Sa scala fusti bonu a fai currendu
Pigadi paxi e meritau riposu
Ca sesi stancu sempri stau sonendu.
Dromi, ca indietru a rinnovai su gosu
Torraus impari, mancai siat sonendu.
Torraus a candu fatu anti scalpori
Sonetu bellu e mellus sonadori.

Su cantu
Su cantu s’assimbillada a su frori
Spontaneamenti in selva germogliau.
Sonu de boxi umana incantadori
De remotu vajitu originau.
Metzu congeniali annunciadori
De motivu dolenti e de prexau.
Antesignanu craru de espressioni
De donnya sentimentu e aspirazioni.
Coru
Cantu, tui ca conoscis donnya bia
E pois deretu a su coru arribai
Donasì sempri gosu e allirghìa
Bivi cun nosu e nò si mankis mai.
Su cantu est unu filu condutori
De su mundu a su deus collegau.
Generosu, fedeli educadori
Meravigliosamenti cunsacrau.
Est issu ki fait s’omi cantadori
Ca nascit de su scramiu acumpanjau.
In su cantu s’agatat po diletu
Su cumpanju prus dinnyu de rispetu.
Su cantu est nobilissimu cultori
Studiosu in donnya lingua e cuncordau
Solenni, universali narradori
De fatus e de storias indrollau.
Fonti de joia viva e de fervori
Artefici de beni insuperau.
Infinis, est su cantu, po modellu
De musica su prus acentu bellu.

Su metru segau
Credia de mesurai
Cant’est longa sa vida
Ma sa moti est benida
Su metru a mi segai.
Portat sa faci scura
E su fronti arrunzau
Pariat su mundu mau
Mirendu cun tristura.
Fatu m’adi a cumprendi
Ca nò serbiat mesura
Poita cun pagu cura
Megaus sa vida e spendi.
Ammosta m’at sa serra
Totu insanguentada
Si biat ca fut secada
Torrednu de una gherra.
Arrenegada andendu
Mancai a pagu gana
Genti maladia e sana
Prim’e s’ora bocendu.
Sa genti a curri avesa
Nò dd’ollit biri firma
Tanti dda tzerriat prima
De lompi a sa becesa.
Dd’ollinti in monti o in pranu
Su vitziu, su velenu
In makina, in su trenu
In mari e in s’ariopranu.
In vida m’at lassau
Po curri a un atru logu
Lassendumì s’arrogu
De su metru segau.

S’occidroxiu
(monodia e coru mudu)
Seddori in s’occidroxiu
Tristu m’ad ammostau
Ossus bius sentz’e croxiu
Prenus de prantu acorau.
Tristu m’ad amostau
Pamp’e fogu tenendu
Fogu ki adi spaçau
Tanti mamas prangendu.
Pamp’e fogu tenendu
Ki Aragona at bitiu
In terra sarda intrendu
Po bocì a fradi miu.
Ki Aragona at bitiu
Contr’a sa genti nosta
Po fai de sangui un riu
Currendu sentz’e sosta.
Contr’a sa genti nosta
Totu de ferru armau
Su nemigu in batosta
Lutu mannu at lassau.
Totu de ferru armau
Trista e crudeli gherra
De su sangui versau
Esti arrubia sa terra.

Su mundu diferenti
Candu ancòra cuatr’annus nò tenìa
Donnya cosa mirà cun joia e spantu.
Bivendu in d’unu mundu m’intendia
Prenu de meravilia e de incantu.
Nò mancat nudda, a su ki cumprendìa
Fiat paradisu, festa totu cantu
In d’unu impari fatu de ugualis
Circundau de benis e idealis.
Ma postu fini a sa notzenti edadi
A ora a ora a bivi seu intrau
In mesu de s’umana sotziedadi
Cunfundiu, disconnotu e ingannau.
E tristu megu e bii sa beridadi
In custu mundu mali governa
Postu in manu de genti presuntuosa
Malina, disonesta e vitziosa.
Deu credia in s’amori tra sa genti
In s’onestadi, in sa justitzia vera
In su progresu sanu e inteligenti
In sa cuscientzia, bona consillera.
Sa cresia bia, cristiana veramenti
E onorada sa paxi verdadera.
Ma oi m’abarrat pagu beni a crei
Ki faba nò esti a si brullai de mei.

S’urtimu animali
(sa benida de s’omini)
Su sturru ancòra, nò si fiat sapìu
Ca jai fut s’omi in custu mundu intrau
E candu asut’e is ogus sidd’at biu
A fiskiai s’est postu, avabotau.
Su stori, ascurtendiddu infastidiu
De s’aria in totu pressi nd’est cabau
E postu de su sturru a pagu tretu
Dd’at nau: “citi su fiskiu e stai kietu.
Ita acusas ofesa o timoria
O po fura ti megas de kesçai”?
Su sturru adi arrespostu: “in vida mia
Apu biu tanti cosas de spantai
Ma una arràna strantaxa nò credia
Caminendu in s’arruga de agatai.
Est animali custu o atru scis tui
Ki siat de mama o aprobiau de innui”?
Arrespundit su stori: “a su ki biu
Sa figura ti ponit turbamentu
Ma su ki est issu naru e su ki scìu
Ki tui stasi a m’ascurtai atentu.
Custu est s’omi, de nosu agòa benìu
Turbadori de s’ordini e s’assentu.
Mancat de còa, diversu de is ugualis
E si fait rei de totu is animalis”.
Su sturru dd’at torrau: “mi parit grai
Ki s’omi dd’atzetaus cumpangiu nostu
Jai ki ddi nas beniu po cumandai
Candu nemus a capu dd’at prepostu.
Tocada a nosu a si preocupai
Nò arribidi a fai mali a donnya costu.
Jai sa figura sua mi fait dudosu
E prus ddu biju e creu perigulosu”.
“Su ki pretzisas tui”, at nau su stori
“Dd’apu postu deu puru in pensamentu.
Ki s’omi (po fai sù) perdit valori
A nisciunus de nosu fait cuntentu.
Si fatzat capu o rei o imperadori
Nò stadi a nosu s’incoronamentu
Feti, ki bieus ca faidi opera sconça
Fiskiaddu tui ca deu ddu pisciu a conca”.