LAVORÂ PAR VIVI O VIVI PAR LAVORÂ? - Pprg.Infoteca.It

Comun di Basilian
Concors di poesie in lenghe furlane
emozions di ingjustri
I edizion
LAVORÂ PAR VIVI
O
VIVI PAR LAVORÂ?
Poesiis sieltis

Fernando Gerometta
Pseudonimo: Ros di buinore
Vito d’Asio (PN)
I Classificato
DOI BRAZ E UN OM
Vuìa in cercjarài noma un tic
dal plat dal orloi, di timp
cussì taront, una ligna di menta, un secont
Spietarai ch’a i sbrissi un cuc a chê sbrindula di rita
lassarai scori bondanta l’aga dal flum, par lavâmi la musa
gjeneruas al sarà il gno prin cucâ sul mont, grant coma il cêl
Impiarai il sotridi tal borest dal ros di bunora, e
dopodimisdì lassarai scuacarâ il soreli
No nivula il gno fladâ ma caligo lisiar
Su novantatria cjamps di blava, enfra i sorgjai
alt fin a la tacadura da la prima panola
vos mostrarai cjamps di pomârs imbeletâts
Dret il braç, coma ch’al fasarès un re
da la çampa, bel planc, fin a la dreta
la man sveada apenas
La curnìla cun dut ch’a è rauca a cjantarà par me a plen bec a la vita
Fasarài scjampâ la bolp tirantji davôr il côr
Il lât il gno pensâ, i svuitz da la truta las mes intuizions
I salts da la bilita a i pandaràn il gno amôr
Lassarai ducj a bocja vierta cul salt da la crota
Dal nuja al nuja, culùar ch’al torna culùar
Il ton al sarà il puin sul desc par chesta me invenzion
Judadas a cjapâ il soreli dut il dopodimisì, las rosas
sarài cussì strac co en il bosc al restarà un lamp cença fladâ
E no verài da vergognâmi a restâ incjantât e fer
so par câs ves da incuintrâ una lipara
o una gargiona sentada a clucjâ
o un muruas ch’al deventi ros
cuintra il cêl
di soreli a mont.

Giancarlo Pontoni
Pseudonimo: Spoon river
Variano di Basiliano (UD)
II Classificato
QUI GIACE MENI “MENON”
CAVALIERE DEL LAVORO
Gran lavoradôr, diseve la int.
Al veve lavorât dì e gnot
Tant che il cavalîr
Ch’al file la sô galete
par sierâsi e lì murì bessôl.
Intant fûr il soreli tal cîl,
il mar e lis montagnis;
il to pais, la int, i amîs
e l’amôr
a jemplin il cûr da int:
par fâle vivi.
Come il respir al jemple i polmons:
Par fânus esisti.
Beat cui che al po scrivi su la sô lapide:
la muart a fâs part da vite:
o ai vivût, prime di murî.

Roberto Tosoratti
Pseudonimo: Tan Caran
Plaino di Pagnacco (UD)
III Classificato
CARANTAN
Ce voie ch’o ai di vêti
Ma tu sês simpri lontan,
e o soi stufe di no vioditi
intant che tu ingrumis un carantan.
O stoi bessole a spietâti
o a spietâ une cjarace
E intant no sta maraveâti
So deventi dure cun me stesse,
e ce che mi mancje di plui
a son cjarecis, no pan e fasûi.
Cjapâ beçs par vivi miôr
e smenteâsi intant di vivi,
tu âs lavorât tant al è siguûr
ma nol è chest che jo o cirivi.
Ducj chei beçs che tu âs tirât sù
a son ducj in cheste stanzie
jo no ju dopri se no tu sês tu
E no àn chê grande impuartance.
Viodût che bessole cence pensâ sù
No vevi te e o ai fat istès cence
Ce biel regâl in chescj pôcs dîs
Che tu mi dâs ancje se no tu crodis.
E je une setemane ch’o polsìn
E ch’o vivìn a plen ogni moment.
E tu, tu mi cjalis e tu stâs disint
Di perdonâti pal to no stâ in ferment.
Varessio par cheste setemane
Di perdonâti parcè che no tu âs rindût?
Ma jo ti dîs che je stade umane
E la plui biele ch’o ai vivût.

Luigino Concina
Pseudonimo: Niniconi Glauco
Basiliano (UD)
Segnalato
LAVORÂ PAR VIVI O VIVI PAR LAVORÂ:
IL TIMP DAI LAVÔRS E IL TIMP DES FIESTIS
Con che un ûl lavorâ
al à simpri ce mangjâ
cuant che a è sere “Ohi ce strache!”
e ognun di nô lu sa.
Tropes voltes si sint dî
come cuant che un al mûr:
“Che persone tal lavôr
e meteve ancje el cûr”.
La sô vite consumade
tal lavôr fat cun passion
e dut chist a ti apaghe
e ti da sodisfazion…
Ma il lavôr di une persone
a rispiete la cuscienze
che ven prin di ogni robe
comprendude ancje la scienze.
E insomp de setemane:
“Ferme, polse, cjape flât”
E je simpri une domenie
par chel Dio che ti à creât.
E ancje la famee:
la tô femine, i toi fîs,
pal lavôr no trascuraju:
tu larâs in Paradîs.
Inte vite e intal lavôr
si cir simpri alc di miôr
ma savesi contentâ,
je la vie di imparâ.

Olga Cossaro
Pseudonimo: Caliber
Flumignano di Talmassons (UD)
Segnalata
PARENZIS
Ta chest aiar cisichin
vuê mi pâr di sintî
il torment dal glerein
sot il pas riscjelât dal so baston
e il cricâ di chei cuatri vues in crôs
ta la polse da la fieste cirî pâs
“Perdonaitmi Signôr, dibant jo no pues stâ”
Ta chest lusôr di veri
mi pâr di viodi vuê
che sô muse ruspiose
la brustulide piel di contadin
disfate dal soreli di misdì
e il pas il timp sul cjamp segnâ al falçut
“Laudât che al sei il Signôr, che nus dei di lavorâ”
Ta chest odôr di bon
propit vuê mi pâr che il nono
il pari di me pari
la ole dal prin mio savê
al sedi ancjemò ca
e mi sclope dentri il cûr
chel so impotent stâ fer
di là da fereade dal balcon
nemâl sciarât in scjaipule
roseât dal lent passâ
di che vore masse dure
“Signôr ce vitis… no dome par vivi”

Giacomina De Michieli
Pseudonimo: La lune tal poç
S.Odorico di Flaibano (UD)
Segnalata
CORI
Jenfri il tucâ dal orloi
il timp al passe,
il timp che dut al mude,
il timp che mai si ferme.
Dentri cheste suaze,
int di corse e malcuiete,
sicu furmiis cence padìn.
Si lavorie par vivi
oben si vivie par lavorâ?
Cori, cheste e je la condane
Pal om che no si contente,
che nol rive a vivi in pâs.
Om moderni che al dopre
argagns di ogni sorte,
imbarlumît dai lavôrs,
dai impegns e dai matets,
cuntun çurviel mai libar,
cuntun cûr mai seren.
Cori, di un scûr a che altri
e finalmentri…
la domenie par polsâ.
Utopie…
La domenie no je plui une zornade
Di fieste e tant mancul di preiere.
L’om di vuê, e à fate deventâ
come une femine di strade
che e rît svampide.

Francesco Fornasiero
Pseudonimo: Frans di Sàie
Rive d’Arcano (UD)
Segnalato
TIMPS DI LAVÔR E TIMPS DI FIESTE
“Al è nassût cu la cjamese”
a si dîs di un fortunât;
ma al è che ch’al tire la carete,
e chel che za siôr si è cjatât.
“Il lavôr al nobilite l’om
E lu rint simil a las besties”,
ma las besties, sono lades bessoles
sot la glove, o sono stades obleades?
Il timp dal lavôr l’è sacri,
come sacri al è il racolt
e dopo fa fieste di ringraziament,
ma cun dovizie e sintiment.
No l’è just vivi nome par lavorâ
E volê vê di plui di ce ch’al covente
Sei crumiros e vivi par ingrumâ,
e tancj puarets a scugnin lâ indenant a stente.
Fasìn sì fieste, par i regai ch’i vin
E ringrazìn il Signôr pe buine anade,
che i sorestans nus lassin alc intal tacuin,
e ca sei legre la serade.

Stefano Gasti
Pseudonimo: Bandul
Remanzacco (UD)
Segnalato
PAN E DIGNITÂT
Achì si steve cul nestri spolert a scjaldâ
cjants di fieste e sunôrs di dîs de vore
cul nestri cori a vore cul gamelin
cCul nestri vistît sborfinât mîl voltis.
dut chest e tant altri nol è nome finît
al è dismenteât daûr il volê grampâ
la glorie a bon presit, la gjonde cul tacuin
chê di corse, chê dal telecuiz.
Là si viôt la risulte clare
Une volte che strache e contente:
un grum di lens, un mûr
une piece di formadi
une cunvierie remenade
un rispiet contentât.
O no ise miôr chê
Che jemple la sachete
Cence cognossi imprescj
Ni risultât, ni fature
Che spiete un vincjesiet
Nome par studâ un mutui?
O scolti il dolôr vueit de mê int
A fermâ la buride te dismentie
In muse al timp cence cjalâ
Il cîl passût di siums crevâts
Sort a mans che clamin
a nulôr di tiere, aghe e fûc
vuarp a taulis plenis di pan e dignitât
contentansi di rudis ridadis
un nuie cjandit di gjonde.

Luigina Lorenzini
Pseudonimo: Côr di margarita
Pielungo (PN)
Segnalata
VIVI PAR LAVORÂ?
Ai stât a portai l’invît
A Margarita, a Dignan:
sacrabolt, soi vecja,
vecja e straca
e ài trentecinc agns.
Entrâ tun bar
e sintisi for dal mont
Cença pi voia da vivi
Mûrs ch’ai strengin il rispîr
Un peis grîs tor dal cuel
Ch’al cji ten scliçât jù.
Epur tu âs fat dut
ben, no tu âs pierdut timp, tu âs fat dut:
gjentîl cul paron
precîs sul lavôr
la spesa tal puest pi a bon presi
La ruba neta a suiâ.
Doman a è la Madona,
si fâs l’arbol di Nadâl.
Ma parcè no rivio fin in fonz
a tirâ flât,
parcè su l’asfalt las ruedas no sintes pi
la libertât,
parcè no mi ridei i vùai
lusinz e lisìars
coma a Margarita
tal bar?

Beppino Marinig
Pseudonimo: Vigj Ploe
Variano di Basiliano (UD)
Segnalato
TANTE FIESTE, PÔC LAVÔR
Cun gjachete e cun crauate, ben lustrade e sopressade
Dentri e fûr de ostarie se passave in ligrie.
Ven a dî e ven a stâi che sol lui no sbaglie mai
Ce che al dîs e ce che al fâs miei di lui no sono plui brâfs.
Tal poiâ malte e modon come lui no le nissun
Tal doprâ sul le plane no s’in cjate a fai le cane.
Brâf di molgi, semenâ, di cusî e di mendâ
Lis sôs oris te zornade jerin dut un lavorâ.
Ma un suspiet la cjapât vie a le int che lu scoltave
Masse timp in ostarie par contâle atôr pierdeve.
E cussì an capît dopo che tra i mûrs de privative
Il çurviel a sun di taces chei lavôrs al cumbinave.
Tant le vêr ch cjase sô par scovâ ‘ne fuee di tiere
Al sperave su Triest a mandâ un tic di Buere.
Tante fieste poc lavôr jere il cal ch’al veve intôr
Michelaç jere so pari, un bon fî nol va contrari.
E cumò se a vin di sielgi, jo no sai ce bande stâ
Il lavôr al plee le schene e la fieste fâs uçâ.

Ivano Miconi
Pseudonimo: Fur i bez
Tarcento
Segnalato
O CONTI
O conti i dîs
ch’o ai di stâ
ta chist paîs,
segnâts in ros
sul calendari
che mi à dât Bros,
ogni dì di mancul,
plui piçul il numar
di fâ il calcul
e cun Nadâl e feries
al vanze pôc,
son robis series
e o ai di saludâ i amîs
ch’o ai vût fin ca
e dal lavôr, ch’o ai,
mi fot e mi rondoli,
o dîs che non-n-di ai.
O cir di vivi vuê,
deventant vecjo
e je buine ogni dì
e volarès di zovin,
la pension,
par podê vivi ben
che se no ai dincj,
valin nie i bês
e o pensi ai vincj
e fan ch’o vevi,
gjoldi pôc e nie
che spindi no podevi
e cumò che spindi o pues,
i dincj e colin
e mi fasin mâl i vues.

Guerrino Novelli
Pseudonimo: Rugerino
Basiliano (UD)
Segnalato
LAVORÂ PAR VIVI CUASI DUCJ SCUEN
In Italie doi in dî
A lavorin par murî
La clamin muart blancje
E samee che a nissun impuarte
Ti cjape di pont in blanc cence cirîle
Tun moment di distrazion eo di fadìe
Par chest pratindin dai sorestans l’impegn
Lavorâ par vivi cuasi ducj scuen
Che doman, ti prein Signôr,
nissun muri pal lavôr.

Renato Pizzamiglio
Pseudonimo: Renassut
Vissandone di Basiliano (UD)
Segnalato
LAVORÂ
Mi soi sveât dibot, al cricà dal dî.
Mi soi dit: “Stâtu lavorant par vivi,
opur vivint par lavorâ ?”
Ce grant berdei!
Daspò ancje, mi soi rispuindût, sclet !
Al ven a stâi, un timp di lavorâ par vivi!
Un timp di vivi par lavorâ, judant chei altris!
Un timp par fâ fieste cun chel poc che si à vuadagnât
Ma a voltis valie la pene spacâsi la schene,
par vuadagnâ simpri di plui?
Opur al è ben dî: “Lassìn che fasin chei altris,
tant il mont al va indenant bessôl,
e jo o vîf distès!”
ma cumò che o soi ancje un poc vieli o pensi,
a ce tant lavôr fat onestamentri!
O varès podût forsit, vuadagnâ di plui,
ma mi contenti!
Parcè che cualchidun al à vût
Simpri alc mancul di me.
Cussì la grande gjonde e je,
il Grazie che mi disevin
a la fin da lis zornadis
vint finit il gno lavor
ta la grazie dal Signôr.
Cussì cumò al è rivât
il timp di finî di lavorâ par vivi
e il timp di finî di vivi par lavorâ!
E començâ il timp des fiestis
Par il timp che al restarà…

Fernando Gerometta
Pseudonimo: Ros di buinore
Vito d’Asio (PN)
I Classificato
DUE BRACCIA E UN…UOMO
Oggi ne assaggerò solo un poco
Dal piatto orologio, di tempo
Così rotondo, una perla di menta, un secondo
Aspetterò che scivoli (sfugga) un gheriglio allo scoiattolo bighellone
Lascerò scorrere abbondante l’acqua nel fiume, per lavarmi il volto
Generoso sarà il mio primo sguardo sul mondo, grande come il cielo
Accenderò il sorriso al braciere dell’aurora, e
Nel pomeriggio lascerò sia il sole a sbellicarsi dalle risa
Non nuvola il mio respiro ma bruma leggera
Su novantatrè campi di granoturco, fra le stoppie
Alta fino all’attaccatura della prima pannocchia
Vi indicherò frutteti imbellettati
Diritto il braccio, come farebbe un re
Da manca, lentamente, fino a dritta
La mano appena desta
La cornacchia, seppur rauca, canterà per me a pieno becco alla vita
Farò scappare la volpe lanciandole appresso il cuore
Il lago il mio pensare, i guizzi della trota le mie intuizioni
I salti della donnola sveleranno il mio amore
Lascerò tutti a bocca aperta con il salto della rana
Dal nulla al nulla, colore che ritorna colore
Il tuono sarà il pugno sul tavolo per questa mia invenzione
Aiutati ad abbronzarsi per tutto il pomeriggio, i fiori
Sarò così stanco che anche il bosco per un istante rimarrà senza respiro
E non dovrò vergognarmi di rimanere incantato, fermo
Se per caso dovessi incontrare una vipera
Oppure un innamorato che arrossisca
Rivolto al cielo
Del tramonto.